تازيون خبرون

Daily Archives: December 15, 2017

پريانڪا چوپڙا ايوارڊ شو ۾ ڊانس پرفارمنس دوران ڪجهه ئي منٽن ۾ ڪروڙين رپيا ڪمائيندي

ممبئي (شوبز نيوز) ناليواري بالي ووڊ اداڪارا پريانڪا چوپڙا ايوارڊ شو ۾ ڊانس پرفارمنس دوران ڪجهه ئي منٽن ۾ ڪروڙين رپيا ڪمائيندي. اڳوڻي حسن جي راڻي ۽ بالي ووڊ جي خوبصورت اداڪارا پريانڪا چوپڙا جي مقبوليت ۾ ڏينهن و ڏينهن واڌ ٿي رهي آهي جنهن جي ڪري سندس ڊيمانڊ به وڌي رهي آهي. بالي ووڊ سان گڏ هالي ووڊ ۾ به مقبول ترين اداڪارا پريانڪا چوپڙا جا ستارا هن وقت عروج تي آهن ۽ بالي ووڊ جو هر فلمساز ۽ پروڊيوسر ساڻس ڪم ڪرڻ جو خواهشمند آهي جنهن لاءِ هو اداڪارا کي وڏي کان وڏو معاوضو ڏيڻ لاءِ به تيار آهن جنهن جو مثال تازو ئي ڏسڻ ۾ آيو. ڀارتي ميڊيا موجب ڀارت جي مقبول ترين ايوارڊ ”وي زي سيني ايوارڊز 2018ع“ جي تقريب ۾ رنوير سنگهه، شاهد ڪپور، ڪترينا ڪيف، سڌارٿ ملهوترا، جيڪولين فرنينڊس ۽ ڀومي پنڊيڪر پنهنجي فن جو مظاهرو ڪندا. ميڊيا رپورٽس موجب پريانڪا چوپڙا کي 5 منٽن جي پرفارمنس لاءِ 4 کان پنج ڪروڙ رپيا ادا ڪيا ويندا ان جو مطلب آهي ته بالي ووڊ جي ”ديسي گرل“ هڪ منٽ ۾ هڪ ڪروڙ رپيا ڪمائيندي.

 

آسڪر ايوارڊ لاءِ پاڪستاني فلمن جي نامزدگي تمام وڏي ڪاميابي آهي: سهائي علي ابڙو

لاهور (شوبز نيوز) اداڪارا ۽ ماڊل سهائي  علي ابڙو چيو آهي ته آسڪر ايوارڊ لاءِ پاڪستاني فلمن جي نامزدگي تمام وڏي ڪاميابي آهي جڏهن ته منفرد موضوعن تي ٺهندڙ ايڪشن، رومانس ۽ مزاح کان ڀرپور فلمون مداحن جي ڌيان جو مرڪز بڻجنديون آهن. ميڊيا سان ڳالهائيندي سهائي  علي ابڙو چيو ته آسڪر ايوارڊ تائين پاڪستاني فلمن جو پهچڻ هڪ دور ۾ خواب لڳندو هو پر هاڻ اسان جي فلمن جي نامزدگي ٿي رهي آهي ۽ اهو وقت پري ناهي جڏهن اسان جون فلمون نه رڳو آسڪر ايوارڊ کٽينديون پر اسان جي فنڪارن کي هالي ووڊ فلمن ۾ ڪم جي آڇ پڻ ٿيندي. هن چيو ته نوجوان فلم ميڪر ۽ فنڪار گڏجي هڪ اهڙي ٽريڪ تي اڳتي وڌي رهيا آهن جنهن جي ذريعي جلدي ئي اسان انٽرنيشنل مارڪيٽ تائين پهچي ويندا سين. سندس وڌيڪ چوڻ هو ته فن جي دنيا ۾ فلم هڪ اهڙو شعبو آهي جيڪو ماڻهن جي سڀ کان ويجهو آهي جڏهن ته پاڪستان فلم انڊسٽري جي مشهور فنڪارن جي چاهيندڙن جو وڏو انگ اڄ به موجود آهي، جيڪو سندن ڪم کي پسند ڪندو آهي ۽ متعارف ڪرائيل لباس، هيئر اسٽائل، جيولري، جوتا ۽ ٻين کي اڄ به ساراهيندو آهي. جيڪو هڪ فلم اسٽار جي سڀ کان وڏي ڪاميابي سمجهيو ويندو آهي.

 

