تازيون خبرون

Daily Archives: July 20, 2017

2018 ۾ لوڊشيڊنگ جي خاتمي جو اعلان، جنهن ڪرپشن جو احتساب پيو ٿئي اها ڪٿي ٿي؟: نواز شريف

اسلام آباد/سيالڪوٽ (ويب ڊيسڪ) وزير اعظم نواز شريف هڪ ڀيرو ٻيهر 2018ع ۾ بجلي جي لوڊشيڊنگ جي خاتمي جو اعلان ڪيو آهي، وزيراعظم نواز شريف چيو آهي ته اسان تي هڪ پائي جي ڪرپشن جو داغ ناهي پر سمجهه ۾ نٿو اچي ته ڪهڙي منصوبي ۾ ڪرپشن ٿي آهي، جنهن جو اڄ احتساب ٿي رهيو آهي، سيالڪوٽ چيمبر آف ڪامرس اينڊ انڊسٽري جي تقريب کي خطاب دوران وزيراعظم نواز شريف جو چوڻ هو ته سي پيڪ کي ناڪام بڻائڻ جي ڪوشش ڪئي پئي وڃي، حڪومت جا پهريان 2 سال وسيلا مهيا ڪرڻ ۾ گذري ويا پر هاڻي سڄي ملڪ ۾ موٽر ويز تيزي سان بڻجي رهيا آهن، ڪي پي ۾ مخالف سياسي جماعت جي حڪومت آهي پر اتي به هزاره موٽر ويز اسان بڻائي رهيا آهيون، هر روز بجلي جي ڪارخانن جو افتتاح ٿي رهيو آهي ۽ ملڪ مان لوڊشيڊنگ ختم ٿيندي نظر اچي رهي آهي، سندس چوڻ هو ته 2013 ۾ قياس آرايون جاري هيون ته پاڪستان هڪ ناڪام رياست ۽ مالي طور تي ڏيوالو ٿيڻ وارو آهي، جڳهه جڳهه احتجاج ٿي رهيو هيو ۽ سڄي ملڪ ۾ رشوت جو بازار گرم هيو، جڏهن ته ڪرپشن جي هڪ عجب ڪهاڻي روز ايندي هئي، وزيراعظم نواز شريف چيو ته اسان تي هڪ پائي جي ڪرپشن جو داغ ناهي پر سمجه ۾ نٿو اچي ته ڪڏهن، ڪٿي ۽ ڪهڙي منصوبي ۾ ڪرپشن ٿي آهي، جنهن جو اڄ احتساب ٿي رهيو آهي، مون کي ان جو جواب ناهي ملي سگهيو، خبر وٺڻ گهرجي ته ڪهڙي شئي جو احتساب ٿي رهيو اهي، هي سرڪاري پئسن ۾ گهوٻيون يا وري اسان جي ڪاروباري معاملن جو احتساب ٿي رهيو آهي، سندس چوڻ هو ته 44 سالن کان اسان سان احتساب جي ڳالهه ڪئي پئي وڃي، اوڀر پاڪستان ۾ جيڪو اسان جو ڪارخانو هيو، اهو بنگلاديش سان گڏ هليو ويو، جڏهن ته ڀٽو اسان جي اولهه پاڪستان جي ڪارخاني کي ڦٻائي ورتو، سواءِ ان جي ته اهي حساب ڏين، حسان اسان کان گهريو پيو وڃي، پر اسان سرخرو ٿينداسين، وزيراعظم جو چوڻ هو ته 2014 کان ئي ملڪ ۾ اهو تماشو لڳو پيو آهي، قوم به ڄاڻي ٿي ته اهو تماشو لڳائڻ وارا ڪهڙا ماڻهو آهن، پهرين اليڪشن ۾ ڌانڌلي، پوءِ ڌرڻا شروع ڪيا ويا، تنهن هوندي به ان سڄي دٻاءَ باوجود اڄ پاڪستان ۾ بجلي جا ڪارخانا به لڳي رهيا آهن ۽ دهشتگردي جي چيلهه به ٽوڙي وئي آهي، سندس چوڻ هو ته منفي سياست کيڏندڙن چاهيو پاڪستان ترقي نه ڪري پر اڄ پاڪستان ترقي جي بلندين تي آهي ۽ ان ڳالهه جو اعتراف پوري دنيا ڪري رهي آهي پر ڇا انهن ماڻهن جو ڳلو جهلڻ وارو ڪير ناهي، ڪير پڇي انهن کان ته ڇا هي ملڪ کي بدحال ڪرڻ جي لاءِ ڪري رهيا آهن، وزيراعظم چيو ته 90 جي ڏهاڪي ۾ جن ملڪن جي برابر پاڪستان هيو اڄ اهي ملڪ ڪٿي وڃي پهتا آهن، اسان جيڪو ماضي ۾ وڃايو آهي، ان کي واپس حاصل ڪرڻ جي ڪوشش ڪري رهيا آهيون پر جيڪڏهن ان لاءِ به ٽنگون ڇڪيون وڃن ته ملڪ ڪيڏانهن ويندو، جيڪو مينا بازار ملڪ ۾ لڳل آهي، اهو پاڪستان کي ڪهڙي طرف وٺي ويندو، پاڪستاني قوم کي ان جو حساب گهرڻ گهرجي ۽ مون کان استعيفيٰ گهرڻ وارن کي هر هر قوم ٺڪرايو آهي، هن چيو ته اسان کي ان کان اڳ 2، 2 سال جا دور مليا، هي پهريون ڀيرو 4 سال مليا آهن ۽ ڏسون ٿا ته هاڻي اڳتي ڇا ٿو ٿئي، وزيراعظم جو چوڻ هو ته خنجراب کان گوادر تائين روڊ بلڪل تيار آهن،جڏهن ته ريلوي کي اپ گريڊ ڪيو پيو وڃي، 30 سالن کان نامڪمل لواري ٽنل جو سڀاڻي افتتاح ڪري رهيو آهيان پر انهن ماڻهن کي ترقيءَ کان ڇا ڏيڻو وٺڻو، سندس چوڻ هو ته عوامي رستي سان اقتدار نه ملڻ تي ماڻهو تماشو لڳائي بانسري وڄائي رهيا آهن، جڏهن ته دهلڙي وڄائڻ وارا دهلڙي وڄائيندا رهندا، سياسي مخالفن کي ڪجهه پلئه نه پوندو.

