تازيون خبرون

Daily Archives: December 23, 2017

اختلاف پنهنجي جڳهه تي جڏهن ملڪ جو معاملو هجي سنڌ جو وڏو وزير سپورٽ ڪندو آهي: وزير اعظم

ڪراچي(ويب ڊيسڪ) وزير اعظم شاهد خاقان عباسي ڪراچي ۾ وائٽ آل پائپ لائن موٽر گيسولين منصوبي جي پيڙهه جو پٿر رکي ڇڏيو. تقريب کي خطاب جڪندي وزير اعظم چيو ته تيل کي روڊ جي ذريعي موڪلڻ ۾ نقصان ۽ خطرو آهي، ان ڪري سڄي دنيا ۾ پائپ لائنن کي استعمال ڪيو ويندو آهي. هن چيو ته ٽينڪرن جو وڏو انگ نظام ۾ هئڻ سبب حادثن جو خطرو رهندو آهي، بهاولپور ڀرسان ٿيل حادثو ان جو مثال آهي. شاهد خاقان عباسي چيو ته ٽرانسپورٽن جي ڪاروبار جو خيال رکيو آهي،  منصوبي سان انهن کي نقصان نه ٿيندو، ٽينڪر سيڪنڊري تيل لاءِ ڪم ڪندا، سندن ڪم ۾ گهٽتائي نه ايندي. هن ٻڌايو ته 15 ارب رپين جي لاڳت وارو منصوبو 20 مهينن ۾ مڪمل ٿيندو اميد آهي ته تيل اماڻن واري منصوبي تي ڪم جلد کان جلد مڪمل ٿيندو. سندس وڌيڪ چوڻ هو ته پيٽروليم شين جي معيار کي بهتر بڻايو پيو وڃي.

 

