تازيون خبرون

Daily Archives: November 4, 2017

نئون اين آر او نه پيو اچي، پويون اين آر او پ پ ۽ مشرف وچ ۾ هو: نواز شريف

اسلام آباد( ويب ڊيسڪ ) احتساب عدالت اڳوڻي وزيراعظم نواز شريف خلاف داخل ريفرنسنز جي ٻڌڻي 7 نومبر تائين ملتوي ڪري ڇڏي، عدالت کيس حاضري کان آجو قرار نه ڏنو آهي. احتساب عدالت ۾ اڳوڻو وزيراعظم نواز شريف، سندس نياڻي مريم نواز ۽ نياڻو ڪيپٽن صفدر عدالت ۾ پيش ٿيا. ٻڌڻي جي شروعات ۾  ئي احتساب عدالت جي جج محمد بشير اسلام آباد هاءِ ڪورٽ طرفان گذريل ڏينهن ڪيل فيصلي جي ڪاپي جي عدم موجودگيءَ سبب ٻڌڻي 15 منٽن لاءِ ملتوي ڪئي.  ٻڌڻي جي شروعات تي اڳوڻي وزيراعظم جي وڪيل عدالت کي درخواست ڪئي ته جيستائين فيصلي جي ڪاپي نه ٿي اچي اڱاري تائين ٻڌڻي ملتوي ڪئي وڃي. جج محمد بشير چيو ته توهان آپريشن نه ٿيو، فيصلي جي ڪاپي گهرائي ٿا وٺون. نواز شريف پيشي دوران اهم دستاويز به گڏ آندا جڏهن هن عدالت ۾ عزيزيه ۽ فليگ شپ ريفرنس ۾ 50، 50 لک رپين جا 2 ضمانتي مچلڪا به جمع ڪرائي ڇڏيا. هن عدالت ۾ حاضري يقيني بڻائڻ لاءِ اهي ضمانتي مچلڪا جمع ڪرايا. پيشيءَ جي موقعي تي احتساب عدالت ٻاهران سڪيورٽي انتظام سخت ڪري وڏي انگ ۾ اهلڪارن کي مقرر ڪيو ويو. مسلم ليگ ن جي عورت اسيمبلي ميمبرن عدالت ۾ وڃڻ جي اجازت نه ملڻ تي سخت احتجاج ڪيو. عدالت طرف ويندڙ ڪشمير هاءِ وي کي عام ٽريفڪ لاءِ بند ۽ رستن کي ڪنڊيدار تارون لڳائي سيل ڪيو ويو. جوڊيشل ڪمپليڪس ٻاهران نواز شريف ۽ مريم نواز جي حق ۾ بينر پڻ لڳايا ويا.  ٻئي طرف اڳوڻي وزيراعظم نواز شريف چيو آهي ته مان نظريا ضرورت ايجاد ڪندڙ عدليه جو حامي نه آهيان، ملڪ جو عدالتي نظام درست هئڻ گهرجي. احتساب عدالت ٻاهران ميڊيا سان ڳالهائيندي نواز شريف چيو ته هي ڪيس ڇا آهن کيس سمجهه ۾ ڳالهه نه اچي رهي