 

پانامه عملدرآمي ڪيس، پهريان عبوري حڪم هو هاڻي فيصلو ٿيندو: سپريم ڪورٽ

اسلام آباد (اين اين آءِ) سپريم ڪورٽ آف پاڪستان ۾ جي آئي ٽي جي رپورٽ تي ٽين ٻڌي دوران ججن رمارڪس ڏنا آهن پهريان عبوري حڪم هيو هاڻي فيصلو ٿيندو ان جو ڳالهه جو ڪوبه ثبوت نه آهي،  وزيراعظم پاڻ ڪنهن به پراپرٽي جو مالڪ آهي اسانکي ڏسڻو آهي ته ڇا ڪيس ۾ ڪي شاهديون آهن، جيڪا وزيراعظم معاملي سان جوڙين ٿيون ڏسڻو آهي ته سانکي فيصلو ڪرڻو آهي يا ٽرائِل ڪورٽ ڏانهن موڪلڻو آهي، حقيقت اها آهي ته هن عدالت وٽ فيصلي ڪرڻ جو اختيار آهي. توهانکي سمورا پتا ظاهر ڪرڻ گھرجن هان، بنيادي سوال اهو آهي ته لنڊن فليٽن لاءِ ڪڏهن ۽ ڪنهن ادائيگي ڪئي فنڊ سعودي عرب دبئي ۽ قطر ڪئي، سوال اهو آهي فنڊ ڪيئن لنڊن پهتا نوازشريف ڪٿان کان ۽ ڪيئن منتقل ڪيا اهو جواب ملي وڃي ته ڳالهه ختم ٿي ويندي،. واليم چار ۾ تمام خطرناڪ دستاويز آهن ان ٽرسٽ بيڊ تي ڳالهه ڪرڻي آهي ۽ ڪجھه نتيجا به ظاهر ڪيا ويا، وزيراعظم جي وڪيل خواجا حارث دليل مڪمل ڪندي چيو آهي ته جي آئي ٽي جي رپورٽ ۾ وزيراعظم جي خلاف ڪجھه به نه آهي ادب اسان گذارش آهي ته فيصلي ۾ احتيات ڪيو وڃي اربع تي جسٽس اعجاز افضل جي سربراهي ۾ جسٽس عظمت سعيد سيخ ۽ جسٽس اعجار الا احسن تي ٻڌل سپريم ڪورٽ تي ٻڌل ٽي رڪني بينچ ٻڌڻي ڪئي. ٻڌڻي شروع ٿي ته وزيرعظم جي وڪيل چيو ته گذريل ڏينهن مان وزيراعظم جو جي آئي ٽي ۾ بيان پڙهي ٻڌايو هو. وزيراعظم جي آئي ٽي کي گوشوارن جي صورت ۾ آمدني ۽ اثاثن جا تفصيل ڏنا پر جي آئي ٽي وڌيڪ ڪنهن اثاثڻ بابت سوال نه ڪيو. جي آئي ٽي ۾ پيشي تائين ٻيو ڪو به اثاثو هيو ئي نه جي آئي ٽي وٽ ڪجھه هجي هان ته سوال ڪري هان، وزيراعظم جي مٽن مائٽن ڪا به ملڪيت نه لڪائي جڏهن وزيراعظم ڪا به بنا نالي جي ملڪيت نه آهي. نيب قانون موجب اهڙو شخص جنهن جي زال ٻارڙن جي نالي اثاثا هجن ان کي ذميوار نه ٿو چئي سگھجي. وزيراعظم ٽيڪس رٽرن ۾ اثاثا ظاهر ڪيا آهن ۽ هن ڪو به اثاثو نه لڪايو آهي، وزيراعظم جي وڪيل دليلن دوران نيب قانون جي ڇڪ 5A جو حوالو ڏيندي چيو ته نيب قانون موجب اهڙو شخص جنهنجي زال جي ٻارڙن جي نالي اثاثا هجن، ان کي ان جو ذميوار نه ٿو چئي سگھجي. جنهن تي جسٽس اعجازافضل رمارڪس ڏنا ته جنهن نيب قانون جو توهان حوالو ڏئي رهيا آهيون اهو  ته ڪيس سان مشآبهت نه ٿو رکي، جسٽس عظمت سعيد چيو ته آمدني هڪ ڪروڙ ۽ ملڪيت پنج ڪروڙ جي ٺاهي وٺي ته انکي ڇا چئبو. خواجا حارث جواب ڏنو ته قبضي واري ملڪيت جيڪڏهن آمدني کان وڌيڪ هجي ته اها جوابده هوندي آهي، جي آئي ٽي وزيراعظم تي ملڪيت ٻارڙن جي نالي ڪرڻ جو الزام لڳايو آهي ٻارڙن جي ملڪيت بنا نالي جي ڪيئن ٿي سگھي ٿي، جڏهن لنڊن فليٽن  جي مالڪ جو نالو به سامهون اچي چڪو آهي. جسٽس عظمت سعيد رمارڪس ڏنا ته قانون ۾ آمدني ۽ اثاثن جي ذريعن جو ذڪر آهي. قانون ۾ ان شخص جو به ذڪر آهي جنهن جي قبضي ۾ اثاثا هجن ۽اثاثا جنهنجي استعمال هيٺ هجن اهو به بي نالي ٿي