تازيون خبرون

Daily Archives: December 26, 2017

فلم ”ٽائيگر زندهه هي“ چئن ڏينهن ۾ 114 ڪروڙ ڪمائي ورتا

ممبئي  (شوبز نيوز) باليووڊ سلطان سلمان خان جي چار ڏينهن اڳ ريليز ٿيل فلم ‘‘ٽائيگر زندا هي’’ رڳو چار ڏينهن ۾ 114 ڪروڙ روپين کان به وڌيڪ بزنس ڪري ورتو. سلمان خان جي فلم ‘‘ٽائيگر زندا هي’’ باليوڊ جي پهرئين فلم آهي جنهن شروعات 4 ڏينهن ۾ سڀ کان وڌيڪ بزنس ڪيو، جيڪا وڏي اعزاز جي ڳالهه آهي. فلم ۾ سلمان خان کي ڀارتي خوفيه اجنسي پاران عراق ۾ داعش پاران اغوا ڪيل 25 نرسن کي بازياب ڪرائڻ لاءِ خصوصي مشن تي موڪليو ويندو آهي. فلم ”ٽائيگر زندا هي“ 22 ڊسمبر تي ريليز ٿي هئي، جنهن پهرئين ڏينهن 34 ڪروڙ روپين جو بزنس ڪيو. مجموعي طور سلمان خان جي اها 12هين فلم آهي، جيڪا 100 ڪروڙ ڪلب ۾ شامل ٿي چڪي آهي، جڏهن ته اها سندس ٽئين فلم آهي جيڪا رڳو 3 ڏينهن ۾ 100 ڪروڙ ڪلب ۾ شامل ٿي آهي.

 

پاڪستاني فلم ”پرچي“ سعودي سئنيما گهرن جي زينت بڻجندي

رياض (شوبز نيوز) سعودي عرب ۾ ايندڙ سال مارچ کان ٻيهر کلندڙ سينما گهرن ۾ پاڪستاني فلم ‘‘پرچي’’ کي به چونڊيو ويو آهي. ميڊيا مطابق تقريبن 35 سالن کانپوءِ سعودي عرب ۾ ايندڙ سال مارچ ۾ سينما گهر ٻيهر کلندا، ان سلسلي ۾ ميڊيا ڪنٽرول ڪندڙ اداري سعودي عرب ۾ سينما گهرن ۾ ڏيکاري ويندڙ فلمن لاءِ چونڊ ڪرڻ شروع ڪري ڇڏي آهي. سعودي وزير ثقافت ۽ اطلاعات عواد بن صالح سينما گهرن جي آغاز جي تصديق ڪري ڇڏي آهي. سعودي ميڊيا مطابق انتظاميا پاران ڪجهه فلمن جي منظوري به ڏني وئي آهي، انهن فلمن ۾ پاڪستاني فلم ‘‘پرچي’’ به شامل آهي، جيڪا سعودي ۾ پاڪستاني فلمن مان سڀ کان پهرين ڏيکاري ويندي، جنهن جي ڪاسٽ ۾ حرمين فاروق، علي رحمان خان ۽ شفقت چيما شامل آهن. فلم جي مرڪزي ڪردار حرمين فاروق جو چوڻ آهي ته فلم ‘‘پرچي’’ جو سعودي ٿيٽر لاءِ پهرئين چونڊ هجڻ اعزاز ۽ وڏي فخر جي ڳالهه آهي ۽ اهو ان ڳالهه جو ثبوت آهي ته پاڪستاني فلمون عالمي مارڪيٽ جو ڌيان بڻجي رهيون آهن. واضح رهي ته فلم ‘‘پرچي’’ پاڪستان ۾ 5 جنوري تي ريليز ڪئي ويندي.

 

ايندڙ ايشز کانپوءِ عهدو ڇڏي ڏيندس: آسٽريلوي ڪوچ ڊيرن ليهمن

سڊني (اسپورٽس نيوز) آسٽريلوي ڪرڪيٽ ٽيم جي هيڊ ڪوچ ڊيرن ليهمن چيو آهي ته مان 2019ع جي ايشز سيريز کانپوءِ پنهنجي معاهدي ۾ واڌ نه وٺندي عهدو ڇڏي ڏيندس. هڪ انٽرويو ۾ ڊيرن ليهمن چيو ته 2019ع ۾ انگلينڊ ۾ شيڊيول ايشز سيريز کانپوءِ مان ٽيم جي ڪوچنگ ڇڏي ڏيندس، ڇو ته ان لاءِ وڌ کان وڌ ڏيڻ سميت ڏاڍو سفر به ڪرڻو پوندو آهي. سندس چوڻ هو ته مان پنهنجي ڪوچنگ مان ڏاڍو لطف اندوز ٿيس ۽ اهو تجربو شاندار رهيو. واضح رهي ته ڊيرن ليهمن 2013ع جي ايشز سيريز کانپوءِ مڪي آرٿر جي جاءِ تي ڪوچنگ جي ذميواري سنڀالي هئي. سندس ڪوچنگ ۾ آسٽريلوي ٽيم 2015ع جو ورلڊ ڪپ کٽڻ سان گڏوگڏ هوم گرائونڊ تي ٻه ايشز سيريزون پنهنجي نالي ڪيون پر انگلينڊ ۾ کيڏيل ٻنهي ايشز سيريزن ۾ ڪينگروز کي شڪست جو منهن ڏسڻو پيو.

