تازيون خبرون

Monthly Archives: September 2017

نواز شريف جو پارٽي سربراهه ٿيڻ جو رستو صاف، سينيٽ چونڊ سڌارن جو بل منظور ڪري ورتو

اسلام آباد (ويب ڊيسڪ): سينيٽ قومي اسيمبلي مان منظور ٿيل چونڊ سڌارن جو بل اعتزاز احسن جي ترميم کي رد ڪري منظور ڪري ورتو، جنهن بعد نواز شريف جي پارٽي سربراهه ٿيڻ جي راهه هموار ٿي وئي آهي، سينيٽ جو اجلاس چيئرمين رضا رباني جي سربراهيءَ ۾ ٿيو، جنهن ۾ چونڊ سڌارن جي بل کي منظور ڪيو ويو، جڏهن ته ايم اين اي نه هئڻ جي صورت ۾ پارٽي سربراهه نه بڻجڻ جي اعتزاز احسن جي ترميم رد ڪئي وئي، پيپلز پارٽي طرفان سي ڪلاز 203 ۾ ترميم اعتزاز احسن پيش ڪئي، اها شق هئي ته جيڪو ايم اين اي نٿو بڻجي سگهي، اهو پارٽي جو سربراهه به نٿو بڻجي سگهي، اعتزاز احسن چيو ته حڪومت پارٽي ايڪٽ آرڊر تبديل ڪري رهي آهي، جيڪو غلط آهي، شق 203 ۾ ترميم جي لاءِ جڏهن پهرين ووٽنگ ڪرائي وئي ته ڪجهه حڪومتي نمائندا ايوان ۾ موجود نه هئا، جنهن تي ٻيهر ووٽنگ ڪرائي وئي، بل جي حمايت ۾ 37 ۽ مخالفت ۾ 38 ووٽ آيا، جنهن سان اعتزاز احسن جي شق 203 ۾ ترميم رڳو هڪ ووٽ تان رد ٿي وئي، ايم ڪيو ايم جو ووٽ حڪومت جي ڪم اچي ويو ۽ ڪلاز 203 تي راءِ شماري وقت سينيٽر عتيق شيخ ايوان ۾ موجود هيو، ياد رهي ته سينيٽ ۾ پيپلز پارٽي جي ميمبرن جو انگ 26 ۽ مسلم ليگ (ن) جي ميمبرن جو انگ 27 آهي، شق 203 ۾ ترميم کان اڳ وفاقي وزير سعد رفيق ايوان ۾ سرگرم نظر آيو ۽ ححڪومتي ميمبرن جي ڳڻپ پوري ڪرائڻ لڳو، جنهن تي اپوزيشن ميمبرن احتجاج ڪندي چيو ته وفاقي وزير ايوان کي پريشان ڪري رهيو آهي، چونڊ سڌارا بل مطابق ڪنهن شهري کي سياسي جماعت سان وابستگي جو اختيار هوندو، شهري جيڪو سرڪاري ملازمت ۾ نه هجي، ان کي اختيار هوندو ته ڪا به سياسي جماعت بڻائي، جڏهن ته بل تحت آرٽيڪل 62، 63 تحت ناال شخص پارٽي جو سربراهه بڻجي سگهي ٿو ۽ اهي آرٽيڪل پارٽي سربراهه تي لاڳو نه ٿيندا، چونڊ سڌارا بل ۾ اسٽيڊنگ ڪميٽي قانون ۽ انصاف جي ترميم به منظور ڪئي وئي، جنهن مطابق اليڪشن ڪميشن 90 ڏينهن اندر اليڪشن خرچن جي جاچ ڪري سگهي ٿي، مقرر وقت ۾ جاچ نه ڪئي وئي ته جمع ڪرايل خرچ درست تسليم ڪيا ويندا، جڏهن ته اثاثن ۽ ذميدارين جا تفصيل غلط ثابت ٿيا ته 120 ڏينهن اندر ڪارروائي ٿيندي، واضح رهي ته چونڊ سڌارا بل کي قومي اسيمبلي مان منظوري بعد سينيت ۾ پيش ڪيو ويو هيو ۽ هاڻي بل کي واپس قومي اسيمبلي اماڻيو ويندو.

