تازيون خبرون

Monthly Archives: January 2018

ياسرعرفات جي قتل لاء اسرائيل ڇا ڇا ڪيو؟ : شفيق الرحمان شاڪر

اڳوڻو اسرائيلي وزيراعظم ايريل شيرون 1980ع جي ڏهاڪي ۾ فلسطين لبريشن آرگنائيزيشن (پي ايل او) جي چيئرمين ياسر عرفات کي قتل ڪرائڻ لاء ايترو ته بضد هو جو هن مسافر هوائي جهازن  کي ڪيرائڻ جي منصوبابندي جي به منظوري ڏيئي ڇڏي هئي.اهو انڪشاف تازو نيويارڪ ٽائيمز جي هڪ مضمون ۾ ڪيو ويو آهي.

ليکڪ رونين برگمين  اسرائيل طرفان عرفات کي قتل ڪرڻ لاء سالن تائين کنيل قدمن  کي تفصيل سان بيان ڪيو آهي.پي ايل او اڳواڻ ڪيترن ئي بم حملن ۽ فوجي ڪاروائين باوجود معجزاڻي طور تي بچندو رهيو.انهن ۾ ڪجهه اهڙا حملا به رٿيل هئا جيڪي  ڳري انساني جانين جي نقصان واري امڪان سبب اسرائيلي انتظاميا روڪي ڇڏيا هئا.عرفات آخرڪار 2004ع ۾ 75 سالن جي عمر ۾ گذاري ويو.

برگمين جي رپورٽ مطابق هڪ ڀيري ايريل شيرون اسرائيلي ايجنسين کي حڪم ڏنو ته بيروت جي هڪ اسٽيڊيم جي وي آئي پي ايريا ۾ خطرناڪ قسم جا بم فٽ ڪيا وڃن جتي پي ايل او ڪو ڏينهن ملهائڻ لاء تقريب جو بندوبست ڪري رهي هئي.ڌماڪو ڪندڙ مواد نصب ڪرڻو هو ۽ صرف هڪ بٽن دٻائڻ جي دير هئي جو پي ايل او جي پوري قيادت تباهه ٿي وڃي.

پر اهو منصوبو ان وقت رد ڪيو ويو جڏهن اسرائيلي سينئر عملدارن ان وقت جي اسرائيلي وزيراعظم بيگن سامهون پنهنجن ڪيترن ئي  سخت تحفظات جو اظهار ڪيو.

هڪ ٻئي منصوبي ۾ شيرون انهن تجارتي هوائي اڏامن کي ڪيرائڻ جي باري ۾ سوچ ويچار ڪيو جن اڏامن ذريعي ياسر عرفات غيرملڪي دورن تي ويندو هو.مضمون مطابق صرف ٽي اسرائيلي اعليٰ عملدار ان منصوبي کان واقف هئا.

““ جڏهن موساد رپورٽ ڏني ته عرفات اڪثر ڪري پنهنجن ساٿين سميت عام تجارتي اڏامن ذريعي  فرسٽ ڪلاس يا بزنيس ڪلاس ۾ سفر ڪري ٿو ته شيرون انهن اڏامن کي قانوني طور تي نشاني تي رکڻ جو فيصلو ڪيو.منصوبو اهو جوڙيو ويو ته اهڙي جهاز کي سمنڊ جي مٿان ڪناري کان گھڻو پري ڪيرائجي ته جيئن جاچ ڪندڙن کي اها جاچ ڪرڻ ۾ گھڻو وقت لڳي وڃي ۽ اهو معلوم نه ٿي سگھي ته ان جهاز کي ڪنهن ميزائيل جو نشانو بنايو ويو يا اهو ڪنهن فني خرابيء ڪري تباهه ٿيو.   ان مقصد لاء اونهو پاڻي وڌيڪ مناسب ٿيندو جو اتان ڪنهن جي بچڻ جي ڪا اميد ئي نه رهندي.”

1982ع ۾ شيرون جيڪو ان وقت وزيردفاع هو هڪ هوائي جهاز کي ڪيرائڻ لاء مليٽري آپريشن جو حڪم ڏنو جنهن ۾ هڪ اطلاع مطابق ياسر عرفات پرڏيهه وڃڻ لاء سوار هو.اسرائيلي ايئر فورس اها ڪاروائي ڪرڻ واري هئي ته موساد انٽيليجنس سروس مزاحمت ڪندي معلومات ڏني ته ان جهاز ۾ عرفات نه پر سندس ڀاء فتحي  ۽ مسافرن ۾ 30 زخمي فلسطيني ٻارڙا شامل آهن.