آهي، جڏهن سپريم ڪورٽ جي ججن پاڻ چئي ڇڏيو آهي ته ڪرپشن جو ڪيس ناهي ته سمجهه ۾ نه ٿو اچي ته اسان پيشيون ڇو ڀوڳي رهيا آهيون. هن چيو ته ڪرپشن، ڪڪ بيڪس يا رشوت وٺڻ جا ڪيس آهن، ڪجهه سمجهه ۾ نه اچي رهيو آهي، ڇا ان ڳالهه جي سزا ڏني پئي وڃي ته ملڪ مان لوڊشيڊنگ ختم ٿي رهي آهي، ڇا ان ڳالهه جي سزا ته ناهي ته ملڪ مان ختم دهشتگردي ختم ٿي رهي آهي. سندس چوڻ هو ته ڇا ان ڳالهه جي سزا آهي ته سي پيڪ مان ملڪ ۾ سيڙپڪاري اچي رهي آهي، ڪراچي ۾ امن ۽ معيشت کي مضبوط ڪرڻ جي سزا ته نه ملي رهي آهي، جڏهن ته جيڪو به ٿي رهيو آهي ڇا  ڪنهن ملڪ ۾ ائين ٿيندو آهي. نواز شريف چيو ته اسٽاڪ ايڪسچينج تاريخ ۾ ڪڏهن ايتري بلند ترين سطح تي نه پهتي، ملڪ ۾ رڪارڊ ترقي ٿي، پرڏيهي ناڻي جي مٽاسٽا جي ذخيرن ۾ اضافو ٿيو، اسان ملڪ ۾ معيشت کي ٺيڪ ڪيو ڇا سي پيڪ جي سيڙپڪاري ۽ ڪراچيءَ ۾ امن آڻڻ جي سزا ڏني پئي وڃي. هن چيو ته ڪابه ڊيل نه ٿي رهي آهي، اين آر او جي حوالي سان ڪابه شيءَ نه هلي رهي آهي، ٽيڪنو ڪريٽ حڪومت جو 17 سالن کان ٻڌي رهيو آهيان، عدالتن ۾ هزارين ڪيس التوا هيٺ آهن، ڪڏهن به نه ٻڌو ته سپريم ڪورٽ جو جج نگراني ڪري رهيو آهي، توهين عدالت ٻاهران نه پر اندران به ٿيندي آهي، عدالتي نظام درست هئڻ گهرجي. سندس چوڻ هو ته شريف خاندان ۾ ڪي به اختلاف نه آهن، ڪجهه ماڻهن کي ٻاهران اختلاف ڏسڻ جي خواهش آهي، نظريه ضرورت ايجاد ڪندڙ عدليه جا حامي نه آهيون، آزاد ۽ غير جانبدار عدليه لاءِ جدوجهد ڪئي، ٽڪراءَ جي ڳالهه ٿيندي آهي، جيڪي اسان کي ٽڪر هڻن ٿا انهن کان ڪير به نه ٿو پڇي، جڏهن به مارچ ايندو آهي ته مارچ جا افواهه گرم ٿي ويندا آهن. نواز شريف چيو ته آصف علي زرداري مون کي گاريون نه پيو ڏي پر ڪنهن ٻي کي خوش ڪري رهيو آهي، اهڙي وقت ۾ جمهوري پارٽين کي متحد رهڻ گهرجي.

