تازيون خبرون

Daily Archives: August 11, 2017

5 ماڻهن پاران وزيراعظم کي 5 منٽن ۾ فارغ ڪرڻ ووٽرز جي توهين آهي: نواز شريف

اسلام آباد (ويب ڊيسڪ): اڳوڻي وزيراعظم نواز شريف چيو آهي ته پاڪستان جي ترقيءَ لاءِ ڪم ڪري رهيو هيس، اسپتالون ۽ موٽر ويز بڻائي رهيو هيس، بجلي ۽ گئس جي لوڊشيڊنگ ختم ڪرڻ لاءِ ڪم ڪري رهيو هيس، دينا ۾ خطاب ڪندي اڳوڻي وزيراعظم نواز شريف چيو ته 5 ماڻهو وزيراعظم کي 5 منٽن ۾ فارغ ڪري ڇڏين ٿا، ڇا اها پاڪستان جي ووٽرز جي توهين ناهي؟، هن چيو ته نواز شريف کي اها سزا ڇو ڏني وئي؟، ستر سالن کان تماشو هلي رهيو آهي، اهو بند ٿيڻ گهرجي يا نه؟، اوهان منهنجو ساٿ ڏيندئو، تقدير الله سائين بدلائيندو آهي پر ماڻهن ذريعي بدلائيندو آهي، پاڪستان جي تقدير بدلائڻ لاءِ ساٿ ڏيندئو؟، هي مون کي انعام ڏنو ويو آهي ملڪ جي خدمت جو، ڇا هي سزا آهي يا جزا آهي؟، پاڪستان جو دستور ۽ پاڪستان جو طريقيڪار بدلائڻو پوندو.

 

سنڌ ۾ نيب قانون ختم، نوٽيفڪيشن جاري

ڪراچي  (اين اين آءِ) سنڌ ۾ احتساب آرڊيننس 1999 کي ختم ڪيو ويو آهي، سنڌ جي کاتن ۾ نيب کي ڪرپشن تي ڪارروائي جو ڪو به اختيار نه هوندو، سنڌ جي قانون واري کاتي احتساب آرڊيننس ختم ڪرڻ بابت نوٽيفڪيشن جاري ڪري ڇڏيو آهي، سنڌ جي گورنر اسيمبلي مان منظور ڪيل قانون تي صحيح نه ڪئي هئي، جڏهن ته سنڌ اسيمبلي ايڪٽ جي ڇپائي جا حڪم جاري ڪري ڇڏيا ۽ نئون قانون لاڳو ٿيڻ کانپوءِ سنڌ جي صوبائي کاتن ۾ نيب ڪرپشن جي جاچ نه ڪري سگهندي، ان ڏس ۾ قانون واري وزير ضياءُ الحسن لنجار ٻڌايو ته سنڌ اسيمبلي مان منظور ڪيل بل هاڻ ايڪٽ بڻجي چڪو آهي ۽ قانون بڻجڻ کانپوءِ صوبائي کاتن ۾ نيب جو ڪردار ختم ٿي چڪو آهي، هن چيو ته صوبائي احتساب ايجنسي جي قيام کانپوءِ ڪرپشن تي ضابطو آڻي سگهبو ۽ صوبائي احتساب ايجنسي خود مختيار ادارو هوندو. نئين قانون تحت نيب صوبي جي ماتحت ادارن ۾ ڪارروائي جو اختيار نه رکندي ۽ نيب تحت ٿيندڙ ڪارروايون ۽ ڪيسن جي جاچ سنڌ اينٽي ڪرپشن کي منتقل ٿي وينديون.

