تازيون خبرون

Daily Archives: December 10, 2017

” دنگل گرل“ زائره وسيم سان اڏام ۾ هٿ چراند، انسٽا گرام تي وڊيو وائرل

ممبئي( شوبز نيوز ) فلم ” دنگل“ ۾ عامر جي ڌيءَ جو ڪردار ادا ڪندڙ اداڪاره زائره وسيم سان فلائيٽ دوران مسافر طرفان هٿ چراند ڪئي جنهن تي هوءَ لڙڪ لاڙي ويٺي. ڀارتي ميڊيا رپورٽس موجب بالي ووڊ جي بلاڪ بسٽر فلم دنگ ذريعي انٽري ڪندڙ اداڪاره زائره وسيم دهلي مان وسترا ايئر لائن جي اڏام ذريعي ممبئي وڃي رهي هئي ته هن فلائيٽ دوران پاڻ سان پيش آيل واقعي بابت آگاهه ڪيو. اداڪاره سماجي رابطن جي ايپ انسٽا گرام تي هڪ وڊيو رکي جنهن ۾ هوءَ روئي رهي آهي. هن ٻڌايو ته فلائيٽ ۾ سندس پويان ويٺل شخص ساڻس تنهن وقت هٿ چراند ڪئي جڏهن هوءَ ستل هئي. اداڪاره ٻڌايو ته مسافر سندس ڳچيءَ تي مسلسل هٿ لائيندو رهيو،  سندس وڊيو ٺاهڻ جي ڪوشش ڪئي پر گهٽ روشني سبب مان ايئن نه ڪري سگهيس پر هوءَ ڪنهن حد تائين اسڪرين شارٽس وٺڻ ۾ ڪامياب ٿي وئي. اداڪاره فلائيٽ جي ڪيبن ڪريو کي طلب ڪيو ۽ ان شخص بابت شڪايت ڪئي پر عملي شخص خلاف ڪابه ڪارروائي نه ڪئي. اداڪاره انسٽا گرام تي روئيندي زائره ٻڌايو ته تمام گهڻي پريشان آهيان، جيڪڏهن سندن ڪو حفاظت نه ٿو ڪري سگهي ته ڇوڪريون ڪيئن محفوظ رهنديون. اداڪاره جي وڊيو کانپوءِ ايئر لائن وسترا ٽوئٽ ڪيو ته معاملي جي جاچ شروع ڪئي وئي آهي، زائره سان ڀرپور سهڪار ڪيو ويندو، اهڙو واقعو برداشت جوڳو ناهي جنهن خلاف سخت ڪارروائي ڪئي ويندي.

 

 

 

اٽليءَ ۾ ورات ڪوهلي ۽ انوشڪا شرما جي شاديءَ جون تقريبون شروع

ممبئي( شوبز نيوز )  اٽليءَ جي شهر ميلان ۾ بالي ووڊ اداڪاره انوشڪا شرما ۽ ڀارتي ڪرڪيٽ ٽيم جي ڪپتان ورات ڪوهلي جي شاديءَ جون تقريبون شروع ٿي ويون آهن. ڀارتي ميڊيا دعويٰ ڪئي آهي ته انوشڪا شرما ۽ ورات ڪوهلي 15 ڊسمبر تي شاديءَ جي ٻنڌڻن ۾ ٻڌجي ويندا جنهن جي تقريبن جي شروعات اٽلي جي شهر ميلان ۾ ٿي چڪي آهي. رپورٽ موجب ميلان ۽ فلورنس ۾ شاديءَ جي تقريبن جو انتظام ڪيو ويو آهي جڏهن ته شادي جو ميلو ٽسڪني جي حسين تاريخي قلعي ۾ سجندو. ڀارتي ميڊيا موجب انوشڪا شرما سڀ کان اڳ اديتا چوپڙا کي پنهنجي شادي بابت آگاهه ڪيو، شاهه رخ خان، عامر خان ۽ ٻين بالي ووڊ اداڪارن جي شاديءَ ۾ شرڪت جو امڪان آهي. ٻئي طرف ورات ڪوهلي طرفان 26 ڊسمبر تي ڀارت جي شهر ممبئي ۾ شادي جي آجياڻي جو انتظام ڪيو ويندو.

 

 

 

وومينز بگ بيش ليگ ۾ پرت اسڪارچرز، ايڊيليڊ اسٽرائيڪرز ۽ سڊني سڪسرز جي ڪاميابي

سڊني (اسپورٽس نيوز) آسٽريلوي ويمنز بگ بيش ليگ ۾ پرٿ اسڪارچرز برسبين هيٽ، ايڊيليڊ اسٽرائيڪرز هوبارٽ هريڪينز ۽ سڊني ٿينڊر کي هارائي ڇڏيو. تفصيل موجب وومن بگ بيش ليگ جي چوٿين ميچ ۾ پرٿ اسڪارچرز برسبين هيٽ کي 18 رنسن تان هارائي ڇڏيو. ايڊيليڊ اسٽرائيڪرز هوبارٽ هريڪنز کي 83 رنسن تان شڪست ڏني. جڏهن ته سڊني سڪسرز سڊني ٿنڊر کي 6 وڪيٽن تان هارايو.

