تازيون خبرون

Daily Archives: December 22, 2017

نيشنل ڪمانڊ اٿارٽي نيشنل اسپيس پروگرام 2047 ۽ نيو ڪليئر پاور جي منظوري ڏئي ڇڏي

راولپنڊي (اين اين آءِ) نيشنل ڪمانڊ اٿارٽي ڪنهن به نوعيت جي جارحيت کي منهن ڏيڻ لاءِ پاڪستان جي دفاعي صلاحيت تي مڪمل اظهار ڪندي قومي دفاعي صلاحيتن کي مستحڪم ڪرڻ جي سلسلي ۾ ڪوششن ۽ ڪردار تي سائنسدانن ۽ انجنيئرز کي مبارڪ ڏني آهي، جڏهن ته پاڙي ۾ عدم استحڪام جي قدمن تي ڳڻتي جو اظهار ڪندي چيو آهي ته اهڙن قدمن سان ڏکڻ ايشيا ۾ اسٽريٽجڪ استحڪام برقرار رکڻ جي مقصد کي نقصان پهچي سگهي ٿو، نيشنل ڪمانڊ اٿارٽي جو 23 هون اجلاس خميس تي وزيراعظم شاهد خاقان عباسي جي صدارت هيٺ ٿيو، اجلاس ۾ دفاع ۽ گهرو وفاقي وزيرن، چيئرمين جي ايس سي، چيف آف آرمي اسٽاف، چيف آف نيول اسٽاف، چيف آف ايئر اسٽاف، ڊي جي اسٽريٽجڪ پلاننگ ڊويزن، ڊي جي آءِ ايس آءِ، پرڏيهي معاملن واري سيڪريٽري ۽ ٻين اعليٰ عملدارن شرڪت ڪئي، نيشنل ڪمانڊ اسٽريٽجڪ ماحول بابت بريفنگ ڏني وئي، اين سي اي خطي جي صورتحال جو جائزو وٺندي پاڪستان جي پاڙي ۾ ٿيندڙ عدم استحڪام جي قدمن تي ڳڻتي جو اظهار ڪيو جنهن سبب ڏکڻ ايشيا ۾ اسٽريٽجڪ استحڪام برقرار رکڻ جي مقصد کي نقصان پهچي سگهي ٿو، اهڙن قدمن ۾ روايتي هٿيارن جي ذخير ۾ واڌ، ڀارتي بحري خطي کي ايٽمي بڻائڻ ۽ ڊي ايم ڊي ۾ اضافو ۽ مقرري جا منصوبا شامل آهن، نيشنل ڪمانڊ اٿارٽي ڪنهن به نوعيت جي جارحيت کي منهن ڏيڻ لاءِ پاڪستان جي صلاحيت تي مڪمل اعتماد جو اظهار ڪندي مڪمل دفاعي صلاحيت برقرار رکڻ ۽ ان کي هٿي وٺرائڻ جي پاڪستان جي پاليسي کي ورجايو، نيشنل ڪمانڊ اٿارٽي قومي دفاعي صلاحيتن کي مستحڪم ڪرڻ جي سلسلي ۾ ڪوششن ۽ ڪردار تي سائنسدانن ۽ انجنيئرز کي مبارڪ ڏني، اين سي اي بابر ٿري ايس ايل سي ايم ۽ ابابيل ميزائيل سسٽم جي تجربن دوران جديد ترين ٽيڪنالاجي جي مظاهري کي ساراهيو جنهن سان اسٽريٽجڪ صلاحيتن جي حوالي سان ملڪ ٽيڪنالاجي جي جدت جي نئين دور ۾ داخل ٿي ويو آهي، اجلاس دوران نيو ڪليئر سيڪيورٽي ريجيم جو تفصيلي جائزو ورتو ويو، پاڪستان جي ايٽمي نظام جي ڪمانڊ ڪنٽرول ۽ سيڪيورٽي قدمن تي مڪمل اعتماد جو اظهار ڪيو ويو جنهن ذريعي پاڪستان جي اسٽريٽجڪ اثاثن ۽ مواد کي مڪمل تحفظ فراهم ڪيو وڃي ٿو.

