تازيون خبرون

Daily Archives: July 11, 2017

جي آءِ ٽي رپورٽ سپريم ڪورٽ ۾ جمع، ايس اي سي پي چيئرمين خلاف ڪيس داخل ڪرڻ جو حڪم

اسلام آباد( ويب ڊيسڪ ) جي آءِ ٽي ملڪي تاريخ جي سڀ کان وڏي ڪيس جي جاچ رپورٽ جمع ڪرائي ڇڏي، جڏهن ته سپريم ڪورٽ ايس اي سي پي چيئرمين خلاف ڪيس داخل ڪرڻ جو حڪم ڏيندي حسين نواز جي تصوير ليڪ ٿيڻ بابت ڪميشن جوڙڻ جي حڪومتي درخواست رد ڪري ڇڏي. پاناما ڪيس جي جاچ ڪندڙ جوائنٽ انويسٽيگيشن ٽيم  واجد ضياءَ جي سربراهي ۾ رپورٽ تيار ڪرڻ کانپوءِ سپريم ڪورٽ ۾  جمع ڪرائي.ذريعن موجب جي آءِ ٽي طرفان قطري شهزادي حماد بن جاسم سان خطن جي مٽاسٽا جي جائزي سميت سمورن بيانن ۽ شاهدين کي دستاويزي شڪل ڏني وئي. پرڏيهه مان حاصل ڪيل شاهدين کي به رڪارڊ جو حصو بڻايو ويو آهي، جڏهن ته آڊٽ فورمز جي رپورٽ ۽ دبئي مان ملندڙ دستاويز به رپورٽ ۾ شامل آهن. جي آءِ ٽي طرفان وزيراعظم نواز شريف، حسن، حسين نواز، مريم نواز، ڪئپٽن صفدر، ناڻي واري وزير اسحاق ڊار، شهباز شريف سميت ٻين شخصيتن ۽ ادارن جي  سربراهن جا بيان قلمبند ڪيا ويا آهن. واجد ضياءَ جي سربراهيءَ ۾ جي آءِ ٽي ٻن دٻن ۾ رپورٽ جا دستاويز سپريم ڪورٽ ۾ جمع ڪرايا ويا جن مٿان شاهدي لکيل آهي. جي آءِ ٽي جي سپريم ڪورٽ ۾ رپورٽ پيش ڪرڻ جي موقعي تي سڪيورٽي انتظام سخت ڪري وڏي انگ ۾ اهلڪارن کي مقرر ڪيو ويو. جسٽس اعجاز افضل جي سربراهي ۾ سپريم ڪورٽ جي بئنچ پاناما ليڪس بابت عملدرآمد ڪيس جي ٻڌڻي ڪئي. سپريم ڪورٽ حسين نواز جي تصوير ليڪ ڪرڻ بابت ڪميشن جوڙڻ جي درخواست رد ڪندي ملوث ماڻهو جو نالا ظاهر ڪرڻ جي هدايت ڪئي آهي. عدالت رمارڪس ڏيندي چيو ته حڪومت کي تصوير ليڪ ٿيڻ واري معاملي جي جاچ ۾ دلچسپي آهي ته ڀلي جوڙي، تصوير شايع ڪندڙ ذميوار جو نالو عام ڪرڻ جو اختيار حڪومت حوالي ڪيو ويو آهي. جسٽس اعجاز افضل چيو ته عدالت کي حسين نواز جي تصوير ليڪ ٿيڻ واري معاملي جي جاچ ۾ ڪابه دلچسپي ناهي. هن چيو ته تصوير ليڪ ڪرڻ تي ڪميشن ٺاهڻ عدالتي اختيار ۾ ناهي، حڪومت عدالتي ڪلهو استعمال نه ڪري. سپريم ڪورٽ حسين نواز جي تصوير ليڪ ٿيڻ وارو معاملو اڪلائي ڇڏيو. اٽارني جنرل رپورٽ پيش ڪندي چيو ته ايف آءِ اي، ايس اي سي پي چيئرمين ظفر حجازي جي رڪارڊ ٽيمپرنگ جي تصديق ڪندي مٿس ڪيس داخل ڪرڻ جي سفارش ڪئي آهي. ظفر حجازي جي وڪيل اعتراف ڪيو ته 10 مهينا پهرين رڪارڊ ۾ ٽيمپرنگ ڪئي. جسٽس اعجاز الحسن رمارڪس ڏيندي چيو ته ظفر حجازي ماتحت آفيسرن کي ڌمڪيون ڏنيون ۽ مٿن دٻاءُ وڌو. هن چيو ته ظفر حجازي پهريون الزامن کي رد ڪيو پوءِ چيو ته کيس ڄاڻ ناهي، ظفر حجازي ڪنهن جي چوڻ تي ٽيمپرنگ ڪئي اهو به ڏسڻو آهي.  ٻئي طرف عدالت جي آءِ ٽي بابت شايع ٿيل خبرن جو نوٽيس وٺندي جنگ گروپ جي ايڊيٽر انچيف مير شڪيل الرحمان، پبلشر مير جاويد رحمان ۽ دي نيوز جي رپورٽر احمد نوراني کي توهين عدالت جو نوٽيس جاري ڪري ڇڏيو.  سپريم ڪورٽ پاناما ليڪس ڪيس جي ٻڌڻي ايندڙ سومر تائين ملتوي ڪري ڇڏي. عدالت جي آءِ ٽي رپورٽ جي ڪاپي اٽارني جنرل کي به ڏيڻ جو حڪم ڏنو. عدالت چيو ته جيڪڏهن جي آءِ ٽي ميمبرن کي ڪنهن تنگ ڪيو آهي ته سپريم ڪورٽ سان رابطو ڪيو وڃي، ڌريون رجسٽرار آفيس مان رپورٽ حاصل ڪن.

