تازيون خبرون

Daily Archives: July 6, 2017

فلم ”جب هيري ميٽ سجل“ جي شوٽنگ ختم ٿيڻ باوجود سجل جي ڪردار کان ٻاهر ناهيان نڪتي: انوشڪا شرما

نئين دهلي (شوبز نيوز) بالي ووڊ اداڪارا انوشڪا شرما چيو آهي ته ڪجهه مهينا اڳ فلم ”جب هيري ميٽ سجل“ جي شوٽنگ ختم ٿيڻ باوجود هو پنهنجي سجل جي ڪردار کان ٻاهر ناهيان نڪتي. ڀارتي سڌ سماءَ وارن ذريعن موجب اداڪارا انوشڪا شرما ميڊيا سان ڳالهائيندي چيو ته ڪجهه مهينا اڳ فلم جي شوٽنگ ختم ٿيڻ باوجود اڃا سجل جي ڪردار ۾ ئي آهي. هن چيو ته مون کي نه ٿو لڳي ته سجل مون کي ڇڏي رهي آهي، هو اڃا به مون سان ڳنڍيل آهي. فلم جي ڪهاڻي پنجابي گائيڊ ۽ گجراتي ڇوڪري تي ٻڌل آهي. فلم ۾ شاهه رخ خان پنجابي گائيڊ جڏهن ته انوشڪا شرما گجراتي ڇوڪريءَ جو ڪردار ادا ڪري رهي آهي. فلم ۴ آگسٽ تي رليز ڪئي ويندي.

 

ڪترينا ڪيف ۽ رنبير ڪپور پاڪستان اچڻ جا خواهشمند

ڪراچي (شوبز نيوز) بالي ووڊ اداڪارا ڪترينا ڪيف ۽ اداڪار رنبير ڪپور سڀاڻي جمعي تي ڪراچيءَ ۾ صحافين سان اسڪائپ ذريعي ڳالهه ٻولهه ڪندا. ٻئي فلمي اداڪار پنهنجي نئين رليز ٿيل فلم ”جگا جاسوس“ بابت تفصيل کان آگاهه ڪندا. بالي ووڊ فلمن جي پاڪستاني سئنيما گهرن ۾ نمائش کانپوءِ ڀارتي فنڪارن، پروڊيوسرن ۽ ڊائريڪٽرن جي پاڪستان ۾ دلچسپي وڌڻ لڳي آهي. گذريل ڪجهه سالن دوران ڪيترن ئي بالي ووڊ اداڪارن پاڪستان جو دورو ڪيو آهي ۽ پاڪستاني فلمن ۾ اداڪاريءَ جا جوهر ڏيکاريا آهن. رنبير ڪپور ۽ ڪترينا ڪيف پڻ پاڪستان اچڻ چاهين ٿا، جڏهن ته سيڪيورٽي سبب نه اچي رهيا آهن.

 

پاڪستان جي باڪسر محمد وسيم پاناما سٽي ۾ انٽرنيشنل چئلينج فائيٽ کٽي ورتي

پاناما سٽي(اسپورٽس نيوز)  پاڪستان جي باڪسر محمد وسيم پاناما سٽي ۾ انٽرنيشنل چئلينج فائيٽ کٽي ورتي آهي. هن پاناما جي باڪسر اليسروالڊيز کي ٻئي رائونڊ ۾ ئي ناڪ آئوٽ ڪري ڇڏيو. محمد وسيم جي اها لڳاتار ڇهين ڪاميابي آهي. فائيٽ ورلڊ باڪسنگ ڪائونسل تحت رينڪنگ فائيٽ ۸ رائونڊن تي ٻڌل هئي. محمد وسيم ڊبليو بي سي سلور فلاءِ ويٽ جي عالمي رينڪنگ ۾ پهرين نمبر تي اچي ويو آهي.

 

اسپاٽ فڪسنگ ۾ معطل ڪرڪيٽر ناصر جمشيد کان وني به ڌار ٿي وئي

لاهور (اسپورٽس نيوز) اسپاٽ فڪسنگ جي الزام هيٺ معطل ڪرڪيٽر ناصر جمشيد ۽ ڊاڪٽر سمارا افضل ڌار ٿي ويا آهن. رپورٽ مطابق پاڪستان ڪرڪيٽ بورڊ طرفان اسپاٽ فڪسنگ جي الزامن هيٺ معطل ڪيل اوپنر بيٽسمين ناصر جمشيد جي ازدواجي زندگي به ناڪام ٿي وئي آهي. اسپاٽ فڪسنگ ۾ ناصر جمشيد جو بچاءُ ڪندڙ سندس وني سمارا افضل هاڻي کائنس ڌار ٿي وئي آهي ۽ ان جي تصديق هن پنهنجي ٽوئيٽر اڪائونٽ ذريعي به ڪري ڇڏي آهي. سمارا افضل پنهنجي پروفائل تان ناصر جمشيد جو نالو به هٽائي ڇڏيو آهي.