 

حڪمران غريب ماڻهن جو تيل ڪڍي مٿي تي پيا هڻن وار پوءِ به نه ڦٽندا: خورشيد شاهه

اسلام آباد( ويب ڊيسڪ ) قومي اسيمبليءَ ۾ مخالف ڌر جي اڳواڻ خورشيد شاهه چيو آهي ته حڪمران غريب ماڻهن جو تيل ڪڍي مٿي تي هڻي رهيا آهن پر وارا پوءِ نه نڪرندا. اسلام آباد ۾ پبلڪ اڪائونٽس ڪميٽيءَ جي اجلاس جي صدارت ڪندي چيئرمين خورشيد شاهه چيو ته ملڪ ۾ 80 سيڪڙو صارف جو تلق غريب طبقي سان آهي، تنهن باوجود حڪومت 35 رپيه لٽر وارو تيل عوام کي 80 رپين ۾ وڪرو ڪري رهي آهي، غريب صارفين کي 2 رپيه يونٽ واري بجلي ستن رپيه في يونٽ وڪرو ڪئي پئي وڃي، جڏهن ته سي پيڪ جي سڪيورٽي جي نالي تي بجلي صارفين کان 17 ارب رپيه اوڳاڙيا پيا وڃن. اجلاس ۾ پاڻي ۽ بجلي واري وزارت جي 5 ڪروڙ رپين کان وڌيڪ جي بقايا جو جائزو ورتو ويو. آڊٽ اختيارين ٻڌايو ته اهڙن وڏن باقيدارن مٿان 246 ارب 90 ڪروڙ رپين کان وڌيڪ بقايا آهي جيڪي فوت ٿي ويا يا ڪاروبار بند ڪري ويا آهن.

 

ڀارت پاڪستان ۾ افغانستان ذريعي دهشتگردي ڪري رهيو آهي: پرڏيهي ترجمان

اسلام آباد( ويب ڊيسڪ ) پرڏيهي آفيس جي ترجمان نفيس ذڪريا چيو آهي ته ڀارت افغانستان جي ڌرتي پاڪستان خلاف استعمال ڪري رهيو آهي، جڏهن ته ڪابل سرڪار سان ڪيترائي ڀيرا معاملو اٿاريو ويو آهي.  اسلام آباد ۾ هفتيوار بريفنگ ڏيندي پرڏيهي آفيس جي ترجمان نفيس ذڪريا چيو ته والاريل ڪشمير ۾ ڀارتي ظلم جو سلسلو ڪيتري ئي عرصي کان جاري آهي، هلندڙ هفتي 15 معصوم ڪشميرين کي شهيد ڪيو ويو. هن چيو ته عالمي برادري معصوم ڪشميرين جي قتل عام کي روڪڻ ۾ ناڪام ٿي وئي آهي، جڏهن ته ڀارت اڪثريتي ڪشميرين کي اقليت ۾ تبديل ڪرڻ چاهي ٿو، مسئلي کي گڏيل قومن جي ٺهرائن موجب حل ڪيو وڃي. سندس چوڻ هو ته پاڪستان دهشتگردي خلاف جنگ ۾ قربانيون ڏنيون آهن، پاڪستان دهشٽگردي جي خاتمي لاءِ پرعزم آهي، ڀارت پاڪستان ۾ دهشتگردي پکيڙي رهيو آهي. پرڏيهي آفيس جي ترجمان چيو ته ڪشمير بابت گڏيل قومن جي ٺهرائن کي 70 سال گذري ويا آهن، ڀارت امڪاني راءِ شماري جي نتيجن تي اثرانداز ٿيڻ جي ڪوشش ڪري رهيو آهي. پرڏيهي آفيس جي ترجمان چيو ته ڀارت ڪشمير ۾ آبادي جو تناسب تبديل ڪرڻ چاهي ٿو تنهن ڪري عالمي برادري ڀارتي چالن جو نوٽيس وٺي.  هن چيو ته 2017ع ۾ ايل او سي جي ڀڃڪري 500 کان وڌيڪ ڀيرا ڪئي وئي، اها ڀارت جي هڪ چال آهي ته ڪشمير ۾ اسناني حقن جي لتاڙ تان ڌيان جي نظر هٽائي سگهجي. سندس چوڻ هو ته 2018ع ۾ سي پيڪ جو پهريون مرحلو مڪمل ٿيندو. پرڏيهي آفيس جي ترجمان چيو ته سي پيڪ منصوبي کي پلاننگ ڪميشن ڏسي رهي آهي، جيڪو مرحليلوا مڪمل ٿي رهيو آهي.