 

ڪرڪيٽ جا شوقين عامر وانگر مون کي معاف ڪن: محمد آصف

ڪراچي (اسپورٽس نيوز) اسپاٽ فڪسنگ جي ڏوهه ۾ پابندي کانپوءِ ڪرڪيٽ ۾ واپس ايندڙ محمد آصف پاڪستان ڪرڪيٽ بورڊ تي سندس ۽ محمد عامر لاءِ ٻٽو معيار اختيار ڪرڻ جي شڪايت ڪندي ڪرڪيٽ جي شوقينن کي هڪ ڀيرو ٻيهر سندس ڏوهه معاف ڪرڻ جي اپيل ڪري ڇڏي، صحافين سان ڳالهائيندي هن چيو ته قائد اعظم ٽرافي جي دوران فارم ۽ رڌم ٻيهر حاصل ڪيو آهي، جيڪڏهن قومي ٽيم ۾ موقعو مليو ته فارم کي ثابت ڪري سگهان ٿو، هن چيو ته ڊوميسٽڪ سيزن ۾ پنهنجي ڪارڪردگي مان خوش آهيان جتي مان 5 ميچن ۾ 30 وڪيٽون وٺي فٽنس ۽ رڌم سان گڏ پنهنجي ڪارڪردگي پڻ ڏيکاري آهي، پي سي بي تي الزام مڙهيندي هن چيو ته پي سي بي منهنجي ۽ سلمان بٽ جي ڀيٽ ۾ محمد عامر سان ٻٽو معيار اختيار ڪيو آهي، مان ڪرڪيٽ جي شوقينن کي اپيل ڪريان ٿو ته جهڙي طرح انهن عامر کي معاف ڪيو مون کي معاف ڪن.

 

ابتو زمانو اچي ويو…!!: منير ڊومڪي

اڄوڪي هن مختصر لکڻيءَ ۾ اسان پنجابي ٻوليءَ جي معروف صوفي شاعر بُهلي شاهه(1680_1758)جي مشهور ڪافي ” اُلٽي هوئي زماني آئي“کي سمجهڻ جي هڪ ڪوشش ڪنداسين.هن ڪافيءَ جي وڏي خصوصيت اها آهي ته هي لڳ ڀڳ 3 صديون پهريان جي لکيل ڪافي آهي،پرهن ۾ بيان ٿيل خيال اڄ جي دور جو عڪاس به آهن.بُلهي شاهه جي هيءَ ڪافي نصحيت آميز مثالن ۽ تمثيلي شاعريءَ سان معمور آهي.شاعرتي دنيا جو سچ ان وقت عيان ٿئي ٿو،جڏهن سڄو زمانو ابتو ٿي وڃي ٿو.ابتو ڪيئن؟جڏهن شاعر اهو ڳوڙهو مشاهدو ڪري ٿو ته انسانن جي آباد ڪيل هن دنيا مان اهي سڀ آدرش ۽ اقدار تقريبن وڃائجي ويا آهن،جيڪي انساني صحتمند سماج کي اڏڻ ۾ بنيادي ڪردار ادا ڪندا آهن.

اُلٽي هوئي زماني آئي،تان مين بهيت سجڻ دي پائي!

جڏهن الٽي گنگا وهندي آهي ته پوءِ زماني جي هر شيءِ ۾ ٽيڙ ايندي آهي.ٿلهه کانپوءِ هن ڪافي جي پهرين مصرعي ۾ بظاهر ته شاعربُهلي شاهه پکي ۽ گگدامن جي دنيا ۾ جديد دور جي آمد سان ٿيندڙ تبديلن جو ذڪر ڪري ٿو،پر پرندن ۽ جانورن جا نالاڪتب آڻي تمثيلي طور هوماڻهن جي دنيا ۽ دور تي به تنقيد جا تکا تيروهائي ٿو.

ڪان لگڙان نُون مارن لگي،چِڙيان جُرّي ڍهائي،

گھوڙي چُگڻ ارُوڙيان تي، گدّون خوِيد پوائي!