آخري مرحلي ۾ پهتل جي آءِ ٽي جي جاچ: واحد پارس هيسباڻي

پاناما مامري جي جاچ لاءِ جُڙيل جي آءِ ٽي تقريباً جاچ جي آخري مرحلي ۾ پهچي وئي آهي. کيس مليل 60 ڏينهن وارو عرصو 7 جولاءِ تي پورو ٿي رهيو آهي. عدالت طرفان کيس 10 جولاءِ تي هر صورت ۾ حتمي رپورٽ پيش ڪرڻ جو حڪم مليل آهي. جي آءِ ٽي طرفان هينئر تائين جيڪي 3 رپورٽون سپريم ڪورٽ ۾ جمع ڪرايون ويون آهن، انهن ۾ ڇا آهي؟ ان بابت پاڻ  ته ڪجهه به نٿا ڄاڻون، پر بظاهر نظر ايندڙ صورتحال کي ڏسي ڪيترائي مبصر اهو چوندي ٻُڌجي رهيا آهن ته حالتون شريف خاندان جي حق ۾ نظر نه پيون اچن. اهڙي قسم جي تبصرن، تجزين ۽ امڪانن کي وڌيڪ هٿي وري  نواز سرڪار جي وزيرن، مشيرن توڙي ”سرڪرده“ اڳواڻن جي وڌيل بلڊپريشر جي ڪري به ملي آهي. جنهن جذباتي قسم جي تقرير جي شروعات نهال هاشمي کان ٿي. اهڙي قسم جو جذبات هاڻي نواز ليگ اينڊ ڪمپني ۾ جيئن پوءِ تيئن شديد ٿيندي نظر اچي رهيو آهي. ميڊيائي خبرون آهن ته وڏي ميان صاحب  طرفان خود پنهنجي ’وفاداران ‘ ۽ ’همدردان‘ کي سائي جهنڊي ڏيکاري وئي آهي ته ميڊيا توڙي ميڊيا کان ٻاهر ڪم کي ڇڪي رکو،  پوءِ جيڪو ٿيو ڏٺو ويندو. شايد اهو ئي سبب آهي جو اڄڪلهه نواز سرڪار جي ويجهن ماڻهن جي جذبات جو پارو چوٽ چڙهيل آهي.

حيرت جهڙي ڳالهه اها آهي ته عام طور تي ٿڌي مزاج ۽ پنهنجي ڪم سان ڪم رکڻ جي حوالي سان مشهور اسحاق ڊار به هن موقعي تي پنهنجي جذبات تي قابو نه رکي سگهيو آهي ۽ ڪاوڙ  جا رڪارڊ ٽوڙيندي نظر اچي رهيو آهي. تازو جي آءِ ٽي جي سڏ تي وڃڻ وقت هي جيترو پرسڪون ۽ خوشگوار نظر اچي رهيو هو. واپسيءَ تي وري  اوترو ئي جذباتي نظر اچي رهيو هو. ميڊيا تي اڃا تائين  به ڏاڍي دلچسپ انداز  ۾ اهي تبصرا هلندڙ آهن ته نيٺ اهڙو ڇا ٿيو جو هر وقت خزاني واري حساب ڪتاب ۾ مصروف اسحاق ڊار کي ٻاهر جي دنيا نظر اچي وئي ۽  ائين جذباتي ٿي ويو. سندس اها پرسڪوني نيٺ اوچتو ئي اوچتو جذباتيت ۾ ڪيئن تبديل ٿي وئي. جي آءِ ٽي طرفان کانئس اهڙو ڇا پڇيو ويو، جنهن کيس ايترو جذباتي بڻائي ڇڏيو. بهرحال محسوس ائين ٿي رهيو آهي ته اسحاق ڊار  کان ڪا سخت پڇا ڳاڇا ٿي آهي يا وري هن به پنهنجي باقي پارٽي جي ساٿين وانگر ’جاڙي به جڳ سنئين‘ وارو دڳ ورتو آهي.

