تازيون خبرون

Daily Archives: August 12, 2017

توهان جي ووٽ جو احترام نه ڪيو ويو، ٻڌايو وڃي مون ڪهڙي ڪرپشن ڪئي؟: نواز شريف

گجرانوالا (ويب ڊيسڪ): اڳوڻي وزيراعظم نواز شريف جي ٽي مشن ريلي دوران گجرانوالا ۾ جلسي کي خطاب ڪندي چيو آهي ته گجرانوالا واسيو نواز شريف اڄ اوهان جو مريد ۽ ممنون آهي، هن چيو ته جهڙيءَ ريت ڀرپور آجيان ڪئي وئي آهي، سڄي زندگي نه وساريندس، هن چيو ته عوام تمام گهڻي محبت ڏني آهي، جيڪو پيار اڄ مليو آهي، ان جو مثال نٿو ملي، هي پيار ۽ محبت ڪنهن ڪنهن کي نصيب ٿيندي آهي، خوش نصيب آهيان گجرانوالا واسي نواز شريف سان ايترو پيار ڪن ٿا، مان به ڪندو آهيان، مان گهر وڃي رهيو هيس ته مون کي گجرانوالا روڪي ورتو، اڳوڻي وزيراعظم نواز شريف چيو ته ججز جي بحالي لاءِ جڏهن لانگ مارچ گجرانوالا پهتو ته اعلان ٿيو ته ججز بحال ٿي ويا آهن، اڄ نواز شريف اوهان جي سامهون آهي، نواز شريف کي اوهان چونڊي وزيراعظم بڻايو هيو يا نه بڻايو هيو؟، نواز شريف کي اوهان وزيراعظم بڻايو هيو نه، اڄ نواز شريف کي انهن ڪڍي ڇڏيو، رڳو ڪاغذن تي ڪڍي ڇڏيو، اوهان جي دلين مان نه ڪڍي سگهيا، سڀاڻي ٻيهر نواز شريف کي هي ماڻهو وزيراعظم بڻائي ڇڏيندا، منهنجو مقصد وزيراعظم بڻجڻ ناهي، پاڪستان جا مالڪ ويهه ڪروڙ عوام آهن يا ناهن؟، گجرانوالا جا مالڪ هتان جا ماڻهو آهن يا ناهن؟، مون کي ڪهڙي ڳالهه تي ڪڍيو ويو؟، لوڊشيڊنگ ختم ڪئي پئي وئي، ملڪ ترقي ڪري رهيو هيو، واپار وڌڻ شروع ٿيو هيو، نواز شريف چيو ته هتي ڪارخانا هلڻ شروع ٿي ويا، بيروزگاري گهٽجڻ شروع ٿي وئي، پاڪستان ۾ موٽر ويز بڻجي رهيون هيون، بجلي سستن اگهن تي اچڻ واري هئي، بيروزگاري جو خاتمو ٿي رهيو هيو، ملڪ ۾ امن قائم ٿي رهيو هيو، دنيا تسليم ڪري ٿي ته پاڪستان پرامن ٿي رهيو هيو، پوءِ ڪهڙو سبب هيو جو نواز شريف کي ڪڍيو ويو، پاڪستان جو امن راس نه آيو، ماڻهن کي برداشت نه ٿيو، ڌرڻا ڏيڻ شروع ٿي ويا، هي ماڻهو سوچي رهيا هئا نواز شريف ڪامياب ٿي ويو، 2018 ۾ به اچي ويندو، هن چيو ته منهنجي خلاف فيصلو ڏيڻ وارئو، قوم جو فيصلو به ڏسو.

 

پ پ چيئرمين سنڌ مان ماڻهن جي کنڀجڻ تي ڳڻتي ظاهر ڪري ڇڏي، سنڌ سرڪار کان جواب طلب

ڪراچي (ويب ڊيسڪ): پيپلز پارٽي چيئرمين بلاول ڀٽو زرداري چيو آهي ته هن وقت جمهوريت ۽ سسٽم کي ڪو خطرو ناهي، ها نواز شريف جي ذات کي ڪو ضرور خطرو آهي، نواز شريف جي ذات ۽ جمهوريت جو ڪو تعلق ناهي، هن چيو ته گذريل چونڊن ۾ سياسي حالتون ڪجهه مختلف هيون، اسان ڪو آئيني ٽڪراءُ نٿا چاهيون، بلاول ڀٽو زرداري چيو ته سنڌ ۾ گم ٿيل ماڻهن جي حوالي سان معاملا سامهون اچي رهيا آهن، گم ٿيل ماڻهن جي حوالي سان سنڌ حڪومت کان به سوال ڪري رهيو آهيان، هن چيو ته سنڌ ۾ ماڻهن جي گم ٿيڻ واري معاملي جي سخت مذمت ڪريان ٿو، سينيٽ ۾ انساني حقن جي ڪميٽي ۾ به سنڌ مان گم ٿيل ماڻهن بابت آواز اٿارڻ لاءِ چيو آهي، اسان گار گند جي سياست نه ڪنداسين، اسان ڪنهن ٻي پارٽي جي فيصلن تي ناهيون هلندا، مائنس ون جو فارمولو نه هلندو، اسان چاهيون ٿا ته ادارن ۾ ٽڪراءُ نه هجڻ گهرجي.

