تازيون خبرون

Monthly Archives: November 2017

افغانستان جو امن پاڪستان لاءِ اهم آهي: آرمي چيف

راولپنڊي (اين اين آءِ) آرمي چيف جنرل قمر جاويد باجوه افعانستان ۾ امن کي پاڪستان لاءِ اهم ڪوٺيندي چيو آهي ته رنڊڪن جي  باجود پنهنجي طرفان خاص قدم کنيا آهن پاڪستان پنهنجي مستقبل لاءِ عوامي امنگ مطابق ڪوششون جاري رکندو، آمريڪي سينٽڪام جي ڪمانڊر جنرل جوزف ايل ووٽل دهشتگردي خلاف جنگ ۾ پاڪتسان جي ڪوششن کي ساراهيندي ان جي قربانين کي خراج عقيدت پيش ڪيو آءِ ايس پي آر موجب ٻنهي اڳواڻن وچ ۾ خميس تي ملاقات ٿي، ملاقات ۾ خطي جي سيڪيورٽي صورتحال ۽ افغاننستان بابت معاملن تي غور ڪيو ويو، جڏهن ته پاڪ افغان بارڊر مئجيمينٽ ۽ خطي ۾ امن ۽ استحڪام لاءِ پاڪستان جي بهتر ڪردار ۽ ڪوششن تي به خيالن جي ڏي وٺ ڪئي وئي، آرمي چيف ان موقعي تي ڳالهائيندي چيو ته افغانستان ۾ امن ڪنهن ٻئي ملڪ جي ڀيٽ ۾ پاڪستان لاءِ وڌيڪ اهميت وارو آهي، آمريڪي سينٽرل ڪمانڊ جي ڪمانڊر پاڪستان آرمي جي ڪردار جو اعتراف ڪندي ان کي ساراهيو ۽ دهشتگردي خلاف جنگ ۾ پاڪستان جي قربانين کي خراج عقيدت پيش ڪيو.

 

نيب اسحاق ڊار جو نالو اي سي ايل ۾ وجهڻ جي سفارش ڪري ڇڏي

اسلام آباد(ويب ڊيسڪ) قومي احتساب بيورو (نيب) ناڻي واري وفاقي وزير اسحاق ڊار جو نالو ايگزٽ ڪنٽرول لسٽ (اي سي ايل) ۾ وجهڻ جي سفارش ڪري ڇڏي. اسلام آباد جي احتساب عدالت نيب ريفرنس جي ٻڌڻي ۾ مسلسل غير حاضري تي اسحاق ڊار جا ضمانت نه ٿيڻ جوڳا گرفتاري وارنٽ جاري ڪري رکيا آهن. تفصيل موجب نيب ناڻي واري وفاقي وزير جو نالو اي سي ايل ۾ وجهڻ جي سفارش ڪري ڇڏي. نيب اسحاق ڊار جو نالو اي سي ايل ۾ وجهڻ لاءِ گهرو وزارت کي درخواست ڏني جنهن سان گڏ ڪورنگ ليٽر ۽ احتساب عدالت طرفان جاري سندس ضمانت نه ٿيڻ جوڳن گرفتاري وارنٽن جي نقل به لڳائي وئي. نيب طرفان ليٽر ۾ تفصيلي طور ٻڌايو ويو آهي ته اسحاق ڊار ڄاڻي واڻي احتساب عدالت ۾ پيش ناهي ٿي رهيو، هو ضمانت نه ٿيڻ جوڳا گرفتاري وارنٽ جاري ٿيڻ جي باوجود عدالت ۾ پيش ناهي ٿيو ان ڪري سندس نالو اي سي ايل ۾ وڌو وڃي. ذريعن موجب نيب جي درخواست تي گهرو وزارت جي ٽي رڪني ڪميٽي اسحاق ڊار جو نالو اي سي ايل ۾ وجهڻ بابت فيصلو ڪندي جنهن جي ايندڙ 72 ڪلاڪ ۾ اچڻ جي اميد آهي.