برگمين مطابق ؛ “ ٻي جنگ عظيم کان پوء اسرائيل قتل ۽ نشانو بڻائي ماڻهو مارڻ ۾ ٻئي ڪنهن به اولهه جي ملڪ کان گھڻو اڳتي رهيو آهي. گھڻن واقعن ۾ صرف عام شهرين جي زندگين کي خطري ۾ وڌو ويو آهي. انتقام جي هڪ اونهي  ۽ معاف نه ڪرڻ واري سوچ جنهن ملڪ ۾ انهن بحثن کي جنم ڏنو آهي ته انهيء سوچ سان اسرائيل دنيا ۾ ڪيئن محفوظ رهي سگھندو؟”

هڪ اسرائيلي صحافي پاران ڪيل تازن انڪشافن بعد دنيا کي دهشتگرديء کان پاڪ ڪرڻ جي نام نهاد عالمي چڱن مڙسن کي انهن سوالن جا جواب به دنيا کي ڏيڻ گھرجن ته ڇا ڪو ملڪ بطور رياست دهشتگرديء جا طريقا اختيار ڪري سگھي ٿو؟ ڇا ڪو ملڪ معصوم شهرين کي ماري يا معذور بنائي به قومن جي صف ۾ هڪ رياست جي حيثيت حاصل ڪري سگھي ٿو؟انهن خوني ڪاروائين جي قيمت ڪير ادا ڪندو؟ ڏاڍ مڙسي ۽ انتقام جي دهشتگرد پاليسين جي ڪا حد به آهي؟ نيو يارڪ ٽائيمز جي ان مضمون ۾ برگمين ٻيون به ڪيتريون ئي ڇرڪائيندڙ ڳالهيون ڪيون آهن  جن اسرائيل جي چهري تان معصوميت،مظلوميت ۽ شرافت جا سڀ نقاب لاهي کيس دنيا جي خطرناڪ دهشتگردن جي صف ۾ آڻي بيهاريو آهي.

 

انصاف جا متظر ڪمند جا آبادگار…!

مل مافيا جي هڪ هٽي سبب ڪمند جا آبادگار تخت مشڪلاتن جي ور چڙهيل آهي، ڪجهه آبادگارن ته مل مالڪن جي هٺ ڌرمي سبب پنهنجي ڪمند کي احتجاجن باهه ڏئي ساڙي ڇڏيو ته ڪجهه وري احتجاج ۾ رڌل آهن ته جئين کين ڪٿان انصاف ملي سگهي.

سنڌ هاءِ ڪورٽ جي جسٽس عقيل احمد عباسي جي سربراهي ۾ ٻه رڪني بئنچ ڪمند جو اگهه مقررنه ڪرڻ جي خلاف توهين عدالت واري درخواست تي چيف سيڪريٽري سنڌ ۽ ايڊووڪيٽ جنرل سنڌ سميت ٻيا پيش ٿيا.  عدالت ڪمند  جي اگهه تي نئون اسٽي آرڊر جاري ڪري ڇڏيو آهي. عدالت سمورين ڌرين جي مشاورت سان ڪمند جو اگهه عارضي طور تي 160رپيا مقررڪري ڇڏيو آهي. عدالت ۾ چيف سيڪريٽري سنڌ چيو ته آبادگار هن ملڪ جا شهري آهن. هنن جي حقن کي به نظر ۾ رکيو وڃي. سنڌ سرڪار مناسب حل ڳولي. چيف سيڪريٽري سنڌ چيو ته پهرين سنڌ سرڪار کنڊ تي سبسڊي ڏيندي هئي. جڏهن شگر مل مالڪن جو موقف آهي ته اسان وٽ کنڊ جو پهرين کان ذخيرو موجود آهي. آبادگارن جي لاءِ قدم کڻي رهيا آهيون. سنڌسرڪار وڌيڪ سبسڊي ڏيڻ جي پوزيشن ۾ نه آهي .

شگرمل مالڪن جي وڪيل عبدالستار پيرزادو چيو اسان وڌ ۾ وڌ 155رپيا في مڻ ڪمند خريد ڪري سگهون ٿا، آبادگارن جي وڪيل چيو ته 162 رپيا اگهه جي اجلاس ۾ اسان کي آڇ ڪئي وئي آهي. جيڪا آفر ڪئي وئي آهي ان تي عمل ڪيو وڃي. عدالت چيو ته معاملو حل ڪرڻ چاهيون ٿا. اسان نٿا چاهيون ته شگرمل ۽ آبادگارن کي نقصان ٿئي. عدالت عارضي طور تي ڪمند جو اگهه 160 رپيا مقر رڪرڻ جو حڪم ڏيندي سنڌ سرڪار کي معاملو جلد حل ڪرڻ جي هدايت ڪري ڇڏي آهي. ياد رهي ته ان کان اڳ سنڌ هاءِ ڪورٽ جي جسٽس منيب اختر جي بئنچ 172ڪمند جو آگهه مقررڪيو هو ۽ 10 رپيا بطور سيڪيورٽي هاءِ ڪورٽ جي ناظر وٽ جمع ڪرڻ جو حڪم ڏنو هو. ان تي عمل نه ڪرڻ تي پاسماجي خلاف توهين عدالت جي درخواست داخل ڪئي هئي.

