تازيون خبرون

Daily Archives: September 26, 2017

نواز شريف جي احتساب عدالت ۾ پيشي، فول پروف سيڪيورٽي ڏيڻ جو فيصلو

اسلام آباد( ويب ڊيسڪ )نواز شريف جي احتساب عدالت ۾ پيشي، فول پروف سيڪيورٽي ڏيڻ جو فيصلو، تفصيل موجب:  اڳوڻي وزيراعظم نواز شريف سان وزير اعظم شاهد خاقان عباسي ۽  اڳوڻي وفاقي گهرو وزير چوڌري نثار ملاقات ڪئي. لنڊن مان ڏيهه واپسيءَ بعد پنجاب هائوس ۾ نواز شريف سان ٻنهي اڳواڻن ملاقات ڪئي. ملاقات دوران ملڪي سياسي صورتحال تي ڳالهيون ڪيون ويون. ذريعن موجب ملاقات دوران اڳوڻي وزير اعظم نواز شريف وزير اعظم شاهد خاقان عباسي ۽ وزيرن جي ڪارڪردگي تي اطمينان جو اظهار ڪيو، ملاقات دوران چوڌري نثار علي نواز شريف جي قيادت تي اعتماد جو اظهار ڪيو. چوڌري نثار علي نواز شريف سان بيگم ڪلثوم نواز جي صحت بابت دريافت دريافت ڪيو. چوڌري نثار علي ۽ نواز شريف ۾ ڏيڍ مهيني کانپوءِ ٿيل ملاقات دوران هڪ ٻي کي ميارون پڻ ڏنيون ويون. چوڌري نثار علي اڳوڻي وزيراعظم کي پنهنجي خدشن کان آگاهه ڪيو. ٻئي طرف اڳوڻي وزير اعظم نواز شريف جي احتساب عدالت ۾ پيشي دوران فول پروف سيڪيورٽي ڏيڻ جو فيصلو، اڳوڻي وزير اعظم نواز شريف احتساب عدالت ۾ پيشي جي حوالي سان وفاقي وزيرن، پارٽي اڳواڻن ۽ قانوني ماهرن سان مشاورت مڪمل ڪري ورتي، فيصلو ڪيو ويو ته ڪارڪنن کي نه گهرايو ويندو ۽ نه روڪيو ويندو، عدالت ۾ نواز شريف سان گڏ پارٽي جا مرڪزي اڳواڻ ويندا، پيشي دوران احتساب عدالت اندر رينجرز ۽ ايليٽ فورس جو دستو مقرر ڪيو ويندو، ٻڌڻي دوران ميڊيا کي احاطي ۾ داخل ٿيڻ جي اجازت نه هوندي

 

ايمرجنسي لاڳو ڪرڻ، ججن جي نظربندي مشرف جو ذاتي فيصلو هو: ڪرنل (ر) انعام الرحيم

اسلام آباد (ويب ڊيسڪ): دهشتگردي ٽوڙ عدالت ۾ ججز نظربندي ڪيس جي ٻڌڻي دوران جنرل (ر) پرويز مشرف جي خلاف استغاثه جي آخري گواهه ڪرنل (ر) انعام الرحيم جو بيان رڪارڊ ڪيو ويو، ٻڌڻي دوران ڪرنل (ر) انعام الرحيم موقف اختيار ڪيو ته ايمرجنسي جو نفاذ ۽ ججز جي نظربندي پرويز مشرف جا ذاتي فيصلا هئا، هن چيو ته نومبر جي ايمرجنسي ۾ پرويز مشرف وردي جو غلط استعمال ڪيو ۽ پاڪ فوج جي ساک کي نقصان پهچايو، عدالت ۾ پنهنجي بيان ۾ سندس چوڻ هيو ته ججز جي نظربندي ۾ ڪور ڪمانڊرز جي مرضي شامل نه هئي، سندس چوڻ هيو ته ايمرجنسي خلاف وڪيلن ۽ اڳوڻن فوجين به احتجاج ڪيو، هن ٻڌايو ته عدليه بحالي تحريڪ ۾ سرگرم وڪيلن کي جيل اماڻيو ويو، پراسيڪيوٽر عامر نديم چيو ته سمورن گواهن جون شاهديون مڪمل ٿي ويون آهن، بعد ۾ ٻڌڻي کي پنج آڪٽوبر تائين ملتوي ڪيو ويو، مشرف خلاف 60 ججن کي نظربند ڪرڻ تي 11 آگسٽ 2009 تي ايف آءِ آر داخل ڪئي وئي، جنهن ۾ دهشتگردي جون دفعات به شامل ڪيون ويون، جون 2013 ۾ ان تي فرد جرم لاڳو ڪئي وئي، جنهن موجب اڳوڻي صدر ججز کي نظربند ڪيو ۽ ملڪ ۾ ايمرجنسي لاڳو ڪئي.