ميان صاحب جو وڏو فرزندِ ارجمند حسين نواز  ٽيون ڏينهن خيرن سان ڇهون ڀيرو  جي آءِ ٽي اڳيان پيش ٿيو آهي ۽ سندس تازي پيشي دوران ماڻهن نه رڳو سندس چهري جي ڏاڙهي مبارڪ واري نئين اسٽائيل کي  ڏٺو پر سندس انداز بيان کي به بدليل بدليل محسوس ڪيو. تازي  پيشي تي هو ماضيءَ جي ڀيٽ ۾ ڪجهه وڌيڪ جذباتي نظر آيو ۽ اهو چوندي ته ”خبردار جي آءِ ٽي ۽ رياستي اهلڪار غير قانوني ڪم کان اڳ سوچين ته سڀاڻي پاڻ به ڪٽهڙي ۾ نه هجن…“ سندس چهري جا تيور ڏسڻ  وٽان هئا. مبصر سندس انهن جملن کي نه رڳو معنيٰ خيز چئي رهيا آهن پر اهي به امڪان ڏيکاري رهيا آهن ته ڪٿي سندس اهي لفظ هن لاءِ ڪا نئين مصيبت نه پيدا ڪن. حسين نواز جي تازي بدليل ۽ جذباتي انداز کي به ڪافي مبصر ان ساڳي حڪمت عملي جو حصو چئي  رهيا آهن جنهن جي ميان صاحب طرفان خود سائي جهنڊي ڏيکاريل ٻڌائي پئي وڃي.

ميان صاحب جي ٻنهي  فرزندن سان گڏ نيٺ سندس پياري نياڻي مريم نواز به جي آءِ ٽي اڳيان پيش ٿي چڪي، جنهن جي وري والدين کان وڌيڪ تڪليف نواز سرڪار جي شعلا بيان  وزيرن کي آهي ۽ اُهي ان معاملي تي صفا هٿن مان ويندي نظر اچي رهيا آهن. جي آءِ ٽي طرفان مريم نواز کي گهرائڻ جو وڏو ڏک ڇوٽي ميان صاحب عرف عام خادم اعليٰ پنجاب کي به ٿيو آهي ۽ سندس چوڻ آهي ته مريم نواز جي جي آءِ ٽي ۾ طلبي جو اخلاقي جواز ناهي. اسان جي تهذيب عورتن جو احترام سيکاريو آهي. مون کي خبر ناهي اهڙي قسم جي ڳالهه ڪرڻ وقت ڪنهن صحافي ڇوٽي ميان صاحب  کي اهو وقت ياد ڇو نه ڏياريو، جڏهن محترمه کي هڪ ڏينهن ۾ ڪيترين ئي ڪورٽن جو چڪر ڪٽرائڻ سان گڏ جيل ۾ بند پنهنجي ور سان ملاقات ۾ به رنڊڪون وڌيون وينديون هيون. ڇا اُن وقت شريف برادران کي عورتن جي احترام واري تهذيب ياد نه هوندي هئي؟ واقعي جٿي باهه ٻلي اها جاءِ جلي…. بهرحال شريف خاندان توڙي سندن همنوائن جن سدائين بادشاهي واري زندگي گذاري ۽ اقتدار کي پنهنجي مرضي ۽ خواهش جو طابع بڻائي انجواءِ  ڪيو. هن وقت اُهي تاريخ جي انتهائي ڪڙي موڙ مان گذري رهيا آهن. بقول هڪ سياسي مبصر جي ته جيڪڏهن هو هي موڙ صبر ۽ تحمل سان گذارڻ ۾ ڪامياب ٿي ويا ته ممڪن آهي ته سندن سياسي مستقبل جي بهتري جي ڪا گنجائش نڪري اچي پر جيڪڏهن هنن ساڳيو ماضيءَ وارو طرز انداز اختيار ڪيو ۽ عدالتي فيصلن کي قبول ڪرڻ بدران جذبات جي وهڪري ۾ پاڻ کي لوڙهي ڇڏيو ته شايد سندن اهو عمل هن ڀيري سندن سياسي مستقبل کي به لوڙهي وڃي. جيڪڏهن هي سمجهن ٿا ته پاناما واري معاملي ۾ سندن ڪو به ڏوهه ناهي ۽ مٿن لڳل الزامن ۾ ڪا به صداقت ناهي ته پوءِ گهٻرائڻ جي ضرورت ئي ڪهڙي آهي! جاچ ذريعي کير جو کير ۽ پاڻي جو پاڻي ٿي وڃڻو آهي پوءِ ايتري جذباتي انداز اختيار ڪرڻ جي ڪهڙي گهرج آهي. جيڪڏهن معاملي کي انصاف ۽ جمهوري نقطئه نظر سان ڏسجي ته شريف خاندان ۽ سندن ساٿين جو صبر ۽ تحمل تي مشتمل سهڪاري رويو عوامي سطح تي خود سندن لاءِ بهتر تاثر ڪري سگهي ٿو ۽ اُهي ان ذريعي اهو پيغام ڏئي سگهن ٿا ته ڏسو اقتدار ۾ هجڻ جي باوجود اسان ڪيئن خاموشي سان پاڻ کي احتساب جي لاءِ پيش ڪري رهيا آهيون ۽ اسان وٽ ادارن جو ڪيترو احترام آهي. حقيقت ۾ جذباتي رويو اختيار ڪري نه رڳو شڪ شبهن واري ماحول کي وڌايو پيو وڃي پر ڄڻ ته پنهنجي سڄي ڪيل ڪمائي پڻ وڃائي پئي وڃي. ماضيءَ ۾ هن  قسم جي جذباتي رويي جو نتيجو ڇا نڪتو آهي ان کان چڱي ريت واقف هجڻ جي باوجود به ساڳين روين جو ورجاءُ حيران ڪندڙ آهي.

