تازيون خبرون

Monthly Archives: January 2018

مظلومن سان انصاف چاهيون ٿا، ملڪ کي جاتي امرا مان خطرو آهي: قادري/زرداري/عمران

لاهور (اين اين آءِ) اڳوڻي صدر آصف علي زرداري چيو آهي ته ملڪ کي ڪنهن ٻئي مان نه رڳو جاتي امره جي مجيب رحمان کان خطرو آهي، مان چاهيان ته کيس ڪڍي ڇڏيا ۽ ان ۾ دير به نه لڳندي، مان نواز شريف وانگر پنهنجو نه پر ملڪ جو سوچيندو آهيان، هي جيڏانهن ويندا اتي جاتي امره بڻائيندا، کيس ڪنهن جي پرواهه نه آهي پر اسان ۽ اسان جي ايندڙ نسلن کي هن ملڪ ۾ رهڻو آهي، نواز شريف گريٽر پنجاب واري سوچ رکي ٿو ۽ هو ملڪ کي ڪمزور ڪرڻ چاهي ٿو، اسان ان کان ماڊل ٽائون جي شهيدن جو انصاف ضرور وٺنداسين، اهڙن خيالن جو اظهار هن گڏيل اپوزيشن جي احتمام هيٺ مال روڊ تي ماڊل ٽائون سانحي ۽ قصور سانحي جي انصاف لاءِ ڪوٺايل احتجاجي جلسي جي صدارت ڪندي ڪيو، آصف زرداري چيو ته مان اڳ کان 7 مهينا اڳ هڪ پروگرام ۾ چيو هو ته هي گريٽر پنجاب ٺاهڻ جي ڳالهه ڪري رهيو آهي ۽ سچ ان جي وات مان نڪري آيو آهي ته مون کي مجيب رحمان بڻايو پيو وڃي، شيخ مجيب رحمان پاڪستان کي ٽوڙيو، ڇا اڄ تائين اسان جا نسل ان کي معاف ڪري سگهن ٿا، نواز شريف پاڻ چئي رهيو آهي ته مان شيخ مجيب رحمان بڻجڻ چاهيان ٿو پر اهو ته ٻڌائي ته آخر ان سان ٿيو ڇا آهي، پ پ ۽ عوامي تحريڪ سان جيڪو ٿيو پر ان جي باوجود اسان ڪڏهن به اهڙي ڳالهه ناهي ڪئي پر اسان پاڪستان کپي جو نعرو هنيو آهي، اسان جو جيئن مرڻ پاڪستان ۾ آهي، اسان هتي رهڻ چاهيون ٿا، هن چيو ته مان طاهر قادري جو ٿورائتو آهيان جو هن سمورين پارٽين کي هتي اچڻ جي دعوت ڏني، هن چيو ته نواز شريف وارا ايترو قرض وٺي چڪا آهن جو اهي چاهين ٿا ملڪ ڪمزور ٿئي ۽ مودي جو يار جيڪو ڪرڻ چاهي ڀل ڪري، پر الحمد الله جيستائين اوهان آهيو، اسان آهيون، اسان جا ڪارڪنن آهن، عوام آهي، اسان ڪڏهن به ائين ٿيڻ نه ڏينداسين، هن چيو ته هي بلوچستان جي ڳالهه ڪن ٿا، مان دعا ضرور ڏني هئي دعا ۽ دوا ڏيڻ سياسي ماڻهن جو ڪم آهي ۽ سياست ڪرڻ اسان جو حق آهي، اسان ملڪ جي خلاف نه آهيون، اسان ملڪ کي مضبوط ڪيو آهي، اڄ هي ماڻهو ڳالهه ڪري رهيا آهن ته 5 سئو ووٽ کڻڻ وارو وڏو وزير بڻجي ويو، جڏهن توهان ان کي ڊپٽي اسپيڪر بڻايو هو ان وقت ڇا هو، ان شخص جو تعلق آواران سان آهي ۽ آواران اهو علائقو آهي جتي سڀ کان وڌيڪ تڪليفون آيون آهن، اسان بلوچستان ۽ اوهان سان گڏ آهيون، هن چيو ته جڏهن اسان حڪومت ۾ هئاسين ته ان وقت ننڍي ميان صاحب جي واتان گل ڇڻندا هئا پر اسان ڪڏهن به جواب نه ڏنو، ان لاءِ نه ڏنو جو اسان جمهوريت جو سفر پورو ڪرڻ چاهيون ٿا، پر هاڻ اهو لڳي ٿو ته اهي اسان کي مجبور ڪري رهيا آهن ته جمهوريت جو سفر پورو نه ڪن ۽ ان لاءِ اسان کي هن حد تي پهچائڻ چاهين ٿا جنهن سان سفر پورو نه ٿئي پر جيڪي سياسي سوچ رکن ٿا انهن کي خبر آهي ته مان چاهيان ته اوهان کي ڪڍي سگهان ٿو ۽ مون کي ان ۾ دير نه لڳندي پر مان پاڪستان لاءِ سوچان ٿو، اسان کي اڳتي سفر ڪرڻو آهي، اسان کي ناهي رهڻو پر ملڪن ۾ قومن جي زندگي هوندي آهي، نسلن کي هتي رهڻو آهي، اسان هتان جو کائون ۽ پيون ٿا، اسان هن سان وفاداري جو قسم کڻو ٿا، آصف زرداري چيو ته مجيب رحمان واري سوچ رکي اوهان وڏ وزارت جو حلف کنيو، اوهان جي دماغ ۾ ڪهڙي سوچ هئي، مان پاڪستان جي صدر جي حيثيت سان ذميواري نڀائي پر مان اڄ پنهنجي حلف جي رکوالي ڪري رهيو آهيان، بينظير ڀٽو دنيا جي ملڪن ۾ ليڪچر ڏنا ۽ ان کي ان جا پيسا به ملندا هئا پر هن ڪڏهن به پاڪستان جي خلاف تقرير نه ڪئي هن ڊڪٽيٽر خلاف ضرور ڳالهايو ڇو ته ڊڪٽيٽر ملڪ سنواريندا نه آهن پر بگاڙيندا آهن، اڄ به ملڪ ۾ ضيا جو نشانيون آهن، اسان انهن سان مقابلو ڪري رهيا آهيون، هڪ ناسور ضرور آهي ان سان وڏي مشڪل آهي پر پاڪستان آهي ته اسان آهيون، ان جو پاڪستان سان واسطو نه آهي، ان جو جاتي امره سان واسطو آهي پر مان صاف لفظن ۾ چوان ٿو ته اسان ماڊل ٽائون جو حساب ضرور وٺنداسين، اسان زينب ۽ ٻين جي رت جو به حساب ضرور وٺنداسين.