 

 

نواز شريف کي هڪ ڀيرو جمهوريت خاطر بچايو ٻيهر نه بچائينداسين: پيپلز پارٽي

اسلام آباد/لاهور ( ويب ڊيسڪ ) مخالف ڌر جي اڳواڻ خورشيد شاهه چيو آهي ته جمهوريت لاءِ نواز شريف کي هڪ ڀيرو بچايو هو پر هاڻي ڪنهن به صورت ۾ نه بچايو ويندو. اڳوڻي وزيراعظم نواز شريف جي آصف علي زرداريءَ بابت بيان تي رد عمل ۾ خورشيد شاهه چيو ته نواز شريف اهو ڏينهن ياد ڪري جڏهن هن آصف زرداريءَ سان ملاقات کان انڪار ڪيو، نواز شريف به تنهن وقت ڪنهن کي خوش ڪرڻ لاءِ ملاقات نه ڪئي هئي. هن چيو ته نواز شريف ٻڌائي ته هن تنهن وقت ڪنهن کي خوش ڪرڻ لاءِ ايئن ڪيو هو، ميان صاحب اهو مڪافات عمل آهي. سندس چوڻ هو ته  هاڻي نواز شريف ڦاٿل آهي، جمهوريت تي ڏکيو وقت ناهي، نواز شريف پنهنجي ڏکيائن جو بار جمهوريت تي نه وجهي. خورشيد شاهه چيو ته اسان بار بار چيو ته پارليامينٽ کي اعتماد ۾ وٺو پر هن ڳالهه ٻڌڻ کان انڪار ڪيو، جمهوريت بچائڻ لاءِ اسان پهريون به نواز شريف کي هڪ ڀيرو بچايو پر هاڻي ڪنهن صورت ۾ نه بچايو ويندو.  سينيٽ ۾ مخالف ڌر جي اڳواڻ چوڌري اعتزاز احسن چيو آهي ته نواز شريف عدليه ۽ اسٽيبلشمينٽ سان گڏجي اسان کي نقصان پهچايو، هاڻي ساڻس گڏ ويهڻ مشڪل ٿي ويو آهي. اسلام آباد ۾ ميڊيا سان ڳالهائيندي چوڌري اعتزاز احسن چيو ته نواز شريف ۽ سندس نياڻي مريم نواز ڀت ٽوڙي نڪرڻ جي ڪوشش ڪري رهيا آهن پر هاڻي ريفرنسن ۾ سندن خلاف فيصلو لازمي آهي هو مشڪل ۾ آهن پر جمهوريت کي ڪو به خطرو ناهي. هن چيو ته نواز شريف هميشه فوج، عدليه ۽ اسٽيبلشمينٽ سان گڏجي جمهوريت کي نقصان پهچايو، جنرل اسلم بيگ سان ملي بينظير ڀٽو جي حڪومت خلاف نواز شريف ئي کڙو ٿيو، ججن تي دٻاءُ وجهي بينظير کي سزا ڏياري، يوسف رضا گيلاني کي نااهل قرار ڏيڻ ۾ به سندس هٿ هو. سندس چوڻ هو ته هڪ عرصي کان چئي رهيو آهيان ته نواز شريف شيڊول باسڪنگ ڪري رهيو آهي، کيس هر پردي ۽ ڪنڊ پويان ڀوت نظر اچي رهيو آهي، سندس پنهنجي حڪومت هئڻ باوجود چئي رهيو آهي ته سندس خلاف سازش ٿي رهي آهي. چوڌري اعتزاز احسن چيو ته هو ٻڌائي ته حڪومت سندس پنهنجي آهي ته جمهوريت کي خطرو ڪيئن ٿو ٿي سگهي، نالو وٺي ته آصف علي زرداري ڪنهن جي چوڻ تي سندس خلاف ڳالهائي رهيو آهي.  پ پ ترجمان چوڌري منظور چيو آهي ته نواز شريف هميشه پ پ سان دوکو ڪيو آهي. هڪ بيان ۾ پ پ ترجمان چوڌري منظور چيو ته نواز شريف جي ٽڪراءُ اختيار ڪري معافيون وٺڻ جي ڊگهي تاريخ آهي، ڪيترائي ڀيرا نواز شريف هٿان ڏنگيا وياسين، هاڻي دوکو نه کائينداسين. هن چيو ته اسان کي اڳتي ڪري نواز شريف پرويز مشرف کي پرڏيهه موڪليو. سندس چوڻ هو ته نواز شريف وڪيل بڻجي ميمو گيٽ ۾ پ پ ۽ آصف علي زرداريءَ کي غدار قرار ڏيارڻ لاءِ نڪتو هو. چوڌري منظور چيو ته نواز شريف هڪ ٻيو وڏو دوکو ميمو گيٽ ۾ آصف علي زرداري خلاف ڪارو ڪوٽ پهري ڏنو. هن چيو ته افتخار محمد چوڌري ۽ نواز شريف جي ملي ڀڳت جمهوريت خلاف سازش هئي. سندس چوڻ هو ته اسان جي وزيراعظم کي افتخار محمد چوڌري هٿان نواز شريف گهر موڪليو. چوڌري منظور چيو ته آصف علي زرداري نواز شريف جي ٺاهيل ڪيسن ۾ مشرف جو جيل ڀوڳيندو رهيو. هن چيو ته بينظير ۽ آصف علي زرداري نواز شريف جا ماضي جا ڏوهه معاف ڪري ساڻس هٿ ملايو، نواز شريف پرويز مشرف کان معافي وٺي ٺاهه ڪري پرڏيهه هليو ويو. سندس چوڻ هو ته هٿ ملائي ڇرو هڻڻ ۾ نواز شريف جو ڪو به مٽ ناهي. چوڌري منظور چيو ته گيلاني کي گهر موڪليندڙ روڊن تي پڇي رهيو آهي ته کيس ڇو ڪڍيو ويو آهي. هن چيو ته نوابزاده نصرالله نواز شريف لاءِ چيو هو ته هو سڀني کي کپائي هليو ويو آهي، نواز شريف آصف زرداريءَ بابت ڳالهائڻ کان اڳ پنهنجي ڪردار جو جائزو وٺي. چوڌري منظور چيو ته اسان ڪيترائي ڀيرا نواز شريف کان ڏنگيا آهيون، هاڻي دوکي ۾ نه اينداسين.

