تازيون خبرون

Monthly Archives: August 2017

نئين افغان پاليسي ۽ ٽرمپ جا الزام رد، قومي اسيمبلي قراداد منظور ڪري ورتي

اسلام آباد (اين اين آءِ) قومي اسيمبلي آمريڪي صدر ڊونلڊ ٽرمپ ۽ افغانستان ۾ آمريڪي فوج جي ڪمانڊر جنرل مڪلسن جي پاڪستان بابت الزامن تي ٻڌل بيان سختي سان رد ڪندي چيو آهي ته آمريڪي صدر ۽ جرنل نڪلسن جابيان پاڪستان جي سالميت ۽ استحڪام خلاف ڌمڪي آهي، افغانستان جي ڌرتي پاڪستان ۾ دهشتگردي جي ڪارروائي ۾ ملوث آهي، دهشتگردن جون محفوظ پناهگاهون ختم ڪيون وڃن، حڪومت دوست ملڪن خاص طور  تي خطي جي ملڪن سان موثر سفارتڪاري ذريعي ڳالهه ٻولهه جو عمل تيز ڪري، افغان حڪومت پاڪستاني طالبان مجلس احرار ۽ ٻين دهشتگردن جي پناهه گاهه آهي انهن کي ختم ڪي وڃي، اربع تي قومي اسيمبلي ۾ پرڏيهي وزير خواجه محمد آصف قرار داد پيش ڪندي چيو ته قومي اسيمبلي 21 آگسٽ تي آمريڪي صدر ۽ افغانستان ۾ آمريڪي فوج جي ڪمانڊر جنرل نڪلسن جي بيانن کي رد ڪري ٿي، خطي ۾ عدم استحڪام ۽ افغانستان ۾ ڀارت جو ڪردار وڌائڻ جي حوالي سان آمريڪي صدر جي قدمن جي مزمت ڪريون ٿا. ان خطي جي عدم استحڪام تي ٻڌل قدم قرار ڏيون ٿا ۽ خطي جي موجوده حالتن ۽ حقيقتن جي ابتڙ قرار ڏيون ٿا، ڪشمير جو عوام ڀارتي فوج جي رياستي دهشتگردي جي مزمت ڪريون ٿا، قومي اسيمبلي ۾ اهو پڪو پهه ڪريون ٿا ته پاڪستان ڪشميرين جي حقن جي حمايت جاري رکندو، هي ايوان آمريڪي ان دعويٰ کي رد ڪري ٿو جنهن ۾ هن پاڪستان کي اربين ڊالر ڏيڻ جي ڳالهه ڪئي آهي، پاڪستان کي دهشتگردي خلاف جنگ ۾ 123 ارب رپين جو نقصان ٿيو آهي، هي ايوان ان ڳالهه کي محسوس ڪري ٿو ته ان بيان سان پاڪستان جي دهشتگردي خلاف جنگ ۾ قربانين کي نظرانداز ڪيو ويو آهي، ان جنگ ۾ پاڪستان جا 70 هزار کان وڌيڪ ماڻهو شهيد ٿيا آهن، اها لعنت 4 ڏهاڪن کان اڳ خطي ۾ آندي وئي، ان کانپوءِ ان کي بلڪل نظرانداز ڪيو ويو، قومي اسيمبلي دهشتگردي خلاف جنگ ۾ پاڪ فوج ۽ ٻين سيڪيورٽي ادارن جي قربانين جو اعتراف ڪري ٿي، پاڪ فوج جي رينجرز ۽ ٻين سيڪيورٽي ادارن سان گڏ دهشتگردي خلاف آپريشن جي ڀرپور سپورٽ ڪري ٿي، هي ايوان اهو پڪو پهه ڪري ٿو ته پاڪستان هڪ ذميوار ايٽمي طاقت طور تي عالمي سطح تي تسليم ڪيل ڪمانڊ اينڊ ڪنٽرول سسٽم وارو ملڪ آهي، آمريڪي صدر ڊونلڊ ٽرمپ ۽ نلڪسن جا بيان پاڪستان جي سالميت ۽ استحڪام خلاف ڌمڪي وارا آهن، هي ايوان حڪومت پاڪستان تي زور ڀري ٿو ته اها پاڪستان جي سالميت ۽ بقا جي تحفظ کي يقيني بڻائڻ لاءِ قدم کڻي، قومي اسيمبلي جو هي ايوان آمريڪي اختيارن جي پاڪستان جي دوري جي ملتوي ۽ پاڪستاني اختيارن جو آمريڪي دورو کي ملتوي ڪرڻ جي حوالي سان قدمن کي تسليم ڪري ٿو، حڪومت تي زور ڀري ٿو ته صاف حالتن ۾آمريڪي حڪومت کي حالتن کان آگاهه ڪري، دوستي ملڪن سان سفارتي طريقي موجب ڳالهيون ڪيون وڃن، هي ايوان ان ڳالهه تي زور ڀري ٿو ته افغانستان ۽ پاڪستان وچ ۾ انٽرنيشنل بارڊر جو احترام يقيني بڻائڻ لاءِ آءِ ايس