تازيون خبرون

Daily Archives: December 11, 2017

مونکي جيل پهچائڻ جي ڪوشش ڪئي پئي وڃي : ڪنگنا رناوت

ممبئي  (شوبز نيوز) اداڪاره ڪنگنا رناوت چيو آهي ته دوپيڪا کي قتل جون ڌمڪيون ملڻ غلط آهي، اداڪاره ڪنگنا رناوت چيو آهي ته مونکي جيل ۾ بند ڪرڻ جي ڪوشش ڪئي پئي وڃي، هن صحافين سان ڳ الهائندي  چيو ته دوپيڪا کي مارڻ جون ڌمڪيون ملي رهيو آهن پر ان ۾ ڪائي حيران ڪندڙ ڳالهه ناهي ڇو ته جڏهن منهنجي  ڀيڻ  اسڪول ۾ هئي ته ان تي تيزاب هارڻ جي ڌمڪي ڏني وئي ۽ مون سان جيڪو ڪجھه انڊسٽري ۾ ٿي رهيو آهي ان سان به سڀ واقف آهي ياد رهي ته فلمسازن دوپيڪا  جي سيڪيورٽي وڌائڻ لاءِ ڀارتي حڪومت جي نالي هڪ درخواست داخل ڪئي وئي جنهن تي باليوڊ جي ڪيترن ئي اداڪارن  صحيحون ڪيون.

 

دنگل اسٽارز زائره وسيم کي حراسان ڪندڙ شخص گرفتار

ممبئي  (شوبز نيوز) مشهور باليوڊ اداڪاره زائرا وسيم سان جھاز ۾ هٿچراند ڪرڻ ۽  کيس جنسي طور حراسان ڪندڙ شخص ممبئي مان گ رفتار ڪيو ويو، فلم دنگل ۾ مسٽر پرفيڪشنسٽ عامر خان جي ڌيءَ جو ڪردار ادا ڪندڙ 17 سالن جي مشهور باليوڊ اداڪارا زائرا وسيم جي گذريل ڏينهن منظر عام تي آيل ويڊيو سوشل ميڊيا تي ڦهلجي وئي جنهن ۾ هن جھاز ۾ پاڻ سان ٿيندڙ ڪڌي عمل جو تفصيل روئي ٻڌايو هو ويڊيو ذريعي زائرا پنهنجي پويان ويٺل شخص جي حرڪتن جي بابت ٻڌائيندي چيو ته جڏهن هو ستل هئي ته  ان شخص کيس جنسي طور تي حراسان ڪيو ۽ ان سان هٿ چراند ڪئي جڏهن ان ان جي شڪايت  جھاز جي عملي کي ڏني ته انهن ان شئي جو ڪوبه نوٽيس نه ورتو آخرڪار هن پاڻ ٿيندڙ غلط ورتاءَ جو ويڊيو ٺاهڻ تي مجبور ٿي   پئي ، هن ويڊيو جي منظر عام تي اچڻ سان ايئرلائين انتظاميا ۽ پوليس حرڪت ۾ اچي وئي هئي ۽ زائرا کي پريشان ڪندڙ شخص کي گرفتار ڪري ورتو، کيس پريشان ڪندڙ شخص جو نالو ويڪاش سچ ديو آهي هو ۽ وڏو بزنس مين آهي.

 

اسپاٽ فڪسنگ ڪيس ۾ ناصر جمشيد تي هڪ سال جي پابندي

لاهور (اسپورٽس نيوز) پاڪستان ڪرڪيٽ بورڊ جي اينٽي ڪرپشن ٽربيونل قومي ڪرڪيٽر ناصر جمشيد تي هڪ سال جي پابندي لڳائي ڇڏي آهي. پي سي بي جي اينٽي ڪرپشن ٽربيونل ناصر جمشيد خلاف اسپاٽ فڪسنگ ڪيس جو فيصلو ٻڌائيندي هڪ سال لاءِ سندس ڪرڪيٽ کيڏڻ تي پابندي مڙهي آهي. پي سي بي موجب ناصر جمشيد تي عدم سهڪار جي شق تحت هڪ سال جي پابندي مڙهي وئي، جڏهن ته مٿس اينٽي ڪرپشن ڪوڊ جي 2 شقن جي ڀڃڪڙي جو به الزام هو. پاڪستان سپر ليگ جي ٻئي ايڊيشن دوران اسپاٽ فڪسنگ ۾ ناصر جمشيد سان گڏوگڏ شرجيل خان، محمد عرفان ۽ خالد لطيف جا نالا به سامهون آيا هئا، جن کي جاچ کانپوءِ معطل ڪيو ويو هو.27

 

ڀارت پاڪستان جي ڪري ايشيا ڪپ جي ميزباني تان هٿ کڻي ويو

ممبئي(اسپورٽس نيوز)  ڀارت هڪ ڀيرو ٻيهر روايتي هٺ ڌرمي جو مظاهرو ڪندي پاڪستان جي ڪري ايشيا ڪرڪيٽ ڪپ جي ميزباني کان انڪار ڪري ڇڏيو. ڀارتي ميڊيا مطابق بي سي سي آءِ جي گورننگ باڊي جي اجلاس ۾ فيصلو ڪيو ويو ته پاڪستان جي موجودگي ۾ ايشيا ڪپ جي ميزباني نه ٿا ڪري سگهون. ڀارتي ميڊيا مطابق بي سي سي آءِ اختيارين ان حوالي سان ايشين ڪرڪيٽ ڪائونسل کي به آگاهه ڪري ڇڏيو آهي جڏهن ته ڀارتي ڪرڪيٽ بورڊ جي موجوده سيڪريٽري اميتاڀ چوڌري جو چوڻ آهي ته ايندڙ چئن سالن تائين پاڪستان سان ٻه طرفي ڪرڪيٽ جو ڪوبه امڪان ناهي. بي سي سي آءِ طرفان ڀارتي ٽيم جا چار سالا فيوچر ٽوئر جي شيڊول ۾ پاڪستان سان ڪابه سيريز طئه ناهي. ميڊيا  رپورٽن مطابق بي سي سي آءِ جي گورننگ باڊي جي اجلاس کانپوءِ ميڊيا سان ڳالهائيندي اميتاڀ چوڌري جو چوڻ هو ته جيڪڏهن ڀارتي حڪومت پاڪستان سان ڪرڪيٽ کيڏڻ جي اجازت ڏيندي ته ٻه طرفي ڪرڪيٽ ۾ ڪابه صورتحال بڻجي سگهي ٿي.

