تازيون خبرون

Daily Archives: October 24, 2017

5 ارب کان وڌيڪ جي ڪرپشن، شرجيل ميمڻ عدالتي اڱڻ مان گرفتار، مذاحمت، ڇڪتاڻ، نعريبازي

ڪراچي (ويب ڊيسڪ): سنڌ هاءِ ڪورٽ طرفان سڌ سماءَ واري اڳوڻي وزير شرجيل ميمڻ جي ضمانت ۾ واڌ جي درخواست رد ٿيڻ بعد نيب شرجيل ميمڻ کي عدالت مان گرفتار ڪري ورتو، سنڌ هاءِ ڪورٽ جي چيف جسٽس، جسٽس احمد علي شيخ شرجيل ميمڻ سميت ٻين 13 جوابدارن طرفان داخل ضمانت ۾ واڌ جي درخواست جي ٻڌڻي ڪئي، ان موقعي تي نيب پراسيڪيوٽر ياسر صديق مغل شرجيل ميمڻ جي عبوري ضمانت ۾ واڌ جي مخالفت ڪئي، ٻڌڻي دوران چيف جسٽس سنڌ هاءِ ڪورٽ شرجيل انعام ميمڻ سميت 13 جوابدارن جي عبوري ضمانت ۾ واڌ جي درخواست رد ڪري ڇڏي، پيپلز پارٽي جي اڳواڻ شرجيل ميمڻ وڪيل شهاب سرڪي جي ذريعي نيب کي گرفتاري کان روڪڻ جي درخواست عدالت ۾ جمع ڪرائي، جنهن کي چيف جسٽس ٻڌڻ کان انڪار ڪندي کيس گرفتار ڪرڻ جو حڪم ڏنو، شرجيل ميمڻ درخواست ۾ موقف اختيار ڪيو هيو ته سپريم ڪورٽ ۾ اپيل ڪرڻ تائين نيب کي گرفتاري کان جهليو وڃي، شرجيل ميمڻ جي ضمانت جي درخواست رد ٿيڻ بعد نيب جي ٽيم کيس گرفتار ڪرڻ لاءِ عدالت پهتي ته سندس وڪيلن نيب عملدارن کي اندر اچڻ کان روڪي ڇڏيو، جڏهن ته ان موقعي تي رينجرز به عدالت ٻاهران پهچي وئي، ڪيس جي ٻڌڻي ختم ٿيڻ بعد هاءِ ڪورٽ جا جج صاحب به عدالت مان روانا ٿي ويا، پر شرجيل ميمڻ عدالت کان ٻاهر نه آيو، جڏهن ته سندس وڪيلن درخواست ڪئي ته شرجيل ميمڻ کي جڊيشل رمانڊ تي جيل اماڻيو وڃي، پ پ اڳواڻ شرجيل ميمڻ 5 ڪلاڪن کان وڌيڪ عدالت جي عمارت ۾ موجود رهيو، جڏهن ته نيب ڪيس ۾ نامزد جوابدارن مان 4 کي اڳ ۾ ئي گرفتار ڪري ورتو، جڏهن ته شام 5 وڳي ڌاري شرجيل ميمڻ جي عدالت مان ٻاهر اچڻ تي نيب جي ٽيم ان کي به گرفتار ڪري ورتو، نيب عملدارن طرفان جڏهن شرجيل ميمڻ کي گرفتار ڪيو ويو ته سخت ڇڪتاڻ ٿي ۽ ان دوران اڳوڻي وزير جي قميص جا بٽڻ به ٽٽي پيا، شرجيل ميمڻ جي گرفتاري وقت پيپلز پارٽي جا ڪجهه اسيمبلي ميمبر به ساڻس گڏ هئا، جن اڳوڻي وزير جي گرفتاري تي مزاحمت ڪئي ۽ سخت نعريبازي ڪئي، جڏهن ته ان موقعي تي هاءِ ڪورٽ جي اڱڻ ۾ سڪيورٽي صورتحال برقرار رکڻ لاءِ پوليس ۽ رينجرز جي نفري به موجود هئي، نيب عملدار شرجيل ميمڻ کي گاڏي ۾ ويهاري گڏ وٺي ويا، پوليس ۽ رينجرز جي وڏي نفري نيب جي گاڏي کي گهيري ۾ آڻي رکيو هو، اڳوڻي صوبائي وزير کي سخت سڪيورٽي ۾ نيب سنڌ جي ريجنل آفيس ۾ منتقل ڪيو ويو آهي، جڏهن ته ان موقعي تي سندس وڪيلن ۽ پارٽي اڳواڻن جو وڏو انگ ۾ گڏ آيو، ذريعن جو چوڻ آهي ته شرجيل ميمڻ کي سڀاڻي احتساب عدالت ۾ پيش ڪيو ويندو، واضح رهي ته پيپلز پارٽي اڳواڻ شرجيل ميمڻ تي سنڌ جي سڌ سماءَ کاتي ۾ 5 ارب رپين کان وڌيڪ ڪرپشن جا الزام آهن.