 

پاڪستان قرباني جو ٻڪرو نه بڻجندو، طالبان جا محفوظ ٿاڪ افغانستان ۾ آهن: وزير اعظم

نيويارڪ (اين اين آءِ) وزيراعظم شاهد خاقان عباسي دنيا جي ملڪن جي اڳواڻن تي واضح ڪيو آهي ته پاڪستان افغانستان سميت ڪنهن به ملڪ لاءِ قرباني جو ٻڪرو نه بڻجندو . دهشتگردي خلاف جنگ ۾ وڏين قربانين کانپوءِ افغانستان ۾ سياسي ۽ فوجي وٿيءَ جو ذميوار پاڪستان کي ڏنو پيو وڃي جيڪو پريشان ڪندڙ آهي. داعش ۽ القاعده سميت وڌيڪ انتهاپسندن گروهن جي ترجيحي خاتمي ۽ طالبان سان سياسي حل ڳولا ڪرڻ جي ضرورت آهي، ڀارت والاريل ڪشمير ۾ وڏي پئماني تي بنا فرق جي ڪارروائي جو ذميوار آهي . وزيراعظم شاهد خاقان عباسي گڏيل قومن جي جنرل اسيمبلي کي خطاب ڪندي آمريڪي صدر ڊونلڊ ٽرمپ جي نئين افغان پاليسي تي پاڪستاني موقف جي کليل نموني وضاحت ڪئي. وزيراعظم پاڪستان جو کليل موقف پيش ڪندي چيو ته پاڪستان، افغانستان جي جنگ کي پنهنجي ڌرتي تي وڙهڻ نه ڏيندو اسان ڪنهن اهڙي ناڪام حڪمت عملي جي واڌ نه ٿا ڪري سگهون جيڪاپاڪستان ۽ افغانستان ۽ ٻين علائقائي ملڪن جي عوام کي تڪليف ۾ وجهي. هن چيو ته افغانستان ۾ فوجي يا سياسي وٿيءَ لاءِ الزام لڳائڻ پاڪستان لاءِ ڳڻتي جوڳو عمل آهي. هن چيو ته سرحد پار کان حملا ضرور ٿين ٿا پر اهي حملا وڌيڪ سرحد جي ان پار موجود محفوظ ٺڪاڻن تان پاڪستان جي خلاف دهشتگردن پاران ڪيا وڃن ٿا. اهڙي قسم جي حملن جي روڪٿام لاءِ پاڪستان افغان حڪومت ۽ اتحادي فورسز کي چيو آهي ته هو سرحد کي ڪنٽرول ڪرڻ واري نظام کي مضبوط بڻائين ۽ چرپر جي نگراني لاءِ پاڪستان جي ڪوششن جي حمايت ڪري. هن چيو ته پاڪستان کان وڌيڪ افغانستان ۾ امن جو ڪو به ٻيو خواهشمند نه آهي جڏهن ته افغانستان ۾ 16 سالن جي جنگ کانپوءِ اها ڳالهه واضح آهي ته افغانستان ۾ امن کي جنگ جاري رکي بحال نه ٿو رکي سگهجي. پوءِ ڪا به ڌر هڪ ٻئي کي فوجي حل نه ٿي لاڳو ڪري سگهي. پاڪستان ان ڳالهه تي يقين رکي ٿو ته افغانستان ۾ فوري ۽ حقيقتن تي ٻڌل مقصد ۾ افغانستان ۾ داعش، القاعده ۽ ان جي حمايتن جي خاتمي لاءِ ٺوس قدم شامل ٿيڻ گهرجن. وزيراعظم چيو ته پاڪستان جي دهشتگردي خلاف قدمن تي سوال