 

ايم ڪيو ايم اڳواڻن جون استعيفائون، ڇاڻ ٿيڻ وارو آهي؟: صاحب خان ڀٽي

سنڌ جو راڄڌاني شهر جيڪو گذريل ڪيتري ئي عرصي کي بدامني جي لپيٽ  ۾ رهيو آهي، جنهن جي ڪجهه ماڻهو فلسطين سان ڀيٽ به ڪندا آهن، هن شهر ۾ ڌارين جي آبادڪاري کان ويندي دهشتگردي، ڀتي خوري، اغوا جي وارداتن سميت ٻيون ڪيتريون ئي وارداتون ٿينديون رهن ٿيون، هن شهر ۾ ڪيتريون اهڙيون پارٽيون آهن، جيڪي نسلي فساد ڪرائي پنهنجا سياسي مفاد ماڻيون رهيون آهن، هن بدنصيب شهر تي ڪيترن ئي ماڻهن قبضو ڪرڻ جي ڪوشش ڪئي ۽ رت وهايو  ۽ هو پاڻ ئي انجام تي پڄي ويا، تاريخ شاهد آهي ته برطانيا ۽ عالمي طاقتن به  سنڌ جي هن شهر تي قبضو ڪرڻ جي ڪوشش ڪئي ۽ ڪيترائي سال حڪومت ڪئي آخر ڪار انهن کي به گوڏا کوڻڻا پيا ۽ انهن کي به واپس وڃڻو پيو. هن شهر ۾ اڳوڻي  آمر پرويز مشرف جي دور ۾ لکين  افغان پناهگيرن کي  به آباد ڪيو ۽ کيس ڪير به روڪي نه سگهيو، اڄ ڪلهه جيئن ته هو بيماري سبب ملڪ کان ٻاهر آهي، ٻڌڻ ۾ آيو آهي ته کيس مهاجرن جي قيادت ڪرڻ جو وڏو شوق آهي،

جيڪڏهن ڏٺو وڃي ته سندس ئي دور ۾ ايم ڪيو ايم ڪراچي ۾ تمام گهڻو مضبوط ٿي هئي ۽ ايم ڪيو ايم ڪراچي تي مڪمل ڪنٽرول به حاصل ڪيو، ايتري قدر جو سٽي وارڊ به ٺاهيو ويو هو، جنهن ۾ صرف ايم ڪيو ايم جا ماڻهوڀرتي ڪيا ويا هئا.  اڳوڻي آمر پرويز مشرف جي دور ۾ ئي  12  مئي سانحي ۾ ايم ڪيو ايم پنهنجي طاقت جو مظاهرو ڪيو هو ۽ ان کان پوءِ فيڪٽرين کي باهيون ڏيڻ، ڀتي خوري ۽ ٻيون وارداتون عام جام ٿي ويون  هيون، بلديا فيڪٽري سانحي جي مک جوابدار  حماد صديقي جي به گرفتاري جون گرفتاريون گردش ڪري رهيون آهن. جنهن جو تعلق به ايم ڪيو ايم سان هو، جيئن ته اڄ ڪلهه ايم ڪيو ايم ڌڙا بندي جو شڪار آهي، ان جو سبب به ڊراءِ ڪلينر فارمولي جو نتيجو آهي ۽ اهو فارمولو ان وقت استعمال ڪيو ويو، جڏهن اڳوڻو آمر پرويز مشرف پنهنجو اقتدار ڇڏيو هو ، ان کان پوءِ ڪراچي جون ان کان به وڌيڪ خراب ٿي ويون هيون، ڇاڪاڻ ته ايم ڪيو ايم جو هڪ ئي مطالبو رهيو آهي، اهو رڳو سنڌ کي ٽوڙڻ آهي، اهو خواب ايم ڪيو ايم ان ڪري ڏسي رهي آهي جو سنڌ ئي سڀ کان اڳ ۾ پاڪستان جي قيام جو ٺهراءُ پاس ڪيو هو، ان جو نتيجو اڄ ايم ڪيو ايم ۽ ڌارين جي آبادڪاري مان نڪتو آهي، اسان جي وڏڙن سوچيو به نه هوندو ته مذهب جي نالي تي سنڌ اندر ڌارين جي لوڌ آباد ڪئي ويندي، افغان مهاجر،  برمي، ايراني، بنگالي، بهاري ۽ ٻيا ڌاريا هن سنڌ وطن ۾ آباد ڪري ڌرتي ڌڻين کي اقليت ۾ تبديل ڪيو ويندو.