لاهور (ويب ڊيسڪ) پاڪستان عوامي تحريڪ جي سربراهه طاهر القادري چيو آهي ته معاشري ۾ ايتري ورهاست ۽ فرق وڌي ويو آهي جو ڪنهن معاملي تي گڏجي ويهڻ جو حوصلو ناهي رهيو، اڄ اسان ماڊل ٽائون سانحي جي متاثرن کي انصاف ڏيارڻ لاءِ گڏ ٿيا آهيون، سڀني کي گهرائڻ جو مقصد پنهنجي ذات لاءِ ڪجهه حاصل ڪرڻ نه پر ستل شعور کي جاڳائڻ ۽ بي آوازن کي آواز ڏيڻ آهي. لاهور جي مال روڊ تي گڏيل اپوزيشن جي احتجاجي جلسي کي خطاب ڪندي طاهر القادري چيو ته زرداري صاحب اڄ سڀني جو گڏجڻ منهنجو نه پر شهيدن جي قربانين جو ڪمال آهي، اهو ڪمال انهن معصوم ٻارن جو آهي، جن جي حفاظت لاءِ سڀ گڏيا آهن. هن چيو ته انساني حق  چِٿيا پيا وڃن ۽ قومي ناڻو ڦريو پيو وڃي، اسان عدليا کي آزاد رکڻ، هر مظلوم کي انصاف ڏيارڻ ۽ ملڪ کي حيوانن کان بچائڻ لاءِ گڏ ٿيا آهيون، قوم اٿي ۽ سڃاڻي ته دشمن ڪير آهي. سندس چوڻ هو ته اسان ملڪ جو امن ٽوڙڻ نٿا چاهيون، جيڪڏهن ائين ڪرڻو هجي ها ته نواز شريف ۽ شهباز شريف کي جاتي امرا کان ٻاهر هڪ قدم رکڻ جي به جرئت نه هجي ها، چاهيون ٿا ته قانون عوام ۽ شريف خاندان لاءِ به هڪ جهڙو هجي. طاهر القادري چيو ته اسان ڀڃ ڊاهه ۽ گهيرو ڪرڻ ناهيون آيا، قانون هٿ ۾ کڻڻو هجي ها ته سانحا برداشت نه ڪيون ها، شريفن جي بادشاهي خلاف ڳالهائي رهيا آهيون.27