 

غير قانوني اثاثه ڪيس: اسحاق ڊار تي فرد جرم لاڳو ڪرڻ لاءِ تاريخ مقرر

اسلام آباد( ويب ڊيسڪ ) احتساب عدالت غير قانوني اثاثن جي ڪيس ۾ ناڻي واري وزير اسحاق ڊار تي فرد جرم لاڳو ڪرڻ لاءِ 27 سيپٽمبر جي تاريخ مقرر ڪري ڇڏي آهي. ضمانت ٿيڻ جوڳا گرفتاري وارنٽ جاري ٿيڻ کانپوءِ ناڻي وارو وزير اسحاق ڊار احتساب عدالت ۾ جج محمد بشير جي اڳيان پيش ٿيو. ٻڌڻي دوران جج سوال ڪيو ته جوابدار جا وارنٽ اڃا برقرار آهن پر مچلڪا داخل ڇو نه ڪيا ويا آهن. اسحاق ڊار جي وڪيل موقف اختيار ڪيو ته هو ضمانتي مچلڪا گڏ کڻي آيا آهن جيڪي هاڻي جمع ڪرايا ويندا. نيب پراسيڪيوٽر عدالت کي آگاهه ڪيو ته عدالتي حڪم ملندي ئي اسحاق ڊار جي لاهور ۽ اسلام آباد جي گهرن ۾ ڇاپا هنيا ويا پر جوابدار جي گرفتاري عمل ۾ نه اچي سگهي پر جوابدار اڄ عدالت ۾ اوچتو پيش ٿيو، عدالت کي اپيل آهي ته جوابدار جا ضمانت نه ٿيڻ جوڳا گرفتاري وارنٽ جاري ڪيا وڃن. اسحاق ڊار 10 لک رپين جا ضمانتي مچلڪا جمع ڪرائيندي عدالت کان 10 ڏينهن جي مهلت طلب ڪئي جنهن تي عدالت ريفرنس جا مڪمل نقل اسحاق ڊار کي ڏيڻ جو حڪم ڏيندي جوابدار  تي فرد جرم لاءِ 27 سيپٽمبر جي تاريخ مقرر ڪري ڇڏي آهي. عدالت چيو ته اسان روزاني بنياد تي ڪيس جي ٻڌڻي ڪنداسين، عدالت جوابدار جي ايندڙ ٻڌڻي تي حاضري يقيني بڻائڻ جو حڪم ڏيندي ڪيس جي وڌيڪ ٻڌڻي 27 سيپٽمبر تائين ملتوي ڪري ڇڏي.

 