نااهل شخص پارٽي جو سربراهه نٿو بڻجي سگهي، سينيٽ بل منظور ڪري ورتو

اسلام آباد(ويب ڊيسڪ) مخالف پارٽين چونڊ بل 2017ع ۾ وڌيڪ ترميم جو بل سينيٽ ۾ پيش ڪيو جنهن کي منظور ڪيو وي. اليڪشن بل جي شق 203 ۾ ترميم جو بل سينيٽر شبلي فراز پيش ڪيو، ترميم بل جماعت اسلامي، مسلم ليگ ق، پيپلز پارٽي ۽ پي ٽي آءِ طرفان پيش ڪيو ويو، پيپلز پارٽي، ق ليگ، پي ٽي آءِ، ايم ڪيو ايم، اي اين پي، فاٽا ميمبرن تحريڪ جي حمايت ۾ ووٽ ڏنا، بل پيش ڪرڻ واري تحريڪ جي حق ۾  46 ۽ مخالفت 21 ووٽ آيا. ترميمي بل جي متن ۾ چيو ويو آهي ته جيڪو پارليامينٽ ميمبر بڻجڻ جو اهل ناهي اهو پارٽي سربراهه يا عهديدار بڻجڻ جي به اهل ناهي. سينيٽر شبلي فراز جو چوڻ هو ته اها شق عدالتي فيصلي جي تذليل هئي، شق جي منظوري سان ايوان جي بدنامي ٿي ۽ پارليامينٽ تي داڳ لڳو، حڪومت طرفان ترميمي بل جي مخالفت ڪئي وئي، ان موقعي تي زاهد حامد جو چوڻ هو ته سڄي قانون ۾ مخالف ڌر طرفان 631 تجويزون آيون، اصل بل ۾ ڪا هڪ تجويز به شق 203 بابت نه هئي، ڇا هاڻ مخالف ڊڪٽيٽر جي دور ۾ بڻايل قانون واپس آڻڻ چاهيون ٿا؟

 