ايف کي پنهنجو ڪردار ادا ڪرڻ گهرجي، قومي اسيمبلي افغانستان ۽ پاڪستان سان جڙيل علائقن ۾ داعش ۽ ٻين دهشتگرد تنظيمن جي سرگرمين ۾ واڌ تي ڳڻتي ڪري ٿو ۽ آمريڪا ۽ افغانستان کان مطالبو ڪري ٿي ته افغانستان ۾ آمريڪي فوج ۽ افغان سيڪيورٽي ادارا پاڪستان ۾ دهشتگردن کي روڪڻ جي حوالي سان ڪردار ادا ڪن، افغان حڪومت پاڪستاني طالبان مجلس احرار ۽ ٻين دهشتگردن جون پناهگاهون ختم ڪري جتان کان هو پاڪستان ۾ دهشتگردي جون ڪارروايون ڪري رهيا آهن، آمريڪا نيٽو ۽ افغانستان کي ان ڳالهه کي يقيني بڻائڻ گهرجي ته ڀارت کي پاڪستان ۾ دهشتگردي جي ڪاررواين کان روڪي، ايوان ان ڳاله تي زور ڀري ٿو ته آمريڪا سان ٻطرفي ۽ گڏيل احترام تي ٻڌل انداز ۾ ڳالهايو وڃي، ايوان پڪو پهه ڪري ٿو ته پاڪستان امن جو خواهشمند آهي، هي ايوان افغانستان سان لاڳاپن ۽ امن جي بحالي لاءِ قدمن جي ڀرپور حمايت ڪري ٿو، قومي اسيمبلي گڏيل طور تي قرارداد منظور ڪري ورتو. ان کان اڳ آمريڪي صدار جي بيان ۽ پاليسي جي حوالي سان بحث ۾ حصو وٺندي سردار اويس لغاري چيو ته هڪ ٽريلن  يو ايس اي ڊالر خرچ ڪرڻ کانپوءِ افعانستان اتي ئي بيٺو آهي جتي 2000 ۾ هو، 16 سالن ۾ ٽن صدرن جون ڪوششون ضايع، هزارين ماڻهن جي جاني نقصان، اسان جا تعليم ادارا اي پي ايس حادثي باوجود افغانستان اتي آهي، 50 سيڪڙو کان وڌيڪ افغانستان جو حصو آمريڪي فوج جي ڪنٽرول کان ٻاهر آهي، جڏهن ته افغان حڪومت انتظامي طور تي ناڪام ٿي چڪي آهي، هن چيو ته افغانستان اندر سياسي قوتون نٿيون چاهين ته طالبان سياسي عمل جو حصو بڻجڻ، ان ۾ پاڪستان ڇا ٿو ڪري سگهي، آمريڪا ڪهڙي بيان تي پاڪستان تي الزام مڙهي رهيو آهي، ڇا آمريڪا جون ويٽنام عراق ۽ لبيا جون پاليسيون درست هيون، سڄي دنيا ان حقيقت کي سڃاڻي چڪي آهي، هن چيو ته ڀارت ان سان وڌيڪ خوش نه ٿيندو ته پاڪستان آمريڪا سان لاڳاپا خراب ڪري، هن چيو ته سي پيڪ کي ڏسي ڪجهه طاقتون انڌيون ٿي ويون آهن ۽ ڀارت کي افغانستان ۾ هڪ مهري طور استعمال ڪرڻ جي ڪوشش آهي جيڪو پراسڪي وار کانسواءِ ڪجهه نه آهي، هن چيو ته آمريڪا سان لاڳاپا ختم ڪرڻ جي حق ۾ نه آهيون پر آمريڪا کي اهو باور ڪرائڻ چاهيون ٿا ته هو منافقت ڪرڻ ڇڏي، هن چيو ته  ايران، آمريڪا، چين روس ۽ آمريڪا جي افغانستان جي حوالي سان جيستائين گڏجي آپريشن معاملن تي ڳالهيون نه ٿينديون تيستائين اهو معاملو حل نه ٿيندو، ايم ڪيو ايم جي فاروق ستار چيو ته زنده قومون اهي هونديون آهن جيڪي چيلينجز کي موقعن ۾ تبديل ڪن، ماضي ۾ به آمريڪا جي لاڳاپن ۾ لاها چاڙها آيا پر اسان ان ۾ اهڙو ڪجهه نه ڪري سگهياسين، هن چيو ته آمريڪا جي پرڏيهي پاليسي آمريڪا کي مدنظر رکندي پاڪستان پنهنجي پرڏيهي پاليسي آمريڪا بابت جوڙي، هن چيو ته ايم ڪيو ايم پاڪستان آمريڪي صدر جي افغان پاليسي ۽ پاڪستان جي الزامن کي رد ڪري ٿو، هن چيو ته دهشتگردي خلاف جنگ ۾ 80 هزار ماڻهن جي شهادت، هزارين ماڻهن ۽ هٿياربند فوج جي قربانين کي ڀيٽا پيش ڪريون ٿا.