آءِ سي سي اسپاٽ فڪسنگ واري دعويٰ رد ڪري ڇڏي

پرٿ (اسپورٽس نيوز) آءِ سي سي برطانوي اخبار جي اسپاٽ فڪسنگ ڪيس جي حوالي سان دعويٰ مسترد ڪئي آهي. آءِ سي سي برطانوي اخبار جي اسپاٽ فڪسنگ ڪيس جي حوالي سان دعويٰ مسترد ڪندي چيو آهي ته شروعاتي جاچ دوران آسٽريليا ۽ انگلينڊ وچ ۾ پرٿ ٽيسٽ ۾ ڪرپشن جو ڪو به ثبوت نه مليو آهي، جنرل منيجر اينٽي ڪرپشن اليڪس مارشل جو چوڻ آهي ته اسان کي ” دي سن“ جي جاچ سان وابسطه سمورو مواد موصول ٿي چڪو، في الحال اهڙو ڪو به اشارو نه مليو آهي ته ان ميچ ۾ شريڪ ڪنهن به رانديگر سان مبينا فڪسرز جو رابطو رهيو هجي. هن چيو ته اسان انهن الزامن کي انتهائي سنجيدگي سان ڏسي رهيا آهيون ۽ جاچ اينٽي ڪرپشن يونٽ ميمبر ملڪن سان ساٿين سان گڏجي ڪندو، برطانوي اخبار سان گڏ پنهنجن ڳجهن ذريعن سان به معاملي جي جاچ ڪندا سين. اليڪس مارشل چيو ته جيتوڻيڪ آسٽريلوي قانون موجب فڪسنگ هڪ ڏوهه آهي پر في الحال معاملا شروعاتي مرحلن ۾ آهن خاص شاهديون هجن ها ته پوليس ۾ رپورٽ ڪري سگھجي ها، اليڪس مارشل چيو ته الزامن جي پکيڙ ڪيتري ئي ملڪن ۾ ڪرڪيٽ جي مختلف فارميٽ تائين پکڙجي وئي آهي، جنهن ۾ ٽي ٽوئنٽي ٽورنامنٽ به شامل آهي.

 

امام الحق ۽ جنيد خان به اَن فٽ ڪرڪيٽرن جي فهرست ۾ شامل

ڪراچي (اسپورٽس نيوز) پاڪستان ڪرڪيٽ ٽيم جي نيوزي لينڊ دوري کان اڳ اوپنر امام الحق ۽ فاسٽ بالر جنيد خان به ان فٽ رانديگرن جي لسٽ ۾ شامل ٿي ويا آهن. ٻئي رانديگر قائد اعظم ٽرافي جي سپر ايٽ رائونڊ ۾ پنهنجي ڊپارٽمنٽ حبيب بينڪ جي نمائندگي نه ڪري سگھندا. جمعي کان ملڪ جي سڀ کان وڏي فرسٽ ڪلاس ٽورنامنٽ جي سپر ايٽ رائونڊ جون آخري ميچون ٿي رهيون آهن، سموريون ٽيمون پنهنجن اهم ترين رانديگرن کان محروم رهنديون. انهن رانديگرن کي پي سي بي تڪراري ٽي ٽين ليگ کيڏڻ جي اجازت ڏني آهي، حبيب بينڪ جي ميچ لاهور وائٽس سان نيشنل بينڪ ڪمپليڪس ۾ ٿيندي. حبيب بينڪ جو ڪوچ ڪبير خان به ٽي ٽين جي ڪوچنگ لاءِ شارجا ويو آهي، بينڪ ۾ ڪوچ ڪبير خان، ڪپتان احمد شهزاد ۽ اهم ترين رانديگرن کان محروم رهندو. حبيب بينڪ جو عمر گل، فهيم اشرف ۽ فخر زمان به موجود نه هوندو جڏهن ته ٽيسٽ اوپنر عبدالرحمان، احمد شهزاد جي جاءِ تي ڪپتان ٿيندو. ذريعي جو چوڻ آهي ته امام الحق جي پير ۾ فنگس جي بيماري لڳي وئي آهي. ڊاڪٽرن جو چوڻ آهي ته کيس مڪمل فٽ ٿيڻ ۾ هڪ مهيني کان وڌيڪ وقت لڳي سگھي ٿو. حبيب بينڪ ٽيم انتظاميا جو چوڻ آهي ته فخر زمان کي گھمڻ ڦرڻ ۾ شديد ڏکيائي آهي ان ڪري هو ميچ ڇڏي لاهور هليو ويو آهي جتي پاڪستان ڪرڪيٽ بورڊ جا ڊاڪٽر سندس علاج ڪري رهيا آهن. فاسٽ بالر جنيد خان جو پير بنگلا ديش پريميئر ليگ دوران زخمي ٿيو هو. هو به فٽ ناهي ۽ پنهنجي ٽيم جي نمائندگي نه ڪري سگھندو. يو بي ايل ڪمپليڪس ۾ يو بي ايل ۽ ڪي آر ايل جي ميچ ٿيندي. يو بي ايل اهم ترين ميچ ۾ پنهنجن رانديگرن عمر اڪمل، سهيل خان، محمد نواز ۽ عامر يامين جون خدمتون حاصل نه ڪري سگھندو. رومان رئيس پنهنجي ماءُ جي بيماري ڪري ميچ نه کيڏندو. ڪيمپ جي آغاز تي نيوزي لينڊ جي دوري لاءِ پاڪستاني ٽيم جو اعلان ڪيو ويندو، ذريعي جو چوڻ آهي ته فٽنس ٽيسٽ ۾ امام الحق، جنيد خان کان سواءِ شاداب خان، عماد وسيم، اظهر علي ۽ فهيم اشرف کي به پنهنجي فٽنس ثابت ڪرڻي پوندي.

