تازيون خبرون

Monthly Archives: July 2017

پ پ بعد ن ليگ جو به وزير اعظم گهر ڀيڙو، سپريم ڪورٽ نواز شريف کي تاحيات نااهل قرار ڏئي ڇڏيو

اسلام آباد (ويب ڊيسڪ): سپريم ڪورٽ پاناما ليڪس ڪيس ۾ وزيراعظم نواز  شريف ۽ اسحاق ڊار کي کي نااهل قرار ڏيندي شريف خاندان خلاف ڪيس احتساب عدالت ۾ هلائڻ جو حڪم ڏئي ڇڏيو آهي. سپريم ڪورٽ جي  لارجر بئنچ پاناما ليڪس ڪيس جو فيصلو ٻڌائي وزيراعظم نواز شريف ۽ اسحاق ڊار کي نااهل قرار ڏئي ڇڏيو آهي. سپريم ڪورٽ جي پنجن ئي ججن وزيراعظم نواز شريف ۽ اسحاق ڊار کي متفق فيصلي سان نااهل قرار ڏنو. سپريم ڪورٽ مريم نواز، حسن، حسين نواز  ۽ ڪيپٽن صفدر خلاف احتساب عدالت ۾ 6 هفتن اندر ريفرنس موڪلڻ جو حڪم ڏنو.  سپريم ڪورٽ پنهنجي فيصلي ۾ چيو ته وزيراعظم نواز شريف ايف زيڊ ڪمپني لڪائي، جڏهن ته پنهنجا اثاثا ثابت ڪرڻ ۾ ناڪام ٿيو. عدالتي فيصلي ۾ چيو ويو ته اليڪشن ڪميشن وزيراعظم نااهلي جو نوٽيفيڪشن جاري ڪري ۽ صدر نئين وزيراعظم جي چونڊ لاءِ انتظام ڪيا وڃن.سپريم ڪورٽ پنهنجي لکت فيصلي ۾ چيو ته  نيب راولپنڊي جي احتساب عدالت ۾ 6 هفتن اندر ريفرنس داخل ڪري. لکت فيصلي ۾ چيو ويو ته جي آءِ ٽي طرفان جمع ڪيل مواد جي روشني ۾ ريفرنس داخل ڪيو وڃي. سپريم ڪورٽ پنهنجي فيصلي ۾ چيو ته  گڏيل قانوني مشاورت کانپوءِ حاصل ڪيل مواد کي به نظر رکيو وڃي. سپريم ڪورٽ جي فيصلي موجب نواز شريف، حسين، حسن ۽ ڪئپٽن صفدر خلاف ريفرنس داخل ڪيو وڃي. فيصلي ۾ چيو ويو ته عدالتي حڪم تي عملدرآمد جي نگراني لاءِ هڪ جج کي نامزد ڪيو وڃي.لکت فيصلي ۾ چيو ويو ته وزيراعظم صادق ۽ امين نه رهيو آهي. پاناما ليڪس جي فيصلي جي موقعي تي سپريم ڪورٽ ٻاهران حفاظتي انتظام سخت ڪيا ويا . سپريم ڪورٽ ڏانهن ايندڙ ويندڙ رستن تي پوليس سان گڏ رينجرز ۽ ايف سي جي پڻ وڏي نفري مقرر ڪئي وئي آهي. پ پ، تحريڪ انصاف، جماعت اسلامي سميت اهم سياسي پارٽين جا اڳواڻ فيصلو ٻڌڻ لاءِ سپريم ڪورٽ پهتل هئا. سڌ سماءَ واري ممڪلتي وزير مريم اورنگزيب ۽ ٻيا حڪومتي وزير توڙي عهديدار به سپريم ڪورٽ ۾ موجود پهتا. فيصلي کانپوءِ تحريڪ انصاف جي ڪارڪنن سجدا ڪيا ۽ مٺائي ورهائي.

