تازيون خبرون

Daily Archives: August 2, 2017

نواز شريف ملڪ کي ايٽمي طاقت بڻائڻ جو ڏوهه ڪيو، گواهه آهيون هن ڪرپشن ناهي ڪئي: شاهد خاقان عباسي

اسلام آباد  (اين اين آءِ) قومي اسيمبلي ۾ مسلم ليگ ن جو شاهد خاقان عباسي 221 ووٽ کڻي وزيراعظم چونڊجي ويو، اڱاري تي قومي اسيمبلي جي اجلاس ۾ وزيراعظم لاءِ ن ليگ جي نامزد اميدوار شاهد خاقان عباسي 221 ووٽ کڻي وزيراعظم چونڊجي ويو، پ پ اميدوار سيد نويد قمر 47 ووٽ حاصل ڪيا، تحريڪ انصاف ۽ ق ليگ جي اميدوار شيخ رشيد 33 ووٽ حاصل ڪيا، جڏهن ته پي ٽي آءِ اڳواڻ عمران خان ووٽ ڏيڻ لاءِ ايوان ۾ نه آيو، جماعت اسلامي جي اميدوار صاحبزادي طارق الله 4 ووٽ حاصل ڪيا، عوامي پارٽي جي ميمبرن ووٽنگ ۾ حصو نه ورتو، اي اين پي جي قومي اسيمبلي ميمبر ۽ اڳوڻي ڪي پي ڪي جي وڏي وزير امير حيدر هوتي غير حاضر رهيو. ن ليگ جي اميدوار شاهد خاقان عباسي کي جي يو آءِ ف، پختونخواهه ملي عوامي پارٽي ۽ ايم ڪيو ايم جي حمايت حاصل هئي. نئين چونڊيل وزيراعظم شاهد خاقان عباسي چيو آهي ته حڪومت، اپوزيشن، فوج ۽ عدليا سڀ هڪ ٻيڙي ۾ سوار آهن، ٻيڙي ۾ سوراخ ٿيو ته سڀ ٻڏي ويندا، اسان کي آئين موجب هلڻو آهي، 45 ڏينهن ۾ 45 مهينن جو ڪم ڪندس، سپريم ڪورٽ جي فيصلي کي دل سان قبول ڪيو پر پاڪستان جي عوام قبول نه ڪيو، ڪو به قانوني ماهر اهڙو نه آهي جيڪو ان فيصلي کي مڃي سگهي، نواز شريف ڪڏهن به ڪرپشن نه ڪئي، هڪ ڀيرو ٻيهر هو وزيراعظم بڻجندو، هڪ ٻي عدالت به لڳندي جيڪا ان عدالت کان وڏي هوندي اتي ڪا به جي آءِ ٽي نه هوندي، اڱاري تي قومي اسيمبلي جي اجلاس دوران ڳالهائيندي وزيراعظم شاهد خاقان عباسي پنهنجي پارٽي جا ٿورا مڃيندي چيو ته مان عوام جي وزيراعظم نواز شريف جو ٿورائتو آهيان جنهن پي ٽي آءِ جي چيئرمين عمران خان به ٿورا مڃيا جيڪو روز اسان کي تنقيد جو نشانو بڻائيندو آهي ۽ گاريون ڏيندو آهي،هن چيو ته اسان به اپوزيشن وارو ڪم ڪري سگهون ٿا پر اسان جي تربيت اهڙي نه آهي، اسان جي قائد جو حڪم آهي ته گار جو جواب نرمي سان ڏنو وڃي. شاهد خاقان عباسي چيو ته اسان سپريم ڪورٽ جي فيصلي کي دل سان قبول ڪيو، هن چيو ته وزيراعظم جي ڪرسي سياست جي ميراس سمجهي ويندي آهي، هي اها سيٽ آهي جنهن تي لياقت علي خان، ڀٽو، بينظير ۽ نواز شريف ويٺا، هن چيو ته اها مسلم ليگ ن ئي آهي جيڪا سپريم ڪورٽ جي فيصلي کانپوءِ پارٽي ۾ ڪنهن شخص نه چيو ته هوان ڪرسي تائين پهچڻ چاهي ٿو، پارٽي قيادت جنهن شخص کي چونڊيو اڄ اهو هتي بيٺو آهي، وزيراعظم چيو ته مان ملڪ جو وزيراعظم آهيان ۽ سيٽ جي بار جي خبر آهي، ڪم ڪرڻ آيو آهيان، سيٽ گرم ڪرڻ نه، وزيراعظم چيو ته اڄ هن ايوان جو سڀ کان وڏو ڪم اهو آهي ته ايوان پنهنجي عزت ۽ تقدس کي بحال ڪري، اسان کي آئين موجب هلڻو آهي، هن چيو ته اسان گواهه هونداسين ته نواز شريف ڪڏهن به ڪرپشن نه ڪئي آهي، وزيراعظم چيو ته 30 سالن کان پارٽي سان گڏ آهيان، پنڊي مان اليڪشن وڙهندڙ شيخ رشيد به مون کان وڌيڪ نواز شريف جي ويجهو رهيو آهي، اهو به ان جي حق ۾ گواهي ڏيندو ته نواز شريف ڪرپشن نه ڪئي آهي، هن چيو ته پارليامينٽرين جي ٽيڪس ڊائريڪٽري تڪليف ٿئي ٿي،  ٽيڪس ڏيڻ قانوني ذميواري آهي جيڪي ٽيڪس نٿا ڏين انهن کي ٽيڪس ڏيڻو پوندو. هن چيو ته جيڪي ماڻهو بل ادا نه ڪندا اتي لوڊشيڊنگ ٿيندي، سيڪيورٽي فراهم ڪرڻ حڪومت جي پهرين ترجيح آهي.