 

باجوڙ ايجنسي ۾ مٽي جي ڇپ ڪرڻ سبب 8 ڄڻا فوت

اتمانخيل  (اين اين آءِ) باجوڙ ايجنسي جي تعلقي اتمانخيل ۾ هڪ گهر تي مٽي جي چپ ڪرڻ سان فوتين جو انگ 8 ٿي ويو ۽ ڪيترائي زخمي ٿي پيا، پوليٽڪل انتظاميا موجب مٽي جي ڇپ هيٺان دٻيل ماڻهو گهر ٺاهڻ لاءِ جبل تان مٽي کڻي رهيا هئا ته ان دوران جبل جو هڪ حصو انهن تي ڪري پيو، واقعي کانپوءِ مقامي ماڻهن پنهنجي مدد پاڻ تحت امدادي ڪاررواين دوران 6 ڇوڪرين، هڪ ٻارڙي ۽ هڪ عورت جو لاش ڪڍي ورتو، لينڊ سلائيڊنگ جو اطلاع ملندي ئي ريسڪيو ٽيمون حادثي واري هنڌ پهتيون، فوتين ۾ هڪ عورت، 5 ٻارڙيون ۽ هڪ ٻارڙو شامل آهي.

 

ڪرپشن جي الزام ۾ عدالت ويندڙن کي 40 گاڏين جو پروٽوڪول ڏنو پيو وڃي: عمران خان

ڪوٽ ادو (ويب ڊيسڪ): پي ٽي آءِ سربراهه عمران خان چيو آهي ته جيڪڏهن اسان ووٽ جو صحيح استعمال ڪيو ته ملڪ بڻائي سگهون ٿا، ڪوٽ ادو ۾ جلسي کي خطاب ڪندي عمران خان چيو ته ملڪ ۾ خوراڪ جي کوٽ سبب ٻارڙا مري رهيا آهن، هن چيو ته رستي تي ٻار پيدا ٿي رهيا آهن، ڇو ته اسپتالن ۾ جڳهه ناهي، حقيقي جمهوريت جو مطلب آهي ته ملڪ جو سربراهه عوام کي جوابده آهي، هن چيو ته اسان وزيراعظم خلاف اسپيڪر کي ريفرنس اماڻڻ جو چيو، ان نه اماڻيو، عمران خان چيو ته مان پهرين به هتي آيو آهيان، ڪڏهن اهڙو جذبو ناهي ڏٺو، ننڍڙي ڪرپٽ مافيا هر هر وارا وٺي عوام جو پئسو چوري ڪندي آهي، قوم جي پئسن مان ٻاهرين ملڪن ۾ محل بڻايا ويندا آهن،  هن چيو ته دين جي نالي تي ماڻهن کان ووٽ ورتا ويندا آهن، اٽو، لٽو ۽ اجهو جي نالي تي ووٽ ورتا ويندا آهن، خواجا آصف چوي ٿو ميان صاحب فڪر نه ڪريو قوم جلد وساري ويهندي، هن چيو ته جڏهن قوم ۾ شعور اچي ويندو آهي ته پوءِ اها پنهنجا فيصلا سوچي سمجهي ڪندي آهي، هن چيو ته جڏهن قوم سوچي سمجهي ووٽ ڏيڻ جو فيصلو ڪري ته حقيقي جمهوريت ايندي آهي، جيڪڏهن اسان ووٽ جو ٺيڪ استعمال ڪيو ته ملڪ خوشحال ٿي سگهي ٿو، انهن ماڻهن جون ملڪيتون ٻاهرن آهن، عيدون به ٻاهر ملهائيندا آهن، اسپيڪر نواز شريف خلاف ان لاءِ ريفرنس نه اماڻيو، ته اهو انهن يج گهر جو ماڻهو آهي، عمران خان چيو ته جيڪڏهن حقيقي جمهوريت هجي ها ته وزيراعظم پارليامينٽ ۾ جواب ڏئي ها، پارليامينٽ ۾ هٿ کڻي قانون پاس ڪوي ويو ته ڏوهاري سياسي جماعت جو سربراهه ٿي سگهي ٿو، پارليامينت عوام جا پئسا چوري ڪندڙن جي مدد ڪري رهي آهي، پارليامينٽ وزيراعظم کان جواب طلب نه ڪيو ته اسان کي سپريم ڪورٽ وڃڻو پيو، هن چيو ته حقيقي جمهوريت ۾ قانون جي بالادستي