 

پاڪستان جي آبادي 21 ڪروڙ کان وڌي وئي، ڇهين آدمشماري 2017 جا نتيجا

ڪراچي (اين اين آءِ) ڇهين آدمشاري 2017 جي شروعاتي نتيجن موجب پاڪستان جي آبادي 13 ڪروڙ 23 لک کان وڌي 21 ڪروڙ 31 لک کان وڌي وئي آهي، جڏهن آزاد ڪشمير ۽ گلگت سميت اها آبادي 21 ڪروڙ 90 لک تائين پهچڻ جو امڪان آهي، 1998 کان 2017 تائين ست ڪروڙ 87 لک کان وڌيڪ ماڻهن جي واڌ ٿي آهي، ڪراچي جي آبادي 98 لک کان وڌي هڪ ڪروڙ ستر لک کان وڌي وئي آهي، گڏيل طور سنڌ جو ڪل حصو آبادي ۾ 23 سيڪڙو کان وڌي 24 سيڪڙو ٿي ويو آهي، آبادي ۾ 5 آدمشماري 1998 جي ڀيٽ ۾ گڏيل طور تي 60 سيڪڙو واڌ ٿي اهي، پنجاب کانسواءِ ٻين صوبن ۾ شره جي واڌ وڌي وئي آهي. پاڪستان جي ڇهين آدمشماري جي حوالي سان مختلف ذريعن مان ملندڙ غير حتمي انگ اکر موجب پاڪستان جي آدمشماري 13 ڪروڙ 23 لک جي ڀيٽ ڇهين آدمشماري 2017 ۾ وڌي 21 ڪروڙ 31 لک ٿي وئي آهي ، ذريعن موجب 1998 ۾ پنجاب جي آبادي 7 ڪروڙ 36 لک هئي جيڪا چهين آدمشماري ۾ 11 ڪروڙ 10 لک کان وڌي وئي آهي، سنڌ جي آبادي 3 ڪروڙ چار لک هئي جيڪا وڌي 5 ڪروڙ 10 لک کان وڌي وئي آهي، ڪي پي ڪي جي آبادي هڪ ڪروڙ 37 لک هئي جيڪا هن وقت وڌي 3 ڪروڙ 10 لک کان وڌيڪ آهي، بلوچستان جي آبادي 65  لک هئي جيڪا 2017  هڪ ڪروڙ 15 لک آهي ، فاٽا جي آبادي 31لک هئي جيڪا هن وقت وڌي 55 لک ٿي آهي. اسلام آباد جي آبادي 8 لک هئي جيڪا هن وقت وڌي 21 لک ٿي وئي آهي. انگ اکر موجب 1998 کان 2016 تائين  ست ڪروڙ 87 لک کان وڌيڪ مانهن جي واڌ آهي جيڪو گڏيل طور تي تقريبن سٺ سيڪرو ٿي آهي، پنجاب ۾ اها واڌ ٽي ڪروڙ 84 لک آهي جيڪا 52 سيڪڙو کان وڌيڪ ٿيئي ٿي. سنڌ ۾ اها واڌ ٻه ڪروڙ ڇهه لک آهي جيڪا 68 سيڪرو کان وڌيڪ اهي، ڪي پي ڪي م اها واڌ هڪ ڪروڙ 33 لک  آهي جيڪا 65 سيڪڙو کان وڌيڪ ، بلوچستان ۾ اها واڌ 50 لک آهي جيڪا 77 سيڪڙو کان وڌيڪ آهي، فاٽا ۾ اها واڌ 24 لک آهي جيڪا 77 سيڪڙو کان وڌيڪ آهي، ملڪ جي اهم شهرن جي حوالي سان ملندڙ انگ اکر موجب 1998 ۾ اسلام آباد جي آبادي 8 لک هئي جيڪا هن وقت 21 لک کان وڌيڪ آهي، ڪراچي جي آبادي 98 لک هئي جيڪا هڪ ڪروڙ 70 لک آهي، لاهور جي آبادي 63 لک هئي جيڪا هن وقت هڪ ڪروڙ ويهه لک آهي، راولپنڊي جي آبادي 33 لکن مان 56 لک ٿي وئي. پشاور جي آبادي 20 لک هئي جيڪا هن وقت 40 لک آهي، ڪوئيٽا جي آبادي 7 لک سٺ هزار هئي جيڪا هن وقت 20 لک آهي. شماريات کاتي جي ذريعن موجب 1998 جي شرح واڌ جيڪا 2.69 سيڪڙو هئي ان حساب سان واڌ 51 کان 53 سيڪڙو هجڻ گھرجي هان پر گڏيل طور تي واڌ 60 سيڪڙو آهي. جنهن جو چٽو مطلب اهو آهي ته پاڪستان جي سالياني شرح واڌ ۾ واڌ ٿي آهي. پنجين آدمشاري 1998 جي سالياني شڙح واڌ موجب پنجاب جي واڌ ملندڙ جلندڙ آهي جڏهن ته سنڌ ڪي پي ڪي ، بلوچستان ۽ فاٽا جي آبادي ۾ تمام گھڻي واڌ جي شرح ٿي آهي.