لاهور (ويب ڊيسڪ) تحريڪ انصاف جي سربراهه عمران خان چيو آهي ته قصور ۾ ڪجهه مهينن کان اهو سڀ ڪجهه ٿي رهيو هو پر ڪو ايڪشن نه ورتو ويو، زينب جو ڪيس منظر تي اچڻ کانپوءِ قوم کي خبر پئي ته اهو اسان جي ٻارن سان به ٿي سگهي ٿو، طاهر القادري ملڪ جي سڀني پارٽين کي گڏ ڪيو، ڊاڪٽر صاحب، قوم توهان سان گڏ بيٺي آهي. مال روڊ تي جلسي کي خطاب ڪندي عمران خان چيو ته سڄو پاڪستان ڏسي رهيو هو ماڊل ٽائون ۾ بيگناهن تي پوليس گوليون هلايون ويون، 14 ڄڻن کي قتل ڪيو ويو ۽ ڪيترائي زخمي ٿيا، ڇا ماڊل ٽائون ۽ قصور جي متاثرن کي انصاف مليو؟ زينب جي وارثن پنجاب پوليس ۽ وڏي وزير کان نه پر آرمي چيف کان انصاف جو مطالبو ڪيو، راڻا ثناءُ الله کان ته ڪنهن به انصاف نه ورتو، اهو صورت مان ئي قاتل لڳندو آهي. سندس چوڻ هو ته مان شريف ڀائرن کي 40 ورهين کان سڃاڻان ٿو، نواز شريف جمهوريت تي يقين ئي نٿو رکي، ماڊل ٽائون سانحي پويان ٻنهي ڀائرن جو هٿ آهي. هن چيو ته هڪ شخص جيڪو 3 سئو ارب چوري ڪري ٻاهر کڻي ويندو آهي، ان کي پارٽي جو سربراهه بڻايو ويو آهي، اهڙي شخص لاءِ پارليامينٽ ۾ هٿ کڻي چيو ويندو آهي ته اهو پارٽي جو سربراهه بڻجي سگهي ٿو.  پ پ اڳواڻ قمر زمان ڪائرا چيو آهي ته اڳوڻو وزير اعظم نواز شريف دبئي هليو وڃي يا ڪنهن ٻئي پاسي، کيس ڪنهن به صورت ۾ معافي نه ملندي، هيءَ اها ٻلي آهي جيڪا پير سڙڻ تي ٻارن کي پيرن هيٺان رکندي آهي. مال روڊ تي جلسي کي خطاب ڪندي قمر زمان ڪائرا چيو ته نواز شريف صاحب پنهنجي ننڍي ڀاءَ کان پڇو توهان کي ڇو ڪڍيو  ويو؟ حڪمرانن کي جمهوريت جي نه اقتدار جي لالچ آهي. هن چيو ته هر شئي جي هڪ حد هوندي، نواز شريف صاحب توهان اهو ٻڌايو ته توهان هارين کي ٻنين مان ڇو ڪڍيو ؟ توهان کي ڪنهن سازش تحت نه پر اعليٰ عدليا سان ڪوڙ ڳالهائڻ ۽ بدديانتي تي ڪڍيو ويو. سندس چوڻ هو ته شريف خاندان پنهنجي کسيل دولت لاءِ جدوجهد ڪري رهيو آهي، ميان صاحب جمهوريت ۽ پارليامينٽ کي پنهنجي اقتدار لاءِ استعمال ڪري رهيو آهي، جيڪڏهن نواز شريف رهيو ته جمهوريت نه رهندي، ڇو ته اڳوڻو وزير اعظم چاهي ٿو ته جمهوريت ختم ٿي وڃي پر اسان آمرن ۽ انهن جي ٻارن کان جمهوريت بحال ڪرائي آهي.،پ پ اڳواڻ اعتزاز احسن چيو آهي ته ماڊل ٽائون ۾ پوليس بيگناهن تي گوليون هلايون، متاثر اڄ به انصاف جا طلبگار آهن، انهن کي انصاف ملڻ گهرجي. مال روڊ تي جلسي کي خطاب ڪندي اعتزاز احسن چيو ته حڪمران پارٽي انصاف ۾ سڀ کان وڏي رنڊڪ آهي، نواز شريف هر موقعي تي چوندو آهي مون کي ڇو ڪڍيو ويو؟ حڪومت نواز شريف جي آهي، حيران آهيون ته سازش ڪير ڪري رهيو آهي. هن چيو ته هر دور جي حڪومت خلاف نواز شريف سازشون ڪندو رهيو، 1990ع جي چونڊن ۾ ڌانڌلي ڪئي وئي، نواز شريف ماضي ۾ چونڊيل وزيراعظم خلاف سازشون ڪيون، انهن چيف جسٽس کي ڪڍڻ لاءِ سپريم ڪورٽ تي حملو ڪيو، هر سازش جو حصو رهندڙ شخص پاڻ خلاف سازش جو  پِٽڪو ڪري رهيو آهي. سندس چوڻ هو ته اقامو مني لانڊرنگ کان وڌيڪ خطرناڪ آهي،  اقامي تي ته قيد ٿيڻ گهرجي ها پر عدالت نرمي جو مظاهرو ڪيو.27

 

 

نعرا هڻندڙ پاڻ تبديل ٿي ويا، نواز شريف ننڍي ڀاءَ کان پڇي ته ڇو ڪڍيو ويو: بلاول ڀٽو زرداري

