تازيون خبرون

Daily Archives: October 30, 2017

ملڪ جي احتساب عدالتن ۽ نيب جي امتيازي سلوڪ تي سنڌ هاءِ ڪورٽ ڳڻتي ظاهر ڪري ڇڏي

ڪراچي(م.ڊ) سنڌ هاءِ ڪورٽ شرجيل ميمڻ خلاف ڪرپشن ريفرنس ۾ ضمانت مسترد ڪيل جي تفصيلي فيصلو جاري ڪري ڇڏيو، سنڌ هاءِ ڪورٽ سڄي ملڪ جي احتساب عدالتن ۽ نيب طرفان ممڪنه امتيازي سلوڪ تي گهري ڳڻتي جو اظهار ڪيو آهي. سنڌ هاءِ ڪورٽ فيصلي ۾ چيو ته نيب جي انڪوائري، تفتيش يا ريفرنس ۾ نامزد ملزمن جي گرفتاري جي معاملي تي ملڪ جي مختلف حصن ۾ نيب ۽ احتساب عدالتن طرفان الڳ الڳ پاليسيون اختيار ڪرڻ تي گهري ڳڻتي آهي. مثال طور تي سنڌ ۾ نيب ريفرنس جي ملزم ضمانت کان پهرين گرفتاري حاصل ڪرڻ چاهين ٿا ۽ هاءِ ڪورٽ ان جي درخواست رد ڪري ڇڏي ته ان کي گرفتار ڪيو ويندو آهي، جڏهن ته ٻين صوبن خصوصن پنجاب ۽ وفاقي گادي واري هنڌ اسلام آباد ۾ اهڙي نظر ايندي آهي ته نيب ڪجهه ملزمن کي گرفتار ڪيو پر انهن کي لاڳاپيل احتساب عدالتن ضمانتي مچلڪن تي آزاد ڪري ڇڏيو، جنهن سان اهو تاثر اڀرندو آهي ته اهي طاقت ور ۽ بااثر ماڻهو آهن. وڌيڪ اهو ته نيب ۽ احتساب عدالتون ان ملزمن جا نالا ايگزٽ ڪنٽرول لسٽ ۾ وجهڻ جو به نه چيو ۽ انهن جو  پنهنجي مرضي سان ملڪ کان ٻاهر اچڻ وڃڻ رهي ٿو ۽ ڪڏهن نه به ايندو ۽ مفرور ٿي ويندو آهي. بادي النظر ۾ اهو تفريق امتيازي سلوڪ معلوم ٿيندو آهي جيڪو آئين جي آرٽيڪل پنجويهه جي خلاف آهي. عدالت وڌيڪ چيو ته اهو طرز عمل بادي النظر ۾ نه صرف امتيازي سلوڪ آهي، بلڪه ان سان عوام جي قانون جي بالادستي ۽ انصاف جي نظام تي اعتماد به مجروح ٿيندو آهي. سنڌ هاءِ ڪورٽ چيو ته ان پس منظر ۾ نيب کي ملزمان جي گرفتاري ۾ هڪ جهڙي پاليسي اپنائڻ گهرجي، اهڙي طرح احتساب عدالتن کي به ناقابل ضمانت ريفرنسن کي ملزمان لاءِ قانون موجب هڪ جهڙي پاليسي اپنائڻ گهرجي.

 

ادارن سان ٽڪراءُ ملڪي سلامتي خلاف آهي، پاڻ کي طاقتور سمجهندڙ پارليامينٽ ختم نٿو ڪري سگهي: خورشيد شاهه

