تازيون خبرون

Daily Archives: December 8, 2017

ٺٽي ۾ پانڌيئڙن جي ٻيڙي اونڌي، عورتن ۽ ٻارن سميت 17 ڄڻا فوت

ٺٽو (ويب ڊيسڪ) ٺٽي ۾ پانڌيئڙن جي ٻيڙي اونڌي ٿيڻ جي نتيجي ۾ 17 ڄڻا فوت ٿي ويا آهن، جن ۾ عورتون ۽ ٻار به شامل آهن. ٺٽي جي ڊپٽي ڪمشنر ناصر بيگ موجب بدقسمت ٻيڙي ۾ عورتن ۽ ٻارن سميت 60 ڄڻا سوار هئا، جيڪي ٻُهارا ۾ سمنڊ پار پير پٺائي جي مزار تي حاضري لاءِ وڃي رهيا هئا. سندس چوڻ هو ته ريسڪيو ٽيمن حادثي واري هنڌ پهچي امدادي ڪم شروع ڪيا ۽ هن وقت تائين درياهه مان 17 ڄڻن جا مڙهه ڪڍيا ويا آهن، 20 ڄڻن کي صحيح سلامت ڪڍيو ويو آهي، جڏهن ته ٻين جي ڳولا جاري آهي. هن ٻڌايو ته ٻيڙي ۾ گنجائش کان وڌيڪ ماڻهو سوار هئا، جنهن سبب اهو حادثو پيش آيو. هوڏانهن پاڪ فشر فوڪ فورم جي چيئرمين محمد علي شاهه جو چوڻ هو ته ٻيڙي ۾ 100 کان وڌيڪ ماڻهو سوار هئا، جيڪا توازن برقرار نه رکندي اونڌي ٿي پئي. نيوي ۽ ريسڪيو ادارن چيو آهي ته فوت ٿي ويلن ۾ 3 ٻار ۽ 5 عورتون به شامل آهن. حيدرآباد جي ڪمشنر جو چوڻ آهي ته ريسڪيو عمل ۾ حصو وٺڻ لاءِ ٺٽي ۽ سجاول جي ضلعن مان ٽيمون توڙي ايمبولينسون گهرايون ويون آهن، فوتين جا مڙهه ميرپور ساڪرو تعلقي اسپتال منتقل ڪيو ويو آهي. ٻئي پاسي وڏي وزير سيد مراد علي شاهه واقعي جو نوٽيس وٺندي حيدرآباد جي ڪمشنر کي ريسڪيو جو ڪم تيز ڪرڻ جي هدايت ڪئي آهي.27

 