ته اهڙوزمانو اچي ويو آهي،جنهن ۾ ڪانگ،جن ڪانگن کي ڊيڄارڻ لاءِ ۽ انهن کان بچائڻ لاءِ هاري ويچارا پنهنجي پچيل فصل جي وچ ۾ مصنوعي هڪ ماڻهو جو بت ٺاهي لڳائيندا آهن،جنهن مصنوعي بُت کان اڳي دور جا ڪانوءَ ڊڄي ڀڄي ويندا هئا ۽ فصل جي ويجهو ئي نه ايندا هئا،ته هاڻي اهي ڪانوءَ ان مصنوعي بُت کي چُڳي چُڳي نستوڪري ماري ڇڏين ٿا.نه فقط اهو،اڳي باز جهرڪين کي ماريندا هئا ۽ هاڻي اهي جهرڪيون انهن بازن کي کائن ٿيون،جديد دور اهڙو اُلٽو ٿي ويو آهي!ڀلا!جنهن دور ۾ گهوڙا گڏهن جو کاڌو کائن ۽ گڏهه گھوڙن جا خلَ پهري انهن جا ڪردار ادا ڪن، ته پوءِ ماڻهو اهو چوڻ تي مجبور ته ٿيندو نه” اُلٽي هوئي زماني آئي“.

انسانن جي دنيا جي وڏي ۾ وڏي شناخت ڪيئن پيدا ٿي؟اها ايئن ته جڏهن ماڻهو جهنگلي جانور مان تبديل ٿي دنيا ۾ پهريون ڀيرو ڪٽنب وارو ادارو قائم ڪري انسان واري زندگي بسر ڪرڻ جي ڪوشش ڪئي.انساني خانداني زندگي نه فقط ماڻهو کي ذاتي تحفظ جو احساس ڏيندي آهي پر محبت جي قدرن کي درست ڪرڻ ۽ قائم رکڻ ۾ هر وقت مدد به ڏيندي آهي،ته هن ڪافي جي اڳين بند ۾شاعر بُلهي شاهه اڄ جي ماڻهن سان سلهاڙيل انساني نسلي اندروني زندگيءَ جي اجاڙ جا سبب ٻڌائي ٿو:

آپتيان وچ الفت ناهين،ڪيا چاچي.ڪيا تائي؟

پُيو پُتران اِتفاق نه ڪائي،ڌِيّان نال نه مَائي!

اڄوڪو رواجي دورايڏو بگڙجي ويوآهي،جو خانداني قدر به تلف ڪيا ويا آهن.ڪنهن دور ۾”فيملي“ زندگي جيڪا ايڪي اتحاد ۽ محبت جي اهڃاڻ هوندي هئي، هاڻي ان خانداني زندگيءَ مان محبتون موڪلائي ويون آهن.اڄڪلهه جي اولاد نه ماءُ پيءُ جي چئي ۾ آهي،نه ئي چاچن،مامن،چاچين ۽ ماسين جي اها عزت ڪئي وڃي ٿي،جنهن عزت جا اهي مستحق آهن.ٻار والدين ۽ ڪٽنب جي ٻين بزرگن جي صدين کان ٻڌايل صحيح رستن کي ترڪ ڪندا،ته پوءِ ان ۾انهن جي ترقي نه بلڪه تنزلي آهي.

جڏهن خاندان جي ويجهن فردن ۾ محبت جو مقدار وڃي ٻُڻي بچي ۽ پيءُ ماءُ ۽ اولاد جهڙي شرين ۽ مقدس رشتي ۾ به ڏار پئجي وڃن،پنهنجائپ جي پرجوش احساسن بدران لاتعلقي جو احساس وڌي وڃي،ڪٽنب جو وجود داءُ تي لڳي وڃي،ته پوءِ مذهبي،سياسي ۽ سماجي ڏاها سڀ سمجهي ڇڏين ته معاشري جو زوال به اڻ ٽر هوندو.

صوفي شاعر بُهلي شاهه پنهنجي هن ڪافي جي ذريعي انساني قدر وڃائجي وڃڻ جو ڏک ته ڪري ئي ٿو،پران سان گڏ اهو پڻ نشاندهي ڪري ٿو ته ڪهڙا ڪهڙا اقدار ڪن جڳهن تان ڪيئن کسڪي ويا آهن.جڏهن خانداني قدرشناسي ختم ٿي وئي هجي،ته پوءِ اهو ڪيئن ممڪن آهي ته معاشرتي قدر قائم دائم هوندا؟!

سچّيان نُون پئي مِلدئي ڌڪّي،جهوٽي ڪول بَهائي،

اگلي هو ڪنگالي بيٺي، پِڇليان فرش وِڇائي!