اسحاق ڊار جا سمورا اثاثا منجمد، رپورٽ عدالت ۾ پيش، وڪيلن ۾ ڄنڊا پٽ

اسلام آباد (ويب ڊيسڪ): قومي احتساب بيورو (نيب) جي چيئرمين جسٽس ريٽائرڊ جاويد اقبال ناڻي واري وزير جا سمورا اثاثا منجمد ڪري ڇڏيا، جڏهن ته نيب اسحاق ڊار جا اثاثا منجمد ڪرڻ جي رپورٽ احتساب عدالت ۾ جمع ڪرائي ڇڏي آهي، جنهن موجب ناڻي وزير جا منقولا ۽ غير منقولا اثاثا منجمد ڪري ڇڏيا آهن، نيب پراسيڪيوٽر عدالت کان درخواست ڪئي ته اسحاق ڊار جا اثاثا منجمد ڪرڻ جي فيصلي جي توثيق ڪئي وڃي، جنهن تي عدالت اسحاق ڊار کي نوٽس جاري ڪندي چيو ته ايندڙ ٻڌڻي تي بحث ڪريو، ناڻي وزير خلاف ڪيس جي ٻڌڻي 30 آڪٽوبر تائين ملتوي ڪري ڇڏي ۽ استغاثا جي وڌيڪ ٻن گواهن کي طلب ڪري ورتو آهي، احتساب عدالت ۾ ناڻي وزير اسحاق ڊار خلاف آمدني کان وڌيڪ اثاثا ريفرنس جي ٻڌڻي ٿي، نيب طرفان داخل ڪيل ريفرنس ۾ ناڻي وزير اسحاق ڊار اسلام آباد جي احتساب عدالت ۾ پيش ٿيو، ان ڪيس ۾ هي سندس ستين پيشي آهي، ٻڌڻي ۾ استغاثه جي گواهه ۽ نجي بئنڪ جي آفيسر عبدالرحمان گوندل جو بيان قلم بند ڪيو ويو، گواهه اسحاق ڊار جي بينڪ آڪائونٽ جا تفصيل به فراهم ڪري ڇڏيا، خواجا حارث اعتراض واريندي چيو ته نيب کي ڏنل ۽ عدالت ۾ جمع ڪرايل ڪاغذن ۾ تضاد آهي، گواهه تي جرح دوران اسحاق ڊار جي وڪيل خواجا حارث ۽ نيب پراسيڪيوٽر وچ ۾ سخت تلخ ڪلامي به ٿي آهي، وڪيل خواجا حارث چيو ته نيب جو رويو ناقابل برداشت آهي، ۽ مان پنهنجو احتجاج رڪارڊ ڪرائي رهيو آهيان، مون کي نيب پراسيڪيوٽر تي افسوس ٿئي ٿو ۽ سمجهه ۾ نٿو اچي ته اهو ڪيئن پراسيڪيوٽر آهي، گواهه ماهر آهن ۽ سمجهدار به ته پوءِ نيب پراسيڪيوٽر ڇو هر هر مداخلت ڪري رهيو آهي، نيب پراسيڪيوٽر عمران شفيق جواب ۾ چيو ته مون تي ذاتي حملا نه ڪيا وڃن ۽ مان سينيئر وڪيل کان اهڙن حملن جي اميد نٿو ڪيان، خواجا حارث نيب پراسڪيوٽر کي چيو ته اوهان گواهه تي اثر اندار ٿيڻ جي ڪوشش نه ڪيو، جواب ۾ عمران شفيق چيو ته گواهه عدالت آڏو بيان ڏئي رهيو آهي ته ڪيئن اثرانداز ٿي سگهي ٿو؟، جج محمد بشير جو چوڻ هو ته جيڪڏهن اوهان ٻنهي وڙهي بس ڪئي آهي ته پوءِ هاڻي اڳتي وڌون ۽ قانوني ڪارروائي پوري ڪيون، احتساب عدالت اڄ اسحاق ڊار خلاف استغاثا جي ٻن گواهن کي طلب ڪيو هو، جنهن ۾ خانگي بئنڪن جي آفيسرن عبدالرحمان گوندل ۽ مسعود غني شامل آهن.

 

عمران ۽ جهانگير نااهلي ڪيس: چاهيون ٿا ته ڌرين کي موقعو ملي ۽ سچ سامهون اچي: چيف جسٽس

