تازيون خبرون

Monthly Archives: November 2017

ڀارتي ڪرڪيٽر ڀونيشر ڪمار شادي جي ٻنڌڻن ۾ ٻڌجي ويو

نئين دلي(اسپورٽس نيوز) ڀارتي فاسٽ بالر ڀونيشور ڪمار شادي جي ٻنڌڻن ۾ ٻڌجي ويو، هن گذريل ڏينهن اڳوڻي پيسر ظهير خان جي شادي جي ڪجهه ڪلاڪن کانپوءِ پنهنجي مڱيندي نوپور نيگر سان شادي ڪئي.ڀونيشور ڪمار سريلنڪا خلاف کيڏيل پهرين ٽيسٽ ميچ ۾ مين آف دي ميچ قرار ڏنو ويو هو جڏهن ته شادي سبب ان کي آئي لينڊرز خلاف آخري 2 ميچن کان رليز ڪيو ويو

 

گلاب ۽ خواب جي وکري وڃڻ جو درد…!!: پروفيسر منير ڊومڪي

لاڙڪاڻي جي اوڀر اتر طرف واقع ننڍڙي شهر مدئجي سان تعلق رکندڙ هڪ معزز تخليقڪار سيد عابد عباس ڪاظمي گھڻ پاسائو نمايان شخصيت آهي.بهترين تنقيد نگار،براڊ ڪاسٽر ۽ زبردست ڪمپيئر ته هو آهي ئي،پرپنهنجي ذات ۾ هو هڪ لائبريري به آهي.سياست هجي،مذهب هجي،سماجيات هجي يا هن جو پسنديده فيلڊ فلسفو ۽ ادب هجي انهن موضوعن تي ڳالهائڻ ۾ سمورو وقت ۽ سج جو رنگ نارنگيءَ مان نيرو ٿي ويندو،پرسائين عابد جو علم کٽڻ جو نالو ئي نه وٺندو. آئون هن سان کائنس پهريون ڀيروان وقت مليس،جڏهن آئون ڪاليج ويندڙشاگرد هئس،پوءِ ان وقت کان وٺي مسلسل ڏهه ورهيه مون بطور ريڊيو اردو ڪمپيئر پنهنجي برجستي براڊ ڪاسٽر سائين عابد عباس ڪاظميءَ سان گڏ ريڊيو پاڪستان لاڙڪاڻي ۾ گذاريا.

سيد عابد ڪاظمي نثر جو نرالو ليکڪ آهي،پر هن جو نظم جي ٻوليءَ تي دسترس به ڪمال جو آهي ۽ خاص ڪري اردو شاعري ڄڻ ته هن جي پنهنجي دل جي ٻولي آهي.اهو ئي سبب آهي جو هڪ سنڌي ڳالهائيندڙ ٿي ڪري،هن اردو شاعريءَ جي فيلڊ ۾ پنهنجي شاعريءَ جي پهرين مجموعي ”خواب هوائون پي لکهون“ سان ڊبنگ انٽري ڪئي آهي.سيد عابد ڪاظمي جنهن جي اردو شاعري جي مجموعي کي پڙهڻ کانپوءِ اردو ادب جي هڪ نامياري نانءُ محترم عطاالحق قاسمي،هن جي شاعري جي ڪتاب جي بيڪ ٽائيٽل ۾ پنهنجي راءِ ڏيندي چوي ٿو ته ”عابد ڪاظمي جي شاعري لطيف طرزِ احساس ۽ معصوم جذبن جي ترجمان آهي،ان جي شاعري کي پڙهي انهيءَ تازگي جو احساس ٿئي ٿو جيڪو شام جي وقت سنڌ ۾ هلندڙ هوائن کان محسوس ٿيندو آهي.“سيد عابد عباس ڪاظمي جي شاعري ڪيترن ئي خصوصيتن سان سرشار آهي.بطور تخليقڪار هو پنهنجي شاعريءَ ۾ سادن لفظن سان به وڏو تخليقي ورتاءُ رکي ٿو.هن جي شاعري ۾ معصوم جذبن جو به ججهو نماءُ آهي.هو شعرن کي سرجڻ وقت پنهنجي لب و لهجي کي وڏي افاديت ڏي ٿو.بظاهرته هن جا لفظ عام ۽ روز مره ٻوليءَ جا لفظ هوندا آهن،پرانهن لفظن جي ظاهري ۽ اندروني معنى کي سمجهڻ لاءِ ڪي پل لڳي وڃن ٿا ۽ انهن لاءِ وڏي عقل و فهم جي ضرورت به هوندي آهي.ڪاظميءَ جي شاعريءَ جي سڀ کان وڏي خوبي اها به آهي ته هو سحرانگيز شاعري ڪري ٿو،هڪ اهڙي قسم جي شاعري،جيڪو ٻڌندڙ يا پڙهندڙ کي ائين ته لڳي ٿو ته اهڙي سادي ۽ دل کي لبها.ئيندڙ شاعري اهي پاڻ به ڪري سگھن ٿا،پر جڏهن ٻڌندڙ يا پڙهندڙ پنهنجو قلم کڻي اهڙي قسم جي شاعري لکڻ جي ڪوشش ڪن ٿا ته پوءِ اهي ان قسم جي شاعري ڪرڻ کان پاڻ قاصر ٿي وڃن ٿا،ڇو ته انهن کي خبر پئجي وڃي ٿي ته اهڙي قسم جي اعلى ۽ منفرد شاعري صرف ان شعر جو شاعر ئي ڪري سگھي ٿو ٻيو ڪو به نه.اڄ اسان هن جي اردوشاعريءَ جي پهرين مجموعي ”خواب هوائون پي لکهون“مان هن جي هڪ نامياري غزل” سوکهه ڪر اِڪ گلاب بکهرا هي“تي هڪ نظر وجهنداسين.