جيڪڏهن  سنڌ ۾ وفاق جي آشيروارد سان ڌارين جي آبادڪاري نه ڪئي وڃي ها ته اڄ ڪراچي جون اهڙيون حالتون نه  هجن ها ۽ نه ئي ڀتي، خور، ٽارگيٽ ۽ دهشتگردن جو راڄ هجي ها. هي اهو شهر آهي، جتي افغانستان مان دهشتگرد  اچي ڪارروايون ڪندا آهن، ڪيترائي دهشتگرد هن شهر ۾ پوليس مقابلن ۾ ماريا به ويا آهن، جن جو تعلق به اڪثر ڪري افغانستان سان ئي ٻڌايو ويندو آهي. بهرحال دهشتگردي هن شهر ۾ گذريل ڪيتري ئي عرصي کان هلي رهي آهي پر سڀ کان وڌيڪ اهم ڳالهه اها آهي ته جيڪا پارٽي پنهنجي اجازت کانسواءِ هن شهر ۾ جلسو به نه ڪرڻ ڏيندي هئي اڄ اها پارٽي ڌڙا بندي جو شڪار ٿي وئي آهي ۽ ان جو سڄو ڪريڊٽ هتان جي قانون لاڳو ڪندڙ ادارن ڏانهن ئي وڃي ٿو، جيڪڏهن اها ادارا ڪراچي ۾ دهشتگردن خلاف ڪارروائي نه ڪن ها ته اڄ امن قائم نه ٿئي ها ۽ نه ئي هن شهر  مان نيٽو جا هٿيار هٿ ڪيا وڃن هئا،

جڏهن ڪراچي  ۾ دهشتگردي ٿي رهي هئي ته ان وقت به ايم ڪيو ايم جو مطالبو هو ته آپريشن ڪيو وڃي ۽ جڏهن آپريشن شروع ٿيو ته ان وقت سڀ کان پهرين ايم ڪيو ايم ئي رڙيون ڪيون ۽ نائن زيرو جي ڀرپاسي وارن علائقن  کان سواءِ شهر جي مختلف علائقن مان هٿيارن جا انبار هٿ ڪيا ويا پر تعجب جي ڳالهه آهي ته اهي هٿيار ڪهڙي پارٽي جا هئا ۽  ڪيترن ماڻهن کي گرفتار ڪيو ويو، ان جا تفصيل ميڊيا کي نه ٻڌايا ويا ، جڏهن به هن شهر ۾ آپريشن ٿيندو هو ته رڳو اهو ٻڌايو ويندو هو ته شڪي  ماڻهو گرفتار ڪيا ويا آهن، رينجرز به هٿيارن جا انبار ميڊيا تي ڏيکاريندي هئي، جنهن جو اثر اهو پيو ته دهشتگرد پنهنجي ٻرن ۾ لڪي ويا، هاڻ خبر ناهي ته اهي ڪڏهن ٿا ٻاهر نڪرن. هاڻ ته ايم ڪيو ايم ۾ کوڙ سارا ڌڙا ٿيڻ ٿي رهيا آهن، ان جو سبب ڪراچي آپريشن کان پوءِ بوکلاهٽ جو شڪار ٿيل ايم ڪيو ايم لنڊن جو سربراهه آهي، نه اهو  هتان جي ادارن کي ناراض ڪري ها ۽ نه ئي وري مٿس ڪا پابندي لڳي ها،

اڄ ڪلهه سندس سوشل ميڊيا تي تمام گهڻيون ويڊيوز شيئر ٿي رهيون آهن، جنهن ۾ سندس رياست مخالفت بيان به شامل آهن، ان کان اڳ هو هن ملڪ جي سمورن ٽي وي چينلن تي ويهي ڪلاڪن جا ڪلاڪ  سنڌ خلاف ڳالهائيندو هو پر جڏهن سندس رخ هتان جي قانون لاڳو ڪندڙ ادارن ڏانهن ٿيو ته مٿس پابندي لڳي وئي ۽ ان کانپوءِ سڀني ڏٺو ته ڪراچي ۾ ڪيترو امن قائم ٿيو آهي ۽ اها پابندي سندس ساٿين ۽ پوئلڳن تي نه لڳائي وئي آهي ، رڳو هڪ شخص تي ئي لڳائي وئي آهي، جيڪو لنڊن ۾ ويٺو آهي، باقي جيڪي هن  سنڌ ۾ ترسيل آهن، انهن کي الڳ الڳ الڳ پارٽي ٺاهڻ جي اجازت ڏني وئي آهي ۽ نالو اڪثر پارٽين جو ساڳيو آهي، جن جو به ساڳيو ئي مقصد آهي، جيڪو لنڊن واري شخص جو هو، فاروق ستار به لنڊن واري شخص جيان ڳالهائي رهيو آهي ۽ ايم ڪيو ايم جي سمورن ڌڙن کي گڏ ٿيڻ جون هدايتون جاري ڪندو رهي ٿو.  شروع ۾ اسان ڏٺوسين ته ايم ڪيو ايم مان  اڳوڻي سٽي ناظم مصطفيٰ ڪمال جو ڌڙو ٺهيو، جنهن جو نالو پي ايس پي رکيو ويو ۽ هاڻ ٻڌڻ ۾ آيو آهي ته ٻيا به ڌڙا ٺهي رهيا آهن ۽ آهستي آهستي ايم ڪيو ايم جا  وڌيڪ ٻه ٻيا به ڌڙا ٿي ويا، هڪ جو نالو ايم ڪيو ايم لنڊن رکيو ويو ته ٻي جو نالو وري ايم ڪيو ايم پاڪستان رکيو ويو، جيڪي ماڻهو اسان ماضي ۾ ڏسنداسين، اهي ساڳيا  ئي  ماڻهو پارٽي  جي نالن ۾ ترميم کانپوءِ پنهنجون سرگرميون ٻيهر جاري رکندا پيا اچن. پر هاڻ حالتون وڌيڪ تبديل ٿي رهيون آهن، ڇاڪاڻ ته اڳوڻي وفاقي وزير ۽ ايم ڪيو ايم اڳواڻ بابر غوري،  شميم صديقي ۽ امبر خان ايم ڪيو ايم لنڊن جي بنيادي ميمبرشپ تان استعيفيٰ ڏئي ڇڏي آهي،