سکر (اين اين آءِ) مخالف ڌر جي اڳواڻ  سيد خورشيد شاهه چيو آهي ته ادارن سان ٽڪراءَ ملڪي بقا جي خلاف آهي ، سياستدانن کي عوام جي حَن جي ڳالهه ڪرڻ گھرجي، ڪجھۡه سياستدان پهريان گاريون ڏين ٿا پوءِ چون ٿا معاف ڪيو، معافي وٺندڙن  سياستدانن کي سياست ڪرڻ جو ڪو حق ناهي، صالح پٽ ۾ عوامي ميڙ کي خطاب ڪندي سيد خورشيد شاهه چيو ته اسان اپوزيشن ۾ رهي پارليمينٽ ۽ جمهوريت کي مضبوط ڪرڻ جي ڪوشش ڪيئ اڄ پاڪستان مسئلن جي ور چڙهيل آهي. اهڙيون حالتون پيدا ٿيون آهن جن کي حل ڪرڻ فرض آهي، اپوزيشن ليڊر چيو ته ملڪ جمهوريت جي ڪري ئي ترقي ڪري سگھِي ٿو، هن چيو ته ميان صاحب کي هر وقت چيو ته پارليمينٽ کي اهميت ڏيو ۽ اسان سان ويهي مسئلا حل ڪيو پر عمران خان  ۽ نوازشريف ٻئي پارليمينٽ ۾ اچڻ پنهنجي توهين سمجھن ٿا، هن چيو ته اهڙو شخص پارليمينٽ کي ختم نه ٿو ڪري سگھي  جيڪو پاڻ کي طاقتور سمجھندو هجي، هن چيو ته اسان پارليمينت کي طاقتور ثابت ڪري ڏيکاريو، عوامي طاقت محسوس نه ڪندڙ شخص ختم ٿي وڃي ٿو، جيڪو عوام جي لاءِ جيئندو آهي اهو هميشا قائم رهندو آهي.

 

پاڪستان سريلنڪا کي ٽيون ٽي-20 هارائي ميچ ۽ سيريز کٽي ورتي

لاهور (اسپورٽس نيوز) قومي ڪرڪيٽ ٽيم سريلنڪا کي 36 رنسن تان شڪست ڏئي ٽي ٽوئنٽي سيريز ۾ 0-3 تان وائيٽ واش ڪري ورتو آهي. سريلنڪن ڪرڪيٽ ٽيم پاڪستان خلاف لاهور ۾ کيڏيل آخري ٽي ٽوئنٽي ميچ ۾ ٽاس کٽي پهريان فيلڊنگ جو فيصلو ڪيو ۽ دعوت ملڻ کانپوءِ پهريان بيٽنگ ڪندي گرين شرٽس مقرر اوورن ۾ ٽن وڪيٽن جي نقصان تي 180 رنسون ٺاهيون. پاڪستان طرفان شعيب ملڪ بهترين بيٽنگ جو مظاهرو ڪندي 24 بالن تي 51 رنسن جي شاندار اننگز کيڏي، جڏهن ته عمر امين 45، فخر زمان 31، بابر اعظم 34 ۽ فهيم اشرف 13 رنسون ٺاهيون. سريلنڪا طرفان سنجايا، مناويرا ۽ اوڊانا هڪ – هڪ وڪيٽ ورتي. جواب ۾ سريلنڪن ٽيم مقرر اوورن ۾ 9 وڪيٽن جي نقصان تي 144 رنسون ٺاهي سگهي. سريلنڪا طرفان شناڪا 54 رنسن جي شاندار اننگز کيڏي، ٻين رانديگرن ۾ چتورنگا 21، پراسنا 16، پٿيرانا 14 ۽ ڪپتان ٿسارا پريرا 10 رنسون ٺاهي اڳڀرا رهيا. پاڪستان طرفان محمد عامر 4، فهيم اشرف 2، جڏهن ته عماد وسيم، محمد حفيظ ۽ حسن علي هڪ – هڪ وڪيٽ ورتي. قومي ٽيم سريلنڪا کي ٽي ٽوئنٽي سيريز ۾ 0-3 تان ڪلين سوئيپ ڪري ورتو آهي.27

 