سوکهه ڪر اِڪ گلاب بکهرا هي،

جاني ڪس ڪا يه خواب بکهرا هي؟

شاعرعابد عباس ڪاظمي جي هن غزل جي پهرين بند يعني مطلع ۾ ئي هڪ گھري فڪر جو جامع اظهار ڪيو ويو آهي.هن مٿين شعر ۾ بظاهر ته پڙهندڙن کي ائين لڳي ٿو ته هڪ گلاب جي گل جي مرجهي وڃڻ جي ڳالهه ڪئي وڃي ٿي،جنهن گلاب جي گل  سان ڪنهن جو خواب سلهاڙيل هو.پر شاعر جو وکريل گلاب مان مراد دراصل! محبت آهي،اها به اجڙيل ۽ وکريل حالت ۾!!

شاعرڪاظمي هڪ وکريل گل جي ذريعي هن بند ۾ نه فقط ظاهري اجڙيل ويران محبت جو نوحو ٻڌائي ٿو،پرساڳئي وقت پنهنجي شاعرانه ڏانءُ سان ڪتب آندل استعارن”گلاب“ ۽ ٻي سٽ ۾”خواب“ جي ذريعي محبت جي ابدي ۽ حقيقي فطرت کي به ايڪسپلور ڪري ٿو، محبت جي اها ابدي فطرت ته ”ساٿ ڪيسين محبتون رهنديون؟“هڪ گلاب جو گل ڪڏهن اڀرندو،ٽڙندو۽ ٻهڪندو آهي؟جڏهن بهارجي موسم هوندي آهي،پر بهار کانپوءِ ان گل جو اجڙڻ اڻ ٽر هوندو آهي.نئون تازو گل هوندو آهي ته پوءِ ان جو تازگي ۽ خوشبوءِ به وڻندڙ هوندي آهي.نئون گل ٽڙي،پوءِ مرجهائجي ۽ پوءِ ختم ٿي ويندو آهي ائين ئي نئي حب جو تعلق گرم ۽ جوشيلن جذبن سان هوندو آهي ۽ انساني محبت به جذبن ۽ حالتن جي رحم ڪرم تي آهي،جيڪي جذبا ۽ حالتون ڪڏهن به ساڳيون ۽ مستقل نٿيون رهن.ڇڙوڇڙ ٿيل گلاب مان ٻيو اهو به مطلب آهي ته محبوبا جي حالت به اجڙيل ويران آهي،اها مها گل جيڪا ڪنهن ديواني جو خواب هوندي هئي.جڏهن مهه جبين ئي اجڙيل ۽ وکريل آهي ته پوءِ پيار وارو خواب ڪيئن رنگين ۽ سالم ٿي سگھي ٿو؟هڪ ديواني لاءِ اها هڪ اهڙي حقيقت هوندي آهي،جيڪا روح کي جهنجهوڙيندڙ هوندي آهي.

ادب ۾ ۽ خاص ڪري شاعريءَ ۾ گلاب جو گل هڪ مڪمل، پرسڪون ۽ هم آهنگ دنيا جي علامت طور به ڪتب آندو ويندو آهي.جيڪڏهن ڪو گلاب مرجهائجي وکري ويو آهي ته ان جو مطلب ته دنيا مان هم آهنگي به ختم ٿي وئي آهي ۽ خواب وکري ويو آهي ته ان جو مقصد ڪنهن جو ته اهو خواب هو،جيڪو انسانن جي آباد ڪيل هن سڄي دنيا کي هڪ ڪرڻ پئي چاهيو ٿئي،پر افسوس ته ان ماڻهوءَ جو اهو خواب پورو نٿي سگھيو ۽ اهو خواب منتشرٿي ويو!!

جيئن ته گلاب مرجهيل ۽ خواب وکريل آهي،شاعر جي اهڙن سنجيده جذبن جي عڪاسي مان اهو به مراد آهي ته سونهن به پنهنجي فطرت ۾ فاني آهي.”گلاب“ يعني محبوبا جيڪا ڪنهن وقت ۾ پنهنجي زيب و زينت جي ڪري سڃاتي ويندي هئي، هاڻي اها ان ساڳي شڪل و صورت ۾ نه رهي آهي ۽ آشنا جو اهو خواب ته سجني هميشه پنهنجي جواني ۽ سونهن سڀيتا وارين ڏينهن ۾ ئي رهي ۽ هو هن کي هميشه ائين ئي سونهن سورنهن سينگارن ۾ ئي پسندو رهي،هن جو اهو خواب ساڀيان نه پئي ٿي سگھيو،اهو خواب هاڻي وکرجي ويو آهي.