 

مانچسٽر سٽي ڪيلينڊر ايئر ۾ گولن ۾ سينچري مڪمل ڪري ورتي

مانچسٽر (اسپورٽس نيوز) مانچسٽر سٽي 1982ع کان پوءِ ڪيلينڊر ايئر ۾ گولن جي سينچري اسڪور ڪندڙ پهريون ڪلب بڻجي ويو آهي. هلندڙ سال ليگ ۾ ٽيم 55 پوائنٽس سان اڳڀري آهي، ان کي مانچسٽر يونائيٽڊ تي 14 پوائنٽن جي سرسي حاصل آهي، ان کان 35 سال اڳ 1982ع ۾ اهو ڪارنامو ليور پول انجام ڏنو هو، ان ڪيلينڊر ايئر۾ 106 گول ڪيا هئا، جڏهن ته مانچسٽر سٽي اهو ڪارنامو گذريل ڏينهن بورن مائوٿ ڪلب خلاف 0-4 تان ڪاميابي ماڻي انجام ڏنو. ان پرفارمنس کانپوءِ سيزن ۾ ڪلب جي گڏيل گولن جو انگ 100 ٿي ويو آهي، جنهن ۾ پريميئر ليگ جا 60 گول به شامل آهن. واضح رهي ته اها مانچسٽر سٽي جي لاڳيتي 17هين فتح هئي.

 

“را” ايجنٽن ”جي گهر ڀاتين سان ملاقات  ۽ گريٽ گيم..!!!: غلام مصطفيٰ جمالي

پاڪستان خاص طور تي بلوچستان اندر دهشتگردي جي ڪاروائين ۾ را” جو ملوث هجڻ اها ڪا نئي ڳالهه ناهي.بلوچ لبرشن آرمي جي ڪاروائين اندر پڻ را ملوث رهي آهي.جڏهن ته ان کان علاوا ڪراچي اندر پڻ ڪيترن ئي دهشتگردي واقعن اندر پڻ ڀارتي اينجسي “را” جي ملوث هجڻ جا پڪا ثبوت پهرين ئي حڪومت وٽ موجود هئا.بلوچستان مان گرفتار ڪيل ڀارتي ايجنسي “را” جي ايجنٽ ڪلڀوشن ياديو جو پڻ اعترافي بيان اچي چڪو آهي.جنهن اندر هن واَضع بيان ڪيو آهي ته ڀارت پاڪستان اندر نه رڳو دهشتگردي ڦهلائڻ چاهي ٿو پر سندس اصل مقصد پاڪ چين اقتصادي راءِ داري منصوبي کي ناڪام ڪرڻ آهي.جڏهن ته اهڙي اعترافي بيان کان پوءِ فوجي ترجمان پاران اهڙو بيان پڻ سامهون آيو آهي ته اهو معاملو گڏيل قومن اندر اٿاريو ويندو. اهو ضروري آهي ته ڀارت جي اهڙي دهشتگردي واري منصوبي کي ضرور گڏيل قومن ۾ اٿاريو وڃي.ڀارتي ايجنٽ پنهنجي اعترافي بيان ۾ چيو ته هو هو انيل گپتا جي ماتحت ڪم ڪندو هو.جڏهن ته بلوچ لبرشن آرمي کي پڻ ڀارتي ايجنسي“را” فنڊنگ ڪندي آهي.جڏهن ته اهڙو بيان هن وقت گرفتار ڪيل ڀارتي “را” جي ايجنٽ ڪلڀوشن ياديو جي بيان کان پوءِ سامهون آيو آهي.جڏهن ته پاڪستان پهرين  به اهو بار بار چئي رهيو ته پاڪستان اندر جيڪي به دهشتگردي جا واقعا پيش اچي رهيا آهن انهن واقعن جي پويان ڀارتي ايجنسي “را” جي ملوث هجڻ جو وڏي ۾ وڏو هٿ آهي.