سگھي ٿو. ڇا توهان چوڻ چاهيو ٿا ته ڪنهن ٻئي جي گھر ۾ ڪجھه وقت رهندڙ جوابدار نه ٿو بڻجي سگھجي، استعمال هيٺ هجڻ ٻي ڳالهه آهي، ۽ اثاثن مان فائدو وٺڻ الڳ ڳالهه آهي توهان جي موجب ڪنهن جي گھر رهڻ واري تي نيب قانون جو لاڳو نه ٿيندو، اها ڳالهه اسان مهينن کان  ٻڌي رهيا آهيون، فليٽن جي ملڪيت کانسواءِ سڀ ڳالهيون چٽيون آهن، سپريم ڪورٽ جي جج چيو ته اسان توهانجي ڳالهيون سمجھون ٿا ته جي آئي ٽي رپورٽ ۾ وزيراعظم تي ڪرپشن يا عهدي جي غلط اسعتمال جو ڪو به الزام نه آهي. جسٽس عظمت سعيد رمارڪس ڏنا ته غلطي ڪٿي يا ڪوتاهي نيب آرڊيننس ۾ بنا نالي جي ملڪيت جو ڪو به ذڪر نه آهي. جسٽس اعجاز افضل چيو ته حديبيا ڪيس بابت توهان جو نڪتو نوت ڪيو هيو. توهان پنهنجا دليل دهرائي رهيا آهيو جنهن تي وزيراعظم جي وڪيل چيو ته عدالت جو وڌيڪ وقت نه وٺندس جي آئي ٽِي رپورٽ اچڻ کانپوءَ پراڻا معاملا ختم ٿي ويا، ان حوالي سان ڪي به شاهديون نه لڳايو ويون، لنڊن فليٽ جي باري ۾ جي آئي ٽي نه چيو ته اصل مالڪ وزيراعظم آهي، جنهن تي جسٽس عظمت سعيد رمارڪس ڏنا لڳي ٿو ته بنا نالي واري جي تعريف لکڻ وقت قانون ۾ غلطي ٿي وئي آهي، بنا ڪنهن نالي جي اصل تعريف اسان سڀ ڄاڻون  ٿا، خواجا حارث چيوت وزيراعظم جي تقرير کان انڪار نه ڪري رهيو آهي وزيراعظم جي ذاتي طور تي ان معاملي سان ڪوبه واسطو نه آهي، وزيراعظم جي خاندان جي ٻين ماڻهن وانگر جيڪا ڄاڻ هئي اها شيئر ڪئي جي آئي ٽي چيو ته فليٽ سڄي خاندان جا آهن، التوصيف شريف فيمليءَ جا ميمبر شيئر هولڊر هيا، انهيءَ ڪيس ۾ شريف فيملي جا ميمبر شيئر هولڊر هيا جنهن تي جسٽس اعجاز افضل چيو ته حديبيا پيپر جي مالڪن ۾ مريم نوازبه شامل آهي جنهن تي خواجا حآرث چيو ته ڪمپني جو فيصلو ميان شريف ڪندو هو. جسٽس اعجاز الا احسن بنيادي سوال اهو آهي ته لنڊن فليٽ ڪنهن ورتا ڪٿان آيا مني ٽرائيل ڪڏهن ڪئي وئي جنهن جو جواب نه ڏنو پيو وڃي، هن چيو ته شريف خاندان جو موقف آهي ملڪيت 2006 ۾ حاصل ڪئي وئي. ڇا حسن ۽ حسين لنڊن جي ملڪيت نوازشريف جي چوڻ تي ورتي؟ اصل سوال اهو آهي ته سعودي عرب، دبئي ۽لنڊن ملڪيت جا فنڊ ڪٿان آيا ان بنيادي سوال جو جواب نه ملي سگھيو آهي. خواجا حارث چيو ته جيڪو بيان مان پڙهيو ته ان ۾ قطري سرمائي مان ملڪيت خريد ڪرڻ جو ٻڌايو جنهن تي جسٽس اعجاز الا حسن چيو ته وزيراعظم تقرير ۾ انجو ذڪر نه  ڪيو  جنهن تي وڪيل چيو ته ان سمورو رڪارڊ موجود آهي. وزيراعظم جي وڪيل چيو ته جلد نمبر چار تي ڪجھه ڳالهائيندس جنهن تي جسٽس اعجازالا احسن رماڪس ڏنا ته واليم چار جي حوالي سان محتاط رهو ان ۾ خطرناڪ دستاويز موجود آهن. خواجا حآرث جو چوڻ هيو ته وزيراعظم چيو ته سيٽلمينٽ ٿي هئي. ان تي تفصيل جي خبر نه آهي. لنڊن فليٽ سان وزيراعظم جي ڳنڍڻ جي ڳالهه جيڪا هئي اها منگھڙت آهي، ڪي به شاهديون يا دستاويز نه آهن، ٻي ڌر سان جوڙڻ به اعتراض جوڳو آهي. پر هاڻي مان ان تي اعتراض نه ڪري رهيو آهيان، جنهن تي جسٽس اعجاز