عدالت سڳوري هن ڀيري پنهنجي حڪم تي عمل ڪرائي ڪمند جي آبادگارن جن اڳ گهڻو ئي نقصان برداشت ڪيو آهي وڌيڪ نقصان ٿيڻ کان بچائيندي سندن پر گهور لهي ته جئين اڳتي آبادگار ڪمند جي پوکي ڪري سگهن ۽ مل مالڪن کي به آبادگارن جي مسئلن جو احساس ڪندي انهن کي مناسب اگهه ڏئي ڪمند خريد ڪن جئين آبادگارن جو ٿيل فصل تي خرچ به اڳڙي سگهي.

 

اسحاق ڊار جي دولت ۾ 16 سالن دوران 91 سيڪڙو اضافي جو انڪشاف

اسلام آباد ( ويب ڊيسڪ ) اڳوڻي ناڻي واري وزير اسحاق ڊار خلاف نيب ريفرنس جي ٻڌڻي آخري مرحلي ۾ داخل ٿي وئي آهي ۽ وڌيڪ شاهدن پنهنجا بيان قلمبند ڪري ڇڏيا آهن. آمدني کان وڌيڪ غير قانوني اثاثا ٺاهڻ جي ريفرنس ۾ اسحاق ڊار خلاف شاهدي ڏيڻ جو عمل آخري مرحلن ۾ داخل ٿي ويو آهي. نيب طرفان جمع ڪرايل 28 شاهدن جي لسٽ ۾ 18 جو بيان قلمبند ٿي چڪو آهي جڏهن ته عدالت 8 شاهدن کي بيان قلمبند ڪرائڻ لاءِ طلب ڪيو آهي. اڄ 26 شاهدن جا بيان قلمبند ٿي ويندا ۽ باقي 2 شاهد رهجي ويندا جنهن ۾ نيب جو جاچ آفيسر ۽ پاناما ڪيس جي آءِ جي ٽي جو سربراهه واجد ضياءَ شامل آهي.  اسلام آباد جي احتساب عدالت جي جج اسحاق ڊار خلاف آمدني کان وڌيڪ اثاثا ٺاهڻ بابت نيب جي ڪيسن جي ٻڌڻي ڪئي. عدالت ۾ فريادي ڌر جا 3 شاهد پيش ٿيا جن جا بيان قلمبند ڪيا ويا. شاهدن ۾ اقبال احسن، عمر دراز گوندل ۽ نيب جو آفيسر شڪيل انجم ناگرا شامل آهن. شڪيل انجم ٻڌايو ته جي آءِ ٽي جي رپورٽ حاصل ڪرڻ لاءِ سپريم ڪورٽ کي 10 ۽ 15 آگسٽ تي خط لکيا. هن سپريم ڪورٽ کي لکيل خطن جون ڪاپيون عدالت ۾ پيش ڪيون ته جج سوال ڪيو ته ڇا خطن جون اصل ڪاپيون توهان وٽ موجود آهن، شاهد شڪيل انجم چيو ته جي نه اصل سپريم ڪورٽ ۾ آهن، سپريم ڪورٽ واليم هڪ کان 9 تائين 3 ڪاپيون جڏهن ته واليم 10 جون چار ڪاپيون ڏنيون. فريادي ڌر جي ٻي شاهد اقبال حسن ٻڌايو ته ايڪسپرٽ ظفر اقبال جو بيان منهنجي موجودگيءَ ۾ قلمبند ڪيو ويو.  هن چيو ته جاچ آفيسر جي هدايت تي طلبي جو نوٽيس کڻي اسحاق ڊار جي گلبرڪ واري رهائشگاهه تي پهتس ته تي موجود پوليس ڪانسٽيبل ٻڌايو ته اسحاق ڊار اسلام آباد ۾ ترسيل آهي، ڪڏهن ڪڏهن هتي ايندو آهي، عمل نه ٿيڻ تي نوٽيس جاچ آفيسر حوالي ڪري ڇڏيا. ايف بي آر جي ڪمشنر ان لينڊ روينيو اشتياق احمد عدالت ۾ پنهنجو بيان قلمبند ڪندي چيو ته 1993ع کان 2009ع دوران اسحاق ڊار جي دولت ۾ 91 سيڪڙو ضافو ٿيو. هن چيو ته انڪم ٽيڪس جي گوشوارن موجب جون 1993ع ۾ اسحاق ڊار جي آمدني 7 لک 29 هزار کان وڌيڪ هئي جڏهن ته 2009ع ۾ سندس آمدني وڌي 4 ڪروڙ 64 لک 62 کان وڌيڪ ٿي وئي.