ن ليگ چونڊن جي تيارين سميت ۳ اهم فيصلا ڪري ورتا

اسلام آباد(م.ڊ)  حڪمران مسلم ليگ (ن) جي قيادت ملڪ ۾ مجموعي سياسي صورتحال سبب نئين چونڊن جي تيارين جي سلسلي ۾ عوامي مهم هلائڻ سميت ۳ اهم فيصلا ڪري ورتا آهن. رپورٽ مطابق مسلم ليگ (ن) جي قيادت طرفان ڪيل فيصلن ۾ وفاقي حڪومت طرفان نئين احتساب قانون سميت اهم معاملن بابت قانونسازي کي جلد کان جلد پارليامينٽ مان منظور ڪرائڻ، شريف خاندان خلاف عدالتن ۾ داخل ريفرنسز جي امڪاني فيصلن جي پيشنظر پارٽي جي تنظيمي اسٽرڪچر ۾ فوري تبديلي ۽ عام چونڊن جي تيارين لاءِ عوامي رابطا مهم شروع ڪرڻ شامل آهن. مسلم ليگ (ن) جي قيادت قانون جي منظوري جو ٽاسڪ وزيراعظم شاهد خاقان عباسي، عدالتي فيصلو امڪاني طور تي شريف خاندان خلاف اچڻ جي صورت ۾ پارٽي سيٽ اپ ۾ تبديلي جو ٽاسڪ پنجاب جي وڏي وزير شهباز شريف ۽ عام چونڊن جي تيارين لاءِ فوري طور تي عوامي رابطا مهم شروع ڪرڻ جو ٽاسڪ اڳوڻي گهرو وزير چوڌري نثار علي خان ۽ ٻين اهم پارٽي اڳواڻن کي ڏئي ڇڏيو آهي.

 

نيب ڪي پي بدعنوان آفيسرن خلاف ريفرنس جي منظوري ڏئي ڇڏي

پشاور( ويب ڊيسڪ) قومي احتساب بيورو نيب ڪي پي ڊپٽي ڪمشنر شانگلا سميت ٻين سرڪاري آفيسرن خلاف بدعنواني ۽ اختيارن جي ناجائز استعمال تي رفرنس داخل ڪرڻ جي منظوري ڏئي ڇڏي. نيب ڪي پي طرفان جاري ڪيل بيان موجب نيب جي ريجنل بورڊ جو اجلاس پشاور ۾ ٿيو جنهن ۾ ڊپٽي ڪمشنر شانگلائ ڊائريڪٽر پي ڊي اي، پي ايس او ۽ ڪسٽم اختيارين خلاف ريفرنس جي منظوري ڏني وئي. پڌرائي موجب ڊپٽي ڪمشنر شانگلا ۽ ٻين خلاف 12 ڪروڙ 30 لک رپين جي جاچ جي شروعات ٿيندي. ڊپٽِي ڪمشنر تي الزام آهي ته هن اختيارن جو غلط استعمال ڪيو ۽ اشتهارن کانسواءِ ٺيڪا ڏنا، جڏهن ته 2016عي ٻوڏ کانپوءِ هن انفراسٽرڪچر جي بحالي ۾ به مبينا طور خرد برد ڪئي. نيب جي پڌرائي موجب ڊائريڪٽر پي ڊي اي امين الدين خلاف به ريفرنس داخل ڪرڻ جي منظوري ڏني وئي آهي جنهن تي آمدني کان وڌيڪ اثاثا ٺاهڻ جو الزام آهي. نيب ڪي پي جي ريجنل بورڊ جي اجلاس دوران اختيارن جي ناجائز استعمال تي پي اي ساو ۽ ڪسٽم اختيارين خلاف به ريفرنس داخل ڪرڻ جي منظوري ڏني وئي. پڌرائي موجب جوابدارن افعانستان برآمد ڪيل پيٽروليم شين جي مقامي مارڪيٽ ۾ وڪرو ڪئي جنهن سان قومي ناڻي کي 2 ڪروڙ 30 لک رپين جو نقصان ٿيو.

 

 

پاڪستان ۽ آمريڪا وچ ۾ لاڳاپا وڌيڪ مضبوط بڻائڻ جي ضرورت آهي: اعزاز چوڌري

اسلام آباد(بيورو)  آمريڪا ۾ پاڪستان جي سفير اعزاز احمد چوڌري پاڪستان ۽ آمريڪا جي وچ ۾ لاڳاپا وڌيڪ مضبوط بڻائڻ جي ضرورت تي زور ڏنو آهي. آچر ڏينهن نيويارڪ ۾ پاڪ آمريڪا ڪميٽي کي خطاب ڪندي هن چيو ته پاڪستان ۽ آمريڪا جا لاڳاپا لچڪدار آهن. هن وڌيڪ چيو ته آمريڪا ۾ رهندڙ پاڪستانين کي ملڪ جو مثبت تشخص اجاگر ڪرڻ گهرجي. اعزاز احمد چوڌري چيو ته ڪجهه عنصر پاڪستان بابت متضاد حقيقتون پيش ڪري رهيا آهن، جڏهن ته اسان اهي غلط فهميون ختم ڪرڻ جي ڪوشش ڪري رهيا آهيون.