افضل چيو ته جي آئي ٽي چيو ته لنڊن فليٽ شريف فيملي رکي ٿي، جيڪڏهن جي آئي ٽي جي رائي جي حوالي سان ڪو به ثبوت نه آهي ته ان جو وزن نه هوندو، جي آئي ٽي کي ڇڏيو اسانکي دستاويز ڏيکاريو، جيڪڏهن حسن ۽ حسين فليٽ ڪنهن ٻئي نالي تي آهن ته اهي ڪير آهن حسين پاڻ فليٽ جو مالڪ چيو پر دستاويز نه ڏنا. نيسڪول منروا جي مالڪ به پاڻ کي چيو پر دستاويزن ۾ نه آهي، منروا جي دستاويزن تي مريم کي مالڪ ڪيو ويو آهي، اعجاز الا احسن پنهنجي رمارڪس ۾ چيو ته بحث لاءِ مڃون ٿا ته فليٽ ميان شريف جا آهن، وفاق کانپوءِ ان ۾ وزيراعظم جو به حصو هوندو، وزيراعظم هجي يا حسين نواز ٻئي زباني چئي رهيا آهن آفشور ڪمپنيون قائم ڪيون ويون آهن. ڪمپنين ۾ اثآثن ۽ فنڊ واضع نه آهن، جسٽس عظمت سعيد چيو ته آڦشور ڪمپني ٻين ڪمپنين کان سروس وٺي رهيون آهن اها سروس ڪنهنکي ڏني پئي خبر ناهي ته نالو ڪنهنجو پيسا ڪنهن ڏنا ڪو ٻڌائي نه رهيو آهي، ڪاغذ ڪو به نه ڏيکاري رهيو آهي اهو ته آهي 88 سيڪڙو منافعو وزيراعظم کي ڏنو ويو، هڪ ارب 17 ڪروڙ روپيا وزيراعظم کي ڏنا ويا، خواجا حآرث چيو ته هل ميٽل حسين نواز جي ڪمپني آهي جيڪا خودمختيار آهي حسين نواز پنهنجي والد کي پيسا ڏنا، جنهن تي عظمت سعيد رمارڪس ڏنا ته سڀ شيون آهن اسان اکيون بند نه ڪنداسين خواجا حارث دليل مڪمل ڪندي چيوته جي آئي ٽي رپورٽ ۾ وزيراعظم، جي خلاف ڪجھه نه اهي ادب سان گذارش آهي ته فيصلي ۾ احتياط ڪيو وڃي، جنهن تي جسٽس اعجاز الا حسن رمارڪس ڏنا ڏسڻو آهي ته اسانکي فيصلو ڪرڻو آهي يا ٽرائيل ڪورٽ ڏانهن موڪلڻو آهي حققيقت اها آهي ته فيصلو عدالت کي اختيار آهي، توهانکي سمورا پتا ظاهر ڪرڻا هئا، ججن چيو ته پهريان عبوري حڪم هيو هاڻي فيصلو ٿيندو ان ڳالهه جو ڪو به ثبوت نه آهي ته وزيراعظم پاڻ ڪنهن به پراپرٽِي جو مالڪ نه آهي. جسٽس عظمت سعيد رمارڪس ۾ چيو ته ٻه صوتون هيون اسان درخواست رد ڪيون يا مڃون يا چاهيون ته ائين فيصلو ڪري ڇڏيو پر اسان قانون کي مدنظڙ رکيو پنهنجي خلاف الزامن جو جواب ٽرائيل ڪورٽ ۾ ڏنو جيترو رڪارڊ ڏيڻو آهي توهان عدالت کي ڏيو، توهان تحفا وصول ڪري پاڪستاني رپئي ۾ تبديل ڪيا توهانجي بيان جي تصديق ويڊيو رڪارڊنگ مان ٿي سگھي ٿي، طارق حسين ايڊووڪيٽ چيو ته جي آئي ٽي منهنجي موئڪل قصور وار ڇو چيو جي آئي ٽي جو رويو صحيح نه هيو، جنهن تي جسٽس عظمت سعيد رمارڪس ڏنا ته اسانجي رويي تي به اعتراض آهي ، ڇا  توهانجو هل ميٽل ۾ سيٽلمينٽ ۾ ڪرادار نه آهي اسان توهان جا نڪتا نوٽ ڪيون ٿا، جيڪڏهن توهانجو ڪردار نه آهي ته پوءِ ڳڻتي ڪرڻ جي ضرورت نه آهي هل ميٽل جو اشو به اڃان زنداه آهي جنهن طارق حسن چيو ته مان پنهنجي لاءِ نه پر پنهنجي موڪل لاءِ پريشان آهيان جنهن تي اعجاز افضل رمارڪس ڏنا نعيم بخاري چئي چڪو آهي ته وڪيل نه هارايندو پر موڪل هارائنيدو ويندو آهي، ان کانپوءِ سپريمڪورٽ ناڻي واري وزير  اسحاق ڊار دستاويز جمع ڪرائيندي چيو اڄ صبح ساڍي 9 وڳي تائين ڪندي ملتوي ڪئي وئي.