ڀارتي ايجنسي را جو ڪراچي ۽ بلوچستان اندر ڪاروائين ۾ ملوث هجڻ جو ثبوت پڻ ملي چڪو آهي.جڏهن ته اڄ ڪالهه پنجاب اندر دهشگردي جو وڏو شور هلي رهيو آَهي.۽ پنجاب اندر هن وقت دهشتگردي پوري عروج تي هلي رهي آهي.جڏهن ته پنجاب جو قانون واري وزير اهو بار بار چئي رهيو آهي ته پنجاب اندر ڪوبه نوگو ايريا ناهي ۽ نه ئي پنجاب اندر دهشتگردن جا ڪي مظبوط ٺڪاڻا آهن.۽ جيئتري حد تائين بلوچستان جو تعلق آهي ته بلوچستان اندر ”را” جي ڪاروائين کان سڀ واقف آهن.جڏهن ته هڪ نظر سان ڏسجي ته بلوچستان اندر ماضي ۾ تمام گهڻيون زيادتون ٿيون آهن.انهي ڪري هن وقت شايد سڀ ڪجهه بلوچستان اندر ئي ٿي رهيو آهي هاڻ لڳي اهو پيو ته اهو سڀ ماضَي ۾ ڪيل ڪاروائين جو رد عمل آهي.جڏهن ته هن وقت هر ڪو بلوچستان اندر ٿيندڙ ڪاروائين جي وجهه کي پنهنجي اندر ۾ ڳولڻ جي ڪوشش ڪري رهيو هو.پر ان وقت ڀارتي ايجنسي “را” جو نالو وٺڻ کان هر ڪو ڊڄي رهيو هو.!جڏهن ته بلوچستان اندر بغاوت ڪندڙن سرادرن کي اسان خد مظلوم ظاهر ڪرڻ جي ڪوشش ڪري رهيا هئاسين.جڏهن ته اهي ڀارت کان مدد جي ڳالهه به ڪن ها ته ان کي نظر انداز ڪيو وڃي ها.هن وقت بلوچستان اندر جيڪو نظام هلي رهيو آهي ۽ جيڪي بلوچ سرادرن حڪومت کان ناراض ٿي ڪري  پنهنجي ملڪ خلاف وڙهي رهيا آهن.اتي هڪ اهو به سوال آهي ته ڇا انهي سرادرن کي پاڪستان جي امن لاءِ پرچائڻو پوندو.؟پر سوال اهو به پيدا ٿو ٿي ته آخر ڀارت بلوچستان اندر ايتري دلچسپي ڇو وٺِي رهيو آهي.؟انهي دلچسپي جو هڪڙو اهم ڪارڻ گوادر  جي بندر گاهه پڻ آهي.جڏهن ته ڀارت ۽ ٻيون عالمي قوتون اهو نه پيون چاهين ته پاڪستان چين اقتصادي راءِ منصوبو ڪامياب وڃي.ڇو ته اها سڀني کي خبر آهي ته گوادر بندرگاه جي منصوبي جو ڪامياب ٿيڻ پاڪستان جي قسمت بدلائي سگهي ٿو.انهي ڪري عالمي قوتون ڀارت سان ملي ڪري بلوچستان جا حالات خراب ڪرڻ جون ڪوششون ڪري رهيا آهن.ته جيئن پاڪ چين اقتصادي راءِ داري کي روڪي سگهجي.