حيدر آباد (اين اين آءِ) پاڪستان پيپلزپارٽي جي چيئرمين بلاول ڀٽوزرداري چيو آهي پاڪستان جي سياست ۽ حڪمران سياستدانن جي رويي تي افسوس  ٿئي ٿو، بابابلي شاهه جهڙي بزرگ جي شهر قصور ۾ اسانجي معصوم گلن جهڙي ٻارڙي زينب تي ايترو وڏو ظلم ٿي ويو ۽ اهو پهريون واقعو نه بلڪه ان قسم جي واقعن جو تسلسل  آهي، هن چيو ته 27 ڊسمبر تي ڳڙهي خدا بخش ۾ قانون لاڳو ڪندڙ ادارن  ۽ حڪمرانن کان قصور ۾ ٿيل واقعي تي انصاف گهريو هو ان وقت معصوم زينب زندهه هئي پر حڪومت ۽ قانون لاڳو ڪندڙ ادارا خاموش تماشائي  بڻيا رهيا _ اها ڳالهه هن اڄ راهوڪي ضلعي بدين ۾ شهيد فاضل راهو جي 31 ورسي جي موقعي تي جلسي کي خطاب ڪندي ڪيو _ هن چيو ته اها هڪ زينب نه هئي بلڪ هن سال  11 زينب ۽ ڪيترا سو معصوم ٻارڙا وحشت جو نشانو بڻيا پر ڏوهاري گرفتار ڪرڻ ۽ ثبوت  هجڻ جي باوجود اڄ  به اهي ماڻهو آزاد گهمي رهيا آهن  پر حڪمران ٽولو نظر انداز ڪري رهيو آهي ۽ قصور جي ٻارڙي سميت  ملڪ جي تمام ٻارڙن  کي وحشين جي رحم ۽ ڪرم تي نٿو ڇڏي سگهجي _ هن ميان محمد نواز شريف ۽ شهباز شريف تي تنقيد ڪندي چيو ته شريف زاده قصور جي ٻارن کان ڪهڙي ڳالهه جو بدلو وٺي رهيا آهن اسانکي پنهنجن ٻارڙن کي انصاف ڏيارڻو آهي ۽ انهن جي مستقبل جي تحفظ لاءِ خاموشي ٽوڙڻي پوندي _ هن چيو ته سنڌ حڪومت چائلڊ رائيٽ پروٽيڪشن قائم ڪيو  آهي _ هن  سنڌ حڪومت جو حوالو ڏيندي ٻين صوبن  کي تجويز ڏني ته اهي سنڌ حڪومت وانگر پنهنجي نصاب ۾ چائلڊ پروٽيڪشن جي حوالي سان مضمون شامل ڪري ايندڙ نسل کي صحيح ۽ غلط کان آگاهي ڏين _ هن چيو ته ميان صاحب مان توهان کان پڇان ٿو ته توهان پنهنجي مفادن لاءِ انصاف جي تحريڪ هلائڻ جو شوشو  ڇڏيو پر قصور جي ٻارن ۽ ماڊل ٽائون جي شهيدن کي انصاف ڪير ڏيندو _ هن چيو ته نواز شريف اهو چوندو ڦري پيو  ته مونکي ڇو ڪڍيو ويو  مان کيس چوان ٿو ته اهو سوال توهان پنهنجي ننڍي ڀاءُ کا پڇيو ۽ سوال جو جواب توهان جي گهر مان ئي ملي ويندو_ ميان صاحب توهان کي ڪرپشن ڪيس ۾ سزا ملي ۽ توهان جي ڀاءُ کي حديبه  پيپر مل ڪيس ۾ بري ڪيو ويو  جيڪڏهن اِهو فيصلو غلط آهي ته اُهو فيصلو به غلط آهي ۽  اهو ڪهڙو مذاق  آهي ته وڏو ميان  چوي ٿو ته ادارا سندس ٽارگٽ ڪلنگ ڪري رهيا آهن  ۽ ننڍو  ميان چوي  ٿو ته ادارا صحيح ڪم ڪري رهيا آهن، وڏو ميان چئي ٿو ته کيس غلط سزا ڏني وئي ۽ ننڍو ميان چوي ٿو ته انصاف جو مان مٿانهون ٿيو ، ميان صاحب توهان ٻئي ڀائر ڊرامي بازي سان  هاڻي ملڪ جي باشعور  ماڻهن کي بيوقوف نٿا بڻائي سگهو  ڇاڪاڻ ته ماڻهو توهان کي سڃاڻي چڪا آهن _ هن چيو ته ميان صاحب  جڏهن به  سنڌ  جو دورو ڪيو ته واعداڪيا  جن مان  هن وقت تائين ڪو به واعدو  پورو نه ٿيو آهي جڏهن ته گذريل پنجن سالن کان اين ايف سي ايوارڊ به پورو نه ڏنو ويو آهي بلڪه اڄ به ننڍي صوبي  جي اين ايف سي  ايوارڊ  مان رقم ڪاٽي وئي  آهي _ هن چيو ته ميان صاحب حقيقت کي تسليم ڪيو ته توهان پنهنجي سياسي عمر پوري ڪري چڪا آهيون هاڻي اهي سهارا نه رهيا آهن جيڪي توهان جو ساٿ ڏيندا هئا  ، ميان صاحب توهان  کان نه ملڪ سنڀاليو ويو  نه ئي وري حڪومت بلڪه توهان کان ته پنهنجو ننڍو ڀاءُ تائين سنڀاليو نه ويو ۽ توهان هر طرح سان ناڪام ٿي چڪا آهيو _ هن چيو ته اسان اهو ملڪ نواز شريف ۽ عمران خان جهڙن سياستدانن جي خواهشن جي رحم ۽ ڪرم تي نٿا ڇڏي سگهون _ هن چيو ته هڪ لاڏلو چوي ٿو ته اهي اثاثا منهنجا نه آهن  ۽ عدالتون چون ٿيون ته اهي توهان جا آهن ٻيو لاڏلو چئي ٿو ته اهي اثاثا منهنجا آهن  عدالتون چون ٿيون ته اهي تنهنجا نه آهن  دراصل ٻنهي لاڏلن جي لڙائي  آهي _ هن چيو ته هڪ لاڏلي سنڌ ۾ اچڻ شروع ڪيو آهي ۽ اهو اهڙن ماڻهن سان گڏ آهي جن کي عوام هميشه لاءِ مسترد ڪيو آهي _ هن چيو ته عمران خان ڪرپشن ڪرپشن جو گوڙ ڪري ٿو پر خيبرپختونخواهه  جي وزير اعليٰ تي بدعنواني جي سنگين الزامن جي باوجود ڪا ڪارروائي  نه ڪئي وئي آهي ڪٿي وئي  سندس احتساب  ڪميشن ؟