 

ٻارڙن جون فحش فلمون تيار ڪرڻ ۾ وچ پنجاب سڀ کان اڳتي آهي: ايف آءِ اي جو ڇرڪائيندڙ انڪشاف

لاهور (اين اين آءِ) ايف آءِ اي انڪشاف ڪيو آهي ته ملڪ ۾ ٻارڙن جون فحش (پورنو گرافڪ) فلمون ٺاهڻ ۽ سندن اگهاڙيون تصويرون انٽرنيٽ تي اپ لوڊ ڪرڻ جي معاملي ۾ پنجاب صوبو ٻين صوبن کان اڳتي آهي، بي بي سي جي رپورٽ موجب قصور ۾ معصوم ٻارڙين سان جنسي ڏاڍائي ۽ انهن کي قتل ڪرڻ جا واقعا اڳيان اچڻ کانپوءِ ايف آءِ اي جي ڊي ٻارڙن جي جنسي تشدد تي ٻڌل فلم ٺاهيندڙن خلاف هڪ ٻن ميمبرن تي ٻڌل ٽيم جوڙي آهي جيڪا ملڪ ۾ اهڙن واقعن کي روڪڻ لاءِ قدم کڻندي، ايف آءِ اي جي عملدارن جو چوڻ آهي ته ٻارڙن جون اگهاڙيون فلمون ٺاهڻ جي حوالي سان هن وقت تائين جيڪي هڪ درجن کان وڌيڪ ڪيس داخل ڪيا ويا آهن انهن مان گهڻا پنجاب ۾ ٿيا آهن ۽ گرفتار ماڻهن جي اڪثريت جو تعلق به پنجاب جي مختلف شهرن سان آهي، ٻن ميمبرن تي ٻڌل ٽيم جي سربراهه عمران حيدر بي بي سي کي ٻڌايو ته ان ڏس ۾ پاڪستان ٽِيليڪميونيڪشن کانسواءِ مقامي ماڻهن کان به مدد ورتي ويندي، اهڙن ماڻهن کان پڇاڳاڇا ڪئي ويندي جيڪي انٽر نيٽ تي مختلف ڇوڪرين جون فحش تصويرون انٽرنيٽ تي اپ لوڊ ڪرڻ جي الزام ۾ گرفتار ڪيا ويا آهن ۽ اڄ ڪلهه ملڪ جي مختلف جيلن ۾ قيد آهن، هن چيو ته ٻارڙن جي جنسي تشدد جي مواد خلاف پاڪستان ۾ موثر ڪارروائي نه ٿي سگهي آهي ڇو ته هتي متاثر ماڻهو لاڳاپيل عملدارن کي ان بابت شڪايت داخل نٿا ڪرائين، هن چيو ته جن ماڻهن جي خلاف ڪارروائي ڪئي وئي آهي انهن مان اڪثر ڄاڻ مختلف ملڪن مان انٽرپول جي ذريعي پاڪستاني انٽرپول ڏانهن موڪلي وئي هئي، پاڪستان ٽيليڪميونيڪشن اٿارٽي به ان ڏس ۾ هڪ خاص سيل قائم ڪيو آهي جيڪو انٽرنيٽ تي ٻارڙن جون اگهاڙيون تصويرون اپ لوڊ ڪندڙن جي نشاندهي ڪندو ۽ ان معلومات جي روشني ۾ ايف آءِ اي جو سائبر ڪرائيم ذميوارن خلاف ڪارروائي ڪندي، ايف آءِ اي حڪومت کي درخواست ڪئي ته اها اهڙن ڏوهن ۾ ملوث ماڻهن جي فيس بڪ آءِ ڊي جي فوري معلومات حاصل ڪرڻ لاءِ لاڳاپيل عملدارن سان ڳالهائي، ڇو ته ان ڏس ۾ معلومات حاصل ڪرڻ لاءِ جاچ ڪندڙن کي 4 کان 6 هفتن تائين انتظار ڪرڻو پوي ٿو، جيڪي اهڙن ڪيسن کي مڪمل ڪرڻ تائين دير جو سبب بڻجن ٿا، پاڪستان ۾ جن ماڻهن خلاف ڪارروائي ڪئي وئي آهي انهن ۾ اڪثر پاڪستاني ٻارڙن جي اگهاڙي فلم جي تيارين يا اپ لوڊ ۾ ملوث آهن، عمران حيدر ٻڌايو ته پاڪستاني ٻارڙن جون اگهاڙيون تصويرون ۽ فلم انٽرنيٽ تي وڪرو ٿي رهيون آهن ۽ ٽيم جا ميمبر انهن جي ڳولا ڪري رهيا آهن جيڪي ان ڌنڌي ۾ ملوث آهن، هن چيو ته اطلاعن موجب اهڙن ڪيسن ۾ جيترا ماڻهو گرفتار ڪيا ويا آهن انهن مان گهڻي ڀاڳي پڙهيل لکيل ۽ پروفيشنل ڊگري هولڊرز آهن، ايف آءِ اي تازو ئي انٽرپول ڪينڊا مان مليل ڄاڻ جي مدد سان جهنگ جي رهواسي تيمور مقصود کي ٻارڙن جي پرونو گرافي تي ٻڌل وڊيوز ۽ تصويرون رکڻ ۽ انٽرنيٽ تي جاري ڪرڻ جي الزام ۾ گرفتار ڪيو آهي.