 

سينيٽ چيئرمين انٽرا انسٽيٽيوشنل ڊائلاگ شروع ڪرڻ جي اجازت ڏئي ڇڏي

اسلام آباد (ويب ڊيسڪ) سينيٽ چيئرمين رضا رباني پاناما فيصلي کانپوءِ پيدا ٿيل سياسي صورتحال کي نظر ۾ رکندي پارليامينٽ جي ڪردار تي بحث ڪرائڻ جو فيصلو ڪندي چيو آهي ته ملڪ ادارن ۾ تڪرار برداشت نٿو ڪري سگهي، تنهن ڪري ادارن وچ ۾ تڪرار نه پر ڊائلاگ جي ضرورت آهي. سندس چوڻ آهي ته پارليامينٽ کي اختيار ڏيڻ لاءِ ڪميٽي آف هول جي تحريڪ تيار ٿيڻ گهرجي، ٺوس تجويزون اچڻ تائين سينيٽ جي هول ڪميٽي جا اجلاس ٿيندا. هن چيو ته اهو حڪومت يا اپوزيشن نه پر سڄي ايوان جو معاملو آهي، ادارن ۾ ٽڪر مناسب ناهي، عدليا، فوج ۽ حڪومت وچ ۾ انٽرا انسٽيٽيوشنل ڊائلاگ ڪرايا ويندا.27

 

نوازشريف جي ريلي کي سيڪيورٽي فراهم ڪرڻ نون ليگ حڪومت جي ذميواري آهي : احسن اقبال

اسلام آباد  (اين اين آءِ) وفاقي گھرو وزير احسن اقبال چيو ته نوازشريف جي ريلي  کي سيڪيورٽي فراهم ڪرڻ حڪومت جي ذميواري آهي، وزيراعظم ڪنهن جي خلاف احتجاج يا وڳوڙن جي لاءِ ڪنٽينر تي نه چڙهيو آهي، نجي ٽِي وي سان ڳالهائيندي گھرو وزير چيو ته محمد نوازشريف ٽي دفعا وزيراعظم ٿيو ۽ هو پارٽي ۽ ملڪ جو اثاثو آهي کيس سيڪيورٽي فراهم ڪرڻ حڪومت جي ذميواري آهي، هن چيو ته حڪومت پي ٽي آئي ۽ عوامي تحريڪ کي ڊي چوڪ جي ڌرڻن کي به سيڪيورٽي ڏني هئي. هن چيو ته نوازشريف ڪنهن جي خلاف مارچ ريلي نه ڪڍي رهيو اهي پر هو پنهنجي گھر وڃي رهيو آهي ۽ عوام سان محبت جو اظهار ڪري رهيو آهٿي، هن چيو ته نوازشريف جي ڪنٽينر ٺ۽ مخالفن جي ڪنٽينر ۾ فرق آهي، ڇو ته نوازشريف ڪنهن جي خلاف احتجاج يا اڳوڙن جي لاءِ ڪنٽينر تي نه چڙهيو آهي،

 