 

جمهوريت جي مضبوطي لاءِ هر قرباني ڏيڻ لاءِ تيار آهيون، احتساب ٿيندي نظر نه پيو اچي: نواز شريف

لاهور (اين اين آءِ) ن ليگ جي صدر محمد نواز شريف ۽ وزيراعظم شاهد خاقان عباسي وچ ۾ ٿيل ملاقات ۾ فاٽا کي ڪي پي ڪي ۾ ضم ڪرڻ ۽ فاٽا سڌارن واري بل تي ڳالهه ٻولهه ڪئي وئي جنهن ۾ مولانا فضل رحمان سميت ٻين جا خدشا ختم ڪرڻ ۽ سياسي جماعتن جي اڳواڻن سان رابطن تي اتفاق ڪيو ويو، رائيونڊ ۾ ٿيل ملاقات ۾ شهباز شريف، رانا تنوير حسين، انجنيئر خرم دستگير پرويز رشيد سميت ٻيا به موجود هئا،نواز شريف ۽ شاهد خاقان عباسي جو چوڻ هو ته پارليامينٽ جي مضبوطي سمورن ادارن جي مضبوطي آهي ۽ ن ليگ هميشه ان لاءِ ڪوششون ڪيون آهن، ان دوران فاٽا کي ڪي پي ڪي ۾ شامل ڪرڻ ۽ فاٽا سڌارن بل تي مولانا فضل رحمان سميت ٻين جي خدشن تي خيالن جي ڏي وٺ ڪئي وئي ۽ فيصلو ڪيو ويو ته نه صرف خدشا ختم ڪيا ويندا پر سياسي جماعتن جي اڳواڻن سان رابطا ڪيا ويندا، ملاقات ۾ ٻين اهم معاملن تي خيالن جي ڏي وٺ ڪئي وئي،ته ٻنهي اڳواڻن ان ڳالهه تي اتفاق ڪيو ته پارليامينٽ جي مضبوطي تمام ادارن جي مضبوطي آهي، ميان نواز شريف جو چوڻ هو ته 2018ع چوندن جو سال آهي، عوام ۽ ڪارڪنن سان رابطي ۾ تيزي آندي وڃي، جمهوريت جي مضبوطي جي لاءِ هر قرباني ڏيڻ لاءِ تيار آهيون، احتساب ٿيندي نظر نه پيو اچي، وزير اعظم شاهد خاقان عباسي جو چوڻ هو ته ن ليگ نواز شريف جي قيادت ۾ متحد آهي، ن ليگ 2018ع جون چونڊون نواز شريف جي قيادت ۾ وڙهندي. وزيراعظم جي لاهور پهچڻ تي شهباز شريف، چيف سيڪريٽري پنجاب، آءِ جي پنجاب ڪيپٽن رٽائرڊ عارف نواز خان، ڪمشنر لاهور ڊويزن عبدالله خان سمبل سميت ٻين استقبال ڪيو، ان کان اڳ اڳوڻي وزيراعظم سان دانيال عزيز پڻ ملاقات ڪئي ان موقعي تي سپريم ڪورٽ جي عمران خان ڪيس ۾ فيصلي خلاف رويو پٽيشن، فاٽا سڌارن واري بل بابت عوامي مهم تي خيالن جي ڏي وٺ ڪئي وئي.