 

بنگالين جو قتل عام ۽ بنگلاديش جو قيام!: ڪامريڊمنان چانڊيو

اڄ کان 46 سال اڳ 16 ڊسمبر 1971ع تي دنيا جي نقشي تي هڪ نئون ۽ آزاد ملڪ بنگلاديش، نڪري نروار ۽ نموندار ٿيو، ۽ اهڙي ريت 14 آگسٽ 1947ع تي قائم ٿيل پاڪستان 24 سالن جي چئن مهينن ۽ ٻن ڏينهن واري ڦوهه جواني ۾ ٻه اڌ ٿي ويو. هتي افسوس جي ڳالھ اها پڻ آھي، ته جتي بنگلاديش جي باني شيخ مجيب الرحمان کي هڪ فوجي جنرل مشتاق احمد 7 آگسٽ 1975ع تي بنگالي قوم جي هيري کي قتل ڪرائي حڪومت تي قضبو ڪرائي ورتو. اتي وري 4 اپريل 1979ع تي اولھ پاڪستان کي مشڪل حالتن مان اڪاري نئين سر ترقي ۽ تعمير جي راهه تي گامزن ڪندڙ ذوالفقارعلي ڀٽو جي حڪومت جو تختو اونڌو ڪري مارشل لا راڄ مڙھي، کيس جنرل ضياءُ الحق عدالت هٿان قتل ڪرائي ڇڏيو. اسان جي نظر ۾ انهن ٻنهي عوامي اڳواڻن جي غير فطري وڇوڙي کان پوءِ اتان جي عوام کي انهن جهڙا معتبر ۽ محبوب ليڊر اڄ تائين ڪونه مليا آھن. جيتوڻيڪ شيخ مجيب الرحمان جي فوجي غاصبن جي وحشيت کان بچيل اڪيلي نياڻي شيخ حسينا واجد پنهنجي عظيم پيءُ جي شھادت کان پوءِ هن وقت تائين ٻه ٽي ڀيرا حڪومت سنڀالي آھي. ۽ ساڳي ريت ذوالفقار علي ڀٽو جهڙي اعليٰ پائي جي سياستدان جي ڌيءُ پنهنجي والد جي شھادت کان پوءِ ٻه دفعا ملڪ جي اقتدار تائين رسڻ کان پوءِ نيٺ ان کي به قاتل قوتن شهيد ڪري ڇڏيو. ڪيڏي نه ستم ظريفي ۽ دردناڪ ڪهاڻي آھي، ته هڪ طرف شيخ مجيب جي پوري خاندان سواءِ شيخ حسينا واجد جي، کي قتل ڪيو ويو. ته ٻئي پاسي وري ذوالفقارعلي ڀٽو کي ٻن فرزندن، هڪ نياڻي سميت به بيدردي سان ماريو ويو. ۽ ھن جي گهرواري کي به اڻ سڌي طرح موت جي مونهن ۾ ڏنو ويو. چوڻ جو مطلب ته اڳوڻي گڏيل پاڪستان ۽ پوءِ اوڀر ۽ اولھ واري پاڪستان جي سڀ کان وڌيڪ مقبول سياسي ليڊرن کي فيملي سميت اتان جي ظالم ۽ جلاد قوتن مارائي ڇڏڻ کان پوءِ وڃي اهو سمجهو ته هاڻي انهن جو ناءُ نشان ۽ سياست ختم ٿي ويندي. پر اڄ تائين به انهن جي نالي ۽ ڪيل عوامي خدمتن جي عيوض سندن پارٽيون موجود آھن. خير اها ٻئي ڳالھ آھي ته اڄ به بنگلاديش ۾ شيخ مجيب جي پارٽي عوامي ليگ سندس ڌيءُ جي قيادت هيٺ حڪومت هلائي رهي آھي. ۽ اسان وٽ ڀٽو جي پارٽي کي سندس موجودهه محترمين ۽ معززين، پوري پاڪستان مان سياسي، حڪومتي ۽ تنظيمي لڏو کڻائي، اچي سنڌ جي ٻھراڙين تائين سو به ڀوتارن جي رحم ڪرم تي محدود ڪري ڇڏيو آھي. بهرحال ٻن سياسي اڳواڻن ۽ سندن گهراڻن جي ڏنل قربانين ۽ انهن جي سياست جي وارثن سندن ڪيترو قدر ڪيو ۽ ڀرم رکيو، اهو ڪنهن جي اکين کان اوجهل ناهي. پر پاڻ ڳالھ پيا ڪيون بنگلاديش جي قيام جي، ته اسان کي سمجھ ۾ نٿو اچي ته اڄوڪي ڏينهن تي بنگلاديش جي باني ۽ بنگالي قوم جي هيري شيخ مجيب جي نياڻي ۽ بنگالي قوم سان، لکين بنگالين جي شھادت تي عذر خواهي ڪيون يا ملڪ جي قيام ۽ قوم جي آزادي تي کين مبارڪ باد ڏيون. ڇو ته ٻنهين واقعن جي پنهنجي پنهنجي جاءِ تي وڏي اهميت آھي. ان ڪري ڀٽائي جي بيت جي هڪ سٽ، کين ارپيون ٿا.

ڏيکاريس ڏکن گوندر گس پرينءَ جو. يا گهوريا سک ڏکن ريءَ.