 

جولاءِ ۾ عام چونڊون ٿينديون، ايندر حڪومتون به ترقي جي تسلسل کي برقرار رکنديون: وزير اعظم

گوادر (اين اين آءِ) وزيراعظم شاهد خاقان عباسي چيو آهي ته گوادر پورٽ ۽ فري زون جي تعمير سان بلوچستان سان گڏوگڏ پاڪستان ترقي جي رستي تي هلي پوندو سي پيڪ منصوبو سڄي خطي لاءِ گيم چينجر آهي فري زون کان سواءِ ڪابه بندرگاهه فائديمند ثابت نٿي ٿي سگهي گوادر پورٽ، گوادر فري زون، ايڪسپريس ويز، موٽر ويز ۽ ريلوي جي ترقي جي منصوبا گوادر، خنجراب ۽ پشاور کي ڪراچي سان ملائيندا بلوچستان جو مستقبل بلوچستان جي سياسي قيادت جي هٿ ۾ آهي بلوچستان جي قيادت آڏو پيش ايندڙ چئلينجز و حل پاڻ ڪڍڻو پوندو وفاقي حڪومت ان ڏس ۾ معاونت فراهم ڪندي گوادر کي جديد شهر بنائڻ ۾ رنڊڪون ته پيش اينديون ان سلسلي ۾ گوادر ڊيولپمينٽ اٿارٽي ۽ بلوچستان حڪومت کي پنهنجو موثر ڪردار ادا ڪرڻو پوندو برابر پاٽنرشپ تي ٻڌل پئڪيج سان گڏوگڏ هڪ ٻيو پئڪيج ڏنو ويندو جنهن ۾ نصف فنڊنگ وفاقي ۽ نصف صوبائي حڪومت فراهم ڪندي پاڪستان مسلم ليگ (ن) ترقياتي منصوبن کي سياسي تبديلي کان الڳ ڪري ڇڏيو آهي جولاءِ ۾ عام چونڊون ٿينديون يقين آهي ته ايندر حڪومتون به ترقي جي تسلسل کي برقرار رکنديون سومر تي وزيراعظم شاهد خاقان عباسي بٽڻ دٻائي انٽرنيشنل گوادر ايڪسپو جو باقاعده افتتاح ڪري ڇڏيو آهي تقريب ۾ بلوچستان جو گورنر محمد خان اچڪزئي وفاقي وزير جعفر اقبال، سڌسماءَ جي وزير مريم اورنگزيب پرڏيهي شخصيتون سفارتڪار ۽ مختلف ملڪن سان تعلق رکندڙ ڪاروباري شخصيتون ۽ اعليٰ سول ۽ عسڪريت شخصيتن شرڪت ڪئي ٻن ڏينهن واري بين الاقوامي نمائش ۾ پرڏيهي شخصيتون پرڏيهي سفير ۽ سڄي دنيا مان تاجر نمائندا شريڪ ٿيا فري زون کان سينٽرل ايشيا سميت دنيا جي مختلف هصن تائين واپار کي هٿي ڏني ويندي ذريعي مطابق هي نمائش سيڙپڪاري، روزگار جي موقعا وڌائڻ ۽ تجارتي سرگرمين کي هٿي ڏيڻ لاءِ مقامي ۽ پرڏيهي ڪاروباري شخصيتون سيڙپڪارن ۽ سرڪاري عملدارن کي ملاقات جو هڪ پليٽ فارم فراهم ڪندي جنهن سان هن وڏي منصوبي جي ثمرن مان فائدو ورتو ويندو. نمائش جو اهتمام گوادر جي ترقياتي ادارا ۽ چين جي بيروني ملڪ بندرگاهن بابت معاملن جي انتظامي ڪمپني گڏيل طور تي ڪيو ويو. تقريب کي خطاب ڪندي وزيراعظم چيو ته گوادر ۾ ته پهرين ٻن ڏينهن واري بين الاقوامي نمائش ۽ فري زون جو افتتاح ڪندي کيس گهڻي خوشي ٿي رهي آهي اڄ چين جي صدر شي جن پنگ ۽ اڳوڻي وزيراعظم محمد نوازشريف جي ويزن کي حقيقت جي شڪل ڏيڻ جو ڏينهن آهي پاڪستاني ۽ چيني قيادت جو ويزن اڄ هڪ حقيقت بڻجي چڪو آهي اسان جي لاءِ اها خوشي جي ڳالهه آهي جو سي پيڪ چيني قيادت جي هڪ خطي هڪ شاهراه جو سڀ کان وڏو عملي منصوبو آهي جيڪو حقيقت جو روپ اختيار ڪري چڪو آهي هي صدر شي جن پنگ جو موجوده ۽ ايندڙ نسلن لاءِ هڪ اهم تحفو آهي وزيراعظم چيو ته پاڪ چين اقتصادي راهداري مالياتي موزونيت ۽ ماحولياتي پائيداريت جي اصولن تي ٻڌل ۽ مون کي اميد آهي ته انهيءَ اصول تي عمل ڪري نه صرف پاڪستان پر خطي جون ضرورتون پوريون ٿي سگهنديون. وزيراعظم گوادر پورٽ ۽ فري زون جي تعمير ۾ چيني حڪومت چيني ڪمپني گوادر پورٽ اٿارٽي ۽ بين لاڳاپيل ادارن جو شڪريو ادا ڪندي چيو ته هي هڪ اهڙو منصوبو آهي جنهن نه صرف بلوچستان پر پاڪستان به ترقي جي شاهراه تي هلي پوندو پاڪستان مسلم ليگ (ن) ترقياتي منصوبن کي سياسي تبديلين جي عمل کان الڳ ڪري ڇڏيو آهي. تقريب کي احسن اقبال، عبدالقدوس بزنجو، مير حاصل خان بزنجو ۽ چيني سفير ياهوجنگ پڻ خطاب ڪيو.