 

بينظير ڀٽو قتل ڪيس : دليل مڪمل، فيصلو محفوظ، اڄ ٻڌائڻ جا امڪان

راولپنڊي (اين اين آءِ) راولپنڊي جي دهشتگرد ٽوڙ عدالت اڳوڻي وزيراعظم بينطير ڀٽو قتل ڪيس بابت محفوظ ڪيل فيصلي۾ 10 سال لڳي ويا، راولپنڊي جي عدالت جي جج اصغر خان وڪيلن ۽ پراسيڪيوٽرن جا دليل مڪمل ٿيڻ تي فيصلو محفوظ ڪيو هو، جيڪو 31 آگسٽ تي راولپنڊي جي اڊيالاجيل ۾ ٻڌائڻ جو امڪان آهي، ڪيس ۾ اڳوڻي صدر پرويز مشرف کانسواءِ جوابدار عماد گل، اقرام الله، عبدالله، فيض الله ۽ بيت الله محسود کي اشتهاري قرار ڏنو ويو، اڳوڻي سي پي او سعود عزيز ۽ اڳوڻي ايس پي خرم شهزاد ضمانت تي آهن، ان کانسوءِ 5 جوابدار اعتزاز شاهه، حسينن گل، شير زمان، رفاقت ۽ رشيد احمد گرفتاري کانپوءِ جيل ۾ آهن، ايف آءِ اي جي پراسيڪيوٽر ٻڌڻي دوران انڪشاف ڪيو هو ته پرويز مشرف کي عالمي دهشتگرد تنظيم القائده کان خطرو آهي جنهن سبب هو عدالت ۾ پيش نه ٿي رهيو آهي، عدالت ۾ ٿيندڙ ٻڌڻي دوران ڪيس ۾ نامزد آخري جوابدار اعتزاز شاهه جي وڪيل دليلن ۾ چيو ته ايف آءِ اي جي جاچ ۾ غلطيون آهن، ان جاچ ۾ ڪنهن جوابدار کان نه پچيو ويو ته ان کي ڪڏهن گرفتار ڪيو ويو، جڏهن ته اسماعيل نالي شخص جنهن کي چالان ۾ آپريٽر ظاهر ڪيو عدالت مان ئي ڀڃي ويو هو، پوليس ٻڌايو ته اسماعيل آپريٽر بيت الله محسود جي فون ڪال ٽيپ ڪئي هئي، چوڌري اظهر پنهنجي دليل ۾ چيو ته جوابدارن جي گرفتاري وارين تاريخن ۾ تضاد آهي ته اها غلطي پوليس جي آهي، ايف آءِ جي نه. حملو گاڏي جي ٻاهران ٿيو ته اسان گاڏي ۾ ويٺل ماڻهن کان جاچ ڇو ڪيون، پراسيڪيوٽرن جي دليلن تي جوابدارن جي وڪيلن اعتراض ڪندي چيو ته جيڪڏهن پراسيڪيوٽر سمورن گواهن جا بيان پڙهندا ته اسان به تياري ڪنداسين، جج ريمارڪسر ڏنا ته توهان جلدي ۾ پنهنجا دليل مڪمل ڪيو، ڪيس جي ٻڌڻي دوران استثغيٰ پاران 68 شاهدن جا بيان رڪارڊ ڪيا ويا، پوليس 3 ۽ ايف آءِ اي 5 چالان عدالت ۾ پيش ڪيا، ڪيس جي ٻڌڻي دوران 8 جج تبديل ٿيا، ڪيس جي ٻڌڻي دوران پراسيڪيوٽر چوڌري ذوالفقار جو اسلام آباد ۾ قتل ٿي چڪو آهي، ياد رهي ته پ پ جي اڳواڻ بينظير ڀٽو کي 27 سيپٽمبر 2007 جي شام راولپنڊي ۾ جلسو ختم ڪرڻ کانپوءِ زرداري هائوس واپس ويندي رستي ۾ فائرنگ ڪري قتل ڪيو ويو هو، ان ئي رات سٽي ٿاڻي تي واقعي جو ڪيس داخل ڪيو ويو هو، فيبروري 2008 ۾ راولپنڊي پوليس شروعاتي طور تي 5 جوابدارن کي گرفتار ڪيو هو، جڏهن ته پ پ 2008 ۾ حڪومت بڻائي ته ان جي جاچ ايف آءِ اي کي ڏني وئي هئي.