ٽماٽر جي گهرج ۽ رسد ۾ فرق ختم ڪرڻ لاءِ افغانستان مان گهرائڻ جو فيصلو

لاهور (اين اين آءِ)  وفاقي نيشنل فوڊ سيڪيورٽي واري وزير سڪندر حيات بوسڻ چيو آهي ته ڀارت مان ڪنهن به صورت ۾ ٽماٽر نه گهرائينداسين، بلوچستان ۾ ٽماٽرن جو فصل تيار آهي ۽ جلد بحران ختم ٿي ويندو، محمد نواز شريف جو ملڪي سياست ۾ اهم ڪردار آهي، ان جي ڏيهه واپس اچڻ سان سمورا افواهه ۽ مخالفن جون خواهشون مٽي ۾ دفن ٿي ويون آهن، ملڪ جي ترقي لاءِ سمورين سياسي پارٽين کي سخت محنت ڪرڻ گهرجي، وزيراعظم فيڊرل فوڊ سيڪريٽري جي اداري جي منظوري ڏئي ڇڏي، جڏهن ته پلانٽ بريڊرز رائيٽس بل قومي اسيمبلي ۽ سنيٽ مان منظور ٿيڻ سان گڏ ان جا رولز به تيار ڪيا ويا آهن، اهڙن خيالن جو اظهار هن پاڪستان بايو ٽيڪنالاجي انفارميشن سينٽر ۽ فارمين گريچ ڪاليج جي تعاون سان بايو ٽيڪنالاجي جي حوالي سان ڪوٺايل 3 ڏينهن واري ورڪشاپ جي افتتاحي سيشن کي خطاب ڪندي ڪيو، وفاقي وزير چيو ته عوام پاران سياسي پارٽي کي ڏنل مينڊينٽ کي تسليم ۽ ان کي پورو ٿيڻ گهرجي، اسيمبليون پنهنجو آئيني مدو پورو ڪنديون، وقت کان اڳ چونڊن جو مطالبو درست نه آهي، چونڊو مقرر وقت تي ٿيڻ گهرجن، هن چيو ته اڄ جو ورڪشاپ هڪ سٺي ڪوشش آهي ۽ اهڙا ايونٽ تمام ضروري آهن جتي ننڍن هارين ۽ ملڪ جي پيداوار وڌائڻ جي حوالي سان ڳالهه ٻولهه ٿيندي آهي، اهڙن ورڪشاپن جو انقاد ٿيڻ گهرجي، هن چيو ته بلوچستان ۾ بصرن ۽ ٽماٽرن جو فصل تيار ٿي چڪو آهي ۽ ڪجهه ڏينهن ۾ اهي سبزيون وڏي مقدار ۾ موجود هونديون، جڏهن ته عارضي کوٽ پوري ڪرڻ لاءِ ٽماٽر ڀارت کان نه گهرائينداسين، هن چيو ته ڏڪار کان بچڻ لاءِ ماحولياتي تبديلي تي ڌيان ڏئي رهيا آهيون، زراعت جو شعبو ملڪ جي ڪرنگهي جي هڏي جي حيثيت رکي ٿو جنهن ۾ بهتري لاءِ ڪوشش ڪري رهيا آهيون ته جيئن ان کي مڪمل صنعت جو درجو ملي سگهي.  ٻئي طرف  ڪابينا جي سب ڪميٽي پرائيس ڪنٽرول جو اجلاس بصرن جي اگهه ۾ گهٽتائي تي اطمينان جو اظهار ڪندي ٽماٽرجي گهرج ۽ رسد ۾ فرق ختم ڪرڻ لاءِ افغانستان مان ان جي درآمد وڌائڻ جو فيصلو ڪيو آهي، ان ڏس ۾ برآمد ڪندڙن جا خدشا ختم ڪرڻ لاءِ وزيرن ۽ سينيئر آفيسرن جي ٽيم انهن سان ملاقات ڪندي، افغانستان ۽ ايران ۾ پاڪستاني سفارتخانن سان به رابطو ڪيو ويندو، اجلاس جي صدارت پنجاب جي چيف سيڪريٽري زاهد سعيد ڪئي، سب ڪميٽي نوٽ ڪيو ته بلوچستان جيڪو ٽماٽر جي ملڪ جي پيداوار جو وڏو حصو پيدا ڪري ٿو اتي غير توقع جي طور تي وائرس جي حملي سبب فصل تباهه ٿي ويو، سنڌ ۾ ٽماٽر جو فصل تيار آهي ۽ جلد مارڪيٽ ۾ اچي ويندو، ڀارت مان ٽماٽر گهرائڻ جي پابندي برقرار رکڻ واري فيصلي جي حمايت ڪئي وئي، شرڪت ڪندڙن چيو ته پاڪستان ۾ ٽماٽر جو فصل متاثر ٿيڻ جو سبب به ڀارتي ٽماٽر جو وائرس آهي، چيف سيڪريٽري چيو ته خوراڪ کاتي ۽ صنعت کاتي جي خاص ٽيم ڪي پي ڪي ۽ افغانستان وڃي ٽماٽر جي درآمد جي امڪانن جو جائزو وٺندي، خوراڪ واري وزير بلال ياسين چٽن لفظن ۾ چيو ته ڏکيائي جي باجود ڀارت کان بيمار ٽماٽر ڪڏهن به خريد نه ڪنداسين.

