تازيون خبرون

Daily Archives: December 13, 2017

حديبيا ڪيس: نيب ڪهاڻين بدران شاهديون پيش ڪري: سپريم ڪورٽ

اسلام آباد (ويب ڊيسڪ) سپريم ڪورٽ حديبيا پيپز ملز ڪيس جي ٻڌڻي ۾ چيو آهي ته نيب ڪهاڻين بدران شاهديون پيش ڪري. جسٽس مشير عالم جي سربراهي ۾ سپريم ڪورٽ جي ٽي رڪني بئنچ حديبيا ڪيس کولڻ لاءِ نيب جي اپيل جي ٻڌڻي ڪئي. ان دوران جسٽس مظهر عالم چيو ته حديبيا ڪيس جي حوالي سان سپريم ڪورٽ جي پاناما ڪيس جي فيصلي ۾ هدايتون هيون ۽ ڇا جي آءِ ٽي سفارشن تي عدالت حديبيا ڪيس بابت ڪي هدايتون ڏنيون. نيب وڪيل عمران الحق چيو ته حديبيا جو ذڪر پاناما فيصلي ۾ ناهي. جسٽس قاضي فائز عيسيٰ چيو ته پئسا هيڏانهن هوڏانهن هليا ويا، اهي ڪهاڻيون آهن، بيان ڇڏيو ۽ شاهديون پيش ڪيو. جوابدارن تي لڳايل الزام ٻڌايو، ممڪن آهي ته اهو ڪارو ناڻو يا انڪم ٽيڪس جو ڪيس هجي. جسٽس مشير عالم چيو ته پاناما فيصلي کي حديبيا سان ڪيئن ڳنڍينداسين. جسٽس قاضي فائز عيسيٰ چيو ته پاناما جي آءِ ٽي ته حديبيا ڪيس بابت پنهنجي راءِ ڏني آهي، ان معاملي ۾ مجرماڻو عمل ڇا آهي اهو ٻڌايو، ممڪن آهي هي انڪم ٽيڪس جو معاملو هجي. نيب وڪيل عمران الحق ٻڌايو ته 1998ع جي ايٽمي ڌماڪن کانپوءِ سڀ فارن ڪرنسي اڪائونٽ منجمد ڪيا ويا هئا، فارن اڪائونٽ منجمد ڪرڻ کان اڳ جوابدارن پنهنجو پئسو ڪڍرايو هو. جسٽس مشير عالم چيو ته 1992 کانپوءِ اڄ 2017ع هلي رهيو آهي، هاڻ به اسان اونداهه ۾ آهيون، الزام واضح هجڻ گهرجن، صديقا جي اڪائونٽ مان پئسا ڪنهن ڪڍرايا نالو ٻڌايو. نيب وڪيل چيو ته اسحاق ڊار اها رقم ڪڍرائڻ جو اعتراف ڪيو. جسٽس مشير عالم چيو ته اهڙي صورت ۾ ته لاڳاپيل ڪاغذ اسان جي سامهون هجڻ گهرجن. جسٽس قاضي فائز عيسيٰ چيو ته نه جي آءِ ٽي ڪجهه ڪيو نه توهان ڪجهه ڪيو، ڇا حديبيا جي ڊائريڪٽرز کي سڀ سوال ڏنا ويا؟ آرٽيڪل 13 کي به نظر ۾ رکڻو آهي. عمران الحق ٻڌايو ته اسان جوابدارن کي سوال نامو موڪليو پر جواب نه ڏنا ويا. جسٽس مشير عالم نيب وڪيل کي چيو ته توهان کي مڪمل مني ٽريل ثابت ڪرڻي آهي. جسٽس قاضي فائز عيسيٰ چيو ته سڀ ڳالهيون مڃيون پوءِ به نيب کي مجرماڻو عمل ٻڌائڻو آهي، نيب سيڪشن 9 اي تحت ته توهان ڪا ڳالهه نه پيا ڪيو. نيب وڪيل چيو ته عدالت اجازت ڏئي ته اسحاق ڊار جو بيان پڙهان. جسٽس قاضي فائز چيو ته اسحاق ڊار جي بيان کي ڪنهن قانون تحت ڪنهن ٻئي شخص خلاف استعمال ڪري سگهجي ٿو. جسٽس مشير عالم پڇيو ته ڇا اسحاق ڊار جي بيان کي ڪائونٽر چيڪ (تصديق) ڪيو ويو. نيب وڪيل چيو ته اسحاق ڊار جي بيان جي تصديق ڪئي وئي. جسٽس قاضي فائز عيسيٰ چيو ته قانوني طور اسحاق ڊار جو بيان عدالت يا نيب چيئرمين اڳيان وٺڻ گهرجي ها. ڪيس جي ٻڌڻي سڀاڻي ساڍي 11هين وڳي تائين ملتوي ڪئي وئي.27