ڏٺو وڃي ته بنگلاديش جي قيام جا ته بظاهر ڪارڻ 1979ع جي اليڪشن ۾ شيخ مجيب جي پارٽي عوامي ليگ جي شاندار سوڀ کان پوءِ اقتدار اولھ کان اوڀر پاڪستان ڏانهن منتقل نه ڪرڻ هئا، پر ان کان اڳ ملڪ تي اردو ٻولي مڙھڻ واري سوال تي بنگالي قوم کي سخت اعتراز هئا. ان کان سواءِ اتان جي سياسي، اقتصادي، معاشي ۽ تعليمي مامرن تي به بنگالين کي ڄاڻي واڻي نظر انداز ڪرڻ تي پڻ بنگالي اولھ پاڪستان، خاص ڪري پنجابي مهاجر لابي ۽ اسٽيبليشمنٽ جي روين تي کين تحفظات هئا. ان ڪري انهن پنهنجو ووٽ هڪ طرفو شيخ مجيب جي پارٽي کي ڏئي ڪامياب ڪري اقتدار جي منتقلي جي انتظار ۾ هئا، ته جيئن ھو پاءُ صدءَ کان وٺي گهڻائي ۾ هوندي به ٿورائي وارن جي حڪومتي، سياسي، انتظامي، معاشي، ٻولي ۽ ثقافتي حوالي سان ٿيندڙ ڏاڍاين ۽ بي واجبين جو ازالو ڪري سگهن. اها حقيقت هئي ته پاڪستان ۾ سڀ کان وڌيڪ ڳالهائي ويندڙ ٻولي بنگالي هئي. جنهن جو تناسب 54 سيڪڙو هيو. جڏھن ته اردو جو ست سيڪڙو ۽ باقي ٻين قومن جهڙوڪ؛ سنڌين، پنجابين، بلوچن، پختونن ۽ سرائڪين جو تناسب لڳ ڀڳ 39 فيصد هيو. ته پوءِ اهو ڪيئن ٿي سگهيو پئي ته ست سيڪڙو وارث ٻولي 93 سيڪڙو وارين ٻولين تي مڙھي سگهجي؟ هڪ طرف ٻولي واري مامري تي بنگالين سان ايڏي ساري ناانصافي ٿي رهي هئي، ته ٻئي طرف وري هنن جي معاشي ڦر لٽ به چوٽان چوٽ ھئي.

اسان وٽ مثال طور تي بنگال جڏھن پاڪستان جي وحدت ۾ شامل ٿيو، ته ان جي سراسري ڪل پيداوار تيرنھن بلين کان وڌيڪ هئي. جڏھن ته اولھ پاڪستان جي يارنھن بلين رپين جي لڳ ڀگ هئي. ۽ جڏھن بنگال تي فوج ڪشي شروع تي ته بنگال جي سراسري پيداوار اولھ پاڪستان جي ڀيٽ ۾ گهٽ رهي. يعني بنگال جي جي ڊي پي 23 سالن ۾ تيرنھن بلين مان وڌي 20 بلين تي پهتي ۽ اولھ پاڪستان جي 11 بلين مان وڌي 27 بلين تي پهتي. جنهن مان صاف ظاهر هيو ته پاڪستان جي وحدت ۾ شامل ٿيڻ بعد بنگال جي معاشي ترقي جمود جو شڪار رهي. ۽ اولھ پاڪستان تيزيءَ سان ترقي ڪئي. جنهن جو مطلب اهو ٿيو ته اوڀر پاڪستان ۽ بنگالي قوم کي اولھ وارن هٿ وٺي پوئتي ڌڪي، هنن جي ٻولي ثقافت ۽ معاشي مامرن ۾ استحصال ڪري رهيا هئا. اهي ئي سبب هئا جو بنگالي قوم پنهنجي آئيني، جمهوري ۽ اقتصادي حقن جي حاصلات لاءِ آخري حد تائين وڃڻ لاءِ تيار هئا. هڪ طرف بنگالي قوم اولھ وارن جي وڌيڪ بالادستي برداشت ڪرڻ لاءِ تيار ڪو نه هئا، ته ٻئي طرف اولھ وارن پڻ اهو پڪو پھ ڪيو هيو، ته اقتدار ڪنهن به صورت ۾ اوڀر وارن کي ناهي ڏيڻو.