 

پاڪستان ۽ چين گڏيل ڪوششن سان گڏيل چئلينجن کي منهن ڏئي سگهن ٿا: آرمي چيف

اسلام آباد( ويب ڊيسڪ ) آرمي چيف جنرل قمر جاويد باجوه چيو آهي ته پاڪستان ۽ چين گڏيل چئلينجن کي منهن ڏئي رهيو آهي جنهن کي گڏيل ڪوششن ذريعي شڪست ڏئي سگهجي ٿي. آءِ ايس پي آر موجب اسلام آباد ۾ چين جي پيپلز لبريشن آرمي چيف جي 90 هين سالگره جي سلسلي ۾ تقريب کي خطاب ڪندي آرمي چيف جنرل قمر جاويد باجوه چيو ته پاڪستان ۽ چين اهم اسٽريٽجڪ ڀائيوار آهن ۽ پاڪ فوج کي چين سان پنهنجي دوستي تي فخر آهي. هن چيو ته پاڪ فوج ۽ چين جي لبريشن آرمي ۾ پيشور سهڪار ۾ وڌيڪ اضافو ٿيندو، پاڪ چين لاڳاپا ساراهه جوڳا آهن جنهن جو دنيا ۾ ڪوبه مثال نه آهي. سندس چوڻ هو ته پيپلز لبريشن آرمي دنيا جي بهترين فوجن مان هڪ آهي، پاڪ چين دوستي زندگي جي سمورن رخن بابت آهي ۽ اها دوستي هر ڏينهن سان گڏ وڌي رهي آهي. آرمي چيف جنرل قمر جاويد باجوه چيو ته پاڪ چين لاڳاپن ۾ چين هميشه پاڪستان جي موقف جي تائيد ڪئي آهي، چين هميشه ڪشمير مسئلي، شنهگائي سهڪار تنظيم جي ميمبرشپ جي معاملي تي پاڪستان جو ساٿ ڏنو، عالمي فورمن تي پاڪستان جي حمايت ڪرڻ تي چين جا ٿورائتا آهن.