 

ملڪ جي دفاعي استحڪام تي ڪو به سمجهوتو نه ٿيندو: آرمي چيف

راولپنڊي  (اين اين آءِ) چيف آف آرمي اسٽاف جنرل قمر جاويد باجوه هڪ ڀيرو ٻيهر واضح ڪيو آهي ته ملڪ جي دفاع کي مضبوط بڻائڻ تي ڪا به سوديبازي نه ڪئي ويندي، دفاعي منصوبن جي وقت تي مڪمل ڪرڻ لاءِ تعاون جاري رکنداسين، هو اربع تي هيوي انڊسٽري ٽيڪسلا جي دوري جي موقعي تي خطاب ڪري رهيو هو، آءِ ايس پي آر موجب آرمي چيف هيوي انڊسٽري ٽيڪسلا جو دورو ڪيو جتي هن دفاعي پيداوار بابت جاري ۽ مستقبل جي منصبوبن جي حوالي سان بريفنگ ڏني وئي، آرمي چيف ٽيڪسلا جي معياري پيدوار لاءِ ڪارڪردگي ۽ عزم جي تعريف ڪئي، هن چيئرمين ايڇ آءِ پي کي هلندڙ منصوبن کي وقت اندر مڪمل ڪرڻ جي هدايت ڪئي ۽ هر قسم جي تعاون جي خاطري ڪرائي، آرمي چيف چيو ته ايڇ آءِ ٽي ٽيڪسلا ملڪ جي دفاعي اهليت ۾ اهم ڪردار ادا ڪيو، جڏهن ته ملڪ جي دفاعي صلاحيتن ۾ بهتري تي ڪا به سوديبازي نه ڪئي ويندي.

 