اليڪشن ڪميشن جو اجلاس، ملڪ جون سموريون روينيو بائونڊريز سيل ڪرڻ جو حڪم

اسلام آباد (اين اين آءِ) اليڪشن ڪميشن آف پاڪستان نين تڪبندين جو ڪم 15 جنوري کان شروع ڪرڻ جو اعلان ڪندي چيو آهي ته نين تڪبندين جي حوالي سان ڪم 3 مئي 2018 تي مڪمل ٿيندو، چونڊن واري لسٽن تي نظرثاني جو ڪم 30 اپريل کان اڳ مڪمل ڪيو ويندو، جمعي تي اليڪشن ڪميشن ۾ اعليٰ سطحي اجلاس چيف اليڪشن ڪمشنر جسٽس رٽائرڊ سردار محمد رضا جي صدارت ۾ ٿيو جنهن ۾ اليڪشن ڪيمشن جي چئني ميمبر، چئني صوبائي اليڪشن ڪمشنرز، چارئي چيف سيڪريٽري، چيئرمين نادرا، سيڪريٽري شماريات ڊويزن سميت ٻين عملدارن شرڪت ڪئي، اجلاس ۾ نين تڪبندين تي ڪم شروع ڪرڻ جو فيصلو ڪيو ويو، اجلاس کانپوءِ صحافين سان ڳالهائيندي سيڪريٽري اليڪشن ڪيمشن بابر يعقوب فتح محمد ٻڌايو ته اڄ چيف اليڪشن ڪمشنر جي سربراهي ۾ اهم اجلاس ٿيو جيڪو عام چونڊن جي تيارين جي پهرين ڪڙي هو، اليڪشن جي تياري جو ڪم شروع ڪيو ويو آهي، جڏهن ته اليڪشن جي تاريخ جو اعلان اڃا نٿا ڪري سگهون، اليڪشن ڪميشن اڄ کان سڄي ملڪ ۾ روينيو بائونڊريز منجمند ڪرڻ جو فيصلو ڪيو آهي، 2018 جي عام چونڊن تائين ان ۾ تبديلي نه ٿي سگهندي، هن چيو ته آدمشماري جي عبوري رپورٽ اليڪشن ڪميشن کي فراهم نه ڪئي وئي آهي، شماريات جي سيڪريٽري ٻڌايو ته پاڪستان جي صدر اڃاتائين آئيني ترميم تي صحيح نه ڪئي آهي، صدر جي صحيح سان بل ايڪٽ بڻجندو ته آدمشماري جا عبوري نتيجا ملندا، قانون تحت اسان ساڍن 3 مهينن ۾ تڪبنديون مڪمل ڪري وٺنداسين، اليڪشن ڪميشن 5 ڪميٽيون مقرر ڪري ڇڏيون آهن، تڪبندين جي پروپوزل لاءِ 45 ڏينهن رکيا آهن، 3 صوبائي حڪومتن ۽ شماريات کاتي کي 10 جنوري تائين نقشا ۽ ٻيو مواد فراهم ڪرڻ جي هدايت ڪئي وئي آهي، مئي 2018 تائين تڪبندين بابت ڪارروائي مڪمل ڪري وٺنداسين، جيڪڏهن نقشا ۽ ٻيو مواد جلد فراهم ڪيو ويو ته تڪبنديون جلد ٿي وينديون، هن چيو ته چونڊن جي لسٽ تي نظرثاني لاءِ گهربل عملي لاءِ ايندڙ هفتي ٻڌايو ويندو، 15 لک نوان ووٽ داخل ڪرڻ جو عمل به شروع ڪيو ويندو، هن چيو ته حساس پولنگ اسٽيشنز تي سي سي ٽي وي ڪميرا لڳايا ويندا، هن ٻڌايو ته اجلاس ۾ هڪ اهم فيصلو اهو به ڪيو ويو آهي ته 22 ڊسمبر کانپوءِ ضلعه، تعقله، يوسي جي حد ۾ ڪا تبديلي نه ٿي سگهندي، هن ٻڌايو ته اجلاس دوران نوان ووٽ داخل ڪرڻ لاءِ صوبائي حڪومتن کان مدد طلب ڪئي وئي آهي. قانون موجب اسيمبلي جو مدو ختم ٿيندي ئي چونڊن جي تاريخ لاءِ سمري صدر ڏي موڪلي ويندي، هن ٻڌايو ته هلندڙ سال اليڪشن ڪميشن کي چونڊ تيارين لاءِ 13 ارب گهربل هوندا، جڏهن ته ايندڙ سال لاءِ 8 ارب رپين جي ضرورت پوندي، اهي پيسا شيڊول موجب ملي رهيا آهن، پيسن جي کوٽ نه آهي، هن ٻڌايو ته جنوري جي پهرين هفتي ۾ چونڊن جي لسٽن تي نظرثاني جو ڪم شروع ڪيو ويندو.

 

امداد جي ضرورت ناهي آمريڪا ڌمڪي نه ڏئي، فلسطين جي حمايت تان هٿ نه کڻبو: پيپلز پارٽي