 

نواز ليگ پاناما ليڪس بابت جي آءِ جي ٽي جي رپورٽ کي رد ڪري ڇڏيو

اسلام آباد (ويب ڊيسڪ): وفاقي وزير احسن اقبال جي آءِ ٽي جي رپورٽ کي ردي قرار ڏيندي رد ڪرڻ جو اعلان ڪري ڇڏيو، هن چيو ته سٺو هجي ها جيڪڏهن وزيراعظم خلاف مالي بدعنواني جو ثبوت ڪڍيو وڃي ها، چونڊي چونڊي جي آءِ ٽي ۾ مخالفن کي کنيو ويو، جي آءِ ٽي جي رپورٽ واري ڪوڙ کي سپريم ڪورٽ ۾ بي نقاب ڪنداسين، احسن اقبال چيو ته جي آءِ ٽي جي رپورٽ ۾ ڪو دليل ۽ ڪو مستند جواز ناهي، هن چيو ته رپورٽ ۾ وزيراعظم خلاف ڪرپشن، مالي بدعنواني ۽ ٽيڪس چوري جو ڪو الزام ناهي، پاڪستان ۾ هن وقت هڪ راند کيڏي پئي وڃي، هن چيو ته جي آءِ ٽي رپورٽ ڌرڻو ون ۽ ڌرڻو ٽو وانگر ناڪام ٿيندي، هن چيو ته جي آءِ ٽي جي رپورٽ اسان جي خدشن کي درست قرار ڏئي ڇڏيو.ٻئي طرف وفاقي وزير خواجا آصف چيو آهي ته سورس رپورٽ جي ڪنهن عدالت ۾ شاهدي طور اهميت ناهي هوندي، جي آءِ ٽي رپورٽ ۾ رحمان ملڪ جي ڳالهين تي وڌيڪ ڀاڙيو ويو آهي، گڏيل پريس ڪانفرنس ڪندي خواجا آصف چيو ته مان سمجهندو هيس ته جي آءِ ٽي مضبوط شاهدين تي ڀاڙيندي، هن چيو ته حسين نواز جي سعودي عرب ۾ ڪمپني کان هتي پئسا اماڻيا ويا، جتان پئسا ڪمايا ويا ۽ پاڪستان اماڻيا ويا، اتي ڪو قانون حرڪت ۾ نه آيو، اسان کي سپريم ڪورٽ تي پورو اعتماد آهي، وزيراعظم جي پٽ قانوني طريقي سان رقم اماڻي، هن چيو ته اهي پئسا بئنڪنگ چينل ذريعي نواز شريف جي اڪائونٽ ۾ آيا، برطانيا ۾ ٽيڪس ۽ بينڪنگ قانون پاڪستان کان وڌيڪ سخت آهن