انهي مقصد خاطر بلوچ سرادرن کي پئسا ڏنا پيا وڃن.ته جئين هو عالمي گريٽ گيم جو مهرو ٿي سگهن.هن وقت به جڏهن فرار ٿيل بلوچ هٿهيار ڦٽا ڪري رهيا آهن ته اهي ڪهاڻيون به عام هلي رهيو آهن ته انهن هٿيار فٽا ڪرڻ وارن کي به پئسا ڏنا پيا وڃن.ڇو ته اهي پئسا ڏيڻ جي به هڪ وجهه آهي.اها وجهه اهڙي پيش ڪئي پئي وڃي ته هٿيار فٽا ڪرڻ سان کين “را” پاران ملندڙ فلنڊنگ بند ٿي ويندي آهي.۽ کين پئسا انهي ڪري ڏنا ويندا آهن جو  هو پنهنجي زندگي سٺي نموني گذاري سگهن.اهڙن فرار بلوچن جي هٿيار فٽا ڪرڻ ۽ کين معافي ملڻ ڪري هاڻ ڪراچي ۾ به موجود “را”جا ايجنٽ معافي گهري رهيا آهن.اها به ڳالهه آهي ته جڏهن کين عام معافي ملي ويندي ته هوءُ به پئسا گهرندا..!ٻئي طرف آمريڪا به پنهنجي متحده عرب عمارات جي دوستي جي وجهه سان اهو نه ٿو چاهي ته گوادر منصوبي ڪامياب ٿي سگهي.۽ ايران به پنهنجي بندرگاهه چار بهار جي ترقي چاهي ٿو ۽ اهو به چاهي ٿو ته گوادر بندرگاهه بند ٿي.انهي ڪري بلوچستان ۽ گوادر بندرگاهه جي حوالي سان هڪ عالمي ڪلسٽر ٺهي ويو آهي.جنهن اندر عالمي قوتون ڀارت سان گڏ آهن.جڏهن ته ڀارت کي عالمي قوتون انهي نظر سان ڏسي رهيو آهن ته هوءُ پاڪستان اندر ڪاروايون ڪرائڻ ۾ اهم رول ادا ڪري سگهي ٿو.۽ عالمي قوتن کي اها به خبر آهي ته ڀارت جو پاڪستان اندر هڪ وڏو نيٽ ورڪ موجود آهي.انهي ڪري عالمي قوتن ڀارت کي وڏي مقدار اندر فنڊنگ ڪري رهيو آهن.انهي ڪري ڪي تجري نگار اهو سوچي رهيا هوندا ته ڪلڀوشن ياديو جي گرفتاري جي ڪري پاڪستان جي عالمي سطح ٿي پذيرائي ملندي پر شايد اهي انهي گريٽ گيم جي وساري چڪا آهن ته جيڪي ملڪ ڀارت سان گڏجي ڪري پاڪستان اندر اها گريٽ گيم کيڏي رهيا آهن اهي پاڪستان جي ڪهڙي پذيرائي ۽ حمايت ڏيندا.! پاڪستان ۽ ڀارت ايٽمي طاقت رکندڙ ٻه اهڙا پاڙيسري ملڪ آهن، جن مان ڪنهن به هڪ طرفان ڪنهن به قسم جي غير ذميواري اڳ ئي معاشي بدحالي ۽ هٿيارن جي ڊوڙ جي ور چڙهيل هن خطي جي تباهيءَ جو سبب بڻجي سگهي ٿي. ٻنهي ملڪن وچ ۾ ڪشمير سميت کوڙ اهڙا تڪرار آهن، جيڪي اڄ سوڌو حل ٿي نه سگهيا آهن، جنهن جو وڏي ۾ وڏو سبب ٻنهي ملڪن طرفان پنهنجي پنهنجي موقف تي قائم رهڻ آهي. تاڙي هڪ هٿ سان ناهي وڄندي سو جيڪڏهن ارادو هجي ته لچڪ جو مظاهرو ڪندي تڪرارن کي پرامن نموني حل ڪري سگهجي ٿو پر جيتري قدر پاڪ-ڀارت لاڳاپن ۽ حل طلب تڪرارن کي ڳالهين ٻولهين جي ذريعي حل ڪرڻ جو سوال آهي ته انهيءَ سلسلي ۾ رڳو پاڪستان ئي لچڪ ڏيکاريندو رهيو آهي ۽ هندستان پنهنجي ئي هوڏ تي قائم رهيو آهي، هندستان جي هَٺَ ۽ ضد واري رويي سبب ئي ننڍي کنڊ جو امن ٽياس تي ٽنگيل رهيو آهي ممبئي حملا هجن يا پٺاڻ ڪوٽ وارو معاملو، هندستان هميشه پاڪستان کي ڊڪٽيٽ ڪندو ۽ اڃا به گهڻو ڪجهه ڪرڻ (ڊو مور) جو مطالبو ڪندو رهيو آهي، جڏهن ته پاڪستان پاران خطي ۾ امن لاءِ ڀارت کي رويو سڌارڻ واري صلاح ۽ مشوري کي هميشه هندستان توڙي عالمي طاقتن ٻڌو اڻ ٻڌو پئي ڪيو آهي. ممبئي حملا هجن يا پٺاڻ ڪوٽ وارو واقعو انهن جو پاڪستان تي جڏهن الزام هنيو ويو ته پاڪستان ٻه قدم اڳتي اچي جاچ ۾ نه رڳو سهڪار ڪيو پر ڪري به رهيو آهي، اهو ان ڪري جو انهن ۾ ڪي اهڙا عنصر ملوث رهيا آهن، جن جو اهو ذاتي فعل چئي سگهجي ٿو پر بلوچستان مان ”را“ جي آفيسر جي گرفتاريءَ مان اها ڳالهه درست ثابت ٿي وئي آهي ته هندستان رياستي سطح تي پاڪستان اندر دهشت گرديءَ جي نه رڳو سرپرستي ڪري رهيو آهي پر ان کي هٿي به وٺرائي رهيو آهي.