هوندي آهي، سڀ برابر هوندا آهن، ڪرپشن جي الزام ۾ عدالت ويندڙن کي 40 گاڏين جو پروٽوڪول ڏنو پيو وڃي، هن چيو ته پاڪستان ۾ سڀ کان وڌيڪ ٻار خراب پاڻي پيئڻ سبب مري ويندا آهن، 45 سيڪڙو ٻارڙا پوري خوراڪ نه ملڻ تي ذهني ۽ جسماني طور صحت مند ناهن هوندا، عمران خان چيو ته وزيراعظم پارليامينٽ کي جواب ده هوندو آهي، نواز شريف پارليامينٽ ۾ ڪوڙ ڳالهايو، هتي اسپتال ۾ هڪ بيڊ تي 4 مريض آهن، عوام جو پئسو چوري ڪندڙن کي عوام جي پئسن سان ئي پروٽوڪول ڏنو پيو وڃي، جيڪڏهن حقيقي جمهوريت هجي ها ته اهي جواب ڏين ها، انهن ماڻهو ثابت ڪري ڇڏيو ته پارليامينٽ عوام جي نه ڪرپٽ مافيا جي حفاظت ڪري رهي آهي، جمهوريت ۾ قانون جي بالادستي هوندي آهي، بادشاهت ۾ نه، دنيا جي ڪهڙي جمهوريت ۾ ايئن ٿيندو اهي ته عوام جي پئسن سان ڏوهاري کي پروٽوڪول ملي، وڏي دير کان چئي رهيو هيس ته اسحاق ڊار وڏو مني لانڊرر آهي، هاڻي اسحاق ڊار چوي ٿو، منهنجي طبيعت ٺيڪ ناهي، اسحاق ڊار کي مٿي ۾ سور به پوي ته علاج لاءِ ٻاهر ويندو آهي.

 

پرامن پاڪستان موجوده حڪومت جي ڪوششن جو نتيجو آهي: مريم اورنگزيب

اسلام آباد (ويب ڊيسڪ): سڌ سماءَ واري مملڪتي وزير مريم اورنگزيب چيو آهي ته ثقافتي رابطن سان لاڳاپا مستحڪم ۽ مضبوط ٿيندا آهن، هن چيو ته سي پيڪ معاسي، سماجي ۽ ثقافتي رابطن کي وڌائيندو، هن چيو ته ثقافتي رابطن جي ستحڪام سان معاشي لاڳاپا مضبوط ٿيندا، هن چيو ته 2013 ۾ دهشتگردي جو مرض پاڪستان سان ڳنڍيو ويندو هو، پرامن پاڪستان موجوده حڪومت جي ڪوششن جو نتيجو آهي، مريم اورنگزيب چيو ته سي پيڪ ملڪي تاريخ جي سڀ کان وڏي پرڏيهي سيڙپڪاري اهي، هن چيو ته ڪلچرل ڪاروان ۾ پاڪستان ۽ چين جي ثقافتي ڊانسرز فن جو مظاهرو ڪندا، امن امان جي بحالي سان عالمي سطح تي پاڪستان جو مثبت چهرو سامهون اچي رهيو آهي، ڪلچرل ڪاروان ايونٽ جو مقصد اقتصادي راهداري جي رابطي کي اجاگر ڪرڻ آهي.مريم اورنگزيب چيو آهي ته نواز شريف کي وزارت عظميٰ تان ته ڪڍيو ويو پر عوام جي دلين مان نه ٿو ڪڍي سگهجي.  احتساب عدالت ۾ پيشيءَ جي موقعي تي ميڊيا سان ڳالهائيندي مريم اورنگزيب چيو ته اڳوڻو وزيراعظم ملڪ جو اثاثو آهي کيس عوام جي خدمت جي سزا ملي رهي آهي. هن چيو ته جيڪڏهن دل ۾ چور هجي ها ته نواز شريف سپريم ڪورٽ کي خط نه لکي ها، هن پاڻ کي خاندان سميت احتساب عدالت ۾ پيش ڪيو. سندس چوڻ هو ته دهشتگرديءَ جو خاتمو ڪندڙ ليڊر کي ملڪ مان ڀڄڻ جي ضرورت ناهي، هو رڳو ووٽ جي تقدس لاءِ عدالتن ۾ پيش ٿي رهيو آهي.