ڪابينا ٽٽي وئي، نواز شريف طرفان وزيراعظم جو عهدو ڇڏڻ جو اعلان

اسلام آباد (اين اين آءِ) نون ليگ چيو آهي ته محمد نوازشريف بطور وزيراعظم پنهنجي ذميوارن کان فارغ ٿي ويو آهي. پٽيشن داخل ڪرڻ کان وٺي فيصلي تائين مختلف مرحلن تي سخت خدشن باوجود ان فيصلي تي عملدرآمد  ڪيو ويندو، فيصلي جي باري ۾ پنهنجي سخت خدشن جي حوالي سان سمورا آئيني ۽ قانوني آپشن استعمال ڪيا ويندا،. منصفاڻي ٽريل جي آئيني ۽ قانوني تقاضا بري طرح پامال ڪياويا ، اسان سان ناانصافي ٿي آهي. ان فيصلي تي تاريخ جو فيصلو ئي اصل فيصلو هوندو، انشاءَ الله محمد نوازشريف الله ۽ عوام جي عدالت ۾ سرخرو ٿيندو. جمعي تي پاڪستان مسلم ليگ نون جي ترجمان سپريم ڪورٽ جي فيصلي تي ردعمل جو اظهار ڪندي چيو ته پٽيشن داخل ڪرڻ سان فيصلي تائين مختلف مرحلن تي سخت خدشن جي باوجود ان فيصلي تي عملدرآمد ڪيو ويندو. فيصلي کان پوءِ نوازشريف بطور وزيراعظم پنهنجي ذميوارن کان فارغ ٿي ويو آهي. هن چيو ته عدالتي عمل دوران اهڙا مثال قائم ڪيا آهن جنهنجو ماضيءَ جي ستر سالن جي تاريخ ۾ مثال نه ٿو ملي. وزيراعظم نوازشريف جي وڃڻ کانپوءِ وفاقي ڪابينا به ٽٽي وئي. جمعي تي سپريم ڪورٽ پاناما ڪيس جي فيصلي کانپوءِ وزيراعظم نوازشريف کي عهدي تان فارغ ڪري ڇڏيو جنهن کان پوءِ ڪابينا به ٽٽي وئي انکان اڳ نون ليگ جي ترجمان پنهنجي بيان ۾ چيو ته پٽيشن داخل ڪرڻ جي فيصلي تائين مختلف مرحلن تي سخت خدشا هيا، خدشن جي باوجود فيصلي تي عمل ٿيندو. اليڪشن ڪميشن  پاران نوازشريف جي رڪنيت معطل ٿيڻ جو نوٽفڪيشن جاري رٿيڻ کانپوءِ صدر ممنون حسين نئين قائدايوان جي چونڊ لاءِ اسيمبلي جو اجلاس گھرائيندو، سپريم ڪورٽ جي فيصلي کانپوءِ نوازشريف هاڻي پنهنجي پارٽيءَ جو صدر به ٿو رهي سگھي. پوليٽيڪل پارٽيز آرڊر 2002 جي تحت اسيمبلي رڪنيت مان نااهل ٿيندڙ شخص پارٽيءَ جو عهدو رکڻ جي به اهل نه هوندو آهي.

 

نواز شريف چوٿون ڀيرو وزيراعظم ٿيندو، عدالتي فيصلي تي افسوس آهي: مريم اورنگزيب

اسلام آباد( ويب ڊيسڪ ) سڌ سماءَ واري ممڪلتي وزير مريم اورنگزيب چيو آهي ته سپريم ڪورٽ جي فيصلي تي افسوس ٿيو آهي، ڪجهه فيصلا عدالتن ۽ ڪجهه وري تاريخ ۾ ٿيندا آهن. سپريم ڪورٽ ٻاهران ميڊيا سان ڳالهائيندي مريم اورنگزيب چيو ته اڄوڪي فيصلي تي کين ڪابه حيرت نه ٿي آهي. هن چيو ته اڄ ظاهري طور کين شڪست ملي آهي، ڪيس ۾ نواز شريف تي ڪابه ڪرپشن ثابت نه ٿي آهي. سندس چوڻ هو ته پاڪستان ۾ سڀ کان وڌيڪ ڪارڪن مسلم ليگ ن جا آهن، مسلم ليگ ن سڀ کان وڏي پارٽي آهي. مريم اورنگزيب چيو ته جڏهن ته نواز شريف کي سياسي منظر تان هٽايو ويو ته  هو وڌيڪ ووٽ کڻي ڪامياب ٿيو آهي. هن چيو ته نواز شريف چوٿون ڀيرو ملڪ جو وزيراعظم بڻجندو، کيس ڪرسي جي ضرورت ناهي. سندس چوڻ هو ته نواز شريف کي ڪنهن به صورت ۾ عوامي خدمت کان روڪي نه ٿو سگهجي. مريم اورنگزيب چيو ته سپريم ڪورٽ جي فيصلي تي آئيني ماهرن سان صلاح مشورا ڪيا ويندا. هن چيو ته وزيراعظم ڪير به هجي پر عوام جي دلين جو وزيراعظم نواز شريف هوندو. سندس چوڻ هو ته مسلم ليگ ن جلد مشورو ڪري مستقبل جي حڪمت عملي جو اعلان ڪندي ۽ عوام ساڻن گڏ هوندو. مريم اورنگزيب چيو ته عوام جي دلين جو وزيراعظم اڃا به نواز شريف آهي.