اسلام آباد(ويب ڊيسڪ) سپريم ڪورٽ ۾ عمران خان ۽ جهانگير ترين  جي نااهلي ڪيس جي ٻڌڻي دوران چيف جسٽس ثاقب نثار ريمارڪس ڏيندي چيو ته نعيم بخاري صاحب: توهان جلدي ئي دليل ڏئي ڇڏيندا آهيو، اسان کي گهڻين ئي شين کي سمجهڻو پوندو آهي، ڪيس ۾ جاچ  به ڪري رهيا آهيون، چاهيون ٿا ته ٻنهي کي موقف پيش ڪرڻ جو موقعو ملي، چيف جسٽس ثاقب نثار جو چوڻ هو ته درخواستگذار موقف تبديلي جي درخواست تي اعتراض اٿاريا، چاهيون ٿا ته ڌرين کي موقعو ملي ۽ سچ سامهون اچي. ان تي عمران خان جي وڪيل نعيم بخاري دليل ڏيندي چيو ته تاثر اهو آهي ته عمران خان عدالتي سوالن تي يوٽرن ورتو آهي. بيان حلفي ڏيندي عمران خان وٽ دستاويز نه هئا. حنيف عباسي جي وڪيل اڪرم شيخ چيو ته ڌرين لاءِ ڪيس جي ٻڌڻي مڪمل ٿي چڪي، عدالت کان اپيل آهي ته فيصلو محفوظ ڪري ڇو ته ٻڌڻي مڪمل ٿيڻ کان پوءِ دستاويز جمع نٿا ڪرائي سگهجن، نعيم بخاري اصيل جي خال کي پورو ڪري رهيو آهي. چيف جسٽس ريمارڪس ڏيندي چيو ته اڪرم شيخ صاحب! توهان پنهنجي واري تي اعتراض ڪري سگهو ٿا. جسٽس فيصل عرب پڇاڻو ڪيو ته نامزدگي وارن ڪاغذن جي وقت نيازي سروسز جي اڪائونٽ ۾ ڪيتري رقم هئي؟ ان تي نعيم بخاري دليل ڏيندي چيو ته آگسٽ 2012ع  ۾ نيازي سروسز جي اڪائونٽ ۾ 471 پائونڊ هئا، عمران خان نيازي سروسز جي اڪائونٽ مان 22 هزار يورو مارچ 2008ع ۾ مليا. جسٽس عمر عطا بنديال ريمارڪس ڏيندي چيو ته ڏسڻو آهي ته پاناما فيصلي ۾ شاهدين بابت ڇا چيو ويو، پاناما ڪيس ۾ به اهڙا ئي سوال هئا، اسان جي سامهون بي بنياد دستاويز آيا. جنهن تي نعيم بخاري چيو ته عدالت چاهي ته دستاويزن جي تصديق ڪرائي سگهي ٿي، جسٽس عمر عطا چيو ته توهان پاناما ڪيس فيصلي کي پڙيو، اسان به ڏسون ٿا. نعيم بخاري چيو ته منهنجي اصيل عمران خان خلاف ڪو ڪيس نٿو بڻجي. جسٽس فيصل عرب چيو ته نيازي سروسز جي دستاويزن ۾ عدم مطابقت آهي. ٻڌڻي دوران چيف جسٽس ثاقب نثار ريمارڪس ڏيندي چيو ته 28 هزار پائونڊن جي انٽري اسٽيٽمنٽ جي اڳئين صفحي تي ناهي، 82 هزار پائونڊن جي انٽري صفحي نمبر 11 موجود آهي،  نيازي سروسز جا دستاويز فائل ڪيو. پي ٽي آءِ وڪيل نعيم بخاري چيو ته عمران خان ڪنهن به جاءِ تي يوٽرن ناهي ورتو، عمران خان جو بيان حلفي يادداشت تي ٻڌل آهي، انهن ڪيسن ۾ منهنجو بلڊ پريشر 160 کان به وڌيڪ ويو، روزاني ورزش ڪندو آهيان، عدالت اجازت ڏئي ته هاڻ آرام ڪندس، نعيم خباري جو چوڻ هو ته ٽي وي تي اڪرم شيخ بابت غلط ڳالهائڻ تي معافي ٿو گهران. حنيف عباسي جي وڪيل اڪرم شيخ جو چوڻ هو ته مون کي گاريون ڏنيون، نعيم بخاري معافي نه به گهري تڏهن به ڇا ٿو ڪري سگهان. ان تي سپريم ڪورٽ جي چيف جسٽس جو چوڻ هو ته اڪرم شيخ سٺي انداز ۾ دليل ڏنا، ڪنڊڪٽ جي تعريف ڪندو آهي. عدالت ڌرين جا دليل ٻڌڻ کان پوءِ ٻڌڻي سڀاڻي تائين ملتوي ڪري ڇڏي.

 