 

اسان امن بحال ڪري سڄي سنڌ جو انفراسٽريڪچر بهتر ڪيو. روڊ، پليون ٺهرايون ۽ بهترين اسپتال قائم ڪيا: مراد علي شاهه

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته اسان امن جي بحال ڪيو، سڄي صوبي جو انفراسٽريڪچر بهتر ڪيو. آصف علي زرداري جي اڳواڻيءَ ۾ پبلڪ پرائيوٽ پارٽنرشپ تحت روڊن، درياهه تي پليون ٺهرايون ۽ بهترين اسپتال قائم ڪيا. قانون لاڳو ڪندڙ ادارن شهر ۾ وڏين قربانين کانپوءِ امن قائم ڪيو. اسانجي حڪومت پُرامن بقا تي يقين رکي ٿي. اهڙين خيالن جو اظهار هن اڄ پاڪستان ميڊيا ڪلب جي 30 رڪني وفد سان وزيراعليٰ هائوس ۾ ملاقت جي دوران ڪيو. ملاقات ۾ اينڪرز، پروڊيوسرز ۽ ميڊيا سان لاڳاپيل ٻين شخصيتن شرڪت ڪئي. وڏي وزير ان موقعي تي چيو ته پاڪستان ۾ افغان جنگ ٽرننگ پوائنٽ هئي، ان جنگ ملڪي معيشت، سياست ۽ امن امان تي تباهيءَ واري اثر ڇڏيا. ڪلاشنڪوف، هيروئن (منشيات) ۽ شدت پسندي افغان جنگ جو نتيجو آهن، اهو آمر جي ڊڪٽيٽرشپ ڪري ٿيو. وڏي وزير امن امان بابت ڳالهائيدي چيو ته پوليس جيڪو آپريشن ڪيو انهن کي چونڊي چونڊي ماريو ويو، جنهن ڪري 150 کان 200 اهلڪار شهيد ٿيا، پوليس جا حوصلا گهٽجي ويا ۽ آپريشن ڪرڻ لاءِ ڪوبه پوليس آفيسر راضي نه هو. هن وڌيڪ ٻڌايو ته هڪ وڏي جدوجهد کانپوءِ ڪراچي ۾ ٽارگيٽڊ آپريشن شروع ڪيو ويو، ڪراچي ٽارگيٽڊ آپريشن تمام سٺا نتيجا ڏنا. هن چيو ته اسان پوليس جي حوصلي کي بلندي ڪيو آهي؛ پگهارون وڌايون آهن، شهيدن جي گهرڀاتين کي اونرشپ ڏني، معاوضو وڌايو. ڪراچي آپريشن جي ڪاميابي شهرين، پوليس، رينجرز ۽ ڳجهن ادارن جي ڪري ممڪن ٿي. هن چيو ته امن جي بحاليءَ کانپوءِ اسان شهر جي ٻيهر تعمير وارو ڪم شروع ڪيو. ڪراچي اڄ پُرامن، ترقيءَ جي رستي ڏانهن وڌي رهيو آهي. هن چيو ته سنڌ حڪومت ڪم ڪيو آهي ۽ عوام پيپلز پارٽي کي ووٽ ڏنو جنهن جو اهم ثبوت مرتضيٰ بلوچ، حڪيم بلوچ ۽ سعيد غني جي ننڍين چونڊن ۾ ڪاميابي آهي ۽ بلدياتي چونڊن ۾ پڻ وڏي سوڀ حاصل ٿي. ترقي بابت ڳالهائندي هن چيو ته شهيد محترمه بينظير ڀٽو ٿر جي ڪوئلي تي ڪم شروع ڪيو، محترمه بينظير جي سمورن