 

عمران خان چئن سالن دوران ادارن کي ڪمزور ڪرڻ کانسواءِ ڪجهه ناهي ڪيو: مريم اورنگزيب

اسلام آباد (اين اين آءِ) سڌ سماءَ واري مملڪتي وزير مريم اورنگزيب چيو آهي ته ميان نوازشريف هميشا آئين ۽ قانون جو احترام ڪيو آهي. نوازشريف ۽ خاندان پنهنجي خلاف ڪيس ۾ قانون جي پاسداري ڪئي ۽ نئون تاريخي مثال قائم ڪيو. مني لانڊرنگ جي نالي تي شروع ٿي اقامي تي ختم ٿيندڙ ڪيس تي پوري قوم سوال ڪري رهي آهي . سپريم ڪورٽ ۾ ڪرپشن جا نعرا لڳائيندڙ پاڻ عدالتن کان فرار آهن، عمران خان ادارن کي گاريون ڏئي ٿو. هن چئن سالن ۾ ادارن کي ڪمزور ڪرڻ کان سواءِ ڪجھه نه ڪيو. هن چيو ته  شينهن ايندو مان چيوهو ۽ سڄو پاڪستان ڏسندو. هر پاڪستاني شهري وانگر شريف خاندان کي سمورا قانوني حق حاصل آهن. پاڪستان جي  آئين ۽ قانون کي به شريف خاندان جي قانوني ۽ بنيادي حقن جو خيال رکڻون پوندو.  هن چيو ته عمران خان ڪي پي ڪي ۾ پنهنجي حڪومت جي ڪرپشن لڪائڻ لاءِ احتساب ڪميشن کي اڄ تائين تالو هڻي ڇڏيو آهي، هن چيو ته عمران خان پارٽي فنڊنگ جي لاءِ جوا کيڏندو آهي ۽ چوي ٿو ته  جوا نه کيڏي پر  ايڊوائيز ڏني  هئي.

 

خطي ۾ جوهري ڦهلاءُ روايتي بحري قوت ۾ واڌ سبب مسلسل هوشيار رهڻ جي ضرورت آهي: صدر ممنون حسين