 

اتر وزيرستان ۾ دهشتگردن جي حملي ۾ پاڪ فوج جا ٻه جوان شهيد

راولپنڊي  (اين اين آءِ)  اتر وزيرستان ايجنسي جي جبلن ۾  لڪي ويٺل دهشتگردن فوجي گاڏي تي ف ائرنگ ڪئي جنهن ۾  پاڪ فوج جو آفيسر سيڪنڊ ليفٽنٽ عبدلمعيد ۽ سپاهي  بشارت شهيد ٿي ويا، 21 سالن جو سيڪنڊ ليفٽنٽ عبدالمعيد تازو ئي پاڪستان ملٽري اڪيڊمي مان پنهنجي تربيت پوري ڪئي هئي جنهن جو تعلق وهاڙي تعلقي ڀوريوالا سان  آهي، جڏهن ته هڪ شهيد بشارت کي پاڪ فوج ۾ خدمتون نڀائيندي ٽي سال گذري چڪا هئا، سندس تعلق گلگت جي ڳوٺ دانيور سان آهي.  پاڪ  فوج جي سربراه جنرل قمر جاويد باوجوه شهيدن کي سلام پيش ڪندي چيو آهي ته آزادي مفت ۾ ناهي ملندي ان جي قيمت ڌرتي جا پٽ ادا ڪن ٿا. پاڪ فوج جي اڳواڻ جنرل قمر جاويد باجوا اتر وزيرستان ۾ شهيد جوانن کي زبردست خراج عقيدت پيش ڪندي چيو آهي ته آزادي مفت ۾ ناهي ملي. ڌرتي ماءُ لاءِ پُٽن کي قرباني ڏيڻي پوندي. پاڪ فوج جي شعبي تعلقات عامه (آءِ ايس پي آر) جي ڊائريڪٽر جنرل، ميجر جنرل آصف غفور جي ٽوئيٽ مطابق پاڪ فوج جي اڳواڻ جنرل قمر جاويد باجوا اتر وزيرستان ۾ شهيد جوانن کي زبردست خراجِ عقيدت پيش ڪيو. هن چيو ته شهيدن کي سلام ڪريان ٿو، آزادي جيڪا اسان هاڻي ملائي رهيا آهيون، ائين ئي بهادر جوانن جي قربانين سبب آهي   صدر ممنون حسين اتر وزيرستان ۾ فوجي قافلي تي دهشتگرد حملي جي مذمت ڪندي چيو آهي ته اسانجي محافظن قرباني ڏئي قوم جو مستقبل محفوظ ڪيو آهي، صدر ممنون حسين حملي ۾ شهيد سيڪنڊ ليفٽنٽ ۽ سپاهي جي بلند درجن ۽ گھر ڀاتين جي لاٰ صبر جي دعا ڪئي هن چيو ته دهشتگردي جي خلاف ۾ جنگ ۾ هٿيار بند فوج جي جوانن وڏيون قربانيون ڏنيون آهن، صدر چيو ته قوم شهيدن غازين جون قربانيون هميشا ياد رکندي.وزيراعظم شاهد خاقان عباسي  اتر وزيرستان ۾ سيڪيورٽِي فورسز تي دهشتگرد حملي جي سخت مذمت ڪندي پنهنجي بيان ۾ ڏکايل خاندان سان تعزيت جو اظهار ۽ شهيدن جي لاءِ بلند درجن جي دعا ڪئي. وزيراعظم چيو ته پاڪستان  دهشتگردي جي ناسور کي شڪست ڏني آهي. دشمنن جي خلاف بهادر فوج جو ڪردار ڀلائي نه ٿو سگھجي، ۽ دهشتگردي خلاف جنگ ۾ لازوال قربانيون هميشا ياد رهنديون.