معاهدن کي ختم ڪري ڪول مائننگ جي ڪم کي روڪيو ويو. اسان 2010ع ۾ ٿرڪول مائننگ جو بين الاقوامي ٽرينڊر جي آچ ڪئي پر ڪوبه نه آيو. ان بعد اسان اينگرو سان پارٽنرشپ ڪري سنڌ اينگرو ڪول مائننگ ڪمپني بڻائي، جنهن ۾ 54 سيڪڙو حصيداري سنڌ حڪومت جي آهي. هن چيو ته اڄ ٿر جي ڪوئلي کي هڪ سڃاڻپ ملي آهي ۽ هاڻ بين الاقوامي ڪمپنيون ٿر ۾ سيڙپڪاري ڪرڻ لاءِ قطار ۾ بيٺل آهن. هن چيو ته اسان ٿر جي ڊانچي جي تعمير ڪئي. سيد مراد علي شاهه چيو ته صحت جي شعبي ۾ سنڌ حڪومت گهڻو ڪم ڪيو آهي. جڏهن اسان کي جناح اسپتال (جي پي ايم سي) ملي هئي تڏهن کين بجيٽ 700 ملين رپيا هو ۽ اڄ جناح اسپتال جو بجيٽ 5.8 بلين رپيا آهي. هن چيو ته اين آءِ سي وي ڊي کي مضبوط ڪيو، اين آءِ سي وي ڊي جا سيٽلائيٽ سينٽر سکر، لاڙڪاڻي ۽ ٽنڊي محمد خان ۾ قائم ڪيا آهن ۽ ٻين شهر ۾ پڻ قائم ڪري رهيا آهيون.  اهڙي ريت ايس آءِ يو ٽي جا به سيٽلائيٽ سينٽر قائم ٿي رهيا آهن. هن چيو ته پبلڪ پرائيوٽ پارٽنرشپ تحت صحت جي شعبي ۾ بهتر ڪم ٿي رهيو آهي. گمبٽ انسٽيٽيوٽ آف هيلٿ سائنسز، ٿر جي اسپتال، بدين ۽ ٻين شهر ۾ بهترين اسپتال قائم ڪيا ويا آهن. هن چيو ته اسان امن بحال ڪيو آهي، سڄي صوبي ۾ انفراسٽريڪچر بهتر ڪيو آهي، روڊ رستا، فلاءِ اوور، انڊرپاسز، درياهن تي پُل ٺهرايا آهن. هن چيو ته پوليس کي جديد هٿيار فراهم ڪري مضبوط ڪيو آهي ۽ پوليس ۾ ميرٽ تي ڀرتيون ڪيون جيڪا اسان جي ڪاميابي آهي، جيستائين پوليس مضبوط نه ٿيندي تيستائين رينجرز سنڌ ۾ رهندي ۽ رينجرز سٺو ڪم ڪري رهي آهي. نيب بابت وڏي وزير چيو ته هاءِ ڪورٽ به نيب جي ڪارڪردگيءَ تي آڱر اٿاري رهي آهي.

 

آرمي چيف سان برطانوي هاءِ ڪمشنر جي ملاقات

راولپنڊي (اين اين آءِ)  آرمي چيف جنرل قمر جاويد باجوا ۽ برطانوي هائي ڪمشنر خطي جي سيڪيورٽي صورتحال سميت گڏيل دلچسپي  جي معاملن تي ڳالهيون ڪيون آهي، آرمي چيف سان برطانوي هائي ڪمشنر ٿامس ڊريو جمعي تي ملاقات  ڪئي، جي ايچ ڪيو م ٿيندڙ ملاقات ۾ گڏيل دلچسپي جي معاملن تي ڳالهه ٻولهه ڪئي ۽ خطي جي سيڪيورٽي صورتحال تي ڳالهه ٻولهه ڪئي وئي.