جديد جڳ ۾ معاشري جي پوزيشن به اتي اچي پهتي آهي جو ڪوڙن ۽ منافقن جا کوڙ محل و عمارات آهن،انهن جا ٺٺ آهن،جڏهن ته سچن ماڻهن جي هٿ ۾ پنڻ وارو رڳو ڪشڪول آهي.سچن آدرشي ماڻهن کي هتي جتي ڪٿي ڌڪا ٿاٻا ملن ٿا صرف ان ڪري جو اهي سچ ٻڌڻ ۽ سچ چوڻ جا پيروڪار آهن،جڏهن ته ڪوڙن ٺڳن ماڻهن جي هر ڪو ويجهو آهي،اهي پاڻ به هرڪنهن جي ويجهوآهن ۽انهن جي هر هنڌ هاڪ آهي،ڇو ته ڪوڙن لڱن جو انهن ماڻهن ۾ ۽ انهن ماڻهن جو ڪوڙن ۾ هڪٻئي جا ذاتي مفاد آهن،جن مفادن جي تڪميل لاءِ اهو ضروري آهي ته اهي هڪٻئي جي نظر و نياز ۽ قربت ۾ رهن.آڳاٽي زماني جا ماڻهو،جيڪي سچ جا معتقد هئا، جديد دور ۾ انهن سان اها ويڌن آهي ته هو ڪنگال ۽ غريب آهن انهن جي جهڙوڪر ڪا عزت ئي ناهي، وري اڄ جا ماڻهوعيش و آرام ۾ آهن.پراڻي زماني جا ماڻهو جن کي منافقت ۽ ٺڳي ڪرڻ نه ايندي هئي،سخت محنت اورچائي باوجود به اهي پٽ تي ويهندا هئا يا سمهندا هئا، جڏهن ته جديد عهد جي ماڻهن لاءِ ماربل ۽ سينگاريل فرش آهي،جيڪي ڪجهه نه ڪندي به فرش تي سستيءَ سان آرام ڪن ٿا.اهڙو ابتو زمانو اچي ويوآهي!

هن ڪافي جي آخري بند ۾ شاعر بُهلي شاهه پڙهندڙن کي جديد زماني جي هڪ ٻي ٻٽي رويئي کي وائکو ڪري ٿو ته نئين دور ۾نوڪرن وٽ به اهي قدر باقي وڃي نه بچيا آهن،جن قدرن جي ڪري اهي به سڃاتا ويندا هئا.جڏهن انهن خدمتگارن کي اهو حڪم ڪيو وڃي ٿو ته اهي محل ۾ ايندڙ بادشاهن جي آمد ۾ غاليچا وغيره وڇائن ته جيئن انهن جي ڀرپورآجيان ڪئي وڃي، ته راجا مهاراجائن جي انهن خوبصورت گلمن تي انهن جي پير رکڻ کان اڳ ۾،اهي نوڪرانهن سينگاريل گلمن تي پاڻ گھمي،ڦري ۽ سمهي انهن تي ڀرپور راج ڪن ٿا.جيئن ته انهن خدمتگارن کي پنهنجي مالڪ جو گلمن وڇائڻ جو اڳواٽ حڪم مليل هوندو آهي ته انهن نوڪرن کي اتان هٽائي به نٿوسگھجي جيستائين اهي پاڻ نه چاهن.اهڙو ابتوزمانو اچي ويو آهي!

ڀوُريان والي راجي ڪِيتي،راجيان ڀيڪ منگائي،

بُلهيا! حڪم حضورون آيا،تِس نُون ڪون هٽائي!

(ليکڪ انگريزي ادب جو استاد آهي.)

 

وري هڪ نئين ڌرڻي جي تياري..!!؛ غلام مصطفيٰ جمالي

پاڪستان پيپلزپارٽي جي ڪو چيئرمين جناب آصف علي زرادي  پنهنجي سموري سياسي وفد سان گڏجي ڪري قبله سائين جناب ڊاڪٽرطاهرالقادي سان ملاقات ڪئي ۽ سندس آستاني تي حاضري ڀري،جنهن مان ائين لڳو ته ڄڻ مٿس لڳل سمورا ڪيس ختم ٿيندا،جڏهن ته هي هڪ الڳ ٿهيوري آهي ته آصف علي رزادي ۽ سندس ساٿين تي لڳل ڪيس ڪڏهن به ختم نه ٿيندا،جڏهن ته مناسب وقت سان گڏ گڏ سندس احستاب ٿيندو رهندو،۽ اهو احستاب آخري حد تائين به ويندو جنهن کان پوءِ احستاب کي مڪمل شڪل ڏئي ڪري پپيپلزپارٽي جو احستاب وارو دروازو شايد هميشه لاءِ بند ڪيووڃي، برحال هن وقت آئون ڳالهه ٻن اڳواڻن ۽ ٻين سياستدانن جي ڪري رهيو آهي جنهن ۾ هڪ آصف علي زرداي ۽ ٻيو ڊاڪٽرطاهرالقادي آهي .