استعيفيٰ ڏيڻ کان پوءِ بابر غوري ميڊيا سان ڳالهائيندي چيو هو ته پارٽي تان استعيفيٰ ڏيڻ سندس ذاتي فيصلو آهي ۽ هو پنهنجي مرضي سان پارٽيءَ جي سمورين ذميوارين تان هٿ کڻي رهيو آهي. پاڪستان ۾ جيڪا ايم ڪيو ايم آهي تنهن ۾ سندس ڪڏهن حصو نه رهيو آهي،  ايم ڪيو ايم هڪ ئي آهي جيڪا لنڊن ۾ آهي. بابر غوري ويندي ويندي هڪ اهم ڳالهه به ڪئي آهي ته جيڪڏهن ايم ڪيو ايم ۽ پي ايس پي گڏجي ويون ته سٺي ڳالهه آهي. مطلب ته چونڊن کان اڳ ئي ايم ڪيو ايم جي ڌڙن  جو گڏ ٿيڻ جو امڪان آهي. هاڻ ڏسڻُ اهو آهي ته ايندڙ اليڪشن ۾ ايم ڪيو ايم ۽ ان جا ڌڙا گڏجي ڪراچي جي سياست ڪندا يا وري الڳ الڳ ٿي پنهنجي سياست ۾ رڌل رهندا.

sahibalisindhi@gmail.com

 

 

ڇا ڌرڻا سياست ملڪ جي مفاد ۾ آهي؟: نظر محمد ڳاهو

پاڪستان جي تاريخ ٻڌائي ٿي ته ملڪ جي باني محمد علي جناح ملڪ جي آزادي ڳالهه ٻولهه ۽ مڪمل طرح پرامن جمهوري وسيلا اختيار ڪري حاصل ڪئي. جيتوڻيڪ برصغير ۾ انگريز جي جابرانه قبضي خلاف ڪجهه قوتون انتهاپسنديءَ ڏي وڃي رهيون هيون پر قائداعظم مسلم ليگ جي پليٽ فارم تي سرگرم ٿي هڪ سرگرم سياسي عمل جي شروعات ڪئي، پر مُلڪ آزاد ٿيڻ بعد افسوس سندس حياتيءَ ساٿ نه ڏنو ۽ وري جلد ئي سندس ساٿي ۽ تحريڪ آزاديءَ ۾ سندس سڄي هٿ لياقت علي خان کي راولپنڊيءَ جي هڪ جلسي ۾ شهيد ڪيو ويو. انهن ٻنهي مقبول ۽ محنتي اڳواڻن جي جدا ٿي وڃڻ ڪري ملڪ جي سياست ۾ هڪ وڏو خال پيدا ٿيو، جنهن نه فقط ملڪ ۾ جمهوري عمل پر ملڪي سالميت کي به نقصان پهچايو.

ملڪ ۾ اوڀر پاڪستان يعني بنگال مان چونڊجي آيل وزيراعظم خواجا ناظم الدين کي برطرف ڪري اقتدار کي غير سياسي ادارن ۽ نوڪر شاهيءَ جو غلام بڻايو ويو. مغرب جي ملڪن به پاڪستان جي آزاديءَ کي دل سان تسليم ڪونه ڪيو هو، انهن آزادي بعد ملڪ اندر غير جمهوري قوتن کي توجه جو مرڪز ٺاهيو ۽ ملڪ جي اصل ۽ حقيقي آزادي نالي ماتر بڻجي وئي. ملڪي سياست ۾ مشرقي پاڪستان مان ووٽ جي طاقت تي مقبوليت ماڻيندڙ سياستدان حسين شهيد سهرورديءَ کي به وزيراعظم طور هلڻ ڪونه ڏنو ويو ۽ محلاتي سازشن ذريعي ايشيا جي ماڊل ڊڪٽيٽر جنرل ايوب خان اقتدار تي قبضو ڪري ورتو. ايوب خان جي يارنهن سالا آمريت واري دور ۾ قائداعظم محمد علي جناح جي ڀيڻ محترمه فاطمه جناح جمهوريت لاءِ جدوجهد ۽ آئيني جنگ ڪندي رهي پر کيس بنيادي جمهوريت جي نام نهاد جمهوريت ذريعي صدارت جي مقابلي ۾ ايوب خان هٿان هارايل ڏيکاريو ويو.
دنيا جي ڪنهن ڏاهي چيو آهي ته جنهن دور ۾ ڪنهن ملڪ يا ڌرتيءَ تي ظالم ۽ جابر مسلسل حڪمراني ڪندا آهن ته ان دور جون مائرون به باغي ۽ بهادر ٻچا ڄڻنديون آهن، جيڪي عوامي انقلاب لاءِ رستو هموار ڪندا آهن. اهڙي ايوب خان دور ۾ شهيد ذوالفقار علي ڀٽو اقتدار کي لت هڻي ميدان ۾ آيو ۽ وڏن وڏن جلسن، جلوسن ۽ عوام سان مسلسل رابطن ذريعي ايوب خان اقتدار کان عليحده ٿيڻ تي مجبور ڪيو. بعد ۾ ايندڙ آمرن يحيٰ خان ۽ ضياءَالحق سان مهاڏو اٽڪائيندي شهيد ٿي ويو، هُن کانپوءِ سندس وني بيگم نصرت ڀٽو، سندس نياڻي محترمه بينظير ۽ هاڻي چيئرمين بلاول ڀٽو زرداري به پ پ جي علم کي اونچو ڪندا رهيا آهن. ملڪي سياست جمهوريت ۽ جمهوري روايتن کي زنده رکندا آيا آهن.