 

ڪراچي ۾ ايندڙ مهيني کان نيون مسافر بسون هلائڻ جو اعلان

ڪراچي (اين اين آءِ) سنڌ جي وڏي وزير سيد مرادعلي شاهه شهرين لاءِ سٺي خبر ٻڌائيندي ايندڙ مهيني کان نيون مسافر بسون هلائڻ جو اعلان ڪيو آهي هن چيو ته شهر ۾ ٽرانسپورٽ جو مسئلو هر صورت حل ٿيڻ گهرجي جڏهن ته روڊن جو ڄار به بهتر ٿي رهيو آهي اها ڳالهه هن سومر تي وزيراعليٰ هائوس ۾ انٽراسٽي ۽ انٽرسٽي بس منصوبي تحت اجلاس جي صدارت ڪندي ڪئي اجلاس ۾ مير هزارخان بجاراڻي سيد ناصر شاهه چيئرمين پي اينڊ ڊي محمد وسيم سنڌ جي وڏي وزير جو پرنسپل سيڪريٽري سهيل راجپوت سيڪريٽري ٽرانسپورٽ سعيد اعواڻ ۽ ٻين اعليٰ عملدارن شرڪت ڪئي اجلاس ۾ انٽراسٽي ۽ انٽر سٽي بس منصوبي تي غور ڪيو ويو وڏي وزير چيو ته سنڌ حڪومت انٽراسٽي منصوبي لاءِ سنڌ مضاربا لميٽيڊ کي ڏنا هئا جنهن جي ذريعي هو سبسڊي ڏيئي سگهي ٿو شهر ۾ ترانسپورٽ جو مسئلو هر صورت ۾ حل ٿيڻ گهرجي هاڻي ته روڊن جو ڄار بهتر ٿي رهيو آهي سيد ناصر حسين شاهه وڏي وزير کي بريفنگ ڏيندي ٻڌايو ته سبسڊي لاءِ سنڌ حڪومت ۽ سنڌ مضاربا لميٽيڊ وچ ۾ معاهدو ٿي چڪو آهي پاليسي تحت صرف مقامي گاڏين کي سبسڊي ملي سگهي ٿي ۽ منصوبي تحت بسن کي هلائڻلاءِ ٽرانسپورٽ کاتي ۽ حڪومت جو 15 سيڪڙو حصو آهي جڏهن ته 70 سيڪڙو قرض تي ميسر آهي هن وڌيڪ ٻڌايو ته ڊائيو ڪمپني 288 بسون پنج روٽن تي هلائڻ لاءِ اڇ ڪئي آهي جنهن ۾ قيوم آباد کان قصبا ڪالوني بلديه کان قائدآباد، شاهه فيصل ڪالوني کان فشريز لانڍي کان سرجاني ۽ لانڍي کان بلديه تائين شامل آهن ٽرانسپورٽ جي وزير ٻڌايو ته سنڌ جي ٽرانسپورٽ کاتي ڊائيو کي 32 بسون شاهراه فيصل تي هلائڻ جي آڇ ڪئي آهي وڏي وزير منصوبي لاءِ وڌيڪ ساڍا 25 ڪروڙ رپيا منظور ڪندي ٽرانسپورٽ واري وزير کي هدايت ڪئي ته 15 ڏينهن اندر ڪراچي ۾ شاهراه فيصل تي بسون هلندي ڏسڻ چاهيان ٿو ۽ حڪم ڏنو ته ايندڙ 30 ڏينهن ۾ شاهراه فيصل تي نيون بسون هلڻ گهرجن جنهن تي ٽرانسپورٽ واري وزير چيو ته اسان ڪوشش ڪنداسين ته بسون هلڻ شروع ٿي وڃن سيد ناصر شاهه پڪ ڏياري ته هي بسون 15 فيبروري کان هلڻ شروع ڪنديون ٽرانسپورٽ واري وزير اجلاس ۾ بريفنگ ڏيندي چيو ته انٽرسٽِي بسن لاءِ ڊائيو آڇ ڪئي آهي ۽ نون روڊن تي 134 بسون هلايون وينديون انهن روٽن ۾ ڪراچي، حيدرآباد، ڪراچي سکر، ڪراچي ميرپورخاص، ڪراچي لاڙڪاڻو، ڪراچي بينظيرآباد ڪراچي ملتان، ڪراچي ڊيرا غازي خان، ڪراچي ڪوئيٽا ۽ سکر ڪوئيٽا شامل آهن. اجلاس ۾ بي آر ٽي ايس عبدالستار ايڌي لائين اورنج لائين تي به ڳالهه ٻولهه ڪئي جنهن تي سنڌ جي وڏي وزير کي بريفنگ ۾ ٻڌايو ته هي راهداري منصوبو 3.88 ڪلوميٽر ڊگهو آهي جنهن تي 6 بسون هلنديون اورنج لائين منصوبي جو پئڪيج هڪ، ٽي ايم او اورنگي ٽائون کان وٺي باچاخان فلائي اوور آهي جنهن تي ڪم ٿي رهيو آهي هن منصوبي جي لاڳت 643.35 آهي ۽ 42 سيڪڙو اڳڀرائي ٿي چڪي آهي جڏهن ته بيو پئڪيج باچاخان فلائي اوور کان وٺي جناح يونيورسٽي فار وومين تائين آهي جيڪو 2.50 ڪلوميٽر ڊگهو آهي ۽ ان تي 496.768 ملين لاڳت ايندي منصوبي تي 25 سيڪڙو ڪم ٿي چڪو آهي.

