تازيون خبرون

Daily Archives: August 3, 2017

ڀارتي اداڪار انيل ڪپور پاران پاڪستان اچڻ جي خواهش

دبئي(شوبز نيوز) بالي ووڊ فلم اسٽار انيل پور پاڪستان اچڻ جي خواهش ظاهر ڪري ڇڏي گذريل ڏينهن دبئي ۾ پنهنجي نئين فلم مبارڪان جي تقريب جي موقعي تي ميڊيا سان ڳالهائيندي بالي ووڊ جي مشهور اداڪار انيل ڪپور جو چوڻ هو ته پشاور منهنجو اباڻو شهر آهي منهنجو والد ۽ منهنجو ڏاڏو پشاور جا رهواسي هئا دلي خواهش آهي ته مان پساور وڃان جڏهن به موقعو مليو ته اتي ضرور ويندس هڪ سوال تي هن جو چوڻ هو ته فنڪار پاڻ ۾ پيار، محبت ۽ امن کي هٿي ڏين پاڪستان ۽ ڀارت وچ ۾ به فنڪارن جي هڪ ٻئي ڏانهن اچڻ وڃن سان ٻنهي ملڪن جون نفرتون گهٽ ٿينديون هن جو چوڻ آهي ته پاڪستاني فنڪار باصلاحيت آهن هميشا انهن سان گڏ ڪم ڪرڻ تمام سٺو لڳندو آهي منهنجي ڌيءُ سونم ڪپور به پاڪستاني فنڪار فواد خان سان گڏ ڀارتي فلم ۾ ڪم ڪيو جنهن کي پاڪستان ۽ ڀارت سميت پوري دنيا ۾ ساراهيو ويو. ۰۳

 

اشتهارن ۾ ڪوڙ ڳالهائڻ تي شاهرخ خان خلاف عدالتي ڪارروائي

ممبئي(شوبز نيوز) شاهرخ خان کي شيونگ ڪريم جي اشتهار ۾ ان جي ڪوڙي تعريف ڪرڻ تي ڀارتي عدالت نوٽيس جاري ڪري ڇڏيو آهي ڀارتي فلم انڊسٽري جا تقريبن سمورا سپر اسٽارز اضافي آمدني جي مد ۾ اشتهارن ذريعي ڪروڙين ڪمائيندا آهن پر اضافي آمدني جي چڪر ۾ اداڪار اهو وساري ڇڏين ٿا ته عام ماڻهو اهو اشتهار ڏسي جيڪا به شئي خريد ڪندو آهي ان تي ان جا ڪيترائي خراب اثر پوندا آهن ڀارتي ميڊيا مطابق ڪجهه ڏينهن اڳ ڀارتي شهر ڀوپال سان تعلق رکندڙ هڪ شهري راجڪمار پانڊي بالي ووڊ سپر اسٽار شاهرخ خان خلاف شڪايت داخل ڪرائي آهي جنهن ۾ هن موقف اختيار ڪيو آهي ته ان ٽي وي تي شاهرخ خان جو هڪ شيونگ ڪريم وارو اشتهار ڏٺو هو، هو ان اشتهار کان ايترو متاثر ٿيو جو فوري طور ڪريم خريد ڪري گهر وٺي آيو جڏهن ته ڪريم استعمال ڪرڻ تي نه صرف ان کي نقصان ٿيو پر ان جي چهري تي به زخم ٿيا هن ڪنگ خان تي الزام لڳائيندي چيو ته شاهرخ اشتهارن وسيلي ماڻهن کي گمراهه ڪندو آهي هن اشتهار ۾ چيو هو ته هي شيونگ ڪريم ڀارت جي نمبر ون ڪريم آهي جنهن کي هڪ ڀيرو استعمال ڪرڻ تي اوهان هر هر استعمال ڪرڻ تي مجبور ٿي ويندو مان شاهرخ خان کي تمام گهڻو پسند ڪندوآهيان ۽ ان جي ڳالهه تي اعتبار ڪري ئي مون اها ڪريم خريد ڪئي پر ڪريم استعمال ڪرڻ تي مون کي خبر پئي ته شاهرخ خان صرف پنهنجي پروڊڪٽ وڪڙڻ لاءِ ڪوڙ ڳالهايو نه ته ان ئي ان ڳالهه جي ڪابه پرواهه ناهي ته ماڻهن کي ان سان ڪيترو نقصان ٿيندو. ۰۳

 