ايل او سي ڀارتي فوج جي فائرنگ، ۳ شهيد، جوابي ڪارروائي ۾ ۵ دشمن فوجي مارجي ويا

اسلام آباد (اين اين آءِ)راولپنڊي: لائن آف ڪنٽرول تي ڀارت جو جنگي جنون عروج تي پهچي ويو آهي، ڀارتي فوج پاران مختلف سيڪٽرز تي شهري آبادين کي نشانو بڻايو ويو، ڀارت جي ڪارروائي تي پاڪ فوج جي ڀرپور جوابي ڪارروائي ڪئي ته ڀارتي توپون خاموش ٿي ويون، جوابي ڪارروائي دوران ۵ ڀارتي فوجي مارجي ويا، جڏهن ته ڪيترائي زخمي پڻ ٿيا آهن، ان دوران ڪيتريون ئي ڀارتي چوڪيون پڻ تباهه ٿي ويون، آءِ ايس پي آر مطابق ڀارتي فوج لائن آف ڪنٽرول وٽ مختلف سيڪٽرز ۾ شهري آبادين تي بناجواز فائرنگ ڪري ڏني، مختلف سيڪٽرز تي ڀارتي فوج جي فائرنگ جي نتيجي ۾ هڪ جوان ۽ ۲ شهري شهيد ۽ ۷ زخمي ٿي پيا، پاڪ فوج جي ڀرپور ڪارروائي دوران ڀارتي فوج جي مورچن ۽ چيڪ پوسٽن کي تباهه ڪيو ويو آهي، جڏهن ته ۵ ڀارتي فوجي مارجي ويا ۽ ڪيترائي زخمي پڻ ٿيا آهن.  ٻئي طرف  پاڪستان ڀارتي ڊپٽي هاءِ ڪمشنر جي پي سنگهه کي پرڏيهي آفيس طلب ڪري ايل او سي تي ڀارتي فوج جي فائرنگ جي نتيجي ۾ 2 ماڻهن جي شهادت تي سخت احتجاج ڪيو، اربع تي ڀارت پاران ايل او سي جي مسلسل خلاف ورزي تي پاڪستان ڀارتي ڊپٽي هاءِ ڪمشنر جي پي سنگهه کي پرڏيهي آفيس طلب ڪيو ۽ لائين آف ڪنٽرول تي ڀارتي فوج جي فائرنگ جي نتيجي ۾ ٻن شهرين جي شهادت تي احتجاج رڪارڊ ڪرايو، ان سلسلي ۾ ڀارتي ڊپٽي هاءِ ڪمشنر کي احتجاجي خط به ڏنو ويو، جنهن ۾ چيو ويو ته ڀارت مسلسل ايل او سي تي فائرنگ ڪري سيز فائر معاهدي جي خلاف ورزي ڪري رهيو آهي اهو سلسلو بند ڪيو وڃي.

 

جي آءِ ٽي کي فون رڪارڊنگ جو اختيار ڪنهن ڏنو، حڪومت خلاف سازش ٿي رهي آهي: انوشا رحمان

اسلام آباد (ويب ڊيسڪ): آءِ ٽي واري مملڪتي وزير انوشا رحمان چيو ته جي آءِ ٽي رپورٽ تي ڪيترائي سوال اٿي رهيا آهن، رپورٽ ۾ بيانن کي ٽوڙي مروڙي پيش ڪيو ويو، سمورن خدشن بابت سپريم کي آگاهه ڪري ڇڏيو آهي، اسلام آباد ۾ ميڊيا سان ڳالهائيندي انوشا رحمان چيو ته جي آءِ ٽي ميمبر سرڪاري ملازم آهن، جن اختيارن جو ناجائز استعمال ڪيو، سندس چوڻ هو ته جي اءِ ٽي طرفان نيب ڪيس ڪرڻ جي تجويز بدنيتي تي ٻڌل آهي، مملڪتي وزير چيو ته جي آءِ ٽي کي فون رڪارڊنگ جو اختيار ڪنهن ڏنو، حڪومت خلاف سازش ٿي رهي آهي، هن چيو ته جي آءِ ٽي ۾اسحاق ڊار جي بيان کي غلط پيش ڪيو ويو، هيءَ ڪهڙي جي آءِ ٽي آهي، جنهن جي رپورٽ انٽر نيٽ تي موجود آهي، قوم واجد ضياءَ جي جواب جو انتظار ڪري رهي آهي، انوشا رحمان چيو ‎وزيراعظم نواز شريف جو هڪ طرفو ميڊيا ٽرائل ٿي رهيو آهي،  نواز شريف اڄ به وزيراعظم آهي سڀاڻي به وزيراعظم ئي رهندو.

 

سنڌ سروسز تي سيلز ٽيڪس اوڳاڙي ڪري رهي آهي ۽ هلندڙ سال اوڳاڙي جو حدف 2 سئو بلين رپيا رکيو آهي: مراد علي شاهه