جي آءِ ٽي طرفان معاملي جي گهڻ رخي جاچ ڪئي پئي وڃي ۽ ان سلسلي ۾ ڪيترن ئي ماڻهن کي گهرايو ويو آهي، جن کان هن ڪيس جي مختلف پاسن جي جاچ ڪئي وئي آهي. خبرون آهن ته پاناما معاملي تي خط لکندڙ  مشهور  ڪردار قطري شهزادي کي به ان جاچ هيٺ آندو پيو وڃي ۽ ان سلسلي ۾ ڇهن سوالن تي مشتمل سوال نامو تيار ٿيڻ جون خبرون پڻ ٻڌجي رهيون آهن جن ۾ لنڊن جي فليٽن جي خريداري سميت دبئي ۽ جدي جي اسٽيل ملن جي خريداري وارا سوال شامل هجڻ ٻڌايا پيا وڃن. ميڊيائي رپورٽن موجب جي آءِ ٽي طرفان قطري شهزادي کان جاچ لاءِ دوحا وڃڻ جا به امڪان آهن. جن سوالن جون ڳالهيون ٿي رهيون آهن انهن ۾ هڪڙو سوال اهو به ٻڌايو پيو وڃي ته قطري شهزادي کان پڇيو ويندو ته جڏهن لنڊن جا فليٽ 2006ع ۾ خريد ڪيا ويا ته اُهي 90ع واري ڏهاڪي  ۾ شريف خاندان جي استعمال هيٺ ڪيئن آيا؟ ۽ انهن جي خريداري لاءِ سرمايو ڪٿان آيو؟ بهرحال اِهي ته ميڊيائي خبرون آهن. جي آءِ ٽي قطري شهزادي کان جاچ لاءِ دوحا وڃي ٿي يا نه ۽ جيڪڏهن وڃي ٿي ته سوالن جي نوعيت ڪهڙي ٿي سگهي ٿي؟ ان بابت پاڻ اڳواٽ ڪجهه به نٿا چئي سگهون ۽ ڪجهه چوڻ  مناسب به ناهي، بهتر ائين ئي ٿيندو ته ايندڙ وقت جو انتظار ڪيو وڃي، جيڪو هاڻي گهڻو پري ناهي. جي آءِ ٽي جنهن کي ڏهه جولاءِ تي هر صورت ۾ سپريم ڪورٽ ۾ حتمي رپورٽ پيش ڪرڻي آهي. هاڻي جڏهن اُن ڏهين تاريخ ۾ باقي آڱرين تي ڳڻڻ جيترا ڏينهن مس بچيا آهن ته عوام جو سپينس وڌي رهيو آهي ۽ انهن جي ذهن ۾ اهو سوال اڀري رهيو آهي ته اها  رپورٽ ڪهڙي قسم جي ٿي سگهي ٿي ۽ رپورٽ جو ملڪي سياست تي ڪهڙو اثر پئجي سگهي ٿو؟ تحريڪ انصاف سميت مخالف ڌريون جيڪي رپورٽ اچڻ کان اڳ ئي عوام کي نواز حڪومت جي گهر روانگي، نئين اليڪشن جي اعلان سميت مختلف قسمن جون خوشخبريون ٻڌائي رهيا آهن، هاڻي ڏسڻو اهو آهي ته  انهن جيڪو سوچي رکيو آهي اُهو ٿيندو يا سندن سمورين اُميدن ۽ خواهشن تي پاڻي ڦري ويندو.