لاهور (اين اين آءِ)  صدر ممنون حسين چيو آهي ته خطي ۾ جوهري ڦهلاءُ ۽ روايتي بحري قوت ۾ واڌ سبب مسلسل چوڪنار رهڻ جي ضرورت آهي، سي پيڪ کي درپيش خدشن ۽ خطرن کي اڳيان رکندي ان جي تحفظ لاءِ به بهتر قدم کنيا وڃن، خطي جو روشن ۽ خوشحال مستقبل سي پيڪ سان جڙيل آهي، ان جي فعالي صرف هڪ بندرگاهه جي وجود ۾ اچڻ ۽ مختلف خطن کي هڪ روڊ ذريعي گڏيل ملائڻ جو ڪم ئي نه ڪندي پر بري ۽ سامونڊي فوج ٻنهي شعبي ۾ انفرا اسٽرڪچر جي تعمير جو ذريعو بڻجندي، اهڙن خيالن جو اظهار هن پاڪستان نيول وار ڪاليج ۾ ميري ٽائيم جي پهرين محفوظ سمنڊ، خوشحال پاڪستان جي موضوع تي 15 ڏينهن واري ورڪشاپ جي پڄاڻي واري تقريب کي خطاب ڪندي ڪيو، هن چيو ته مون کي خوشي آهي ته پاڪ نيوي انهن معاملن تي ڀرپور ڌيان ڏئي رهي آهي، اميد ڪريان ٿو ته اهڙي قسم جا پروگرام پاڪستان جي سامونڊي وسيلن مان ڀرپور فائدن جو ذريعو بڻجندا، يقين آهي ته نيوي ۽ ان سان جڙيل ادارا ان قومي جذبي تحت پنهنجون خدمتون ادا ڪندا رهندا، هن چيو ته ميري ٽائيم سيڪيورٽي ورڪشاپ جي شريڪ ٿيندڙن ان سلسلي ۾ جنهن محنت سان پنهنجون سفارشون تيار ڪري پيش  ڪيون ان تي کين مبارڪ ڏيان ٿو ۽ يقيني ڪريان ٿو ته معيشت کي مضبوط ڪرڻ سان گڏ بحري رستن جو تحفظ يقيني بڻايو ويندو. هن چيو ته ورڪشاپ سي پيڪ جي تعلق جي حوالي سان ان جي سياسي ۽ اقتصادي صورتحال ۾ هميشه اهم ڪردار ادا ڪيو آهي. هن چيو ته يقين آهي ته اهڙي نموني جي ورڪشاپ ۽ سيمينار ان مقصد کي حاصل ڪرڻ ۾ مددگار ثابت ٿيندا.

 