ملڪ ۾ 1977ع ۾ پهريون ڀيرو شهيد ذوالفقار علي جي وزارت عظميٰ خلاف اسلامي نظام جي نالي تي نون (9) سياسي پارٽين، پاڪستان قومي اتحاد جي نالي تي هڪ پُرتشدد تحريڪ هلائي، جنهن جي نتيجي ۾ جمهوري عمل کي ناقابل تلافي نقصان پهتو ۽ ملڪ ۾ وري ڊگهو عرصو آمريت جو راڄ رهيو. پ پ جي دلير قيادت خاص طور محترمه بينظير ڀٽو پنهنجي خداداد صلاحيتن ۽ شاندار سياسي ڏاهپ سان هڪ طرف دنيا اندر مغربي توڙي مشرق ۾ جمهوري قوتن سان ڊائلاگ جو سلسلو جاري رکيو ته ٻئي طرف لکين ماڻهن جا ملڪ اندر جلسا ڪري وري جمهوريت کي مضبوط ڪيو.

ان دوران دل تي پٿر رکي به پنهنجي شهيد بابا جي سياسي مخالفن سان به ڳالهه ٻولهه ڪري تعاون حاصل ڪيو. هر دور جون پنهنجون سياسي تقاضائون آهن. جيتوڻيڪ ملڪ جي موجوده وزيراعظم پنهنجي غلط سياسي فيصلن ۽ سياسي فيصلن ۾ اڍنگي رويي سميت پ پ ۽ ٻين سياسي جماعتن جو اعتماد ۽ اعتبار وڃائي چڪو آهي پر پ پ جمهوري طريقي سان قومي اسيمبلي ۽ صوبائي اسيمبلي ايوان اندر پنهنجو سياسي حق استعمال ڪندي سندس غلطين ۽ ڪوتاهين جي نشاندهي ڪري رهيا آهن پر ڪجهه جونيئر سياسي پارٽين وري ملڪ جي راڄڌاني اندر ڌرڻن جي هڪ نئين روايت کي جنم ڏنو آهي، جنهن ڪري هڪ ته گاديءَ واري سڄي سياسي، انتظامي ۽ سماجي عمل رڪجي ٿو، اسلام آباد جي سڀني آفيسن جي ڪارڪردگي متاثر ٿئي ٿي. ملڪ جي تعميري ۽ ترقيءَ لاءِ ٿيندڙ ڪاغذي ڪارروائي، عملي ڪم رڪجي وڃي ٿو ته ٻئي طرف بين الاقوامي طور ملڪ جي خواري ۽ خرابي ٿئي ٿي، جيڪا شيءِ ملڪ جي مفاد ۾ ڪانهي. سڄي دنيا ۾ هر ملڪ جي گادي واري هنڌ جو تقدس ٿيندو آهي، جنهن کي برقرار رکڻ هر ذميدار شهريءَ جو فرض ۽ حق آهي. احتجاج کانسواءِ ٻيا به ڪيترائي جمهوري ۽ قانوني رستا آهن، جيڪي قائداعظم اختيار ڪري انگريزن جهڙن ڏاڍن کان آزادي ورتي. اسان کي سنجيده سياسي قوتن کي نواز شريف سان هزار اختلاف آهن، ملڪ ۾ موجوده انارڪي، ملڪ ۾ ناڪام خارجه پاليسي، ملڪي عوام جي معاشي قتل جي ڪري قوم سندس مٿان عدم اعتماد جو اظهار ڪري ٿي، پر اسان جي ملڪ جي عزت ۽ وقار لاءِ وڌيڪ بهتر سياست ذريعي سياسي احتجاج کي منظم ڪرڻ گهرجي. ڪاش نواز شريف صاحب، پاڪستان پيپلز پارٽي چيئرمين بلاول ڀٽو زرداري، شريڪ چيئرمين آصف علي زرداري ۽ ٻي سينئر قيادت جي ڏنل مشورن کي سنجيدگيءَ سان وٺي ها ته کيس ۽ ملڪ جي راڄڌانيءَ اسلام آباد کي ڌرڻن جا منهن نه ڏسڻا پون ها.

 

 وڙهن سئان پٽجن پوٽا واري سياست آخرڪيستائين..؟؟: غلام مصطفيٰ جمالي

پاڪستان جي اڳواڻي وزير اعظم ميان نواز شريف جي نااهل ٿيڻ ۽خزاني واري وزيرااسحاق ڊار جو عدالت ۾ پيش نه ٿيڻ  مٿس ڪيس داخل ٿيڻ سان گڏوگڏ کيس اشتهاري ڏوهاري قرار ڏيڻ وارين خبرون پاڪستان جي عوام کي مونجهاري جو شڪار ڪري ڇڏيو آهي،ڇو ته پاڪستان اندر جهموريت شروع کان وٺي ئي ڪمزوز رهي آهي ۽ جهموريت پنهنجو مدو ڪڏهن به پورو ناهي ڪيو،مٿان وري جهموري حڪمرانن متي عدالتن اندر ڪيس انهي سموري ماحول پاڪستان جي حڪمرانن جو ڌيان عوام کان هٽرائي ڇڏيو آهي،هن وقت پاڪستان جي اڳواڻ صرف ۽ صرف پنهنجي ساک بچائڻ ۾ پورا آهن جيڪا هو ڪڏهن به بچائي نه سگهندا.؟ ڇو ته عدالتن هاڻي حڪمراننن کان احستاب وٺڻ شروع ڪري ڇڏيو آهي،جنهن اندر ڪو به ڪرپشن خور بچي نه سگهندو،هڪ طرف پاڪستان اندر اهڙي صورتحال آهي ته ٻئي پاڪستان پاڪستان جي عوام بهر پريشان حال نظر اچي رهي آهي  ڇو ته هن وقت پاڪستان اندر هڪ طرف وڌندڙ ۽ لوڊشِٽينگ ماڻهو جو متيون مجهائي ڇڏيون آهن اتي وري پاڪستاني سياسي ماحول اندر به تمام گهڻي گرما گرمي پيدا ٿي وئي آهي.هڪ ٻئي جون مخالف سياسي پارٽيون پنهنجا پنهنجا پورا روز لڳائي ڪري پنهنجي مخالفن کي ڪمزور ڪرڻ جون ڪوششون ڪري رهيون آهن.