خان صاحب جي هڪ  تمام ويجهي  دوست  کي عدالتن نااهل ترين قرار ڏنو آهي ۽   ان کان وڏي منافقت ڇا ٿي سگهي ٿي ته مورثي سياست جي خلاف گوڙ ڪرڻ وارن انهي نااهل ترين جي پٽ کي سندس جانشين قرار ڏنو آهي _ عمران خان تبديلي جا نعرا لڳائيندي لڳائيندي  پاڻ تبديل ٿي ويو آهي _ هن چيو ته پي ٽي آئي وارا پنهنجن دماغن تي ايترو  زور نه وجهن جلد آصف علي زرداري کين سياست سيکاريندو  _ هن چيو ته سنڌ ۾ سياسي يتيمن جو ٽولو گڏ ڪيو پيو وڃي ان ٽولي  کي گرانڊ ڊس فنڪشنل الائينس چيو ويندو آهي _    هر اليڪشن ۾ پاڪستان پيپيلزپارٽي جي خلاف اهو ئي ٿيندو آهي  ۽ ان تي الزام لڳايا ويندا آهن پر  عوام ڄاڻي ٿي ته   جيڪڏهن پاڪستان جي آزادي کانپوءِ ڪنهن سياسي جماعت ڪم ڪيو آهي ته ته اها فقط پي پي پي آهي _ هن چيو ته سياسي يتيم ٻڌي وٺو  جهڙي سنڌ کي لطيف سائين  ۽ لعل شهباز قلندر جهڙن بزرگن جي دعا  آهي اهي ڪڏهن تباهه نه ٿيندو بلڪه  توهان جي سياست تباهه ٿي ويندي _ هن چيو ته مون پنهنجي مختصر سياسي سفر ۾ بدين کان هڪ سبق سکيو آهي ۽ اهو حضرت علي جو هڪ قول آهي ته ڪم ظرف تي احسان ڪيو ۽ ان جي شر کان بچو _ هن چيو ته اڄ آئون بدين جي ان علائقي ۾ بيٺو آهيان جنهن سان پي پي پي جو دلي رشتو آهي _ بدين جو عوام ايماندار، وفادار ۽ جرئت مند آهي جيڪو پي پي پي سان ڪڏهن واعدي خلافي نه ڪندو ڇاڪاڻ ته بدين جي عوام هميشه شهيد ذوالفقار علي ڀٽو ۽ شهيد بينظير ڀٽو جو ساٿ ڏنو آهي _ شهيد ذوالفقار علي ڀٽو بدين کي تعلقي مان ضلعي جو درجو ڏنو ۽ اتي اسپتال ۽ ڪاليج قائم ڪيا _ گئس جي پيداوار باوجود هن ضلعي جي ماڻهن کي گئس جي فراهمي نه ٿيندي هئي جيڪا شهيد محترمه بينظير ڀٽو حڪومت ۾ اچي فراهم ڪئي _بدين  ۾ ٿيليسيميا سينٽر قائم ڪيو ويو آهي جتي مفت علاج ڪيو وڃي ٿو  _ان کان علاوه بدين ۾ ٻيون اسپتالون پڻ قائم ڪيون ويون آهن جتي علاج جون مفت سهولتون مهيا ڪيون پيون وڃن ۽ اسان بدين ۾ سنڌ يونيورسٽي ڪيمپس پڻ قائم ڪيو ۽ روڊن جي انفرااسٽرڪچر تي پڻ ڪم ڪيو مونکي خبر آهي ته بدين جا ماڻهو پي پي پي سان بنا ڪنهن لالچ محبت ڪن ٿا ۽ اسان به انهن جي بنا ڪنهن لالچ جي خدمت ۾ يقين رکون ٿا _ هن شهيد فاضل راهو جي 31 ورسي جي موقعي تي شهيد فاضل راهو کي زبردست ڀيٽا پيش ڪندي چيو ته شهيد فاضل راهو سنڌ جو بهادر فرزند هو جنهن مرڻ گهڙي تائين عوامي خدمت ۾ پنهنجو ڀرپور ڪردار ادا ڪيو ۽ سندس ايم آرڊي ۾ جيل ڀريو تحريڪ دوران اڳواڻي وارو ڪردار رهيو _ ، آئون سندس قرباني ۽ جدوجهد کي سلام پيش ڪيان ٿو _ هن چيو ته بدقسمتي سان اڄوڪي ڏينهن تي 1987 ۾ ضياء دور ۾ هڪ سازش تحت شهيد فاضل راهو جي بهادر ۽ تاريخي ڪردار کي شهيد ڪيو ويو _ ان موقعي تي  سنڌ جي وڏي وزيرسيد مراد علي شاهه چيو ته شهيد فاضل هڪ عظيم شخصيت هو جنهن پنهنجي سڄي ڄمار عوام جي خدمت ڪئي ۽ شهيد ذوالفقار علي ڀٽو سان گڏجي ايم آر ڊي تحريڪ ۾ آمريت جو مقابلو ڪيو ۽ اڄ کان 31 سال اڳ کيس شهيد ڪيو ويو _ هن چيو ته بدين ضلعو هميشه کان پي پي پي جو ڳڙهه رهيو آهي ۽ شهيد فاضل راهو جي خاندان جي پي پي پي جي شموليت سان بدين ۾ پي پي پي مضبوط ٿي وئي آهي ۽ هاڻي ڪو به مخالف هتي پي پي پي کي شڪست نٿو ڏئي سگهي _ هن چيو ته مونکي يقين آهي ته هتان جو عوام بلاول ڀٽو کي ڪامياب بڻائي ملڪ جو وزير اعظم بڻائيندا ڇاڪاڻ ته هن وقت بلاول ڀٽو کان علاوه ڪوٻيو اڳواڻ نه آهي جنهن تي عوام اعتماد ڪري  _ان موقعي تي صوبائي وزيرن نثارکهڙو ، ڄام مهتاب حسين ڏهر ، ڊاڪٽر سڪندر منڌرو ، سيد ناصر حسين شاهه ، محمد علي ملڪاڻي ، سينيٽر سسئي پليجو ، ايم اين اي سيد نويد قمر ، راشد رباني سميت ٻين صوبائي  ۽قومي اسيمبلي جي ميمبرن ، پارٽي عهديدارن کان علاوه عوام جو وڏو انگ موجود هو.