اهڙي سنگين صورتحال هئڻ ڪري ڌرين ئي پنهنجي پنهنجي حساب ۽ طاقت کان بندوبست ڪري ڇڏيا هئا. بس پوءِ جڏھن چونڊن ۾ شيخ مجيب جي واضح اڪثريت هئڻ باوجود اقتدار منتقل نه ڪيو ويو ته بنگالين اهڙي عمل خلاف ڀرپور احتجاجي تحريڪ شروع ڪئي، ۽ ان تحريڪ کي ڪچلڻ لاءِ 25 مارچ 1971ع تي پاڪستاني فوج ڍاڪا شھر تي ڪاهه ڪري هڪ رات ۾ گهٽ ۾گهٽ ست هزار شھرين کي موت جي ننڊ سمهاري ڇڏيو. اهڙي وحشياڻي حملي ۾ ڍاڪا يونيورسٽي جا 200 شاگرد هڪ ئي وقت قتل ڪيا ويا. جنهن وقت يونيورسٽي تي حملو ٿي رهيو هيو، ان وقت وري ٻيا فوجي دستا شھر جي ٻئي حصي ۾ پوليس جي هيڊ ڪوارٽرن تي ڪڙڪي پيا جنهن ڪري 11 سئو پوليس وارا پڻ قتل ٿيا. ڏٺو وڃي ته بنگلاديش جي آزادي واري تحريڪ ۾ لکين ماڻھو بيدردي سان ماريا ويا. هتي پاڻ ڪجھ ڏکوئيندڙ واقعن جو ذڪر ڪرڻ ضروري سمجهون ٿا. هڪ ڳوٺ ۾ پاڪستاني فوج ڳوٺاڻن کي چيو ته فوجي جوانن لاءِ رت کپي، ان کان پوءِ ۽ ڪيترين ئي ڳوٺاڻن کي کٽن تي سمهاري، کانئن ايتري تائين رت ڪڍڻ شروع ڪيو ويو، تان جو سندن سمورو رت وهي وڃڻ کان پوءِ اهي مري نٿي ويا. بنگلاديش ۾ جتي ماڻھن جو ڪوس ڪيو ويو، اتي وري اٽڪل ٻه لک اهڙيون عورتون هيون جن سان پاڪستاني فوجين ۽ انهن جي ڇاڙتن البدر ۽ الشمس وارن زوري زنائون ڪيون. جن کي وري پنهنجي مڙسن اهو چئي، ته توهان هاڻي اسان کان حرام ٿي ويون آهيو. ساڻن لاتعلقي جو اظھار ڪري ڇڏيو.

اسان هتي بنگالين جي ٿيل قتل بابت ڀٽو صاحب جا ڪجھ چيل الفاظ لکڻ ضروري سمجهون ٿا. ”اوڀر پاڪستان ۾ جيڪي ڀيانڪ واقعا ٿيا ۽ جا قيامت ٿي گذري، اهو سڀ ڪجھ هڪ خوفناڪ خواب پيو لڳي. اسان ان جو تصور ڪرڻ به نٿا چاهيون. مان وري ڪڏھن به اهو ساڳيو ماڻھون ٿي نه سگهندس، جيڪو انهن واقعن کان اڳ هيس. اڄ به اسين انهن ڳالهين جو سوچيون ٿا ته ننڊون ڦٽيو پون. اسين ڪي جهنگلي ڪو نه آهيون. اسان سڌريل انسان آهيون، پر اسان ڪن جهنگلين جي چنبي ۾ اچي وياسين. مون اول ئي شيخ مجيب کي ٻڌايو آھي، ته جو ڪجھ ٿيو آھي. ان تي اسان کي سخت افسوس آھي. انهن واقعن تي رڳو ويچار ڪرڻ سان به منهنجا لڱ ڪانڊارجي ٿا وڃن. جو ڪجھ ٿيو آھي. ان تي مون کي ۽ اسان سڀني کي ڏک رسيو آھي“ صدر پاڪستان ذوالفقار علي ڀٽو. ڪئنيڊا جي براڊ ڪاسٽنگ ڪارپوريشن سان ڪيل انٽرويو. 23 جنوري 1972ع.

 

 

ٿر ڪوئلو عالمي سيڙپڪار لا۽ ڪراچي ڪيئن پُھچندو…!: فدا حسين ڪُٻر 

ٿر ڪوئلو پروجيڪٽ پنھنجي منزل تي ڪڏھن پُھچندو, ۽ آخر ڪيئن پُھچي سگھندو. خالي بلاڪس کي مختلف ڪمپنين جي حوالي ڪري ڇڏي ڏيڻ سان ڪوئلي مان حاصل ٿيندڙ بجلي جا ڌڻي ڪڏھن به نه ٿي سگھنداسون. پروجيڪٽس تي ڪيل مھاعدن مطابق ڪمپنين کي روڊن, رستن, ۽ ايئرپورٽس ۽ ٻين گذر لنگھن ۽ ٽرانسپورٽس جي سھولتُن سان اجاگر ڪرڻ پوندو ته جيئن ڪمپنيون روڊن رستن ذريعي آساني سان ۽ بنا ڪنھن مشڪلاتُن سان پنھنجي چونڊيل منزل تي پُھچي سگھن, تڏھن ئي ٿر ڪوئلو پنھنجي منزل تي پُھچي سگھندو.  ٿر جي ترقي ڪراچي جھڙي بندرگاھ جي حيثيت رکندڙ شھر کان سوا۽ ممُڪن ناھي. اُنھي ڪري ڪراچي ٿر ڪوئلي جي پروجيڪٽ ۾ اھم ڪردار ادا ڪندو. ڪوئلو ڪڍڻ جي لا۽ جيڪي مشينز استعمال ڪيو وينديون اُھي ڪراچي کان اسلام ڪوٽ ۽ پو۽ اسلام ڪوٽ جي رستن ذريعي ٿر جي مختلف علائقن ڏانھن منتقل ڪيون وينديون ۽ کوٽائي دوران استعمال ڪيون وينديون. جنھن ڪري حُڪومت جي لا۽ سڀ کان وڏو چيلينج روڊن ۽ رستن جي ھُجڻ پڻ درڪار ھُوندو.