 

احتساب بل تي قانون سازي ڪرڻ سنڌ حڪومت جي اختيارن ۾ شامل آهي: وڏو وزير

ڪراچي (اسٽاف رپوٽر ): سنڌ جي وڏي وزير سيد مراد علي شاهه چيو آهي ته احتساب بل تي آئين سازي ڪرڻ سنڌ حڪومت جي اختيارن ۾ شامل آهي. صوبائي اسيمبلي پنهنجن اختيارن کي ڪتب آڻيندي قانون منظور ڪيو. پي ايس 114 جي ننڍن چونڊن ۾ حڪومتي وسيلن کي ڪتب نه آندو ويو آهي بلڪه اسين ڪم ڪري پاڻ کي ثابت ڪيو آهي ۽ عوام اسان جي خدمتن ۽ ڪارڪردگي کي ڏسندي اسان کي ووٽ ڏنا آهن. هن چيو ته ننڍي چونڊ ۾ پئسا هلائڻ واريون خبرون من گهڙت آهن. اهڙن خيالن جو اظهار هن ميمڻ ميڊيڪل اسپتال  صفوره ڳوٺ جي دوري دوران ميڊيا جي نمائندن سان ڳالهائيندي ڪيو. ان موقعي تي وڏي وزير سان گڏ صحت کاتي جو صوبائي وزير ڊاڪٽر سڪندر مينڌرو ۽ سيڪريٽري صحت فضل الله پيچوهو پڻ موجود هو.ميمڻ ميڊيڪل اسپتال جي دوري دوران وڏي وزير چيو ته سنڌ حڪومت نرسنگ اسڪول جي قيام لاءِ ساليانو 42 ملين رپيا گرانٽ ڏيندي رهندي. اسپتالن ۾ نرسز جي ڪردار ۽ انهيءَ جي اهميت کي اجاڳڙ ڪرڻ لاءِ هر ممڪن اُپاءُ ورتا وڃن. هن چيو ته منهنجي اها ڪوشش آهي ته عوام کي صحت جون بهترين سهولتون مهيا ڪرڻ وارن ماڻهن جو هٿ ونڊائي سگهان. هن چيو ته سرڪاري اسپتالن سان گڏوگڏ خانگي اسپتالن جي مالي معاونت پڻ جاري رهندي. منهنجو مقصد سنڌ جي عوام کي تعليم ۽ صحت جي بهتر سهولتن جي فراهمي کي هر ممڪن يقيني بڻائڻ آهي. دوري دوران هن اسپتال جي مختلف وارڊن جو چڪاس ڪندي اسپتال انتظاميه کان مريضن کي ڏنل سهولتن بابت ڄاڻ پڻ ورتي. وڏي وزير کي ٻڌايو ويو ته ميمڻ اسپتال حڪومت سنڌ، خانگي ادارن ۽ مختلف شخصيتن جي مدد سان غريب ۽ لاچار مريضن جي خدمت لاءِ هر وقت سرگرم آهي. ان کانپوءِ وڏي وزير بورڊ آف ڊائريڪٽرز جي ميٽنگ جي پڻ صدارت ڪئي جنهن ۾ هن خطاب ڪندي چيو ته آئون صحت جي شعبي ۾ ترجيحي بنياد تي پبلڪ پرائيويٽ پارٽنرشپ سان اڳيان وڌڻ گهران ٿو. آئون نسرنگ ڪاليج جي قيام لاءِ اوهان سان گڏ آهيان.هن ميٽنگ کي ڄاڻ ڏيندي ٻڌايو ته سنڌ حڪومت پبلڪ پرائيويٽ پارٽنرشپ هيٺ ڪم جي شروعات بدين جي اسپتال کان ڪئي هئي. سنڌ حڪومت صحت جي شعبي ۾ ايمرجنسي لاڳو ڪئي آهي. منهنجي پوري ڪوشش هوندي ته صحت جي شعبي ۾ ڪم ڪندڙن جو هٿ ونڊائي سگهان. هن بورڊ آف ڊائريڪٽرز جي ميٽنگ ۾ شرڪت ڪندڙن کي ٻڌايو ته ميمڻ اسپتال جي دوستن روڊ جي تعمير لاءِ چيو هو ته مون انهيءَ کي ٽن مهينن اندر بڻائي ڏنو. اهو ئي سبب آهي جو آئون چاهيان ٿو ته عوام کي صحت جون سهولتون سندن چوکٺ تي مهيا هجن. هن ٻڌايو ته سالانه 42 ملين روپيا گرانٽ سان گڏوگڏ وڌيڪ به اوهان کي فنڊز ڏيندس.  اسان ڪراچي جي هر لحاظ سان خدمت ڪندا رهنداسين. ميٽنگ ۾ وڏي وزير لاءِ اسپتال انتظاميه پاران ريمارڪس ڏنا ويا ويا ته وڏو وزير اعليٰ تعليم، انجنيئرنگ ۽ معاشيات سندس ممتاز بڻايو آهي. ان موقعي تي ميمڻ اسپتال جي فائونڊيشن چيئرمين پير محمد ديوان پڻ وڏي وزير بابت ڳالهائيندي ٻڌايو ته وڏو وزير پنهنجي زبان ۽ وعدن جو پڪو آهي.