آمريڪي سفارتخاني جي بيت المقدس منتقلي عالمي قانون جي ڀڃڪڙي آهي: پاڪستان

اسلام آباد (اين اين آءِ) آمريڪا پاران والاريل بيت المقدس کي اسرائيل جو گادي شهر تسليم ڪرڻ واري فيصلي تي پاڪستان سميت سڄي دنيا جي ملڪن سخت رد عمل ظاهر ڪيو آهي. پاڪستان جي حڪومت ۽ عوام آمريڪا پاران اسرائيل ۾ پنهنجو سفارتخانو تل ابيب کان والاريل بيت المقد منتقل ڪرڻ واري معاملي تي شديد ڳڻتي جو اظهار ڪيو آهي. پرڏيهي آفيس پاران جاري ڪيل بيان ۾ چيو ويو آهي ته اهڙو ڪو به قدم نه صرف عالمي قانون ۽ سلامتي ڪونسل جي ٺهرائن جي ڀڃڪڙي هوندي پر اهو مسئلو فلسطين تي ڪيترن ئي ڏهاڪن جي اتفاق راءِ جي به خلاف هوندو. پاڪستاني عوام ۽ حڪومت اهڙي ڪنهن به قسم جي قدم جي مخالفت ڪري ٿو. اعلان ۾ چيو ويو آهي ته آمريڪا پاران اهو عمل علائقائي امن ۽ وچ اوڀر ۾ سلامتي کي متاثر ڪندو. پاڪستان پاران چيو ويو آهي ته آمريڪا بيت المقدس جي قانوني ۽ تاريخي حيثيت متاثر ڪرڻ واري قدمن تان هٽي وڃي ۽ ان معاملي تي سلامتي ڪونسل جي ٺهرائن جو احترام ڪيو وڃي. بيان ۾ اهو به چيو ويو آهي ته پاڪستان هڪ آزاد، خودمختيار ۽ مستحڪم فلسطيني رياست جي قيام جو خواهشمند آهي. آمريڪي صدر جي فيصلي تي عرب ملڪن سميت عالمي اڳواڻن پاران شديد تنقيد ڪئي پئي وڃي. فلسطيني صدر محمود عباس آمريڪي سفارتخانو تل ابيب کان والاريل بيت المقدس منتقلي جي صورت ۾ ڊونلڊ ٽرمپ کي سنگين نتيجن کان خبردار ڪيو آهي. سعودي عرب جي شاهه سلمان بن عبدالعزيز صدر ٽرمپ کي چيو آهي ته اهڙا قدم سڄي دنيا جي مسلمانن کي چڙ ڏياري سگهن ٿا. ترڪ صدر رجب طيب اردگان خبردار ڪيو آهي ته والاريل بيت المقدس جي حيثيت مسلمانن لاءِ ڳاڙهي لڪير وانگر آهي ۽ ان حد کي پار ڪرڻ جي صورت ۾ ترڪي، اسرائيل سان پنهنجا لاڳاپا معطل ڪري سگهي ٿو. فرانسيسي صدر، ڊونلڊ ٽرمپ کي چيو آهي ته کيس ڳڻتي آهي ته بيت المقدس جي حيثيت تي ڪو به فيصلو ٻنهي ملڪن جي بنيادي ڍانچي ۾ هئڻ گهرجي. مصر خبردار ڪيو آهي ته جيڪڏهن آمريڪي صدر والاريل بيت المقدس کي اسرائيل جو گادي شهر تسليم ڪرڻ واري پنهنجي فيصلي تي عمل ڪري ٿو ته ان جا خطرناڪ نتيجا نڪري سگهن ٿا. اردن جي شاهه عبدالله چيو آهي ته اهڙو فيصلو امن واري عمل کي ٻيهر شروع ڪرڻ وارين ڪوششن کي ڪمزور ڪندو. حماس جو چوڻ آهي ته آمريڪي سفارتخاني کي واريل بيت المقدس منتقل ڪرڻ جو مطلب آهي ته آمريڪا ڳاڙهي لڪير کي پار ڪري رهيو آهي. هن مطالبو ڪيو ته والاريل بيت المقدس بابت گڏيل قومن جي ٺهرائن جو احترام ڪيو وڃي. ٻئي طرف

پاڪستان آمريڪا طرفان بيت المقدس کي اسرائيلي گادي وارو هنڌ قبول ڪرڻ ۽ آمريڪي سفارتخاني جي منتقلي جي فيصلي کي عالمي قانونن جي ڀڃڪڙي قرار ڏنو ويو آهي. پاڪستان سفارتخاني جي بيت المقدس منتقلي جي فيصلي جي مذمت ڪندي آمريڪا کي خبردار ڪيو آهي ته هو معاملا خراب ٿيڻ جي فيصلي تي نظرثاني ڪري ڇو ته آمريڪي قدم وچ اوڀر جي امن عمل کي تباهي جو سبب بڻجندو. پاڪستان گڏيل قومن جي سلامتي ڪائونسل کان مطالبو ڪيو آهي ته صورتحال جو نوٽيس وٺي جڏهن ته معاملي تي ترقي طرفان اسلامي سربراهه ڪانفرنس گهرائڻ جي آجيان ڪئي آهي. آمريڪي صدر ممنون حسين مذمت ڪندي آمريڪا کان فيصلو واپس وٺڻ جو مطالبو ڪيو. هن چيو ته والاريل بيت المقدس کي اسرائيلي گادي وارو هنڌ بڻائڻ جي هر فورم تي مذمت ڪئي ويندي ۽ اميد آهي ته مسلمان دنيا واقعي جو نوٽِس وٺندي. صدر ممنون حسين ترڪ هم منصب سان فون تي رابطو ڪيو جنهن ۾ صدر صدر اتفاق ڪيو ته آمريڪي صدر جي فيصلي سان وچ اوڀر ۾ امن ۽ استحڪام تي ناڪاري اثر پوندو. پرڏيهي وزير خواجه آصف ٽوئيٽر تي بيان ۾ چيو ته آمريڪي طرفان پنهنجو سفارتخانو والاريل بيت المقدس منتقل ڪرڻ سان رتورت مسلمان دنيا کي وڌيڪ هڪ زخم ملندو.