نيوزيلينڊ ڪرڪيٽ بورڊ پاڪستان سان سيريز جو شيڊول جاري ڪري ڇڏيو

لاهور(اسپورٽس نيوز) پاڪستان ڪرڪيٽ ٽيم جي نيوزيلينڊ جي دوري جو شيڊول جاري ڪيو ويو جنهن دوران قومي ٽيم ۵ ون ڊي ۽ ۳ ٽي ٽوئنٽي ميچن تي ٻڌل سيريز کيڏيندي نيوزيلينڊ ڪرڪيٽ بورڊ طرفان جاري شيڊول مطابق پاڪستان ۽ نيوزيلينڊ وچ ۾ ون ڊي ۽ ٽي ٽوئنٽي سيريز ٦ آگسٽ کان ۲۸ آگسٽ جي وچ ۾ کيڏي ويندي شيڊول مطابق پاڪستان ۽ نيوزيلينڊ وچ ۾ پهرين ون ڊي ٦ جنوري تي ويلنگٽن، ٻئين ميچ ۹ جنوري تي نيلسن، ٽئين ۱۳ جنوري تي ڊنڊڻ، چوٿين ۱٦ جنوري تي هيملٽن ۽ پنجين ون ڊي ميچ ويلنگٽن ۾ ۱۹ جنوري تي کيڏي ويندي، ٽن ٽي ٽوئنٽي ميچن تي ٻڌل سيريز جي شروعات ويلنگٽن ۾ ۲۲ جنوري تي کيڏي ويندي جڏهن ته ٻيون ميچون ۲۵ ۽ ۲۸ جنوري تي آڪلينڊ ۽ ماونٽ مائوگاني ۾ کيڏيون وينديون. ۰۳

 

سونين والين خاطر قتل ٿيل سکر جي معصوم نياڻي …!!!!: غلام مصطفيٰ جمالي

اسان زندگي جي الاءِ ڪهڙي موڙ تي اچي پهتا آهيون خبر ناهي اسان جي منزل ڪٿي آهي ۽ اها به خبر ناهي ته اسين ڪهڙي راهه جا مسافر آهيون. اسان جي اکين مان ننڊون رسي چڪيون آهن اسانجي رهبرن اسان جو ساٿ ڇڏي ڏنو آهي، اسان وسنڌين ۾ هوندي به رڻن جا راهي آهيون اهي رڻ  جيڪي سفرن جي لائيڪ ئي ناهن، اسان پنهنجي اکين اڳيان موت جا هزارين منظر پنهنجي اکين جي آرسي ۾ بند ڪري ڇڏيا آهن اسان پنهنجي معصومن جي تن جا  بنا ڪپڙن جي ڪاڙهن کي ڪڙِيل زّخم ناسور ٿيندي ڏٺا آهن .اسان جي همت اسان جا حوصلا پست ٿي چڪا آهن اسان جيڪي تنهائن جي سفرن جي نڪتل هئاسين سي هاڻي اڌ راهه رلي ويا آهيون اسان پنهجون منزلون وڃائي ويٺا آهيون اکين جو نور هوندي به پاڻ کي انڌا محسوس ڪري رهيا آهيون ڪنن جي پڙلاُاو هوندي به ڪنن کان ٻوڙا آهيون اسان کي ڪجهه سمجهه ۾ ئي نه پيو اچي ته اسين ڇا ڪريون اسان ڪيڏانهن وڃون. اسان مان ڪو به اهڙو ماڻهو ڪونهي، جيڪو اها هام هڻي ته هو سک ۽ سڪون جي زندگي گذاري رهيو آهي.اسان مان هر ڪو پريشان ۽ حيران آهي. هر ڪو هي ڳالهه مڃي ٿو ته پاڻ ڏکين ڏينهن مان گذري رهيا آهيون . اسان جي چؤطرف مسئلا ۽ مونجهارا آهن.وڌندڙ دهشتگردي،ماراماري،ڦرُ،ڌاڙا،ڪارو ڪاري،بم حملا هر طرف غربت آهي،۽ وحشي ماحول پکڙجي چڪو آهي،ڪالهه جتي سمورو پاڪستان سياسي جماعتن جي ڄونڊا پٽ ۾ ٿيندڙ وزيراعظم جي الڪيشن کي ڏسي رهيو هو ۽ ان هي وقت ڪي پي ڪي جي هڪ ايم اين اي عائشه گلالائي پنهنجي ئي ليڊرمٿان پنهنجي ٿيل عزت جي ذلت ٻڌائي رهي هئي،انهي وقت پاڪستان جي سموري ميڊيا انهن ٻنهي اشوزن کي ماڻهو تمام گهڻو غور سان ڏسي به  رهي هئي ۽ ٻڌي به رهي هئي،ان وقت پاڪستان جي سياسي ڄونڊا پٽ اندر ڪنهن به ڪا خبر نه هئي ته منهنجي جيجل سنڌ امڙ جي سيني تي هڪ قيامت جي رات اچي ڪڙڪي آهي  انڪري مان ڪهڙيون معياريون ڏيان ۽ ڪنهن کي معيارون ڏيان پنهنجن به انهي سنڌ  ڌرتي تي  قتل ٿيل معصوم 6 سالن جي نياڻين تي جيڪو قهر اچي قهر ڪڙڪيو هو انهي سموري قهر کي وساريون چڪيون هنيون،