رتوديرو(ويب ڊيسڪ) قومي اسيمبلي ۾ مخالف ڌر جي اڳواڻ خورشيد احمد شاھ چيو آھي ته گڏيل قومن جي اجلاس ۾ پاڪستان سميت 135 ملڪن آمريڪي صدر ڊونلڊ ٽرمپ جي فيصلي خلاف ووٽ ڪري فلسطين جي حمايت ڪئي آھي اھا ھڪ وڏي فتح آھي ۽ تبديلي آھي. ھڪ سوال جي جواب ۾ ھن چيو ته ڊونلڊ ٽرمپ پاران امداد بند ڪرڻ واري ڌمڪي جي پرواھ ناھي  نه ئي ڪا ضرورت آھي. پر فلسطين جي حمايت واري فيصلي تان دستبردار نه ٿينداسين. ھن چيو ته پاڪستان اندر آمريڪي تعاون سان ھلندڙ منصوبن تي ڪو فرق نٿو پئجي سگھي. ڊونلڊ ٽرمپ جي غلط فيصلي آمريڪا تي پڻ اثر ڇڏيا آھن ٽرمپ آمريڪا کي دنيا ۾ اڪيلو ڪرڻ طرف وٺي وڃي رھيو آھي . خورشيد احمد شاھ وڌيڪ چيو ته اسان جي ملڪ ۾ تعيلم جي لاء بجيٽ تمام ٿوري رکي ٿي وڃي ان ڪري تعليم لاء وڌ کان وڌ بجيٽ رکڻ گھرجي گھٽ بجيٽ ھجڻ باوجود سنڌ اندر تعليمي ادارا ٺاھيا آھن . ميڊيڪل انجنئينرنگ ڪاليجون ٺاھيون ويون آھن .پرائمري تعليم کي بھتر بنائڻ جي ضرورت آھي . جيئن ھائر سيڪنڊري تعليم جي لاء ڪميشن آھي اھڙي طرح پرائمري تعليمي ڪميشن به ٺاھڻ گھرجي . ھن چيو ته پيپلزپارٽي جيڪو ماضي جي چونڊن ۾ اليڪشن مھم دوران جيڪو پروگرام ترتيب ڏنو ھو ان تي پورو لٿي  آھي .ان تي عمل درآمد ڪرايو ويو آھي . سنڌ اندر  رڪارڊ ترقياتي ڪم ڪرايا ويا آھن . نوڪريون ڏنيون ويون آھن . ايندڙ چونڊون لاء پيپلزپارٽي تيار آھي .جمھوري طريقي سان  چونڊون وڙھنداسين پارٽي ڇيئرمين بلاول ڀٽو زرداري جي جلسن مخالفن جون ننڊون ئي ڦٽائي ڇڏيون آھن . سياسي پارٽين اندر مائينس واري فارمولي کي نٿا مڃون جيڪڏھن ائين ھجي ھا ته عمران خان به مائينس ٿي وڃي ھا .ھن چيو ته اسان احتساب واري عمل جا حمايتي آھيون پر احتساب ايمانداري جي بنياد ٿيڻ گھرجي تعصب واري بنياد تي ٿيندڙ احتساب جي مخالفت ڪنداسون .عمران خان کي سنڌ ۾ شڪست ڏينداسون .

 

جهل مگسي ۾ ٻن ڌرين ۾ پراڻي تڪرار تان جهيڙو، 5 ڄڻا مارجي ويا

جهل مگسي(ويب ڊيسڪ) جهل مگسي ۾ ٻن ڌرين ۾ پراڻي تڪرار تان جهيڙو، گوليون لڳڻ سبب 5 ڄڻا مارجي ويا. جهل مگسي ويجهو گهاري ۾ ٻن ٻرڙا برادري جي ٻن ڌرين ۾ زمين جي مالڪي تان جهيڙو ٿيو پيو، هٿياربندن جي فائرنگ ۾ 5 ڄڻا ٿڏي تي ئي مارجي ويا. واقعي جي اطلاع تي ليويز اهلڪارن پوليس فوتين جا لاش کڻائي تعلقا اسپتال پهچايا. ليويز اهلڪارن جو چوڻ آهي ته واقعو پراڻي دشمني جي نتيجي ۾  هڪ ئي ڌر جا ڄڻا مارجي ويا. ليويز عملدارن جو چوڻ آهي ته واقعي جو ڪيس داخل ڪري جوابدارن جي گرفتاري لاءِ  ڪارروائي شروع ڪري ڏني آهي.

 

سپريم ڪورٽ طرفان 12  سالن کان گهٽ عمر جي ٻارڙن تي نائين ڪلاس ۾ داخلا تي پابندي

لاهور( ويب ڊيسڪ ) سپريم ڪورٽ 12 سالن کان گهٽ عمر جي ٻارڙن تي نائين ڪلاس ۾ داخلا تي ٻيهر پابندي لڳائي ڇڏي آهي. سپريم ڪورٽ لاهور رجسٽريءَ ۾ بورڊ آف سيڪنڊري ايجوڪيشن پنجاب جي درخواستن تي ٻڌڻي ڪئي وئي. ڪيس جي ٻڌڻي چيف جسٽس ثاقب نثار جي سربراهيءَ ۾ 2 رڪني بئنچ ڪئي. تعليمي بورڊ جي وڪيل عدالت کي ٻڌايو ته پنجاب بورڊ آف انٽر مئڊيٽ اينڊ سيڪنڊري ايجوڪيشن ايڪٽ 1976ع تحت تعليمي بورڊ کي شاگردن جي عمر جي حد مقرر ڪرڻ جو اختيار آهي ۽ لاهور هاءِ ڪورٽ بورڊ آف انٽر ميڊيٽ کي گهٽ عمر جي ٻارڙن کي نائين درجي ۾ داخلا ڏيڻ جو حڪم ڏنو آهي، فيصلي کانپوءِ نائين جماعت لاءِ گهٽ ۾ گهٽ عمر جي حد وڌائي وئي آهي.  چيف جسٽس ڪاوڙ جو اظهار ڪندي رمارڪس ڏنا ته تعليمي بورڊ ڪيئن ٻارڙن جي تعليم حاصل ڪرڻ جي عمر مقرر ڪري سگهي ٿو ۽ جيڪڏهن ڪو ٻار لائق آهي ته ان جو مطلب اهو ناهي ته ان تي پابندي لڳائي وڃي پر اسان قانون هٿان مجبور آهيون. عدالت لاهور هاءِ ڪورٽ جي فيصلي کي ڪالعدم قرار ڏيندي 12 سالن کان گهٽ عمر جي ٻارڙن جي نائين ڪلاس ۾ داخلا تي پابندي لڳائي ڇڏي آهي.

