تازيون خبرون

Daily Archives: April 6, 2017

خيرپور ڀرسان گهر ۾ بيٺل ڪار کي باهه، 4 معصوم ٻارڙا سڙي فوت، هڪ زخمي

خيرپور  (اين اين آءِ) خيرپور ۾ خوفناڪ باهه جي واقعي ۾ 2 ٻارڙين سميت 4 گلن جهڙا معصوم ٻارڙا سڙي فوت، گهرن ۾ ڪهرام، ٻارڙن جي والدين کي بيهوشي جا دورا، قيامت صغرا جا منظر، علائقي ۾ سوڳ. رپورٽ موجب خيرپور جي بي سيڪشن ٿاڻي جي حد ڳاڙهي پل واري علائقي صبح جو سوير منظور حسين سمنگ جي گهر ۾ بيٺل ڪار کي اوچتو باهه وڪوڙي وئي، نتجي ۾ ڪار اندر راند کيڏندڙ هڪ ٻارڙي عليزه ڌيءَ لياقت سمنگ، 2 ٻارڙا وڪرام ولد عمران سمنگ، حديث ولد لياقت سمنگ موقعي تي سڙي فوت ٿي ويا جڏهن ته گنگا ڌيءَ عمران سمنگ سڙي زخمي ٿي پئي. اطلاع تي فائر برگيڊ پهچي باهه تي ضابطو آندو ۽ بعد ۾ فوتي ٻارڙن جا لاش ڪار مان ڪڍڻ بعد زخمي ٻارڙي ۽ لاشن کي سول اسپتال خيرپور آندو ويو جتان ٻارڙي کي فرسٽ ايڊ ڏئي گمبٽ جي اسپتال منتقل ڪيو ويو جتي هو زخمن جا سور نه سهندي فوت ٿي وئي. هوڏانهن پوليس ضروري قانوني ڪارروائي بعد لاش وارثن جي حوالي ڪيا 4 ئي لاش هڪ ئي گهر ۾ پهچڻ تي ڪهرام مچي ويو ۽ سندن امڙن کي بيهوشي جا دورا پئجي رهيا هئا بعد ۾ 4 ئي معصوم گلن جهڙن ٻارڙن جا لاش جنازي نماز لاءِ گهرن کان کنيا ويا ته قيامت صغرا برپا ٿي وئي ۽ علائقي ۾ سوڳ واري صورتحال ڇائنجي وئي، ٻارڙن جي جنازي نماز ڊي ايڇ او آفيس ڀرسان ادا ڪرڻ بعد کين درگاهه شهيد بادشاهه جي اباڻي قبرستان ۾ سوين آلين اکين سان مٽيءَ ماءُ حوالي ويا ٻارڙن جي جنازي نماز ۽ آخري رسمن ۾ پي پي ايم اين اي نواب خان وساڻ، جسقم اڳواڻ امجد مهيسر، ايوب لاشاري سميت سياسي سماجي شخصيتن، صحافين، وڪيلن، شهرين، پورهيتن سون جي تعداد ۾ شرڪت ڪئي ٻارڙن جي وارثن سان تعزيت جو سلسلو جاري آهي. آخري اطلاعن تائين واقعي جو ڪيس داخل ٿي نه سگهيو هو.

 

شرڌا ڪپور شڪتي ڪپور سان ڪڍرايل سيلفي انسٽاگرام تي جاري ڪري ڇڏي

ممبئي(شوبز نيوز) بالي ووڊ اداڪار شرڌا ڪپور پنهنجي پيءُ شڪتي ڪپور سان ڪڍرايل سيلفي انسٽاگرام تي جاري ڪئي آهي. ڀارتي ميڊيا موجب بالي ووڊ اداڪاره شرڌا ڪپور سماجي ويب سائيٽ ٽوئيٽر تي پنهنجي پيءُ سان گڏ ڪڍرايل سيلفي انسٽاگرام تي جاري ڪئي آهي. اداڪاره جو انسٽاگرام تي پنهنجي پيغام ۾ چيو آهي ته شڪتي ڪپور سندس پيءُ نه بلڪ سٺو دوست آهي. سندس زندگيءَ جو اهم حصو آهي. اڄ هوءَ جنهن مقام تي اهي پيءُ جي خوداعتماديءَ سبب آهي. اداڪاره جي نئين فلم ”هاف گرل فرينڊ“ آهي جيڪا 19 مئي تي سئنيما گهرن ۾ نمائش لاءِ پيش ڪئي ويندي.