نه ٿا کڻي سگهجن ، هن چيو ته نائين اليون کانپوءِ پاڪستان جي ڪوششن سان ئي القاعده جو خاتمو ڪيو ويو آهي پاڪستان فوجي آپريشنن سان جابلو علائقن مان سمورن ويڙهاڪ گروپن کي ختم ڪيو آهي. پاڪستان دهشتگردي خلاف وڏي قيمت چڪائي آهي. 6500 فوجي ۽ قانون لاڳو ڪندڙ اهلڪار سميت 27 هزار پاڪستاني ان جنگ ۾ شهيد ٿيا دهشتگردي جي عالمي مسئلي سان گڏيل طور تي منهن ڏيڻ جي ضرورت تي زور ڏيندي دهشتگردي خاتمي جي عالمي حڪمت عملي ۾ اهم غلط جو ذڪر ڪيو جنهن سبب ان مسئلي کي منهن ڏيڻ ۾ ناڪام نصيب ٿي ڇو ته دهشتگردي جي بنيادي سببن کي منهن ڏيڻ جي ضرورت آهي. بنيادي سبب صرف غربت ۽ جهالت ناهن. دهشتگردي جي سببن ۾ ناانصافي، جبر ۽ پرڏيهي مداخلت سميت سياسي ۽ ٻين محرومين تي انتهائي رد عمل به آهي. هن چيو ته پاڪستان جا ايٽمي هٿيار رڳو ان لاءِ ٺاهيا آهن ڇو ته ان جي پاڙِيسري خطي ۾ انهن هٿيارن کي متعارف ڪرايو آهي. اسان جا ايٽمي اثاثا اڳرائي کي منهن ڏيڻ لاءِ لازمي آهن. اسان جا ايٽمي اثاثا پوري طرح محفوظ ڪنٽرول ۾ آهن جنهن جو ماهرن به اعتراف ڪيو آهي. هن چيو ته عالمي برادري پاڪستان کي بنا ڪنهن فرق جي بنياد تي نيو ڪليئر سپلائر گروپ جهڙي عالمي ايٽمي عدم ڦهلاءَ انتظامن ۾ شامل ڪيو. هن چيو ته ايشيا ۾ امن ۽ خوشحالي کي ڏکڻ اوڀر ۽ اولهه ايشيا ۾ وڌندڙ ڇڪتاڻ ۽ اڀرندڙ عالمي طاقتن جي مزاحمت کان خاطرو آهي. وزيراعظم چيو ته شام، عراق، يمن سميت اوڀرملڪن ۾ هر جاءِ تي جنگ ۽ تشدد پکيڙيل آهي هن چيو ته عراق ۽ شام ۾ داعش ڪمزور ٿي چڪي آهي پر اوڀر آفريڪا ۽ دنيا جي ٻين علائقن ۾ دهشتگرد ڪارروائيون پکڙجي چڪيون آهن .اسرائيلي جي غيرقانوني علائقن ۾ واڌ سان مقدس ڌرتي تي تشدد پکڙجندي نظر اچي رهيو آهي هن چيو ته روهنگيا جي مسلمانن جي نشل ڪشي نه صرف انسانيت جي سمورن بنيادي قدرن کان ابتڙ آهي پر اهو اسان جي گڏيل ضمير لاءِ به چئلينج آهي هن چيو ته غربت، بيماريون، ماحُلياتي تبديليون، ايٽمي ڦهلاءُ، دهشتگردي جهڙن مسئلن کي منهن ڏيڻ لاءِ عالمي تعاون ضروري آهي هن گڏيل قومن جي جنرل سيڪريٽري پاران امن، سلامتي، ترقي ۽ انتظام ۾ گڏيل قومن جي اهميت کي هٿي