شاعر عابد ڪاظميءَ جي هن غزل جي وڏي خصوصيت اها به آهي ته هن پنهنجي سليس،نرم ۽ ملائم ٻوليءَ جي ذريعي وڏي مهارت سان خيالن جي تسلسل کي برقراررکيوآهي.غزل جي مطلع ۾ جنهن دل نشين جي ڦٽيل سونهن جي پهرين مصرعي” سوکهه ڪر اِڪ گلاب بکهرا هي“ ۾ ذڪر ڪيو ويوآهي پوءِ هن ئي غزل جي ٻي بند يعني ”حُسن مطلع“ ۾ محبوبا جي سونهن ختم ٿيڻ واري ڳالهه جي تصديق ڪئي وئي آهي.اهو به محب کي جڏهن ڪو ٻيو ان جي حُسن بابت سوال ڪري ياد ڏيرائي ٿو ته هن جي سونهن ۾ اها دلفريبي ۽ ڪشش باقي نه رهي آهي:

ڪس ني مارا سوال ڪا پٿر؟

آئيني ڪا جواب بکهرا هي!

شاعر جو هن بند ۾ آئيني کي استعاري ۽ علامت طور استعمال ڪري زندگيءَ جي اصل حقيقت پڻ ٻڌائڻ آهي.آئيني جو ڪم ڇا هوندو آهي؟جسماني طور آئينو روشني جي عڪاسي ڪندو آهي،پراهو انسان کي پنهنجي ظاهري دنيا جي سچ کان به آگاهه ڪندو آهي.هتي هن مٿين بند ۾ آئيني مان مراد اها واقفيت ۽ آگاهي حاصل ڪرڻ آهي ته جنهن زيبائتي صورت تي دلربا جيڪي ناز نخرا ۽ ارڏائي ڏيکاريندي هئي،هاڻي آئيني ۾” جواب بکهرا هي!“ پنهنجي موجده وکريل عڪس کي ڏسي اتي ئي ڄڻ ته جهٽ پل ۾ هن جي زندگيءَ جون هڙ ئي حسين بهارون ختم ٿي خزان ۾ تبديل ٿي ويون هجن!!

اردو شاعر غالب چيو هو ته انسان هزارين خواهشن ڪرڻ واري مخلوق آهي،جنهن جي هر خواهش تي خواه اها خواهش پوري ٿئي يا نه ٿئي،ڄڻ ته زندگي آهسته آهسته کٽندي وڃي ٿي.شاعر عابد عباس ڪاظمي جي غزل جي اڳين سٽن ۾ به اهو ٻڌايو وڃي ٿو ته ،نه فقط هڪ خواهش جي پويان ٻي خواهش ڪندڙ پرننڍڙي حياتي ۾ وڏين خواهشن جي پويان هر وقت ڪنهن بي لغام جانور وانگر بي حس ڊوڙندڙ آدمي کي اها خبر ئي نٿي رهي ته هو ڪيئن پاڻ قدم قدم تي بي حساب وکرجندو وڃي ٿو.

خواهشون ڪو سميٽتي يارو،

آدمي بي حساب بکهرا هي!

ٻن انسانن جي وچ ۾ قائم محبت ۾ سڀ کان وڏي تڪليفده ڳالهه انهن جي زندگيءَ ۾اچانڪ ڪهي آيل جدائي جي بي رنگ موسم هوندي آهي.اهو بي رحم وڇڙي جو واچوڙو جڏهن ايندو آهي ته پوءِ محبوبا جي ڪل ثبات زلف توڙي شباب جو اهو حشر ڪري ڇڏيندو آهي،ڄڻ ته ماڻهو جيئري ئي مئل هجي!

موسم هجر آگيا شايد،

بال بکهري،شباب بکهرا هي!

شاعر عابد عباس ڪاظميءَ جي مٿين غزل جو هي ”بيت الغزل“ آهي.يعني هن جي سڄي مٿين غزل جو فڪري حوالي سان سڀ کان بهترين بند آهي.پڙهندڙن کي هن ئي بند ۾ هڪ ڳوڙهو فلسفو به سمجهايو وڃي ٿو.”هجر“مان هتي مراد ماڻهوءَ جو هن دنيا مان طبعي طور هميشه لاءِ موڪلائي وڃڻ به آهي.ماڻهو جڏهن پنهنجي زميني حياتيءَ جي سڀ حالتن ۽ صورتن جو گھمرو پورو ڪري ٿو،پهريان ننڍپڻ، پوءِ شباب ۽ جواني،پوءِ پيري ۽ پوءِ آخر ۾ هن جو هن دنيا مان ناس ٿي هجر ڪري وڃڻ هوندو آهي.

جيڪڏهن محبت ٻه طرفه ۽ سچيت جي احساسن سان ڀريل آهي ته پوءِ وڇوڙو ٻنهي محبوبا توڙي چاهيندڙ کي هڪ جيڏي سزا ڏيندو آهي.جڏهن هجر جي بي رحم موسم هجي ۽ دل نشين جا وار وکريل ۽ شباب وکريل هانوءَ کي وڍ ڏيندڙ منظر هجي،پوءِ اهو ڪيئن ممڪن آهي ته هن جو چاهيندڙ سالم ۽ سلامت هوندو؟!نه هرگز نه.

خود ڪو هوا سا لگتا هون،

کچهه تو مجهه ۾ جناب بکهرا هي!

(ليکڪ انگريزي ادب جو استاد آهي.)