 

قومي سلامتي جو اجلاس، ٽرمپ بيان ۽ نئين افغان پاليسي تي غور

اسلام آباد (اين اين آءِ) قومي سلامتي ڪميٽي 5 کان 7 سيپٽمبر 2017 دوران طئه ٿيل سفيرن جي ڪانفرنس جا نتيجا يا سفارشون جوڙڻ لاءِ هيٺين ڪميٽي جوڙڻ جو فيصلو ڪيو آهي، اربع تي وزيراعظم شاهد خاقان عباسي جي صدارت ۾ قومي سلامتي ڪميٽي جو 13 هون اجلاس ٿيو، اجلاس ۾ملڪ جي اندروني ۽ ٻاهرين سيڪيورٽي جي صورتحال ۽ ان کي عالمي ۽ علائقائي تنازز ۾ درپيش قومي سلامتي جي چيلينجز ۽ خطرن جو جائزو ورتو ويو، اجلاس دوران آمريڪي صدر جي ڏکڻ ايشيا بابت پاليس تي بحث ڪيوويو، اجلاس ۾ خرم دستگير، اسحاق ڊار، احسن اقبال، خواجه محمد آصف، زبير محمود حيات، چيف آف آرمي اسٽاف جنرل قمر جاويد باجوه، چيف آف نيول اسٽاف ايڊمرل محمد ذڪاءُ الله، ايئر فورس جي سربراهه سهيل امان، ناصر خان جنجوعا، ڊي جي آءِ ايس پي آر ليفٽيننٽ جنرل نويد مختيار سينيئر سول ۽ فوجي آفيسرن شرڪت ڪئي،اجلاس ۾ملڪ جي اندروني ۽ پرڏيهي سيڪيورٽي صورتحال ۽ ان کي عالمي ۽ علائقائي تنازر ۾ درپيش چيلينجز جائزو ورتو ويو، اجلاس دوران آمريڪي صدر جي ڏکڻ ايشيا پاليسي تي بحث ڪيو ويو، ڪميٽي فيصلو ڪيو ته 5 کان 7 سيپٽمبر 2017 تائين طئه ٿيل سفيرن جي ڪانفرنس جا نتيجا يا سفارشون جوڙڻ لاءِ هيٺين ڪميٽي جوڙي ويندي جيڪا نيشل سيڪيورٽي ڪميٽي جي ايندڙ اجلاس ۾ خاص تجويزن تي غور ڪندي، آرمڊ فورسز ترقياتي منصوبي جو جائزو وٺندي، ڪميٽي فيصلو ڪيو ته درپيش صورتحال ۾ قومي سلامتي کي يقيني بڻائڻ لاءِ هڪ موثر دفاعي اميج کي رکڻ گهرجي.