 

آمريڪي ڊرون جهاز ملڪي حدن ۾ آيا ته ڪيرائي ڇڏينداسين: پاڪ ايئر چيف جو اعلان

اسلام آباد( ويب ڊيسڪ ) هوائي فوج جي سربراهه ايئر چيف مارشل سهيل امان چيو آهي ته اساما بن لادن ڪيس ۾ اسان کان غلطي ٿي، جڏهن ته آمريڪي ڊرون جهازن جي ڀڃڪڙي تي ٻڌائي ڇڏيو آهي ته ملڪي حدن جي ڀڃڪڙي ٿي ڊرون ڪيرائي وٺنداسين. اسلام آباد ۾ تقريب کي خطاب ڪندي ايئر فورس جي سربراهه سهيل امان چيو ته ڪامرا ايئر بيس تي حملو ايئر فورس جي تاريخ جو سڀ کان وڏو حملو ۽ افسوس ترين سانحو هو، اسان سانحي ۾ وڏو نقصان برداشت ڪيو آهي پر حوصلو رکيو، اسان همت ۽ حوصلي سان شدت پسندي خلاف ڪوششون جاري رکيون ۽ ايئر فورسز کي وڌيڪ مضبوط ڪيو. هن چيو ته جيڪو امن ڪيترائي ملڪ نه آڻي سگهيا اهو اسان آندو جنهن جو اعتراف ڀارتي فوجي اختيارين به ڪيو آهي. سندس چوڻ هو ته ڪامرا بيس حملي ۾ دهشتگردن هڪ ساب ايئر ڪرافٽ جهاز مڪمل طور تباهه ڪيو جڏهن ته ٻين کي جزوي طور نقصان پهتو، جهازن کي بهتر بڻائڻ لاءِ عالمي اداري 287 ملين ڊالرز گهريا پر ساڳيا جهاز اسان جي نوجوانن، انجنيئرن سائنسدانن نه رڳو 25 ملين ڊالرز ۾ ٻيهر اڏام لاءِ تيار ڪيا ۽ پاڪستان ساب جهازن جي پنجين سرٽيفڪيشن ايجنسي بڻجي ويو آهي. ايئر چيف چيو ته هاڻي اسان پاڻ جنگي جهاز ٺاهينداسين ۽ ايئر ٽيڪنالوجي لاءِ خيرات نه گهرڻي پوندي، پاڪستان ساليانو 16 کان 20 جي ايف 17 ٿنڊر جهاز تيار ڪري رهيو آهي. هن چيو ته پاڪستان ۾ ٽيلنٽ جي کوٽ ناهي، هر فرد قوم جي ترقيءَ جو ذريعو آهي، رڳو بهترين دماغن کي رستي تي آڻڻ جي ضرورت آهي.