هر ميڊيائي طبقو عمران ۽ عاشيه ۽ پاڪستان جي ٿيڻ واري وزيراعظم جي خبرن کي سينگاري رهيو هو، ان وقت سکراندر هڪ وحشين پنهنجي وحشيت  ۾ اچي ڪري باڳڙي خاندان جي 6 سالن جي معصوم گلن جهڙي ٻارڙيءَ کي ڳچي ۾ رسو ٻڌي گهٽا ڏئي قتل ڪري ڇڏيو هو،مان سمجهان ٿو جيڪڏهن قيامت جومقرر نه هجي هان ته هن وقت ضرور قيامت اچي ڪڙڪي ها،جنهن وقت انهي 6 سالن جي معصوم جي ڳجهي ۾ رسو وجهي کيس ماريو پئي ويو، پر الله پاڪ اهو فيصلي جو ڏينهن مقرر ڪري رکيو آهي،جيڪو هڪ ڏينهن ضرور ايندو،،سکر اندر وحشي انسانن معصوم  نياڻي جي ڪنن ۾ پيل سونين والين جي ڪري کيس گهٽا ڏئي ماري سندس لاش خالي پيل گهر جي ڪمري جي پلنگ هيٺان رکي ڇڏيو.سکر ۾ سي سيڪشن ٿاڻي جي حد وس پور محلي مان هڪ ڏينهن اڳ ڇهن ورهين جي مٺي ڌيءُ سيوا باگڙي گهران نڪتي جيڪا رستي مان گم ٿي وئي. ٻارڙيءَ جي گم ٿيڻ تي گهر ڀاتين جڏهن سندس ڳوالا شروع  ڳولا ڪئي  جنهن بعد سندس ڳچي ۾ رسو ٻڌل لاش علائقي جي خالي پيل گهر جي ڪمري مان پلنگ هيٺان هٿ آيو. ٻارڙيءَ جو لاش هٿ اچڻ تي باگڙي برادري جا مرد ۽ عورتون وڏي انگ ۾ جمع ٿي ويا هئا، جن ٻارڙيءَ جو لاش وس پور روڊ تي رکي احتجاجي مظاهرو پڻ ڪيو،

هن معاشري اندر جتي معصوم ٻارڙين جي جسني هوس جو نشانو بنائڻ کان ويندي انهن معصوم ٻارن جي ڪنن ۾ پيل سون جي والين تي به کين قتل ڪري سندس لاش لڪايا پيا وڃن  ان معاشري اندر ان کان  وڌيڪ قهر ڪهڙو هوندو،. جيئن جيئن وقت گذرندو پيو وڃي، تيئن تيئن درد ۽ دک وڌندا پيا وڃن. جنهن به مسيحا هجڻ جي دعويٰ ڪئي تنهن دوا بدران درد ڏنو. هر ڪو پنهنجو ڪتاب کڻي آيو، هر ڪو پنهنجو نظريو کڻي آيو، هر ڪنهن پاڻ تي ايمان ۽ اعتقاد آڻڻ جي تلقين ڪئي. ڪنهن به قوم تي ۽ عوام تي اعتماد ڪونه ڪيو. مطلب ته جيڪو آيو سور ڏئي ويو ۽ پل پل ۾ هڪ پور ڏئي ويو. اڻکٽ درد جي موجودگيءَ ۾ اسان ۾ هاڻي دوا جو احساس به پيدا ٿي چڪو آهي. هاڻي اسان چاهيون ٿا ته ڏکن ۽ ڏوجهرن مان چوٽڪارو ملي. مسئلا ۽ مونجهارا ختم ٿي وڃن ۽ هر ڪو سک جو ساهه کڻي. هر ڪو ماڻهو ايئن سوچي به ٿو ۽ ايئن لوچي به ٿو. پر سوال هي پيدا ٿئي ٿو ته پوءِ به اسان منزل ماڻي ڇو نه ٿا سگهون؟ پوءِ به اسان جا انفرادي، اجتماعي ۽ قومي ڏک پنجن منجهان پندرهن ڇو ٿا ٿين؟ڏاهن جو چوڻ آهي ته هي ”وسيع تر انفراديت“ جو دور آهي ! ان ڪري هر ڪو ماڻهو فقط پاڻ لاءِ سوچي ٿو ۽ لوچي ٿو. ان ڪري اجتماعيت ۽ قوميت هن لاءِ بي معنيٰ دائرا بڻجي پيا آهن. ڪو به قوم کي ۽ اجتماعي حالتن کي ٺاهڻ لاءِ پاڻ کي ڍاهڻ نه ٿو چاهي. ٿورو اڃا غور ڪري ڏسبو ته اسان مان ڪي ماڻهو پنهنجي وجود ۾ انفراديت کان ٿورو ٻاهر نڪري، پنهنجي برادري ۽ ذات پات جي ڀلائي ۽ خيرخواهي لاءِ به سوچن ٿا. ان ڪري ذاتين پاتين جي بنيادن تي تنظيمون ٺاهن ٿا ۽ پنهنجي ڏاڍ مڙسي مڃرائڻ لاءِ قبائلي جهيڙن ڪرڻ تائين اڳتي وڌي اچن ٿا. ذات پات ۽ ڪڙم قبيلي جي بت ۾ ننڍي کنڊ جي مذهبي حالتن روح ڦوڪيو.انهيءَ نظرئي جا ابا ڏاڏا هندو ئي آهن. پر اڄ ڪلهه هندو توڙي مسلمان ذات پات جي زنگ کان پاڻ بچائي نه سگهيا آهن. بلڪ انهيءَ انسان دشمن نطريئي جا مبلغ بڻجي چڪا آهن. جهڙي ريت انفراديت پرستي پوري انسانيت جي نفي ڪري ٿي. اهڙيءَ ريت ذات پرستي وري ظلم، ذيادتي، بي انصافي ۽ بد امنيءَ کي جنم ڏئي ٿي. اسان چوندا آهيون ته ڪو لڪل ۽ غير سنڌي هٿ سنڌ ۾ قبائلي جهيڙا ڪرائي ٿو.