مان سمجهان ٿو ته ايترو وقت ناهي ٿيو جو اوهان اها ڳالهه وساري ويٺا هجو ڇو ته ڪجهه عرصو پهرين عمران خان صاحب ۽ جناب ڊاڪٽرطاهرالقادي پاڪستان اندر ڌرڻن جي موسم کڻي آيا هئا جيڪا ڌرڻن وارو موسم خزان ۾ تبديل ٿي وئي هئي جهن خزان انساني زندگين جا ڪيترائي گل مرجهائي ڇڏيا هئا،هي اهو دور جڏهن عمران خان صاحب ۽ ڊاڪٽرطاهرالقادري ميان نواز شريف جي حڪومت جي خلاف اسلام آباد ۾ ڪينٽينرسجهائي رهيا هئا ۽ پنهنجي پنهنجي ڪارڪنن کي اسلام آباد ۾ ڏس ڏئي ڪري گهرائي رهيا هئا. ۽ ان وقت جناب آصف علي زرداي انهن ڌرڻن جي سخت لفظن ۾ مذمت ڪري رهيو هو نه رڳو انهن ڌرڻن جي مذمت ڪري رهيو هو ته ميان نواز شريف جو هڏڏوکي بڻجي ڪري سندس ساٿ ڏئي رهيو هوُ ۽ کيس آٿل دلاسا ڏيڻ ۾ پورو هو ته هوُ ان سان هر موڙ تي گڏ آهي ميان نواز شريف کي جڏهن به آصف علي زرداي جي ضرورت پوندي ته هوُ سندس ساٿ ڏيڻ لاءِ سڀ کان اڳ ڀرو هوندو،ان وقت جناب آصف علي زرداي اهو به چئي رهيو هو ته ڊاڪٽرطاهرالقادري ۽ عمران خان جيڪي ڌرڻا هڻي رهيا آهن اهي غيرجمهوري آهن،ان ڪري سوال اهو به آهي ته ان وقت جيڪڏهن لڳل اها ڌرڻا غير جهموري هئا ته اهي ڌرڻا اڄ ڪئين جهموري بڻجي ويا آهن.؟ جو آصف علي زرداري ڊاڪٽرطاهرالقادري سان ملي ڪري سندس حمايت ڪري رهيو آهي.

جناب آصف علي زرداري ۽ ڊاڪٽرطاهرالقادي ٽي ڪلاڪ مسلسل ملاقات ڪئي ۽ سياسي ڳالهيون ڪيون جنهن اندر جناب آصف علي زرداي ڊاڪٽرطاهرالقادري کي يقين ڏياريو ته هو هن سان هر موڙ تي گڏ آهي جيڪڏهن ماڊل ٽائون سانحي کي وٺي ڪري ڊاڪٽرطاهرالقادي ڌرڻا به هوندو ته پاڪستان پيپلزپارٽي ان سان گڏ هوندي،اها ياد رکڻ گهرجي ته انکان پهرين چوڌري شجاعت حسين عمران خان ۽ مصطفيٰ ڪمال به ڊاڪٽرالطاهرالقادري سان ملاقات ڪري چڪا آهن۽ کيس يقين ڏياري چڪا آهن ته هوُ سندن ڀرپور حمايت ڪندا،ان ڪري هن وقت پوري قوم پريشان آهي ته آخر سموري پارٽِين جا اڳواڻ آخر ڊاڪٽرطاهرالقادري کي اڳ واٽ جو اهڙيون تجزيرون ڏئي رهيا آهن،ڇو سڀ اچي ڊاڪثرطاهرالقادري جا همدرد بڻيا آهن آخر وجهه ڇا آهي.؟ مان سمجهان ٿو ته پاڪستاني اڳواڻن جي سياست به وڏو منجهيل ڏيري جو سٽُ آهي جنهن کي اڄ تائين ڪير به نه سلجهائي نه ٿو سگهي ۽ نه ئي ڪو سمجهائي ٿو سگهي،هن وقت سموريون پارٽيون ملي ڪري ڊاڪٽرطاهرالقادري کي هشي ڏئي رهيون آهن ته تون ڌرڻو هڻ اسين تونسان گڏ آهيون.! پر جيڪڏهن ڊاڪٽرطاهرالقادري ڌرڻو هڻي به ٿو ۽ خدا نه ڪري ڪو واقعو نه ٿي. پر جيڪڏهن ڪو واقعو ٿئي ٿو پوي ۽ انهي واقعي اندر ڪو جاني نقيان ٿي ٿو ته پوءِ انجو زميوار ڪير هوندو.؟

هن وقت ته سموريون پارٽيون ڊاڪٽرطاهرالقادري سان گڏ آهن مان سمجهان ٿو ته ڌرڻي کي وٺي ڪري ڪو واقعو پيش به اچي ٿو ته ان وقت ڊاڪٽر جو ڪو ڌڻي به نه ٿيندو،انڪري مان سمجهان ٿو ته جيڪڏهن ڊاڪٽرطاهرالقادري ڌرڻو هڻي ٿو ته عاشقان رسول به ختم نبوت جي اشو کي ٻهير کڻي ڪري روڊن تي نڪرندا ۽ پوءِ هڪ دفعو ٻيهر لاهور ۽ اسلام آباد جي مين روڊن تي ڌرڻن جي سوشو هڪ دفعو ٻيهر شروع ٿي ويندو.جنهن اندر ڊاڪٽرطاهرالقادري ،عمران خان،پاڪستان پيپلزپارٽي،پيرسالوي،ڊاڪٽرآصف جلالي،مسلسم ليگ ق، سميت سموريون جماعتون هڪ ئي ڪري پاڪستان اندر ڌرڻا جو سلسلو جاري ڪنديون.