خانيوال ۾ بس ۽ ٽرالر ۾ ٽڪر، 11 ڄڻا اجل جو شڪار

خانيوال (اين اين آءِ) خانيوال ويجهو ايم فور موٽر وي تي مسافر بس ۽ ٽرالر وچ ۾ ٽڪر جي نتيجي ۾ 11 ڄڻا فوت ۽ 28 زخمي ٿي پيا، مسافر بس لاهور کان راجنپور وڃي رهي هئي ته ايم فور موٽر وي ويجهو ڪوهيڙي سبب ٽرالر سان ٽڪرائجي وئي جنهن ۾ 11 ڄڻا فوت ۽ 28 زخمي ٿيا، فوتين ۾ افضل، حماد، مريد، صديف شامل آهن، جڏهن ته زخمين جي سڃاڻپ شاهد خليل، فيض، فهيم، عمار، شاهد علي، انعام الله، مزمل، عليان، عائشا، فرزانا، عمار ۽ شاهد علي جي نالن سان ٿي آهي، حادثي جي فوتين ۽ زخمين کي نشتر اسپتال ملتان منتقل ڪيو ويو. پوليس جو چوڻ آهي ته حادثي جي فوتين ۾ بس جو ڊرائيور به شامل آهي، جڏهن ته لاشن کي سڃاڻپ کان پوءِ وارثن حوالي ڪيو پيو وڃي.

 

ڊيرا بگٽي ۾ گهر تي فائرنگ، بارودي سرنگهه جو ڌماڪو، 7 ڄڻا مارجي ويا

ڊيرا بگٽي (اين اين آءِ) بلوچستان جي ضلعي ڊيرا بگٽي ۾ ڌماڪي ۽ فائرنگ جي نتيجي ۾ عورتن ۽ ٻارڙن سميت 7 ڄڻا مارجي ويا ۽ 4 زخمي ٿيا، ڊيرا بگٽي جي علائقي ٽوبا نوح  ڪاڻي ۾ اڻڄاتل هٿياربند گجر نالي شخص جي گهر ۾ داخل ٿي فائرنگ ڪئي جنهن ۾ سندس 2 زالن ۽ 3 ٻارڙن سميت 6 ڄڻا مارجي ويا، هٿياربندن جي فائرنگ ۾ 4 ماڻهو زخمي ٿيا، زخمي ۽ لاشن کي اسپتال نيو پيو وڃي ته گاڏي هڪ بارودي سرنگهه سان ٽڪرائجي وئي جنهن ۾ وڌيڪ هڪ شخص فوت ٿي ويو، پوليس ۽ ليويز اهلڪار واقعي واري هنڌ پهچي واقعي واري هنڌ ڪڙو چاڙهي جاچ شروع ڪري ڇڏي آهي، آخري اطلاعن تائين واقعي جو ڪارڻ معلوم نه ٿي سگهيو هو.

 

پاڪ چين اقتصادي راهداري ترقي جو منصوبو نه پر سڄي خطي لاءِ گيم چينجر جي حيثيت رکي ٿو: صدر ممنون حسين

اسلام آباد (اين اين آءِ) پاڪستان جي صدر ممنون حسين کي چين، ويٽنام ۽ ڀارت جي سفارتڪارن پنهنجا سفارتي سرٽيفڪيٽ پيش ڪري ڇڏيا، سفارتڪارن ان موقعي تي صدر سان ڌار ڌار ملاقاتون ڪيون، صدر چيو ته پاڪستان خطي ۾ امن استحڪام ۽ ترقي لاءِ پنهنجي دوست ۽ پاڙيسري ملڪن سان ٻه طرفا لاڳاپا وڌائڻ جو خواهشمند آهي، هن چيو ته پاڪ چين اقتصادي راهداري صرف پاڪستان ۽ چين جي اقتصادي ترقي جو منصوبو نه آهي پر اهو منصوبو سڄي خطي لاءِ گيم چينجر جي حيثيت رکي ٿو، هن چيو ته موجوده حڪومت جي بهتر پاليسين سبب پاڪستان جي معيشت بهتر ٿي آهي، هن چيو ته پاڪستان سيڙپڪاري جي لحاظ کان بهترين ملڪ آهي جنهن سان بين الاقوامي سيڙپڪار مختلف شعبن ۾ ڀرپور فائدو حاصل ڪري سگهن ٿا، ان موقعي تي صدر سفارتڪارن کي مبارڪ ڏيندي اميد ظاهر ڪئي  ته اهي ٻه طرفي لاڳاپن کي هٿي وٺرائڻ لاءِ پنهنجو خاص ڪردار ادا ڪندا.