مطلب ته ڪراچي کان اسلام ڪوٽ تائين سي-پيڪ جھڙا بھترين ۽ نوان روڊ کپندا ۽ پُڻ ننڍن ننڍن ڳوٺن ۽ شھرن مان ھيوي مشينُن جي گُذرڻ جي لا۽ بھترين روڊن جو پڻ بندوبست ڪرڻو پوندو. جيڪڏھن پاڪستان ۽ وفاقي حڪومت چائنا جي مدد ڪندي سي-پيڪ جھڙا روڊ ٺاھي ۽ ٺھرائي سگھي ٿي ته پو۽ ھڪ سو پنجھتر ارب ٽن ڪوئلي جي رقم کي حاصل ڪرڻ جي لا۽ اسان کي سي-پيڪ جھڙا روڊ ٺاھراڻا ئي پوندا جنھن ڪري مشينن پُھچائڻ ۾ آساني ٿيندي. عام طور تي ته ٿر ۾ روڊن جي ڪا به سھولت موجود ناھي پر جيڪڏھن روڊ ٺھيل به آھن ته اھڙا آھن جنھن تان کيکڙا ۽ اُٺ گاڏا ۽ ٻيون جيپون ۽ مقامي گاڏيون ئي ھلي سگھنديون, اُتان وزني گاڏين ۽ مشينن جو گُذرڻ انساني جانين جي لا۽ خطرناڪ ۽ رسڪي عمل ھُوندو! جنھن سبب اُتان وڏي مشينري جو لنگھڻ تمام مُشڪل ثابت ٿيندو. حڪومت جي اڳيان اُھو به ھڪ وڏو چيلينج آھي ته ٿوري وقت ۾ سُٺا روڊ ڪيئن ٺاھي سگھندي! ڇا حڪومت پاران ايتري مالي انڪم ۽ انويسٽمنٽ ڪئي ويندي!

عالمي سيڙپڪار ۽ ايمرجنسي جي لا۽ اسلام ڪوٽ ۾ انٽرنيشنل يا بين الاقوامي ايئرپورٽ جي پڻ ضرورت پوندي جتي ھنگامي حالتُن ۾ ڪنھن انجنيئر يا مشينري جي وقت تي پھچي وڃڻ جو انتظام ڪرڻو پوندو. اسلام ڪوٽ ۾ اڳ ئي ايئرپورٽ قائم ڪيو ويو آھي جنھن جو رنوي پڻ تياري جي آخري مرحلن ۾ داخل ٿي چُڪو آھي. سنڌ اينگرو ڪول مائننگ ڪمپني جيڪا بلاڪ ٽو ۾ موجود آھي ۽ ڪوئلو ڪڍڻ وري عمل کي جاري رکيو آھي. ياد رکڻ کپي ته ڪوئلو ڪڍڻ کان پو۽ بجلي پيدا ڪرڻ جي لا۽ پاور ھائوس قائم ڪيا ويندا, پاور ھائوس قائم ڪرڻ کان سوا۽ بجلي جي پيدائش ممڪن ناھي جنھن ڪري ڪمپنيون ڪوئلو ڪڍڻ کان پو۽ پاور ھائوس ٺاھينديون ۽ بجلي پيدا ڪرڻ جو مرحلو شروع ڪنديون. پر پاور ھائوس ۾ جيڪي بوائلرز استعمال ڪيا ويندا اُنھن جي لا۽ مٺو پاڻي ضرور استعمال ڪرڻو پوندو. جنھن لا۽ مٺي پاڻي جو بندوبست ڪرڻو پوندو جنھن سان سوا۽ پاور ھائوس نه ھلي سگھندا. افسوس ته ٿر ۾ پھريان ئي پاڻي جي شديد کوٽ آھي,

پوري ٿر منجھ پيئڻ جي مٺي پاڻي جي لا۽ حُڪومت جي پاران ڪجھ آرو پلانٽس لڳايا ويا آھن پر انھن آور پلانٽس جو پاڻي پيئڻ جي لا۽ ئي مڪمل نٿو ٿي سگھي ته بوائلرز کي ٿڌو ڪيئن ڪيو ويندو! بوائلرز کي ٿڌو ڪرڻ جي لا۽ گھٽ ۾ گھٽ سو ڪيوسڪ پاڻي کپندو جيڪو ڪٿان ايندو! سنڌ حڪومت کي مٺي پاڻي جو پڻ مُمڪن بندوبست ڪرڻو پوندو ته جيئن بوائلرز کي مٺو پاڻي پُھچائي بجلي ٺاھيندڙ پاور ھاوس کي محفوظ رکيو وڃين. اينگرو ڪول مائننگ ڪمپني جي انجنيئرن جو چوڻ ھُيو ته ڪمپني 2019 تائين 660 ميگاواٽ بجلي پيدا ڪرڻ واري حدف ۾ ڪامياب ٿي ويندي پر جيڪڏھن پاور ھاوس جي بوئلرز کي وقت تي مٺو پاڻي نه پُھچايو ويو ته انھي ڏنل حدف ۾ تاخير جو شڪار ٿي سگھي ٿو جنھن سبب بجلي پيدا ڪرڻ ۾ ڪافي مھينا اضافي لڳي سگھن ٿا. ھڪ ئي ممڪن رستو آھي ته ٿر اندر ڪجھ ٻيا آرو پلاٽس لڳايا وڃن ته جيئن اُنھن بوائلرز تائين ڪاميابي سان پاڻي پھچائي وقت تي بجلي پيدا ڪري سگھجي.