 

برطانيا ۾ شريف خاندان جا اثاثا پاڪستان کي واپس ڪيا وڃن: ٽرانسپيرنسي انٽرنيشنل

لنڊن (ويب ڊيسڪ): پاناما ڪيس ۾ سپريم ڪورٽ طرفان ميان نواز شريف کي نااهل قرار ڏيڻ بعد ٽرانسپيرنسي انٽرنيشنل برطانيه به هڪ بيان جاري ڪيو آهي، جنهن ۾ چيو ويو آهي ته برطانيا ۾ شريف خاندان جي اثاثن جي ڇنڊ ڇاڻ ڪئي وڃي ۽ انهن کي پاڪستان کي واپس موٽائڻ جو انتظام ڪيو وڃي، ٽرانسپيرنسي انٽرنيشنل برطانيا جي ڊائريڪٽر آف پاليسي ڊنڪن هيمس پنهنجي تازي بيان ۾ ميان نواز شريف جي نااهلي تي اداري جو باضابطه ردعمل ڏيندي چيو آهي ته پرڏيهي ملڪن مان لٽيل دولت سان برطانيا ۾ بڻايل اثاثن کي انهن ملڪن جي ماڻهن کي واپس موٽائڻ لاءِ فوري ڪارروائي ڪئي وڃي، جيستائين برطانوي حڪومت ان ڪم لاءِ سمورا ضروري قدم نه کڻندي تيستائين انهن جو ملڪ سڄي دنيا مان آندل غليظ دولت جمع ڪرڻ وارن جو محفوظ ٺڪاڻو بڻيل رهندو، ٽرانسپيرنسي انٽرنيشنل پنهنجي بيان ۾ 2016 جي لنڊن اينٽي ڪرپشن سمٽ جو حوالو ڏيندي چيو ته ان اجلاس ۾ پاڻ برطانوي حڪومت چيو هيو ته پرڏيهي ڪمپنين جي اصل مالڪن جو باقاعده ۽ قانوني رڪارڊ رکيو ويندو ۽ ان مقصد لاءِ ضروري قانون سازي به هڪ سال ۾ مڪمل ڪئي ويندي پر برطانيه جي حڪومت ان سلسلي ۾ اڃا تائين ڪجهه به ناهي ڪيو.

 

سپريم ڪورٽ جو فيصلو ڪرپشن ختم ڪرڻ ۾ اهم ثابت ٿيندو: بلاول ڀٽو

ڪراچي (ويب ڊيسڪ): پيپلز پارٽي چيئرمين بلاول ڀٽو زرداري چيو آهي ته پيپلز پارٽي هيمشه پارليامينٽ، جمهوريت ۽ ادارن جي حمايت ڪئي آهي، پريس ڪانفرنس ڪندي بلاول ڀٽو زرداري چيو ته سپريم ڪورٽ جو فيصلو ڪرپشن ختم ڪرڻ ۾ اهم ثابت ٿيندو، پيپلز پارٽي هر ڪنهن جي احتساب جو مطالبو ڪري ٿي، هن چيو ته اهو فيصلو ملڪ جي فائدي ۾ ويندو، پيپلز پارٽي پاناما جي معاملي کي کنيو هيو، اسان هر صورتحال لاءِ تيار آهيون، شهيد محترمه بينظير ڀٽو چيو هيو ته نواز شريف هڪ ڏينهن روئندو، سپريم ڪورٽ جي فيصلي جي آجيان ڪريون ٿا، سپريم ڪورٽ جو فيصلو ڪنهن جو ذاتي ناهي، ملڪ جي فائدي ۾ آهي، پيپلز پارٽي چاهي ٿي اسيمبليون پنهنجي مدت پوري ڪن، پاناما معاملي تي اسان جي حڪمت عملي ڪجهه مختلف هئي، اڳوڻي وزيراعظم پارليامينٽ کي اهميت نه ڏني، پيپلز پارٽي هڪ نظرياتي پارٽي آهي، هڪ نظريي تي هلندي آهي، اي سي ايل جو قانون سڀني تي لاڳو ٿيڻ گهرجي، سياسي جماعتن کي گهرجي 62 ۽ 63 جي حوالي سان فيصلا قبول ڪن.