سنڌ جي راڄڌاني ڪراچي ته ڏهاڪن کان وٺي دهشت گرديءَ جي باهه ۾ سڙي رهي آهي. جي اهڙي قسم جي مداخلت نه هجي ها ته اڄ ڪراچي شايد ترقيءَ جون الائجي ڪهڙيون منزلون طئي ڪري ها، پنهنجن توڙي پراون هن شهر سان جيڪي ويل وهايا آهن، تنهن جو ئي نتيجو آهي جو هيءُ شهر نفرتن ۽ تضادن جي ور چڙهيل آهي سو چوڻ جو مطلب ته ٻين ملڪن ۾ مداخلت ۽ ايجنٽ موڪلڻ ۽ انهن ڏانهن ايجنٽ موڪلي دهشت گردي کي وڌائڻ ڪنهن جي به مفاد ۾ ناهي. بهتر ٿيندو ته هڪ ٻئي کي نقصان پهچائڻ بدران لڪل ويڙهه وڙهڻ ۽ دهشت گرديءَ کي هٿي وٺرائڻ بدران ڳالهين ذريعي تڪرار نبيرڻ کي ترجيح ڏني وڃي، ڇو جو مسئلي جو حل جنگين ۽ ويڙهه سان نه پر ڳالهين جي ذريعي ئي ڪرڻو آهي. نه صرف ايترو پر هندستان کي به پاڪستان ڏانهن پنهنجو ايجنٽ موڪلڻ، جنهن کي هو پنهنجو شهري ۽ نيويءَ جو اڳوڻو ايجنٽ تسليم ڪري چڪو آهي، وري معاملي جي وضاحت پيش ڪرڻ گهرجي، نه رڳو ايترو پر عالمي برادري پڻ اهڙي عمل جو نوٽيس وٺي، جنهن جي ڪري هن خطي جو امن يرغمال بڻيل آهيايراني صدر جو دوري جي موقعي تي ڀارتي ايجنٽ ڪلڀوشن يادويو گرفتار ٿيو.جڏهن ته اهڙي ايراني صدر جي دوري دوران ڪلڀوشن ياديو کي سامهون آڻڻ ۾ به هڪ مقصد آهي. ته جيڪڏهن هو پاڪستان سان پنهنجا تعلق بهتر بڻائڻ چاهي ٿو ته کيس انهي گريٽ گيم مان ٻاهر نڪرڻو پوندو.جڏهن ته هن وقت ايران جو به چاهي ته عرب ملڪن ۾ هلندڙ جنگ جي اندر پاڪستان شامل نه ٿي.انهي ڪري پاڪستان به اهو چاهي ٿو ته ايران به بلوچستان اندر جاري گريٽ گيم جو حصو هرگز نه بڻجي.۽ هو پاڻ خد انهي گريٽ گيم کان پاسيرو رهي ته بهتر آهي۽ جيڪڏهن اهي ٿي ويو ته يقينن ڀارت جو نيٽ ورڪ به ڪمزور ٿيندو.۽ سندس ڪاروايون ڪر ڻ جي صلاحيت به ختم ٿي ويندي.جڏهن ته پوءِ ڀارت جي آمريڪا جي حمايت حاصل هوندي.جنهن جي ڪري ڀارت جي عالمي سطح تي ڪنهن به وڏي خطري جو ڊپ نه هوندو.پاڪستان جڏهن ته گوادر منصوبو چين حوالي ڪيو آهي.ان ڏينهن کان وٺي آمريڪا انهي کي روڪڻ جي ڪوشش ڪري رهيو آهي.جڏهن ته پاڪستان کي صرف ۽ صرف چين کي حمايت حاصل آهي ۽ ڀارت کي پوري يورپ ۽ آمريڪا جي حمايت حاصل آهي.جڏهن ته يورپ ۽ آمريڪا سڀ ڀارت سان گڏ آهن.انهي ڪري ڪلڀوشن ياديو جو مسئلو عالمي سطح تي اٿارڻ کان پهرين انهي گريٽ گيم جي شطرنج کي سمجهڻ تمام گهڻو ضروري آهي

 

چڪورن جون اکيون چنڊ تلاشين ٿيون!: ايم صالح چنا

خوبصورت بهارن جي شامن ۾ شوخ ۽ چنچل هوائن ۽ موسمي پرڪيف نظارن ۾، دل اهڙو ڪجهہ ڳولڻ ۽ چاهڻ لڳندي آهي. جيڪو اندر جي ماٺيلي موسم کي عيان ڪري يا نکاري سگهي. دل جنهن جي انت بحر جي ڪا ڪل پئجي نہ سگهي آهي، اهڙو ڪجهہ اپنائڻ تي اسرار ڪندي ڏٺي وئي آهي، جنهنجو حصول ناممڪن نہ تہ اڪثر مشڪل ضرور هوندو آهي. دل جي اُڌمن ۽ اسرارن جي ڪَٿَ لڳائڻ، ماڻهوءَ جي معيار ۽ ميزان کان مٿي واري منزل هجي ٿي. هر اُها شيءَ جنهن جو حاصل اڙانگو ۽ اوکو هجي. اتي دل ٽپو ڏئي آه زاري ڪندي، حاصلات جون حدون اورانگهيندي ڏٺي وئي آهي. چڪور جڏهن چاهنا ۾ اونداهين راتين جون اماوسون سهندو آهي. تڏهين هُو ڏاڍو مجبور ۽ اُداس هوندو آهي، پر جڏهن چنڊ آڪاش تي پنهنجا تجلا ۽ ترورا ڏيکارڻ لاءِ طلوع ٿيندو آهي. تڏهن سندس جا سڀ ٿَڪَ ڀڄي پوندا آهن، ۽ ائين گهورڻ شروع ڪندو آهي. جيئن ڪو هن اڄ ئي چنڊ ڏٺو هجي، نيٺ جدائيءَ جو جيئدان کڻي اهو وقت بہ اچي ويندو آهي. جڏهن چنڊ اڀ تان الهي ويندو آهي. ۽ پاڻُ نہ ڍاپيندي چڪور ساڻو ٿي ڪِري پندو آهي. اڄ ڪروڙين چڪورن جون اکيون هڪ چنڊ کي تلاشين ٿيون. جيڪو چنڊ سندن اکين جو ٺارُ ۽ نورُ هيو، اهو چنڊ آڪاس تان هميشہ جان لئہ لهي، اهڙن جبلن ۽ پهاڙن جي پٺيان لِڪي ويو آهي،جن جون اوچايون آسمان سان لڳندڙ هجن، چور چور چڪورن جون اکيون رت ڦڙا هاري، اڄ پڇائون ڪن ٿيون تہ، اسان جي اکين کي رنگت ۽ نورانيت بخشڻ وارو خوبصورت چنڊُ ڪيڏانهن غائب ٿي ويو آهي، درحقيقت چنڊُ نہ غائب ٿيندو آهي، ۽ نہ ئي لهي ويندو آهي، زمين جو مدار کيس اسان جي اکين کان اوجهل ڪري ڇڏيندو آهي. هُو موجود هوندو آهي پر اسين کيس ڏسي نہ سگهندا آهيون ۽ وري پنهنجي مقرره وقت تي اچي، ڏسڻ ۽ چاهڻ وارن جي ديدن کي پنهنجي درشن سان مشرف ڪندو آهي. پر اسان جي چنڊَ ( بينظير ڀُٽو شهيد) کي زميني مدار (دشمن) پنهنجي گردش ۾ آڻي اهڙو تہ لِڪائي ۽ مڻ مٽين ۾ مدفون ڪرائي ڇڏيو آهي، جو اُهو چمڪي فلڪ تي کِڙي وري پنهنجا تجلا ترورا ۽ تابش ڪڏهن بہ ڏيکاري نہ سگهندو، هُوءَ، جيڪا اھڙن پولارن ۽ پاتالن ڏانهن اُماڻي ويئي آهي، سا هزار چاهڻ باوجود بہ پنهنجين سمورين صلاحيتن سميت وري اسان اڳيان جلوه افروز نہ ٿي سگهندي. پر ڪروڙين اکيون قيامت تائين،سندس جي اچڻ جي آس ۾ راهہ نهارينديون رهنديون ۽ ڳوڙها ڳاڙينديون رهنديون،