 

سينيٽ جي چونڊن لاءِ پولنگ 3 مارچ تي ٿيندي: اليڪشن ڪميشن شيڊول جاري ڪري ڇڏيو

اسلام آباد (اين اين آءِ) سينيٽ جون چونڊون 3 مارچ تي ٿينديون جن لاءِ اليڪشن ڪميشن شيڊول جاري ڪري ڇڏيو اليڪشن ڪميشن آف پاڪستان جي شيڊول مطابق رٽرننگ آفيسر 3 فيبروري 2018 تي پبلڪ نوٽيس جاري ڪندو جنهن جي ذريعي اميدوارن کي نامزدگي فارم حاصل ڪرڻ وٺڻ ۽ جمع ڪرائڻ بابت آگاهه ڪيو ويندو نامزدگي فارم 4 فيبروري کان 6 فيبروري واسطيدار رٽرننگ آفيسرن جي آفيس ۾ آفيس جي وقت ۾ جمع ڪرائي سگهبا نامزدگي فارمن جي جاچ پڙتال 9 فيبروري تائين مڪمل ڪئي ويندي اميدوارن جي لسٽ 15 فيبروي تائين جاري ڪئي ويندي جڏهن ته نامزدگي فارم 16 فيبروري تائين واپس وٺي سگهبا سينٽ جي چونڊن لاءِ پولنگ 3 مارچ 2018 تي ٿيندي اليڪسن ڪميشن مطابق سنڌ ۽ پنجاب مان 12،12 سينيٽر، خيبرپختونخواهه ۽ بلوچستان مان 11،11 سينيٽر چونڊيا ويندا اسلام آباد مان هڪ جنرل ۽ هڪ ٽيڪنوڪريٽ جي سيٽ تي چونڊ ٿيندي جڏهن ته سنڌ  ۽ پنجاب ۾ 7 جرنل، 2 ٽيڪنوڪريٽس، 2 عورتون ۽ هڪ اقليتي ميمبر جي چونڊ ٿيندي اليڪشن ڪميشن مطابق فاٽا مان چئن سيٽن تي چونڊ ٿيندي ۽ چار ئي جرنل سيٽون آهن.

 