بحرحال هاڻي جڏهن جاچ پنهنجي آخري مرحلي ۾ پهچي چڪي آهي ته بهتر ائين ٿيندو ته اجايو افراتفري وارو ماحول پيدا ڪرڻ بدران صبر سان ان رپورٽ جو انتظار ڪجي ۽ رپورٽ جيڪا به اچي ٿي ان کانپوءِ ئي پنهنجي پنهنجي خيالن جو اظهار ڪجي.

wahidparas@yahoo.com

 

برطانيا ۾ جڙندڙ گڏيل حڪومت: صاحب خان ڀٽي

برطانيا ۾ جي چونڊن ۾ ڪنزرويٽو پارٽي اڪثريت سان سيٽون حاصل ڪيون آهن سندس مقابلي ۾ ليبر پارٽي آهي پر ان باوجود  ڪنزرويٽو پارٽي ئي اتحادي حڪومت جوڙڻ ۾ ڪامياب ٿي سگهي ٿي ڇاڪاڻ ته ڪنزرويٽو پارٽي يونسنسٽ پارٽي سان به رابطا ڪرڻ شروع ڪري ڏنا آهن، اليڪشن کان اڳ برطانوي وزيراعظم يورپي يونين کان  مڪمل طور ڇوٽڪارو ڏيارڻ جو به عوام سان  واعدو ڪيو هو  پر جڏهن چونڊون ويجهو آيون ته ملڪ اندر حالتون خراب ٿي ويون ۽ مجبورن برطانوي وزيراعظم کي چونڊون ملتوي ڪرڻ جو اعلان ڪرڻو پيو، پر جڏهن لنڊن برج تي حملو ٿيو ته ان وقت برطانوي وزيراعظم ٿريسامي مقرر وقت تي چونڊون ڪرائڻ جو اعلان ڪيو هو .

جڏهن  برطانيا ۾ چونڊن جو اعلان ٿيو تڏهن ئي  اتي حالتون  خراب ٿي ويون  هيون پر ان باوجود برطانوي وزيراعظم ٿريسامي اهو اعلان ڪيو هو ته چونڊون وقت موجب ٿينديون ۽ ان ۾ ڪو به ردو بدل نه ڪيو ويندو ۽ ان حوالي سان چونڊن جا انتظام بهتر ڪيا ويا هئا پر افسوس جو  هن ڀيري  ڪنزرويٽيو پارٽي کي برطانيا ۾ اڪثريت نه ملي سگهي آهي، ان جا به ڪيترائي سبب آهن پر تاريخ ۾ پهريون ڀيرو آمريڪا اندر  عورت اميدوارن وڏي انگ ۾ ڪامياب حاصل ڪئي آهي، ڇاڪاڻ ته ان کان اڳ عورت اميدوار تمام گهڻو گهٽ هيون پر هاڻوڪي چونڊن کانپوءِ برطانيا ۾ عورت اميدوارن جي انگ ۾ اضافو ٿي ويو آهي.جئين ته برطانيا ۾ٿيل چونڊن ۾ ڪنزرويٽو پارٽي اڪثريت حاصل ڪئي آهي پر حڪومت ٺاهڻ لاءِ کيس 326  سيٽنن جي ضرورت آهي پر ڪنزرويٽو پارٽي صرف 318 سيٽون کڻي سگهي آهي.

جڏهن ته ليبر پارٽي سان تعلق رکندڙ 8 پاڪستاني نسل برطانوي شهرين سميت 111 اميدوار به ڪامياب قرار ڏنا ويا آهي، برطانيا ۾ 650 سيٽن تي چونڊون ٿيون هيون جن مان 3 هزار کان وڌيڪ اميدوارن حصو ورتو هو، جنهن ۾ 30 پاڪستاني نسل جا برطانوي شهري به شامل هئا، جن مان 11 پاڪستاني نسل جي برطانوي شهرين ڪاميابي ماڻي آهي.  جيڪي پاڪستاني نسل برطانوي شهري اميدوار ڪامياب ٿيا آهن انهن ۾ پنج عورتون به شامل آهن. برطانوي چونڊين ۾ جيڪي پاڪستاني نسل جي برطانوي شهري اميدوار ڪامياب ٿيا  آهن انهن مان اميدوار ليبر پارٽي  جا آهن.  جڏهن ته ٽن جو تعلق ڪنزويٽو پارٽي سان آهي. نصرت، رحمان چشتي ۽ ساجد جاويد  به پاڪستاني نسل برطانوي شهرين ۾ شامل آهن جن جو تعلق ڪنزرويٽو پارٽي سان آهي.  جڏهن ته فيصل رشيد، شبانه محمود، افضل خان، عمران حسين، ناز شاهه، خالد محمود، روزينا الين خان  ۽ ياسمين قريشي جو تعلق وري ليبر پارٽي سان آهي.