اڄ هڪڙي اهڙي ڪمي مسحوس ٿي رهي آهي، جنهن جو پورائو ناممڪن آهي.  ملڪي سياست جي وڇايل بساط تي، اڄ اهڙي مُهري جي اشد ضرورت محسوس پئي ٿئي جنهن کي ”بادشاهہ” چيو ويندو آهي، پيادن ۽ غلامن جي تہ ڀرمار آهي پر اھڙو مُک مُهرو موجود نہ آهي. جيڪو بازي پنهنجي حق ۾ نہ هوندي بہ کَٽي ڏيکاري، ناواڪف رانديگر راند کيڏي رهيا آهن ۽ بازي پنهنجي حق ۾ هوندي بہ منجهيل ۽ الجهيل نظر پيا اچن. وکن وارو پنڌُ. ميلن مثل لڳي رهيو آهي،فتح هوندي شڪست نظر اچي رهي آهي، وقت وڏو بيرحم آهي، جنهن آڏو بيوسي ۽ بيڪسي ڪا معنيٰ نٿا رکن، وقت اسان جو اهڙو ڪجهہ وڃايو آهي، جيڪو ڪڏهن بہ اسان کي واپس وري نٿو سگهي. هيءَ دنيا. جتي مسيحائن جو فقدان ۽ ظالمن جي انگ ۾ اضافو ٿيندو پيو وڃي. اتي اهڙن سپوتن ۽ سرفروشن کي جنم وٺڻو پوندو. جيڪي ڪنهنجي جاءِ ڀري نہ سگهن تہ گھٽ ۾ گهٽ ڪنهنجي سِڪَ تہ لاهي سگهن، ميڊيا جي هر اسڪرين تي. عوام جون اتاوليون اکيون اھڙي تصوير کي ڏسڻ چاهن ٿيون. جنهن ۾ اُهي سڀ خوبيون هُيون. جيڪي هڪ “ مڪمل انسان“ ۾ هونديون آهن پر سونهن. سوڀيا ۽ سڀاءُ جي راڻي اسان کان فطرتي  رمز ۾ رُسي. اھڙي ڏيهہ هلي ويئي آهي. جتان وري واپس ورڻ ڪنهن جي وَسَ جي ڳالهہ نہ آهي، هڪ سِرَ جي قيمت هزارين سِرَن ۾ هجي هان تہ. هتان جو عوام لکين سِرَن جو ٻليدان ڏئي. ان هڪ سِرَ کي بچائي وٺي هان. جيڪو سِرُ موت نہ پر سونو تاج پهرڻ جي لائق هُيو. سنڌُ جو اُجاڙ خانو. اهڙي بينظير جي راهہ نهاري ٿو. جيڪا سندس لٽيل بهارُن جون شامون واپس ڪري سگهي، هر ايندڙ سياري. سرد راتين واري مزي کان اسان کي محرور ڪري محترمہ جي وڍ ڏيندڙ وڇوڙي جو اھڙو روڳ ڏنو آهي. جيڪو بهارن جون بهاريون بہ ڀُلائي نٿيون سگهن. بهارون تہ گلن جي ڳاڙھاڻ ۽ خوشبوئن جون کٿوريون آڻينديون آهن پر هاڻِ هر سال جي بهار تہ گلن ۽ خوشبوئن بدلي بيڪراريون. بيوفايون ۽ بيچينيون ئي آڻيندو رهندو، موسمون ماڻهوءَ جو ڪجهہ بہ تبديل ڪري نہ سگهنديون آهن. جيسيتائين انسان جي اندر جي موسم خوشگوار نہ ناهي. تيسيتائين ٻاهرين هر موسم جو مٽجڻ بي معنيٰ ۽ بيرنگ هوندو آهي بهار اچڻ کان اڳ ڪو سيارو غم جي اھڙي ڌٻڻ ۾ ڦاسائي ويو هيو. جنهن مان نڪري نئين ڪنهن بهار کي اسان ويلڪم بہ نہ چئي سگهنداسين. ڊسمبر جو مهينو سال کي ختم ڪرڻ سان گڏُ اُهي رونقون بہ ختم ڪري ويو جيڪي وري بحال نہ ٿيڻيون آهن. ڏُهاڳ ڀريو ڊسمبر اهڙي شخصيت جي موت هو زميوار آهي. جنهن شخصيت مڙني مهينن سان هڪ جهڙو ورتاءُ رکندي. هر موسم ۾ پاڻُ پتوڙي عوام جي تقدير جي موسم مٽائڻ جا خواب ڏٺا هئا, پر اسان کان تقدير سان گڏ تاريخ بہ کسي ويئي جنهن جا اسين (سنڌي) وارث چورائڻ جا حقدار بڻيا هئاسيون. اڄ ساڳي ئي ستاويهہ ڊسمبر آهي. جنهن جي لڙندڙ شام. ڏهہ سال اڳ رب جي وڇايل پوري زمين تي ڏکن غمن ۽ روڄ راڙي جا ڪارا ڪڪر مينهن جيان برسايا هئا. ستاويهہ ڊسمبر 2007جي لهندڙ سج. اُهي سڀ خوشيون. اميدون آسون ۽ سانڍيل سپنا. رت جي ڳوڙھن ۾ تبديل ڪري ڇڏيا هئا. جن جو رشتو ۽ تعلق صرف سنڌ راڻي بينظير ڀُٽو سان ئي ٿَي وڃي جڙيو، پورو ملڪ خصوصن سنڌ محترمہ جي اڻ مندائتي مرتئي تي ڪنهن کنڊر ڏيک ڏئي رهي هئي. ۽ رڙيون ڪري چئي رهي هئي تہ اڄ منهنجي سينڌ اجڙي ويئي. محبت عزت ۽ اڪير جي علامت. اڄ منهنجي مارئي مونکان هميشہ لاءِ ڪنهن عمر هٿان کسجي ويئي، ڏيرن جي ڏُهاڳ جو شڪار سسئي، اڄ ٻيهر بيرم سياست جي رڻ ۾ رلي ويئي اڄ ٻي سهڻي عوامي عشق جو درياهہ پار ڪندي. دهشتگردي جي ڪچي گهڙي جو فريب بڻجي ويئي. اڄ منهنجو وڌندڙ وسندڙ/ڏسو صفحو 3 بقايا نمبر 01