Muneerdomki84@gmail.com

 

 

ڌرڻي وارن جي سهولتن جي بندش جا حڪم

سپريم ڪورٽ فيض آباد وٽ لڳل ڌرڻي بابت ڪيس جي ٻڌڻي ڪئي. ٻڌڻي دوران جسٽس قاضي فائز عيسيٰ چيو ته ماڻهن کي تڪليف اچي رهي آهي، هڪ ٻار به رستو نه ملڻ جي ڪري فوت ٿي ويو، الله ڪري اهو ٻار اسان کي بخش ڪري، اسان کي صرف اهو ٻڌايو وڃي ته ڪهڙي شريعت ۾ رستو بند ڪرڻ جو ذڪر موجود آهي يا ان جي اجازت ڏنل آهي. جڏهن رياست ختم ٿي ويندي آهي ته فيصلا رستن تي ئي ٿيندا آهن. هڪ وڻ لڳائڻ به نيڪي آهي پر اهو ڪم ڪير به نه ٿو ڪري، اهڙن معاملن سان اسان به پريشان ٿيون ٿا پر گاريون ناهيون ڏيندا، اسلام ۾ اهو ته ڪٿي به ناهي لکيل جيڪو ڪيو پيو وڃي ۽ هي سڀ انا جي لاءِ ڪيو پيو وڃي ۽ انا ۽ تڪبر سڀ کان وڏا گناهه آهن. هن وقت رياست جو ڪنڌ جهُڪيل آهي. ميڊيا اهڙن ماڻهن کي ڇا لاءِ گهرائي ٿي جيڪي انهن جي ها ۾ ها ملائين ٿا، هي ته الٽو چور پاران چوڪيدار کي ڌمڪيون ڏيڻ واري ڳالهه آهي. اسان جي ڪوشش آهي ته معاملو تشدد طرف نه وڃي اسلام ۾ اهڙي ڪا به ڳالهه ناهي لکيل جنهن تي جسٽس قاضي فائز عيسيٰ چيو ته ڇا توهان کي اسلام جو پتو ناهي، پاڪستان به دليل جي بنياد تي ٺهيو ۽ جڏهن دليل جو بنياد ئي ختم ٿي وڃي ته ڏنڊي جي زور تي سٺي ڳالهه به صحيح نه ٿي لڳي، دشمنن جي لاءِ اهو سولو ڪم آهي، ڪٿي باهه لڳائي ڇڏين ۽ اسان پاڻ ۾ وڙهندا رهون، اهو سڀ ڪجهه پنهنجي شهريت جي لاءِ ٿي رهيو آهي، اٽارني جنرل چيو ته ڳالهين جي لاءِ عالمن کي شامل ڪيو آهي جنهن تي جسٽس قاضي فائز عيسيٰ چيو ته توهان هيستائين ڪيترا ڪيس داخل ڪيا آهن. اٽارني جنرل چيو ته 18 ڪيس داخل ڪيا آهن، 169 ماڻهو گرفتار ڪيا آهن. چهلم جي ڪري اسان خون خرابو نه ٿئي چاهيو جنهن تي جسٽس قاضي فائز عيسيٰ چيو ته ڌرڻو هڻندرن کي سهولتون فراهم نه ڪيون وڃن، هاڻي ائين ٿا ڪريون ته ڪيس رستي تي کڻي ٿا وڃون ۽ پوءِ ڪجهه ڪريون ٿا.

ٻڌڻي دوران جسٽس مشير عالم پڇيو ته اٽارني جنرل صاحب توهان رپورٽ جو جائزو ورتو آهي. جڏهن ته جسٽس قاضي فائز عيسيٰ چيو ته رسول پاڪ صه ته مسڪرائڻ کي به صدقو قرار ڏنو آهي پر هتي ته مون کي ڪو به مسڪرائيندي نظر نه پيو اچي، گاريون سرعام ڏنيون پيون وڃن ڇا معاشرو ائين هلندو. جيڪڏهن ڪا شرعي ڳالهه ٿي آهي ته ان جي لاءِ شرعي عدالت موجود آهي، مون کي ڳالهه سمجهه ۾ نه ٿي اچي ته اسلام امن سان پکڙيو آهي يا ڏنڊي جي زور سان. اتحاد، ايمان ۽ تنظيم ڪٿي نظر نه پئي اچي، جنهن کي مرضي پوي ٿي اهو گاريون ڏي ٿي، جيڪڏهن اهي اسلامي ڳالهيون آهن ته مون کي قائل ڪيو وڃي. ڪيترن ئي ڏينهن کان ماڻهن کي تڪليف ٿي رهي آهي جڏهن رياست ختم ٿي ويندي آهي ته رستن تي قتل ٿيندا آهن، اسان ڪنهن کي به تشدد ڪرڻ جو نه چونداسين، آرٽيڪل 5 کي اسان نظرانداز ڪري ڇڏيو آهي، جيڪڏهن آرٽيڪل 5 جي پوئيواري ناهي ڪرڻي ته پوءِ پاڪستان جي شهريت ڇڏي وڃي. ڌرڻي ۾ موبائيل فون هلي رهي آهي، ڌرڻي سبب عدالتي نظام خراب ٿي ويو آهي، ڌرڻي واري پارٽي ته چونڊ به وڙهي ان نالي سان سياسي پارٽي رجسٽرڊ ڪيئن ٿي، حڪومت جو پلان آف ايڪشن ڇا آهي، ڌرڻي وارن کي ڇا حڪومت چانهه پيش ڪندي آهي اسلام جي عظمت تي ڪڏهن به ٺاهه نه ٿيندو. ٻڌايو وڃي ته 17 ڏينهن کان اهي ماڻهو ڪٿان کائي پي عيش ڪري رهيا آهن.ڌرڻي سبب هڪ ٻار لاڏاڻو ڪري ويو جيڪڏهن اها ڳالهه ڌرڻو هڻندڙن کي سمجهه ۾ اچي ها ته اهي توبهه ڪري هليا وڃن ها. ايمبولينس کي رستو ڏيڻ کان اسان جي انا وڏي آهي.