جيتري بيان بازي وڌيندي پئي وڃِي اوتري ئي ملڪ اندر سياسي ڇڪتاڻ ۾ تيزي ٿيندي پئي وڃي.ڪنهن به اهو نه سوچيو هو ته اليڪشن کان پوءِ ڇهه مهينن اندر پاڪستان مان لوڊشينگ جو آزار ختم ڪرڻ واري پارٽي لاءِ خد ڪيترائي آزار پيدا ٿي ويندا.سابق وزيراعظم  شريف پارٽي اڳواڻ هجڻ سان گڏ پارٽي جو جڙون مظبوط ڪرڻ لاءِ ڪوششون ته تمام  گهڻيون ڪيون  پر عمران خان شايد انهي ڪوششن کي ناڪام بڻائڻ لاءِ انهي جڙن کي ختم ڪرڻ لاءِ بيلچا ڪلهن تي کڻي نڪتو هو انهي اندر ڪامياب ويو ۽ ميان صاحب کي اناهل ڪرائي ڇڏيو،پر ميان نواز شريف پنهنجي سياسي ساک بچائڻ خاطر سنڌ کي ڇڏي ڪري باقي پنجاب ۽ ڪي پي ڪي  اندر جلسا جلسوس ڪري عوام جون دليون کٽڻ جو ڪوشش ته ڪري رهيو آهي  ٻئي پاسي عمران خان صاحب جو قافلو به ملڪ اندر پنهنجي منزل ڏانهن روان دوان آهي.جڏهن ته ميان نواز شريف سنڌ اندر تشريف کڻي نه اچي رهيو آهي جنهن جو به هڪ سبب آهي.انهي جو سبب اهو آهي ته سنڌ جي ڪا به سياسي پارٽي ميان نواز شريف جي خلاف ناهي.جڏهن ته سنڌ اندر جيڪي سياسي پارٽيون آهن انهن پارٽين ۾ قوم پرست پارٽين کي ڇڏي ڪري باقي ف ليگ، پ پ پ، ايم ڪيو ايم، ۽ نئي ٺاهيل پارٽي پاڪ سر زمين پارٽيون آهن.پر انهي سڀني پارٽين مان ڪا به اهڙي پارٽي ناهي جيڪا ميان نواز شريف جي خلاف هجي.پر اتي اهو به هڪ اهم سوال آهي ته جيڪڏهن انهن پارٽي مان ڪابه پارٽي ميان صاحب جي خلاف به  هجي پر انهي پارٽين جو ميان صاحب تي ڪو به اثر نه پوندو.

تحريڪ انصاف ميان نواز شريف کي ضرور هن سياري  جي موسم ۾ پگهر ڏياري ڇڏيو آهي برحال ن ليگ کي شڪر ٿيو جو احساس ته ٿيو.اصل جيڪا ڇڪتان سياسي پارٽين جي وچ ۾ آهي اهي پارٽيون هڪ تحريڪ انصاف ۽ ٻئي پارٽي ن ليگ آهي.ان ڪري ميان نواز شريف عمران خان صاحب جو اميج ڪيرائڻ لاءِ سنڌ بلوچستان کي ڇڏي ڪري باقي ڪي پي ڪي ۽ پنجاب اندر جلسا ڪري رهيو آهي.جڏهن ته انهي ڏس اندر عمران خان  ڪافلو سنڌ ۾ اندر حيدرآباد تائين پهتو آهي، ان ڪري لڳي ائين ٿو ته عمران خان سموري پاڪستان تي حڪومت ڪرڻ جا  خواب ڏسي رهيو آهي ۽ نواز شريف صاحب اهو سوچيندي سوچيندي جلسا پيو ڪري ته رڳو پنجاب ۽ ڪي پي ڪي بچيو ته لک کٽيو.ملڪ اندر سياسي گرما گرمي اندر جلسا به ٿي رهيا آهن ۽ بيان بازيون به هلي رهيون آهن.اشتهار بازي به ٿي رهي آهي ۽ نوٽيس بازي به ٿي رهي آهي.۽ احستاب به هلي رهيو آهي،پر انجي باوجود به ڪو اهڙو ماحول به پيو ٺهي جيڪو ٺهڻ گهرجي.خاص طور تي عوام ۽ حڪمرانن جي وچ واري ماحول جي ڳالهه پيو ڪيان. انهي ماحول اندر ڪا به گرما گرمي ڏسڻ ۾ نه پئي اچي.حڪمران پاناما ليڪس ،ٽيڪس چوري ۽ ڪرپشن کي وٺي ڪري پاڪستاني عوام کي مسلسل نظر انداز ڪري رهيا آهن ۽ عوام جو انهي رد عمل ۾ اهڙو ڪو به ماحول ڏسڻ ۾ نه پيو اچي جنهن اندر عوام پنهنجي حقن لاءِ آواز اٿاري.پر افسوس جو عوام پنهنجا حق وٺڻ بجاءِ خاموشي سان حڪمرانن جي ڄونڊا پٽ ڏسي رهي آهي.ان مان هڪ اهڙي ڳالهه جو به اندازو لڳي ٿو ته يا حڪمرانن وٽ عوام جي ايتري اهميت ناهي جو پنهنجي مسئلن سان گڏ عوام جي مسئلن کي به حل ڪرڻ جي ڪوشش ڪن يا عوام ۾ ايتري سگهه ناهي جو هو پنهنجا حق وٺي سگهي.