 

ڪراچي ۾ پاڻي جي چوري برداشت نه ڪئي ويندي: چيف جسٽس

ڪراچي  (اين اين آءِ)سپريم ڪورٽ شهر ۾ غير قانوني واٽر هائيڊرانٽس جي خلاف ڪاروائي جاري رکڻ جو حڪم ڏنو آهي خميس تي  سپريمڪورٽ ڪراچي رجسٽري ۾ چيف جسٽس آف پاڪستان جسٽس ميان ثاقب نثار جي سربراهي ۾ فاضل بينچ شهر ۾غير قانوني هائيڊرانٽس ختم ڪرڻ جي پاڻمرادو نوٽيس ڪيس جي ٻڌڻي ڪئي. ايم ڊي واٽر بورڊ عدالت کي ٻڌايو ته شهر مان 107 غير قانوني هائيڊرانٽس ختم ڪري ڇڏيا ۽ عدالتي حڪم تي 6 قانوني هائيڊرانٽس قائم ڪيا ويا آهن، چيف جسٽس رمارڪس ڏنا ته جيڪڏهن غلط بيان ڪئي وئي ته توهين عدالت جي ڪاروائي ڪئي ويندي ۽ سزا به ملندي، ايم ڊي توهان لکي ڏيو ته هاڻي ڪو نئون غير قانوني هائيڊرانٽس نه ٺهندو، هاشم رضا عدالت کي ٻڌايو ته غير قانوني هائيڊرانٽس ختم ٿيڻ کان پوءِ واٽر بورڊ جي آمدني ۾ اٺ ڪروڙ رپيا اضافو ٿيو آهي چيف جسٽس رمارڪس ڏيندي چيو ته غير قانوني ڪاروابار ۾ واٽر بورڊ جو عملو ملوث آهي ته ان جي خلاف به  قانوني ڪاروائي ڪيو .  غير قانوني هائيڊرانٽس ۽ ڪوتاهي برداشت نه ڪنداسي. جيڪي هائيڊرانٽس بند ٿي ويا اهي بند ئي هجن، ڪنهن کي ٻيهر ڪم جي اجازت نه ڏينداسي. هائيڊرانٽس مالڪن جي وڪيل عدالت کي اپيل ڪئي ته زمين اندر کارو پاڻي ڪڍڻ جي اجازت ڏني وڄي جنهن  تي چيف جسٽس چيو ته پاڻي مٺو هجي يا کارو ان کي بند رهڻ گھرجي وڪيل چيو ته اهڙِ طرح فيڪٽري کي نقصان ٿيندو ۽  اهي بند ٿي وينديون ، جنهن تي چيف جسٽس پڇا ڪئي ته فيڪٽرين جي لاءِ ٽينڪر   هلائڻ جي اجازت ڏئي ڇڏيون، چيف جسٽس رمارڪس ۾ چيو ته اسان ڪيس ختم ڪري رهيا آهيون سپريمڪورٽ کي غير ضروري ڪيسن  جي بار هيٺا تباهه نه ٿو ڪري سگهجي، اسان جو ڪم حڪومت ڪرڻ ناهي هي ڪم حڪمرانن کي ڪرڻ ڏيو، عدالت ڪيس اڪلائيندي، انتظاميا کي شهر ۾ غير قانوني واٽر هائيڊرانٽس جي خلاف ڪاروائي جاري رکڻ  جو حڪم ڏئي ڇڏيو.

 

زرداري جي طاهر القادري سان ملاقات، متاثرن سان گڏ آهيون: اڳوڻو صدر

لاهور (ويب ڊيسڪ) پ پ جي شريڪ چيئرمين آصف علي زرداري ۽ پاڪستان عوامي تحريڪ جي سربراهه ڊاڪٽر طاهر القادري وچ ۾ لاهور منهاج القرآن سيڪريٽريٽ لاهور ۾ ملاقات ٿي آهي، جنهن ۾ باقر نجفي رپورٽ ۽ ملڪ جي سياسي صورتحال تي غور ڪيو ويو. ملاقات دوران اڳوڻي صدر آصف زرداري جو چوڻ هو ته ماڊل ٽائون سانحي تي عوامي تحريڪ سان گڏ آهيون، شهيدن جو رت رائيگان نه ويندو. هن چيو ته ماڊل ٽائون ۾ ظلم جو بدترين مثال قائم ڪيو ويو، متاثرن کي ساڍا 3 سال گذري وڃڻ باوجود انصاف ناهي مليو. آصف زرداري چيو ته 14 ڄڻن کي قتل ڪيو ويو پر ڪنهن خلاف ڪارروائي نه ٿي، عوامي تحريڪ ۽ متاثرن جي صبر تي فخر آهي، اسان به شهيدن جا وارث آهيون ۽ سندن تڪليف جو احساس آهي. ان موقعي تي طاهر القادري چيو ته رپورٽ سامهون اچڻ کانپوءِ قاتل ۽ رٿابندي ڪندڙ بي نقاب ٿيا.27