 

ڪراچي: دهشتگردن جي فائرنگ، ڊي ايس پي ٽريفڪ ڊرائيور سميت شهيد

ڪراچي(اين اين آءِ) ڪراچي جي علائقي عزيز آباد ۾ اڻڄاتل موتر سوار ٽريفڪ  پوليس اهلڪارن تي فائرنگ ڪئي جنهن جي نتيجي ۾ ڊي ايس پي ڪريم آباد ٽريفڪ پوليس حنيف خان ۽ انجو ڊرائيو مارجي ويو، سنڌ جي وڏي وزير سنڌ جي گھرو وزير ۽ آئي جي سنڌ پوليس اهلڪارن تي فائرنگ جي واقعي جي سخت لفظن ۾ مذمت ڪئي آهي. ريسڪيو ذريعن موجب  فائرنگ جو واقعو شهيد ملت گرلز ڪاليج جي ويجھو آيو جتي موٽر سوار اڻڄاتل دهشتگردن ڊيوٽِي تي موجود ڊي ايس پي حنيف خان جي گاڏي تي فائرنگ ڪئي جنهنجي نتيجي ۾ ڊي ايس پي حنيف خان موقعي تي ئي فوت ٿي ويو جڏهن ته انجو ڊرائيور فدا عالم سخت زخمي ٿي پيو جنهنکي طبي امداد لاءِ اسپتال پهچايو ويو، جڏهن ته هو به اعلاج دوران  زخمن جا سور نه سهندي فوت ٿي ويو. واقعي جو اطلاع ملندي ئي پوليس ۽ رينجر جي وڏي نفري حآدثِي واري جاءِ کي سيل ڪري ڇڏيو. پوليس موجب حملو ڪندڙن گاڏيءِ جي فرنٽ اسڪرين تي انڌاڌنڌ فائرنگ ڪئي. پوليس موجب حملي آورن ٻنهي طرفن کان گاڏيءَ تي حملو ڪيو . سيڪيورٽِي اهلڪارن موجب ڊي ايس پي محمد حنيف خان جي گاڏي کي 15 کان 20 گوليون هنيون ويون، واردات واري جاءِ کان ملندڙ خول فارينزڪ ليب موڪليا ويا آهن جڏهن ته ڪاروائي جي شروعات ڪئي وئي آهي، شروعاتي جاچ موجب دهشتگردن موٽر سائيڪل تي سوار هيا حملي آور سامهون کان ئي ڊي ايس پي کي نشانون بڻايو واردات ۾ استعمال ٿيندڙ هٿيار اڳ ۾ ڪنهن ۾ واردات ۾ استعمال نه ٿيا، اکين ڏٺن شاهدن موجب حملي آور ٻن موٽر سائيڪلن جي سوار هيا حملي کان پوءِ آساني سان فرار ٿي ويا، ٻئي طرف ايڊيشنل اي آئي جي غلام قادر ٿيٻو چيو آهي ته دهشتگردن پيڇو ڪري حملو ڪيو، سنڌ جي وڏي وزير سيد مراد علي شاهه پوليس اهلڪارن جي فائرنگ جي واقعي جي سخت لفظن ۾ مذمت ڪئي ۽ آئي جي سنڌ واقعي جي رپورٽ طلب ڪئي آهي ، سنڌ جي گھرو وزير ايڊيشنل آئي جي ڪراچي کان واقعي جي فوري رپورٽ طلب ڪئي آهي، گھرو وزير سڄي شهر ۾ سيڪيورٽِي هائي الرٽ رکڻ ۽ جوابدارن جي فوري گرفتاري جو حڪم ڏنو آهي، آئي جي سنڌ واقعي جي مذمت ڪندي ڊِي آئي جي ذوالفقار کان رپورٽ طلب ڪئي آهي.

 

جمهوريت جي گاڏي کي پٽڙي تان لهڻ نه ڏينداسين، نواز شريف قوم جو آواز آهي: شاهد خاقان عباسي