پاڪستان سان محبت ڪندڙ شايد انهي ڌرڻن جي معاملي کي ٻڌي ڪري يقين ڏکيرا هوندا جڏهن ته پاڪستان دشمن پروگينڊا ڪندڙ تمام گهڻا خوش هوندا ته پاڪستان جو امن هڪ دفعو ٻيهر خراب ٿيڻ وڃي رهيو آهي،انڪري پوري دنيا سوچيندي هوندي ته دنيا جي ڇهين آبادي اسلامي ملڪ پاڪستان  جيڪا 2107ع ۾ به سندس عدليه ۽ صحافت آزاد آهي پر ملڪ اڃان به آزاد ٿي نه سگهيو آهي جڏهن  جو چاهي ته روڊن تي ٽائر رکي ڪري پاڪستان جو امن امان خراب ڪري سگهي ٿو،2013ع اندر عمران خان اليڪشن ۾ چار حلقا کولڻ جو مطالبو ڪري رهيو هو ۽ حڪومت مسلسل انڪار ڪري رهي هئي،پوءِ عمران خان 126ڏينهن جو ڌرڻو هنيو جنهن ۾ ڌرڻو هڻندڙن جو به اربين رپين جو خرچ ٿي ويو ۽ ڌرڻو روڪڻ وارن جو به اربين رپين جو خرچو ٿي ويو،پر مسئلو ڪو به حل نه ٿي سگهيو هو ۽ مسئلو ائين جو ائين رهيو،ماڊل ٽائون واقعو به ٿيو جنهن اندر بي گناهه عوام مئي پر سزا ڪنهن به ناهي ملي ۽ وري هڪ دفعو ٻيهر ڌرڻن جي موسم شروع ٿي وئي آهي.

اهو سوال تمام گهڻو اهم آهي ته جيڪڏهن هر مسئلو ڌرڻن سان حل ڪيو وڃِي ته پوءِ هي پوليس هي عدالتون هي ايجنسيون ۽ هي ۽ ٻيا قانون نافض ڪرڻ وارا ادرا ڇا اجالا آهن.؟ انڪري مان سمجهان ٿو ته هن وقت هر ڪوئي پنهنجي من ماني ڪري رهيو آهي ۽ هر ڪوئي پاڻ مڃرائڻ ۾ پورو آهي،مڃڻ ۽ مڃرائڻ اندر عوام جو تمام گهڻو نقصان ٿي رهيو آهي،ڇو ته ملڪ اندر ڪوبه ڪم حڪمراني روٽين ۽ آئين جي مطابق نه ٿي رهيو آهي،انڪري شايد هن وقت پاڪستان ۾ ٻيهر ڌرڻن جو پلان ٺاهيو پيو وڃي،انڪري هاڻ ڏسڻو اهو آهي ته لڳندڙ ڌرڻي اندر ڪمزور جهموريت جو ڇا ٿو ٿي.

 

فصيلا سرڪي جو بازياب نه ٿيڻ ئي حڪومت جي نااهلي جو ثبوت آهي..!: عزيزالله ناريجو

چوندا آهن ته چڱو انسان هميشه چڱائي ڪندو آهي ۽ برو انسان هميشه برائي سوچيندو آهي، سو هر انسان جي اصليت ان جي سوچ ۾ ئي لڪل هوندي آهي پر ٿيندو اهو ئي آهي جيڪو قدرت کي منظور هوندو آهي سو مخالفن جڏهن حضرت ابراهيم عليه اسلام کي باهه جي آڙاهه ۾ اڇلايو هو ۽ باهه پنهنجي اولانڀن سان ڪاٺين کي ساڙي رهي هئي ۽ ان ٻرندڙ باهه تي قابو پائڻ ناممڪن بڻجي چڪو هو ته ان وقت لاءِ چوندا آهن ته سانڊي ڇا ڪيو جو باه کي وڌائڻ خاطر باهه کي ڦوڪا ڏيڻ لڳو هو، جڏهن ته ڪال ڪڻڇي پکي پاڻي مان چهنب ٻوڙي باهه مٿان وجھڻ لڳي هئي، سو نه ڪي سانڊي جي ڦوڪن سان باه وسامي هئي ۽ نه وري ڪال ڪڻڇي پکي جي چهنب جي پاڻي سان باهه متي هئي پر ان وقت انهن جي نيتن جي خبر پئجي چڪي هئي سو اڄ سنڌ ڄائي فضيلا سرڪي کي اغوا ٿئي 11 سال گذري ويا آهن پر فضيلا سرڪي جي بازيابي ناممڪن بڻجي ويئي آهي، چون ٿا ته سنڌ سرڪار به پنهنجي وس آهر گھڻو زور لڳايو آهي پر فضيلا سرڪي کي بازياب ڪرائي نه سگھي آهي سو ان ڳالهه ۾ ڪيتري صداقت آهي اهو خدا ئي بهتر ڄاڻي ٿو.