 

 

آمريڪا سان سٺا لاڳاپا ناهن، ڪنهن به صورت قومي مفادن تي سمجهوتو نه ٿيندو: پاڪستان

اسلام آباد (اين اين آءِ) پرڏيهي وزير خواجه آصف چيو آهي ته پاڪستان ڪنهن به صورت قومي مفادن تي سوديبازي نه ڪندو اربع تي پارليمينٽ هائوس اسلام آباد ۾ سينيٽ جي پرڏيهي معاملن بابت قائمه ڪميٽي کي بريفنگ دوران خواجه آصف ٻڌايو ته آمريڪا سان لاڳاپا اڃا بهتر ناهن ٻنهي ملڪن وچ ۾ مسئلا موجود اهن اڃا تائين آمريڪي پوزيشن ۽ اسان جي ردعمل ۾ ڪابه تبديلي ناهي آئي اسان آمريڪا سان لاڳاپن ۾ توازن چاهيون ٿا اسان آمريڪي سياسي ۽ فوجي قيادت کي ٻڌائي ڇڏيو ته اسان کي ڪابه امداد نه گهرجي پاڪستان ڪنهن به صورت قومي مفادن تي سوديبازي نه ڪندو آمريڪا پنهنجي ناڪامي جو الزام پاڪستان تي نه وجهي دهشتگردي بابت فتوايٰ جي حوالي سان پرڏيهجي وزير چيو ته رياست جهاد يا جهادي تنظيمن کي قومي دارا ۾ نه پئي آڻي آپگهاتي حملو هتي ٿئي يا چنڊ تي حرام آهي ته حرام آهي جيڪا به جهادي تنظيم پاڪستان مان ڪٿي به ڪم ڪري فتويٰ جي تحت غلط آهي فتويٰ جامعه طور تي رياست جي ذميواري کي ٻڌائي ڇڏي ٿو پرڏيهي وزير چيو ته افغان طالبان جو پاڪستان اچڻ جي ڪابه خبر نه آهي چين سي پيڪ کي افغانستان تائين وڌائڻ جي خواهش جو اظهار ڪيو آهي ۽ پاڪستان به چين جي ان رٿابندي جو حامي آهي ۽ هي معاملو پاڪستان افغانستان چين ٽه ڌري اجلاس ۾ به آڏو آيو هن چيو ته روزانو 60 کان 70 هزار ماڻهو پاڪ افغان سرحد پار ڪن ٿا اسان افغان مهاجرن کي ڊگهو عرصو پناهه ڏني پر هاڻي ممڪن نه آهي اسان کي افغان مهاجرن جي واپسي ۽ بهتر سرحدي انتظام جي ضمانت گهرجي.

 

قوم ڌرڻن کان نٿي ڊڄي، ناجائز احتجاج ڪندڙن کي شرم اچڻ گهرجي: چيف جسٽس ثاقب نثار

اسلام آباد(ويب ڊيسڪ) سپريم ڪورٽ ۾ مري ۾ غير قانوني اڏاوتن تي پاڻمرادي نوٽيس ڪيس ۾ معاملا درست ڪرڻ لاءِ 15 ڏينهن جي مهلت ڏني وئي آهي، چيف جسٽس احتجاج ڪندڙن بابت ريمارڪس ۾ چيو ته احتجاج ڪرڻ وارا ڪن، قوم ڌرڻن کان ناهي ڊڄندي، پر ناجائز ڌرڻن ۽ احتجاج ڪندڙن کي شرم اچڻ گهرجي. چيف جسٽس جي سربراهي ۾ ٽي رڪني بينچ مري ۾ غير قانوني اڏاوتن جي پاڻمرادي نوٽيس ڪيس جي ٻڌڻي ڪئي. سرڪاري وڪيل گذريل ڏينهن واري ٻڌڻي ۾ مري ۾ اعلان ڪرائڻ واري اعلان بابت ٻڌائيندي چيو ته 125 ماڻهن کي نوٽس جاري ڪيا ويا آهن، 35 عمارتون ڊاهي پٽ ڪيون ويون، چيف جسٽس چيو ته قانون جي خلاف اڏاوتن تي ڪارروائي ٿيندي، مري ۾ ماضي جا جبل ناهن رهيا. چيف جسٽس 15 ڏينهن ۾ معامل  درست ڪرڻ جي هدايت ڪندي چيو ته جيڪڏهن ڪير سمجهي ٿو ته راجا مدد ڪندو ته ائين نه ٿيندو. غير قانوني عمارتن تي سمجهوتو نه ٿيندو. مڪمل قانوني اختيار ڏنا ويندا. غير قانوني اڏاوتون ڪندڙن سان ڪا رعايت نه ڪئي ويندي سچ ڳالهائڻ کي نقصان نه ٿيندو. عدالت مري پاڻمرادي نوٽيس جي ٻڌڻي ٽن هفتن تائين ملتوي ڪري ڇڏي.

 

قبائلي علائقن جي عوام جي تعمير ۽ ترقي حڪومت جي پهرين ترجيح آهي: وزير اعظم

اسلام آباد (اين اين آءِ) وزيراعظم شاهد خاقان عباسي سان قبائلي علائقن جي مختلف ايجنسين سان تعلق رکندڙ مسلم ليگ (ن) جا صدر نائب صدر ۽ جنرل سيڪريٽريز تي ٻڌل وفد اربع تي وزيراعظم آفيس ۾ ملاقات ڪئي وفد جي قيادت مملڪتي وزير غالب خان ڪري رهيو هو ملاقات ۾ سڌارا قبائلي علائقن جي تعمير ۽ ترقي ۽ علائقي سان لاڳاپيل معاملن تي خيالن جي ڏي وٺ ڪئي ويئي وفد سان ڳالهائيندي وزيراعظم چيو ته قبائلي عوام جي تعمير ۽ ترقي حڪومت جي ترجيحي آهي هن چيو ته ملڪي تاريخ ۾ پهريون ڀيرو موجوده حڪومت نه صرف فاٽا جا مسئلا حل ڪرڻ لاءِ سنجيده ڪوشش ڪئي پر ان تي عملي طور ڪم شروع ڪيو هن چيو ته فاٽا سڌارن جو عمل شروع ٿي چڪو آهي ۽ هن عمل کي فاٽا جي عوام جي مرضي مطابق مڪمل ڪيو ويندو فاٽا انظمام تي ڳالهائيندي وزيراعظم چيو ته حڪومت سمجهي ٿي ته فاٽا سڌارن ۽ انظمام جي عمل کي مرحلي وار طريقي سان مڪمل ڪيو وڃي ته جيئن هن عمل سان لاڳاپيل اشوز ۽ مسئلن جو به گڏوگڏ حل نڪري اچي هن چيو ته فاٽا جي عوام کي قومي دارا ۾ آڻڻ لاءِ ضروري اهي ته اتي تعمير ۽ ترقي جي عمل کي هٿي ڏيئي سگهجي وفد جي ميمبرن فاٽا ۾ سڌارن واري عمل کي شروع ڪرڻ ۽ قبائلي علائقن تي سالون سال کان مڙهيل ڪاري قانون جي خاتمي جي سلسلي ۾ عملي قدم کڻڻ تي وزيراعظم جو شڪريو ادا ڪيو.