 

وزيراعظم ماس ٽرانزٽ اٿارٽي جي قيام جي منظوري ڏئي ڇڏي

اسلام آباد (اين اين آءِ) وزيراعظم شاهد خاقان عباسي ڪيپيٽل ماس ٽرانزٽ اٿارٽي جي قيام جي اصولي منظوري ڏئي ڇڏي آهي. اهڙو فيصلو وزيراعظم جي صدارت هيٺ اسلام آباد ۾ ٿيل ميٽرو بس پروجيڪٽ بابت اجلاس ۾ ڪيو ويو. ڪيپٽل ماس ٽرانزٽ اٿارٽي جي قيام جو مقصد اسلام آباد انٽرنيشنل ايئرپورٽ ۽ جاڙن شهرن جي مرڪزي رهائشي علائقن وچ ۾ هلندڙ ميٽرو بس سروس جي منصوبابندي، آپريشن ۽ سار سنڀال ڪرڻ آهي. وزيراعظم شاهد خاقان عباسي واسطيدار عملدارن کي هدايت ڪئي ته ان بابت ضروري قانون جوڙيو وڃي ۽ پنجاب ماس ٽرانزٽ اٿارٽي جي مثال تي به غور ڪيو وڃي.

 

معاشري جو هر فرد دل سان تسليم ڪري ته قسمت جو فيصلو صرف ئي صرف ووٽ جي ذريعي ئي ٿي سگھي ٿو : پاڪستان جو صدر

اسلام آباد (اين اين آءِ) پاڪستان جي صدر ممنون حسين  چيو آهي ته معاشري جو هرفرد دل سان تسليم ڪري ان جو قسمت جوفيصلو صرف ئي صرف ووٽ جي ذريعي ئي ٿي سگھي ٿو ان لاءِ ضروري آهي چونڊن نظام کي فعال ۽ تيز رفتار ۽ شفاف بڻائڻ سميت ٻارڙن جي ذهن ۾ به ننڍي عمر کان ئي ووٽ جو وقار سمجھائڻ گھرجي. ان مقصد جي لاءِ جيڪڏهن تعيلمي نصاب مان مدد وٺڻ جي ضرورت هجي ته اها به ورتي وڃي، ۽ معاشرتي سطح تي جن قدمن جي ضرورت پوي ته اهي به کنيا وڃن، هن اها ڳالهه ووٽن جي قومي  ڏينهن  جي حوالي سان يوان صدر ۾  هڪ تقريب کي خطاب ڪندي ڪئي، تقريب ۾ وفاقي گھرو وزير ۽ چيف اليڪشن ڪميشن به موجود هئا، صدر چيو ته اڄ اسان عورتن جو قومي ڏينهن ان  سٺي خبر سان ملهائي رهيا آهيون ته اسانجو اليڪٽوريل نظام جديد دور ۾ داخل ٿي ويو آهي هن چيو ته موبائيل فون ايپليڪيشن جي افتتاح کانپوءِ پاڪستان جو هر ووٽر ان جي مدد سان پنهنجي ووت بابت تفصيل  سان آگاهه ٿي سگھندو. چونڊن  نظام ۾ وڌيڪ سڌارو تيز رفتاري ۽ شفافيت جي لاءَ بائيوميٽرڪ ۽ اليڪٽوريل ووٽنگ جھڙا تجربا به ٿي چڪا آهن جيڪي هن شعبي کي جديد گھرجن سان هم آهنگ ڪري ڇڏيندا. هن چيو ته چونڊ نظام جا ٽيڪنيڪي معاملا اهم آهن جن کي بهتر  ڪرڻ لاءِ انهي فڪر ۽ سخت محنت جي ضرورت آهي.  هن چيو ته ٺوس قدمن جو هڪ مطلب اهو به آهي ته اسانجي ذهنن ۾ ووٽ جو حرمت ۽ تقدس آندو وڃِ . اليڪشن ڪميشن پاران هر سال قومي ووٽر ڊي ملهائڻ جوقدم ان سلسلي جي ڪڙي آهي.  صدر ممنون حسين وڌيڪ چيو ته اليڪشن ڪميشن جي قدمن سان خبر پوي  ٿي ته هو چونڊن عمل کي بهتر بڻائڻ لاءِ سول سوسائيٽي سميت رياست جي ٻين ادارن کان به مدد حآصل ڪري رهيو آهي اها سٺي ڳالهه آهي پر ڪڏهن ڪڏهن انگ اکر ۽ ڪاغذن تي نظر ايندڙ اڳڀرائي زميني حقيقتن سان ملندڙ جلندڙ ناهي هوندي. هن چيوته چونڊ قانونن جي بهتري هڪ مسلسل عمل آهي جنهن ۾ پارليمينٽ، سياسي جماعتون، ٿنڪ ٽينڪ ۽ ٻيا معاشري ادارا اهم ڪردار ڪن ٿا. تقريب کي چيف اليڪشن ڪميشن ۽ سيڪريٽري اليڪشن ڪميشن پڻ خطاب ڪيو