 

پي ايس ايل ٿري جو فائنل: وڏي وزير طرفان پوليس کي فل ڊريس ريهرسل جو حڪم

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته ڪراچي جا شهري پاڪستان سپر ليگ (پي ايس ايل) سيزن ٿري جا مئچ ۽ فائنل ڏسڻ لاءِ پرجوش ۽ خواهش مند آهن. هن چيو ته مان چاهيان ٿو ته بين الاقوامي ڪرڪيٽ ڪراچيءَ ۾ موٽي اچي ۽ هر لحاظ کان ان ايونٽ کي تاريخي بڻايو ويندو. هن اها ڳالهه اڄ وزيراعليٰ هائوس ۾ پاڪستان ڪرڪيٽ بورڊ جي چيئرمين نجم سيٺي سان ملاقات دوران ڪئي. ملاقات ۾ پي ايس ايل ٿري جي فائنل کي ڪراچيءَ ۾ ڪرائڻ بابت معاملن تي غور ويچا ڪيو ويو ۽ مئچ جي سڪيورٽي لاءِ پڻ خيالن جي ڏي وٺ ڪئي وئي. انهيءَ ملاقات ۾ پي سي بي چيئرمين نجم سيٺي سان گڏ سندس سڪيورٽي ٽيم پڻ گڏ هئي، جڏهن ته انسپيڪٽر جنرل پوليس سنڌ اي ڊي خواجا، گهرو سيڪريٽري شاهد پرويز، ڊپٽي ڊي جي رينجرز برگيڊيئر ناصر، ايڊيشنل آءِ جي پوليس ڪراچي مشتاق مهر، ڪمشنر ڪراچي اعجاز علي خان ۽ ٻيا اعليٰ آفيسر به شريڪ هئا. وڏي وزير سيد مراد علي شاهه پي سي بي چيئرمين کي ڪراچيءَ ۾ پي ايس ايل فائنل جي سڪيورٽي جي حوالي سان اعتماد ۾ ورتو. هن چيو ته هر لحاظ کان پي ايس ايل ٿري کي تاريخي بڻايو ويندو. نجم سيٺيءَ چيو ته ڪراچيءَ جي امن بحال ڪرڻ ۾ اوهان (سيد مراد علي شاهه) جو اهم ڪردار آهي. وڏي وزير آءِ جي پوليس ۽ ڊپٽي ڊي جي رينجرز کي فل ڊريس سڪيورٽي ريهرسل ڪرڻ جو حڪم ڏنو ۽ هن چيو ته فل ڊريس ريهرسل سان بين الاقوامي ڪرڪيٽ مئچن لاءِ اعتماد پيدا ٿيندو. هن آءِ جي پوليس هدايت ڪئي ته ايندڙ ٽيهن ڏينهن اندر اسٽيڊيم ۾ فل ريهرسل ڪئي وڃي. هن چيو ته اسانجي سڪيورٽي انتظامن ڪري بين الاقوامي ڪرڪيٽ جو اعتماد وڌيڪ بهتر ٿيندو. هن چيو ته مان اهو چوڻ چاهيان ٿو ته صوبائي حڪومت ڪجهه ڏينهن اڳ ڪاميابي سان ٻه اهم ايونٽس جي فول پروف سڪيورٽي فراهم ڪئي آهي، ان ۾ سيدنا مفضل سيف الدين جي محرم واريون مجلسون ۽ ٻيو پرنس ڪريم آغا خان جو دورو آهي ۽ هاڻي اهو ايونٽ تمام سٺي ريت منعقد ٿيندو. نجم سيٺيءَ وڏي وزير کي ٻڌايو ته هُو ڪجهه آرمڊ وهيڪلز يا بلٽ پروف گاڏيون رانديگرن کي ايئرپورٽ کان هوٽل ۽ اسٽيڊيم آڻڻ لاءِ استعمال ڪيون وينديون ان جو انتظام ڪيو وڃي، جنهن تي وڏي وزير آءِ جي پوليس کي ٻه بلٽ پروف بڪتربند بسون خريد ڪرڻ جو حڪم ڏنو. هن چيو ته بڪتربند بسن جو معيار بين الاقوامي هئڻ گهرجي. هن آءِ جي پوليس کي پي سي بي سڪيورٽي ٽيم سان گڏ ان بابت ضروري مشاورت ڪرڻ جي به هدايت ڪئي. وڏي وزير نجم سيٺيءَ کي چيو ته اسان ڪراچيءَ ۾ بين الاقوامي ڪرڪيٽ واپس آڻڻ چاهيون ٿا ان لاءِ اسان جيڪي اوهان چاهيندا ڪرڻ لاءِ تيار آهيون. نجم سيٺيءَ وڏي وزير کي ٻڌايو ته اسٽيڊيم جي مرمت جو ڪم جاري آهي، جنهن تي آءِ جي پوليس اي ڊي خواجا صلاح ڏني ته ايس ايس پي سڪيورٽي کي به پي سي بي ٽيم ۾ شامل ڪيو وڃي جيڪو مرمتي ڪم جو ذميوار هوندو. ايس ايس پي سڪيورٽيءَ ورڪ ٿرو گيٽس، سي سي ٽي وي ڪئميرا کي لڳائڻ، داخلي ۽ خارجي رستن جي سڪيورٽي ضرورت تحت تعمير جي تجويز ڏني. اجلاس ۾ ايس ايس پي سڪيورٽي کي مرمتي ڪم ۾ شامل ڪرڻ جو فيصلو ڪيو ويو. واضح رهي ته پاڪستان سپر ليگ سيزن ٿري جو فائنل مئچ 25 مارچ 2018ع تي نيشنل اسٽيڊيم ڪراچيءَ ۾ کيڏيو ويندو ان سلسلي ۾ تياريون شروع ڪيون ويون آهن. نجم سيٺيءَ وڏي  وزير جي ڪراچيءَ ۾ امن جي بحاليءَ وارين ڪاوشن جي ساراهه ڪندي چيو ته اوهان پنهنجو فرض بخوبي ۽ ڪاميابيءَ سان ادا ڪيو آهي. وڏي وزير آءِ جي پوليس، گهرو سيڪريٽري ۽ پي سي بي ٽيم کي وڌيڪ فيصلن لاءِ هڪٻئي سان ويجهن رابطن جي هدايت ڪئي.