مخالف ڌر اڳواڻ کي هٽائڻ نئين ڳالهه ناهي، پ پ راند جو حصو نه ٿيندي: خورشيد شاهه

سکر (اين اين آءِ) مخالف ڌر جي اڳواڻ سيد خورشيد شاهه چيو ته نئون آپوزيشن ليڊر آڻڻ لاءِ ايم ڪيو ايم سان ڳالهه ڪري پي ٽي آئي اڇلايل شيئ واپس کنئي  ڇو ته جيڪڏهن ايم ڪيو ايم ملڪ دشمن هئي ته هاڻي  ان سان ڇو ويهي رهيو آهي جيڪڏهن پي ٽي آئي ۽ ايم ڪيو ايم ڪنهن ٻئي کي آپوزيشن ليڊر بنائڻ چاهين ٿا ته هو پنهنجي ڪوشش ڪن. مان چار سال ايمانداري سان ذميواريون نڀايو ۽ آپوزيشن کي متحدد ڪرڻ جي ڪوشش ڪئي مونکي بطور آپوزيشن ليڊر پنهنجي ڪارڪردگي تي فخر آهي. عمران خان کي وقت کان اڳ الڪيشن  جي ضرورت ڇو آهي خبر ناهي ته جيڪو صوبو نه سنڀالي سگھيو اهو ملڪ کي ڇا سنڀاليندو. جنهن سياستدان جي قول ۽ فعل ۾ فرق هجي اهو قوم جي قيادت ڇا ڪندو.ملڪ ۾ افراتفريح آهي سياسي پارٽيون اندر کان کوکليون ٿي چڪيون آهن. پيپلز پارٽي گڏو ۽ گڏي جي راند نه کيڏندي، اهڙن خيالن جو اظهار هن سکر ۾ پنهنجي رهائش تي پريس ڪانفرنس کي خطاب ڪندي ڪيو، سيد خورشيد شاهه چيو ته اسان جو ايجنڊا آهي ته ملڪ ۾ سسٽم برقرار رهي ۽ پارليمينٽ هلندي رهي . هميشا اها ڳالهه ڪئي جيڪا ملڪ ۽ ادارن جي لاءِ بهتر هجي. هن چيو ته آپوزيشن ليڊر جي تبديلي لاءِ پي ٽي آئي جمهوري رستو اپنائي رهي آهي پي ٽي آئي جو جمهوري رستو اپنائڻ سٺي ڳالهه آهي.  18 ترميم کان اڳ آپوزيشن ليڊر جي چونڊ اسپيڪر ڪندو هيو ۽ هاڻي ادبي انگ اکر جي برطري ٿي ويندو آهي، هن وقت پ پ پ ۽ آپوزيشن جي سڀ کان وڏي پارٽي آهي.  پارليميٽ ئي اهڙو ڪندو آهي جيڪو ملڪ کي مضبوط ڪري سگھي ٿو. عمران خان چوي ٿو ته آپوزيشن ليڊر کي هٽائڻ منهنجو حق آهي پي ٽي آئي جي ايڪشن هميشا نوازشريف کي مضبوط ڪيو. عمران خان جو ايم ڪيو ايم ڇا موقف رهيو  آهي اها سڀني کي خبر آهي.  ميڊيا ۾ عمران خان جون اهي ڳالهيون نشرر ڪرڻ گھرجن جيڪي پهريان چوندو هيو ۽ عمران خان ايم ڪيو ايم کان پهريان دل آزاري تي معذرت وٺي. خورشيد شاهه چيو ته اسان چونڊ بل ۾ ترميم جي ڄمي مخالفت ڪئي. ايم ڪيو ايم پاڪستان چونڊ بل ۾ ترميم جي همايت ڪئي. هن چيو ته عمران خان هر شئي ۾ تڪڙ آهي. هو وقت کان اڳ اليڪشن جي گھر ڪري رهيو آهي.  پي ٽي  آئي ڪي پي ڪي ۾ اڌ سيٽون به کنيو ته الڪيشن کٽي ويندو. پ پ پ وٽ پارليميٽ ۾ 47 ميمبرن جي اڪثريت آهي هن چيو ته اليڪشن ڪميشن پوليٽيڪل پارٽي آرڊر جي آرٽيڪل 6 جي تحت ڪاروائي ڪري رهي آهي، جيڪي سياستدان عدالتن ۽ انصاف کان ڀڄندا آهن اهي سسٽم مان ئي گم ٿي ويندا آهن. هن چيو ته سياسي پارٽين کان نيب جي چيرمين جي لاءِ نالن جو منتظر آهيان. عارف علوي ، شفقت محمود ۽ شيرين مزاري سان صلاح ڪئي. ايم اين پي سراج الحق، آفتاب شيرپائو کان نالا ڏيڻ لاءِ چيو آهي، چيرمين نيب تي نوازشريف سان 20 منٽن تائين مشورو ٿيو هو سياسي پارٽيون نالو ڏينديون ته وزيراعظم کي آگاهه ڪندس.  ڪنهن به ماڻهونءَ جي بطور چيرمين مقرري جي لاءِ ان ڪميٽي ۾ 12 ميمبر ووٽ وجھندا آهن، جيڪڏهن ڪميٽي جا ميمبر برابر ووٽ وجھن ته فيصلو اليڪشن ڪميشن ۾ هليو ويندو آهي. هن چيو ته ملڪ جون اندروني ۽ ٻاهريون حالتون خراب آهن ٽيهن سالن ۾ اهڙيون حالتون ڪڌهن نه ڏٺيون جو ٻاهرين ملڪن کان خطرو هجي، اخبار  ۾ آيو آهي ته طالبانن جي پويان را جو هٿ آهي  پر دنيا ۾ ڪٿي به اسانجي لابنگ نظر نه ٿي اچي. پاڪستان کي ڀارت جو مڪروهه چهرو دنيا جي سامهون بي نقاب ڪرڻ گھرجي. هر ماڻهون ۽ ملڪ جي پنهنجي مفاد ۾ آهن. پ پ پ جو پارليميٽ ۾ ٻاهر موقف هڪ ئي آهي.