 

اليڪشن ڪميشن نواز شريف جي اسيمبلي رڪنيت ختم ڪرڻ جو نوٽيفڪيشن جاري ڪري ڇڏيو

اسلام آباد (ويب ڊيسڪ): اليڪشن ڪميشن نواز شريف جي اسيمبلي رڪنيت ختم ڪرڻ جو نوٽيفڪيشن جاري ڪري ڇڏيو، اليڪشن ڪميشن چيو آهي ته نوٽيفڪيشن سپريم ڪورٽ جي فيصلي جي روشني ۾ جاري ڪيو ويو، نوٽيفڪيشن ۾ ڄاڻايو ويو آهي ته نواز شريف جي قومي اسيمبلي جي رڪنيت مسوخ ڪئي وڃي ٿي، نوٽيفڪيشن موجب نواز شريف جي قومي اسيمبلي جي تڪ اين اي 120 جي رڪنيت منسوخ ڪئي وئي.

 

قرباني کان اڳ قرباني ٿي وئي ۽ پياري پياري ٿي آهي: شيخ رشيد

راولپنڊي  (اين اين آءِ) عوامي مسلم ليگ جي سربراهه شيخ رشيد چيو آهي ته الله منهنجي لڄ رکي، پاڪستان ۾ سرخرو ٿيس، قوم کي مبارڪ ڏيان ٿو، لال حويلي جي ٻاهران ميڊيا سان ڳالهائيندي هن چيو ته هڪ سال اڳ به نواز شريف کي چيو هو ته استعيفيٰ ڏيو، قوم جي عزت کي پنهنجي اقتدار تي ترجيح ڏيو نه ته اقتدار به ويندو ۽ عزت به، پر هن منهنجي ڳالهه نه مڃي ۽ پنهنجي مرحوم والد کي به سپريم ڪورٽ ۾ گهيليو پوءِ به تاحيات نااهل ٿي ويو، هن چيو ته پيٽروليم واري وزير کي چيو هو ته وقت اچڻ تي مان توهان کي قانون جي ڪٽهڙي ۾ بيهاريندس توهان ايل اين جي تي 15 سال ڪانٽريڪٽ ڪري اربين رپين جي ڪرپشن ڪئي، جيئن وزيراعظم کي نااهل ڪرايو هاڻ ايل اين جي تي ڦر ٿيل پيسا واپس ڪرائي ڏيکاريندس، هن چيو ته چوڌري نثار هوشيار ماڻهو آ هي پر گذريل ڏينهن جي پريس ڪانفرنس کانپوءِ مون ان کي چيو هو ته سڀاڻي توهان وزير ئي نه ناهي رهڻو ته پوءِ استعيفيٰ ڪهڙي عهدي تان ڏيندي، هاڻ توهان به پنهنجي استعيفيٰ پاڻ وٽ رکو.