فضيلا سرڪي جو تعلق ٺل شهر جي علائقي ڳڙهي حسن سرڪي سان آهي جتي عبدالرزاق سرڪي جي گھر ۾ هڪ نياڻي جو جنم ٿيو هو جنهن جو انهن نالو فضيلا سرڪي رکيو هو، سو فضيلا سرڪي ستن سالن جي مس ٿي ته ان کي ان ڳوٺ مان ئي اغواءَ ڪرايو ويو پر فضيلا سرڪي کي ڇو اغواءَ ڪرايو ويو هو ان باري ۾ فضيلا سرڪي کي ڪابه ڄاڻ ڪونه هئي، فضيلا سرڪي هڪ معصوم ٻار هئي، ستن سالن جي عمر ۾ اغوا ٿيڻ کان پوءِ هن جي حالت ڪهڙي ٿي هوندي هوءَ پنهنجي پيءُ ۽ ماءُ لاءِ رني ۽ رڙي ڪيئن نه هوندي ….؟؟ هن کي رات جو ننڊ ايندي به هوندي الاهي جي نه …..؟؟ هن جي پتڪڙي ذهن ۾ هزارين سوال اڀرندا هوندا ته آخر هن کي هن جي پيءُ ۽ ماءُ کان ڇو جدا ڪيو ويو آهي پر انهن سوالن جا جواب فضيلا سرڪي وٽ موجود ڪونه هوندا ۽ هن الائي جي ڇا سوچي خاموشي اختيار ڪئي هوندي اهو ڪوبه نه ٿو ڄاڻي.

فضيلا سرڪي جي اغوا ٿيندي ئي فضيلا سرڪي جو پيءُ عبالرزاق سرڪي ۽ سندس امڙ سڪينه سرڪي روئندي رڙندي تر جي مڪامي وڏيرن جي اوطاقن ۽ انهن جي درن تي آيا جتي انهن کي ٺلها آسرا ۽ دلاسا ڏنا ويا پر فضيلا سرڪي جو نالو نشان ملي نه سگھيو تنهن کان پوءِ فضيلا سرڪي جا والدين قرآن پاڪ مٿي تي کڻي پريس ڪلب ٺل تي آيا جتي سوين سياسي ۽ سماجي تنظيمن جي اڳواڻن اچي سنون دلجوئي ڪئي ته هينئر ئي فضيلا سرڪي کي بازياب ڪرايون ٿا پر نه …….  ڪجهھ به حاصل ٿي نه سگھيو.

تنهن کان پوءِ ٻڌڻ ۾ آيو ته سپريم ڪورٽ پاران به فضيلا سرڪي کي بازياب ڪرائڻ جا حڪم ڏنا ويا هئا پر پوءِ به ڪجھه ٿي نه سگھيو، ڪجھه وقت لاءِ ضلعي جيڪب آباد ۾ آيل ڪجھه ايس ايس پيز به ڪجهھ هفتن جو ٽائيم پيرڊ ڏنو ته جلد ئي فضيلا سرڪي کي بازياب ڪرايو ويندو پر انهن ٺلهن آسرن مان به ڪجھه حاصل ٿي نه سگھيو ۽ ائين ئي فضيلا سرڪي جا والدين روئندا رڙندا رهيا پر ڪنهن کي به سندن مٿان رحم ڪونه آيو..

اڄ به جيڪڏهن توهان جو ڪڏهن ٺل شهر وڃڻ ٿئي ته ٺل شهر جي پريس ڪلب آڏو فضيلا سرڪي جي امڙ سڪينه سرڪي ۽ سندس والد عبدارزاق سرڪي قرآن پاڪ مٿي تي کنيون احتجاج ڪندي نظر ايندا، پر افسوس جو هن مهل تائين ڪنهن به هنن جي مدد نه ڪئي آهي.