بي شڪ ويڙهايو ۽ حڪومت ڪيو جي پاليسي اڃا ختم ڪانه ٿي آهي. ان کان سواءِ اسان جي سياسي ڪلچر اهڙي نظام کي قائم رکيو آهي. جنهن ڪري ماڻهو ذاتين ۽ برادرين ۾ تقسيم ٿي وڃن ٿا. پر ذاتين پاتين ۾ اختلافن ۽ تضادن پيدا ڪرڻ جا ڪارڻ اسان پاڻ ئي ٿيون ٿا.پر پاڻ کي بي ڏوهي ثابت ڪرڻ لاءِ پنهنجي غلطين ۽ گناهن جي ٽوڪري ايجنسين کي کڻائيندا آهيون.انفراديت ۽ ذات پات لاءِ ڏوهه ثواب ڪرڻ کان علاوه اسان ٿورو اڳتي وڌي ڪنهن گروهه يا لابيءَ لاءِ به پاڻ پتوڙيون ٿا. هن بدعت سنڌ ۾ موقعن، ذريعن ۽ وسيلن تي قبضا ڪرڻ وارا گروپ پيدا ڪري ڇڏيا آهن. ادارا، ريڊيو ۽ ٽي وي اهڙن ماڻهن لاءِ مڙهه مقام بڻجي چڪا آهن. مجال آهي ڪنهن نئين ۽ اوپري ماڻهوءَ کي جو هنن جو ڪڙو ٽوڙي سگهي. ادارن ۾ عهدا ۽ رتبا ملندا ته مخصوص ماڻهن کي،ريڊيو يا ٽي ويءَ تي پذيرائي ٿيندي ته مخصوص لابين جي.ٻيو وتي ٻاهريان چڪر ڏيندو. هر ڪنهن هنڌ پير يا ڪنهن وڏيري جي درٻار لڳي پئي آهي. ٽوپي ٽانڊو ڪندو ته ڳالهه ۾ اثر پيدا ٿيندس ۽ پنهنجي جوهر ڏيکارڻ جو موقعو ملندس.  اسان جي سهڪار سر پرستي، تعاون ۽ امداد جي ڪهاڻي اهائي آهي. سهڪار ۽ سر پرستيءَ جي منڊي گهوڙي انفرادي غرض، ذات پات ۽ گروهه کان ٻاهر نڪري ئي ڪانه ٿي سگهي. نتيجو اهو ٿو نڪري ته اسان جا اجتماعي ۽ قومي مسئلا حل ٿين ئي ڪونه ٿا ۽ اسان روز به روز وڌيڪ آزار، سور ۽ درد ڏسندا رهون ٿا. اهڙين حالتن ۾ اسان جو هر قدم عدم طرف وڌندو رهي ٿو.عدم طرف وڃڻ جو مطلب ٿيندو مري وڃڻ يا هي جهان ڇڏي وڃڻ. جڏهن اسان قومي ۽ اجتماعي مسئلن ڏانهن توجه نه ٿا ڏيون ۽ هٿ پير نه ٿا هلايون ته زندهه  قوم ڪيئن ٿا ٿي سگهون؟انهيءَ حساب سان اسان زندهه قوم آهيون ئي ڪو نه ڇو ته اسان جيئرا آهيون ته پاڻ لاءِ، زندهه آهيون ته ذات پات يا گروهه لاءِ. قوم لاءِ اسان جو زندهه هجڻ ڪا به معنيٰ نه ٿو رکي ۽ نه ان کي ڪو ضروري ڄاڻون ٿا.اسان جو هر قدم هن ڪري به عدم طرف وڌي ٿو، جواسان ۾ ڪٿي به ورڪنگ رليشنشپ نظر نه ٿي اچي.اسان ڪامن فيڪٽرس  کي اڳيان رکي تعاون نه ٿا ڪيون. ان ڪري هنڌين ماڳين، اسان جي قول ۽ فعل، اسان جي رويئي ۽ انداز ۾ عدم کانسواءِ ڪجهه به ڪونه آهي. بک، بيروزگاري ، جهالت، بد امني جان ۽ مال جي تحفظ جو اونو ۽ ٻيا اهڙا مسئلا ، سمورن جا مسئلا آهن.ايئن ڪونه آهي ته ڪو فرد واحد، ڪا هڪڙي ذات يا ڪو هڪ گروهه انهن مسئلن ۽ مونجهارن جو شڪار آهي