 

ايندڙ وزيراعظم جو اعلان نواز شريف نه پر عوام ڪندو: خورشيد شاهه

سکر(م.ڊ) قومي اسيمبلي ۾ مخالف ڌر جي اڳواڻ سيد خورشيد شاهه جو چوڻ آهي ته ايندڙ وزيراعظم شهباز شريف ٿيندو يا بلاول ڀٽو ان حوالي سان فيصلو نواز شريف نه پر 20 ڪروڙ عوام ڪندو. پنوعاقل ۾ پيپلز پارٽي جي جلسي کي خطاب ڪندي خورشيد شاهه جو چوڻ هو ته نواز شريف ڪيئن فيصلو ڪري سگهي ٿو ته ايندڙ وزيراعظم ڪير ٿيندو، شهباز شريف، بلاول ڀٽو يا عمران خان مان ڪير ايندڙ وزيراعظم هوندو ان جو فيصلو عوام کي ڪرڻو آهي. خورشيد شاهه چيو ته ميان صاحب اڄ پڇي ٿو ته مون کي ڇو ڪڍيو ۽ ٻيو چوي ٿو ته مون کي ڇو گهرايو جڏهن ته مون کان پڇيو ويو ته پارليامينٽ ۾ ميمبرن ڇو ناهن هوندا، مون چيو ته اها ميان صاحب جي ڪمزوري آهي. اپوزيشن ليڊر چيو ته ذوالفقار علي ڀٽو کي ٿورو وقت اڃان ملي ها ته فاٽا وارا اڄ پاڪستان جو حصو هجن ها، اسان تاريخ لکنداسين ۽ پيپلز پارٽي ئي فاٽا کي ان جا حق ڏياريندي.

 

آرمي چيف جمهوريت جي بالادستي لاءِ سينيٽ آيو،  مينڊيٽ مليو ته وزيراعظم بلاول هوندو: نثار کهڙو

حيدرآباد (ويب ڊيسڪ) پ پ اڳواڻ نثار کهڙي چيو آهي ته آرمي چيف جمهوريت جي بالادستي لاءِ سينيٽ آيو، جمهوريت آئي آهي ته ان کي ئي قائم رکڻ گهرجي. پريس ڪانفرنس ڪندي نثار کهڙي چيو ته جيڪڏهن پ پ کي مينڊيٽ مليو ته وزيراعظم بلاول ڀٽو زرداري هوندو، طاهر القادري قصاص تحريڪ هلائڻ جو محفوظ حق رکي ٿو، پ پ قيادت نه ملڪ مان فرار ٿي، نه ٻاهر رهڻ جا معاهدا ڪياسين. هن چيو ته پ پ عمران خان جهڙن ماڻهن جا خواب چڪنا چور ڪري ڇڏيا، ايم ڪيو ايم ۽ پي ايس پي اڳواڻ ڪنهن جي چوڻ تي گڏ ويٺا؟.27

 