 

سنڌ پوليس جا اعليٰ آفيسر ڏوهاري آهن، رپورٽ سپريم ڪورٽ ۾ پيش

ڪراچي (اين اين آءِ)  سپريم ڪورٽ رجسٽري ڏوهن ۾ملوث پوليس جي ڪارين رڍن خلاف ڪارروائي لاءِ حڪومت کي 2 هفتن جي مهلت ڏيندي ٻڌڻي ملتوي ڪري ڇڏي، جسٽس گلزار ريمارڪس ۾ چيو ته سيڪريٽري صاحب انصاف ڪريو، سڀني سان هڪجهڙو ورتا ڪيو، اعليٰ آفيسرن کي معاف نٿو ڪري سگهجي، سپريم ڪورٽ ڪراچي رجسٽري جي اڳيان ڏوهن ۾ ملوث پوليس جي ڪارين رڍن خلاف ڪارروائي بابت ٻڌڻي ٿي، ان موقعي تي گهرو سيڪريٽري سنڌ پوليس جي ڪارين رڍن خلاف ڪارروائي جي رپورٽ پيش ڪئي، عدالت وفاق کان اڳوڻي آءِ جي غلام حيدر جمالي سميت ٻين اعليٰ آفيسرن خلاف ڪارروائي جي رپورٽ طلب ڪري ورتي، ان تي گهرو سيڪريٽري چيو ته گريڊ 17 جي 35 آفيسرن جو معاملو سروسز کاتي وٽ آهي، گريڊ 18 جي آفيسرن خلاف گهرو وزير ڪارروائي جو مجاز آهي، جسٽس گلزار احمد ريمارڪس ڏنا ته گهرو وزير ڪيئن ڪارروائي ڪندو، هو ته پسند ناپسند جو بنياد ڪندو، متاثر اهلڪار جي وڪيل چيو ته اعليٰ پوليس اهلڪارن جي خلاف ڪاروائي نه پئي ٿئي، جسٽس سجاد علي شاهه ريمارڪس ۾ چيو ته اوهان کي خبر نه آهي جو اعليٰ آفيسرن جو معاملو سياستندان وٽ آهي، وزير ڪيئن ڪم ڪري ٿو، سڀني کي خبر آهي، عدالت پڇاڻو ڪيو ته پوليس آفيسرن خلاف الزامن جو تفصيل ڪٿي آهي، جسٽس گلزار چيو ته ڪنهن کي عوام جي خدمت ۾ دلچسپي نه آهي، هر هڪ پنهنجي لاءِ سوچي رهيو آهي، عدالت گهرو سيڪريٽري کي ڇنڊ پٽيندي چيو ته اوهان ماڻهو مٿان کان هيٺ لهي اچو اوهان عوام جا خادم آهيو، پبلڪ ماسٽر نه بڻجو، جسٽس گلزار ريمارڪس ۾ چيو ته آءِ جي صاحب اوهانکي اندازو آهي ڪيتري گڙٻڙ آهي، ڪيترو امتيازي ورتا ٿي رهيو آهي، ڪير پڇڻ وارو نه آهي، آءِ جي چيو ته اعليٰ آفيسرن خلاف ڪارروائي لاءِ سفارشون موڪلي ڇڏيون آهن، عدالت چيو ته هتي ايڏيون وڏيون غلطيون آهن، پوليس جي سڄي کاتي کي مستفي ٿيڻ گهرجي، عدالت ريمارڪس ڏنا ته سيڪريٽري صاحب انصاف ڪريو، سڀني سان هڪجهڙو ورتاءُ ڪريو، اعليٰ آفيسرن کي معاف نٿو ڪري سهگجي، عدالت حڪومت کي ڪارين رڍن خلاف ڪارروائي لاءِ 2 هفتن جي مهلت ڏئي ڇڏي، صوبائي حڪومت سان لاڳاپيل پوليس آفيسرن خلاف ڪارروائي ۽ الزامن جا تفصي طلب ڪيا ويا.