 

پاڪستان ۾ هلندڙ سال 343 عورتن کي غيرت جي نالي موت جي ننڊ سمهاريو ويو

لاهور (ويب ڊيسڪ) پاڪستان ۾ غيرت جي نالي تي عورتن جي قتل جو سلسلو جاري آهي ۽ هلندڙ سال 11 مهينن دوران 343 عورتن کي موت جي ور چاڙهيو ويو. پنجاب اسيمبلي ۾ غيرت جي نالي تي قتل ٿيندڙ عورت خلاف تحريڪ التويٰ پيش ڪئي وئي، جنهن موجب هلندڙ سال 11 مهينن دوران 343 عورتن کي موت جي ننڊ سمهاريو ويو. قرارداد جي متن ۾ چيو ويو آهي ته غيرت جي نالي تي سڀ کان وڌيڪ پنجاب، جڏهن ته سنڌ، ڪي پي ۽ بلوچستان ۾ ترتيب وار ٻئي، ٽئين ۽ چوٿين نمبر تي عورتن کي قتل ڪيو ويو. تحريڪ التويٰ ۾ پيش ڪيل انگن اکرن موجب سنڌ ۾ 58 عورتن کي غيرت جي نالي تي قتل ڪيو ويو. قرارداد ۾ مطالبو ڪيو ويو ته حڪومت عورتن تي ٿيندڙ ظلم جو سختي سان نوٽيس وٺي ۽ غيرت جي نالي تي قتل ڪندڙن کي عبرتناڪ سزا ڏني وڃي ته جيئن اهڙن ڏوهن تي ضابطو اچي سگهي. واضح رهي ته 29 نومبر تي سنڌ اسيمبلي ۾ عورتن تي تشدد جي روڪٿام لاءِ خاص ڏينهن ملهايو ويو هو، جنهن ۾ خيالن جو اظهار ڪندي وڏي وزير جي عورتن بابت ترقي جي مددگار ارم خالد چيو هو ته غيرت جي نالي تي قتلن جي روڪٿام لاءِ قانون سازي جاري آهي، ان ڏس ۾ قانون جو ڊرافٽ به غور هيٺ آهي.27

 

وڏي وزير پاران سنڌ جي ٻهراڙين کي شمسي توانائي مان بجلي فراهم ڪرڻ جو اعلان

ڄام شورو (اين اين آءِ) سنڌ جي وڏي وزير ان عزم جو اظهار ڪيو آهي ته سنڌ جي ڏورانهين ڳوٺن کي  جلد شمسي توانائي جي زريعي بجلي فراهم ڪنداسي، اڱاري تي سيوهڻ کان ڄامشورو تائين ڊبل رود جي  اڏاوت جي منصوبي جي پيڙه جو پٿر رکندي سنڌ جي وڏي وزير سيد مراد علي شاهه چيو ته هي روڊ ٺآهڻ منهنجي خواهش هئي ۽ ضرورت پئي ته هاڻي سيوهڻ وڃڻ لاءِ هيليڪاپٽر تي نه پر هن روڊ تان  ويندس ته جيئن  ڪوالٽي  چيڪ ڪري سگھان، صحافين سان ڳالهائندي وڏي وزير چيو ته ڄآم شورو کان مانجھند تائين 64 ڪلوميٽر پهريون مرحلو آهي ۽ ٻئي مرحلي ۾ جنوري کان ٽينڊر جاري ڪنداسي ۽ هن  روڊ تي پل ۽ انڊرپاس به ٺاهينداسي جتان منهنجو لنگھه به ٿئي ٿو، وڏي وزير  چيو ته 2018 ۾ پ پ جي حڪومت ۾ ايندي  اسان عوام جي خدمت جي لاءِ هر وقت حاضر آهيون هن اعلان ڪيو ته جلدي ڏورانهن علائقن ۾ جلدي شمسي توانائي سان بجلي ڏينداسي.