دوري جي پڄاڻي تي وڏي وزير ميڊيا جي نمائندن سان ڳالهائيندي چيو ته ميمڻ ميڊيڪل اسپتال پاران دوري جي دعوت ڏني وئي هئي. ميمڻ ميڊيڪل انسٽيٽوٽ اسپتال گهڻي عرصي کان متحرڪ آهي ۽ علاج معالجي جي سهولتن ڏيندي انسانيت جي خدمت ۾ رڌل آهي جيڪو سٺو ڪم آهي. نرسنگ اسڪول جي قيام لاءِ سنڌ حڪومت ميمڻ ميڊيڪل اسپتال جي هر ممڪن مدد ڪندي. هن چيو ته گڏاپ ۽ ملير جي ڪن صحت جي مرڪزن کي ميمڻ ميڊيڪل اسپتال سان ڳنڍڻ تي پڻ غور ويچار ڪريون پيا. هڪ سوال جي جواب ۾ هن چيو ته PS-114ننڍو پاڪستان آهي. 2018 جي چونڊن ۾ پڻ ڪراچي مان وڏي ڪاميابي حاصل ڪنداسين. ننڍي چونڊ کٽي ثابت ڪيو ته ڪراچي ۾ پيپلز پارٽي جو اسٽيڪ آهي. ماڻهو سمجهن ٿا ته پيپلز پارٽي ڪراچي ۾ دلچسپي نه ٿي وٺي، پر اسان ترقياتي ڪم ڪرائي عوام جي خدمت ڪندي اهو ثابت ڪيو ته اهو تاثر غلط آهي. چونڊن ۾ پيسا هلائڻ واريون ڳالهيون من گهڙت ۽ بي بنياد آهن. سعيد غني هڪ مزدور جو پٽ آهي جيڪڏهن ووٽ پيسا ڏئي خريد ڪيا وڃن ته سمورا امير چونڊون ڏوڪڙن جي عيوض کٽين ها. پي ايس 114 حلقي ۾ ننڍين چونڊن بابت ماڻهن جو خيال هو ته اسان انهيءَ حلقي مان هروڀرون وڙهون پيا پر پيپلز پارٽي جي اڳواڻن جو اهو پڪو ارادو ۽ يقين هو ته پي پي پي انهيءَ حلقي مان ضرور ڪامياب ٿيندي. پيپلز پارٽي جي انهيءَ حلقي مان ڪاميابي مان مخالفين جا سمورا دعوا ڪوڙا ثابت ٿيا. اسان جو اميدوار سعيد غني ڪاميابي بابت پراميد هو ۽ هن اڳوڻي صدر آصف علي زرداري ۽ چيئرمين پي پي پي بلاول ڀٽو صاحب جي عزم کي سچ ثابت ڪري ڏيکاريو.  جنهن جو نتيجو اوهان آڏو آهي ته 5 کان 6 سيڪڙو ووٽنگ مان 40 سيڪڙو ووٽ اسان کي مليا. جنهن ۾ ٻين پارٽين ۽ مذهبي پارٽين جو پڻ اسان جي مدد ڪئي جنهن تي اسين دل جي گهرائين سان شڪرگذار آهيون. هي حلقو ننڍو پاڪستان جي حيثيت رکي ٿو. جنهن ۾ هر مذهب ۽ فرقي جا ماڻهو رهن ٿا. سنڌي، بلوچ، پٺاڻ، مهاجر ۽ پنجابي پڻ آهن . اهڙا تمام گهٽ حلقا ڏسڻ ۾ ملن ٿا. الله تعاليٰ جي مهرباني آهي ننڍي پاڪستان پي ايس 114 مان پيپلز پارٽي کي ڪاميابي ملڻ جو سبب 2018 جي چونڊن ۾ پڻ اسان جي ڪاميابي جو عڪس نظر اچي. پيپلز پارٽي ايندڙ چونڊن ۾ ڪراچي جي علائقن مان سٺا اميدوار چونڊي انهن کي ٽڪيٽ ڏيندي ۽ ايندڙ چونڊون پڻ کٽندي ڪامياب ٿيندي. هڪ ٻئي سوال جي جواب ۾ هن ٻڌايو ته احتساب جو قانون بڻائڻ سنڌ حڪومت جي اختيار ۾ شامل آهي. نيب قانون جي رد وارو بل گورنر وٽ موجود آهي، انهيءَ تي گهڻو نه ڳالهائيندس. قانون بڻائڻ اسيمبلين جو ڪم آهي. نيب خلاف عدالتن جا ريمارڪس موجود آهن، ادارن تي واضح ڪندو هلان ته بينچ هينٽنگ نه هلندي، پنهنجين حرڪتن کان باز اچو. صوبائي اسيمبلي پنهنجن اختيارن ۾ رهي قانون پاس ڪيو آهي. هن چيو ته سنڌ جي گورنر جا بيان افسوسناڪ آهن، هن کي گهرجي ها ته بيان ڏيڻ بدران اسيمبلي پاران اماڻيل احتساب بل تي صحيحون ڪري.