ڪنهن ڏينهن خوشخبري ملندي اسان پنهنجو سٽنٽ تيار ڪيو آهي: چيف جسٽس

اسلام آباد (اين اين آءِ) سپريم ڪورٽ ۾ غير معياري اسٽنٽ پاڻمرادو نوٽِيس جي ٻڌڻي دوران اها ڳالهه اڳيان آئي ته جون کان پاڪستان ۾ دل جا اسٽنٽ تيار ڪرڻ وارو ڪم شروع ٿي ويندو جنهن جي قيمت به پرڏيهي اسٽنٽ کان ڪافي گهٽ هوندي، سومر تي چيف جسٽس جي سربراهي ۾ سپريم ڪورٽ جي 3 ميمبرن تي ٻڌل بينچ غير معياري اسٽنٽ پاڻمرادو نوٽيس ڪيس جي ٻڌڻي ڪئي، ايڊيشنل اٽارني جنرل رانا وقار عدالت کي ٻڌايو ته مارڪيٽ ۾ 70 هزار ۾ دستياب اسٽنٽ هڪ لک 10 هزار ۾ وڌو وڃي ٿو، چيف جسٽس پڇاڻو ڪيو ته اها خوشخبري ڪڏهن ملندي ته پاڪستان به دل جو اسٽنٽ تيار ڪري ورتو آهي، نيشنل يونيورسٽي آف سائنس اينڊ ٽيڪنالاجي (نسٽ) پاران پيش ٿيل ڊاڪٽر مرتضيٰ چيو ته اميد آهي ته پاڪستان به پنهنجو اسٽنٽ تيار ڪري وٺندو، چيف جسٽس پڇاڻو ڪيو ته اسٽنٽ جي قيمت ڇا هوندي، ڊاڪٽر مرتضيٰ جواب ڏنو ته پاڪستاني اسٽنٽ جي قيمت 15 هزار رپيا هوندي، چيف جسٽس چيو ته ڪوشش ڪريو ته جان کان اڳ اسٽنٽ مارڪيٽ ۾ اچي وڃي، ڪوشش آهي ته عام ماڻهو کي صحت جون سستيون ۽ سٺيون سهولتون ملن، غريب ماڻهو اسٽنٽ خريد ڪرڻ لاءِ ڪٿان ڪٿان پيسا وٺندو هوندو، مريض جي مجبوري مان فائدو وٺڻ استحصال آهي، چيف جسٽس چيو ته خبر پئي آهي ته هڪ لک وارو اسٽنٽ ٻن لکن ۾ وڌو وڃي ٿو، اهو يقين ڪيئن ٿيندو جنهن اسٽنٽ جي قيمت ورتي وئي هجي اهو ئي وڌو ويو آهي، خوشي ٿي رهي آهي ته 3 مهينن جي اندر اسان جو اسٽنٽ مارڪيٽ ۾ اچي ويو، جيڪڏهن مون کي دل جي تڪليف ٿي ۽ پاڪستاني اسٽنٽ وڌو ويو ته خوشي ٿيندي، ڏسون ٿا ته اسان جو اسٽنٽ مارڪيٽ ۾ اچڻ سان ڇا انقلاب اچي ٿو، چيف جسٽس چيو ته ڪنهن جي ڪمزوري ۽ بيماري مان فائدو وٺڻ جي اجازت نه ڏيندس، ان معاملي جو مڪمل رڪارڊ هئڻ گهرجي، مون کي رضاڪار گهرجن جيڪي اسپتالن جو دورو ڪري رپورٽ ڏين، چئن کان 5 ماڻهن کي بي نقاب ڪنداسين ته شيون بهتر ٿينديون، ميڊيا به اهڙين شين کي بي نقاب ڪري رهيو آهي، عدالت اسلام آباد جي 5 پرائيويٽ ۽ سرڪاري اسپتالن کي نوٽيس جاري ڪندي گذريل 3 مهينن ۾ وڌل اسٽنٽس ۽ قيمتن جي رپورٽ طلب ڪري ورتي آهي.

 

نواز شريف ۽ مريم نواز خلاف توهين عدالت جي درخواست ٻڌڻي لاءِ  منظور

اسلام آباد (اين اين آءِ) اسلام آباد هاءِ ڪورٽ اڳوڻي وزيراعظم نوازشريف ۽ سندس ڌيءُ مريم نواز جي خلاف توهين عدالت جي درخواست ٻڌڻي لاءِ منظور ڪري ورتي سومر تي اسلام آباد هاءِ ڪورٽ جي جسٽس عامر فاروق مدعي عدنان اقبال جي درخواست جي ٻڌڻي ڪئي جنهن ۾ نوازشريف مريم نواز اليڪٽرانڪ ميڊيا جي نگران اداري پيمرا ۽ بين کي ڌر بڻايو ويو آهي درخواست گذار موقف اختيار ڪيو ته پانامه فيصلي ۾ نااهل قرار مليل ۽ سپريم ڪورٽ مان برطرفي کان پوءِ نوازشڙيف ۽ مريم نواز عدالتن جي خلاف نفرت پکيڙي رهيا آهن ٻنهي سياسي اڳواڻ ڪوٽ مومن جلسي ۾ ۽ پنجاب هائوس ۾ عدليه خلاف تقريرون ڪيون درخواست گذار اپيل ڪئي ته نوازشريف ۽ مريم نواز جا بيان توهين عدالت جي زمري ۾ اچن ٿا عدالت کي گذارش آهي ته ٻنهي ڌرين جي خلاف توهين عدالت جي ڪارروائي ڪئي وڃي.

 

زينب ڪيس کي جلد انجام تائين پهچايو وڃي: آءِ جي پنجاب جي جي آءِ ٽي کي هدايت

لاهور ( ويب ڊيسڪ ) آءِ جي پنجاب زينب قتل ڪيس جي جاچ ڪندڙ جي آءِ ٽي کي جلد کان جلد ڪيس منطقي انجام تائين پهچائڻ جي هدايت ڪئي آهي. آءِ جي پنجاب عارف نواز جي سربراهيءَ ۾ قصور واقعي بابت جي آءِ ٽي جو اجلاس ٿيو. اجلاس ۾ جي آءِ ٽي جي سربراهه محمد ادريس ۽ آر پي او شيخوپوره ذوالفقار حميد سميت ٻين شرڪت ڪئي جڏهن ته اجلاس ۾ زينب قتل ڪيس جي جوابدار عمران کان ڪيل جاچ تي اڳڀرائيءَ جو جائزو ورتو ويو.  آءِ جي پنجاب جي آءِ ٽي کي ڪيس جلد کان جلد انجام تائين پهچائڻ جي هدايت ڪندي چيو ته زيادتي جي سمورن ڪيسن جي جاچ جي مرحلن کي جلد کان جلد مڪمل ڪيو وڃي، جاچ ۾ جديد ۽ سمورن روايتي شاهدن جو جائزو ورتو وڃي. آءِ جي پنجاب چيو ته متاثر ڪٽنب کي هر صورت ۾ انصاف فراهم ڪيو ويندو.