 

فاٽا سڌارن واري بل تي حڪومت جو رويو غير سنجيدا آهي: خورشيد شاهه

اسلام آباد (ويب ڊيسڪ) قومي اسيمبلي ۾ مخالف ڌر جي اڳواڻ سيد خورشيد شاهه حڪومت تي تنقيد ڪندي چيو آهي ته فاٽا سڌارا بل تي حڪومت جو رويو غير سنجيدا آهي. قومي اسمبلي جي اجلاس ۾ خيالن جو اظهار ڪندي خورشيد شاهه چيو ته 70 ورهيه گذري ويا، هاڻ فاٽا جي مسئلن جو حل ڳولڻو پوندو، ان معاملي تي نواز شريف ڳالهه نه مڃي ۽ هاڻ حڪومت به ساڳيو رويو اختيار ڪيو آهي. هن چيو مخالف ڌر ته اجلاس ۾ اچي ويندي آهي پر حڪومت ناهي ايندي، اهو ئي سبب آهي جو پارليمينٽ جي توهين تي ايوان کان واڪ آئوٽ ڪري رهيا آهيون. سندس چوڻ هو ته اسان کي اميد آهي ته فاٽا سڌارا بل سڀاڻي ايجنڊي ۾ شامل ڪيو ويندو ۽ مسئلا ڊائيلاگ ۽ سنجيدگي سان حل ٿيندا. اجلاس دوران هن فلسطين جي معاملي تي به خيالن جو اظهار ڪندي چيو ته حڪومت فلسطين جي معاملي تي به غير سنجيدا آهي.27

 

فلسطين کي ڪشمير مسئلي وانگر ئي ڏسون ٿا: آرمي چيف

راولپنڊي(اي پي پي) ) پاڪ فوج جي سربراهه جنرل قمر جاويد باجوا سان سعودي عرب جي نائب دفاع واري وزير محمد بن عبدالله العسي ملاقات ڪئي جنهن ۾ علائقائي سلامتي ۽ ٻه طرفو دفاعي سهڪار وڌائڻ جي معاملن تي غور ڪيو ويو. آءِ ايس پي آر مطابق آرمي چيف جنرل قمر جاويد باجوا سان سعودي عرب جي نائب دفاع واري وزير جي ملاقات جي ايڇ ڪيو راولپنڊيءَ ۾ ٿي. سعودي عرب جي نائب دفاع واري وزير پاڪ فوج جي پيشوراڻي معيار ۽ ڪارڪردگيءَ جي واکاڻ ڪئي پاڪ فوج جي سربراهه جنرل قمر جاويد باجوا چيو آهي ته پاڪستان فلسطين جي مسئلي جي حل لاءِ هر ممڪن سهڪار جاري رکندو. فلسطين جي مسئلي کي ڪشمير مسئلي جيان حل طلب سمجهون ٿا، پاڪستان ٻنهي مسئلن جي حل لاءِ سياسي، اخلاقي ۽ عوامي حمايت تي برابر مؤقف رکي ٿو. اهڙو اظهار هن اڱاري ڏينهن فلسطيني سفير سان ملاقات دوران ڳالهائيندي ڪيو. پاڪ فوج جي سڌ سماءَ واري شعبي آءِ ايس پي آر مطابق فلسطين جي سفير وليد ابوعلي جي ايڇ ڪيو راولپنڊيءَ ۾ آرمي چيف جنرل قمر جاويد باجوا سان ملاقات ڪئي. آرمي چيف چيو ته فلسطين مسئلي کي ڪشمير مسئلي جيان حل طلب سمجهون ٿا، پاڪستان ٻنهي مسئلن جي حل لاءِ سياسي، اخلاقي ۽ عوامي حمايت تي هڪ جهڙو مؤقف رکي ٿو. فلسطين جي سفير فلسطين ڪاز لاءِ پاڪستان جي حمايت تي شڪريو ادا ڪيو.

 

اتر وزيرستان ۾ سيڪيورٽي فورسز جي حملي تي سخت مذمت، نواز شريف سي پيڪ معاهدو ڪري ملڪ کي بحرانن مان ڪڍيو: احسن اقبال