جڏهن مسئلا ۽ مونجهارا هڪجهڙا آهن ۽ هر ڪنهن لاءِ آهن ته پوءِ اسان پنهنجي انفراديت، ذات ، گروهه لاءِ ڇو ٿا سوچيون؟ پوءِ اسان جو هر قدم عدم جي رنگ ۾ رتل ڇو آهي؟اسان کي عدم تعاون، عدم اعتماد، عدم دلچسپي ۽ عدم سهڪار ڇو پسند آهن؟ اسان کي هر اهو لفظ ۽ هر اهو عمل ڇو ٿو وڻي جنهن جي اڳيان عدم اچي ٿو؟لفظ عدم سان اسان جي ايتري محبت ڇو آهي؟ عدم طرف وڌندڙ  اسان جو هر قدم اسان کي ڪٿي پهچائيندو؟عدم تعاون، عدم دلچسپي ۽ عدم تعلق اسان مان هر ڪنهن کي ويڳاڻو ۽ وياڪل بڻائي ڇڏيو آهي ۽ اسان هڪ هوندي، اسان هڪ قوم مان هوندي به الڳ الڳ ۽ جدا جدا آهيون. اسان مان هر ڪو بي يارو مددگار ٿي پيو آهي. ڪو ڪنهن جي سار نه ٿو لهي، ڪو ڪنهن جي مدد نٿو ڪري، ڪو ڪنهن جي ڪم نه ٿو اچي مون کي سنڌ حڪومت ۽ خاص طور آجي سنڌ مان تمام گهڻيون اميدون آهن ته مٺي باگڙي معصوم نياڻي سان انصاف ضرور ٿيندو ۽ مان مطالبو ٿو ڪيان ته مٺي جي قاتلن کي اهڙي سزا ڏني وڃي جيڪا عبرتناڪ سزا هجي جيڪا هميشه سنڌ اندر ياد ڪئي وڃي.!!!!

******

 

 

 