چمن برباد ٿي ويو اڄ آئون يتيم بڻجي ويسِ. سنڌ راڻي جي وڇڙڻ جو ٻُڌي ڪا اھڙي اک نہ هئي جيڪا رني نہ هجي، ڪا اهڙي پٿر دل نہ هئي جنهن زور سان ڌڙڪو کاڌو نہ هجي. ٻين صوبن سميت سڄي سنڌ اندر هر گهر ۾ عقيدت ڀريو تڏو وڇايو ويو هيو. جنهن تي ويٺلن جا چهرا پنهنجي عزيز جي موت کان وڌيڪ مايوس ۽ ڏکارا هئا. هر گهر ۽ گهٽيءَ ۾ ماتم نما ماحول هئو. سڏڪا هئا افسوس هئو ۽ ساريون اکيون اشڪبار هيون.
هن جا نظريا ۽ آدرش. هن جون تحريرون ۽ تقريرون اڄ بہ اسان جي سماعتن ۽ بسارتن اڳيان رقص پيو ڪن. محترمہ سان اسان جي روحاني ويجهڙائي ۽ ڪميٽمينٽ اهو ڪڏهن بہ مڃڻ لاءِ حامي نہ پئي ڀري تہ هُوءَ ( بينظير) جيڪا اسان جي اميدن ۽ امنگن جو سچو پچو عڪس هئي، جيڪا اسان جي ماضي جي وارث. حال جي ساٿياڻي ۽ روشن مستقبل جي ضمانت هئي. اُها اسان کان ائين ڪيئن رُسي مڻ مٽين ۾ مدفون ٿي. اسان کي هميشہ جي لئہ الوداع چئي سگهي ٿي هوءَ اڄ بہ زنده آهي ڇو تہ شهيد ڪڏهن بہ مرندا ناهن..!

 

دهشتگردي جو سبب بڻيل آمريڪا…!!