ڪراچي(اي پي پي) وفاقي وزير احسن اقبال چيو آهي ته ايم ڪيو ايم پاڪستان تي پابنديءَ جي ڪا تجويز يا ارادو نه ٿا رکون، ايم ڪيو ايم لنڊن خلاف قانون مطابق ڪارروائي ٿيندي، ڪراچيءَ ۾ ايگزيڪيوٽو پاسپورٽ آفيس جي قيام سان شهرين کي سهولت ميسر ايندي، جيڪي پارٽيون سينيٽ مان مردم شماري جو قانون منظور ڪرائڻ ۾ دير جا طريقا استعمال ڪري رهيون آهن اهي بروقت چونڊون نه ٿيون چاهين ۽ اهي ڊگهي مُدي واري سازش جو حصو آهن. ناڻي واري وزير اسحاق ڊار خلاف سياسي ايجنڊا تحت ڪيس ٺاهيا پيا وڃن. اهڙن خيالن جو اظهار هن اڱاري تي ڪلفٽن ۾ ايگزيڪيوٽو پاسپورٽ آفيس جي افتتاح جي موقعي تي تقريب کي خطاب ڪندي ڪيو. هن چيو ته ڪراچيءَ ۾ عوامي سهولت لاءِ پهرين ايگزيڪيوٽو پاسپورٽ آفيس جو افتتاح ڪري ڇڏيو آهي، وفاقي حڪومت طرفان ان کان اڳ ڪراچيءَ ۾ نادرا طرفان 3 ميگا سينٽر کلي چڪا آهن، انهن سينٽرز جي قيام جو بنيادي مقصد وفاقي حڪومت طرفان قائم ڪيل ادارن ۾ عوام کي وڌ ۾ وڌ سهولتون فراهم ڪرڻ آهي جن ۾ بين الاقوامي معيار جون سهولتون فراهم ڪيون وينديون. هن چيو ته ڪراچي پاڪستان جو معاشي حب آهي، وفاقي حڪومت ملڪ جي ڪنهن به شهر ۾ ميٽرو بس لاءِ هڪ رپيو فراهم نه ڪيو پر ڪراچيءَ ۾ گرين بس سروس لاءِ اسان 24 ارب رپين جي فنڊز جي فراهمي يقيني بنائي آهي، اهڙي ريت هتان جي شهرين کي پيئڻ جي صاف پاڻيءَ جي فراهميءَ لاءِ 12 ارب رپيا وفاقي حڪومت فراهم ڪري رهي آهي ۽ لياري ايڪسپريس وي جو التوا ۾ پيل منصوبو وفاقي حڪومت ٻيهر شروع ڪيو، ان لاءِ فنڊز فراهم ڪيا ويا جيڪو لڳ ڀڳ مڪمل ٿي چڪو آهي. هن چيو ته وفاقي حڪومت جي ڪوششن سان ڪراچيءَ ۾ راند جا ميدان ٻيهر آباد ٿي رهيا آهن ۽ اسان پاڪستان ڪرڪيٽ بورڊ سان گڏجي سيڪيورٽي جي حوالي سان ڪم ڪري رهيا آهيون، هاڻي پي سي ايل جون مئچون ڪراچي آڻڻ جي تياري ڪئي پئي وڃي. ان کان علاوه هاڪيءَ جا بين الاقوامي مقابلا به منعقد ڪرايا ويندا. احسن اقبال چيو ته 2013ع ۽ اڄ جي ضابطو آندو ويو آهي، دهشتگردن جي چيلهه چُٻي ڪئي وئي آهي. ڪراچيءَ ۾ امن واپس اچي چڪو آهي، ٽارگيٽ ڪلنگ نه هئڻ جي برابر آهي، شهري پُرامن طريقي سان زندگي گذاري رهيا آهن. وفاقي گهرو وزير چيو ته صوبائي حڪومت کي چئون ٿا ته اها بجليءَ جي چوري جي خاتمي لاءِ ڪي اليڪٽرڪ جي مدد ڪري، پاڪستان ۾ 65 سيڪڙو فيڊرز تي لوڊشيڊنگ ختم ڪئي وئي آهي جڏهن ته 35 سيڪڙو فيڊرز جتي چوري ڪئي پئي وڃي اتي چوريءَ جي تناسب سان لوڊشيڊنگ ڪئي پئي وڃي. هن چيو ته ڪجهه عنصر چونڊن ۾ دير جا طريقا ڳولهي رهيا آهن، جيڪڏهن ائين ڪيو ويو ته هر طرف کان سوال اُٿندا ۽ ملڪ سياسي بحران ۾ هليو ويندو. تنهن ڪري ضروري آهي ته عبوري حڪومت جي اچڻ کان پوءِ 60 يا 90 ڏينهن اندر چونڊون ڪرايون وڃن ۽ ائين ڪرڻ لاءِ ضروري آهي ته سينيٽ مان فوري طور مردمشماري جي روشنيءَ ۾ تڪبندين جو قانون پاس ڪيو وڃي، ڇاڪاڻ ته اليڪشن ڪميشن کي تڪ بندين جو ڪم مڪل ڪرڻ لاءِ 5 کان 6 مهينا گهربل آهن. هن چيو ته جيڪڏهن سينيٽ مان فوري طور اهو قانون منظور نه ٿو ٿئي ته چونڊن کي التوا ۾ وجهڻ جي سازش ڪامياب ٿي ويندي. مان اهو پُڇڻ ٿو چاهيان ته ”ڇا قومي اسيمبليءَ ۾ پيپلز پارٽي ڌار آهي ۽ سينيٽ ۾ الڳ آهي؟“ ۽ ڇا قومي اسيمبليءَ جي پي ٽي آءِ سينيٽ جي پي ٽي آءِ کان مختلف آهي. هن چيو ته جيڪڏهن مردمشماري جي قانون کي قومي اسيمبليءَ ۾ انهن پارٽين پاس ڪيو آهي ته اهي سينيٽ مان منظور ڪرائڻ کان ڇو لنوائي رهيون اهن. هن چيو ته اسحاق ڊار خلاف جيڪي ڪيس قائم ڪيا ويا آهن اهي افسوسناڪ آهن، کيس سياسي ايجنڊا تحت انتقامي ڪارروائي جو نشانو بڻايو پيو وڃي. هن چيو ته ايم ڪيو ايم پاڪستان تي پابندي جي ڪا تجويز يا ارادو نٿا رکون پر ايم ڪيو ايم لنڊن خلاف اسان وٽ ثبوت موجود آهن، ان خلاف قانون مطابق ڪارروائي ٿيندي