 

حبيب بينڪ نيويارڪ جو نواز شريف جي مني لانڊرنگ لاءِ استعمال ٿيڻ جو انڪشاف

اسلام آباد(ويب ڊيسڪ) حبيب بينڪ نيويارڪ برانچ کي مني لانڊرنگ جي لاءِ استعمال ڪيو ويو جنهن سبب ان تي 62 ارب رپين جو ڏنڊ لاڳو ڪيو ويو. نواز شريف بطور وزير اعظم حبيب بينڪ نيويارڪ کي مني لانڊرنگ جي لاءِ استعمال ڪندو رهيو. نواز شريف کي هل ميٽل ڪمپني طرفان الراجي بينڪ مان پيسا حبيب بينڪ موڪليا جتان اسٽينڊرڊ چارٽرڊ بينڪ ۾ نواز شريف جي اڪائونٽ ۾ منتقل ڪيا ويا. حبيب بينڪ آمريڪا ۾ مني لانڊرنگ جي قانون جي عملدرآمد ناهي ڪري رهي جنهن سبب ڳرو ڏنڊ لاڳو ٿيو. نيو يارڪ اسٽيٽ ڊيپارٽمينٽ جي فنانس سروسز جي رپورٽ موجب حبيب بينڪ تي 53 الزام لاڳو ڪيا ويا. رپورٽ ۾ ٻڌايو ويو ته حبيب بينڪ برانچ مان اهڙيون ادائيگيون ٿينديون رهيون جنهن جو مقصد سمجهه کان ٻاهر آهي. حبيب بينڪ نيويارڪ تي مني لانڊرنگ، دهشتگردن جي مالي سهڪار جو به الزام لڳايو ويو. الراجي بينڪ جا القاعده سان لاڳاپا هئا، مني لانڊرنگ جي لاءِ استعمال ٿيندي رهي.

 

افغانستان جو امن پاڪستان لاءِ اهميت رکي ٿو، آمريڪي امداد جي ضرورت ناهي: آرمي چيف

راولپنڊي (اين اين آءِ) آرمي ڇيف جنرل قمر جاويد باجوه چيو آهي ته اسان آمريڪا کان ڪنهن به قسم جو امداد نٿا چاهيون، اسان جي ڪوششن تي اعتماد ڪندي انهن جو اعتراف ڪيو وڃي، ڪنهن کي خوش ڪرڻ بدران پنهنجي قومي مفاد ۽ قومي پاليسي موجب افغان مسئلي جي حل لاءِ ڀرپور ڪوششون جاري رکنداسين، آءِ ايس پي آر موجب چيف آف آرمي اسٽاف جنرل قمر جاويد باجوه سان آمريڪي سفير ڊيوڊ هيل اربع تي جي ايڇ ڪيو ۾ ملاقات ڪئي ۽ نئين آمريڪي پاليسي بابت بريفنگ ڏني، آمريڪي سفير چيو ته سندس ملڪ دهشتگردي خلاف جنگ ۾ پاڪستان جي ڪردار کي اهميت ڏئي ٿو، پاڪ فوج جي سربراهه ان موقعي تي ڳالهائيندي چيو ته پاڪستان لاءِ افغانستان ۾ امن ايترو ئي اهم آهي جيترو ڪنهن ٻئي ملڪ لاءِ، هن چيو ته افغانستان مسئلي جي حل لاءِ گهڻو ڪجهه ڪيو آهي ۽ ان حوالي سان ڪنهن کي خوش ڪرڻ لاءِ پر پنهنجي قوم مفاد ۽ قومي پاليسي تحت ڪوششون جاري رکنداسين، هن چيو ته اسان آمريڪا سان ڪنهن مادي يا مالي مدد جا خواهشمند نه آهيون پر اسان چاهيون ٿا ته اسان جي ڪوششن تي اعتماد ڪندي انهن جو اعتراف ڪيو وڃي. هن چيو ته افغانستان ۾ وڏي عرصي کان جاري جنگ کي آخري انجام تائين پهچائڻ لاءِ اسٽيڪ هولڊرن جي وچ ۾ تعاون ۽ ڪوششون ضروري آهن.