واضح ڳالھ آھي ته ٻين ڪيميائي شين کي صاف ڪرڻ ۽ انھن جي استعمال جي لا۽ پاڻي جو ھُجڻ نھايت ضروري آھي. ڪوئلو ٿر جي ريگستان جي مختلف علائقن اندر زيري زمين ھڪ سو چاليھ ميٽرن جي اونھائي تي ملندو جنھن جي کوٽڻ کان پو۽ ئي ڪوئلو نڪرڻ شروع ڪندو, پر اُھو انھي وقت تائين استعمال نه ٿي سگھندو جيستائين پاور ھاوس ڪم ڪرڻ شروع نه ڪندا ۽ پاور ھاوس تڏھن ڪم ڪرڻ شروع ڪندا جيستائين انھن جي بوائلرز کي مٺو پاڻي فراھم نه ڪيو ويندو! ٿر ۾ مٺي پاڻي جو پُھچڻ ئي ڪوئلي پروجيڪٽ جي شروعات ھُوندي سنڌ حڪومت کي مٺي پاڻي جي ھڪ ڪيوسڪ جي فراھمي ڏيڻي پوندي ته جيئان ڪوئلي مان آساني سان بجلي پيدا ڪئي وڃين. باقي اڄ جي مضمون جو اھم نختو آھي ته ڪراچي کان اسلام ڪوٽ ۽ اسلام ڪوٽ کان ڪوئلي جي کاڻين تائين سفر ڪيئن ٿيندو…..! سنڌ سرڪار کي سي-پيڪ جھڙا ڪارائتا روڊ ٿر جي ٻاھرين رستن ۽ اندرين رستن تي ڪوئلي جي کاڻين تائين ٺاھڻا پوندا, اسلام ڪوٽ ۾ بين العقوامي ايئرپورٽ پڻ ٺاھڻو پوندو پو۽ ئي عالمي سيڙپڪار ڪراچي پُھچي سگھندي…!

 

انجامِ ئي گلستان ڇا ٿيندو؟: جاويد ڪنڀر

وزيراعليٰ سنڌ سيد مراد علي شاھ وڏ وزارت جومسند سنڀالڻ سان گڏ سنڌ ۾ تعليمي ايمرجنسي جو اعلان ڪيو ته ڪنهن حد تائين دل کي دلاسو مليو ته هاڻي حڪمرانن کي تعليم جو اونو ٿيو آهي هاڻي سنڌي سماج به علم جهڙي انس سان پنهنجو من منور ڪندو پر تعليم واري وزير ڄام مهتاب ڏهر جي اين ٽي ايس ۽ سنڌ يونيورسٽي پاس استادن کان ٻيهر ٽيسٽ وٺڻ ۽ ڪانٽريڪٽ وڌائڻ واري بيان تعليم واري ايمرجنسي کي بي نقاب ڪري ڇڏيو پيغمبرانه پيشي جا پاڌئيڙا سراپا احتجاج بڻجي روڊن تي نڪري آيا هي هُن شعبي جا شيدائي آهن جنهن شعبي تي ناز ڪندي سرور قونين حضرت محمدﷺ جن فرمايو “ آئون دنيا ۾ معلم ڪري موڪليو ويو آهيان” پر سنڌ جا معلم پنهنجن مطالبن جي مڃتا لاءِ روڊن تي دربدر ٿي رهيا آهن دنيا جون ترقي يافته قومون پنهنجن محسن استادن تي ناز ڪنديون آهن انهن جي ضرورتن جي پورائي لاءِ پاڻ پتوڙينديون آهن پر اسان وٽ گنگا الٽي ٿي هلي جنهن کي ڳالهائڻ لاءِ ڪو موضوع نٿو ملي هو استادن تي تنقيد جا تير وسائڻ شروع ڪندو آهي هي ته اهي استاد آهن جن جي سامهون سڪندر اعظم سموري دنيا جو فاتح محڪوم بڻجي چوي ٿو “مون کي مائيٽن آسمان کان زمين تي آندو پر منهنجي استاد مونکي زمين کان آسمان تي پهچايو” سنڌ ۾ تعليم صحت ۽ پوليس جو شعبو سياسي آشرواد هيٺ رهيو آهي انسانن جون جيڪي بنيادي ضرورتون آهن اهي سياسي هٿن ۾ يرغمال رهيون آهن هر موقعي ۽ مهل تي انهن سان پنهنجي منشا آهر کيڏيو ويو آهي اهوئي سبب آهي جو گپل عرصي گذرڻ بعد به تعليم صحت ۽ پوليس جهڙا شعبا پنهنجي پيرن تي بيهي ناهن سگهيا. دنيا جا ڏاها انهي ڳالھ جو اقرار ڪن ٿا ته جنهن قوم کي دنيا جي نقشي تان مٽائڻو هجي انهي قوم جي تعليم کي تباھ ڪيو قوم پاڻهي پساھ ڏيندي اسان جو تعليمي سسٽم به اڌاري آڪسيجن تي هلي رهيو آهي اڌاري آڪسيجن مان جان آجي ڪرڻ لاءِ ڪيترائي نوان تجربا ۽  طريقا رائج ڪيا وڃن ٿا پر اهي سڀئي طريقا ڌڙ ريڊو سسي ٻاڪري وانگي ٻيهائي ۽ ٺڳي تي ٻڌل هوندا آهن جئين تازو وزير تعليم مهتاب ڏهر اين ٽي ايس پاس استادن کان ٻيهر ٽيسٽ وٺڻ ۽ عرصي وڌائڻ وارو پاليسي بيان ڏنو سنڌ جي استادن سراپا احتجاج بڻجي ٻيهر ٽيسٽ وارو بيان واپس وٺن تي مجبور ڪيو پر ڪانٽريڪٽ وڌائن واري بيان تي وزير اڃا قائم آهي ۽ انهي جي خلاف اين ٽي ايس ۽ سنڌ يونيورسٽي پاس استاد روڊن تي سراپا احتجاج آهن هاڻي هڪ وسيع نظر جو جيڪڏهن جائزو وٺون ته انهن بيانن ۽ احتجاجن جو نقصان سنئون سڌو سنڌ جا شاگرد ڀوڳي رهيا آهن هن وقت اسڪولن ۾ نصاب پورو ڪيو ويو آهي اسڪولن ۾ امتحانن،  پنجين ۽ اٺين ڪلاس جي شاگردن کان آءِ بي اي جي اداري طرفان ورتي ويندڙ  اسٽينڊرائيزڊ اچيومينٽ ٽيسٽ جون شاگرد تياريون ڪري رهيا آهن انهي قيمتي گهڙي ۾ استاد بي چيني جو شڪار آهن اهي شاگردن تي ايتري توجھه نه پيا ڏئي سگهن انڪري شاگردن جي پڙهائي پڻ متاثر ٿي رهي آهي استاد مايوسي جو شڪار آهن ڇو ته اهي نج ميرٽ تي ڀرتي ٿيل استاد آهن مختلف وقتن تي انهن کي پريشان ڪيو ويو آهي سنڌ يونيورسٽي پاس اٺن سالن کان پڪا ٿيڻ جي اوسئيڙي ۾ پنهنجيون تدريسي خدمتون سرانجام ڏئي رهيا آهن پر اڃا پڪا ٿي ناهن سگهيا انهي عرصي دوران ڪيترائي استاد گذاري ويا آهن پر انهن جي پوئنيرن کي ڪوبه مالي فائدو نه ملي سگهيو آهي اين ٽي ايس پاس استاد به ٽن سالن کان ساڳئين پريشاني کي منهن ڏئي رهيا آهن انهن جي تبادلي تي به پابندي لڳل آهي سنڌ جي وزير اعليٰ ۽ وزير تعليم کي واقعي ۾ سنڌ جي تعليم جو اونو آهي ته انهن استادن کي پڪو ڪري بي چيني ختم ڪئي وڃي ته جئين اهي استاد تدريسي ذميواريون احسن طريقي سان سرانجام ڏئي سگهن.