وٺرائڻ جي ڪوششن جي آجيان ڪئي. گڏيل قومن جو جنرل اسيمبلي جو سالياڻو اجلاس نيو يارڪ ۾ جاري آهي، وزيراعظم شاهد خاقان عباسي پنهنجي خطاب ۾ عالمي، علائقائي، سماجي ۽ ترقياتي معاملن تي پاڪستان جو موقف پيش ڪيو. وزيراعظم پنهنجي خطاب ۾ پاڪستان جي پرڏيهي پاليسي جو عڪس پيش ڪيو. وزيراعظم پنهنجي خطاب ۾ عالمي اداري کي والاريل ڪشمير ۾ شهرين تي ڀارتي ظلم بابت به ڄاڻ ڏني. وزيراعظم عالمي اداري تي زور ڀريو ته ڪشمير جي مسئلي بابت گڏيل قومن جي ٺهرائن تي عمل کي يقيني بڻايو وڃي.وزيراعظم شاهد خاقان عباسي روهنگيا مسلمانن جي صورتحال بابت به پاڪستان جو موقف پيش ۽ عالمي برادري تي زور ڀريو ته روهنگيا جي مسلمانن جي نسلي لڏ پلاڻ کي روڪيو وڃي.وزيراعظم پنهنجي خطاب ۾ عالمي برادري کي دهشتگردي خلاف جنگ ۾ پاڪستان جي قربانين کان  ڄاڻ ڏني، وزيراعظم چيو ته پاڪستان ان جنگ ۾ هزارين قيميتي جانين جي قرباني ۽ هڪ سئو 20 ارب ڊالرن کان وڌيڪ نقصان برداشت ڪيو آهي.وزيراعظم پاڙيسري ملڪن سان بهتر ناتن لاءِ خواهش جو به اظهار ڪيو ۽ دنيا کي ٻڌايو ته پاڪستان امن پاليسي تي عمل ڪري رهيو آهي، پاڪستان، افغانستان ۾ امن جي حل جو خواهشمند آهي. هن چيو ته پاڪستان ۽ چين جي وچ ۾ ڀائيواري، توانائي ۽ ٽرانسپورٽيشن کان وٺي ڪيترن ئي ٻين شعبن تائين ڦهلجندي. هن چيو ته 207 ملين نوجوانن تي ٻڌل آبادي سان پراعتماد آهي ته هو وڌندڙ آمدني کپت ۽ پيداوار کي ڪتب آڻيندي اقتصادي حڪمت جي ذريعي خوشحالي ڏانهن وڌندو. پاڪستان پنهنجا هدف حاصل ڪرڻ لاءِ پنهنجي ملڪ جي اندر ۽ پنهنجي سرحدن جي آسپاس امن جو خواهشمند آهي. وزيراعظم گڏيل قومن جي امن مشن ۾ پاڪستان جي ڪردار تي به روشني وڌي. وزيراعظم پنهنجي خطاب دوران چيو ته ڪشمير مسئلي جي پرامن ۽ فوري حل لاءِ قدم کڻڻا پوندا. هن چيو ته ڀارت پاڪستان سان امن واري عمل کي بحال ڪرڻ تي تيار ناهي اسان گڏيل قومن تي زور ڏيون ٿا ته هو والاريل ڪشمير بابت پنهنجي ٺهراءَ تي عمل ڪرائڻ لاءِ ذميواري پوري ڪري ان سلسلي ۾ گڏيل قومن جي جنرل سيڪريٽري ڪشمير بابت خاص نمائندو  مقرر ڪري جيڪو گڏيل قومن جي پراڻن ٺهرائن تي عمل ڪرائي.