 

ڪنهن کي گهر موڪلڻو آهي ته ووٽ سان موڪليو نعرن سان نه: مريم اورنگزيب

اسلام آباد(ويب ڊيسڪ) سڌُ سماءَ واري مملڪتي وزير مريم اورنگزيب جو چوڻ آهي ته پاڪستان ووٽ جي طاقت سان ئي اڳتي ويندو ڪنهن کي گهر موڪلڻو آهي ته ووٽ سان موڪليو نعرن سان نه، ووٽ ئي پاڪستان کي آئين ڏنو آهي. اسلام آباد ۾ تقريب کي خطاب ڪندي مملڪتي وزير مريم اورنگزيب چيو ته پاڪستان چيني ماڻهن جو ٻيو گهر آهي پاڪستاني به چين کي ٻيو گهر سمجهندا آهن، پاڪستان ۽ چين جا لاڳاپا تاريخي ۽ اهميت تي ٻڌل آهن چين پاڪستان جي زندگي جي هر وڏي شعبي ۾ ساٿ ڏنو، جڏهن پوئتي وڃي رهيا هياسين ته چين پاڪستان جو ساٿ ڏنو، سي پيڪ سان پاڪستان جو سلهاڙيل آهي. هن چيو ته پاڪستان امن پسند ملڪ آهي تنهن هوندي اسان جيئن دهشتگردي جو مقابلو ڪيو ان جو مثال ڪٿي به نٿو ملي، دهشتگردي نه رڳو لاڻهن کي پر ثقافت کي به ماريو. وفاقي وزير جو چوڻ هو ته پاڪستان ۾ جمهوريت تقويت ملي رهي آهي جمهوري عمل جو تسلسل اڳتي وڌي رهيو آهي.

 