 

سمورن سرڪاري اسپتالن ۾ ايندڙ هفتي جي پوري ٿيڻ تائين دوائن کي يقيني بڻايو وڃي: مراد علي شاهه

ڪراچي (اسٽاف رپورٽر): سنڌ جي وڏي وزير سيد مراد علي شاهه صحت کاتي کي هدايت ڪئي آهي ته سمورن سرڪاري اسپتالن ۾ ايندڙ هفتي جي پوري ٿيڻ تائين دوائن کي يقيني بڻايو وڃي ۽ اهو ڪم ترجيحي بنيادن تي ڪيو وڃي. هن اها ڳالهه اڄ وزيراعليٰ هائوس ۾ صحت کاتي بابت اجلاس جي صدارت ڪندي ڪئي. اجلاس ۾ صحت وارو صوبائي وزير ڊاڪٽر سڪندر مينڌرو، سيڪريٽري صحت فضل الله پيچوهو، وڏي وزير جو پرنسپل سيڪريٽري سهيل راجپوت، ناڻي وارو سيڪريٽري حسن نقوي ۽ ٻين شرڪت ڪئي. سنڌ جي وڏي وزير سيد مراد علي شاهه چيو ته دوائن جي خريداري جو ڪم اڃا تائين ناهي ڪيو ويو، انڪري ڪجهه اسپتالن ۾دوائن جي کوٽ آهي. صحت واري وزير ڊاڪٽر سڪندر مينڌري چيو ته وڏي وزير جي حڪم تي 15 سيڪڙو مقامي خريداري جي اجازت ڏني وئي هئي انڪري ڪنهن به قسم جي کوٽ نه آهي. پاليسيءَ موجب 15 سيڪڙو خريداري مقامي طور تي ڪئي ويندي آهي جڏهن ته 85 سيڪڙو خريداري صحت کاتو ڪندو آهي. سيڪريٽري صحت فضل الله پيچوهي چيو ته پرچيز ڪميٽي خريداري روڪي ڇڏي هئي ڇاڪاڻ ته ڪميٽيءَ جي ڪجهه ميمبرن پنهنجي ذاتي مصروفيتن سبب استعيفيٰ ڏني ۽ ڪجهه ٻيا ميمبر پرڏيهه ويل هئا. وڏي وزير هدايت ڪئي ته قانوني طريقو اختيار ڪندي دوائن جي خريداريءَ جو ڪم مڪمل ڪيو وڃي ۽ مون کي هڪ هفتي اندر رپورٽ ڏني وڃي ته داوائون فراهم ڪيون ويون آهن. واضح رهي ته صوبي جي اسپتالن جو گڏيل آپريشنل بجيٽ 18 بلين رپيا آهي جنهن ۾ اٽڪل 6.5 بلين رپيا دوائن جو بجيٽ آهي. وڏي وزير چيو ته سڀني اسپتالن ۾ بورڊ لڳرايا آهن؛ جنهن ۾ مريضن تي روز ڀريو ويو آهي ته اهي اسپتالن جي اسٽور مان مفت دوائون حاصل ڪن. هن چيو ته اسان جا ماڻهو تمام غريب ۽ سندن صحت جي مناسب سنڀال جي ضرورت آهي. هن چيو ته اسان کي پنهنجي مقصد ۾ سوڀ حاصل ڪرڻي آهي پر اڃا به صوبي جي ڪنڊ ڪرڇ ۾ رهندڙ ماڻهن جي صحت لاءِ گهڻو ڪجهه ڪرڻو آهي. مختلف سرڪاري اسپتالن جي پبلڪ پرائيوٽ پارٽنرشپ (پي پي پي) بابت ڳالهائيندي وڏي وزير چيو ته خانگي شراڪتدار بهترين ريت ڪم ڪري رهيا آهن انڪري سندن مسئلا ترجيحي بنيادن تي حل ٿيڻ گهرجن ته جيئن اهي بهترين صحت جون خدمتون فراهم ڪري سگهن. وڏي وزير واضح ڪيو ته جوهي جي ڊرگهه بالا رورل هيلٿ سينٽر خراب حالت ۾ هو. هن سيڪريٽري صحت کي هدايت ڪئي ته سندن رپورٽ ڏئي ته اهو ڇو بند هو؟. سيڪريٽري هيلٿ ڊي ايڇ او دادو کان پڇاڻو ڪري کين رپورٽ ڏني وڃي. وڏي وزير کي ٻڌايو ويو ته عمارت جو ڪم مڪمل آهي پر گهڻي عرصي کان اها عمارت پوليس جي قبضي هيٺ آهي. وڏي وزير سيڪريٽري صحت کي هدايت ڪئي ته ان صحت مرڪز کي واپس وٺي ۽ هڪ هفتي اندر ان کي فعال ڪيو وڃي. وڏي وزير صحت کاتي کي اها به هدايت ڪئي ته هُو سندن سمورن صحت مرڪزن بابت تفصيلي رپورٽ پيش ڪئي وڃي ته انهن ۾ صحت جون سهولتون، تعميري مقصد يا ايس اين اِي سبب اڻپوريون ڇو آهن؟. هن چيو ته مان چاهيان ٿو ته انهن کي فعال بڻايو وڃي ۽ انهن کي جيترا به فنڊ يا ايس اين اِي گهربل آهي فراهم ڪيا وڃن. سنڌ جي وڏي وزير سيد مراد علي شاهه صحت واري وزير کي هدايت ڪئي ته هُو اسپتالن جا دورا ڪندو رهي ۽ سڀني اسپتالن سان ويجهڙائي وارا رابطا رکي ته جيئن صوبي جي عوام کي صحت جون بهترين سهولتون فراهم ڪري سگهجن.