 

ڪائونسلر جي سيٽ به نه کٽي سگهندڙ ن ليگ خلاف گڏ ٿيا آهن: مريم اورنگزيب

اسلام آباد (ويب ڊيسڪ) سڌ سماءَ واري مملڪتي وزير مريم اورنگزيب چيو آهي ته اڄ سڀ پارٽيون رڳو هڪڙي ن ليگ خلاف گڏ ٿي رهيون آهن، جيڪي ماڻهو گڏ ٿيا آهن اهي ڪائونسلر جي سيٽ به نٿا کٽي سگهن، جيڪو تماشو ٿي رهيو آهي، ن ليگ جي ڪائونسلر جي سيٽ تي به ان کان وڌيڪ ماڻهو گڏ ٿيندا آهن. صحافين سان ڳالهائيندي مريم اورنگزيب چيو ته جنهن وقت ملڪ ۾ سي پيڪ اچي رهيو هو، ان وقت به هڪ ڪنٽينر تيار ٿي رهيو هو، ڪالهه تائين هڪ امپائر جي آڱر جي اشاري جي ڳالهه ٿي رهي هئي، اڄ جڏهن فاٽا جي عوام کي حق ملڻ جي ڳالهه ٿي رهي آهي ته ڪنٽينر تيار ڪيو ويو آهي، جيڪڏهن مخالفن کي خوف نه هجي ها ته ڪنٽينر تيار نه ڪرائين ها. سندس چوڻ هو ته قوم جنهن کي ووٽ ڏيندي اهو ئي اقتدار ۾ ايندو، قصور واقعي جو ڏک وڏي وزير شهباز شريف کان وڌيڪ ڪنهن کي به ناهي، پنجاب، سنڌ، ڪي پي ڪي، بلوچستان توڙي آزاد ڪشمير جا ماڻهو نواز شريف کي ئي ووٽ ڏيندا.27

 

ملڪ ۾ امير ۽ غريب لاءِ قانون هڪ هجڻ گهرجي،احتجاج نه انصاف گهري رهيا آهيون: خورشيد شاهه

لاهور (ويب ڊيسڪ) پ پ اڳواڻ خورشيد شاهه چيو آهي ته اسان سڀ هڪ آهيون ۽ اسان جي سوچ هڪ آهي ته انصاف ٿيڻ گهرجي، ملڪ کي قائم رکنداسين. مال روڊ تي جلسي کي خطاب ڪندي خورشيد شاهه چيو ته ملڪ ۾ امير ۽ غريب لاءِ قانون هڪ هجڻ گهرجي، اسان احتجاج نه پر انصاف گهري رهيا آهيون، سڄي قوم چئي رهي آهي ته انصاف ٿيڻ گهرجي، اسان ماڊل ٽائون سانحي ۾ قتل ڪيل بيگناهن لاءِ انصاف گهري رهيا آهيون، معصوم زينب انصاف گهري رهي آهي. هن چيو ته جنهن رياست ۾ انصاف نه هجي اها تباهه ٿي ويندي آهي، اسان کي خبر آهي ته شهادت ڇا هوندي آهي، حڪمرانن کي شهيدن جي رت جو حساب ڏيڻو پوندو.27

 

هڪ ٻئي کي چور چوندڙن جا اصل ارادا بي نقاب ٿي ويا: سعد رفيق

لاهور (ويب ڊيسڪ) ريلوي واري وفاقي وزير خواجا سعد رفيق چيو آهي ته گڏيل اپوزيشن جي جلسي ۾ لاهور واسين طرفان شرڪت نه ڪرڻ شيطاني اتحاد تي عدم اعتماد جي برابر آهي، طاهرالقادري سدائين جمهوريت ڪش ڪردار ادا ڪيو. گڏيل اپوزيشن جي مال روڊ تي جلسي جي ردعمل ۾ ٽوئيٽ ڪندي سعد رفيق چيو ته ڪينيڊين شهري انتشار پکيڙڻ لاءِ پاڪستان ايندو آهي، هو پاڪستان کي غير مستحڪم ڪرڻ واري پرڏيهي ايجنڊا تي هلي رهيو آهي، عمران، قادري ۽ زرداري جو شيطاني اتحاد سامهون اچي ويو. سندس چوڻ هو ته قتل جي ڪيسن جو فيصلو چوڪ تي نه پر عدالت ۾ ٿيندو، جمهوريت کي ڪجهه به ٿيو ته پهرين ذميواري شيطاني ٽولي جي هوندي.27 ٻئي طرف ريلوي واري وفاقي وزير خواجا سعد رفيق چيو آهي ته هڪ ٻئي کي چور چوندڙن جا اصل ارادا بي نقاب ٿي چڪا آهن. سماجي رابطن واري ويب سائيٽ ٽوئيٽر تي ريلوي واري وفاقي وزير خواجا سعد رفيق جو چوڻ هو ته دنيا ڏسي ڇڏيو ته هڪ ٻئي کي چور چوندڙ گڏ ڪيئن ٿا، انهن جا اصل ارادا بي نقاب ٿي چڪا آهن. واضح رهي ته لاهور ۾ پاڪستان عوامي تحريڪ جي سربراهه ڊاڪٽر طاهر القادري جي قيادت ۾ گڏيل مخالف ڌر طرفان حڪومت خلاف پاور شو جو مظاهرو ڪيو پيو وڃي، جنهن ۾ پي ٽي آءِ چيئرمين عمران خان ۽ اڳوڻو صدر آصف علي زرداري به شرڪت ڪندو.