پاڪستان اسٽيل ۽ پي آءِ اي خساري ۾ آهن، مستقل حل نجڪاري آهي: شاهد خاقان عباسي

اسلام آباد (ويب ڊيسڪ): وزيراعظم شاهد خاقان عباسي چيو آهي ته عدالت جي فيصلي تي دل سان عمل ڪيو، هٿيار رکڻ هر شهري جو حق آهي پر آٽوميٽڪ هٿيار رکڻ نه، ڪراچي ۽ فاٽا ۾ امن امان جي صورتحال تمام بهتر آهي، وزيراعظم چيو ته ٽيڪس جو دائرو وڌائڻ منهنجي ترجيح آهي، حڪومت جي ڪارڪردگي جو فيصلو عوام چونڊن ۾ ڪندو، اڳوڻي وزيراعظم جي وڃڻ سان ملڪ ۽ معيشت تي اثر پيو، 2018 ۾ 2013 کان تمام بهتر پاڪستان ڇڏي وينداسين، وزارتن جي ڪارڪردگي جو جائزو مسلسل عمل آهي، هن چيو ته شريف خاندان ۾ اختلاف رڳو افواهون آهن، ان ۾ ڪا سچائي ناهي، رياض پيرزاده کي جنرل ڪائونسل جي اجلاس ۾ ڳالهه ڪرڻ گهربي هئي، رياض پيرزاده جي راءِ جو احترام آهي، ان کي پنهنجي راءِ جو حق آهي، وزيراعظم چيو ته آٽوميٽڪ هٿيار ختم ڪرڻ جي ضرورت آهي، قدم کڻي رهيا آهيون، عوام عدالتي فيصلي کي تسليم نٿو ڪري، تاريخ فيصلو ڪندي، غير جمهوري فيصلن جا اثر فوري اچڻ شروع ٿي ويندا آهن، هن چيو ته حڪومت جي ڪارڪردگي مجموعي هوندي آهي، فيصلو عوام ڪندو آهي، وزارت عظميٰ جو اميدوار بڻائڻ نواز شريف ۽ پارٽي جو فيصلو هيو، هن چيو ته شريف خاندان يا مسلم ليگ ن ۾ اختلافن جون خبرون بي بنياد آهن، وزيراعظم شاهد خاقان عباسي چيو ته سياسي جماعت ۾ هر قسم جي خيالن جي گنجائش هوندي آهي، پي آءِ اي به خساري ۾ هلي رهيو آهي، پاڪستان اسٽيل ۽ پي آءِ اي جو مستقل حل نجڪاري آهي، ڪابينا جي ميمبرن جو انگ وزيراعظم جو فيصلو هوندو آهي، پاڪستان اسٽيل جو خسارو ڪافي حد تائين گهٽ ڪيو آهي، ڀارت جا پاڪستان بابت ناپاڪ ارادا آهن.

 

نوازشريف نه رڳو عدالتن جي توهين پر عدالتن سان محاذ آرائي اختيار ڪري رهيو آهي : آصف علي زرداري

ڪراچي  (اين اين آءِ) پاڪستان جي اڳوڻي صدر آصف علي زرداري چيو ته نوازشريف نه صرف عدالتن جي توهين ئي نه پر هو  عدالتن سان محاذ آرائي اختيار ڪري رهيو آهي،  وفاقي حڪومت سنڌ ۾نيب کي اسانجي خلاف استعمال ڪيو، 2018 ۾ پ پ پ حڪومت ٺاهيندي، پر اسان انهن کان انتقام نه وٺنداسين پر نون ليگ جي اقتدار واري دور جو حساب وٺنداسي، خانگي ٽي وي  سان ڳالهائيندي هن  چيو ته مسلم ليگ نون جي اقتصادي پاليسي مڪمل طور تي ناڪام ٿي ڇڪي آهي  پاڪستان رپئي جو قدر گھٽجي رهيو آهي جڏهن ته ناڻي  مٽا سٽا جا ذخيره به ختم ٿي رهيا آهن هن وقت اسانکي افغانستان ۽ ايران کي سستي ڪڻڪ ۽ کنڊ فراهم ڪرڻ گھرجي ۽ زراعت کي هٿي ڏئي ملڪي زرعي مصنوعات جي برآمدات کي وڌائڻ  گھرجي. چين سان سي پيڪ تي ڪم ٿي رهيو آهي، اسانکي گھرجي ته چين کي اسان زرعي جنسون موڪليون. آصف علي زرداري چيو ته پاڪستان هڪ زرعي ملڪ آهي ۽ ان جو سمورو دارمدار آبپاشي تي آهي ، اسان جي دور ۾ پاڻي جي ايتري کوٽ نه هئي سياري ۾ پاڻي  گڏ نه ڪري اسان تمام گھڻو ظلم ڪري رهيا آهيون.

 