 

معاشي ۽ معاشرتي ترقي عورتن کانسواءِ اڻپوري آهي: سراج الحق

لاهور (ويب ڊيسڪ): جماعت اسلامي امير سراج الحق چيو آهي ته هن وقت انهن ماڻهن جو نظام آهي، جن رخ آمريڪا طرف ڪري رکيو آهي، حجاب ڪانفرنس کي خطاب ڪندي سراج الحق چيو ته معاشي ۽ معاشرتي ترقي عورتن کانسواءِ اڻپوري آهي، اهڙو معاشرو چاهيون ٿا، جنهن ۾ ڪوئي ڪنهن جو محتاج نه هجي، هن چيو ته ووٽ ذريعي هن بد نظام کان نجات ملي سگهي ٿي.

 

 ماڊل ٽائون سانحي جي رپورٽ عام نه ڪرڻ بابت پنجاب حڪومت جي درخواست رد  

لاهور( ويب ڊيسڪ ) لاهور هاءِ ڪورٽ ماڊل ٽائون سانحي بابت  رپورٽ عام نه ڪرڻ بابت پنجاب حڪومت جي درخواست رد ڪري ڇڏي. لاهور هاءِ ڪورٽ جي فل بئنچ انڪوائري رپورٽ بابت روزاني ٻڌڻ جو فيصلو ڪيو ويو آهي. لاهور هاءِ ڪورٽ سنگل بئنچ جي فيصلي خلاف پنجاب سرڪار  جي درخواست رد ڪئي وئي آهي. لاهور هاءِ ڪورٽ ماڊل ٽائون سانحي جي ٻڌڻي لاءِ 3 رڪني نئين بئنچ جوڙي وئي آهي. جسٽس عزيز شيخ بئنچ جي سربراهي  جوڙيل بئنچ جي ٻين ججن ۾ جسٽس امين الدين ۽ جسٽس شهباز رضوي شامل آهن. ان کان اڳ جسٽس ياور علي جي سربراهيءَ ۾ ٽه رڪني فل بئنچ ماڊل ٽائون سانحي بابت جسٽس باقر نجفي جي رپورٽ پبلڪ ڪرڻ ۽ اپيل جي درخواستن تي ٻڌڻي جي شروعات ڪئي ته عدالت چيو ته هڪ ئي معاملي تي مختلف نوعيت جون درخواستون اچي چڪيون آهن جن جي ٻڌڻي گڏ ممڪن ناهي. جسٽس ياور درخواستن تي ٻڌڻي ڪرڻ کان معذرت ڪئي جنهن سبب بئنچ ٽٽي وئي. جسٽس ياور ڪيس بابت فائلون چيف جسٽس هاءِ ڪورٽ کي موڪليندي معاملو چيف جسٽس حوالي ڪري ڇڏيو.