 

اليڪشن ايڪٽ ۾ وڌيڪ ترميم جو بل قومي اسيمبلي ۾ منظور

اسلام آباد (ويب ڊيسڪ) اليڪشن ايڪٽ ۾ وڌيڪ ترميم جو بل قومي اسيمبلي ۾ گڏيل طور تي منظور ڪيو ويو آهي. اياز صادق جي صدارت هيٺ ٿيل اجلاس ۾ قانون واري وفاقي وزير زاهد حامد اليڪشن ايڪٽ ۾ وڌيڪ ترميم جو بل 2017 پيش ڪيو. اليڪشن ايڪٽ ۾ وڌيڪ ترميمي بل 2017 ۾ تجويز ڏني وئي ته بل تحت ختم نبوت جي حوالي سان سيون بي ۽ سيون سي شقون شامل ڪيون وينديون. زاهد حامد جو چوڻ هو ته سيون سي ۽ سيون بي جو اصل مسودو اڃ به قائم آهي، مان نبي جو عاشق آهيان، ٻه حج ۽ ڪيترائي عمرا ڪري چڪو آهيان، ختم نبوت جي حوالي سان شقن ۾ تبديلي جو سوچي به نٿو سگهان. هن چيو ته 2002ع جي چونڊن کان اڳ حڪومت اليڪشن آرڊر لاڳو ڪيو. زاهد حامد جي بيان تي احسن اقبال چيو ته ڪنهن به شخص جو ايمان الله ۽ ان وچ ۾ معاملو هوندو اهي، ڇا اسان گهٽي گهٽي وڃي ٻڌايون ته مسلمان آهيون، جنهن تي شيخ رشيد چيو ته احسن اقبال کي ڪا به خبر ناهي. زاهد حامد اهو بيان پنهنجي صوابديد تي ڏنا آهي، کيس ڪنهن به نه چيو ته اهو بيان ڏيو، اسپيڪر صاحب مان توهان جي رولنگ چاهيان ٿو، هڪ وزير ڪجهه چئي رهيو آهي ته ٻيو ڪجهه، جيڪڏهن ڪو احمدي يا مرزائي آهي ته ان کي ٻڌائڻو پوندو ته اهو ڪير آهي. پوءِ ايوان چونڊ ترميمي بل 2017 گڏيل طور منظور ڪري ورتو.27

 

انتقامي ڪارروايون ٿي رهيون آهن، ڀڄڻ وارو نه آهيان: نواز شريف

مري (اين اين آءِ)   پاڪستان جي اڳوڻي وزيراعظم نواز شريف چيو آهي ته سندس خلاف انتقامي ڪارروائي ڪئي پئي وڃي، جڏهن ته هو ڀڃڻ وارن مان نه آهي، عدالتن ۾ قانوني جنگ وڙهندس، عوام جي خدمت جو فرض ادا ڪندا رهنداسين، پنهنجي رهائشگاهه تي صحافين سان ڳالهائيندي هن چيو ته کيس خبر آهي ته ان سان هيءُ ورتا ڇو پيو ڪيو وڃي پر هو ڀڃڻ وارو نه آهي قانوني جنگ وڙهنداسين، هن چيو ته عوام جي محبت منهنجي لاءِ عزت ۽ فخر آهي منهنجي دل ۾ به اوهان جي لاءِ پيار آهي، دعا ڪريو ته الله تعاليٰ پاڪستان ۽ اسان تي رحم ڪري، ترقي جو سفر جيڪو شروع ڪيو اهو تيزي سان اڳتي وڌندو، واعدو آهي ته قوم جي خدمت جو فرض ادا ڪندو رهندس.

 

آصف علي زرداري سان آذربائيجان جي سفير جي ملاقات، گڏيل دلچسپي وارن معاملن تي ڳالهيون

ڪراچي (اسٽاف رپورٽر) پاڪستان جي اڳوڻي صدر ۽ پي پي پي پارليامينٽرينز جي سربراهه آصف علي زرداري سان آذربائيجان جي سفير علي عليزاده بلاول هائوس ۾ ملاقات ڪئي. ملاقات دوران گڏيل دلچسپي جي معاملن سميت ٻنهي ملڪن جي عوام وچ ۾ ڀائپي وارن لاڳاپن جي اهميت تي خيالن جي ڏي وٺ ڪئي. ان موقعي تي آمريڪا ۾ پاڪستان جي اڳوڻي سفير سينيٽر شيري رحمان پڻ موجود هئي.