 

خيرپور: ٽرڪ جو مسافر وين سان ٽڪر، 21 ڄڻا اجل جو شڪار، ڪيترائي زخمي

خيرپور (اين اين آءِ) سنڌ صوبي  جي خيرپور ضلعي ۾ شاهه حسين بائي پاس تي ٺيڙي جي هنڌ تي تيز رفتار ٽرڪ مسافر و ين سان ٽڪرائجي وئي جنهن جي نتيجي ۾ 21 مسافر  فوت ۽ ڪيترائي زخمي ٿيا، ريسڪيو ذريعن مطابق ٽرڪ وين مٿان اوندهي  ٿي پئي، جنهن سبب ماڻهون دٻجي فوت ٿي ويا هئا ريسڪيو آپريشن کان پوءِ کين ٻاهر ڪڍيو ويو مسافر وين خيرپور کان سکر وڃي رهي هئي جڏهن ته ڪوئلي سان  ڀريل ٽرڪ پنجاب وڃي رهيو  ٻنهي جي وچ ۾ ٽڪر ٿيو فوتين ۾ راڻي پور ۽ ڀرپاسي جا واپاري به شامل آهن جيڪي خريداري جي لاءِ سکر وڃي رهيا هئا وين  ۾ مسافرن جي سڃاڻپ جي هوالي سان عملدران جو چوڻ هيو ته وين ۾ 40 سالن جو نذير حسين، 26 سالن جو هدايت الله ، 52 سالن جو عبدالرشيد، 30 سالن جو تنوير حسين، 40 سالن جو محمد رمضان، 24 سالن جو نويد، 27 سالن جو ممنوهن داس، 25 سالن جو خليل احمد، 36 سالن جو صدر الدين، 28 سالن جو ٻانهو خان، 27 سالن جو پتنگ علي، 55 سالن جو علي گل، 25سالن جو پرويز، 43 سالن جو امان الله، 24 سالن جو صابل، 23 سالن جو امجد علي، 27 سالن جو پٺاڻ، 35 سالن جو محمد صفدر ۽ 28 سالن جو نديم علي ۽ ٻيا مسافر سوار هئا، خيرپور جي سنيئر سپرينٽيندنٽ پوليس اظفر مهسير مطابق حادثي ۾ بچي ويلن جو چوڻ هيو ته مسافر وين جو ڊرائيور غلط نموني سان ٽرڪ کي اوور ٽيڪ ڪرڻ جي ڪوشش ڪري رهيو هو جنهن سبب هي  حادثو پيش آيو پوليس ٽرڪ ڊرائيور کي گرفتار ڪري ورتو ۽  واقعي جي جاچ شروع ڪئي وئي.

 

توانائي جي چيلنجن تي ضابطو آڻڻ لاءِ عملي بندوبست ڪري رهيا آهيون: شاهد خاقان عباسي

ڪراچي  (اين اين آءِ) وزيراعظم شاهد خاقان عباسي چيوته توانائي بحران تي ضابطو آڻڻ جي لاءِ عملي قدم کڻي رهيا آهيون. حڪومت جيڪو به منصوبو شروع ڪيو اهو مڪمل ڪيو آهي، گيس تي هلندڙ ٽي بجلي گھر جلد ڪم شروع ڪندا. هلندڙ سال پاڪستان جي واڌ جي شرح 5.3 سيڪڙو رهي، ايندڙ سال هي شرح 6 سيڪڙو ٿي ويندي. اهڙن خيالن جو اظهار هن سومر پورٽ قاسم تي ايل اين جي ٽرمينل جي افتتاح جي موقعي تي هڪ تقريب کي خطاب ڪندي ڪيو، ان موقعي تي سنڌ جو گورنر ۽ ٻيا اعليٰ عملدار موجود هئا، وزيراعظم چيو ته 2013 ۾ جڏهن حڪوت سنڀالي ته ملڪ ۾ توانائي جو سخت بحران هيو جنهن تي ضابطو آڻڻ جي لاءِ گيس کي نظام ۾ شامل ڪرڻ جي رٿابندي ڪئي.، پاڪستان گيس پورٽ ڪنسورشيم جي سهڪار سان ٽرمينل لڳايو ۽ اقبال زيڊ احمد محنت سان ٽرمينل منصوبي کي مڪمل ڪيو، ان  ڪنسورشيم  چين ، جاپان ۽ يورپ جون ڪمپنيون شامل آهن هن چيو ته پاڪستان ۾ ايل اين  جي  سڀ کان سستو ٻارڻ آهي اسان مختلف ذريعن سان بجلي حاصل ڪرڻ جي ڪوشش ڪري رهيا آهيون ۽ توانائي جي گھرج پوري ڪرڻ جي لاءِ منصوبا مڪمل ڪيا پيا وڃن، هن چيو ته بجلي جي کوٽ سبب صارفين ۽ صنعتون متاثر ٿي رهيون آهن ۽ ڀاڻ جا ڪارخانا ۽ گھريلو صارفين کي گيس جي کوٽ هئي، گيس تي هلندڙ ٽي بجلي گھر جلد ڪم شروع ڪندا. هن چيو ته ٻئي ايل اين جي ٽرمينل لڳائڻ سان اسانکي  جھجھي گيس مهيا ٿيندي، ملڪ ۾ گيس سان بجلي پيدا ڪندڙ وڌيڪ بجلي گھر به لڳي رهيا آهن. وزيراعظم چيو ته گيس پلانٽ، سي اين جي ۽ صنعتي ضرورتن سبب گيس جي گھرج هڪ پي سي ايف آهي. ايندڙ ٽن سالن ۾ ايل اين جي جي گھرج 30 ملين ٽن کان وڌي ويندي، هن چيو ته اميد آهي ته ملڪ ۾ وڌيڪ ايل اين جي  ٽرمينل لڳندا.  هن چيو ته حڪومت جو ڪم ڪاروبار ڪرڻ ڪم ناهي پر  ريگوليٽري فريم ورڪ فراهم ڪرڻ آهي، هن چيو ته پاڪستان جي صوبن ۾  سيڙپ جا بيشمار منصوبا موجود آهن ۽ ايل اين جي ۾ تمام گھڻي سيڙپ ٿي سگھي ٿي، سيڙپڪار ايل اين جي سميت مختلف شعبن ۾ پاڪستان جي سيڙپ ڪن حڪومت کي  مراعتون ۽ تحفظ ڪندي. وزيراعطم چيو ته ڪوئلي سان تيار ٿيندڙ 360 ميگا واٽ بجلي گھر جو منصوبو مڪمل ٿيڻ وارو آهي ان سان وڌيڪ بجلي گھر تيار ڪيا پيا وڃن، هي بجلي گھر تيار ٿيڻ سان توانائي جو بحران  ختم ٿيندو پاڪستان ترقي  ڪري رهيو آهي.