پاڪستان پيپلز ڪرپشن جي سخت خلاف آهي. اسان جيڪو قانون پاس ڪيو آهي اهو اسان جي نظر ۾ پوري اسمبلي جو فيصلو آهي اهو هڪ صوبائي معاملو آهي جنهن کي اپوزيشن پارٽي مڃڻ کان انڪار ڪيو جنهن جي پنهنجي هڪ راءِ آهي. ڪرپشن جي خاتمي لاءِ اقدامات 1956 ۾ ڪنڪرنٽ لسٽ ۾ هئا هاڻي ريزيول لسٽ ۾ آهن. جيڪو ڪنڪرٽ لسٽ ختم ٿي چڪي آهي ۽ اهو ئي صوبائي سبجيڪٽ آهي. جنهن کي نظر ۾ رکندي صوبائي معاملن تي قانون سازي ڪرڻ اسانجي اختيارن ۾ شامل آهي. ۽ جيڪو اسان صوبائي قانون جوڙيون پيا انشاء الله تعاليٰ جڏهن قانون جڙي آڏو ايندو ته سڀئي خوش ٿيندا، ڪنهن کي اعتراض نه هوندو

 

پاڪ فوج جي ڀارتي فورسز خلاف جوابي ڪارروائي، 4 فوجي مارجي ويا، چوڪيون تباهه

راولپنڊي( ويب ڊيسڪ ) لائن آف ڪنٽرول تي چڙ ڏياري سول شهرين کي نشانو بڻائڻ تي پاڪ فوج ڀرپور جوابي ڪارروائي ڪندي ڀارت جون ڪيتريون ئي چوڪيون تباهه ڪري ڇڏيون آهن. آءِ ايس پي آر موجب برهان واني جي ورسي تي سڄي دنيا ۾ ڪشميرين ڀارتي اڳرائيءَ خلاف احتجاج ڪيو ان موقعي تي ڀارتي فوج ايل او سي ۾ راولا ڪوٽ سيڪٽر تي بنا جواز فائرنگ ڪئي. ڀارتي فوج تيتري نوٽ، مانوا، ستوال ۽ چفر جي ڳوٺن ۾ شهري آباديءَ کي نشانو بڻايو جنهن جي نتيجي ۾ چئن عورتن سميت 5 بي گناهه شهري شهيد ٿي ويا، جڏهن ته ننڍي عمر جي ٻارڙن سميت پنج ماڻهو زخمي ٿي پيا. آءِ ايس پي آر موجب پاڪ فوج ڀارتي اڳرائيءَ جو منهن ٽوڙ جواب ڏنو، پاڪ فوج جي جوابي ڪارروائيءَ ۾ 2 ڀارتي چيڪ پوسٽون تباهه ٿي ويون ۽ 4 ڀارتي فوجي مارجي ويا. آءِ ايس پي آر طرفان ڀارتي چوڪيون تباهه ڪرڻ جي وڊيو به جاري ڪئي وئي آهي.