 

وزير اعظم سان چوڌري نثار جي ملاقات، مختلف معاملن تي ڳالهيون

اسلام آباد (اين اين آءِ) وزيراعظم شاهد خاقان عباسي سان ن ليگ جي سينيئر اڳواڻ چوڌري نثار ملاقات ڪئي جنهن ۾ ملڪي مجموعي صورتحال ۽ سياسي معاملن تي ڳالهيون ڪيون ويون، چوڌري نثار چيو ته گذريل ڪجهه ڏينهن کان فيض آباد جي هنڌ وٽ لڳل ڌرڻي سبب راولپنڊي ۽ اسلام آباد جا شهري سخت پريشانين کي منهن ڏئي رهيا آهن، اسلام آباد جي مصروف رستا ۽ راولپنڊي اسلام آباد کي ملائيندڙ اهم هنڌ تي لاقانونيت ۽ عوام کي پريشان ڪرڻ جي اجازت نه ڏيڻ گهرجي، حڪومت اهو مسئلو جلد کان جلد حل ڪرڻ لاءِ قدم کڻي، هن چيو ته موٽر وي تي ميٽرو اسٽيشن پراجيڪٽ جي تعمير ۾ سستي سان ڪم جو سبب نه صرف لاڳاپيل آبادين پر سڄي ملڪ مان ايندڙ شهرين کي تڪليف کي منهن ڏيڻو پئجي رهيو آهي، اڏاوتي عمل کي تيز ڪرڻ سان گڏ ضروري آهي ته شهرين کي متبادل رستا فراهم ڪيا وڃن ته جيئن انهن جون پريشانيون ختم ٿي سگهن.

 

سٺي سماج لاءِ رواداري ۽ برداشت کي هٿي وٺرائي وڃي: بلاول ڀٽو

ڪراچي (اين اين آءِ) پ  پ چيئرمين بلاول ڀٽو چيو آهي ته بهتر سماج لاءِ رواداري ۽ برداشت تي هٿي وٺرائي وڃي، پ پ جي قيادت ۽ ورڪرز هميشه رواداري ۽ برداشت جا امين رهندا، هن رواداري ۽ برداشت جي عالمي ڏينهن تي پنهنجي پيغام ۾ چيو ته عدم رواداري ۽ عدم برداشت سان معاشري ۾ تشدد پکڙجي رهيو آهي، بهتر سماج لاءِ رواداري ۽ برداشت تي کي هٿي وٺرائي وڃي، هن چيو ته پ پ رواداري ۽ برداشت جو ٻيو نالو آهي، اسان تشدد، ناانصافيون، ڪوڙا ۽ ميڊيا ٽرائيل برداشت ڪيو، پ پ جي قيادت ۽ ورڪرز هميشه روداري ۽ برداشت جا امين رهندا، رواداري ۽ برداشت کي هٿي وٺرائڻ پ  پ جو اهم مشن آهي ٻيون سياسي پارٽيون به پ پ جي پيروي ڪن.

 