 

شيخ رشيد قومي اسيمبليءَ جي ميمبر شپ تان استعيفيٰ ڏئي ڇڏي

لاهور (ويب ڊيسڪ) عوامي مسلم ليگ جي سربراهه شيخ رشيد قومي اسيمبلي جي ميمبر شپ تان استعيفيٰ جو اعلان ڪري ڇڏيو آهي. شيخ رشيد لاهور ۾ مال روڊ تي گڏيل اپوزيشن جي جلسي دوران اهڙو اعلان ڪيو. خطاب ڪندي سندس چوڻ هو ته ماڊل ٽائون جا قاتل ڪاروباري ماڻهو آهن ۽ شريف ڀائر پئسي جي زور تي سياست ڪري رهيا آهن. هن چيو ته نواز شريف اڄ هر هنڌ ڌڪا کائي رهيو آهي، اجمل قصاب جي گهر جو پتو نواز شريف ڏنو پر جيڪو ”مودي جو يار آهي غدار آهي غدار آهي“. شيخ رشيد قومي اسيمبلي جي ميمبر شپ تان استعيفيٰ جو اعلان ڪندي چيو ته شريف ڀائر تقريرن سان نه ويندا آهن، تنهن ڪري مان اڄ استعيفيٰ ڏيڻ جو اعلان ڪيان ٿو، عمران خان کي به استعيفيٰ ڏئي روڊن تي اچڻ گهرجي.27 شيخ رشيد چيو آهي ته اڄ چورن، ڦورن ۽ ڌاڙيلن خلاف احتجاج جو پهريون ڏينهن آهي. عوامي مسلم ليگ جي سربراهه شيخ رشيد پنهنجي ويڊيو پيغام ۾ چيو ته چورن، ڦورن ۽ ڌاڙيلن خلاف احتجاج جو اڄ پهريون ڏينهن آهي، اهو احتجاج انهن جي خلاف آهي جن ناٺي کي 9.9 ارب رپيا ڪابينا کان ڏياريا، اها ماڻهو پرڏيهي ايجنڊِ تي پاڪ فوج کي ذليل ڪري رهيا آهن، اهي ماڻهو 5 ججن کي فيصلي کي گند پيٽي ۾ اڇلائڻ جو چوندا آهن.  اهي ماڻهو سمجن ٿا ته وٽن ملڪ ۾ چوري جو حق جڏهن ته هو جيستائين قانون جي گرفت ۾ نه هوندا اسان سک سان نه ويهنداسين.

 

احتجاج ڪندڙن لاهور جي شهرين کي تڪليفن ۾ مبتلا ڪري ڇڏيو آهي: عائشا گلالئي

اسلام آباد (ويب ڊيسڪ) تحريڪ انصاف جي باغي اڳواڻ ۽ قومي اسيمبلي جي ميمبر عائشا گلالئي چيو آهي ته احتجاج ڪندڙن لاهور جي شهرين کي ڏکيائين ۾ وجھي ڇڏيو آهي. لاهور جا شهري مون کي وقت ڏين آئون اينديس، انهن کي اسان سوگھو ڪندا سين ۽ گڏجي جيل موڪليندا سين، پارليمنٽ هائوس ٻاهران ميڊيا سان ڳالهائيندي عائشا گلالئي چيو ته ايترا احتجاج ٿيندا آهن پر حڪومت ۾ پوءِ به عقل ناهي، سمجھه ۾ نٿو اچي ته ڊپٽي ڪمشنر اسٽيج لڳائڻ جي اجازت ڇو ڏني، لاهور جا شهري مون کي گھُرائن، گڏجي کين جيل موڪليندا سين، اهي ماڻهو نواز شريف جي دشمني ۾ لاهور جي عوام کان بدلو وٺي رهيا آهن، اهي ماڻهو سرڪاري عمارتن کي ساڙيندا، ڪاروبار جي بندش سان واپارين جو روزانو 5 ارب رپين جو نقصان ٿيندو، ڪو قتل ڪندو ته ڇا سزا ٻين کي ملندي، سندس چوڻ هو ته ڊپٽي ڪمشنر کائن صحيون وٺي ها ته ان نقصان جا ذميوار توهان سڀ هوندا. عائشا گلالئي چيو ته اسيمبلين ۾ اهي ماڻهو ايندا ناهن، مفت جون پگھارون وٺندا آهن، احتجاج ڪندا، روڊ بند ڪندا آهن، سندس چوڻ هو ته زينب واقعي تي گھڻائي احتجاجي مظاهرا ڪيا ويا، مردان ۾ ٻارڙيءَ سان زيادتي ٿي ان تي عمران خان جو بيان به نه آيو، هن چيو ته شريفان بي بي انصاف لاءِ دربدر ٿي رهي آهي، ايتري ڏڦيڙ پکيڙيندڙن کي پوليس ڇو ڪجهه نٿي چوي. هن چيو ته انهن ۾ ۽ طالبانن ۾ ڪو فرق ناهي، ڪينيڊين شهري هتي رڳو پارٽ ٽائم لاءِ ايندو آهي، عائشا گلالئي چيو ته جهانگير ترين جو رڳو چهرو ۽ نالو استعمال ٿيندو آهي، پيسو ٻيو ڪٿان ايندو آهي.