 

ڪور ڪمانڊرز ڪانفرنس ۾ آپريشن ردالفساد ۾ اڳڀرائيءَ جو جائزو

راولپنڊي (ويب ڊيسڪ): آرمي چيف جي صدارت هيٺ ڪور ڪمانڊز ڪانفرنس ۾ آپريشن ردالفساد ۾ ٿيندڙ اڳڀرائيءَ جو جائزو ورتو ويو، آءِ ايس پي آر موجب آرمي چيف جنرل قمر جاويد باجوه جي صدارت هيٺ جي ايڇ ڪيو ۾ ڪور ڪمانڊرز ڪانفرنس ٿي، جنهن ۾ خطي جي سلامتي صورتحال سميت آپريشن ردالفساد ۾ ٿيندڙ اڳڀرائيءَ جو به جائزو ورتو ويو، پاڪ فوج جي ترجمان مطابق ڪور ڪمانڊرز ڪانفرنس ۾ وچ اوڀر ۽ افغانستان جي صورتحال جي پاڪستان تي اثرن جو به جائزو ورتو ويو، جڏهن ته اجلاس ۾ ملڪي مفاد کي سامهون رکندي مثبت ڪردار ادا ڪرڻ جو عزم ورجايو ويو.

 

انتهاپسندي دهشتگردي جي خلاف هرسطح تي پاڪستان علمائي ڪائونسل سان تعاون ڪنداسين: آصف علي زرداري

لاهور (اين اين آءِ) پاڪستان علمائي ڪائونسل جي مرڪزي چيئرمين حآفظ محمد طاهر محمود اشرفي اڳوڻي صدر آصف زرداري سان ملاقات ڪري ملڪي ۽ عالمي صورتحال تي تفصيلي ملاقات ڪئي. آصف زرداري چيو ته انتها پسندي، دهشتگردي ۽ فرقيوراڻا تشدد جي خلاف پاڪستان علمائي ڪائونسل جي جدوجھد تعريف جوڳي آهي. انتهاپسندي دهشتگردي جي خلاف هرسطح تي پاڪستان علمائي ڪائونسل سان تعاون ڪنداسين. حافظ محمد طاهر محمود اشرفي چيو ته اسلام جي موجوده صورتحال تي ذوالفقار علي ڀٽو جھڙو ڪردار ادا ڪرڻ جي ضرورت آهي، پ پ پ  کي مسلمانن جي وحدت ۽ اتحاد لاءِ ڀرپور ڪردار ادا ڪرڻ گھرجي.

 

سنڌ جي ادارن اطلاعات ۾ ڪنهن به بدعنوان آفيسر کي برداشت نه ڪيو ويندو : ناصر حسين شاهه