ڪراچي: (اسٽاف رپورٽر): سنڌ جي وڏي وزير سيد مراد علي شاهه چيو آهي ته سيلز ٽيڪس جي مجموعي وصولين وارو ڪم صوبن حوالي ڪيو وڃي، صوبا ٽيڪس ڏيندڙن جي ويجهو هئڻ سان وفاقي حڪومت کان بهتر وصولي ڪري سگهن ٿا. سنڌ حڪومت خدمتن تي سيلز ٽيڪس جي محصولن ۾ وفاقي حڪومت کان بهتر ڪم ڪري پئي. سنڌ حڪومت خدمتن تي ٽيڪس وصولي ڪندو آهي. هلندڙ مالي سال سنڌ حڪومت کي ٽيڪس جي ڏس ۾ 200 بلين جي هدفن کي حاصل ڪرڻ آهي. اهڙن خيالن جو اظهار اڄ هن وزيراعليٰ هائوس ۾ ڪوٺايل آئي ايم ايف IMF جي ملڪي نمائندي مسٽر توقير مرزيو MR. Tokhir Mirzoev سان ملاقات ڪندي ڪيو. ان موقعي تي وڏي وزير جو پرنسپل سيڪريٽري سهيل راجپوت، ناڻي وارو سيڪريٽري حسن نقوي ۽ آئي ايم ايف جا عملدار پڻ موجود هئا. وڏي وزير چيو ته صوبائي محصولي ادارو سنڌ روينيو بورڊ (SRB) هن سال 78 بلين وصول ڪيا آهن جڏهن ته ايڪسائيز کاتي 58 بلين گڏ ڪيا آهن، فقط بورڊ آف روينيو (BoR) جا هدف ڪجهه گهٽ رهيا آهن. هن چيو ته وفاقي حڪومت پنهنجا هدف پورا نه ٿي ڪري سگهي ته ڪيش فلو مينيجمنٽ ۾ صوبن تي اثر پوندو آهي. هن چيو ته هلندڙ سال 200 بلين جي هدفن کي حاصل ڪرڻو آهي جيڪو اسان وصول ڪري وينداسين. هن وڌيڪ چيو ته سنڌ حڪومت پراپرٽي ٽيڪس کي وڌيڪ مضبوط ۽ فعال بڻائڻ لاءِ ضلعي سطح تي اختيار منتقل ڪرڻ جو فيصلو ڪيو آهي. پراپرٽي ٽيڪس ۾ وڏي صلاحيت موجود آهي، انهن جي اصلاحاتن ۾ بهتر وصولي ٿيندي. هن لاڳاپيل عملدارن کي هدايت ڪئي انهيءَ جي قيام جي مقصد کي ڪامياب بڻائڻ لاءِ پنهنجو ڪردار ادا ڪن ته جيئن هيٺين سطح تي عوام جي مسئلن کي حل ڪجي ۽ عوام کي ريليف ميسر ٿي سگهي. آخر ۾ هن چيو ته سنڌ حڪومت مؤثر ۽ منظم مالي انتظامن کي بهتر ڪيو آهي.

 

چونڊ سڌارا ڪميٽي جو بل ڪميٽي منظور ڪري ورتو آهي: اسحاق ڊار

اسلام آباد (ويب ڊيسڪ): ناڻي واري وفاقي وزير اسحاق ڊار چيو آهي ته اليڪشن قانون اليڪشن ڪميشن جي مشاورت سان بڻايا ويا، چونڊ قانونن جي تياريءَ ۾ سمورين جماعتن پنهنجو حصو وڌو آهي، هن چيو ته چونڊ سڌارا ڪميٽي جو بل ڪميٽي منظور ڪري ورتو آهي، چونڊ سڌارن جي بل تي جمعي ڏهاڙي صحيح جي تقريب ٿيندي، چونڊ قانونن جي تياري لاءِ ذيلي ڪميٽي 90 کان وڌيڪ اجلاس ڪيا، اليڪشن بل 2017 تي سڀني جماعتن اتفاق ڪيو آهي.

 

نواز شريف وٽ استعيفيٰ ڏيڻ کانسواءِ ٻيو ڪو رستو ناهي: شيخ رشيد

اسلام آباد (اين اين آءِ) عوامي مسلم ليگ جي سربراه شيخ رشيد چيو آهي ته وزيراعظم کي ڄمي رهڻ جو مشورو ڏيڻ نواز شريف جي سياسي قبر کوٽڻ آهي، سپريم ڪورٽ جي ٻاهران پاناما جي آءِ ٽي ڪيس جي ٽين ٻڌڻي کان اڳ ميڊيا سان ڳالهائيندي هن چيو ته خواجه حارث تسليم ڪيو ته وزيراعظم دبئي جو ايغامون ورتو آهي، شيخ رشيد چيو ته خواجه حارث جي ان دليل کانپوءِ گيم اوور ٿي وئي آهي ۽ هاڻ عدالت کان ٻاهران گوڙ ختم ڪيو وڃي، هن چيو ته ٻڌڻي ۾ به ججن چيو ته مني ٽريل آهي ته کڻي اچو، هن الزام لاڳو ڪيو ته جي آءِ ٽي کي گاريون ڏيندڙ سپريم ڪورٽ کي گاريون ڏئي رهيا آهن، هن چيو ته وزيراعظم وٽ استعيفيٰ کانسواءِ ٻيو ڪو به آپشن نه آهي، نواز شريف صاحب ڄمي رهڻ جون ڳالهيون ڇڏي ڏيو، توهان نااهل به ٿيندو ۽ جيل به ويندو.