 

38 سالن کان افغانستان جي ناڪاري اثرن کي ڀوڳي رهيا آهيون: پاڪستان

اسلام آباد(ويب ڊيسڪ) آمريڪا ۾  پاڪستاني سفير اعزاز چوڌري چيو آهي ته پاڪستان جو  اڌ عرصو ناڪاري اثرن کي منهن ڏيندي نڪري ويو ۽ غير مضبوط افغانستان جا ناڪاري اثر 38 سالن کان ڀوڳي رهيا آهيون. اعزاز چوڌري جو آمريڪي صدر ڊونلڊ ٽرمپ جي پاڪستان مخالف پاليسي تي رد عمل ۾ چوڻ هو ته افغانستان ۾ امن پاڪستان جي مفاد ۾ آهي، پاڪستان مضبوط ۽ پرامن افغانستان جي عالمي ڪوششن جو ساٿ ڏئي رهيو آهي، غير مضبوط افغانستان جا ناڪاري اثر 38 سالن کان ڀوڳي رهيا آهيون. پاڪستان پنهنجي قيام کان اڄ تائين جو اڌ عرصو انهن ناڪاري اثرن کي منهن ڏيندي گذاريو. هن چيو ته پاڪستان جي سر زمين ڪنهن به دهشتگرد جي لاءِ محفوظ پناهه گاهه ناهي، افغان قيادت ئي مفاهمتي عمل کي ڪامياب بڻائي سگهي ٿي ۽ آمريڪي قيادت سان گڏجي نئين پاليسي ڄاڻڻ جي ڪوشش ڪنداسين.

 

ڪراچي: ٻن ڏينهن جي برسات، مختلف واقعن ۾ 20 ڄڻا زندگيون وڃائي ويٺا

ڪراچي (اين اين آءِ) ڪراچي ۾ گذريل ٻن ڏينهن جي برسات سان مختلف علائقن ۾ برسات  جو پاڻي گڏ ٿيڻ سان شهرين کي ڏکيائي درپيش آهي. موسميات کاتي ايندڙ 24 ڪلاڪن ۾ وڌيڪ برسات پوڻ جي اڳڪٿي ڪئي آهي. ڪيترائي علائقا اڃان تائين بجلي جي فراهمي کان ،محروم آهن، ٻن ڏينهن جي برسات م ڪرنٽ لڳڻ ۽ مختلف واقعن ۾ 20 ڄڻا فوت ٿي ويا ، تفصيل موجب اڱاري ۽ اربع واري رات ڪراچي ۾ کنوڻ سان ٿيندڙ تيز برسات سبب ماڻهن کي  ڏکيائي درپيش، سخت برسات سبب ڪيترن ئي علائقن ۾ گھرن ۾ برسات جي پاڻي گڏ ٿيڻ سان قيمتي سامان به خراب ٿي ويو، ڪراچي ۾ ٻن ڏينهن کان ٿيندڙ برسات سبب مخلتف حآدثا رپورٽ ڪيا ويا، ڪرنٽ لڳڻ، ڀتيون ۽ گھرن جون ڇتيون ڪرڻ جي واقعن ۾ هن وقت تائين 20 ڄڻا فوت ٿي  چڪا آهن، فوت ٿيندڙن مان وڌيڪ ڪرنٽ لڳڻ سبب پنهنجي زندگي وڃائي ويٺا، جن ۾ رشيد آباد جي رقعيه خاتون، نارٿ ناظم آبادجي فاطمه ولي محمد، ڳوٺ عزيز آباد جي ڪليم الله، ڪراچي جو اسلم ۽ گلشن اقبال جو غلام محمد شامل آهن. جمالي ڳوٺ ۾ هڪ گھر جي ڇت ڪرڻ سبب منظور فوت ٿي ويو. سپر هائي وي جي ويجھو مال پڙي ۾ هڪ بلبورڊ ڪرڻ سان 14 سالن جو ڇوڪرو فوت ٿي ويو، ٻئي طرف انتظآميان پاران پاڻي جو نيڪال جو انتظام نه ٿيڻ سان مختلف علائقن ۾ پاڻي جمع ٿي ويو جنهن سبب شهرين جي زندگي عزاب بڻجي وئي .اسٽيڊيم روڊ ملير، ڪورنگي، سرجاني، ڪالابورڊ، گلشن اقبال، محمود آباد ۽ ٻين علائقن ۾ پاڻي گڏ ٿي ويو آهي. ناظم آباد ۽ لياقت آباد انڊر پاس جي ٻاهران پاڻي گڏ ٿيڻ سان ٽريفڪ جي رواني متاثر رهي آهي.، گذريل رات برسات سبب ڪي اليڪٽرڪ جا 250 فيڊر ٽرپ ٿيا هئا جن مان ڪيترائي بحال ٿي ويا آهن. پر ڪيترن ئي علائقن ۾ اڃان تائين بجلي غائب آهي. مال پڙي سهراب ڳوٺ برسات سبب خريد ۽ وڪرو ڪرڻ جر سرگرمي متاثر ٿي وئي آهي. جنهن سبب مال جي قيمتن تي منفي اثر پئجي رهيا آهن ۽ اگھن ۾ وڏي پيماني تي گھٽتائي ٿي آهي.