 

پاڪستان کي ترقي يافته ملڪ بڻائينداسين: بلاول ڀٽو زرداري

هالا(ويب ڊيسڪ) پاڪستان پيپلز پارٽي جي چيئرمين بلاول ڀٽو زرداري هالا ۾ مخدوم امين فهيم ورسي جي موقعي تي مخدوم محمد زمان ميڊيڪل ڪاليج جي پيڙهه جو پٿر رکيو. مخدوم امين فهيم جي ورسي جي موقعي تي تقريب کي خطاب ڪندي بلاول ڀٽو زرداري چيو ته سنڌ حڪومت جو صحت جي شعبي کي اهميت ڏيڻ ڀيٽا پيش ڪرڻ جوڳو آهي، سول اسپتال ڪراچي ۾ ٽراما سينٽر قائم ڪيو آهي. هن چيو ته هالا جهڙن ننڍن شهرن ۾ بڻجندڙ ميڊيڪل ڪاليج هتان جي ماڻهن کي انهن جا حق ڏيندو جڏهن ته سکر ۾ ڪڊني سينٽر قائم ڪيو ويو آهي، سکر جي ڪڊني ٽرانسپلانٽ سينٽر سڀني جو مفت ۾ علاج پيو ٿئي. هن چيو ته پيپلز پارٽي جي بنياد لاهور ۾ وڌي وئي پر پهريون ڪنوينشن هالا ۾ رکيو ويو. هالا ميڊيڪل ڪاليج اهڙي شخص جي نالي تي بڻجي رهيو آهي جيڪو پنهنجي ذات ۾ انجمن هو، مخدوم امين فهميد پنهنجي والد جي روايتن جو امين بڻيو، پاڪستان کي ترقي يافته ملڪ بڻائينداسين جڏهن ته مخدوم جميل الزمان ۽ آئون هڪ ئي روايت جا امين آهيون. هن چيو ته اسان مخدوم صاحب کي ڪڏهن به وساري نٿا سگهون، سنڌ ۾ 100 ارب رپين  جا ترقياتي منصوبا شروع ڪيا، پاڪستان کي ترقي پنسد ملڪ بڻائينداسين. هن وڌيڪ چيو ته  پيپلز پارٽي هر دور ۾ نوجوانن کي روزگار ڏنو، پيپلز پارٽي روايتي سياسي پارٽي پارٽي نه پر هڪ خاندان آهي.

 