 

سرڪاري وڪيل آخري ڪوشش ڪن، ته جيئن اهو نه چيو وڃي ته کين موقعو نه ڏنو ويو: سراج الحق

اسلام آباد(ويب ڊيسڪ) جماعت اسلامي جي امير سراج الحق چيو آهي ته حڪمران پاڻ کي احتساب کان مٿانهون نه سمجهن، سرڪاري ڌر جا وڪيل ڀلي ڪوششون ڪري وٺن ڪٿي ايئن نه چيو وڃي ته کين دفاع جو موقعو نه مليو. سپريم ڪورٽ ۾ پاناما عملدرآمد ڪيس جي ٻڌڻي دوران ميڊيا سان ڳالهائيندي هن چيو ته عوام چاهي ٿو ته سرڪاري وڪيل آخري ڪوشش ڪن، ته جيئن اهو نه چيو وڃي ته کين موقعو نه ڏنو ويو. سراج الحق چيو ته وزيراعظم نوازشريف الزامن بعد چيو ته وٽس سمورا ثبوت موجود آهن پر هو جي آءِ ٽي ۾ ڪي به ثبوت پيش نه ڪري سگهيو. هن چيو ته جيڪڏهن وزيراعظم ثبوت پيش ڪرڻ ۾ ڪامياب ٿئي ها ته سندس ترجمانن کي رڙيون ڪندي دفاع ڪرڻ جي ضرورت نه پئي ها. هن چيو ته ريڪارڊ ٽيمپرنگ تاريخ جو انوکو واقعو آهي ۽ سرڪار پاڻ ٽيمپرنگ ڪري رهي آهي. جماعت اسلامي جي امير چيو ته قطري شهزادي کي به عدالت ۾ پيش نه ڪيو ويو، هاڻ ته سرڪاري وڪيل به سوچي رهيا هوندا ته اهي مٿي وڃي ڪهڙو جواب ڏيندا. هن چيو ته سندس جنگ ڪرپشن خلاف آهي، سڀني جو احتساب چاهيون ٿا، جيڪڏهن ايئن ٿيو ته پاڪستان ڪرپشن کان پاڪ ملڪ بڻجي ويندو. سراج الحق چيو ته کيس اميد آهي ته  قوم کي عدالت مان انصاف ملندو.

 

نواز شريف سيالڪوٽ ۾ ويهي لائن آف ڪنٽرول تي ڳالهه ئي نه ڪئي: عمران خان

اسلام آباد (ويب ڊيسڪ): پي ٽي آءِ چيئرمين عمران خان چيو آهي ته ن ليگ کي پرواهه ئي ناهي ملڪ ۾ ڇا ٿي رهيو آهي، نواز شريف سيالڪوٽ ۾ ويهي لائن آف ڪنٽرول تي ڳالهه ئي نه ڪئي، خطاب ۾ نواز شريف ايل او سي تي ٿيندڙ شهادتن تي ڳالهه ئي نه ڪئي، اسلام آباد ۾ پريس ڪانفرنس ڪندي عمران خان چيو ته ڪابينا نواز شريف جي ڪرپشن لڪائڻ کانسواءِ ڪجهه نه ڪري رهي آهي، شريف فيملي تسليم ڪيو ته انهن جي ملڪيت آهي، وڏن پروجيڪٽن سان شريف خاندان کي وڏو فائدو پهتو آهي، وڏن پروجيڪٽن مان پئسا ڪڍي ٻاهر اماڻيندا رهندا آهن، هن چيو ته سپريم ڪورٽ انهن کي پنج موقعا صفائي لاءِ ڏنا، نواز شريف اڄ چئي رهيو آهي ته منهنجو ڏوهه ڪهڙو آهي، جي آءِ ٽي جي رپورٽ بعد خبر پئي ته نواز شريف جو بزنس ئي ڪرپشن آهي، عمران خان چيو ته مان اڃا به نواز شريف کي چوان ٿو، اوهان وٽ وقت آهي، استعيفيٰ ڏئي ڇڏيو، انهن ڪمپنيون بڻايون ۽ فرنٽ مين رکيل آهن، ايف بي آر دستاويز نه ڏنا، ڏسون ٿا ته هاڻي ان ۾ ڇا پيش ٿئي ٿو، بئنڪن مان انهن قرض ورتا، هي ته اليڪشن ئي نه وڙهي سگهندا هئا، لنڊن ۾ ته انهن جون ڏهه ڪمپنيون نڪري آيون، جيڪي سڀ خساري ۾ هيون، وڪيل برادري سمجهي ٿي ته وزيراعظم کي استعيفيٰ ڏيڻ گهرجي، چونڊ سڌارا ڪميٽي مان اڄ اسان جي نمائندن واڪ آئوٽ ڪيو، اليڪشن ڪميشن کي نئين سر جوڙيو وڃي.