 

پراسيڪيوشن پنهنجو ڪم ڇو نٿي ڪري، ڪي پي ڪي پوليس ناڪارا آهي: سپريم ڪورٽ

اسلام آباد(ويب ڊيسڪ) سپريم ڪورٽ جي جج جسٽس قاضي فائز عيسيٰ اغوا جي جوابدار کي جرڳي ذريعي معافر ڪرائڻ واري معاملي تي پنهنجي ريمارڪس ۾ چيو آهي ته پراسيڪيوشن پنهنجو ڪم ڇو ناهي ڪندي، خيبرپختونخواهه جي پوليس ته بلڪل ناڪارا لڳندي آهي. سپريم ڪورٽ ۾ اغوا جي جوابدار خالد جي ضمانت واري درخواست تي ٻڌڻي جسٽس مشير عالم جي سربراهي ۾ ٻه رڪني بينچ ڪئي. عدالت جوابدارن جي ضمانت هڪ لک رپين جي مچلڪن جي عيوض منظور ڪري ورتي، جوابدار خالد تي پشاور مان باسط کي اغوا ڪرڻ جو الزام هو. ٻڌڻي دوران عدالت ۾ اغوا ٿيندڙ باسط جي پيءُ پنهنجي بيان ۾ چيو ته هن جوابدار کي معاف ڪري ڇڏيو آهي ڇو ته جرڳي ان کي ضمانت  ڏني. جسٽس قاضي فائز عيسيٰ پڇاڻو ڪيو ته توهان معاف ڪري ڇڏيو ڇا ڪوڙو ڪيس فائل ڪيو هو؟ جسٽس مشير عالم چيو ته اسان ڏسي رهيا آهيو اڄ ڪلهه جرڳن ۾ ڪهڙا معاملا هوندا آهن. جسٽس قاضي فائز عيسيٰ اغوا ٿيل باسط کان پڇاڻو ڪيو ته ٻن سالن تائين توهان اغوا رهيئو توهان کي خبر ناهي ته ڪٿي هيئو، ڪوڙو ڪيس ڪرڻ تي سزا به ٿي سگهي ٿي، الله تعاليٰ سچ ڳالهائڻ جو حڪم ڏنو آهي، توهان کي اغوا ڪيو ويو ته پر توهان وري به معاف ڪيو؟ جنهن تي باسط چيو ته هن جوابدار کي جرڳي جي چوڻ تي معاف ڪيو.

 

نواز شريف جي صدارت هيٺ مشاورتي اجلاس، آرٽيڪل ٦۲،٦۳ ۾ ترميم تي غور ويچار

لاهور (اين اين آءِ) ن ليگ جو اهم مشاورتي اجلاس رائيونڊ ۾ ٿيو جنهن ۾ قانوني معاملا، نيب ڪيس، پارٽي جي موقف سميت مستقبل جي لائحه عمل بابت ڳالهه ٻولهه ڪئي وئي، اجلاس ۾ اڳوڻي وزيراعظم نواز شريف، سنڌ جو گورنر محمد زبير، قانون جي وفاقي وزير زاهد حامد، ريلوي جي وفاقي وزير خواجه سعد رفيق، سڌ سماءَ واري مملڪتي وزير مريم اورنگزيب، پرويز رشيد، رانا ثناءُ الله ۽ٻين شرڪت ڪئي، ٻڌايو پيو وڃي ته ان اجلاس ۾ موجوده حالتن ۾ پارٽي جي سطح تي موقف جي حوالي سان سمورن اڳواڻن کي بريفنگ ڏني وئي، اجلاس ۾ نيب ڪيس، نيب جي ڪارروائي بابت ڳالهيون ڪيون ويون، ان موقعي تي پارٽي جي مستقبل جي لائحه عمل بابت به ڳالهه ٻولهه ڪئي وئي ۽ مستقبل ۾ به مشاورت جو سلسلو جاري رکڻ تي اتفاق ڪيو ويو، اجلاس ۾ شريڪ ٿيندڙن بيگم ڪلثوم نواز جي صحت بابت آگاهي حاصل ڪئي ۽ ان جي صحتيابي لاءِ نيڪ خواهشن جو اظهار ڪيو، اجلاس کانپوءِ خواجه سعد رفيق، رانا ثناءُ الله سان گڏ ميڊيا کي ٻڌايو ته اجلاس ۾ قانوني معاملن تي مشاورت ڪئي وئي آهي، ان سان گڏ پارٽي جو جيڪو موقف آهي ان حوالي سان اڳواڻن لاءِ بريفنگ جو احتمام ڪيو ويو، هن چيو ته اين اي 120 ۾ اميدوار جي تبديلي جي ڪا به تجويز غور هيٺ نه آهي پرڏيهي وزير حڪومتي معاملن جي سلسلي ۾ ملڪ کان ٻاهر هو، هن چيو ته سنڌ جي گورنر جي رائيونڊ ۾ اجلاسن ۾ شرڪت جي حوالي سان ان تي ڪا به پابندي نه آهي، هن چيو ته ڪا به تاريخ طئه نه ڪئي وئي آهي پر ان کان اڳ ايندڙ خبر درست نه هئي ته نواز شريف 24 آگسٽ تي لنڊن وڃي رهيو آهي، ڊاڪٽرن چيو آهي ته بيگم ڪلثوم نواز جي بيماري جو علاج آهي، هن چيو ته چوڌري نثار علي خان پارٽي جو سينيئر اڳواڻ آهي، ن ليگ واحد پارٽي آهي جنهن ۾ اڳواڻ اختلاف راءِ رکندا آهن