گذريل آچر ڏينهن اسلام آباد ۾ منعقد ٿيندڙ پهرين اسپيڪرز ڪانفرنس جي پڄاڻي تي جاري ڪيل 29 نقاطي گڏيل پڌرنامي ۾ چيو ويو آهي ته اسان ون بيلٽ ۽ ون روٽ جي منصوبي جي سپورٽ ۽ آجيان ڪريون ٿا ۽ عالمي تعاون جي لاءِ مئي 2017ع ۾ چين ۾ منعقد ٿيندڙ ون بيلٽ ۽ ون روٽ فورم جي ڪاميابي کي ساراهيون ٿا.پاڪستان، چين، روس، ترڪيءَ،ايران ۽ افغانستان علائقائي سلامتي، خودمختياري ۽ آزادي جي تحفظ جي عزم کي ورجائيندي چيو آهي ته دهشتگردي جو تعلق ڪنهن به مذهب، قوميت، تهذيب، ثقافت يا نسلي گروپ سان نه ڳنڍڻ گهرجي، دهشتگردي اسان جي ملڪن سميت پوري دنيا جي لاءِ گڏيل خطرو آهي، اسان ان جي ڪنهن به قسم جي مذمت ڪريون ٿا، اسان جي حڪومتن کي گهرجي ته اهي دهشتگردي جي خاتمي لاءِ ٺوس حڪمت عملي ۽ گڏيل قدمن ذريعي عملي  ۽ ٺوس قدم کڻن، پاڪستان ۽ ڀارت گڏيل قومن جي سلامتي ڪائونسل جي قراردادن جي روشني ۾ عالمي ۽ علائقائي امن کي يقيني بڻائڻ جي لاءِ ڄمون ۽ ڪشمير جي تڪرار جو پرامن حل ڪڍن، دهشتگردي جي نظرين جي پکيڙ ۽ پروپئگنڊه جي روڪٿام جو موثر تعاون ضروري آهي.  پڌرنامي ۾ دهشتگردن پاران پارليامينٽ تي حملي جي مذمت ڪندي اهڙن ملڪن جي حڪومتن ۽ عوام سان يڪجهتي جو اظهار ڪيو ويو آهي جڏهن ته 15 جولاءِ تي ترڪيءَ ۾ فوج پاران اقتدار تي قبضي جي ڪوشش جي مذمت ڪندي شرپسندن کي قانون جي ڪٽهڙي ۾ آڻڻ جي لاءِ ترڪيءَ سان ڀرپور تعاون جي خاطري ڪرائي. گڏيل پڌرنامي ۾ القدس جي جاگرافيائي حيثيت تبديل ڪرڻ جي قدمن ۽ فيصلن جي مذمت ڪندي ان عزم کي ورجايو ويو ته وچ اوڀر جي مسئلي جو حل عالمي قانون موجب هجڻ گهرجي. پڌرنامي ۾ عراق ۽ شام ۾ داعش جي شڪست جي ڏس ۾ حاصل ڪيل ڪاميابين جي آجيان ڪندي چيو ويو آهي ته خطي جي ملڪن جي سلامتي ۽ استحڪام جي لاءِ داعش هڪ سنجيده خطرو آهي ۽ ان خطري کي منهن ڏيڻ جي لاءِ گڏيل ڪوششون ڪيون وڃن. گڏيل پڌرنامي ۾ تشدد جي خاتمي ۽ شامي بحران جي سياسي حل لاءِ آستانه فريم ورڪ جي آجيان ڪئي وئي آهي. هڪ ملڪ کي ٻين رياستن پاران هڪ طرفي يا اضافي علائقائي قانون جيڪي عالمي قانونن، گڏيل قومن جي چارٽر جي نفي هجن ۽ خودمختياري ۽ آزادي جي خلاف ورزي هجن، انهن جي استعمال کي رد ڪريون ٿا. پڌرنامي ۾ ان ڳالهه تي رضامندي ظاهر ڪئي وئي آهي ته ڳالهين، اعتماد سان دهشتگردي جي گڏيل چئلينج کي منهن ڏيڻ جي لاءِ مدد ڪئي وڃي. پڌرنامي ۾ ڊگهي مدي واري سفارتڪاري، بشمول پارلياماني سفارتڪاري جي حوصلا افزائي جو عزم ڪيو ويو آهي. پڌرنامي ۾ ملڪن معاشرن ۽ عوام جي سطح تي اقتصادي ترقي جي لاءِ رابطا وڌائڻ جي لاءِ ڪوششن تي رضامندي جو اظهار ڪيو ويو. گڏيل پڌرنامي ۾ اسپيڪرز ۽ وفدن جي سربراهن پاڪستان پاران اسپيڪرز ڪانفرنس جي ڀرپور ۽ گرمجوش ميزباني تي قومي اسيمبلي جي اسپيڪر جا ٿورا مڃيا. وفدن جي سربراهن ۽ اسپيڪرز ايندڙ سال ٻي اسپيڪرز ڪانفرنس تهران ۾ منعقد ڪرائڻ تي رضامندي ظاهر ڪئي.