اسلام آباد (اين اين آءِ) وزيراعظم شاهد خاقان عباسي چيو آهي ته جمهوريت جي گاڏي کي پٽڙي تان لهڻ نه ڏينداسين، نواز شريف قوم جو آواز آهي، 2018 ۾ ن ليگ عوام جي عدالت مان ڪامياب ٿيندي، موجوده حڪومت نواز شريف جي پاليسين ۽ منصوبن کي مڪمل ڪندي، جمهوريت جي بقا مضبوطي لاءِ سمورين سياسي پارٽين کي گڏجي کڻي هلنداسين، 60 ارب ڊالر جي لاڳت سان سي پيڪ منصوبو پاڪستان جي ترقي ۽ خوشحالي ۾ مددگار ثابت ٿيندو، علائقائي امن لاءِ آئين ۽ قانون جي بالادستي هرصورت ۾ برقرار رکي ويندي، خطي جو امن ڪشمير سان آهي، جتي ظلم جي بازارا گرم آهي، ڪشمير تي ڪنهن به قسم جي سوديبازي قبول نه آهي، 31 ڊسمبر 2017 تائين ڪچي آبادي جي مالڪاڻا حق ۽ مسئلن جي حل لاءِ پارلياماني ڪميٽي قائم ڪئي ويندي، جنهن ۾ ڪاغف جا نمائندا شامل هوندا، وزيراعظم اها ڳالهه تحريڪ پاڪستان جي جهوني ڪارڪن مرحوم مرشد شاهين گورايا مرشدي جي پٽ ۽ ڪچي آبادي اينڊ ڳوٺ فيڊريشن آف پاڪستان ڪاغف ۽ قومي امن رابطا ڪونسل پاڪستان جي چيئرمين امن جي سفير صاحبزاده احمد عمران نقشبندي مرشدي سان ملاقات دوران ڪيو، ان موقعي تي وفاقي وزير عبدالقادر بلوچ به ساڻس گڏ هو، ڪاغف جي چيئرمين وزيراعظم کي سڄي ملڪ جي ڪچي آبادين ۽ ڳوٺن جي مالڪاڻي حقن جي قانونسازي لينڊ مافيا ۽ ان جي سهولتڪارن پاران سرڪاري زمينن کي چائنا ڪٽينگ ۽ جعلي نالن سان وڪرو ڪري قومي ناڻي کي اربين رپين جو نقصان پهچائڻ وارن قدمن کان آگاهه ڪندي مسئلن جي حل لاءِ 52 تجويزون پيش ڪندي کيس سنڌ جي دوري جي دعوت ڏني جنهن کي وزيراعظم قبول ڪندي چيو ته هو ويجهو سنڌ جو دورو ڪندو، وزيراعظم چيو ته ڪچي آبادين ۽ ڳوٺن جي ڪروڙين رهواسين جو جمهوريت کي مضبوط ڪرڻ ۾ بنيادي ڪردار آهي، صوبائي حڪومتن کي گهرجي ته اهي پنهنجن پنهنجن صوبن ۾ وڌيڪ ڪچي آبادين کي قائم ڪرڻ کي روڪڻ لاءِ موثر ۽ هڪجهڙي پالسي بڻائيندي سمورن صوبن ۾ 31 ڊسمبر 2017 تائين آباد سمورن ڪچي آبادين ۽ ڳوٺن کي مالڪاڻا حق ڏيڻ لاءِقانونسازي ڪن ۽ سستي رهائش گهٽ لاڳ اسڪيمون بڻائي گهٽ آمدني وارين شهرين کي رهائش جون سهولتون ۽ بنيادي ضرورتن جي فراهمي کي يقيني بڻائين، هن چيو ته هو ان سلسلي ۾ وفاقي وزارت هائوسنگ ۽ تعميرات کي به هدايت ڪندو، هو وزيراعظم هائوسنگ پروجيڪٽ تحت وفاقي حڪومت پاران سستي گهٽ لاڳت وارين رهائشي اسڪيمن لاءِ منصوبابندي ڪري. هن چيو ته هو ڪراچي پورٽ ٽرسٽ جي زمين تي قائم 8، ٽي ڊبليو ڊي جي زمين تي قائم 10 ريلوي جي زمين تي قائم 80، ڊفينس جي زمين تي قائم 10، پي ٽي ايل ۽ واپڊا جي زمين تي قائم هڪ هڪ ڪچي آبادين کي مالڪاڻا حق ڏيڻ لاءِ واسطيدارن ادارن کي اين او سي فراهمي جي حوالي سان هدايتون جاري ڪيون وينديون ۽ ان سلسلي ۾ ن ليگ پاران قومي اسيمبلي ۾ قرارداد به پيش ڪيو ويندو، هن چيو ته علائقائي امن لاءِ قانون جي بالادستي هر صورت ۾ برقرار کي ويندي، هن چيو ته اسان جمهوريت جي بقا ۽ مضبوطي لاءِ سمورين پارٽين سان گڏجي هلنداسين، هن چيو ته ڪراچي پاڪستان جو حب آهي، اتان جي عوام جا مسئلا حل ڪنداسين، ڪراچي ۾ امن جي بحالي جو ڪريڊٽ نواز شريف ڏانهن وڃي ٿو، هن چيو ته نواز شريف ۽ ن ليگ ڪراچي جي عوام کي ڪنهن جي به رحم ڪرم تي نه ڇڏيندي، 70 سالن ڏکيائين سان منهن ڏيڻ باوجود ملڪ وڏيون ڪاميابيون حاصل ڪيون آهن پر افسوس سياسي نظام کي مضبوط ٿيڻ نه ڏنو پيو وڃي. هاڻ 21 ڪروڙ عوام سياسي نظام کي ڪمزور ڪندڙ سازشن جو ڄمي مقابلو ڪندو. دهشتگردي جي خاتمي لاءِ پاڪ فوج، سيڪيورٽي ادارن جو قربانيون ساراهه جوڳيون آهن انهن کي ڪڏهن به وساري نٿو سگهجي، 70 هين آزادي جي ڏهاڙي تي ان کي زبردستي خراج عقيدت پيش ڪرڻ پاڪستان جي عوام جو قومي فرض آهي.