 

اسان 62،63 کي ختم ڪري ذوالفقار علي ڀٽو جو آئين بحال ڪرڻ پئي چاهيو: خورشيد شاهه

اسلام آباد (اين اين آءِ)قومي اسيميبلي جي اڳواڻ سيد خورشيد شاهه چيو آهي ته حڪومت نوازشريف کي بچائڻ لاءِ آرٽيڪل 62، 63 ۾ ترميم ڪرڻ چاهي ٿي جڏهن ته پ پ پ ڪنهن به شخص کي بچائڻ لاءِ ائين ڪڏهن به نه ڪندي، حڪومت عدالتن جي فيصلي جو احترام ڪري ، وقت اچڻ تي آئين ترميم ٿي ويندي. اسانجي وزارت پرڏيهي امريڪي پاليسي جي  معاملي کي هينڊل ڪرڻ ۾ ناڪام ٿي وئي آهي. اربع تي پنهنجي چيمبر ۾ ميڊيا جي نمائندن سان ڳالهائيندي سيد خورشيد شاهه چيو ته اسان ته ضياءَ الحق جي آئين ۾ وڌل آرٽيڪل 62، 63 شقن جو خاتمون ۽ ذوالفقار علي ڀٽو جو آئين فعال ڪرائڻ چاهيون پيا پر هاڻي 62، 63 ۾ ترميم جي پويان ڪنهن بچائڻ جو مقصد آهي. هن چيو ته هن وقت اسان آئين ۾ اهڙي ڪنهن به ترميم جا حامي نه آهيون جنهن سان اهو تاثر ٿئي ته ڪنهن بچايو پيو وڃي، سيد خورشيد شاهه چيو ته حڪومت کي گھرجي ته عدالتن جي فيصلي جوآهترام ڪري، هن چيو ته آصف علي زرداري کي ڦاسائڻ لاءِ آرٽيڪل 62، 63 کي ختم ڪرڻ جي مخالفت ڪئي وئي الله جي قدرت آهي هو خود ان ۾ ڦاسي ويو.  هن چيو ته هو نوازشريف کي منافق نه ٿو چوي پر انجي نيتن ۾ فرق آهي. 62،63 ته هونئن آئين ۽ قانون جو حصو آهي جيڪا ختم نه ٿيندي. امريڪي صدر پاران پاڪستان کي تنقيد جو نشانون بڻائن ۽ حڪومتي خاموشي تي سخت رد عمل جو اظهار ڪندي سيد خورشيد شاهه چيو ته اسانجي پرڏيهي وزارت امريڪي پاليسي جي معاملي کي هينڊل ڪرڻ ۾ ناڪام ٿي وئي آهي. هن  چيو ته امريڪي صدر کي منهه توڙ جواب ڏيڻ تي بطور آپوزيشن جي چين جو ٿورائتو آهيان، اڄ سموري قوم چين جي محبت ۾ واڌ ٿي آهي ۽ اهڙن قدمن سان پاڪ چين دوستي مضبوط ٿيندي.