 

فاٽا جي عوام کي حق نه مليا ته حڪمرانن جي ڳِچي پڪڙينداسين: سراج الحق

اسلام آباد (اين اين آءِ) فاٽا سڌارن جي لاءِ جماعت اسلامي جو ڪي پي ڪي  مان شروع ٿيل لانگ مارچ اسلام آباد پهچي ويو آهي ذريعن مطابق جماعت اسلامي جي فاٽا سڌارن واري ريلي فيض آباد پهچي وئي آهي. لانگ مارچ ۾   جماعت اسلامي جي ڪارڪنن جو وڏو انگ شامل هيو صحافين سان ڳالهائندي سراج الحق چيو ته ڪنهن جي اشاري ۽ ڪنهنجي دٻاءُ تي حڪومت فاٽا سڌارن جو  پنهنجو واعدو پورو نه پئي ڪري ايف سي آر جي ظالماڻي نظام سان نفرت سبب قبائلي عوام لانگ مارچ ڪري رهيو آهي اهي پنهنجن علائقن ۾ اسڪول ۽ اسپتالون گھرن ٿا، قبائلي علائقي  کي ڪي پي ڪي زم ڪرڻ گھرجي سمورين جماعتن کي ان جو ساٿ ڏيڻ گھرجي، ٻئي پاسي ريلي ۽ ڌرڻي جي ڪري وفاقي پوليس کي الرٽ   ڪيو ويو آهي، ڊي چوڪ ۽ ريڊزون ڏانهن ويندڙ رستن تي پوليس جا وڏا اٽالا بيهاريا ويا ۽ اندريان رستا بند ڪرڻ لاءِ ڪنٽينر به گھرايا ويا.