 

الزام رد، مشرف ايترو بهادر آهي ته ڏيهه اچي عدالتن کي منهن ڏئي: آصف زرداري

ڪماليه (ويب ڊيسڪ): پاڪستان پيپلز پارٽي جي شريڪ چيئرمين آصف زرداري جنرل (ر) پرويز مشرف جي گذريل ڏينهن وارن الزامن جي ردعمل ۾ چيو آهي ته جيڪڏهن مشرف ايترو بهادر آهي ته پاڪستان اچي ۽ عدالتن کي منهن ڏئي، ڪماليه ۾ ميڊيا سان ڳالهائيندي آصف زرداري چيو ته جيڪڏهن مشرف جي چيلهه ۾ ايتري تڪليف آهي ته پوءِ ڊسڪو ڪيئن ڪري رهيو آهي، هن چيو ته مرتضيٰ ڀٽو جي قتل وقت به مون تي ۽ بي بي تي الزام لڳايو ويو هيو، ياد رهي ته پرويز مشرف سماجي رابطن جي ويب سائيٽ ٽوئيٽر تي ڀٽو خاندان جي نالي تي پنهنجو وڊيو پيغام جاري ڪيو هيو، پرويز مشرف پنهنجي پيغام ۾ بينظير ڀٽو ۽ ان جي ڀاءُ مرتضيٰ ڀٽو جي قتل جو ذميدار آصف زرداري کي قرار ڏنو آهي، آصف زرداري چيو ته پاڪستان ڪيترن مسئلن ۾ گهيريل آهي، ناڻي وارو وزير اسحاق ڊار فرار ٿي ويو ۽ زخمي پاڪستان کي ڇڏي ويو، سندس چوڻ هيو ته اين اي 120 جون ننڍيون چونڊيون ڪو پيراميٽر ناهن، تڪ ۾ حڪمران جماعت هڪ مهيني کان اربين رپيا خرچ ڪيا، جڏهن ته اتي تحريڪ انصاف به ڪا خاص ڪارڪردگي ناهي ڏيکاري، هن چيو ته چئن سالن جي حڪومت دنيا ۾ ڪا لابنگ ناهي ڪئي، انهن عالمي سطح تي پاڪستان جو ڪيس ڪمزور ڪيو.

 

ورڪنگ بائونڊري تي ڀارتي فوج جي اڳرائي، فائرنگ، 4 عورتن سميت 6 ڄڻا شهيد، 26 زخمي

سيالڪوٽ (ويب ڊيسڪ): ورڪنگ بائونڊري تي ڀارتي فورسز جي بنا جواز فائرنگ جي نتيجي ۾ 4 عورتن سميت 6 پاڪستاني شهري شهيد ٿي ويا آهن، جڏهن ته 26 زخمي ٿي پيا آهن. آءِ ايس پي آر طرفان جاري ڪيل بيان موجب ڀارتي فورسز شهري آبادي کي نشانو بڻايو، ڀارتي فوج جي فائرنگ جي نتيجي ۾ 6 پاڪستاني شهري شهيد ٿي ويا، جن ۾ 4 عورتون به شامل آهن. ترجمان موجب ڀارتي فوج جي فائرنگ جي نتيجي ۾ مارجي ويلن ۾ کنڊن پور ڳوٺ جو اشرف ولد مسعود، ڀيني سيلريان جي مريم ڌي اشفاق، ڳوٺ گنديال جي شازيه زال احمد جڏهن ته چارواهه جو وسيم ولد انور، شڪيلا زال نديم ۽ نفيسه ڌيءَ محمود شامل آهن. آءِ ايس پي آر موجب ڀارتي فوج ورڪنگ بائونڊري جي ڀرپاسي شهري آبادي تي فائرنگ ڪئي ۽ مارٽر گولا اڇلايا، جڏهن ته پنجاب رينجرز ڀارتي فائرنگ جو ڀرپور جواب ڏنو ۽ ڀارتي چوڪين کي نشانو بڻايو ۽ ڪيتريون ئي چوڪيون تباهه ڪيون ويون آهن.