وڏي وزير ضلعي سطح تي استادن جي غيرقانوني ڀرتين جي جاچ جو حڪم ڏئي ڇڏيو، رپورٽ طلب

ڪراچي (اسٽاف رپورٽر) سنڌ جي وڏي وزير سيد مراد علي شاهه تعليم کاتي (اسڪول سائيڊ) کي هدايت ڪئي آهي ته ضلعي سطح تي استادن جي غيرقانوني ڀرتين جي جاچ ڪري رپورٽ پيش ڪئي وڃي. هن چيو ته مان ٽيچنگ ڪيڊر ۾ ڪنهن به غيرقانوني اينٽريءَ جي اجازت نه ڏيندس. هن چيو ته اين ٽي ايس ذريعي بهترين استاد ڀرتي ڪرڻ جي ضرورت آهي. هن اهي هدايتون اڄ وزيراعليٰ هائوس ۾ تعليم کاتي جي مختلف منصوبن تي ٿيندڙ اڳڀرائي تي جائزي بابت اجلاس جي صدارت ڪندي ڏنيون. اجلاس ۾ صوبائي وزير پي اينڊ ڊي مير هزار خان بجاراڻي، صوبائي تعليم وارو وزير ڄام مهتاب ڏهر، چيئرمين پي اينڊ ڊي محمد وسيم، وڏي وزير جو پرنسپل سيڪريٽري سهيل راجپوت، ناڻي وارو سيڪريٽري حسن نقوي، سيڪريٽري اسڪولز ايجوڪيشن عزيز عقيلي، سيڪريٽري ڪاليجز ايجوڪيشن پرويز سيهڙ ۽ ٻين لاڳاپيل آفيسرن شرڪت ڪئي. وڏي وزير چيو ته 2008ع کان استادن جي ڀرتين تي ڪابه پابندي نه آهي، پر گهربل ٽيچنگ اسٽاف ٿرڊ پارٽي / سٺي ساک جي حامل ادارن ذريعي ڀرتي ڪيا پيا وڃن. هن سوال ڪيو ته مختلف ضلعن ۾ ڪيترا استاد ڀرتي ڪيا ويا آهن؟. صوبائي وزير تعليم ڄام مهتاب ڏهر وڏي وزير کي ٻڌايو ته 3700 استاد جون پگهارون انهن جي سندن جي تصديق جي ڪري روڪيون ويون آهن. هن چيو ته ان جي باوجود ته قومي اخبار ذريعي ڪيترائي نوٽيس شايع ڪرڻ بعد رڳو 16 استادن پنهنجا ڪاغذ جمع ڪرايا آهن. وڏي وزير سيڪريٽري تعليم کي هدايت ڪئي ته هُو ان معاملي جي جاچ ڪري ۽ غيرقانوني ڀرتين جا آرڊر جاري ڪرڻ، فراڊ ۽ جعلسازي ۾ ملوث ماڻهن خلاف ايف آءِ آر داخل ڪرائي ان معاملي جي جاچ ڪئي وڃي. هن چيو ته مان تعليم جي شعبي ۾ ميرٽ ۽ معيار تي ڪنهن به قسم جو سمجهوتو نه ڪندس. هن چيو ته ملڪ خاص طور تي سنڌ جو مستقبل تعليم تي آهي، انڪري اسان جي گڏيل ذميواري آهي ته ايمانداري ۽ جذبي سان ڪم ڪريون. سيڪريٽري اسڪول ايجوڪيشن عزيز عقيليءَ وڏي وزير کي بريفنگ ڏيندي ٻڌايو ته تعليم جي شعبي ۾ پرڏيهي امداد تحت 6 مختلف منصوبا جاري آهن، انهن ۾ ورلڊ بينڪ جي سهڪار سان سنڌ ايجوڪيشن رفارم پروگرام (ايس اي آر پي I/II) 66 ملين ڊالرز جو سنڌ گلوبل پارٽنرشپ فار ايجوڪيشن (ايس جي پي اي) ان لاءِ به فنڊ ورلڊ بينڪ، يورپين يونين ۽ ٻين ڊونرز فراهم ڪيا آهن. اي يو سنڌ ايجوڪيشن سيڪٽر پروگرام (ايس اي ايس ايس پي)، سنڌ بيسڪ ايجوڪيشن پروگرام (ايس بي اي پي) آف يو ايس ايڊ، ڪيپسٽي بلڊنگ آف ٽيچرز ٽريننگ انسٽيٽيوٽ اينڊ ٽريننگ آف ايليمينٽري اسڪولز ٽيچرز آف سي آءِ ڊي اي ۽ جائيڪا جو گرلز ايليمينٽري اسڪولز شامل آهن. ايس اي آر پي هڪ ۽ ٻه بابت ڳالهائيندي سيڪريٽري چيو ته اهي ترتيبوار 355.044 ملين ڊالرز ۽ 321.432 ملين ڊالرز جا پروجيڪٽس