 

پانامه بابت سپريم ڪورٽ جي پهرين فيصلي تي ئي وزير اعظم کي اخلاقي طور استعفيٰ ڏيڻ گھرجي ها: ناصر شاهه

ٺٽو (ڊ.ر) صوبائي وزير اطلاعات، آمدرفت، ليبر سيد ناصر حسين شاه چيو آهي ته پانامه ڪيس بابت سپريم ڪورٽ جو جڏهن پهرين فيصلو آيو هو ته وزير اعظم کي اخلاقي طور تي تڏهن ئي استعفيٰ ڏيڻ گھرجي ها پر سندس مشيرن کيس غلط مشورا ڏنا نتيجي ۾ اڄ سپريم ڪورٽ جي پنجن ئي ججن پاران کيس نا اهل قرار ڏيندي سندس خلاف مقدمو داخل ڪرڻ جو حڪم ڏنو آهي. صوبائي وزير چيو ته پانامه ڪيس بابت سپريم ڪورٽ جي فيصلي تي هاڻ عمل ٿيڻ گھرجي ۽ ميان نواز شريف کي وزير اعظم جي عهدي تان فوري طور تي استعفيٰ ڏيڻ گھرجي. صوبائي وزير چيو ته پيپلز پارٽي جي اعليٰ قيادت ۽ سنڌ حڪومت پاران ڌاٻيجي ۾ جلد اڪانامڪ زون تحت ڪيترين ئي صنعتن جو ڄار وڇايو ويندو جنهن تحت مقامي ماڻهن کي ترجيحي بنيادن تي روزگار جا موقعا فراهم ڪيا ويندا ۽ هتان جي ماڻهن کي ٽيڪنيڪل عهدن تي مقرر ڪرڻ لاءِ پڻ کين تربيب ۽ سکيا ڏني ويندي ته جيئن هتان جا ماڻهو فيڪٽرين ۾ اعليٰ عهدن تي مقرر ٿي سگھن. اهڙين ڳالهين جو اظهار اڄ هن ٺٽي ضلعي جي ساحلي پٽي واري علائقي دريا پير ۾ ساحل ويلفيئر ٽرسٽ پاران قائم ڪيل فري جنرل ميڊيڪل ڪيمپ جي افتتاحي تقريب بعد ميڊيا جي نمائندن سان ڳالهائيندي ڪيو. صوبائي وزير اطلاعات پانامه ڪيس بابت ڳالهائيندي چيو ته ملڪ جي وزير اعظم جو عهدو اهم عهدو آهي پر نواز شريف کي سندس مشيرن غلط صلاحون ۽ مشورا ڏئي کيس آخرڪار سپريم ڪورٽ کان نااهل قرار ڏياريو. هن چيو ته ڪوبه ماڻهو قانون کان بالاتر نه آهي ۽ هن فيصلي سان مستقبل ۾ جيڪڏهن ڪوبه وڏو ماڻهوڪرپشن ۾ ملوث  ڏٺو ويو ته اهو قانون جي اهڙن فيصلن کان نٿو بڇي سگھي. ان کان اڳ تقريب کي خطاب ڪندي صوبائي وزير چيو ته ڌاٻيجي جي اڪانامڪ زون ۾ جيڪي به صنعتڪار صنعتون لڳائيندا انهن سان سنڌ حڪومت معاهدي تحت وڌ کان وڌ مقامي بيروزگارن کي روزگار ڏيڻ لاءِ زور ڀريندي. صوبائي وزير اطلاعات چيو ته حڪومت سنڌ ۽ پاڪستان پيپز پارٽي عوامي خدمت ۾ يقين رکي ٿي ان تحت ٺٽي جي ساحلي علائقن ۾ نوان ترقياتي منصوبا شروع ڪيا ويندا جنهن سان هتان جي ماڻهن جي زندگي بدلجي ويندي. هن چيو ته ساحل ويلفيئر ٽرسٽ جو صحت، تعليم، ماهيگيري ۽ ٻين شعبن ۾ ڪيل خدمتون تعريف جوڳيون آهن ۽ هو کين سنڌ حڪومت ۽ ذاتي طور تي ساحلي علائقي ۾ ساحل ويلفيئر اسپتال جي قيام لاءِ ڀرپور سهڪار ڪندو. هن چيو ته ساحلي پٽي جي ماهيگيرن کان ٻيڻي فيس ورتي وڃي ٿي ان لاءِ پڻ سنڌ حڪومت هڪ فيس معاف ڪرڻ جو فيصلو ڪيو آهي. هن وڌيڪ چيو ته پيپلز پارٽي چيئرمين بلاول ڀٽو زرداري، ڪو چيئرمين آصف علي زرداري، وزير اعليٰ سنڌ سيد مراد علي شاه ۽ فريال ٽالپر صاحبه جي قيادت ۾ ساحلي علائقي جي ترقيءَ لاءِ ڪوسٽل هاءِ وي جي رهيل ڪم جي جلد ٻيهر تعمير ۽ ٻين ڪيترن ئي منصوبن جو پڻ جلد آغاز ڪيو ويندو. ان موقعي تي پريس ڪلب ڌاٻيجي لاءِ صوبائي وزير اطلاعات سيد ناصر حسين شاه پاران هڪ لک روپيه امداد جو پڻ اعلان ڪيو. تقريب دوران چيئرمين ضلع ڪائونسل سجاول حاجي محمد عثمان جلباڻي، چيئرمين ساحل ويلفيئر ٽرسٽ ڊاڪٽر افضل آرائين ۽ ٻين پڻ خطاب ڪيو.