طاهر القادري انصاف لاءِ روڊن تي نڪتو ته سندس ساٿ ڏينداسين: عمران خان

اسلام آباد (اين اين آءِ) پاڪستان تحريڪ انصاف جي چيرمين عمران خان چيو ته طاهر القادري کي مڪمل سهڪار جو يقين ڏياريان ٿو ماڊل ٽائون سانحِي  جي انصاف لاءِ  رستن تي نڪتا ته ساٿ ڏينداسي، سڀني کي ماڊل ٽائون رپورٽ ڏسڻ گھرجي، شهبازشريف ۽ راڻاثناءَ الله جلد کان جلد استعيفيٰ ڏين، شهبازشريف جو ڪوڙ پڪڙجي پيو  ۽ راڻا ثناءَ الله گوليون هلائڻ جو حڪم جاري ڪيو، ڪيس شهبازشريف ۽ عابد شير علي تي هلائڻ گھرجي، عمران خان چيو ته اسان صاف ۽ شفاف چونڊ لاءِ پرامن احتجاج ڪيو پوءِ به اسان تي الزام مڙهيا ويا، ملٽري ڊڪٽيٽري جي هنج ۾ پلجندڙ منهنجي خلاف ڪيس داخل ڪري رهيا آهن، هڪ سوال تي هن چيو ته اسان   پر امن احتجاج ڪري رهيا   هئاسي، ٻئي پاسي لاهور ۾ شهبازشريف جي حڪم تي هٿين خالي شهرين تي گوليون هلايون ويون تنهنڪري دهشتگردي جا  ڪيس راڻا ثناءَ الله ۽ شهبازشريف تي هلائڻ گھرجن، عمران خان چيو ته ٻنهي کي دهشتگردي جي ڪيس ۾ اندر ڪرڻ گھرجي، عمران خان نوازشريف سان هٿ  ملائڻ جي سوال تي جواب ڏنو ته مان ڏوهارين ۽ قوم جي دشمنن سان هٿ ناهيان ملائيندو، عمران خان ٽرمپ جي بيت المقدس جي حوالي سان قدمن جي سخت مذمت ڪئي ۽ چيو ته فلسطيني مسلمانن تي وڏا ظلم ڪيا ويا آهن، ٽرمپ جھڙا ماڻهون مسلمانن کي انسان ئي نه ٿا سمجھن ۽ ان بابت اسانجي ڪٺ پتلي وزيراعظم کي  طيب اردگان جھڙو موقف اختيار ڪرڻ گھرجي.

 

ڪراچي ۾ 11 مهينن دوران 361 قتل، 28 هزار شهري ڦرجي ويا

ڪراچي (ويب ڊيسڪ) سي پي ايل سي هلندڙ سال 11 مهينن دوران ٿيندڙ ڏوهن جي وارداتن جي لسٽ جاري ڪري ڇڏي آهي، جنهن موجب ڪراچي ۾ جنوري کان نومبر تائين 361 ماڻهن کي قتل ڪيو ويو. شهر ۾ امن امان جي صورتحال جي حوالي سان  سي پي ايل سي 2017ع جي 11 مهينن دوران ٿيندڙ ڏوهن جا انگ اکر جاري ڪري ڇڏيا آهن. سي پي ايل سي جي رپورٽ موجب 11 مهينن دوران 361 ماڻهن کي قتل ڪيو ويو، ڦر ۽ دڳ ويندڙن کان ڦر جي وارداتن ۾ 28 هزار کان وڌيڪ شهري موبائلن ۽ ٻين قيمتي شين کان محروم ٿي ويا، جن جو ڪاٿو 28 ڪروڙ 8 لک رپين کان وڌيڪ لڳايو پيو وڃي. رپورٽ موجب 11 مهينن دوران 24 هزار 154 شهري پنهنجي موٽر سائيڪلن تان هٿ ڌوئي ويٺا، هر هڪ موٽر سائيڪل جي قيمت 40 هزار رپين جي حساب سان مجموعي طور 96 ڪروڙ 61 لک رقم ٻڌائي وڃي پئي، جڏهن ته 13 سئو شهري پنهنجي قيمتي ڪارن کان محروم ڪيا ويا، 7 لک رپين جي ايوريج سان شهري 93 ڪروڙ 17 لک رپين جون گاڏيون وڃائي ويٺا. سي پي ايل سي موجب ڀنگ لاءِ اغوا جا 11 واقعا رپورٽ ڪيا ويا، ڪراچي جي 61 شهرين ڀتا خوري جون شڪايتون ڪيون، جڏهن ته ڦورن شهر جي 8 بئنڪن مان پنهنجا هٿ صاف ڪيا.27