جيڪڏهن ڏٺو وڃي ته هن ڀيري برطانيا اندر ڪنزرويٽو پارٽي  ۽ ليبر پارٽي ۾ چوٽي جو مقابلو ٿيو آهي، جيئن ته هن ڀيري برطانيا اندر ڪا به پارٽي اڪثريت نه ماڻي سگهي آهي، جيڪڏهن ڪنزرويٽو پارٽي گهربل سيٽون کڻڻ ۾ ڪامياب ٿي وڃي ها ته برطانيا اندر بنا اتحاد جي حڪومت ٺاهي سگهي پئي پر هن  ڀيري  برطانيا اندر حالتون تبديل ٿي چڪيون آهي، ڇاڪاڻ ته ماضي ۾ هڪ ته يورپي يونين کان ڌار ٿيڻ جو فيصلو ڪيو ويو هو، ٻيو ته دهشتگردي جا واقعا به ڪنزرويٽو پارٽي جي حڪومت ۾ تمام گهڻا پيش اچي رهيا هئا جيڪي اڄ به جاري ۽ ساري آهن. جيڪڏهن ڏٺو وڃي ته برطانوي وزيراعظم ٿريسامي جي يونسنسٽ پارٽي سان اتحاد ڪري ٿي ته  پوءِ  سندس پارٽي جون سيٽون 329 تائين پهچي وينديون  ۽ هو  آساني سان حڪومت ٺاهي سگهي ٿي،

ليبر پارٽي جڏهن ويلز ۽ اسڪاٽ لينڊ ۾ 29 واڌو سيٽون کنيون هيون ته ان وقت چيو ويو ته اقليتي حڪومت ڪڏهن نه ٺاهي ويندي، بهرحال هن وقت ڪنزرويٽو پارٽي  کي سرسي حاصل آهي.  جيڪڏهن ايس اين پي، لبر ڊيمڪوريٽس، گرين پارٽي ۽ پلائيڊ ڪيمري جي اتحاد ۾ شامل ٿي وڃن ٿيون ته پوءِ  لبير پارٽيون جون ٽوٽل سيٽون 313  ٿينديون جنهن سبب ليبر پارٽي ڪنهن به صورت ۾ برطانيا اندر   حڪومت  ٺاهي نه ٿي سگهي، باقي رهي ڳالهه ڪنزرويٽو پارٽي جي ته  اها پارٽي هن وقت به اڪثريت ۾ آهي ۽ ان حوالي سان  برطانوي وزيراعظم ٿريسامي بڪنگهم  پيلس ۾  راڻي سان ملاقات ڪئي ۽  اهو  پنهنجي عوام سان واعدو به ڪيو آهي ته هو برطانيا کي يورپي يونين کان نجات ڏياريندي.

بهرحال هن وقت سڀ کان وڏو چيلنج  ڪنزرويٽو پارٽي لاءِ  يونسنسٽ پارٽي جي حمايت کانپوءِ پيدا ٿيل صورتحال آهي، ڇاڪاڻ ته   بڪنگهم پيلس ۾ راڻي  سان ملاقات کانپوءِ هن تمام وڏا واعدا ڪيا آهن ته هو عوام  جي تحفظ کي يقيني بڻائيندي ۽ يورپي يونين کان به ڇوٽڪارو حاصل ڪيو ويندو.  هاڻ ڏسڻو اهو آهي ته آخر ڪهڙي ريت ڪنزويٽو پارٽي حڪومت ٺاهي عوام جي مسئلن کي حل ڪندي  پر  برطانيا جي هاڻوڪي چونڊين ۾ هڪ  ڳالهه ته واضع ٿي وئي  آهي ته  برطانيا ۾ به  هاڻ ٻين ملڪن وانگر ڪا پارٽي اڪثريت ۾ ڪامياب نه ٿي سگهندي.