ڪراچي (پ.ر) سنڌ جي وزير اطلاعات ناصر حسين شاهه چيو آهي ته ان ڳالهه کان باخبر آهن ته سي پي اين اي جي ڪارڪنن کي سنڌ جي ادارن اطلاعات ۾ بدعنوانين تي مبني شڪايت آهي. هن ان شڪايت جو فوري نوٽيس ورتو آهي، جڏهن ته ان کي مڪمل تدارڪ جي لاءِ انهن کي سي پي اين اي جي ڀرپور رهنمائي ۽ تعاون درڪار آهي. اهي سي پي اين اي جي اسٽينڊنگ ڪميٽي جي ڪارڪن جي اعزاز ۾ پنهنجي طرفان ڏنل عصراني جي موقعي تي خطاب ڪري رهيو هو. هن چيو ته پاڪستان پيپلزپارٽي جي چيئرمين بلاول ڀٽو زرداري ۽ سنڌ جي وڏي وزير مراد علي شاهه جي واضح هدايت آهي ته سمورن سرڪاري ادارن ۾ بدانتظامي ۽ بدعنواني جو هر سطح تي مڪمل خاتمي لاءِ فوري طور تي قدم شروع ڪيا وڃن. هن چيو ته سنڌ جي ادارن اطلاعات ۾ ڪنهن به بدعنوان آفيسر کي برداشت نه ڪيو ويندو. اشتهاري ايجنسين طرفان ازخود ميڊيا لسٽ جي تياري جي شڪايت کي ذڪر ڪندي چيو ته اهو سرڪاري امور ۾ مداخلت آهي ۽ ان پريڪٽس جي ذميدار اشتهاري ايجنسين ۽ آفيسرن خلاف سخت ڪارروائي ڪئي ويندي. هن وڌيڪ چيو ته حڪومت 18 هين آئيني ترميم تحت اختيارن جي منتقلي جي عمل کي سنڌ جو اطلاعات کاتي ۾ مڪمل عمل درآمد جو جائزو ورتو پيو وڃي ۽ ان سلسلي ۾ به ضروري قدم کنيا وڃن پيا. ان موقعي تي سي پي اين اي جي صدر ضيا شاهد، سينيئر نائب صدر شاهين قريشي، سيڪريٽري جنرل اعجاز الحق، نائب صدر عامر محمود، رحمت علي رازي، طاهر فاروق، انور ساجدي، سينيئر ميمبر وامق زبيري، قاضي اسد عابد، اڪرام سهگل، غلام نبي چانڊيو، ڪاظم خان، ڊاڪٽر جبار خٽڪ، امين يوسف، عارف بلوچ، ڊاڪٽر وقار يوسف عظيمي، نصير هاشمي، حامد حسين عابدي، عبدالرحمان منڱريو، خليل الرحمان، تنوير شوڪت، اسلم خان، محمد يونس مهر، بشير احمد ميمڻ، ڪامران ممتاز ۽ زاهده عباسي سميت وڏي تعداد ۾ مديران و صحافين شرڪت ڪئي.

 

پي ايس 114 تي ننڍي چونڊ ۾ پيپلز پارٽيءَ جو سعيد غني ڪامياب

ڪراچي (ويب ڊيسڪ) ڪراچي ۾ پي ايس 114 تي ننڍي چونڊ ۾ پيپلز پارٽيءَ جي سعيد غني ڪاميابي حاصل ڪري ورتي . پي ايس 114 تي ننڍي چونڊ لاءِ صبح 8 وڳي کان پولنگ جو عمل بنا وقفي جي شام 5 وڳي تائين جاري. چونڊ دوران مختلف پولنگ اسٽيشنز تي پ پ، ايم ڪيو ايم، آزاد اميدوار ۽ پي ٽي آءِ اميدوارن جي حامين ۾ چڪريون پڻ ٿيون. رينجرز چنيسر ڳوٺ ۾ پولنگ اسٽيشن تي جعلي ووٽ ڪاسٽ ڪرڻ جي الزام هڪ ڄڻي کي گرفتار ڪري ورتو، جڏهن ته يوسي 6 ۾ پولنگ اسٽيشن اندر زبردستي داخل ٿيڻ جي ڪوشش تي  رينجرز ۽ پوليس 11 ڄڻن کي گرفتار پڻ ڪيو. چونڊ دوران، ڊي جي رينجرز ميجر جنرل محمد سعيد، صوبائي اليڪشن ڪمشنر ۽ ٻين عملدارن مختلف پولنگ اسٽيشنز جو دورو ڪري صورتحال جو جائزو ورتو. ووٽن جي ڳڻپ کانپوءِ پ پ جي سعيد غني کي ڪامياب قرار ڏنو ويو.سنڌ جي وڏي وزير مراد علي شاهه، صوبائي گهرو وزير سهيل انور سيال ۽ ٻين سعيد غني جي گهر پهچي سندس ڪاميابي جي جشن ۾ شرڪت ڪئي.