وڇوٽين جو هيءُ سلسلو ڪٿي ڇيهه ڪندو؟: عبدالمجيد مغيري

اِها ويهه سال اڳ جي ڳالهه آهي، سيوهڻ جي درگاهه تي ڌڻيءَ تعاليٰ کان دُعا لاءِ هٿ کنيو بيٺو هوس ته درگاهه جي ڏکڻ پاسي واري دروازي کان ماڻهن جي ميڙ ۾ هڪ ماڻهو اندر داخل ٿيو، ڪارا ڪپڙا پهريل هئس، مٿي تي خوبصورت سنڌي ٽوپي ۽ انتهائي خوش شڪل جوان هو. مان هڪ نظر کيس پيرن کان وٺي سندس ٽوپي جي چمڪندڙ ڪاون تائين، گهوري ڏسان ٿو، ڪاري وڳي ۾ ڄڻ چند جو ٽڪڙو ٿي لڳو. هُن درگاهه تي چادر چاڙهي، دعا گهري ۽ پوءِ مزار جي هڪ پاسي ٿي بيهي رهيو. هُن جي موهيندڙ صورت ڏسي منهنجي دل ۾ خيال پيدا ٿيو نه ته ڄاڻ الائي ڪير آهي؟ تنهن ويل ڀر ۾ بيٺل هڪ پوڙهي شخص، ٻئي همراهه کي ٻُڌايو پئي، اِهو ملڪ اسد سڪندر اٿئي. اهو ٻُڌندي ئي مان ساڻس هٿ ملائڻ لاءِ ٻه قدم اڳتي وڌيس، هُن به محسوس ڪري ورتو ته، هي همراهه مون سان ملڻ لاءِ اچي ٿو. اڃان ويجهو مس ئي پهتس ته، ان کان پهرين هُو گلابي چپن تي مٺي مرڪ تاريندي پاڻ مون ڏانهن وڌيو، مون هٿ اڳتي وڌايو، هڪ ٻئي سان مختصر تعارف ڪرائڻ کان پوءِ ڪجهه گهڙين تائين ڪچهري ٿيندي رهي. بعد ۾ موڪلائي هليو ويس. ڏاڍو قربدار محبتي ماڻهو هو. اُهو ڏينهن ۽ اڄو ڪو ڏينهن وري ڪڏهن به نه ساڻس ملاقات ٿي ۽ نه ئي ڪٿي ويجهي کان ڏٺم، بس ميڊيائي ذريعن تان سندس سياسي زندگيءَ جي حال احوال کان واقف ٿيندو رهيس. ۽ هاڻي وري ڪيترن ئي ڏينهن کان ملڪ اسد سڪندر ۽ پيپلز پارٽي جي سنڌ حڪومت وچ ۾ شروع ٿيل تڪرار جي حوالي سان ڪيترن ئي ڏينهن کان پرنٽ. اليڪٽرانڪ ۽ سوشل ميڊيا ۾ انتهائي گرم خبرون پڙهڻ ۽ ٻڌڻ ۾ اچي رهيون آهن.

ملڪ اسد سڪندر نه فقط پنهنجي قبيلي پر علائقي جي ڪيترين ئي ذايتن جي ماڻهن جو سردار آهي. ڪوهستان جو ڪنگ سڏيو وڃي ٿو. ۽ سياسي وابستگي پاڪستان پيپلز پارٽي سان آهي. وڏي ڳالهه هن وقت پاڪستان پيپلز پارٽيءَ جو چونڊيل ايم اين اي آهي.

سنڌ جي اُتر واري پاسي جي سردارن ۽ بااثر ڀوتارن جي قهري ڪارنامن ۽ ناڪاري ڪردار کان پوري دنيا چڱيءَ ريت واقف آهي. اُتي ٿيندڙ ناانصافيون سردارن، بااثر ڀوتارن ۽ سندن ماڻهن جي کاتي ڳڻجن ٿيون. ساڳي ئي سنڌ ۾ ملڪ اسد سڪندر به رهي ٿو. مختلف قبيلن جي ماڻهن جو سردار بااثر شخص آهي. پر هو وڏي پکيڙ رکندڙ علائقي ۾ رهندڙ لکين ماڻهن لاءِ بڙجي ڇانو بڻيل آهي. اتر سنڌ جي سردارن جي علائقائي حدن ۾ وڏا خوني جهيڙا ٿيندا رهيا آهن ۽ سالن تائين هلندا رهن ٿا، سوين ماڻهون پنهنجون جانيون وڃائي تباهه برباد ٿي ويا آهن. پر ڪو ٻڌائي ته، سردار ملڪ اسد سڪندر جي علائقائي حدن ۾ اڄ تائين ڪنهن معمولي جهيڙي کان سواءِ ڪو وڏو جهيڙو ڪا وڏي خونريزي ٿي هُجي؟ تقريبن سمورو جابلو علائقو آهي، لڪڻ جا وڏا هنڌ آهن. پوءِ به ڪڏهن، ڪنهن اهو نه ٻُڌو آهي ته ان علائقي ۾ ڪا بدامني هُجي. هن علائقي ۾ ديوان ڀائرن جي وڏي اڪثريت رهي ٿي، اُهي سردار جي صاحبيءَ ۾ پاڻ کي محفوظ تصور ڪن ٿا، نه ته باقي سنڌ مان ڪيترائي هندو ڀائر مختلف آزارن سبب پرڏيهه پلاڻي ويا آهن. مطلب ته هيءُ ماڻهو پنهنجي ماڻهن جو ڀرجهلو آهي، هُن کي پنهنجي علائقي سان بيپناهه محبت آهي، اهڙي ماڻهوءَ سان سنڌ سرڪار جو تڪرار سمجهه ۾ نه اچڻ واري ڳالهه آهي. هڪ اهڙو جرئتمند ماڻهو جيڪو نه رُڳو پاڻ، پر ٻين به ڪيترن ئي اُميدوارن کي سوڀ ڏيارڻ ۾ مدد ڪري ٿو، اُن سان پارٽيءَ جو هيءُ ورتاءُ ڪا سُٺي روايت ناهي.