 

هڪ بلدياتي ادارو نه هلائي سگهندڙ اناڙي 20 ڪروڙ عوام جي چاٻي پيو گهري، 2018 ۾ لوڊ شيڊنگ مڪمل ختم ٿي ويندي: احسن اقبال

ناروال (اين اين آءِ)وفاقي گھرو وزير احسن اقبال چيو آهي ته سڄي ملڪ ۾ ترقياتي منصوبا جاري آهن ۽ معيشٽ ترقي ڪري رهي اهي عوام جي اعتماد سان پاڪستان جي قسمت بدلائي ڇڏينداسي، اهڙن خيالن جو اظهار هن ناروال ۾ ڇنڇر جي رات هڪ ميڙاڪ کي خطاب ڪندي ڪيو، احسن  اقبال چيو ته 2013 ۾ اسان پاڪستان بدلجڻ جو نعرو  هنيو هو  هاڻي اسان پاڪستان بدلائي رهيا آهيون توانائي جو خاتمو ڪري اونداهين جو خاتمو ڪيو، ۽ 2018 ۾ لوڊ شيڊنگ مڪمل ختم ٿي ويندي، دهشتگردن جي چيلهه ٽوڙي ملڪي  معيشت کي مضبوط ڪيو ويو جيڪو اڄ ترقي ڪري رهيو آهي… گھرو وزير چيو ته عمران خان وٽ ترقي جو فارمولو آهي ته سامهون آڻي، هن ڪي  پي ڪي ۾ ڪجھه نه ڪيو، حڪومت چين جي سهڪار سان ڪراچي کان پشاور تائين هڪ نئين ٽرين هلائي ويندي جنهن تي اٺ ارب ڊالر خرچ ٿيندا. هن چيو ته ناروال ۾ يونيورسٽين جو ڄار وڇايو ويو آهي  ريلوي اسٽيشن ۽ هڪ انٽرنيشنل معيار جو اسٽيڊيم تعمير جي آخري مرحلن ۾ آهي جنهن سان  نوجوانن کي صحت مند سرگرميون مهيا ٿي ملنديون، تقريب م زندگي جي مختلف شعبن سان تعلق   رکندڙ ماڻهن شرڪت ڪئي. ٻئي طرف ميڊيا سان ڳالهائندي عمران خان  تي هڪ دفعو ٻيهر ڇتي تنقيد ڪندي وفاقي گھرو وزير احسن اقبال چيو آهي ته جنهن اناڙي هڪ بلدياتي ادارو به ناهي هلايو اهو ويهه ڪروڙ عوام جي چاٻي گھري رهيو آهي . عمران خان ملڪ کي هڪ کڏ ۾  ته فٽو ڪري سگھي ٿو پر مٿانهين تي نه ٿو آڻي سگھي، هن چيو ته جنهن اناڙي هڪ بلدياتي ادارو نه هلايو هجي اهو ويهه  ڪروڙ عوام جي چاٻِي گھري رهيو آهي ۽  ايتري ۾ جيڪڏهن خان صاحب ترقي جو ليڪچر ڏيندو ته ان ليڪچر کي ردي جو ٽوڪري ۾ اڇلائي ڇڏيندس،  هن چيو ته عمران  خان ٽيسٽ ڪرڪيٽ ته کيڏي آهي پر  ترقي جي ميدان ۾ ڪلب ڪرڪيٽ ناهي کيڏي.