 

اسان چاهيون ٿا ته فيصلو سپريم ڪورٽ ۾ ئي ٿئي: سراج الحق

اسلام آباد (اين اين آءِ)جماعت اسلامي جي امير سراج الحق چيو آهي ته قطري شهزادي گھرائڻ عدالت کي اختيار آهي جيڪڏهن شهزادي aکي ٻڌايو وڃي هان ته هتي تتر آهن ۽ بٽير به آهن ته هو اچي وڃي هان. ميڊيا سان ڳالهائيندي هن چيو ته سپريم ڪورٽ جي فيصلي سان پهريان ئي ڪجھه ماڻهن روئڻ شروع ڪيو آهي. اها ته اڃا شروعات آهي اڳتي ڏسون ته ڇا ٿو ٿئي. هن چيو ته عدالتن کي ڌميڪون ڏيندڙ شخص خود اهي ماڻهون آهن ۽ جن ماڻهن جو آواز بلند ٿي رهيو آهي اهي حق تي نه آهن. جن وٽ اختيار هئا انهن ئي ڪرپشن ڪئي آهي. جڏهن ته ايوان به پنهنجو ڪردار ادا نه ڪيو، اسان سڀني کي سپريم ڪورٽ جي فيصلي جو انتظار آهي، اسان بادشاهت جي بدران آئين ۽ قانون جي حڪمراني چاهيون ٿا.

 

نواز شريف وٽ استعيفيٰ ڏيڻ کانسواءِ ڪو رستو ناهي: عمران خان

اسلام آباد (ويب ڊيسڪ): تحريڪ انصاف چيئرمين عمران خان چيو آهي ته وزيراعظم کي پاناما ڪيس جو فيصلو اچڻ بعد ئي استعيفيٰ ڏئي ڇڏڻ گهربي هئي، جڏهن ته هاڻي ان وٽ استعيفيٰ ڏيڻ کانسواءِ ٻيو ڪو رستو ڪونهي، اسلام آباد ۾ پريس ڪانفرنس ڪندي عمران خان چيو ته پاناما ڪيس ۾ انصاف جي راهه ۾ رنڊڪون وجهڻ جي پوري ڪوشش ڪئي وئي ۽ شريف خاندان پنهنجي چوري لڪائڻ لاءِ ادارن کان غلط ڪم ڪرايا پر اهي سموريون شيون اڄ قوم جي سامهون اچي چڪيون آهن ۽ اسان جا جيڪي خدشا هيا اهي سچ ثابت ٿي ويا، عمران خان چيو ته مئچ ختم ٿي ويو آهي، ڏسڻو آهي ته ڪهڙي ڏينهن وزيراعظم هائوس خالي ڪن ٿا، سموريون شيون سامهون اينديون ۽ هاڻي خبر پوندي ته انهن 30 سالن اندر ملڪ کي ڪيترو لٽيو، عمران خان چيو ته نيون نيون شيون سامهون اچي رهيون آهن، اڄ ثابت ٿي ويو ته مريم نواز لنڊن فليٽس جي اصل مالڪ آهي ۽ قطري شهزادي جو خط فراڊ هيو، جڏهن ته نواز شريف دبئي جي ڪمپني جو چيئرمين به نڪري آيو، هاڻي رستن تي تحريڪ انصاف جي ضرورت نه رهندي پر رستن تي جشن ملهائينداسين، پي ٽي آءِ چيئرمين مطالبو ڪيو ته شريف فيملي جا نالا اي سي ايل ۾ وڌا وڃن، انهن تي اربين رپين جي ڪرپشن آهي، جڏهن ته نواز شريف قوم جو جوابدار آهي، وڏا ۽ ننڍا سمورا گاڊ فادرز استعيفيٰ ڏين، عمران خان جو چوڻ هو ته حڪوم جي ڪرپشن خلاف مخالف ڌر اڳواڻ جو ڪردار ادا ڪري رهيو هيس پر مون کي ڊيڄارڻ ڌمڪائڻ جي ڪوسش ڪئي وئي، جڏهن ته اسپيڪر قومي اسيمبلي اياز صادق نواز شريف جو ريفرنس سپريم ڪورٽ اماڻڻ بدران منهنجو ريفرنس اماڻي ڇڏيو، ان کي به عهدي تان استعيفيٰ ڏيڻ گهرجي.