سڄي ملڪ ۾ مدرسن جي ڊيٽا نئين سر مرتب ڪرڻ جو فيصلو

ڪراچي(ويب ڊيسڪ) حڪومت سڄي ملڪ ۾ مدرسن جي ڊيٽا نئين سر مرتب ڪرڻ جو فيصلو ڪيو آهي. حڪومت سڄي ملڪ ۾ مدرسن جا گڏيل ۽ مڪمل دستاويز جمع ڪرڻ لاءِ سروي شروع ڪري ڇڏيو آهي. سنڌ جي 10 ضلعن ۾ 100 کان وڌيڪ غير رجسٽرڊ مدرسن کي پهرين ئي بند ڪيو ويو آهي مدرسن جي ڊيٽا نئين سر مرتب ڪرڻ جي پروگرام ۾ مدرسن جي فنڊن جو رڪارڊ، عالمن ۽ استادن جي ڊيٽا به چيڪ ڪئي ويندي جڏهن ته غير رجسٽرڊ مدرسن کي نوٽس به جاري ڪيا ويندا جيئن هو پنهنجي رجسٽريشن في فوري طور ادا ڪرائن، واچ لسٽ ۾ شامل مدرسن جي اثاثن، پرڏيهي شاگردن جي انگ، فنڊن، خرچن ۽ تعليم هيٺ شاگردن جي جماعتي وابستگي کي به چيڪ ڪيو ويندو، سنڌ ۾ مدرسن جو انگ 9590 جي لڳ ڀڳ آهي جن مان تقريبن 6500 مدرسن جي رجسٽريشن مڪمل ٿي چڪي آهي، باقي مدرسن جي رجسٽريشن جو عمل جاري آهي ۽ مدرسن جي انتظاميا جو چوڻ آهي ته مدرسن جي رجسٽريشن جي پيچيده طريقيڪار جي ڪري مدرسن جي انتظاميا کي ڏکيائين کي منهن ڏيڻو پيو پوي. مدرسن جي رجسٽريشن جي مختلف مرحلن دوران مدرسن جي اتنظاميا کي گهرو وزارت، پوليس کاتي ۽ ٻين کاتن جا چڪر لڳرايا ويندا آهي ۽ انهن کان رشوت به طلب ڪئي ويندي آهي، ڪجهه وڪيل ۽ بروڪر مدرسن جي رجسٽريشن جي مڪمل فائل تيار ڪرڻ ۽ ضروري ڪاغذن ڏيڻ لاءِ مدرسن جي انتظاميا کان هڪ لک رپين تائين رشوت طلب ڪندا آهن. انگن اکرن موجب سڄي ملڪ ۾ رجسٽرڊ مدرسن جو انگ 35 هزار جي لڳ ڀڳ آهي جنهن ۾ 40 لک کان وڌيڪ شاگرد ۽ شاگرديون تعليم حاصل ڪري رهيون آهن، وفاق المدارس العربيه تحت مدرسن جو انگ تقريبن 19 هزار جي لڳ ڀڳ آهي جن ۾ تعليم هيٺ شاگردن ۽ شاگردياڻين جو انگ 25 لک جي لڳ ڀڳ آهي. تنظيم المدارس جي تحت سڄي ملڪ ۾ مدرسن جو انگ تقرين ساڍا 8 هزار آهي، وفاق المدارس السلفيه پاڪستان تحت ديني مدرسن جو انگ 2400 کان وڌيڪ آهي.

 

ڪراچي ۾ مڪمل امن قائم ڪرڻ تائين آپريشن بنا فرق جاري رهندو : وزير اعظم

ڪراچي  (اين اين آءِ) وزيراعظم شاهد خاقان عباسي سان سنڌ جي وڏي وزير سيد مراد علي شاهه سومر جي صبح گورنر هائوس ۾ ملاقات ڪئي ۽ گڏ ناشتو ڪيو ان موقعي تي سنڌ جو گورنر به موجود هيو، سنڌ جي وڏي وزيراعظم کي ايپڪس ڪميٽي جي فيصلن ۽ ان تي عملدرآمد کان آگاهه ڪيو ٽنهي اڳواڻن جي وچ ۾ ملاقات اٽڪل پوڻا ٻه ڪلاڪ ٿيندي رهي . ملاقات ۾ صوبي جي صورتحال ۽ امن امان وفاق تحت ٿيندڙن منصوبن ۾ اڳڀررائي معاشي اقتصادي ۽ واپاري سرگرمين سميت اهميت وارن معاملن تي خيالن جي ڏي وٺ ڪئي وئي، ملاقات ۾ وزيراعظم چيو ته ڪراچي ۾ مڪمل امن قائم ڪرڻ تائين آپريشن بنا فرق جاري رهندو هن چيو ته وفاق سڄي ملڪ جي برابر ترقي جي سوچ تي قائم آهي. عوام جي جان ۽ مال جي تحفظ ۽ هر قسم جون سهولتون ڏيڻ حڪومت جي پهرين ترجيح آهي، وزيراعظم چيو ته ڪراچي جي امن امان صورتحال بهتر ڪرڻ جي لاءِ وفاقي حڪومت سنڌ حڪومت سان مڪمل سهڪار ڪري رهي آهي جڏهن ته سنڌ جي ترقي جي لاءِ به وفاق سهڪار ڪندو، جڏهن ته ٽنهي اڳواڻن جي وچ ۾ سياسي صورتحال تي به ڳالهه ٻولهه ڪئي وئي. وزيراعليٰ هائوس جي ترجمان موجب وزيراعظم سان ملاقات ۾  وڏي وزير ايپڪس ڪميٽي جي فيصلن ۽ ان تي عملدرآمد کان آگاهه ڪيو، جڏهن ته ڪراچي ۾ اپريشن ۽ امن امان جي صورتحال کان پڻ آگاهه ڪيو، وڏي وزير وزيراعظم کي ڪي سي آر متعلق رنڊڪن بابت پڻ ٻڌايو.