هاڻوڪي چونڊن  بعد برطانيا اندر انهن انتهاپسندن کي به شڪت ملي آهي جيڪي برطانيا اندر مذهبن جي نالي تي دهشتگردي پکيڙي رهيا آهن، جڏهن آمريڪا ۾ صدارتي چونڊون ٿيون هيون ته ان وقت ماحول  ڪافي مختلف هيو ڇاڪاڻ ته اتي  ڊونلڊ ٽرمپ مسلمانن تي پابندي لڳائڻ سان گڏ  اهڙا اعلان ڪري رهيو  هو جنهن سان اتان جي عوام کانئنس پريشان ٿي وئي  هئي. هون ءَ ته برطانوي چونڊن ۾ کوڙ ساري پارٽين چونڊن ۾  حصو ورتو آهي، جڏهن  برطانوي ٿريسامي دهشتگردي بعد چونڊن جو اعلان ڪيو هو ته ان وقت چيو پئي ويو ته هن ڀيري به اها ئي پارٽي ڪامياب ٿيندي ڇاڪاڻ ته دهشتگردي خلاف جيڪي به ٿريسامي طرفان اعلان ڪيا ويا انهن مان اتان جي عوام مطئمن نظر اچي رهي  هئي. بهرحال دهشتگردي سبب برطانيا اندر مسلمان خلاف جيڪي نفرت پيدا ڪرڻ جي ڪوشش ڪئي وئي هئي، اها ناڪام ٿي پر آمريڪا اندر جيڪو ڪجهه ٿيو اهو تمام گهڻو ڏکوئيندڙ هو، هن ڀيري  ماضي جي ڀيٽ ڪيترن ئي مسلمان اميدوارن به برطانيا ۾ چونڊن دوران ڪاميابي ماڻي آهي ۽ مسلمان اميدوارن جي ڪاميابي کانپوءِ  برطانيا اندر اهو تاثر ختم ٿيڻ لڳو آهي ته برطانيا اندر صرف مسلمان ئي دهشتگردي ڪري رهيا آهن، برطانوي وزيراعظم ٿريسامي چيو آهي ته هو ڊي يو پي سان گڏجي مضبوط حڪومت ٺاهيندا  ۽ عوام جي خدمت ڪندا

sahibalisindhi@gmail.com

 

 

هڪ سوال …

گذريل اربع ڏينهن پاناما پيپرز ڪيس جي جاچ ڪندڙ گڏيل جاچ ٽيم ۾ پيشي کانپوءِ جوڊيشل اڪيڊمي ٻاهران صحافين سان ڳالهائيندي  ملڪ جي وزير اعظم ميان نواز شريف جي نياڻي مريم نواز شريف چيو ته جي آءِ ٽي ۾ اٽڪل 2 ڪلاڪ جي پيشي دوران هنن جيڪو مون کان پڇيو مون ان جو جواب ڏنو، پنهنجي والد، پنهنجي چاچي ۽ پنهنجي ڀائرن جي پيشين کانپوءِ باوجود ان جي ته سپريم ڪورٽ جي حڪم ۾ منهنجو نالو نه هو پر اڄ آئون هتي آهيان. درخواستگذار مون تي جيڪي به الزام هنيا وزيراعظم جي زيرڪفالت هجڻ يا ڪو لاڀ پرائڻ جو انهن مان ڪو به ثابت ناهي ٿي سگهيو.  مون جي آءِ ٽي وارن کان آخر ۾ پڇيو ته توهان مون کان جيڪو ڪجهه پڇيو منهنجي ڪوشش هئي ته آئون ايمانداري سان سوالن جا جواب ڏيان پر هڪ سوال منهنجو به آهي ته مون تي الزام ڪهڙو آهي پر هنن وٽ ان جو ڪو به جواب نه هو. هي دنيا جي پهرين جي آءِ ٽي آهي جيڪا ٺهي پهرين آهي ۽ الزام هاڻي ڳولي رهي آهي، اهو ئي سوال منهنجي ڀائرن پڇيو پر انهن وٽ ڪو جواب نه آهي، مون کي خوشي آهي ته وزيراعظم نواز شريف جي لاءِ ان کان وڌيڪ فخر ٻيو ڪهڙو ٿي سگهي ٿو جو الزام هڻندڙن جيڪي الزام هنيا آهن اهي ذاتي ڪاروبار بابت آهن ۽ اهي انهن ڏهاڪن سان لاڳاپيل آهن ٽن دورن ۾ هڪ پائي جي ڪرپشن جي ته پري جي ڳالهه آهي پر هن دور ۾ هڪ الزام به لڳائي نه ٿو سگهجي. ان کان وڌيڪ مسلم ليگ (ن)، وزيراعظم ۽ ان جي خاندان جي لاءِ فخر جي ڳالهه ڪهڙي ٿي سگهي ٿي. خانداني ڪاروبار جي حوالي سندس موقف هو ته 60ع، 70ع ۽ 80ع جي ڏهاڪن ۾ خاندان جو ڪاروبار هو، ان ۾ هڪ به سرڪاري رپيو شامل نه هو جو ان جو جواب ڏيڻو پوي. ذاتي ڪاروبار بابت نه ته سوال ٺهي ٿو ۽ نه ئي وري جواب ڏيڻ ٺهي ٿو. ان ڏس ۾ هڪ پئسي جي ڪرپشن يا مني لانڊرنگ يا ڪميشن کي سامهون نه ٿو آڻي سگهجي، ڇو ته ان جو ڪو وجود ئي نه آهي. اسان جي ذمي عوام جو هڪ رپيو به قرض نه آهي، جن تي عوام جا پئسا لٽائڻ جا ڪيسز آهن انهن عدالت کان منع نامو وٺي ورتو آهي.