آئي سي سي وف جي وڏي وزير سان ملاقات، سيڪيورٽي معيار موجب ڏيڻ جي خاطري

ڪراچي (23 آڪٽوبر 2017): سنڌ جي وڏي وزير سيد مراد علي شاهه چيو آهي ته ڪراچي ڪرڪيٽ جي دنيا جو مرڪز آهي، ڪرڪيٽ جي واڌ ۾ ڪراچيءَ جو مثالي ڪردار رهيو آهي. اها ڳالهه اڄ وزيراعليٰ هائوس ۾ انٽرنيشنل ڪرڪيٽ ڪونسل جي سڪيورٽي ڪنسلٽنٽ ريگ ڊڪسن سان ملاقات دوران ڪئي. ملاقات ۾ ڊي جي رينجرز محمد سعيد، آءِ جي پوليس اي ڊي خواجا، گهرو سيڪريٽري قاضي شاهد پرويز، وڏي وزير جو اسپيشل سيڪريٽري عبدالرحيم شيخ کانسواءِ نيشنل اسٽيڊيم ڪراچي جو جنرل مينجر ارشد خان ۽ ڪرنل اعظم پڻ موجود هئا. انٽرنيشنل ڪرڪيٽ جي پرڏيهي سڪيورٽي ڪنسلٽنٽ ريگ ڊڪسن وڏي وزير جي يقين ڏيارڻ کانپوءِ چيو ته انٽرنيشنل ڪرڪيٽ کي ڪراچيءَ م ميچ ڪرائڻ جي منظوري ڏينداسين. وڏي وزير سيد مراد علي شاهه چيو ته ڪراچيءَ جي شهرين جو حق آهي ته انٽرنيشنل ڪرڪيٽ ڏسن، ڪراچي شهر هاڻي پُرامن آهي، هتان جي شهرين قانون لاڳو ڪندڙ ادارن جي سهڪار سان دهشتگردن کي ڀڄايو آهي. هن آءِ سي سي جي پرڏيهي سڪيورٽي ڪنسلٽنٽ کي يقين ڏياريو ته سڀ ڪجهه اوهان جي معيار مطابق هوندو، اسٽڊيم ۾ اسان اوهان سان گڏ هونداسين. ان موقعي تي آءِ سي سي جي پرڏيهي سڪيورٽي ڪنسلٽنٽ ريگ ڊڪسن چيو ته اسان ڪرڪيٽ ٽيم جي سڪيورٽي جي معيار تي ڊي جي رينجرز، آءِ جي پوليس ۽ گهرو وزارت سان خيالن جي ڏي وٺ ڪئي آهي. وڌيڪ يقين ڏياريندي وڏي وزير چيو ته ڪرڪيٽ ٽيمن کي ايئرپورٽ کان هوٽل، هوٽل کان اسٽيڊيم ۽ اسٽيڊيم کان پلي گرائونڊ تائين الڳ رستو فراهم ڪيو ويندو. واضح رهي ته ان سلسلي ۾ چيئرمين پي سي بي نجم سيٺي وڏي وزير سيد مراد علي شاهه سان ملاقات ڪئي هئي ۽ انهيءَ ملاقات ۾ پاڪستان سپر ليگ جا چار ميچ ڪراچيءَ ۾ ڪرائڻ جو اعلان ڪيو آهي.

 

حمزا شهباز ڀاءُ آهي، ساڻس ڪي به اختلاف نه آهن، حمزا شهباز سان سندس ڪي به اختلاف نه آهن : مريم نواز

لاهور  (اين اين آءِ) پاڪستان مسلم ليگ نون جي مرڪزي اڳواڻ مريم نواز واضع ڪيو آهي ته سندس حمزه شهباز سان ڪوبه اختلاف ناهي نوازشريف جي قيادت ۾ اسان سڀ متحد آهيون، ۽ 2018 ۾ نوازشريف وزيراعظم ٿيندو، شريف فيملي ۾ اختلافن جو خبرون ويهن سالن کان ٻڌي رهيا آهيون، مخالفن وٽ جڏهن ڪابه ڳالهه  نه هوندي آهي ته بس افواهه ڦهلائيندا آهن، اهڙن خيالن جو اظهار هن گذڙيل ڏينهن تڪ اين اي 120 جي دوري جي موقعي تي ميڊيا سان ڳالهائنيدي ڪيو، مريم نواز چيو ته تڪ ۾ ترقياتي ڪم جھڙي طرح ٿيڻ گھرجن هان هاڻِي تيئن ٿيندا ان حوالي سان  مان پاڻ انهن شين جي سرپرستي ڪنديس، نوازشريف جي پرڏيهه مان وطن واپس اچڻ جي سوال تي مريم نواز چيو ته نوازشريف وطن واپس اچي رهيو آهي ۽ ان لاءِ هو اتان هليو آهي، هن چيو ته مسلم ليگ نون پهريان کان متحرڪ آهي ۽ ان جي خلاف جيڪو ڪجھه ٿي رهيو آهي  اهو ان ڳالهه جو ثبوت آهي ته نون ليگ سڀکان وڌيڪ متحرڪ آهي. حمزه شهباز سان اختلاف جي حوالي سان مريم نواز چيو ته الله نه ڪري ته اسان ۾ ڪو  اختلاف ٿئي تنهن ڪري اهڙين خبرن ۾  ڪا به صداقت ناهي، هو منهنجو ننڍو ڀاءُ آهي ان سان ڪو اختلاف ناهي ان کان اڳ مسلم ليگ نون  جي اڳواڻ مريم نواز تڪ اين اي 120 ۾ مزنگ جي علائقي ۾ پهتي جتي ڪارڪنن سندس آجيان ڪئي.مريم نواز علائقي واسين  سان ملاقات ڪئي ۽ انهن جا مسئلا ٻڌا.