فضيلا سرڪي کي اغواءَ ٿئي 11 سال گذري ويا آهن پر هن مهل تائين سندس ڪو پتو پئجي نه سگھيو آهي ته آخر فضيلا سرڪي آهي ڪٿي …….؟؟

فضيلا سرڪي ڪنهن اهڙي هنڌ لڪائي ويئي آهي جنهن جو ڏس پتو پوڻ ناممڪن بڻجي ويو آهي پر چوندا آهن ته جيڪڏهن سرڪار سڌي ٿي پوي ته هر ناممڪن ڪم ممڪن بڻجي پوندو آهي پر الائي جي ڇو سنڌ سرڪار فضيلا سرڪي کي بازياب ڪرائڻ ۾ ناڪام ويئي آهي، سو هاڻي سنڌ سرڪار فضيلا سرڪي جي بازيابي تي خاموشي اختيار ڪري نه فقط ڪيترائي شڪ شبها پيدا ڪرايا آهن پر عوام جي دلين ۾ به غبار اچي رهيو آهي پر ڪجھه الله تعاليٰ جا اهڙا نيڪ انسان به آهن جيڪي هن وقت فضيلا سرڪي جي بازيابي لاءِ ميدان ۾ لهي آيا آهن.

اهڙن نيڪ ماڻهن ۾ حساس دل رکندڙ تنگواني جي علائقي ڊيرا سرڪي سان تعلق رکندڙ چيف سردار غلام سرور سرڪي صاحب جن ميدان ۾ لهي آيا آهن، چيف سردار صاحب جو چوڻ آهي ته فضيلا سرڪي جا والدين غريب هجڻ ڪري فقط ٺل پريس ڪلب تائين احتجاج ڪندا رهيا آهن پر هاڻي اسين انهن جو ساٿ ڏيئي اهو احتجاجي دائرو وڌائينداسين، چيف سردار غلام سرور سرڪي پريس بيان ۾ چيو ته 26 نومبر 2017 تي اسين ٺل شهر جي عوام کي ساڻ ڪري لاڙڪاڻي جي شهر ڳڙهي خدابخش ڀٽو ۾ شهيد ذوالفقار علي ڀٽي ۽ شهيد راڻي محترمه بينظير ڀٽو جي مزارن آڏو احتجاجي مظاهرو ڪنداسين،

چيف سردار غلام سرور سرڪي ٻڌايو يارنهن سالن کان فضيلا سرڪي جا والدين قرآن پاڪ کڻي احتجاج ڪندا رهيا آهن پر سنڌ سرڪار کي هنن جي حال تي ڪنهن به قسم جو رحم ڪونه آيو آهي پر هاڻي اسين انهن جو ساٿ ڏينداسين ۽ هنن جو آواز اعليٰ ايوانن تائين پهچائينداسين، چيف سردار چيو ته اسان جي احتجاج جو هي پهريون مرحلو هوندو جو اسين ڳڙهي خدابخش ۾ ڌرڻو هڻنداسين جي اڃان به فضيلا سرڪي بازياب نه ٿي ته اسين ڪراچي پريس ڪلب آڏو به ڌرڻو هڻنداسين جنهن کان پوءِ اسين سنڌ اسيمبلي آڏو به ڌرڻو هڻنداسين  ۽ اهڙي طرح اسان جو هي سلسلو ان وقت تائين جاري رهندو جيسيتائين فضيلا سرڪي بازياب ٿي گھر نه ٿي موٽي.

عزيزالله ناريجو

 

پاڻي پلانٽ فعال ٿيندا؟

سپريم ڪورٽ سنڌ ۾ سامونڊي گدلاڻ ۽ پيئڻ جو صاف پاڻي نه ڏيڻ ۽پاڻي جي نيڪالي واري ڪيس ۾ عارضي حڪم نامو جاري ڪري ڇڏيو آهي .جيڪو عارضي حڪم نامو 6 صفحن تي مشتمل آهي .فيصلي ۾ ٻڌايو ته سنڌ ۾ صحت لاءِ نقصانڪار پاڻي سبب هيپاٽائيٽس سي ۽ چمڙي جون بيماريون پکڙجي رهيون آهن .سنڌ جي وڏي وزير ان معاملي کي حل ڪرڻ لاءِ ٽن هفتن جي مهلت ورتي آهي. حڪم نامي ۾ چيو ويو آهي ته ٽائم لائن جي لاءِ وڏي وزير پنهنجو قسم نامو به جمع  ڪرائي. پيئڻ جي پاڻي، سيوريج جي نظام جي حوالي سان هر ضلعي جي اسڪيم جي لاءِ ٽائم لائن ڏني وڃي .ڪهڙي به ضلعي ۾ ڪيتري وقت  واٽر ٽريٽمنٽ پلائٽس فعال ٿيندا. سنڌ جو وڏو وزير  سپريم ڪورٽ کي رپورٽ ڏئي ڪهڙي وقت پلانٽ فعال ڪيا ويندا. ڪراچي جي  اسپتالن جي گندگي کي ختم ڪرڻ جي منصوبن کان سپريم ڪورٽ کي آگاهي ڏني وڃي . وڏو وزير سنڌ محمودآباد ٽريٽمينٽ پلانٽ جي زمين ليز ڏيڻ جي جاچ ڪري.