 

ڊار جي واپسي انٽرپول ذريعي ڪرڻ جو فيصلو..!!

نئب جي ايگزيڪيوٽو بورڊ جو اجلاس چيئرمين جاويد اقبال جي صدارت هيٺ ٿيو. اجلاس بعد پڌرنامو جاري ڪندي چيو ويو آهي ته ايگزيڪيوٽو بورڊ اجلاس ۾ 8 انڪوائرين ۽ ٻين انويسٽيگيشن جي منظوري ڏني وئي. ملتان ميٽرو بس پراجيڪٽ ۾ سرڪاري فنڊن ۾ ناجائز استعمال ڪيو ويو. پراجيڪٽ ۾ پيپرا قاعدن ۽ قانون جي ڀڃڪڙي جو الزام آهي. بدعنواني جي جاچ جي به منظوري ڏني وئي آهي. اڳوڻي ناڻي واري وزير اسحاق ڊار کي انٽر پول ذريعي ڏيهه آڻڻ جو فيصلو ڪيو ويو آهي.

نئب ترجمان موجب نئب ڪراچي جي ڊپٽي ڊائريڪٽر سرويچ شيخ کي معطل ڪيو ويو آهي. انڪوائري ڪميٽي روزاني جي بنياد تي الزامن جي جاچ ڪندي. هن تي ڪرپشن جو الزام آهي. جاچ مڪمل ٿيڻ تائين معطل رهندو. پاڪ ڊبليو ڊي لاڙڪاڻي جي آفيسرن خلاف جاچ، اڳوڻي ايم پي اي نصرالله بلوچ خلاف اختيارين جي ناجائز ااستعمال، نارٿ سنڌ اربن سروسز ڪارپوريشن جي آفيسرن خلاف ڪرپشن جي جاچ جي به منظوري ڏني وئي آهي. شاهه عبداللطيف يونيورسٽي خيرپور جي پروين نعيم، چيف انجنيئر سکر ارشاد ميمڻ جي ڪرپشن جي جاچ جي منظوري ڏني وئي. نئب پي آءِ اي جي جهاز اي 310 غير قانوني جرمني موڪلڻ ۽ بعد ۾ ڀڳڙن مٺ تي وڪرو، پنجاب ۾ مبينا طور 56 غير قانوني پبلڪ ڪمپنين ۾ بدعنوانين، نيو اسلام آباد ايئرپورٽ جي تعمير ۾ مبينا بدعنوانين تي سي اي اي آفيسرن خلاف انڪوائري جي به منظوري ڏني وئي.