 

آرمي چيف سان برطانوي هاءِ ڪمشنر جي ملاقات، علائقائي صورتحال تي ڳالهيون

راولپنڊي(م.ڊ) آرمي چيف سان برطانوي هاءِ ڪمشنر جي ملاقات، علائقائي صورتحال تي ڳالهيون، تصيل موجب: برطانوي هاءِ ڪمشنر ٿامس ڊريو آرمي چيف جنرل قمر جاويد باجوه سان جي ايڇ ڪيو ۾ ملاقات ڪئي، آئي ايس پي آر پاران جاري ڪيل بيان ۾ چيو ويو اهي ته  جي ايڇ ڪيو ۾ ٿيندڙ ملاقات ۾ برطانوي هاءِ ڪمشنر خطي ۾ امن ۽ استحڪام جي لاءِ پاڪستاني ڪوششن کي تسليم ڪيو

 

اطلاعات آفيسر منفي پهلوئن کي مثبت تعميري سرگرمين ذريعي پرنٽ ۽ اليڪٽرانڪ ميڊيا ۾ آڻين: ناصر حسين شاهه

ڪراچي(اسٽاف رپورٽر) اطلاعات واري صوبائي وزير سيد ناصر حسين شاهه اطلاعات کاتي جي آفيسرن تي زور ڀريو آهي ته حڪومتي سرگرمين ۾ پنهنجي پيشيواراڻين صلاحيتن کي استعمال ۾ آڻي منفي پهلوئن کي مثبت تعميري سرگرمين جي ذريعي پرنٽ ۽ اليڪٽرانڪ ميڊيا ۾ فوري عمل ۾ آڻين. اها ڳالهه هن اڄ پنهنجي آفيس ۾ سمورن حڪومتي کاتن جي پبلڪ رليشن آفيسرن، اطلاعات کاتي، اليڪٽرانڪ ميڊيا جي آفيسرن سان هڪ اجلاس جي صدارت ڪندي چئي. اجلاس ۾ خاص طور تي ايم پي اي خيرالنساءَ مغل، پيپلز پارٽي ڪراچي عورت ونگ جي سيڪريٽري اطلاعات سعديه جاويد، اطلاعات واري سيڪريٽري عمران عطا سومرو، ڊائريڪٽر اطلاعات اليڪٽرانڪ ميڊيا ثناءُ الله راڄڙ، ڊائريڪٽر پبليڪيشن ڊاڪٽر معيز الدين پيرزادو ۽ سمورن آفيسرن شرڪت ڪئي. صوبائي وزير اطلاعات سيد ناصر حسين شاهه چيو ته اطلاعات آفيسرن تي اهم ذميواري عائد ٿئي ته هو پنهنجي لاڳاپيل کاتن جي سرگرمين لاءِ پنهنجن ذميوارين کي ڀرپور نموني سان سرانجام ڏين. جيڪڏهن ڪابه منفي خبر يا رپورٽ ميڊيا تي اچي ٿي ته ان کي فوري طور لاڳاپيل وزير، سيڪريٽري يا اداري جي سربراهه پاران ردعمل کي يقيني بڻائين ۽ حقيقت تي ٻڌل سمورن پهلوئن کي اجاگر ڪن ته جيئن عام ماڻهو کي حڪومتي اپائن جي بروقت معلومات ۽ صحيح رپورٽ ملي سگهي. هن چيو ته حڪومت جي عوامي مفادن، فلاحي پروگرامن ۽ ٻين اپائن کي مثبت طريقي سان سرگرمين لاءِ پرنٽ ۽ اليڪٽرانڪ ميڊيا سان تعلقات کي وڌيڪ فروغ ڏئي نتيجا حاصل ڪيا وڃن ۽ انهن سان مسلسل رابطي ۾ رهن. صوبائي وزير اطلاعات سيد ناصر حسين شاهه هدايت ڪئي ته اليڪٽرانڪ ميڊيا جي نظام ۾ جديد تقاضائن جي مطابق وسيع نظام وضع ڪن ته جيئن وڌ کان وڌ حڪومتي سرگرمين کي پرنٽ ۽ اليڪٽرانڪ ميڊيا ۾ گهربل جاءِ ملي سگهي ۽ حڪومتي پاليسين کي پراثر نموني نمايان ۽ ردعمل ڏين. هن سيڪريٽري اطلاعات عمران عطا سومرو کي هدايت ڪئي ته اطلاعات آفيسرن کي فيلڊ ۾ پيش ايندڙ مسئلن جي حل لاءِ قدم کڻي ته جيئن هو حڪومتي سرگرمين لاءِ پنهنجو ڀرپور ڪردار ادا ڪري سگهن. ڇو ته اهي آفيسر حڪومت ۽ ميڊيا جي وچ ۾ پل جو ڪردار ادا ڪن ٿا ۽ تعلقات روزمره جي بنياد تي وڌيڪ مضبوط ۽ مستحڪم ٿي سگهن.