 

ٻين کي عدالتن آڏو پيش ٿيڻ ۽ احترام جو درس ڏيندڙ نوازشريف پاڻ ئي سبق وساري ويٺو : اعتزاز احسن

لاهور  (اين اين آءِ) پ پ پ جو مرڪزي اڳواڻ سينيٽراعتزاز احسن چيو ته ٻين  کي عدالتن آڏو پيش ٿيڻ  ۽ احترام جو  درس ڏيندڙ نوازشريف پاڻ ئي سبق وساري ويٺو آهي. تجربي ۾ پنهنجو مٽ نه رکندڙ جي دور ۾ معيشت هڏڪين ۾ آهي، نون ليگ جي وڏن جي لنڊن ياترا تي گھڻو ڪجھۡه سوچي سگھجي ٿو، هڪ انٽرويو ۾ هن چيو ته پ پ پ پهريان به جمهوريت جو ساٿ ڏنو ۽ اڳتي به هو پنهنجو ڪردار ادا ڪندي، پ پ پ جي قيادت واضع ڪري چڪي آهي ته شريف خاندان ڪنهن به قسم جو رابطو نه ٿو ٿي سگھي ، هن چيو ته نوازشريف ٻين کي ادارن جي احترام جو درس ڏيندو  هو پر پاڻ ئي سبق وساري ويٺو آهي . عدالت جي آڏو پيش ٿيڻ جي بدران ڇوٽ جو درخواستون ٿينديون پيون وڃن، هن چيو ته انصاف جي معاملي تي ٻٽو معيار نه هجڻ گھرجي، هن چيو ته پ پ پ ۽ نون ليگ وارن جي لاءِ  قانون الڳ الڳ آهي.

 

21 سالن کان منهنجو مقابلو سياستدانن سان نه مافيا سان آهي: عمران خان

منڊي بهاءُ الدين (ويب ديسڪ): پي ٽي آءِ چيئرمين عمران خان چيو آهي ته جمهوريت جي نالي تي عوام کي ڦرڻ ڇا هوندو آهي؟، 21 سال منهنجو مقابلو سياستدانن سان نه مافيا سان ٿيو، جلسي کي خطاب ڪندي عمران خان چيو ته سياستدان عوام جي خدمت ڪندو آهي ته اها عبادت هوندي آهي، سياستدانن ۽ مافيا ۾ فرق هوندو آهي، حڪومت عزير بلوچ جي جي آءِ ٽي رپورٽ عوام جي سامهون آڻي، عزير بلوچ انڪشاف ڪيا آهن، عزير بلوچ اعتراف ڪيو ته زرداري جي چوڻ تي هن ماڻهن کي قتل ڪرايو، عمران خان چيو ته عزير بلوچ جو چوڻ آهي پيپلز پارٽي جي قيادت جي چوڻ تي ان خالد شهنشاهه کي قتل ڪيو، خالد شهنشاهه بينظير ڀٽو قتل ڪيس جو گواهه هيو، عزير بلوچ چوي ٿو سنڌ جي 14 شگر ملز تي قبضو ڪري زرداري کي ڏياريون، نواز شريف جا ٻار ارب پتي بڻجي ويا، پئسا ڪيئن ڪمايا؟، پي ٽي آءِ چيئرمين چيو ته هي ماڻهو قوم جو پئسو لٽيندا آهن، ماڻهو خريد ڪندا آهن، جيڪي ماڻهو ناهن وڪامندا هيماڻهو انهن کي ٻاهر ڪڍي ڇڏيندا آهن، ماڊل ٽائون ۾ 14 ماڻهن کي قتل ڪيو ويو، ڇا سياستدان ايئن ڪندا آهن؟، آصف زرداري ڪڏهن ڪڏهن پاڪستان ايندو آهي، بلاول ڀٽو کي اردو مشڪل سان ايندي آهي، پي ٽي آءِ چيئرمين چيو ته ملڪ قرضي ٿي ويو آهي، اسان اهي قرض واپس ڪيئن ڪنداسين، هي ماڻهو پاڪستان جا مير جعفر ۽ مير صادق آهن، ايف بي آر کي ٺيڪ ڪندس، ايماندار ماڻهن کي مقرر ڪندس، شريف خاندان ارب پتي آهي، انهن کان پڇو ڪيترو ٽيڪس ڏيندا آهن، نيب ڪرپشن ختم ڪرڻ جو ادارو آهي، نيب کي درست ڪندس، هن چيو ته آصف زرداري ٻڌائي ڪيترو ٽيڪس ڏيندو آهي، وڏن وڏن واڳن کي مان ئي پڪڙيندس، ملڪ ۾ ٽيڪس 35 سئو ارب وصول ٿيندو آهي، هڪ سال ۾ 4 هزار ارب رپين جي ڪرپشن ٿيندي آهي، اسحاق ڊار جو اربين رپين جو دبئي ۾ گهر بڻجي رهيو آهي، نواز شريف جا ٽي سئو ارب رپيا ٻاهر پيا آهن، آصف زرداري جا دبئي، فرانس، لنڊن ۾ محل آهن، عمران خان چيو ته ويچاري مظلوم، معصوم کي ان لاءِ ڪڍيو ويو، ان ٽيهه سال عوام کي ڦريو، ملڪ جو ڦريل پئسو واپس آڻيندس، جڏهن ڪنهن کان خيرات گهرون ته عزت ناهي ٿيندي، شهباز شريف ماڊل ٽائون ۾ 14 ماڻهن کي قتل ڪرايو، شريف مافيا ٽيهه سالن کان پنجاب تي قبضو ڪيون ويٺي آهي، هارين کي سستو ڀاڻ فراهم ڪنداسين، نواز شريف ۽ زرداري عوام تي ظلم ڪيو، خادم اعليٰ ڪهڙو ڊرامو ڪندو آهي، ان کي ڀارت اماڻي ڇڏيو، فلمن ۾ ڪم ڪري، شهباز سريف چوندو هيو لوڊشيڊنگ ڇهه مهينن ۾ ختم نه ڪريان ته نالو مٽائي ڇڏجو، رائيونڊ جي سڪيورتي تي 5 سالن ۾ 7 ارب رپيا خرچ ٿيا، ٻڌايو شهباز شريف جو نالو ڇا رکون، شهباز شريف جو نالو شوباز شريف رکون ٿا، شهباز شريف بالي ووڊ هليو وڃي، وڏو اسٽار بڻجي ويندو، سٺو ولن بڻجندو.