 

ملڪ جي توانائي بحال ڪرڻ جو حل صرف سنڌ ۾ آهي: مراد علي شاهه

ڪراچي (پهرين آگسٽ 2017ع) سنڌ جي وڏي وزير سيد مراد علي شاهه چيو آهي ته سنڌ 70 سيڪڙو گيس ۽ 42 سيڪڙو تيل پيدا ڪندڙ واحد صوبو آهي، ملڪ جي توانائي بحال ڪرڻ جو حل صرف سنڌ ۾ آهي. هن اها ڳالهه اڄ مقامي هوٽل ۾ ورلڊ بينڪ پاران منعقد ڪيل ”پاڪستان سولر اينڊ رينيوايبل انرجي پروگرام“ سيمينار کي خطاب ڪندي ڪئي. سيمينار جي صدارت وڏي وزير سيد مراد علي شاهه، جڏهن ته پروگرام جو ميزبان ورلڊ بينڪ جو ڪنٽري ڊائريڪٽر پيتچاموٿو الانگوا ڪئي ۽ چيئرمين رٿابندي ۽ ترقي محمد وسيم آرگنائيزر هو. سيمينار جي شرڪت ڪندڙن کي صوبائي توانائي واري سيڪريٽري آغا واصف سنڌ ۾ رينيوايبل انرجي يعني شمسي ۽ هوا مان تيار ٿيندڙ بجليءَ جي صلاحيتن بابت آگاهي ڏني. انهيءَ کانپوءِ ورلڊ بينڪ جي ڪنٽري ڊائريڪٽر پيتچاموٿو الانگوا ورڪشاپ کي خطاب ڪندي چيو ته سنڌ جي وڏي وزير سيد مراد علي شاهه جي سربراهيءَ ۾ 2013ع ۾ سنڌ انرجي ڊپارٽمينٽ قائم ٿيو. هن چيو ته سنڌ واحد صوبو آهي جنهن رينيواايبل انرجي پروجيڪٽ لاءِ زمين مختص ڪئي آهي. هن چيو ته گهارو ۽ جهمپير ونڊ ڪاريڊور ۾ ونڊ انرجي جا 15 منصوبا 785 ميگا واٽ بجلي پيدا ڪري رهيا آهن ۽ وڌيڪ 450 ميگاواٽ جي 9 منصوبن تي ڪم جاري آهي.

سيمينار کي خطاب ڪندي وڏي وزير سيد مراد علي شاهه چيو ته سنڌ ۾ رينيوايبل انرجي مان 5500 ميگاواٽ بجلي پيدا ڪرڻ جي صلاحيت آهي. هن چيو ته شمسي توانائي مان 10 ميگاواٽ، هائيڊرو مان 130 ميگاواٽ ۽ ڪچري سميت ٻين طريقن مان 1500 ميگاواٽ بجلي پيدا ڪرڻ جي صلاحيت ۽ گنجائش آهي. هن چيو ته پاڪستان ۾ سنڌ 70 سيڪڙو گيس ۽ 42 سيڪڙو تيل پيدا ڪري رهيو آهي. هن چيو ته ملڪ جي توانائي بحران جو حل صرف سنڌ وٽ آهي. هن وڌيڪ چيو ته سنڌ جا اسڪول شمسي توانائيءَ تي منتقل ڪري رهيا آهيون، 2013ع ۾ سڀ کان پهرين ٿرپارڪر جي ٻن سرحدي ڳوٺن کي شمسي توانائي ذريعي بجلي فراهم ڪئي هئي، اهو اسان جي توانائي کاتي جو پهريون ڪم هو. هن چيو ته اسان پنهنجي پاور ڪمپني، ٽرانسميشن ۽ ڊسپيچ ڪمپني قائم ڪئي آهي ۽ ان جو پهريون منصوبو نوري آباد پاور پلانٽ آهي. انهيءَ بعد سنڌ جي وڏي وزير سيد مراد علي شاهه جي موجودگيءَ ۾ سنڌ انرجي ۽ ڪي اليڪٽرڪ وچ ۾ معاهدي تي صحيحون ڪيون ويون. معاهدي تحت وزيراعليٰ هائوس کي شمسي توانائي تي منتقل ڪيو ويندو.