 

سينيٽ مان پوليٽيڪل پارٽيز ايڪٽ ترميمي بل منظور، شيخ رشيد پاران سپريم ڪورٽ وڃڻ جو اعلان

اسلام آباد (ويب ڊيسڪ): عوامي مسلم ليگ جي سربراهه شيخ رشيد احمد سينيٽ مان پوليٽيڪل پارٽيز ايڪٽ 2002 ۾ ترميم جي بل جي منظوري خلاف سپريم ڪورٽ وڃڻ جو اعلان ڪري ڇڏيو آهي، نجي ٽي وي سان ڳالهائيندي شيخ رشيد احمد چيو ته هي ماڻهو آئين ۽ قانون سان کيڏي رهيا آهن، هي ماڻهو سرعام عدالت جي فيصلي کي چئلينج ڪري رهيا آهن، جنهن سان ملڪ کي نقصان پهچندو، اهو نٿو ٿي سگهي ته نااهل ماڻهو پارٽي کي هلائين، هن چيو ته اهو سينيٽ مان پاس ٿيل پوليٽيڪل پارٽيز ايڪٽ 2002 ترميمي بل خلاف سپريم ڪورٽ سان رابطو ڪندو، ياد رهي ته سينيٽ ۾ پوليٽيڪل پارٽيز ايڪٽ 2002 ۾ ترميم جو بل اڪٿريتي راءِ سان منظور ڪيو ويو آهي، جنهن تحت عدالت مان نااهل ٿيل ماڻهو ڪنهن به پارٽي جو سربراهه بڻجي سگهندو، چونڊ سڌارن جو بل قومي اسيمبلي مان منظور ٿي سينيٽ ۾ آيو هيو، ان تحت ڪو به شهري جيڪو سرڪاري ملازم نه هجي اهو پنهنجي سياسي پارٽي به بڻائي سگهندو، واضح رهي پوليٽيڪل پارٽيز ايڪٽ 2002 ۾ ترميم بعد اڳوڻو وزيراعظم نواز شريف مسلم ليگ ن جي صدر بڻجڻ جي راهه هموار ٿي وئي آهي.

 

بيوروڪريٽس ڀڳوڙن لاءِ ڪيريئر تباهه نه ڪن، قاتل ڀائرن جو ڪو مستقبل ناهي: طاهرالقادري