 

يوم تشڪر ملهائڻ جو اعلان، نواز شريف سان شروع ٿي وئي، هاڻي وڏن ڦورن جو وارو اچڻ وارو آهي: عمران خان

اسلام آباد (اين اين آءِ) پي ٽي آءِ جي سربراهه عمران خان سڀاڻي آچر تي شڪراني جو ڏهاڙو ملهائڻ جو اعلان ڪندي چيو آهي ته اڄ شروعات آهي، آئينده ٻيا به وڏا وڏا چور پڪڙيا ويندا، منهنجي نواز شريف سان ڪا به ويڙهه نه هئي، جي آءِ ٽي جا ميمبر قوم جا هيرو آهن، عدالت کي خراج تحسين پيش ڪريان ٿو، عدالت چاهي ته طاقتور جو به احتساب ٿي سگهي ٿو، ڪارڪن پرامن رهن، حڪومتي وزيرن شوڪت خانم اسپتال تي حملا ڪيا جنهن سان مونکي وڌيڪ تڪليف ٿي، جمعي تي پريس ڪانفرنس کي خطاب ڪندي عمران خان چيو ته ڪوشش انسان ڪندو آهي ۽ ڪاميابي الله ڏيندو آهي، هن چيو ته 2013 ۾ جدوجهد شروع ٿي، جدوجهد پنهنجي ذات نه پر پاڪستان لاءِ ڪئي، ڏيڍ سالن کان عدالتن کان انصاف گهرندا رهياسين، هن چيو ته شريف خاندان جا اربين رپين جا محل آهن، هڪ هزار ارب ساليانو مني لانڊرنگ ذريعي پرڏيهه موڪليو ويندو آهي، پاڪستان جي تاريخ ۾ ڪڏهن به ايترو قرض نه ورتو ويو، هڪ سال ۾ 10 ارب ڊالر جو قرض ورتو ويو، هن چيو ته اسان کي پنهنجن وسلين جي حفاظت ڪرڻ گهرجي، 60 ڏينهن ۾ جي آءِ ٽي وڏو ڪم ڪيو. هن چيو ته سڄي قوم کي شڪراني جي ڏهاڙي ۾ شرڪت جي دعوت ڏيان ٿو. آچر تي اسلام آباد جي پريڊ گرائونڊ ۾ شڪراني جي ڏهاڙي جي حوالي سان جلسو ٿيندو.

 

پاناما ڪيس جو فيصلو آئين ۽ قانون جي فتح آهي، الله جو شڪر آهي سپريم ڪورٽ مان سرخرو ٿي نڪري رهيا آهيون : سراج الحق

اسلام آباد (اين اين آءِ) جماعت اسلامي جي امير سينيٽر سراج الحق چيو ته پاناما جو فيصلو آئين ۽ قانون جي فتح آهي الله جو شڪر آهي ته اسان سپريم ڪورٽ مان ڪامياب ٿي نڪري رهيا آهيون، جمعي تي سپريمڪورٽ جي فيصلي کانپوءِ ميڊيا سان ڳالهائيندي هن چيو جماعت اسلامي هميشا آئين ۽ قانون جي بالادستي لاءِ ڪوشش ڪئي ۽ پنهنجي پاناما تي درخواست کڻي سپريم ڪورٽ وياسين ۽ ڪيس جي ڀرپور پيروي ڪئي مان انهن ماڻهن جو ٿورائتو آهيان جن ڪرپشن کان فري پاڪستان بنائڻ ۾ اسانجو ساٿ ڏنو.