 

ملڪ ۽ قوم جي ترقي جمهوريت ۽ ان جي مضبوط ٿيڻ سان مشروط آهي: نواز شريف

لاهور (اين اين آءِ) اڳوڻي وزيراعظم نواز شريف چيو آهي ته ملڪ ۽ قومي جي ترقي جمهوريت ۽ ان جي مضبوطي سان مشروط آهي جلد عوامي رابطا مهم جو سلسلو شروع ڪيو ويندو، عام چونڊن ۾ عوام جنهن پارٽي کي وڌيڪ ووٽ ڏيندو ان جي حڪومت ٺهندي، اسان سازشن ۽ رنڊڪن پوڻ جي باوجود پنهنجي ڪارڪردگي مان مطمئين آهيون، اهڙن خيالن جو اظهار هن جاتي امرا ۾ ڪارڪنن سان گڏ جمعي جي نماز ادا ڪرڻ کانپوءِ مختصر ڳالهه ٻولهه ڪندي، ان موقعي تي بيگم ڪلثوم نواز جي جلد صحتيابي لاءِ دعا پڻ گهري وئي، جمعي جي نماز کانپوءِ نواز شريف ڪارڪنن سان ملندو رهيو، نواز شريف چيو ته گڏ هلڻ لاءِ تيار آهيون جنهن تي سڀني جوش جذبي ۽ محبت جو اظهار ڪيو، هن چيو ته ووٽ جو تقدس بحال ڪرايو ويندو، عوام ڄاڻي ٿو ته هڪ چونڊيل وزيراعظم کي ڪهڙي ڏوهه جي سزا ڏني وئي.