 

سمورن آئيني ادارن کي پارليامينٽ جي عزت ڪرڻي پوندي: مريم اورنگزيب

اسلام آباد (اين اين آءِ) سڌ سماءَ واري مملڪتي وزير مريم اورنگزيب چيو آهي ته پاڪستان پنهنجو ستر سالن جو تاريخي سفر مڪمل ڪري چڪو آهي. پاڪستان جي هر شخص ملڪ کي اڳتي وٺي وڃڻ لاءِ ڪردار ادا ڪيو آهي، 18 وزيراعظم ملڪ م رهيا پر ڪنهن کي به پنهنجو مدو پورو نه ڪرڻ ڏنو ويو اڄ سمورن ادارن گڏجي ملڪ کي دهشتگردي کان پاڪ ڪيو آهي، 2013 ۾ ماڻهون دهشتگردي  سبب ملڪ ڇڏي رهيا هئا ۽ اڄ واپس اچي رهيا آهن. موجوده وزيراعظم اڳوڻي وزيراعظم جي مشن کي مڪمل ڪندو وزيراعظم هوندي نوازشريف پنهنجي ٽن نسلن جو حساب ڏنو اهي، عوام جي ووٽن جي عزت کان بغِير پارليامينٽ جي عزت نه ٿيندي، آئين جي عزت کانسواءِ ادارن کي هٿي نه ملندي، لوڪ ورثا ميوزم ۾ تصويري نمائش جي افتتاحي تقريب کي خطاب ڪندي مملڪتي وزير چيو ته سڌ سماءَ واري وزرت جي انتظام هيٺ پاڪستاني تاريخ جي تصويري نمائش خوشي جھڙي ڳالهه  آهي. نمائش ۾ گذريل ستر سالن دوران جمهوري ادارن جي ڪردار کي هٿي وٺرائي وئي آهي. پاڪستان پنهنجي ستر سالن جو ت اريخي سفر نوازشريف جي قيادت ۾ مڪمل ڪري چڪو آهي، هن چيو ته موٽروي جو ڄار نه هجي هان ته اڄ سي پيڪ به نه هجي هان، هن چيو ته ڏکڻ ايشيا جو سڀ کان وڏو صحت جو پروگرام پاڪستان ۾ شروع ڪيو ويو اهي، هن چيو ته پاڪستان جا سڀ ماڻهون ڪردار ادا ڪن ته جيئن ملڪ ۾ طاقتور جمهوريت کي هٿي ملي، هن چيو ته محمد نوازشريف وڏي ڊائلاگ واري ڳالهه ڪئي آهي هن چيو ته عوام جي ووٽن جي عزت کانسواءِ پارليامينٽ جي عزت نه ٿيندي ۽ آئين جي عزت ڪرڻ کانسواءِ ادارن کي هٿي نه ملندي. هن چيو ته آئين جي حڪمراني ان وقت ممڪن آهي جڏهن پارليامينٽ مضبوط ٿيندي، هن چيو ته آپوزيشن سان همدردي جو اظهار ڪيو جن ننڍيون ننڍيون جلسون ڪيون ۽ ايترو وڏو سمنڊ تڏهن نڪتو جڏهن ميان نوازشريف ٻاهر آيو.

 

وزيراعظم، چيف جسٽس ۽ فوجي قيادت ۾ ڊائيلاگ ٿيڻ گهرجي: رضا رباني

اسلام آباد( ويب ڊيسڪ ) سينيٽ چيئرمين رضا رباني ادارن ۾ ڊائيلاگ شروع ڪرڻ جي اجازت ڏئي ڇڏي آهي،  سندس چوڻ آهي ته ادارن ۾ ٽڪراءُ مناسب ناهي. هڪ بيان ۾ سينيٽ چيئرمين رضا رباني چيو ته آئيني ادارن ۾ سڀ کان ڪمزور ترين ادارا پارليامينٽ آهي جنهن جا 9 سبب آهن. هن چيو ته اندورني ڪمزورين سبب عدليه، انتظاميه ۽ آمريتون سڀ پارليامينٽ تي حملو ڪنديون آهن. سندس چوڻ هو ته اندورني ڪمزورين تي ضابطو آڻيندي پارليامينٽ کي پاليسين ۽ فيصلن جو مرڪز بڻائڻو پوندو. سينيٽ چيئرمين رضا رباني چيو ته طاقت جو مرڪز عدليه، انتظاميه ۽ پارليامينٽ اهن پر پارليامينٽ اندروني ڪمزورين سبب ڪمزور ترين ادارو بڻجي ويو آهي. هن چيو ته انتظاميه ڪابينا پارليامينٽ تي يلغار ڪري ٿي، ڪڏهن عدليه ته ڪڏهن وري آمريتن طرفان پارليامينٽ تي حملو ڪيو ويندو آهي. سندس چوڻ هو ته پا رليامينٽ جي ڪمزوري جو سبب سياسي پارٽين طرفان پارليامينٽ کي سنجيده نه وٺڻ، اهم فيصلن جو اعلان پارليامينٽ کان ٻاهر ٿيڻ، پارليامينٽ جي گڏيل اجلاس بدران اي پي سي جهڙا فورم استعمال ڪرڻ شامل آهي.