مون کي ڇا ان ڳالهه جو جواب ملندو ته جن ماڻهن جو سواءِ گهري کائڻ کانسواءِ ٻيو ڪو به ڪاروبار ۽ آمدني جو ذريعو نه آهي اهو شخص چوي ٿو ته آئون هنن کي روئاريندس پر هو ٻڌي وٺي ته روئڻ ۽ جهڪائڻ جي طاقت صرف الله تعاليٰ وٽ آهي ڪنهن انسان وٽ نه آهي، ڪنهن انسان جي اها حيثيت ۽ اوقات نه آهي جو هو ڪنهن کي جهڪائي ڇڏي، اسان جو حڪمران خاندان سان تعلق آهي، پاناما ليڪس پهرين ليڪس نه آهي جنهن ۾ مون کي ملوث ڪيو ويو آهي پر ان کان اڳ ڊان ليڪس به آئي ان ۾ به مون کي ملوث ڪرڻ جي ڪوشش ڪئي وئي، سبب صرف هڪ آهي ته پيءُ کي ڌيءَ جو نالو استعمال ۾ آڻي دٻاءُ ۾ آڻي سگهجي، سڀني کي خبر آهي ته اسلامي ۽ مشرقي روايتن ۾ هڪ ڌيءَ والد جي تمام گهڻو ويجهي هوندي آهي ۽ اهو نرم ترين حصو جيڪڏهن والد جي دل ۾ هجي ته اهو فاطمته الزهره وانگر هوندو آهي جيڪڏهن هو علم کڻي ميدان ۾ اچي وڃي ته اهو بيبي زينب عه وانگر هوندو آهي، نواز شريف جي ڌيءَ کي ان جو ڪمزوري سمجهندڙ انشاءَ الله ان کي طاقت سمجهندا،جيڪڏهن ڪير ائين سجهي ٿو ته ڌيئرن کي ائين شامل ڪري هو وزيراعظم نواز شريف کي ڪنهن امتحان ۾ وجهندا ته اهي ٻڌي ڇڏين ته آئون ان شخص جي ڌيءَ آهيان جنهن پنهنجي حق لاءِ بيهڻ سيکاريو آهي ۽ جنهن مون کي تربيت ڏني آهي ته ڪوڙ ۽ ظلم جي آڏو ڪنڌ ناهي جهڪائڻو پر اها ڳالهه اهي ماڻهو نه ٿا سمجهن جن کي ڌيئرن جو قدر نه آهي، جن کي ڌيئرن جي تڪليف ۽ احترام جو احساس نه آهي، جن کي خانداني قدرن جو پتو نه آهي. اسان به فني سببن ۽ استثنيٰ جو سهارو وٺي اقتدار جي ايوان ۾ لڪي ٿي سگهياسين پر ائين نه ڪيو، هاڻي سوال اهو آهي ته پهرين جي آءِ ٽي تي خدشا ظاهر ڪيا ويا هاڻي وري بقول مريم نواز شريف موجب ته هڪ سوال منهنجو به آهي پر ان جو جواب کيس اڃان تائين ناهي ملي سگهيو ڇا ان سوال جو جواب کيس ملندو. اهو وقت ئي ٻڌائي سگهي ٿو، ان ڪري جي آءِ ٽي جي فيصلو جو انتظار ڪرڻ ئي بهتر هوندو.