عوام کي اها به خبر ناهي ته انهي کان سواءِ هي حڪمراني هي سياست به ڪنهن ڪم جي ناهي.عوام آهي ته حڪمران آهن جي عوام ناهي ته حڪمران به ناهن.پر الائي ڇو اها ڳالهه عوام جي ياد ناهي.جڏهن ته وقت جو تقاضو اهو به آهي ته ٽئي ڪا اهڙي ڌر ناهي جيڪا انهي مسئلي کي اڳيان کڻي اچي.انهي ڪري عوام پنهنجو ماتم پاڻ ڪري رهي آهي ۽ حڪمرانن جي ڄونڊا پٽ آرام سان ويهي ڏسي رهي آهي. شايد عوام جي انهي اندر ئي سڪون ملي رهيو آهي.ڪالهه سپريم ڪورٽ پنهنجي بيان اندر اهو صاف ٻڌائي ڇڏيو ته هن ملڪ جو ڪو ڌڻي ڌوڻي ناهي.هر ڪو پنهنجي پنهنجي سياست ڪرڻ ۾ پورو آهي ۽ انهي سياست کي سموري عوام مٿان مڙهڻ لاءِ ڏينهن رات محنت ڪري رهيو آهي.هن وقت پاڪستان اندر جيتري قدر جهموريت هلي رهي آهي شايد انهي  ڪمروز جهموريت کي به هلڻ کان روڪيو پيو وڃي.جڏهن ته مختلف تجزيڪار اهو به چئي رهيا آهن ته جهموريت جهڙي آهي انهي کي هلڻ ڏيو.ڇو ته جهموريت مان ئي عوام کي ٿورو ئي سهي پر رليف ملي سگهي ٿو.پر شايد اها ڳالهه ڪنهن سياسي جماعتن جي هضم نه ٿي رهي آهي.آئون نه ٿو چوان ته سياسي پارٽيون هڪ ٻئي جي خلاف ڇو آهن.ڀلي انهي سياسي پارٽين جي ڇڪتاڻ جائز هجي ڀلي عمران خان سان اليڪشن ۾ ڌانڌليون ٿيون هجن انهي ڳالهه کان انڪار ناهي پر انڪار انهي ڳالهه کان آهي ته اهو رستو غلط آهي جيڪو ورتو پيو وڃِي.هن وقت جيڪي ماڻهو انهي جهموريت کي خلاف آهن منهنجو صرف انهن کان هڪ ننڍڙو سوال آهي ته ڇا هو اهو سب ڪجهه انهي هڪ آمريت جي دور اندر ڪري سگهن ها جيڪو ڪجهه هن وقت ڪيو پيو وڃي.؟؟

ملڪ جي معِيشت کي مظبوط ڪرڻ جو چيو پيو وڃي ٻئي پاسي جهموريت کي هلڻ ئي نه پيو ڏنو وڃي ته ملڪ جي معيشت ڪئين مظبوط ٿيندي.عمران خان صاحب پنهنجي جڳهه تي بلڪل به سهي هجي پر هي پنج سال ن ليگ کي به پورا ڪرڻ ڏنا وڃن ته جئين عوام کي به ته خبر پئي ته انهي سان سچي پارٽي ڪهڙي آهي.جڏهن ته ن ليگ اليڪشن کان پهرين ئي چيو هو ته سندس اهو ئي مشن آهي ته ملڪ مان بجلي جو بحران ختم ٿي پر اهي نه ٿي سگهيو ملڪ مان بجلي جو بحران ته پري جي ڳالهه آهي مگرئي ملڪ اندر  بجلي جو بحران وڌي ويو.جنهن جي ڪري عوام جي اڪثريت ن ليگ کان ناراض ڏسڻ ۾ آئي پنجاب ن ليگ جو قعلو آهي پر انهي اندر به سندس اميج ڪرندي ڏٺو ويو.جڏهن ته انهي جي خلاف لڳل ڌرڻن جيتري مقبوليت ماڻي اهو انهي ڳالهه جو رد عمل آهي.پر هاڻ وفاق ڪو به ڪم نه ڪري رهي آهي ڇو جو وٺس هڪ بهانو آهي ته وفاق کي هلڻ نه پيو ڏنو وڃي.جڏهن ته عمران خان صاحب خد کي به اها خبر آهي ته سندس ڌرڻن کان وٺي هن وقت تائين هو وفاق ڇو ڇا ڪري سگهيو آهي.ٻيڻو عوام کي آزار ۾ وجهي ڇڏيو اٿس انهي ڪري عوام کي به پورو پورو رليف نه ملي رهيو آهي.اها سڀني کي خبر آهي ته ملڪي سياست اندر عوام جو ڪير ڪيترو خيرخواه آهي انهي ڪري پ پ پنهنجا پنج سال پورا ڪري عوام کي ڇا ڏنو.سنڌ جيڪا سندس ساڄِي ٻانهن آهي پ پ ته انهي کي به کائي کائي ختم ڪتري ڇڏيو .پاڪستاني سياسي اندر اهو رواج آهي ته هتي آزمايل کي به آزمايو ويندو آهي.ان ڪري سنڌ حڪومت شروع کان وٺي انهي جي ورثي ۾ رهي آهي.پر انهي جي ڀيٽ اندر ڪي پي ڪي ۽ پنجاب جي عوام اهين ناهي ڪيو. ۽ جيڪڏهن اهين ڪري ها ته پنجاب ۽ ڪي پي ڪي اندر هن وقت به پ پ جي حڪومت هجي ها.ان ڪري اهو سجهڻ ضروري آهي ته جتي سان وڙهنندا آهن اتي ٻوٽا ضرور چپبا آهن.ان ڪري ئي انهي لڙائي اندر عوام ٻوٽن وارو ڪردار ادا ڪري رهي آهي جيڪو شايد سندس نصيب آهي.