 

نواز شريف جو اسپيڪر اياز صادق سان ٽيليفونڪ رابطو، پارٽي صدارت کان روڪڻ وارو بل رد ڪرائڻ جي هدايت

لاهور(ويب ڊيسڪ) اڳوڻي وزير اعظم نواز شريف قومي سان قومي اسيمبلي جي اسپيڪر سردار اياز صادق ٽيليفونڪ رابطو ڪيو جنهن ۾ نااهل شخص کي پارٽي سربراهي واري بل سميت ٻين معاملن تي ڳالهيون ڪيون ويون. ميڊيا رپورٽن موجب ڳالهه ٻولهه دوران اڳوڻي وزير اعظم ن ليگ جي قومي اسيمبلي جي ميمبرن جي سڀاڻي حاضري يقيني بڻائڻ جو ٽاسڪ ڏنو. نواز شريف کي پارٽي صدارت تان هٽائڻ جو بل پيش ٿيڻ جا امڪان آهي، اڳوڻي وزير اعظم هدايت ڪئي آهي ته ليگي ميمبرن جي حاضري يقيني بڻائي وڃي ۽ پارٽي صدارت جو بل رد ڪرائڻ جي ڀرپور ڪوشش ڪئي وڃي.

 

اسلام آباد ۾ ڌرڻو حڪومت جي ڪمزوري ۽ عملداري ختم ٿيڻ جي نشاندهي قرار، ڊار استعيفا ڏئي: خورشيد شاهه

سکر (اين اين آءِ) قومي اسيمبلي ۾ مخالف ڌر جي اڳواڻ سيد خورشيد شاهه وفاقي ناڻِي واري وزير اسحاق ڊار  کان استعيفيٰ ڏيڻ جو مطالبو ڪندي چيو آهي ته کيس اخلاقي ۽ سياسي جرئت جو مظاهرو ڪندي جلدي استعيفيٰ ڏيڻ گھرجي، ميان صاحب غير آئيني رستو نه وٺي وڌيڪ ڦاسي ويندو، رفرنڊم جو مطالبو غير آئيني آهي. ڌرڻون حڪومتي ڪمزوري ۽ رٽ ختم ٿيڻ جي نشاني آهي حڪومت کي جيڪڏهن ايڪشن ناهي وٺڻون ته حڪومت ڇڏي ڏيڻ گھرجي، ڌرڻي سان ماڻهون سخت پريشان آهن جنهن تي افسوس آهي، تاريخ ۾ پهريون ڀيرو پ پ جي حڪومت پنهنجو آئيني مدو پورو ڪيو، سومر تي سکر ۾ ميڊيا سان ڳالهائندي سيد  خور شيد شاهه چيو ته افسوس جھڙي ڳالهه آهي  ڪجھه ماڻهن اسلام آباد کي بند ڪري ڇڏيو آهي جنهن سبب عام شهري پريشاني کي منهن ڏئي رهيا آهن، اسلام آباد ۾ ويهه لک ماڻهون رهن ٿا ۽ هتي سڄي دنيا جا ماڻهون اچن وڃن ٿا، حڪومت جيڪڏهن مظاهرو ڪندڙن جي خلاف ايڪشن نه ٿي کڻڻ چاهي  ته حڪومت ڇڏي ڏيڻ گھرجي هن چيو ته وقت کان اڳ اليڪشن جو مطالبو غير ضروري آهي ، عمران خان ريفرنڊم جو حامي رهيو آهي  جيڪڏهن نوازشريف ان جي ڳالهه ڪئي آهي ته  هو خود غير آئيني رستي تي هلي رهيو آهي جنهن سان هو وڌيڪ ڦاسي ويندو. عمران خان تي تنقيد ڪندي مخالف ڌر جي اڳواڻ چيو ته ڪي پي ڪي ڏسو ته سندس ڪارڪردگي ڇا آهي عمران خان جي حڪومت ۾ هڪ عورت کي انصاف نه پيو ملي، عمران خان کي پوليس کي غير سياسي ڪرڻ جو پول کلي ويو آهي داوڙ ڪنڊيءَ ڪا غلط  ڳالهه نه ڪئي آهي هن چيو ته وقت کان اڳ اليڪشن ٿيڻ يا نه ٿيڻ جو خواب منظور وساڻ ڏٺو آهي ۽ اهو ئي ان جي تعبير ٻڌائي سگھي ٿو، هر اليڪشن ۾ الائينس ٺهي ٿو پوءِ ٽٽي وڃي ٿو، پ پ ڪارڪردگي جي بنياد تي اڳيان وڌندي، خور شيد شاهه چيو ته اسان ملڪ ۾ صاف سٿري سياست ڪرڻ ڇاهيون ٿا ۽ ڪنهن جي معاملي ۾ مداخلت جا نتيجا سٺا ناهن هوندا، خور شيد شاهه چيو ته رياست  ۾ رياست ۽ ادارن ۾ ادارن هجڻ گھرجن، حڪومت جي رٽ ڪٿي به نظر نه ٿي اچي بنيادي مسئلن جو حل عوام جو حَق آهي. هن چيو ته پاڪستان جي تاريخ ۾ پهريون ڀيرو پ پ جي حڪومت پنج سال مدو پورو ڪيو ۽ پهريون ڀيرو ملڪ خاص طور تي سنڌ  کي ترقي وٺرائي هاڻي به ڪوشش آهي ۽ چاهيون ٿا ته موجوده حڪومت به پنهنجو آئيني مدو پورو ڪري. مطالبا ڪرڻ سياسي جماعت جو حق آهي.  هڪ سوال تي خور شيد شاهه چيو ته اهو چوڻ درست ناهي ته پرويز مشرف کي عدالتن ٻاهر وڃڻ ڏنو نوازشريف پاڻ پرويز مشرف کي ٻاهر وڃڻ جي  اجازت ڏني ۽ هو ان حوالي سان پنهنجي اڳوڻي گھرو وزير کان سوال ڪري.