لاهور (ويب ڊيسڪ): پاڪستان عوامي تحريڪ سربراهه ڊاڪٽر طاهرالقادري چيو آهي ته بيوروڪريٽس ڀڳوڙن لاءِ پنهنجو ڪيريئر تباهه نه ڪن، ڇو ته قاتل ڀائرن جو ڪو مستقبل ناهي، عدالتن جي فيصلن جو مذاق اڏائڻ وارن شريف ڀائرن ۽ انهن جي ساٿارين، درٻارين کي عدالتي فيصلن جي احترام جو سبق سيکارڻو پوندو، پاڪستان عوامي تحريڪ جي سينٽرل ڪور ڪميٽي جي هنگامي اجلاس ۾ ڳالهائيندي طاهرالقادري جو چوڻ هيو ته عدالت جي فيصلي ۽ پنجاب حڪومت جي رپورٽ ڏيڻ کان انڪار مان ثابت ٿيو ويو ته سانحي ۾ حڪومت سڌيءَ ريت ملوث آهي، هن چيو ته لاهور هاءِ ڪورٽ آئين جي آرٽيڪل اي 19 تحت فيصلو ٻڌايو، آئين جي ان آرٽيڪل تحت هر شهري کي عوامي مفاد جي معلومات تائين رسائي جو حق حاصل آهي پر ماڊل ٽائون سانحي ڪيس ۾ ڪو عام شهري نه پر ماڊل ٽائون جي شهيدن جا وارث عدالت ويا، جن جي گهرن ۾ لاش ويا، انصاف حاصل ڪرڻ جي قانوني جنگ مڪمل انصاف تائين جاري رهندي ۽ ان لاءِ هر قيمت چڪائڻ لاءِ قيادت کان وٺي ڪارڪن تائين سڀ پرعزم آهيون.

 

فلم ”چندا مامون دُور ڪي“ جي شوٽنگ جو اعلان بعد ۾ ڪيو ويندو: سوشانت سنگهه

ممبئي(شوبز نيوز) بالي ووڊ اداڪار شانت سنگهه راجپوت چيو آهي ته فلم ”چندا مامون دُور ڪي“ جي شوٽنگ جي شيڊول جو اعلان بين الاقوامي فني ٽيم جي اچڻ کان پوءِ ئي ڪيو ويندو. ڀارتي ذريعن موجب سوشانت سنگهه چيو آهي ته هو اڄڪلهه ساره علي خان سان فلم ”ڪيدار ناٿ“ جي شوٽنگ ۾ مصروف آهي ۽ هو هڪ فلم مڪمل ڪرڻ کانپوءِ ئي ٻي فلم جي شوٽنگ شروع ڪندو. هن جو چوڻ آهي ته فلم ”چندا مامون دُور ڪي“ جي شوٽنگ جي شيڊول جو اعلان بين الاقوامي ٽيڪينڪل ٽيم جي اچڻ کانپوءِ ئي ڪيو ويندو.

 

ماهره خان ۽ رنبير ڪپور جي نئين تصويرن سوشل ميڊيا تي ٿرٿلو مچائي ڇڏيو

نيويارڪ: پاڪستاني اداڪارا ماهره خان ۽ بالي ووڊ اداڪار رنبير ڪپور جي نئين تصويرن سوشل ميڊيا تي ٿرٿلو مچائي ڇڏيو آهي، تصويرن ۾ ٻنهي کي سگريٽ پيئندي واضح طور تي ڏسي سگهجي ٿو جڏهن ته ماهره خان کي مختصر ڪپڙا پهريل آهن. اهي تصويرون نيويارڪ جي هڪ هوٽل ٻاهران ورتيون ويون آهن جتي ٻنهي کي مختلف انداز ۾ ڏسي سگهجي ٿو. تصويرن ۾ ماهره خان کي اڇي رنگ جو لباس پهريل آهي ۽ سندس هٿ ۾ سگريٽ کي واضح طور تي ڏسي سگهجي ٿو. ان کان اڳ مارچ مهيني ۾ پڻ ٻنهي اداڪارن جي دبئي جي هڪ تقريب ۾ شرڪت دوران ٺاهيل وڊيو به سوشل ميڊيا تي وائرل ٿي وئي هئي جنهن کانپوءِ اهي ڳالهيون عام ٿيڻ لڳيون ته ٻنهي ۾ معاملو دوستي کان ڪجهه اڳتي وڌي ويو آهي.