 

متحده پاڪستان جي وڏي وڪيٽ ڪري پئي، ڊپٽي ميئر ارشد وهره پي ايس پي ۾ شامل

ڪراچي( ويب ڊيسڪ ) ايم ڪيو ايم پاڪستان جي وڌيڪ هڪ وڪيٽ ڪري پئي آهي ۽ ڊپٽي ميئر ارشد وهره پي ايس پي ۾ شامل ٿي ويو آهي. ايم ڪيو ايم جي ڊپٽي ميئر ارشد وهره پاڪستان هائوس پهچي ايم ڪيو ايم ۾ شامل ٿيڻ جو اعلان ڪيو. ان موقعي تي ارشد وهره چيو ته اسان ڪراچيءَ جي عوام سان ڪيل واعدا پورا نه ڪري سگهيا آهيون. هن چيو ته عوام جي خدمت ڪرڻ بدران اختيار نه هئڻ جو پٽڪو ڪيو ويو پر هاڻي شهرين کي منهن نه ٿا ڏئي سگهون. سندس چوڻ هو ته جيڪا ذميواري پوري نه ڪري سگهجي ان کي ڇڏڻ ئي بهتر آهي تنهن ڪري هن استعيفيٰ ڏيڻ جو فيصلو ڪيو. ارشده وهره چيو ته مصطفيٰ ڪمال شهرين جون اميدون پوريون ڪيون هيون هو سٽي ناظم طور هڪ مثال آهي. هن چيو ته جيڪي وسيلا هئا تنهن ۾ عوام جا مسئلا حل ڪري پئي سگهياسين جيڪا نه ڪري سگهياسين. سندس چوڻ هو ته عوام کي هڪ سال تائين رڳو واعدن تائين ڪجهه نه ڏئي سگهياسين. سندس چوڻ هو ته هو ڪنهن دٻاءَ تحت پي ايس پي ۾ شامل نه ٿيو آهي، عوام جا مسئلا حل نه ٿيڻ کانپوءِ عهدي تي رهڻ جو حق ناهي. ارشد وهره چيو ته هو پاڪستاني شهري آهي، هتي ئي رهندو، ڀڄڻ وارو ناهي، هر قسم جي جاچ کي منهن ڏيڻ لاءِ تيار آهيان.