 

ڪيترائي ڀيرا فون ڪيو، نواز ۽ زرداري ۾ رابطو نه ڪرائي سگهيس: خواجا آصف جو اعتراف

اسلام آباد(ويب ڊيسڪ) پرڏيهي وزير خواجا آصف اعتراف ڪيو آهي ته هو نواز شريف ۽ آصف زرداري وچ رابطا ڪرائڻ ۾ ناڪام رهيو. خواجا آصف هڪ خانگي ٽي وي سان ڳالهائينديچيو ته آصف زرداري سندس ماسات ۽ وڪيل فاروق نائيڪ کي سندس اقامو ڪيس وڙهڻ کان منع ڪري ڇڏيو هو جڏهن ته ان سلسلي ۾ هو پنج کان ست ڏينهن مسلسل آصف زرداري کي فون ڪندو رهيو پر جواب نه مليو، سندس اي ڊي سي ۽ آپريشن سان به ڳالهه ٻولهه ٿي پر هن ان جو جواب نه ڏنو.

 

منهنجا گرفتاري وارنٽ به جاري نه ٿيا آهن، جبري قيد رکيو ويو آهي: شرجيل ميمڻ

ڪراچي( ويب ڊيسڪ ) اڳوڻي صوبائي وزير شرجيل ميمڻ چيو آهي ته منهنجا گرفتاري وارنٽ به جاري نه ڪيا ويا آهن، کيس جبري طور قيد رکيو ويو آهي. سنڌ اسيمبلي ٻاهران ميڊيا سان ڳالهائيندي شرجيل ميمڻ چيو ته مريم نواز طرفان سرڪاري وسيلا استعمال ڪرڻ ۽ شاهدي پروٽوڪول ڏيڻ غلط آهي. هن چيو ته احتساب عدالت ٻاهران مريم نواز جي سالگره ملهائڻ ڪارڪنن جو حق آهي. سندس چوڻ هو ته آصف علي زرداري 11 سال ڀوڳيو آهي، جيل پ پ ڪارڪنن جو ٻيو گهر آهي. سندس چوڻ هو ته ماضيءَ ۾ نواز شريف بينظير ڀٽو جي حڪومت ڪيرائي هئي. شرجيل ميمڻ چيو ته نواز شريف ڪهڙن نظرين جي ڳالهه ڪري رهيو آهي؟ هن چيو ته مون کي ايئرپورٽ اندران ئي گرفتار ڪيو ويو،  نواز شريف جي گرفتاري لاءِ ني کي ايئرپورٽ ۾ داخل ٿيڻ جي اجازت نه ملي. سندس چوڻ هو ته نواز شريف جي آجيان ڪرڻ ڪارڪنن جو حق آهي. شرجيل ميمڻ چيو ته نيب کي نواز ليگ سان محبت آهي.

 

شيخوپوره ۾ مسافر بس ۽ وين ۾ ٽڪر، ۵ ڄڻا فوت، ۸ زخمي

شيخوپوره(م.ڊ)  شيخوپوره ۾ گوجرانوالا روڊ تي مسافر بس ۽ وين جي وچ ۾ خوفناڪ ٽڪر جي نتيجي ۾ ۵ ماڻهو فوت ۽ ۸ زخمي ٿي پيا آهن، حادثو تيز رفتاري سبب پيش آيو. واقعي جو اطلاع ملندي ئي پوليس، ايمبولينس ۽ ريسڪيو ٽيمون حادثي واري هنڌ تي پهتيون. امدادي ٽيمن لاشن ۽ زخمين کي لاهور جي اسپتال منتقل ڪري ڇڏيو آهي. ريسڪيو اهلڪارن جو چوڻ آهي ته زخمين مان ٽن جي حالت ڳڻتي جوڳي آهي.