آهن، انهن ٻنهي منصوبن جا ٻه حصا آهن. ايليجيبل ايسپينڊيچر پروگرام (اي اي پي) ٽيڪنيڪل اسسٽينٽ (ٽي اي). ايس اي ايس ايس پي بابت روشني وجهندي هن چيو ته ان تحت ايجوڪيشن گورننس، پهچ ۽ معيار تي ڌيان ڏنو ويو آهي. اي يو تحت 25.5 ملين يورو جي (16-2015ع) ۾ بجيٽ ۾ سپورٽ ڪيو ويو، ايندڙ پروگرامن تحت 50 ملين يورو جا وعدا ڪيا ويا آهن. ايس بي اي پي منصوبو يو ايس ايڊ جي فنڊ تحت 155 ملين ڊالرز جو آهي، ان منصوبي تحت 106 اسڪول تعمير ڪيا پيا وڃن، ان منصوبن جي ٻين حصن ۾ سنڌ ريڊنگ پروگرام، ڪميونٽي موبيلائيزيشن پروگرام، سنڌ ڪيپسٽي ڊولپمينٽ پروگرام ۽ آرڪيٽيڪچرل اينڊ انجنيئرنگ سپورٽ پروگرام شامل آهن. سنڌ حڪومت به ان منصوبي ۾ 1.02 ملين رپين جي فنانسنگ ڪئي آهيئ اجلاس کي ٻڌايو ويو ته ايس بي اي پي پروگرام تحت 7 ضلعن ۾ 106 اسڪول تعمير ڪيا پيا وڃن، اڃا تائين 16 اسڪول مڪمل ڪيا ويا آهن، جڏهن ته 63 اسڪول تي ڪم جاري آهي. سيڪريٽري تعليم عزيز عقيليءَ چيو ته مڪمل ٿيندڙ 16 اسڪولن مان 9 اسڪول پي پي پي موڊ تحت حوالي ڪيا ويا آهن. حوالي ڪيل 9 اسڪول خيرپور ۽ سکر ضلعن جي مختلف ڳوٺن ۾ واقع آهن. 10 وڌيڪ اسڪول هن مهيني جي آخر ۾ حوالي ڪيا ويندا. 1.3 بلين رپين جا سي آءِ ڊي اي منصوبي بابت بريفنگ ڏيندي عزيز عقيليءِ چيو ته ان پروگرام تحت 1016 هيڊماسترن کي تربيت ڏني وئي آهي. 100 هيڊماسترن جو ٽن هفتن وارو تربيتي پروگرام هن مهيني شروع ڪيو ويو ۽ آڪٽوبر ۾ مڪمل ٿيندو. 700 نوان ترقي حاصل ڪندڙ هيڊماسترن لاءِ ٽن هفتن وارو تربيتي پروگرام هن مهيني ۾ شروع ڪيو پيو وڃي ۽ سبجيڪٽ اسپيشلسٽ جي ترقي حاصل ڪندڙ 700 هيڊماسترن جي تربيت وارو پروگرام به جلد شروع ٿيندو. هن چيو ته ان پروگرام  تحت 3416 هيڊماسترن کي تربيت فراهم ڪئي ويندي. ٻهراڙي وارن علائقن ۾ گرلز اسڪولن کان ايليمينٽري اسڪول اپ گريڊنگ جائيڪا پروگرام بابت ٻڌائيندي چيو ته اهو پروگرام ٻن مرحلن ۾ آهي، ان جي اصل ۾ 2013ع ۾ ٻن بلين رپين جي ان پروگرام جي ايڪنيڪ کان منظوري ڏني وئي هئي ۽ ان ۾ جائيڪا جو حصو 1.66 بلين رپيا جڏهن ته سنڌ حڪومت جو 409 ملين رپيا حصو هو. پروگرام جا ٻه حصا آهن ڏاکڻو پاسي ۽ اتريون پاسو ۽ اهو جون 2019ع ۾ مڪمل ٿيندو. پروگرام جي ٻين مقصدن ۾ پهچ جي بهتري ۽ جينڊر گيپ جو تدارڪ، ٻهراڙي ۽ شهري فرق کي ختم ڪرڻ ۽ گرلز ايليمينٽري اسڪولن جي ضلعن ۾ ترجيحي بنيادن تي ترقي ڏيڻ شامل آهي. هن چيو ته 54 اسڪولن مان 39 مڪمل ڪيا ويا آهن، جڏهن ته 25 تعمير هيٺ آهن، جيڪي مڪمل ٿي چڪا آهن، 10 ميرپورخاص، 2 حيدرآباد، 6 ڄام شورو، 3 بينظيرآباد، 6 بدين ۽ 2 ٽنڊوالهيار ضلعن ۾ آهن. وڏي وزير صوبائي تعليم واري وزير کي هدايت ڪئي ته هُو ميرٽ تي توجهه ڏئي ۽ فنڊن جي صحيح ۽ مناسب استعمال کي يقيني بڻائي ڇاڪاڻ ته اهو تمام اهم آهي.