 

شهيد راڻي محترم بينظير ڀٽو جي عظيم قرباني سبب اڄ ملڪ ۾ جمهوريت قائم آهي: بلاول ڀٽو

ڏوڪري(رپورٽر) پ پ چئير مين بلاول ڀٽو زرداري جو هولو گراف ٽيڪنالاجي ذريعي پ پ عوام جي جلسي خطاب  سوين ماڻهن جي شرڪت , خبر موجب ، پ پ تعلقي ڏوڪري پاران  منير سوهو پاران سومرا شادي حال ۾ رکيل پروگرام ۾ ڏوڪري تعلقي جي مختلف ڳوڄٺن باڊهه موهن جو دڙو بگي ڪاراڻي ۽ مختلف ڳوٺن مان سوين جيالا پ پ جا جهنڊا کڻي پنڊال ۾ پهتا ، جڏهن ته پنڊال ۾ پ پ ضلعي صدر عبداولفتاح ڀٽو پ پ انفارميشن سيڪريٽري محمد علي امر ٻگهيو جي پنڊال ۾ اچڻ تي سندن جو پ پ ورڪرن چونڊيل چئير منين منير احمد سوهو حافظ رجب سولنگي لڪي غلام الرسول چڪڻ منصور امام ساريو، شهمير ميراڻي ، فدا ڦلپوٽو بشير جو ڻيجو رئيس عطا ءَ الله جتوئي محمد جمن ٻگهيو حسين سولنگي ، برڪت چنو ،مظفر سوهو  پ پ اڳواڻ غلام مصطفي گاڏهي ۽ ٻين گلن جي ورکا سان شاندار استقبال ڪيو، ان موقعي تي هولو گراف ٽيڪنالاجي ذريعي سوين پ پ ڪارڪنن کيخطاب ڪندي پ پ چئير مين بلاول ڀٽو زرداري چيو ته شهيد راڻي محترم بينظير ڀٽو جي عظيم قرباني سبب اڄ ملڪ ۾ جمهوريت قائم آهي، منهنجي ماءُ هڪ آمر جي اڳيان جهڪڻ بجاءُ سندس ڊڪٽيٽرشپ کي للڪاريندي،شهادت ماڻي. ڊسمبر جو مهينو پاڪستان جي عوام ۽ پيپلزپارٽي ڪارڪنن کان ڪڏهن به نه وسرندو، ڇو ته هن منهيني ۾ دنيا جي عظيم ليڊر کي شهيد ڪيو ويو، 27 ڊسمبر تي ڳڙهي خدابخش ۾ لکين ماڻهون بي بي شهيد جي ورسي ۾ شرڪت ڪندا، شهيد بينظير جي ڀٽو جي ڇڏيل واٽ تي هلندي غريب عوام جي خدمت ڪري رهيا آهيون، ، اهڙو اظهار هن ڪالهه ڏوڪري ۾ هولو گرام ٽيڪنالاجي ذريعي ڪارڪنن جي ميڙاڪي کي خطاب دوران ڪيو. هن وڌيڪ چيو پيپلزپارٽي جمهوري پارٽي آهي جيڪا عام ماڻهون جي جذبن جي عڪاسي ڪري ٿي، بي بي شهيد جي شهادت کانپوءُ ملڪ سنگين بحرانن جي ورچڙهيل هو، بحرانن مان ڪڍڻ لاءُ آصف علي زرداري ملڪ ۽ ڪارڪنن کي سنڀاليو ان جي ئي