 

ايپڪس ڪميٽي سنڌ جو اجلاس، خطرناڪ قيدين کي ڪراچي مان صوبي جي ٻين جيلن ۾ منتقل ڪرڻ جو فيصلو

ڪراچي (اسٽاف رپورٽر) ايپڪس ڪميٽيءَ پنهنجي 20هين اجلاس ۾ اهو فيصلو ڪيو آهي ته 270 قيدن بشمول 19 تمام خطرناڪ قيدين کي سينٽرل جيل ڪراچيءَ مان صوبي جي مختلف جيلن ۾ منتقل ڪرڻ جو فيصلو ڪندي انهن کي هاءِ سڪيورٽي قيدي ظاهر ڪيو آهي. اجلاس جي صدارت سنڌ جي وڏي وزير سيد مراد علي شاهه ڪئي. اجلاس ۾ ڪورڪمانڊر ڪراچي ليفٽننٽ جنرل شاهد بيگ مرزا، چيف سيڪريٽري سنڌ رضوان ميمڻ، ڊي جي رينجرز ميجر جنرل محمد سعيد ۽ ٻين شرڪت ڪئي. اجلاس ۾ واضح ڪيو ويو ته ڪراچي سينٽرل جيل ۾ 270 خطرناڪ قيدي آهن جن مان 19 تمام گهڻا خطرناڪ آهن ۽ اهي مختلف طريقن سان پنهنجا نيٽ ورڪ هلائي رهيا آهن. ان صورتحال کي ڏسندي فيصلو ڪيو ويو ته انهن کي ايندڙ ڏهن ڏينهن اندر صوبي جي ٻين جيلن ڏانهن منتقل ڪيو وڃي. وڏي وزير گهرو کاتي کي هدايت ڪئي ته اهي پنهنجا ڪيس ملٽري فورسز کي موڪلي، ان مقصد لاءِ گهرو کاتو ۽ قانون کاتو پنهنجي ڪيسن جي جاچ پڙتال ۽ جائزو وٺڻ بعد ضروري ڪاغذن سان گڏ ملٽري فورس ڏانهن موڪلن. اجلاس ۾ صوبي اندر مدرسن ۾ اضافي تي به غور ڪيو ويو، واضح رهي ته اٽڪل 1000 مدرسا غيرقانوني طور تي سرڪاري زمين تي واقع آهن. اجلاس ۾ فيصلو ڪيو ويو ته انهن 1000 مدرسن جا ڪاغذات / اين او سي وغيره جي ڇنڊڇاڻ ڪئي ويندي ۽ ڪنهن به مدرسي کي آرٽري / روڊ تي تعمير جي اجازت نه ڏني ويندي. اجلاس ۾ اها ڳالهه به غور هيٺ آئي ته گذريل ٽن کان چئن سالن دوران 60 مدرسا ٿرپارڪر ۾ تعمير ڪيا ويا جڏهن ته علائقي ۾ آبادي جي اڪثريت هندن جي آهي. اتي اهو سوال پيدا ٿئي پيو ته ٿر ۾ اهي مدرسا ڇو قائم ڪيا پيا وڃن، اهو هڪ سوال طلب معاملو آهي ۽ ان حوالي سان خدشا به آهن، انڪري اهو فيصلو ڪيو ويو آهي ته گهرو کاتو غيرقانوني طور تي تعمير ڪيل مدرسن جي جاچ ڪندو. اجلاس کي ٻڌايو ويو ته گهوٽڪي ۾ 3 مدرسا آهن جن کي سرڪاري زمين تي غيرقانوني طور تي قائم ڪرڻ تي نوٽيس ڏنا ويا آهن. ايپڪس ڪميٽي ۾ پابندي لاڳو پيل تنظيمون جيڪي نون نالن سان ڪم ڪري رهيون آهن انهن تي به غور ڪيو ويو ۽ اهو فيصلو ڪيو ويو ته انٽيليجنس ايجنسين، پوليس ۽ رينجرز اهڙن ڪيسن جي جاچ ۽ ضروري ڪارروائي ڪندي. اجلاس ۾ وڌنڌڙ سائيبر ڪرائم تي به غور ڪيو ويو ۽ اهو فيصلو ڪيو ويو ته سائيبر ڪرائم ڪيسن جي جاچ پڙتال ۽ رجسٽرڊ ڪرڻ بابت وفاقي حڪومت/ ايف آءِ اي کان اختيار گهريا وڃن. وڏي وزير چيو ته صوبائي پوليس سيٽ اپ کي رڳو شيڊول ڪيسن جي ضرورت نه آهي پر انهن کي اهڙن ڪيسن تي به ڪم ڪرڻ واري مهارت جي ضرورت آهي. اجلاس ۾ فيصلو ڪيو ويو ته سائيبر ڪرائم ڊيٽيڪشن سسٽم ۾ سيڙپڪاري ڪئي وڃي. اجلاس کي ٻڌايو ويو ته دهشتگردن جو ڊيٽا گڏ ڪيو پيو وڃي. سنڌ پوليس، پنجاب پوليس سان گڏجي ڪم ڪري رهي آهي ۽ ڏهارين جي ريڪارڊ جي شئرنگ ۽ ترتيب ڏنو پيو وڃي. واضح رهي ته ان ڳالهه جو فيصلو 18هين ايپڪس ڪميٽيءَ واري اجلاس ۾ ڪيو ويو هو۔ اجلاس ۾ پوليس جي اهلڪارن جي هلندڙ وڌندڙ ٽارگيٽ ڪلنگ جي واقعن تي به غور ڪيو ويو. اهو هڪ سنگين مامرو آهي ۽ ان حوالي سان خبرون اينديون رهنديون آهن. وڏي وزير چيو ته لازمي طور تي اهو بند ٿيڻ گهرجي ۽ اتي بهتر طريقي سان ڪم ڪيو وڃي. ان تي اجلاس کي ڊي جي رينجرز ۽ آءِ جي پوليس ٻڌايو ته اهي پوليس اهلڪارن جي ٽارگيٽ ڪنگ ۾ ملوث گينگ کي ختم ڪرڻ جي تمام ويجهو آهن. اجلاس ۾ ڪچي وارن علائقن ۾ ڏوهارين خلاف آپريشن تي به غور ويچار ڪيو ويو، جنهن لاءِ وڏي وزير اڳئي اجازت ڏني آهي. اجلاس ۾ فيصلو ڪيو ويو ته ان حوالي سان فضائي سپورٽ، اضافي فورس، جيڪا پوليس، رينجرز ۽ آرمڊ فورس اهلڪارن تي مشتمل هجي ان جي مدد ورتي وڃي. ان حوالي سان آپريشن آءِ جي پوليس ۽ ڊي جي رينجرز حتمي شڪل ڏيندا. اجلاس ۾ درگاهه جي سڪيورٽي وارو مامرو به غور هيٺ آيو. اجلاس ۾ ٻڌايو ويو ته حضرت لعل شهباز قلندر ۽ حضرت شاهه عبداللطيف ڀٽائي درگاهن کي گهربل پوليس فورس جي مقرري ۽ واڪ ٿرو گيٽس ۽ سي سي ٽي وي ڪيميرا لڳائي محفوظ بڻايو ويو آهي. ٻين درگاهه ۾ سڪيورٽي فورس کي بهتر بڻائي وارو عمل جاري آهي. اجلاس ۾ شهر ۾ اسٽريٽ ڪرائم تي به غور ڪيو ويو ۽ وڏي وزير چيو ته اسٽريٽ ڪرمنلز جو لازمي طورتي خاتمو ٿيڻ گهرجي. هن اي جي سنڌ کي هدايت ڪئي ته اسٽريٽ ڪرمنلز جي ڪيسن جي حوالي سان چيف جسٽس آف سنڌ هاءِ ڪورٽ سان ڳالهائي. هن چيو ته مان چاهيان ٿو ته انهن جا ڪيس به دهشتگردي وارن عدالتن ۾ هلڻ گهرجن. ان ڪري اي جي سنڌ کي هدف ڏنو ويو ته هُو سنڌ هاءِ ڪورٽ سان ڳالهه ٻولهه ڪري. ڊي جي رينجرز ٻڌايو ته انهن 450 اسٽريٽ ڪرمنلز کي پوليس حوالي ڪيا ۽ پوليس به وڏي انگ ۾ اسٽريٽ ڪرمنلز کي گرفتار ڪيو آهي. وڏي وزير آءِ جي سنڌ کي چيو ته اهو هڪ سنجيده مامرو آهي انڪري ان کي سختي سان منهن ڏنو وڃي. اجلاس ۾ ڪارن، موٽرسائيڪلن ۾ سم لڳائڻ ۽ موبائيل فون ۾ ٽرينگ سسٽم جي ايڪٽيويشن بابت اپائن تي به غور ويچا ڪيو ويو. صوبائي گهرو وزير چيو ته هن منيوفيڪچرز سان ڪيترائي اجلاس منعقد ڪيا آهن ۽ ڪجهه انهن حوالي سان راضپو به ظاهر ڪيو آهي پر اڃا نه انهن کي قائل ڪرڻ جي ضرورت آهي. جيتري حد تائين موبائل فون جي آهي ان ۾ سسٽم موجود آهي ۽ ڳولا ڪري سگهجي ٿي. اجلاس ۾ لينڊ گريبنگ واري مامري تي به غور ڪيو ويو ۽ چيو ويو ته اهو شهر ۾ هڪ منظم ڏوهه آهي. ضلعي انتظاميا ۽ پوليس کي اهو هدف ڏنو ويو ته اهي سرڪاري ۽ خانگي ملڪيت کي تحفظ فراهم ڪري ۽ جيڪڏهن هڪ زمين جا ڪيترائي دعويٰ ڪندڙ يا ڪاغذ سامهون اچن ته انهن جي بورڊ آف روينيو جي آٽوميشن برانچ کان ان جي تصديق ڪئي وڃي. اجلاس ۾ 10 وڌيڪ ڪيس بشمول امجد صابري، ملٽري ڪورٽس موڪلڻ جي منظوري ڏني وئي. انهن ڏهن ڪيسن ۾ عاصم ڪيپري، اسحاق بوبي، سميع الله ۽ ٻيا گروپ نامزد آهن. واضح رهي ته سنڌ حڪومت 90 ڪيس ملٽري ڪورٽس ڏانهن موڪليا آهن جن مان 37 ڪيس ملٽري ڪورٽس ۾ هلي رهيا آهن، جن مان 21 ڪيسن ۾ سزا ملي چڪي آهي. اجلاس کي ٻڌايو ويو ته سنڌ حڪومت جي سفارش تي گهرو وزارت 69 تنظيمن کي شيڊول ون ۾ رکيو آهي. صوبائي حڪومت 573 ماڻهن کي شيڊول فور ۾ رکيو آهي. وڏي وزير آءِ جي پوليس کي هدايت ڪئي ته فورٿ شيدول تي ان جي اصل روح موجب عملدرآمد ٿيڻ گهرجي. فورٿ شيڊولرز کي گهرجي تي اهي قانون تي عمل ڪن جنهن لاءِ پوليس اسٽيشن کي هدايت جاري ڪئي وئي آهي. اجلاس کي ٻڌايو ويو ته 7095 افغان پناهه گيرن کي واپس موڪليو ويو آهي، 3135 غيرقانوني افغانين خلاف ڪيس داخل ڪيا ويا آهن، 5073 غيرقانوني طور ترسيل افغانين کي گرفتار ڪيو ويو آهي ۽ 888 افغانين کي ڊي-پورٽ ڪيو ويو آهي.