 

صحافين تي تشدد جي مذمت، ميان صاحب پنهنجي گلو بٽن کي قابو ۾ رکي: بلاول ڀٽو/ناصر شاهه

لاهور(م.ڊ)  نواز شريف جي جلسي دوران نجي ٽي وي جي صحافين ۽ ڪئميرامينن تي ن ليگ جي ڪارڪنن تشدد ڪيو آهي. جنهن جي مختلف ڌرين پاران مذمت ڪئي وئي آهي. پاڪستان پيپلز پارٽي جي چيئرمين بلاول ڀٽو زرداري، نواز شريف جي جلسي دوران صحافين ۽ ڪئميرامين تي تشدد جي مذمت ڪندي اهڙي عمل کي صحافت جي آزادي تي حملو قرار ڏنو آهي. پنهنجي جاري ڪيل بيان ۾ پ پ پ چيئرمين چيو ته جلسن ۽ جلوسن دوارن عورتن سان اڍنگو ورتاءُ ۽ صحافين تي حملن وارو لاڙو جمهوري روايتن ۽ سماجي قدرن لاءِ موتمار وهه آهي، اهڙن لاڙن کي روڪڻ لاءِ سياسي پارٽين ۽ انهن جي قيادت کي وڏي نظر ۽ ذميواراڻو ڪردار ادا ڪرڻ گهرجي. بلاول ڀٽو زرداري مطالبو ڪيو ته صحافين تي حملي ۾ ملوث جوابدارن کي بنا دير گرفتار ڪيو وڃي. سنڌ جي اطلاعات واري صوبائي وزير سيد ناصر حسين شاھ صحافين تي ٿيندڙ مارڪٽ جي سخت لفظن ۾ مذمت ڪندي چيو آهي ته ميان صاحب پنهنجي گلو بٽن کي قابو ۾ رکي. هن چيو ته اسان بول ٽي وي جي رپورٽرز ۽ ٽيم تي حملي جي سخت لفظن ۾ مذمت ڪريون ٿا. ناصر حسين شاھ وڌيڪ چيو ته صحافين کي هيسائڻ نه ڏنو ويندو. ميڊيا جمهوريت جو ٿنڀو آهي ان جي حفاظت اسان جي ذميواري آهي. وزير اطلاعات سنڌ سيد ناصر حسين شاھ چيو آهي ته صحافين تي حملا ڪندڙن کي فوري طور تي گرفتار ڪيو وڃي ۽ انهن جي خلاف سخت ڪارروائي عمل ۾ آندي وڃي.