بدولت اڄ ملڪ پنهنجي پيرن تي بيٺل آهن، اسان بي بي شهيد جي غم کي طاقت ۾ تبديل ڪري جمهوري عمل کي اڳتي وڌايوسين ايندڙ چونڊون سڄي ملڪ مان پ پ پ کٽي پنهنجي حڪومت ٺاهيندي شهيد راڻي جي ڇڏيل خواب کي اڳتي وڌائنداسين پ پ عوام جي جلسي خطاب  شهيد راڻي محترم بينظير ڀٽو جي عظيم قرباني سبب اڄ ملڪ ۾ جمهوريت قائم آهي، اسان جي قائد جمهوريت محترم بينظير ڀٽو هڪ آمر جي اڳيان جهڪڻ بجاءُ سندس ڊڪٽيٽرشپ کي للڪاريندي،شهادت ماڻي. ڊسمبر جو مهينو پاڪستان جي عوام ۽ پيپلزپارٽي ڪارڪنن کان ڪڏهن به نه وسرندو، ڇو ته هن منهيني ۾ دنيا جي عظيم ليڊر کي شهيد ڪيو ويو، 27 ڊسمبر تي ڳڙهي خدابخش ۾ لکين ماڻهون بي بي شهيد جي ورسي ۾ شرڪت ڪندا، شهيد بينظير جي ڀٽو جي ڇڏيل واٽ تي هلندي غريب عوام جي خدمت ڪري رهيا آهيون، ، پ پ ضلعي لاڙڪاڻي جو صدر عبدال فتاح ڀٽو پ پ انفارميشن سيڪريٽري سردار محمد علي امر خان ٻگهيو ضلعي ڪائونسل لاڙڪاڻي جو چئير مين خان محمد سانگهرو پ پ اڳواڻ منير احمد سوهو منصور امام ساريو باڊهه جو چئير مين محمد خان چنو ۽ ٻين خطاب ڪندي چيو آهي . هنن وڌيڪ چيو پيپلزپارٽي جمهوري پارٽي آهي جيڪا عام ماڻهون جي جذبن جي عڪاسي ڪري ٿي، بي بي شهيد جي شهادت کانپوءُ ملڪ سنگين بحرانن جي ورچڙهيل هو، بحرانن مان ڪڍڻ لاءُ آصف علي زرداري ملڪ ۽ ڪارڪنن کي سنڀاليو ان جي ئي بدولت اڄ ملڪ پنهنجي پيرن تي بيٺل آهن، اسان بي بي شهيد جي غم کي طاقت ۾ تبديل ڪري جمهوري عمل کي اڳتي وڌايوسين ايندڙ چونڊون سڄي ملڪ مان پ پ پ کٽي پنهنجي حڪومت ٺاهيندي شهيد راڻي جي ڇڏيل خواب کي اڳتي وڌائنداسين، هنن وڌيڪ چيو ته پ پ عوامي پارٽي آهي جنهن کي ڪوبه شڪست نه ٿو ڏئي سگهي، شهيد محترمه بينظير ڀٽو عوام جي لاءِ جانين جو نذرانو ڏئي تاريخ ۾ امر ٿي ويا، 27 ڊسمبر تي شهيد محترمه بينظير ڀٽو جي ورسي ۾ هزارين پ پ ڪارڪن شرڪت ڪندا. ان موقعي تي ، منير احمد سوهو ڪارڪنن ۽ عوام جو شڪريو ادا ڪيو