صنعتي مزدورن جي تعليمي سهولتن کي ٻيهر بحال ڪيو ويو آهي: وڏو وزير

ڪراچي (16 نومبر2017): وڏي وزير سيد مراد علي شاهه چيو آهي ته قائداعظم محمد علي جناح جهڙي عظيم ۽ تاريخ ساز شخصيت کانپوءِ قائد عوام ذوالفقار علي ڀٽو پاڪستان جو اهو عظيم ليڊر آهي جنهن تاريخ جي ورقن تي اڻ مٽندڙ نقش مرتب ڪيا ۽ وزيراعظم جي حيثيت سان سڌارا لاڳو ڪيا ۽ ليبر قانون متعارف ڪرايو ۽ ڪيترن ئي شعبن ۾ اهڙيون تبديليون ڪيون جنهن ڪري ملڪ ترقي جي راهه تي هلڻ شروع ڪيو. وڏي وزير سيد مراد علي شاهه اهڙن خيالن جو اظهار اڄ وزيراعليٰ هائوس ۾ رٿيل ورڪرز فنڊ فليٽس بابت تقريب کي خطاب ڪندي ڪيو. تقريب ۾ قومي اسيمبليءَ ۾ مخالف ڌر اڳواڻ سيد خورشيد شاهه، سڌسماءِ، ٽرانسپورٽ ۽ ليبر اينڊ ويلفيئر فنڊ وارو صوبائي وزير سيد ناصر حسين شاهه، سيڪريٽري ليبر اينڊ هيومن رسورسز عبدالرشيد سولنگي، سيڪريٽري ورڪرز ويلفيئرز بورڊ سنڌ آصف علي ميمڻ، ورڪرز ويلفيئر فنڊ اسلام آباد، سنڌ حڪومت جي ليبر کاتي ۽ ٻين ادارن جي آفيسرن سميت معزز شخصيت شرڪت ڪئي. وڏي وزير ان موقعي تي قومي اسيمبليءَ ۾ مخالف ڌر اڳواڻ سيد خورشيد شاهه جا ٿورا مڃيندي چيو ته هُو قومي اسيمبليءَ جو اجلاس ڇڏي تقريب ۾ شريڪ ٿيو. هن چيو ته فليٽن جي تعمير جا منصوبن جي شروعات سيد خوشيد شاهه جي وزارت واري دور ۾ ڪئي وئي. وڏي وزير چيو ته پاڪستان جي اڳواڻي صدر آصف علي زرداري جي اڻٿڪ محنت ۽ ڪوششن سان ارڙهين آئيني ترميم قومي اسيمبليءَ مان منظور ڪرائي وئي ۽ ليبر سان لاڳاپيل کاتن کي صوبي جي حوالي ڪيو ويو ۽ صوبن کي قانونسازيءَ جا اختيار ڏنا ويا. سنڌ حڪومت ان مامري ۾ ليبر ورڪرز قانون صوبائي اسيمبليءَ مان يڪراءِ سان منظور ڪرايو جنهن جي لاڳو ٿيڻ سان سنڌ جي عوام ۽ هن صوبي جي محنت ڪندڙن جي خوشحاليءَ کي يقيني بڻايو پيو وڃي ۽ ترقياتي ڪمن کي تيزيءَ سان مڪمل ڪيو پيو وڃي. وڏي وزير چيو ته پاڪستان پيپلز پارٽيءَ جي منشور اٽي، لٽي ۽ اجهي کي مدنظر رکندي ورڪرز ويلفيئر بورڊ سنڌ مزدورن جي خوشحالي ۽ بهبود لاءِ رهائش، جهيز گرانٽ، ڊيٿ گرانٽ ۽ تعليم ۽ تدريس جي منصوبن جي عمل ڪري رهي آهي. سيد مراد علي شاهه چيو ته ورڪرز ويلفيئر بورڊ سنڌ جا اختيار پهرين وفاق وٽ هئا پر هاڻ صوبي ڏانهن منتقل ڪيا ويا آهن. هن چيو ته سنڌ واحد صوبو آهي جنهن پنهنجو قانون صوبائي اسيمبليءَ مان منظور ڪرايو ۽ ورڪرز ويلفيئر بورڊ سنڌ جون هن وقت تائين اٺ گڏجاڻيون ٿيون آهن. ان مد ۾ سنڌ حڪومت ورڪرز ويلفيئرز فنڊ لاءِ 250 ملين رپيا پنهنجو حصو مختص ۽ منظور ڪيو آهي. هن چيو ته اڄوڪي تقريب انهيءَ سلسلي سان جڙيل آهي جيڪا سنڌ حڪومت جي وزير ليبر اينڊ هيومن رسورسز کاتي واري وزير سيد ناصر حسين شاهه، سيڪريٽري ليبر اينڊ هيومن سورسز جي مسلسل جدوجهدو جو نتيجو آهي. ان موقعي جي مناسبت سان مان 18هين آئيني ترميم بعد محنت ڪندڙن لاءِ ورڪرز ويلفيئرز فنڊ سنڌ پاران ڪيل اپائن بابت هن ٻڌايو ته ورڪرز جي نياڻين جي شادين لاءِ ڏاج گرانٽ جي مد ۾ 300 ملين رپين جي خاطر خواهه رقم مان اڃا تائين 80 ملين رپيا ڪراچي، حيدرآباد، سکر ۽ لاڙڪاڻي ڊويزنن ۾ ورهايا ويا آهن ۽ باقي رهيل 220 ملين رپيا ايندڙ ٽن کان چئن مهينن ۾ ورهايا ويندا. ڊيٿ گرانٽ جي مد ۾ 100 ملين رپيا ورهايا آهن ۽ باقي درخواست