 

آصف زرداري ۽ فريال ٽالپر ڪرپٽ مافيا جا بادشاهه آهن، قوم اين آر او ٿيڻ نه ڏيندي: عمران خان

سيوهڻ (اين اين آءِ) پاڪستان تهريڪ انصاف جي چيرمين عمران خان چيو ته هن دفعي پهريون ڀيرو پ پ پ کي سنڌ مان شڪست ٿيندي، مونکي بهانون بڻائي لعل شهباز  قلندر جي مزار تي حاضري ڀرڻ کان روڪيو ويو، سنڌ ۾ ڪنهن قسم جي آزادي ناهي ماڻهن کي غلام بڻايو ويو آهي سنڌ جو عوام زرداري ۽ فريال ٽالپر کان تنگ آهي. هن دفعي قوم ڪنهن اين  آر او کي تسليم نه ڪندي  جيڪڏهن هن دفعي ڪو اين آر او آيو ته پوري قوم کي مان ٻاهر ڪڍندس، اسان ڪنهن به صورت ۾  هاڻي ڊيل نه ٿيڻ ڌينداسين ، ۽ ڪنهن قسم جو اين آر او تسليم نه ڪنداسين. حديبيا پيپر مل جو ڪيس اوپن آهي ۽ اسان جو مطالبو آهي ته سپريم ڪورٽ انکي فوري طور تي لڳايو وڃي. سومر تي  هن ميڊيا سان ڳالهائندي عمران خان چيو ته اسانجي جلسي ۾ ماڻهون هلي اچن ٿا اسان جي جلسن ۾ ماڻهن کي زبردستي نه پيو  آندو وڃي. مونکي لعل شهباز قلندر جي مزار تي حاضري ڏيڻي هئي ڪنهن مزار تي حاضري ڏيڻ جي لاءِ ڇا اجازت وٺڻي پوندي آهي، هتي ڪنهن قسم جي آزادي ناهي ماڻهن کي غلام بڻآيو ويو آهي، عمران خان چيو ته ڪنهن صوبي جي شايد ئي ايتري خراب صورتحال هجي جيتري سنڌ جي آهي. شهباز قلندر جي مزار تي حاضري کان  روڪڻ جي لاءِ بهانون بڻآيو ويو ته گارڊ گڏ آهن، جڏهن ته ٽي وي فوٽيج ڏسو، هن چيو ته سنڌ ۾ ڪابه آزادي ناهي ماڻهون غلام آهن، انتقامي ڪاروائي جي لاءِ پوليس کي استعمال ڪري ماڻهن تي تشدد ڪيو  ٿو وڃي، سنڌ جي پوليس جيڪڏهن غير جانبدار ٿي وڃي ته هتي پ پ پ هڪ سيٽ به نه ٿي کٽي سگھي  ۽ سنڌ مان ووٽ وٺي دبئي ۾ لانچن جي ذريعي ٻاهر پيسو  اماڻيون ويندو هو، هن دفعي پهريون دفعو  پ پ  پ کي سنڌ ۾ شڪست ٿيندي هن چيو ته پ پ پ پنهنجي مرضي اسان ادارن جا سربراهه رکيا اهن، عدليا آزاد آهي جنهن مان عوام کي اميد آهي، سنڌ جي پوليس ۽ زرداري ۽ فريال ٽالپر جا غلط ڪم بچا.ئڻ لاءِ استعمال ٿئي ٿي، وفاق ۾ ادارا سنڌ ۾ پوليس  وانگر استعمال ٿين ٿا.  پر امن احتجاج تي منهنجي خلاف دهشتگردي جي خلاف الزام مڙهيو ويو ، جمهوريت ۾ احتجاج ڪرڻ منهنجو حق آهي ، 300 ارب ٻاهر کڻي ويندڙ نااهل شخص جو احتساب ٿي رهيو آهي. عوام جي جان ۽ مال جي حفاطت ڪرڻ رياست جو ڪم آهي، حڪومت هڪ مجرم سان بيهي رهي آهي. هي هن جو ڪم ناهي . عمران خان چيو ته نااهل شخص کي بچائڻ جي بدران جلدي چونڊون بهتر آهي، پاڪستان جو ناڻون چوري ٿيو . مشرف تيڪيس معاف ڪرڻجو حق نه هيو، مشرف ٻه ارب وڪيلن تي خرچ ڪيا پوءِ اين آر او ڏئي ڇڏيو، هن دفعي اين آر او ڏنو ويو ته پوري پاڪستان ۾عوام کي ٻاهررستن تي ڪڍندس، جيڪڏهن مان جلدي چونڊن جو چيئ رهيو آهيان ته ان ۾ اسٽيبلشمينٽ جو ڪهڙو هٿ آهي . ملڪ جو وزيراعظم ڪرپٽ ماڻهون سان مليل آهي، صاف اليڪشن ڪرڻ هڪ جمهوري طريقو آهي. ايم ڪيو ايم جي بچاءَ جو طريقو ايم ڪيو ايم جي باني کان مڪمل  عليحدگي آهي، ملڪ  کي  ورهائڻ جي  ڳالهه ڪندڙ کي اليڪشن جي ڳالهه نه ڪرڻ گھرجي.