 

ٿر جو ڪوئلو سعودي عرب جي تيل کان وڌيڪ توانائي پيدا ڪري سگهي ٿو: احسن اقبال

ٿرپارڪر (اين اين آءِ) وفاقي گهرو وزير چوڌري احسن اقبال چيو آهي ته ملڪ جو مستقبل جمهوري نظام سان جڙيل آهي، سياسي استحڪام کانسواءِ اقتصادي ترقي نٿي ٿي سگهي، حڪومت جي 5 سال مدي جو احترام ڪرڻ گهرجي، اڄ اسان معيشت جي مقابلي ۾ داخل ٿي چڪا آهيون، اسان کي هڪٻئي سان ڌرڻن ۾ مقابلو ناهي ڪرڻو، قوم ڏڦيڙ سان نه پر اتفاق، تعاون ۽ ٻڌي سان ترقي ڪنديون آهن، سي پيڪ هڪ حقيقت بڻجي چڪو آهي، دهشتگردي جي چيلهه چٻي ٿي چڪي آهي، پاڪستان توانائي ۾ پاڻڀرو ٿي چڪو آهي، ٿر جو ريگستان جتي انسان آباد ٿيڻ لاءِ تيار نه هو، اڄ ملڪ  جو سڀ کان وڏو نجي سيڙپڪارن جو مرڪز بڻجي چڪو آهي، پاڪستان خودمختيار ملڪ، آزاد پرڏيهي پاليسي بڻائي ٿو، آمريڪا سان امن جو گڏيل ۽ اعتماد تي ٻڌل لاڳاپا چاهيون ٿا.گهرو وزير احسن اقبال چيو آهي ته پاڪستان توانائي جي شعبي ۾ پاڻڀرائپ حاصل ڪري رهيو آهي ۽ تمام جلد 24 ڪلاڪ بجلي دستياب هوندي. ٿرڪول جي دوري جي موقعي تي ميڊيا سان ڳالهائيندي گهرو وزير چيو ته ٿر منصوبي مان چار هزار ميگاواٽ بجلي پيدا ٿيندي جنهن سان ملڪ جي بجلي جي ضرورت پوري ٿي سگهندي. ٿرڪول مان پيدا ٿيندڙ بجلي سستي اگهه تي فراهم ڪئي ويندي ۽ منصوبي مان ٿر ۾ ترقي ۽ خوشحالي ايندي. هن چيو ته اينگرو ٿر ۾ عورتن کي اڳتي وڌائڻ جا موقعا فراهم ڪري رهيو آهي ۽ ٿري عورتن ثابت ڪيو آهي ته اهي ڪنهن به شعبي ۾ مردن کان گهٽ ناهن. هڪ سوال جي جواب تي احسن اقبال چيو ته اڄ اسان سياسي دور نه پر معاشي مقابلي جي دور ۾ داخل ٿي چڪا آهيون ۽ اسان جو مقابلو خطي جي ملڪن جي معيشت سان آهي. هن چيو ته مخالف ڌر جون پارٽيون ڌرڻي جي سياست ڇڏي ملڪ جي تعمير ۽ ترقي ۾ ساٿ ڏين.

 

وفاق جي نااهلي جي ڪري ڪمند جا آبادگار احتجاج تي مجبور آهن: سهيل انور سيال

لاڙڪاڻو(ويب ڊيسڪ) صوبائي گهرو وزير سهيل انور سيال چيو آهي ته حماد صديقي کي هن وقت تائين سنڌ پوليس جي حوالي ناهي ڪيو ويو، وفاقي حڪومت جي نااهلي جي ڪري بحران پيدا ٿي رهيا آهن. تفصيل موجب سنڌ جي گهرو وزير سهيل انور سيال پريس ڪانفرنس ڪندي چيو ته دهشتگردن جا ڪيس فوجي عدالتن ڏانهن اماڻي رهيا آهيون، عزير بلوچ جي جي آءِ ٽي تي عدالت جيڪو به حڪم ڏيندي ان تي عمل ڪنداسين. هن چيو ته حماد صديقي کي هن وقت تائين سنڌ پوليس جي حوالي ناهي ڪيو ويو. وفاقي حڪومت جي نااهلي جي ڪري بحران پيدا ٿي رهيا آهن. وفاق جي نااهلي جي ڪري ڪمند جا آبادگار احتجاج تي مجبور آهن. کنڊ وڏي مقدار ۾ هئڻ سبب سبسڊي ڏئي رهيا آهيون.  گهرو وزير جو وڌيڪ چوڻ هو ته مفرور اسحاق ڊار جي ڪري ملڪ ۾ ڪيترائي بحران پيدا ٿي رهيا آهن. سنڌ پوليس ۾ پوليس اهلڪارن جي ڪرپشن بابت سندس چوڻ هو ته 12 هزار پوليس اهلڪارن خلاف جاچ جاري آهي. جيڪي پوليس اهلڪار ڏوهاري ثابت ٿيا انهن کي نه بخشبو. سندس وڌيڪ چوڻ هو ته تڪ بندين تي اليڪشن ڪميشن جي حڪمن تي عمل ڪنداسين، سال 2018 ۾ وفاق سميت چئني صوبن ۾ حڪومت بڻائينداسين.