حقيقت هيءَ آهي ته شهيد راڻي محترما بينظير ڀٽو کان پوءِ محترما جي وفادار، ايماندار اڳواڻن ۽ جيالن کي ڳولهي ڳولهي پارٽي جي پهرين صف مان ڪڍي، تمام پري بيهاري نڌڻڪو ڪيو ويو آهي. پنهنجي شهيد قائدين ۽ پارٽي مٿان جڏهن به ڏکيو وقت آيو ته غريب ڪارڪنن پنهنجو ساهه ڏئي ويساهه ڏنو ۽ هو سدائين وفائن جا باغ پوکيندا رهيا. پر افسوس! اهڙن غريب پرور اڳواڻن ۽ جيالن جي جاءِ مفاد پرست منافعي خورن اچي والاري آهن. جن شهيدن جي عوامي پارٽي کي فيڪٽري ۾ تبديل ڪري ڇڏيو آهي. جن ڪرپشن ڪري شهيدن جي پارٽي کي ڏادو  بدنام ڪيو آهي. اڄ به اُهي ئي ڦورو دل تي ڏاڍا مِٺا آهن. اهڙن ماڻهن کي نه پارٽي جي چيئرمين بلاول ڀٽو زرداري جو لحاظ آهي ۽ نه ئي شهيدن جي عوامي پارٽي سان ڪا دلچسپي آهي. هي فقط ڏوڪڙ ڪمائڻ لاءِ پارٽيءَ ۾ شامل ٿين ٿا، جنهن سبب چيئرمين بلاول ڀٽو زرداري جي ملڪ ۾ وڌندڙ عوامي مقبوليت کي نقصان رسي ٿو. معاهدا ڪري شامل ٿيندڙ اِهي واپاري ماڻهو شهيدن جي عوامي پارٽي جي تباهي ۽ برباديءَ جو سبب بڻجي رهيا آهن. اهڙا ڪيترائي آثار ظاهر ڏسڻ ۾  اچن ٿا.

بهرحال ڄامشوري ضلعي ۾ پنهنجي پارٽي جي چونڊيل ايم اين اي ملڪ اسد سڪندر ۽ سندس همدردن سان لاڳاپيل معاملي کي جلد ختم ڪرڻ لاءِ پارٽي چيئرمين صاحب کي مداخلت ڪرڻ گهرجي، پارٽي جي چونڊيل اڳواڻن سان اهڙيون زيادتيون ڪرڻ سان عوامي سطح تي شهيدن جي عوامي پارٽي مٿان انتهائي ناڪاري اثر پئجي رهيا آهن. ملڪ اسد سڪندر ۽ پاڪستان پيپلز پارٽي وچ ۾ وڌندڙ وڇوٽين جو ڪارڻ زمينن تي والار آهي، جيڪا مقامي ماڻهن کي قبول ناهي. اهڙي صورت ۾ پارٽيءَ کي پنهنجن ماڻهن جي ڀر ڌر ٿيڻ گهربو هو، پر افسوس ته پارٽيءَ جي ذميوار ماڻهن جون همدرديون ڪن ٻين ماڻهن سان آهن، جنهن سبب پارٽيءَ لاءِ منفي تاثر اُڀري رهيو آهي، جيڪو ڪنهن به ريت پارٽيءَ جي حق ۾ بهتر نه ٿيندو. تنهن ڪري بلاول ڀُٽو زرداريءَ کي هن سلسلي ۾ ڪا اڳڀرائي ضرور ڪرڻ گهرجي ته جيئن پارٽيءَ ۽ اُن جي ماڻهن ۾ وڇوٽين کي گهٽائي سگهجي.

majeedpbc@gmail.com

 

عمران تي لڳل سنگين الزامن جي جاچ وقت جي ضرورت…!