 

ٺل لڳ وحشين جي 6 ورهين جي معصوم نينگري سان جنسي ڏاڍائي، مرڻيڪ حالت ۾ ڇڏي فرار، ٻارڙي جي حالت نازڪ

ٺل(رپورٽر) ٺل لڳ وحشي صفت جوابدارن پاران ڇهن ورهين جي نينگري سان جنسي ڏاڍائي ڪري مرڻينگ حالت ۾ اسڪول اندر ڦٽو ڪري ويو،نينگري کي بي هوشي واري حالت ۾ هٿ ڪري نازڪ حالت ۾ جيڪب آباد منتقل ڪيو ويو آهي، ٺل لڳ ڳوٺ مبارڪپور ۾ ڇهن ورهين جي معصوم نينگري مهرين ڀٽو کي وحشي جوابدارن پاران گهر ٻاهران کڻي ڪري ڳوٺ جي هڪ ڦٽل اسڪول ۾ جنسي ڏاڍائي ڪئي جنهن بعد نينگري کي چهري تي ڌڪ هڻي ڪري مرڻينگ ڪري وڌو،جڏهن ته  نينگري مهرين ڀٽو کي بي هوشي واري حالت ۾ هٿ ڪيو ويو آهي جنهن کي نازڪ حالت ۾ جيڪب آباد اسپتال منتقل ڪيو ويو آهي جڏهن ته هنجي حالت ڳڻتي جوڳي ٻڌائي پئي وڃي سول اسپتال جيڪب آباد جي ليڊي ڊاڪٽر فرحين مغل پاران نينگري سان جنسي ڏاڍائي جي تقديق ڪري ڇڏي آهي، نينگري جي حالت ڳڻتي جوڳي ٿيڻ ڪري هنکي انتهائي نگهداشت واري وارڊ ۾ داخل ڪيو ويو آهي،ان سلسلي ۾ ايس ايڇ او مبارڪپور ٻڌايوته گهر اڳيان راند ڪندي  ڇهن ورهين جي نينگري مهرين ڀٽو کي اغوا ڪري بعد م ڦتل اسڪول تي وٺي وڃي ڪري جنسي ڏاڍائي بعد سخت تشدد ڪري مرڻينگ ڪيو ويو،هن ٻڌايوته ليڊي ڊاڪٽر پاران نينگري سان جنسي ڏاڍائي جي تصديق ڪئي آهي جنهن کي نازڪ حالت ۾ اسپتال داخل ڪيو ويو آهي،هن چيوته جوابدارن جي ڳولها ڪئي پئي وڃي ڪيس داخل ڪري جوابدارن کي گرفتار ڪيو ويندو.