 

اسان قائد اعظم جي بنيادي اصولن طرف موٽڻو آهي، نيشنل ايڪشن پلان جي اهم جزن تي عملدرآمد نه ٿي رهيو آهي: آصف علي زرداري

اسلام آباد (اين اين آءِ) اڳوڻي صدر آصف علي زرداري اقليتن جي ڏينهن 11 آگسٽ جي موقعي تي پنهنجي پيغام ۾ چيو آهي ته اقليتن جو ڏينهن ملهائڻ جو مقصد اهو آهي ته اسان قائد اعظم جي 11 آگسٽ 1947 جي تقرير جيڪا هن آئين ساز اسيمبلي ۾ خطاب ڪندي ڪئي هئي جنهن ۾ هن رياست جي پاليسين جنهن ۾ شامل پاڪستان ۾ غير مسلم شهرين بابت رياستي پاليسي بيان ڪئي هئي، اسان ان کي پنهنجي اندر ۾ جزب ڪيون ۽ ان جو حقيقي مطلب سمجهون، پنهنجي ان تاريخي تقرير ۾ قائد اعظم چيو هو ته توهان ڪهڙي به مذهب، رنگ ۽ نسل سان تعلق رکندا هجو رياست جو ان ۾ ڪو به دخل نه آهي ۽ اسان پاڪستان کي مضبوط ۽ خوشحال ڏسڻو چاهيون ٿا، اسان کي قائد اعظم جي ان بنيادي اصولن ڏانهن موٽڻو پوندو، هن چيو ته جڏهن کان رياست ۾ ڊڪٽيٽرشپ جي زماني ۾ جهاد جي نجڪاري ڏانهن اکيون بند ڪيون ويون آهن ان وقت کان قوم قائد اعظم جي ويزن کان پري ٿيندي پئي وڃي، اسان کي هر صورت ۾ جهاد جي نجڪاري جي پروجيڪٽ کي ختم ڪرڻو پوندو ۽ پاڻ ۾ عسڪريت پسندن، انتهاپسندن ۽ مذهبي جنونيت کي ڪڍڻو پوندو، هن چيو ته ان ڳالهه تي سخت ڳڻتي آهي ته نيشنل ايڪشن پلان جي اهم جزن تي عمل نه ٿي رهيو آهي ۽ فرقيواريت ڦهلائڻ وارا ۽ ڪالعدم تنظيمن جي خلاف ڪو به ايڪشن نه ورتو پيو وڃي ۽ اهي تنظيمون نون نالن سان ٻيهر جنم وٺي رهيون آهن، ان موقعي تي هن مطالبو ڪيو ته فرقيواريت، عسڪريت سپندي ۽ انتهاپسندي خلاف جنگ لاءِ قاضي فيض عيسيٰ جي رپورٽ تي عمل ڪيو وڃي، اسان کي هر صورت ۾ ملڪ ۾ اندروني طور تي امن کي بحال ڪرڻو پوندو، اڄ جو ڏينهن اسان انهن ماڻهن کي خراج عقيدت پيش ڪيون ٿا جن هر مذهب، هم آهنگي ۽ غير مسلم شهرين جي حقن لاءِ قربانيون ڏنيو، اهي ماڻهو قوم جا هيرو آهن.

 

عوام نواز شريف جي مظلوميت جو ڊرامو رد ڪري ڇڏيو آهي: عمران خان

اسلام آباد (ويب ڊيسڪ): اسلام آباد ۾ پاڪستان تحريڪ انصاف جي مشاورتي اجلاس ۾ عمران خان جو چوڻ هيو ته عوام نواز شريف جو مظلوميت ڪارڊ رد ڪري ڇڏيو آهي، نواز شريف تي هاڻي فرد جرم به لڳڻ وڃي رهيو آهي، اڳوڻو وزيراعظم جوابدار مان هاڻي ڏوهاري بڻجڻ وڃي رهيو آهي، پي ٽي آءِ چيئرمين عمران خان اجلاس ۾ چيو ته عوام نواز شريف جو مظلوميت ڪارڊ رد ڪري ڇڏيو آهي، سندس نواز شريف کي مخاطب ڪندي چوڻ هيو ته ميان صاحب اوهان تي فرد جرم لڳڻ وڃي رهيو آهي، اوهان جوابدار مان ڏوهاري بڻجڻ وڃي رهيا آهيو، سندس چوڻ هيو ته عوام کي نواز شريف جي چوري جو يقين ٿي ويو آهي، نواز شريف پنهنجي بيگناهي جو ڪو به ثبوت پيش ناهي ڪري سگهيو، پاڪستان تحريڪ انصاف جي مشاورتي اجلاس ۾ ان ڳالهه تي به زور ڀريو ويو ته پاڪستان تحريڪ انصاف عدليه سان گڏ بيٺل آهي، اجلاس ۾ اڳوڻي وزيراعظم جي عدليه مخالف بيان جي سخت مذمت ڪئي وئي آهي.