گذريل ڏينهن پي ٽي آءِ ۾ اهم ڪردار ادا ڪندڙ ايم اين اي عائشه گلالئي پارٽي تان استعيفيٰ ڏئي پريس ڪانفرنس ڪندي چيو ته تحريڪ ۾ ڇوڪرين توڙي عزتدار عورتن جون عزتون محفوظ ناهن، جنهن ڪري ڪيتريون ئي عورتون پارٽي جي ماحول سبب پريشان آهن، عمران خان ۽ سندس ٽولي جي هٿان تحريڪ انصاف ۾ شامل عورتن جون عزتون محفوظ ناهن، پيپلزپارٽي ۾ عورتن جي وڏي عزت ڪئي ويندي آهي، عمران خان ڪارڪنن جي تذليل ڪندو آهي، عمران خان نفسياتي مريض آهي، جنهن ڪري ٽيلنٽڊ نوجوانن کان سڙندو آهي، عمران خان هڪ گڏجاڻي ۾ محترمه بينظير ڀٽو بابت انتهائي غلط ڳالهايو، جنهن تي مونکي ڏاڍو افسوس ٿيو، عمران  خان رڳو زندهه ماڻهن کي نه پر مئل ماڻهن خلاف به غلط لفظ استعمال ڪندو آهي، عمران خان پاڻ کي وڏو عقلمند ۽ باقي سڄي پاڪستان جي عوام کي بيوقوف سمجهندو آهي، ڪي پي ڪي ۾ ڪروڙين رپين جي ڪرپشن ٿي رهي آهي، ڪيترائي ڀيرا عمران کي آگاهه ڪيو ويو پر هن نوٽيس نه ورتو، وڏي وزير پرويز خٽڪ ٺيڪن جي غيرقانوني ليزنگ ڏيندو آهي، پرويز خٽڪ پنهنجي سوٽ کي تنگي مائنز ۾ غيرقانوني ليز ڏني، پرويز خٽڪ خلاف ڪرپشن جا ثبوت کڻي عمران خان وٽ وياسين، عمران نيازي جن کي رد ڪري سائيڊ تي رکي ڇڏيو، پرويز خٽڪ ۽ جهانگير ترين جي ٺيڪن سان عمران جو ڪچن هلندو آهي، آڪٽوبر 2013ع ۾ عمران خان جو پهريون ٽيڪسٽ ميسيج مليو، عمران خان جو ڀل بليڪ بيري چيڪ ڪيو وڃي، عمران خان عورت ڪارڪنن کي چوندو آهي ته اوهان به بليڪ بيري رکو ڇاڪاڻ ته ان مان ميسيج ٽريس ناهي ٿيندي، ميسيجن ۾ اهڙا الفاظ هوندا هئا جيڪي ڪوبه غيرتمند بردداشت نه ڪري سگهندو، عمران خان کي جيڪي ماڻهو فرشتو سمجهن ٿا اهو هڪ شيطان آهي ۽ شيطاني ذهنيت رکندڙ شخص آهي، عمران خان جي هٿان ڪنهن به نياڻيءَ جي عزت محفوظ ناهي، آئون مائرن کي ٿي چوان ته تحريڪ انصاف ۾ ڪنهن به نياڻي جي عزت محفوظ ناهي، جنهن ڪري ڪوبه والدين پنهنجين نياڻين کي تحريڪ انصاف ۾ شموليت ڪرڻ کان روڪڻ لاءِ سخت قدم کڻي، تحريڪ انصاف ۾ ايم اين ايز جي به ڪا عزت ناهي ڪئي ويندي، جنهن ڪري پارٽي جا اڪثر ايم اين ايز ناراض به آهن، عائشه گلالئي سپريم ڪورٽ کان مطالبو به ڪيو آهي ته تحريڪ انصاف ۾ شامل عورت ورڪرن ۽ ايم اين ايز کي گهرائي پڇا ڪئي وڃي ته پارٽي ۾ ساڻن ڪهڙو رويو اختيار ڪيو ويندو آهي، آئين جي آرٽيڪل 62 ۽ 63 ۾ اخلاقيات جي به ڳالهه ٻولهه ڪئي وئي آهي، عورتن جي عزت نه ڪرڻ تي عمران خان کي نااهل قرار ڏنو وڃي، ٽڪيٽ ڏيڻ وارو ڪو مسئلو ناهي، گلالئي عمران خان کي چئي ڇڏيو آهي ته هاڻ تنهنجو وارو آهي، تحريڪ انصاف جو ماحول اهڙو ناهي جهڙو دنيا کي ڏيکاريو ٿو وڃي، پارٽي اندر ڪرپشن ۽ عورتن جي عزت نه هئڻ سبب عورت ورڪر احتجاج ڪري رهيون آهن،

هڪ پارٽي جي قومي اسيمبلي جي ميمبر پارٽي سربراهه تي سنگين الزام هڻي ٿي ته انهن ۾ ڪجهه ته هوندو، اسان اعليٰ عدالت سڳري ۽ مقدس ايوان کي عرض ڪنداسين ته عائشه گلالئي جي سنگي الزامن جو نوٽيس ورتو وڃي جيڪڏهن عمران خان واقعي ذميوار آهي ته کيس نااهلي ڪري نيڪالي ڏني وڃي ۽ جيڪڏهن الزام هڻندڙ غلط بياني کان ڪم ورتو آهي يا ڪنهن جي چوڻ يا پئسن  لي لالچ ۾ اچي الزام تراشي ڪئي آهي ته سندس خلاف به ڪارروائي ڪري عبرتناڪ سزا ڏني وڃي.