گذارن کي هلندڙ مالي سال دوران ڏنا ويندا. اسڪالرشپ براءِ تعليمي سال 17-2016ع جي مد ۾ 200 ملين رپيا موصول ڪيل درخواستن جي جاچ پڙتال بعد ٻن کان ٽن مهينن اندر ورهايا ويندا. صنعتي مزدورن جي ٻارن کي تعليمي سهولتون جيڪي ورڪرز ويلفيئر فنڊ ختم ڪيا هئا انهن کي بحال ڪيو ويو آهي. هن چيو ته 18هين آئيني ترميم کانپوءِ ورڪرز ويلفيئر فنڊ اسلام آباد مان منتقل ڪيو ويو، ميٽرڪ ٽيڪ ايجوڪيشن پروجيڪٽ جي سمورن ملازمن کي مستقل ڪيو ويو آهي ۽ صوبي ۾ ورڪرز ويلفيئرز بورڊ سنڌ جون 31 ڪالونيون ۽ 22 تعليمي درسگاهون جن جي مرمت وارو ڪم جلد شروع ٿيندو. سيد مراد علي شاهه چيو ته ورڪرز ويلفيئرز بورڊ سنڌ تحت ڪراچي ۾ 3008 فليٽس، حيدرآباد ۾ 1500 فليٽس، ڪوٽڙيءَ ۾ 500 فليٽس، نوري آباد ۾ 200 فليٽس، لاڙڪاڻي ۾ 96 فليٽن جو ڪم اٽڪل 99 سيڪڙو مڪمل ڪيو ويو آهي، جيڪي تمام جلد ڪڻن ذريعي محنت ڪندڙن کي الاٽ ڪيا ويندا. هن محنت ڪندڙن جي رهائشي مسئلن کي ڏسندي ۽ انهن جي حل لاءِ ورڪرز ويلفيئر بورڊ سنڌ سڄي صوبي ۾ رهائشي اسڪيمون پڻ شروع ڪري رهيو آهي، جنهن ۾ ڪراچي ۾ 4096 فليٽس، ڏهرڪي ۾ 2048 فليٽس، ڪوٽڙي ۾ 1504 فليٽس، ٽنڊو محمد خان ۾ 256 فليٽس ۽ ٽنڊو الهيار ۾ 256 فليٽس تعمير ڪيا ويندا. وڏي وزير چيو ته محنت ڪندڙ جي ٻارن جي تعليمي ۽ تدريسي گهرجن کي ڏسندي ورڪرز ويلفيئرز بورڊ سنڌ نوان اسڪول ۽ ڪاليج قائم ڪري رهيو آهي، جن ۾ ورڪرز انٽرميڊيٽ ڪاليج ڪورنگي ڪراچي، ورڪرز انٽرميڊيٽ ڪاليج لانڍي ڪراچي، ورڪرز انٽرميڊيٽ ڪاليج نيو ڪراچي، ورڪرز انٽرميڊيٽ ڪاليج حيدرآباد، ورڪرز انٽرميڊيٽ ڪاليج گهوٽڪي، ورڪرز انٽرميڊيٽ ڪاليج سکر، ورڪرز ماڊل اسڪول ٺٽو، ورڪرز ماڊل اسڪول گهوٽڪي شامل آهن. تقريب جي آخر ۾ هن چيو ته پاڪستان پيپلز پارٽي جي پاليسين مطابق ورڪرن لاءِ ليبر کاتي وڌ ۾ وڌ اپاءَ وٺي رهيو آهي ته جيئن عوامي حڪومت جون پاليسيون مزدورن جي ترقيءَ ۽ خوشحاليءَ جو ضامن بڻجي ۽ ان سان گڏوگڏ سنڌ، ملڪ ۽ قوم جي ترقي ۽ خوشحالي جو باعث بڻجي. وڏي وزير چيو ته اين آءِ سي وي ڊي جڏهن سنڌ حوالي ڪيو ويو ته ان جو بجيٽ 700 ملين رپيا هو ۽ هاڻي ان جو بجيٽ 8.5 بلين رپيا آهي. هن چيو ته اسان اين آءِ سي وي ڊي کي هڪ زبردست فڪيلٽي بڻائي ڇڏيو آهي. هن چيو ته هڪ ايم اين اي جنهن کي اسلام آباد ۾ دل جي تڪليف ٿي ۽ هُو اتان کان علاج خاطر اين آءِ سي وي ڊي آيو. وڏي وزير چيو ته پاڪستان پيپلز پارٽيءَ جي قيادت سدائين مزدورن لاءِ ڪم ڪيو آهي ۽ اهي مزدور اسان جي معيشت جو اثاثو آهن، انڪري اسان کي انهن جو خيال رکڻو آهي. ان موقعي تي قومي اسيمبليءَ ۾ مخالف ڌر اڳواڻ سيد خورشيد شاهه خطاب ڪندي چيو ته مزدورن لاءِ اهو منصوبو تمام اهم آهي ۽ مزدور ۽ هاري ملڪ جي معيشت جو ڦيٿو هلائيندا آهن. محنت ڪندڙ کي فليٽ جي فراهمي پيپلز پارٽي جي پاليسيءَ جي مطابق آهي. ليبر اينڊ هيومن رسورسز واري وزير ناصر حسين شاهه چيو ته خورشيد شاهه جي ڪوششن سان اهو منصوبو مڪمل ٿيو آهي ۽ محنت ڪندڙ کي اهي فليٽ ملي رهيا آهن. هن چيو ته محنت ڪندڙ لاءِ معياري فليٽس تيار ڪيا ويا آهن ۽ مزدورن جي رهائشي علائقن ۾ صحت جون سهولتن جي فراهميءَ کي به يقيني بڻايو ويو آهي ۽ اسان جي ڪوشش آهي ته بجيٽ ۾ محنت ڪندڙن جي سهولتن لاءِ وڌيڪ فنڊ مختص ڪيا وڃن.