28 ڊسمبر تي آل پارٽيز ڪانفرنس جو اعلان، لائحا عمل جوڙينداسين: طاهر القادري

اسلام آباد (اين اين آءِ) پاڪستان عوامي تحريڪ جي سربراهه طاهر قادري عوامي مسلم ليگ جي سربراهه شيخ رشيد احمد سان گڏ پريس ڪانفرنس کي خطاب ڪندي چيو آهي ته 28 ڊسمبر تي اي پي سي ٿيندي، سمورين جماعتن جي مرڪزي قيادت کي شرڪت جي دعوت ڏني آهي، هن پريس ڪانفرنس ۾ دعويٰ ڪئي ته سرڪاري رڪارڊ موجب ماڊل ٽائون ۾ 45 ٿاڻن، چوڪين جي 809 جي نفري انساني بيئررز هٽائڻ جي آپريشن ۾ حصو ورتو، انهن ۾ 204 اسپيشل فورسز جا اسنائيپرز ۽ شوٽر به شامل هئا، عوامي تحريڪ جي سربراهه پريس ڪانفرنس دوران ٿاڻن جي لسٽ به جاري ڪئي، سندس چوڻ هو ته اسان جي مشاهدي موجب ان نفري کان پنجون تي وڌيڪ نفري هئي، هن سوال ڪيو ته ڇا اها ڳري نفري بيريئر هٽائڻ لاءِ هئي، ڇا ايڏيون وڏيون مقرريون پنجاب جي وڏي وزير جي حڪم کانسواءِ ممڪن هيون، هن چيلينج ڪيو ته انهن معلومات جي ڪو به سرڪاري آفيسر ترديد جي جرئت نٿو ڪري سگهجي، هن چيو ته شهباز شريف ۽ نواز شريف هڪ ئي سڪي جا ٻه رخ آهن ٻنهي ۾ ڪو به فرق نه آهي، شهباز شريف جو وزيراعظم بڻجڻ ته پري جي ڳالهه مان کيس ماڊل ٽائون سانحي ۾ ڦاهي تي چڙهندي ڏسي رهيو آهيان، سندس ورح ته ملڪل موت قبض ڪندو، اسان صرف انتظام ڪري رهيا آهيون، ماڊل ٽائون جو ڪيس ڪيترن ئي ڪيسن کان ڳرو آهي، هن چيو ته شيخ رشيد جو گرم جوشي سان استقبال ڪريان ٿو، ان سان ماڊل ٽائون سانحي، 31 ڊسمبر جي ڊيڊ لائين ۽ اي پي سي جي حوالي سان تفصيلي ڳالهيون ٿيون ۽ کيس شرڪت جي دعوت ڏني آهي جيڪا هن قبول ڪئي آهي، شيخ رشيد پريس ڪانفرنس کي خطاب ڪندي چيو ته طاهر قادري جي هر فيصلي ۽ حڪم سان گڏ آهيون، هو جيڪو فيصلو ڪندو ان تي پهرو ڏينداسين، شهباز شريف جي ماڊل ٽائون ڪيس ۾ جند نه ڇٽندي، نجفي رپورٽ سندن چهرن تان نقاب هٽائي ڇڏيو آهي، حديبيا ڪيس مڌر آف ڪرائيم آهي، ججن کي درخواست آهي ته فيصلي جي ڪاپي ڏين، دير جو هي فائدو وٺي رهيا آهن، علي بابا ۽ ڪابينا جا 53 چور تباهي جي راند کيڏي رهيا آهن، هن وڌيڪ چيو ته ٻئي ڀائر ڊبل گيم ڪري رهيا آهن ۽ رام شام جي فلم لڳل آهي، هڪ ساراهه ڪري ٿو ٻيو فوج ۽ عدليا کي گاريون ڏئي ٿو، نواز شريف پرڏيهي ايجندا تي ڪم ڪري رهيو آهي، عوام اي پي سي ۾ ڀرپور شرڪت ڪندو.

 

قوم کي اهڙي ليڊر جي ضرورت آهي جنهن جو قبلو واشنگٽن نه هجي، خانا قعبا هجي: سراج الحق