 

 

فاٽا سڌارن واري بل ۾ دير جا سنگين نتيجا نڪري سگهن ٿا: عمران خان

اسلام آباد (ويب ڊيسڪ) تحريڪ انصاف جي سربراهه عمران خان چيو آهي ته فاٽا سڌارن وارو بل لاڳو نه ٿيڻ سبب اتان جي ماڻهن ۾ بي چيني وڌي رهي آهي، جنهن جا سنگين نتيجا نڪري سگهن ٿا. ٽوئيٽر تي پيغام ڏيندي عمران خان چيو ته حڪومت جو فاٽا سڌارن واري بل تي غير سنجيدا رويو سڀني کان وڌيڪ قربانيون ڏيندڙ فاٽا جي انهن ماڻهن جي توهين آهي، جن کي اڄ به پنهنجي جمهوري حقن کان محروم رکيو ويو آهي. فاٽا سڌارن وارو پيڪيج مڪمل طور لاڳو ڪرڻ ۾ دير سبب اتان جي ماڻهن ۾ بيچيني آهي، جنهن جا سنگين نتيجا نڪرندا. هن چيو ته اسان مطالبو ٿا ڪيون ته حڪومت قومي اسيمبلي ۾ فاٽا سڌارن جو مڪمل پيڪيج ۽ ايف سي آر جي خاتمي جو بل پيش ڪري ۽ پشاور هاءِ ڪورٽ توڙي سپريم ڪورٽ جو دائرو اهڙن علائقن تان وڌائي، حڪومت آئين جي آرٽيڪل 106 ۾ ترميم ڪري خيبر پختونخواهه اسيمبلي ۾ فاٽا ميمبرن جي نمائندگي وڌائي.27

 

صوبائي ايڪريڊٽيشن ڪميٽي طرفان پهرين جنوري کان پيشيور صحافين کي ايڪريڊٽيشن ڪارڊ جاري ڪرڻ جو فيصلو

ڪراچي( اي پي پي) صوبائي ايڪريڊٽيشن ڪميٽي جو ساليانو اجلاس اطلاعات ۽ آرڪائيوز کاتي عمران عطا سومرو جي صدارت هيٺ ڪالهه سندس آفيس ۾ ٿيو. اجلاس ۾ مختلف ادارن سان تعلق رکندڙ صحافين ۽ صوبائي ايڪريڊٽيشن ڪميٽي جي ميمبرن شرڪت ڪئي، جن ۾ ڪراچي يونين آف جرنلسٽ جي صدر حسن منصور، حسن عباس، 92 نيوز جي ريزيڊنٽ ايڊيٽر سعيد خاور، سينيئر جرنلسٽ شاهد جتوئي، پيپ جي صدر عرفان علي، ڪي يو جي جي جنرل سيڪريٽري حامد الرحمان، عوامي آواز جي ايڊيٽر ڊاڪٽر ايوب شيخ، سينيئر صحافي طاهر حسن خان ۽ ٻيا شامل هئا. اجلاس ۾ پيشيور صاحافين کي سال 2017ع جا ايڪريڊٽيشن ڪارڊ جاري ڪرڻ جي باري ۾ خيالن جي ڏي وٺ ڪئي وئي. اجلاس ۾ فيصلو ڪيو ويو ته هر ٽن مهينن بعد لاڳاپيل ڪميٽي جو اجلاس منعقد ڪيو ويندو. اجلاس ۾ وڌيڪ فيصلو ڪيو ويو ته معزز سپريم ڪورٽ ۽ هاءِ ڪورٽ جي حڪمن جي روشني ۾ سرڪاري ملازمت ڪندڙ ڪنهن به صحافي کي ايڪريڊٽيشن ڪارڊ جاري نه ڪيو ويندو. اجلاس ۾ اهو به فيصلو ڪيو ويو ته اطلاعات کاتو سنڌ سمورن چينلز ۽ اخبارن کي هڪ ليٽر موڪليو ويندو جنهن ۾ سندن اداري ۾ ڪم ڪندڙ صحافين، ڪئميرا مين ۽ فوٽو گرافرز جا نالا طلب ڪيا ويندا ته جيئن پهرين جنوري 2018 کان ئي صحافين کي ايڪريڊٽيشن ڪارڊ جاري ڪرڻ لاءِ ڪم شروع ڪري سگهجي. اطلاعات کاتي سنڌ جي سمورن ڊائريڪٽرن، صوبائي ايڪريڊيشن ڪميٽي جي ميمبرن ڊائريڪٽر اطلاعات پريس انفارميشن زينت جهان، ڊويزنل ڊائريڪٽر اطلاعات حيدرآباد خورشيد شيخ، ڊائريڪٽر اطلاعات لاڙڪاڻو سيد پرويز حسنين ، ڊويزنل ڊائريڪٽر اطلاعات ميرپورخاص ۽ ٻين شرڪت ڪئي