 

سنڌ ۾ هاري خوشحال آهي…؟

پ پ پ جي شريڪ چيئرمين آصف علي زرداري چيو آهي ته وطن ۽ عوام سان محبت سبب شھيد ڀٽو کي ڦاهي چاڙھيو ويو ۽ بي بي کي شھيد ڪرايو ويو. پاڪستان کي مسئلن مان نجات ڏيارڻ لاءِ ۽ ملڪي معيشيت کي بهتر بنائڻ لاءِ ھڪ ڀيرو ٻيهر اقتدار هنن کان وٺي ڏيکارينداسين، عمرڪوٽ جي آبادگارن جي خوشحالي لاءِ واهه پڪا ڪرايا ويندا ۽ ٿر ۾ به پاڻي پهچايو ويندو آئون پاڻ آبادگار آھيان ان لاءِ سنڌ جي آبادگارن کي صلاح ڏيان ٿو ته پاڻي جي کوٽ کان بچڻ لاءِ ڊرپ ايريگيشن سسٽم تي اچو، ڪمند جي آبادگارن کي سٺا اگھه ڏيڻ چاهيون ٿا پر آبادگار ڪمند جي ايوريج کي وڌائڻ تي ڌيان ڏين،

عوام جا سڀ مسئلا حل ڪرڻ ۽ گهرجون پوريون ڪرڻ چاهيان ٿو پر ان لاءِ وقت لڳندو ۽ آھستي آھستي ڪري ڏيکارينداسين ، ٿر جي ڌرتي تي اسان سڀني کي ناز آھي ڇاڪاڻ جو ٿري ماروئڙن ھميشه پ پ پ جو ساٿ ڏنو آھي، ٿر ڌرتي جي ڪري منھنجي نياڻي جو نالو بختاور آھي شادي جي ڪاڄن ۾ شرڪت ڪري پنھنجون ريتن ۽ رسمن کي ياد ڪندا آھيون،  ھن ملڪ ۽ ڌرتي خاطر شھيد ذوالفقار علي ڀٽو ڪڏھن به ڪنڌ نه جھڪايو ۽ سولي تي چڙھي ويو، بينظير ڀٽو به شير جي ڌيءُ ھئي ۽ شيرڻي ھئي جيڪا جان جي پرواھ نه ڪندي جلاوطن رھڻ بعد ملڪ واپس وري آئي ۽ سوين ڪارڪنن جي شھادت باوجود به مقابلو ڪندي رھي ۽ پاڻ به شھيد ٿي ويئي، ٿر سان محبت آھي ڌرتي سان محبت آھي زنده آ بيبي منھنجي دل جي نه پر سنڌ ديس ۾ وسندڙ دل جو نعرو آھي زنده ھي بيبي ھريرام ڪشوري لال کي چيو اٿم ته جلسو ميرپورخاص ۾ رکرائي ۽ عوام سان وري ملبو، ڪنري تعلقي ۾ پاڻي کوٽ ختم ڪرڻ لاءِ نبي سر واھ کي پڪو ڪيو ويندو، يوسي شھيد بختاور ۾ آھيان جنھن جو تعلق ڪنري تعلقي سان آھي صرف پيپلز پارٽي ئي ملڪ کي بحران مان ڪڍي سگهي ٿي،

جنهن علائقي ۾ 8 سالن کان پاڻي نه پئي پهتو اتي پ پ جي دور حڪومت ۾ پاڻي پهچايو ويو ۽ هاري خوشحال آهن ۽ سنڌ ۾ زراعت ۾ هڪ وڏي ترقي ٿي آهي، حڪومت سنڌ طرفان ڊرپ پروجيڪٽ شروع ڪيو ويو آهي جنهن ۾ 20 سيڪڙو زميندار کي حصو ڏيڻو پوندو ۽ 80 سيڪڙو حڪومت سنڌ برداشت ڪندي  ڇاڪاڻ ته ايندڙ وقت ان جو ئي آهي، ٿر ۾ 14 ڊيم ٺاهيا ويا آهن جن سان وڏو فائدو ٿيو آهي ۽ ايندڙ وقت ۾ به وڌيڪ ڊيم ٺاهيا ويندا، اسان کي خبر آهي ته پاڪستان کي ڪيئن هلائڻو آهي. نواز حڪومت جيڪي به پاور پلانٽ لڳايا آهن انهن ۾ جتي هڪ روپئي جو خرچ هو اتي انهن 10 روپين جو خرچ ظاهر ڪيو آهي جنهن جي خبر ايندڙ وقت ۾ پئجي ويندي، پاڪستان هن وقت معاشي حالتن کي منهن ڏئي رهيو آهي، جنهن جو حل صرف پ پ وٽ آهي ۽ انشاءَ الله ايندڙ وقت ۾ اسان کي حڪومت ملي ته اسين انهن مسئلن کي حل ڪنداسين .