 

ڪلڀوشن جو ٺاهيل نيٽ ورڪ ئي بلوچستان ۾ ڪارروايون پيو ڪري: سراج الحق

لاهور (ويب ڊيسڪ) جماعت اسلامي جي امير سراج الحق چيو آهي ته دشمنن بلوچستان کي پنهنجي تخريبي سرگرمين جو مرڪز بڻائي ڇڏيو آهي، جڏهن ته حڪومت ڪلڀوشن کي مهمان بڻائي رکيو آهي، انساني همدردي تحت ساڻس گهر ڀاتين سان ملاقات جي به آڇ ڪئي وئي آهي، جنهن کي ڀارتي ميڊيا پاڪستان تي دٻاءَ جو نتيجو قرار ڏئي رهي آهي، ڪيترن ئي پاڪستانين جي رت ۾ رڱيل شخص لاءِ انساني همدردي جي ڪهڙي معنيٰ آهي؟ ڪلڀوشن جو ٺاهيل نيٽ ورڪ ئي بلوچستان ۾ ڪارروايون ڪري رهيو آهي. حڪومت اثرائتا قدم کڻي. منصورا ۾ مختلف وفدن سان ملاقات دوران ڳالهائيندي سينيٽر سراج الحق چيو ته ڪرپشن ڪندڙ سياستدان قيادت جا اهل ناهن، وقت اچي ويو آهي ته سياست ۽ ڪرپشن کي ڌار ڪيو وڃي. سندس چوڻ هو ته جماعت اسلامي ڪرپشن خلاف جدوجهد ڪري رهي آهي، اسان فيصلو ڪيو آهي ته 2018ع جي چونڊن دوران ڪرپشن خلاف تحريڪ کي عروج تائين پهچائينداسين ته جيئن ڪرپٽ ۽ بد ديانت ماڻهن کي عوام جي حقن تي ڌاڙي جو موقعو نه ملي سگهي.27