 

پارٽي جي مضبوطي لاءِ سوچي سمجهي ڪم ڪرڻو پوندو: چوڌري نثار

اسلام آباد (ويب ڊيسڪ) اڳوڻي گهرو وزير چوڌري نثار چيو آهي ته اسان کي برداشت ۽ صبر سان هلڻ گهرجي، اهڙو طريقي ڪار اختيار نه ڪيو جنهن سان ادارن کي پنهنجي خلاف ڪري ڇڏيو ۽ هاڻوڪين حالتن ۾ گهڻي حد تائين نه وڃڻ گهرجي. قومي اسيمبلي جي ميمبرن سان غير رسمي ڳالهه ٻولهه ڪندي چوڌري نثار جو چوڻ هو ته جيڪڏهن ڀٽو صاحب پي اين اي سان ڳالهه ٻولهه ڪري ها ته معاملا خراب نه ٿين ها پر ڀٽو صاحب انتهائي حد تائين ويو، جنهن سبب کيس نقصان پهتو. هن چيو ته جڏهن بينظير ڀٽو صاحبا 86 ۾ موٽي آئي ته سندس شاندار استقبال ٿيو ۽ اچڻ کانپوءِ بينظير ڀٽو ايتري سخت تحريڪ هلائي، جو ڪارڪن ۽ عوام ٿڪجي پيو، ان وقت چونڊن جو نتيجو آيو ته پ پ کي خواهش ۽ اميدن موجب سيٽون نه ملي سگهيون. چوڌري نثار چيو ته اڄ به پارٽي جي مضبوطي لاءِ سوچي سمجهي ڪم ڪرڻو پوندو.27

 

پاڪستان جي مڌر ٽريسا ڊاڪٽر رٿ فائو لاڏاڻو ڪري وئي

ڪراچي( ويب ڊيسڪ ) پاڪستاني مڌر ٽريسا ڊاڪٽر رٿ ڪراچيءُ ۾ لاڏاڻو ڪري وئي. پاڪستاني مڌر ٽريسا 88 ورهين جي ڄمار ۾ ڪراچيءَ جي خانگي اسپتال ۾ دم ڌڻي حوالي ڪيو. ڊاڪٽر رٿ فائو 9 سيپٽمبر  1929ع تي جرمني جي شهر ليپازگ ۾ جنم ورتو جيڪا ڊگهي عرصي کان ساهه جي تڪليف ۽ دل جي مرض جو شڪار رهي. ڊاڪٽر رٿ فائو 1960ع ۾ پاڪستان ۾ جذام جي خاتمي لاءِ ڪوششن جي شروعات ڪئي. ڊاڪٽر رٿ فائو جي ڪوششن سان ملڪ مان جذام جو مرض ختم ٿيو. صحت جي عالمي اداري 1996ع ۾ پاڪستان کي جذام تي ضابطو آڻڻ وارو ملڪ قرار ڏنو جڏهن ته پاڪستان ايشيا جو پهريون ملڪ هو جنهن ۾ جذام تي ضابطو آندو ويو.  حڪومت 1979ع ۾ ڊاڪٽر رٿ فائو کي جذام جي خاتمي لاءِ وفاقي صلاحڪار بڻايو ۽ 1988ع ۾ ڊاڪٽر رٿ فائو کي پاڪستان جي شهرت ڏني وئي. ڊاڪٽر رٿ جي خدمتن تي کيس ستاره قائد اعظم، هلال امتياز، جناح ايوارڊ ۽ نشان قائد اعظم سان نوازيو ويو، جڏهن ته ڊاڪٽر رٿ فائو کي جرمن حڪومت بيم بي ايوارڊ ۽ آغا خان يونيورسٽي ڊاڪٽر آف سائنس جي ايوارڊ سان نوازيو. ڊاڪٽر رٿ فائون جون آخري رسمون 19 آگسٽ تي پيٽرڪ چرچ صدر ۾ ادا ڪيون وينديون. وزيراعظم شاهد خاقان عباسي ڊاڪٽر رٿ فائو جي لاڏاڻي تي افسوس جو اظهار ڪندي چيو ته هوءَ جرمني ۾ پيدا ٿي پر سندس دل ۾ پاڪستان ۾ ڌڙڪندي هئي.