اسلام آباد (اين اين آءِ) جماعت اسلامي جي امير سراج الحق چيو آهي ته متحده مجلس عمل مشاورتي عمل مان لنگهي رهي آهي اتحاد ۾ شامل سموريون جماعتون هڪ ئي چونڊ نشان تي چونڊن ۾ حصو وٺڻ چاهين ٿيون، صوبي ۾ پي ٽي آءِ سان 13 نقاطي ايجنڊا تحت حڪومت ۾ شامل آهيون، ميڊيا سان ڳالهائيندي سراج الحق چيو ته ايم ايم اي جو ايندڙ مشاورتي اجلاس لاهور ۾ ٿيندو، مولانا سميع الحق لاءِ جرڳو ويندو، فاٽا بابت اهو ئي فيصلو آهي جيڪو قبائل جو فيصلو آهي، سراج الحق چيو ته مسلمانن جو پهريون قعبو اسلامي ملڪن جي قيادت جو رستو ڏسي رهيو آهي، ڪنهن سياسي ليڊر مسجد اقصيٰ تي قبضي جي خلاف ڪا ڳالهه نه ڪئي آهي، اسان جي سياستدانن جو مقصد صرف پنهنجي ذات جا مفاد حاصل ڪرڻ آهي، مسجد اقصيٰ جو وڏو مسئلو آمريڪا ۽اسرائيل نه آهي، مسلمان حڪمران آهن، قوم کي اهڙي ليڊر جي ضرورت آهي جنهن جو قبلو واشنگٽن نه هجي، خانا قعبا هجي، هن چيو ته موجوده سياسي قيادت قوم کي منتشر ڪيو، ڪنهن سياسي ليڊر جو پٽ ملڪ جي تعليمي ادارن ۾ نٿو پڙهي، اهي ماڻهو علاج لاءِ ٻاهر وڃن ۽ رڳو حڪمراني ڪرڻ لاءِ پاڪستان اچن ٿا.

 

نواز شريف ادارن وچ ۾ ٽڪراءَ جي ڪوشش ڪري رهيو آهي، ائين ٿيندو ڪو نه: قمر زمان ڪائرا

فيصل آباد (اين اين آءِ) پ پ اڳواڻ قمر زمان ڪائرا چيو آهي ته نواز شريف ادارن وچ ۾ ٽڪراءَ جي ڪوشش ڪري رهيو آهي پر ائين نه ٿيندو، صحافين سان ڳالهائيندي هن چيو ته پ پ مقرر وقت تي چونڊن جي خواهشمند آهي، اسان اليڪشن ۾ دير ٿيڻ نه ڏينداسين، پوءِ ڇو نه پراڻي آدمشماري تي ٿين، هن چيو ته ملڪ ۾ جمهوريت کي ڪڏهن به ڊي ريل نه ٿيڻ ڏينداسين، پ  پ هميشه اسٽبلشمينٽ ۽ ايجنسين جي سياست جي خلاف رهي آهي، ڪڏهن ان کي سپورٽ نه ڪيو، قمر زمان ڪائرا چيو ته عدالت کي سکا شاهي چوڻ ان کان وڏي عدليا جي توهين نه آهي، نواز شريف عدالت جي خلاف تحريڪ هلائي رهيو آهي، ڏسون ٿا ته ڇا ٿو ڪري، پ پ اڳواڻ چيو ته ملڪ ۾ هلندڙ جمهوري ۽ سياسي نظام نواز شريف جي فائدي ۾ نه آهي، جمهوريت جو ڊي ريل ٿيڻ کيس فائدو ڏئي ٿو، هو هميشه جمهوريت ڊي ريل ڪرڻ ۾ اڳ اڳ رهيو، هن چيو ته نواز شريف ادارن وچ ۾ ٽڪراءَ جي ڪوشش ڪئي، هو عدليا ۽ فوج تي گند اڇلائي رهيو آهي، نواز شريف جيڪا ڪوشش ڪري رهيو آهي ائين ٿيڻ نه ڏينداسين، هن چيو ته هن وقت ملڪ ۾ 7 حڪومتون آهن جن مان 5 نواز شريف جون آهن، جڏهن ته ان جون حڪومتون هوندي به سندس چوري پڪڙي وئي هاڻ ان جو حساب ٿي رهيو آهي، نواز شريف جو سياسي ڪيريئر ختم ٿي ويو، کيس هاڻ پيسا به ڏيڻا پوندا ۽ جيل به وڃڻو پوندو، هڪ سوال جي جواب ۾ هن چيو ته ماڊل سانحي تي باقر نجفي رپورٽ اچڻ کانپوءِ حساب ٿيڻ گهرجي، اسان بي گناهه ماڻهن جي رت جو حساب چاهيون ٿا، طاهر قادري کي خاطري ڪرائي آهي ته جيڪڏهن هو قانون دائري ۾ پرامن احتجاج ڪندو ته اسان ان سان گڏ هونداسين.