 

هسپانوي ماڊل انجيلا رتيڪ روشن بابت بيانن تي معافي ورتي

نئين دهلي(شوبز نيوز) بالي ووڊ جي هسپانوي ماڊل انجيلا ڪرسٽلز هرتيڪ روشن بابت بيان تي معافي ورتي آهي. فلم قابل جي اسٽار هرتيڪ روشن سماجي ميل ميلاپ واري ويب سائيٽ ٽوئيٽر تي انجيلا جي بيانن جي ترديد ڪندي چيو ته ڊٽير ليڊي توهان ڪير آهي ۽ ڪوڙ ڇو ڳالهائي رهي آهي جنهن تي ماڊل چيو ته سر مان توهان جي تمام گهڻي عزت ڪريان

ٿي ۽ مان پنهنجي رويي تي معافي گهران ٿي. ان تي هرتيڪ روشن چيو ته سڀ ڪجهه وسري ويو آهي ۽ ماڊل جي مستقبل بابت نيڪ خواهشن جو اظهار ڪيو.

 

ٽوئرڊي سنڌ سائيڪل ريليءَ ۾ حصو وٺندڙ رانديگر ن جو خيرپور جي شاهه باءِ پاس پهچڻ تي شاندار استقبال

سکر(اسپورٽس نيوز) سنڌ جي راندين ۽ نوجوانن جي معاملن واري کاتي جي سهڪار سان 02 اپريل کان گهوٽڪي مان شروع ٿيل ٽوئرڊي سنڌ سائيڪل ريليءَ ۾ حصو وٺندڙ رانديگر ڪالهه سکر ۽ ٻٻرلوءِ باءِ پاس کان ٿيندا خيرپور جي شاهه باءِ پاس پهتا ته ضلعي انتظاميا خيرپور طرفان سندن شاندار آڌرڀاءُ ڪيو ويو. سائيڪل ريليءَ جو آڌرڀاءُ ڪرڻ وارن ۾ اسسٽنٽ ڪمشنر خيرپور اويس مشتاق، ڊسٽرڪٽ ايجوڪيشن آفيسر خيرپور غلام حيدر بلو ۽ ٻيا شامل هئا. ٻٻرلوءِ باءِ پاس وٽ سنڌ سائيڪل جي قافلي تي گلن جي ورکا ڪئي وئي واضٰح رهي ته سنڌ سائيڪل ريلي 16 اپريل تي ڪراچي پهچندي

 

ڇا هي سڀ اليڪشن تياري جو حصو آهي؟: واحد پارس هيسباڻي

سڀ ائين ٿا چون ته پاڻ وٽ هيل سياري ڪي خاص جوهر نه ڏيکاريا ۽ وقت کان اڳ ئي بنا موڪلاڻي جي روانو ٿي ويو، نه ويندي ويندي وڏڙن وارا ٻڌايل اهي آخري ست پارا پيا ۽ نه سردي ڪي ٻيا اهڙا جوهر ڏيکاريا، جيڪي يادگار بڻجي وڃن. محسوس ائين ٿي رهيو آهي ته ماڻهن جي طبيعتن جيان  هاڻي موسمن جي ٿڌاڻ به گهٽجي رهي آهي. هن ڀيري وقت کان اڳ گرمي جنهن انداز ۾ پنهنجا تيور ڏيکارڻ شروع ڪيا آهن، ان سڀني کي پريشان ڪري ڇڏيو آهي، نه ته عام طور تي ائين ٿيندو هو ته سيارو گذرڻ کانپوءِ بهار پنهنجا رنگ پسائيندي هئي پر هن ڀيري بهار به ڪي رنگ نه ڏيکاريا. جيئن پاڻ وٽ آفيشل ڊيڪورم تحت شيون ٿرو پراپر چينل وينديون آهن ۽ ڪٿي به جيڪڏهن ڪا ويهه اوڻيهه ٿيندي آهي ته ان کي ڪراس ڪرڻ جو نالو ڏنو ويندو آهي سو هن ڀيري ائين لڳي رهيو آهي ته موسم ٿرو پراپر چينل بدران ڪراس وارو انداز اختيار ڪيو آهي. سياري پنهنجي چارج بهار کي ڏيڻ بدران سڌو سنئون اونهاري کي ڏئي ڇڏي آهي. بهرحال اهي ته موسمن جا احوال آهن جيڪي پل ۾ بدلبيون ۽ پل ۾ صحيح ٿينديون رهن ٿيون ۽ ان بابت ڪجهه به نٿو چئي سگهجي. موسميات کاتي وارا جيڪي پگهار ئي ان ڪم جي کڻندا آهن ته موسمن جي گهٽ وڌائي جو جائزو وٺي قوم کي آگاهي ڏئي سگهن. اڪثر ڪري انهن کان به معاملا زور هوندا آهن ۽ برسات نه پوڻ جي اڳڪٿي برسات سان گڏ عوام وٽ پهچندي آهي ۽ ڪڏهن برسات وسڻ واري ڳالهه کانپوءِ آسمان تي هڪ ڪڪر به نه مڙندو آهي.

پاڻ وٽ هڪ پاسي موسمياتي حوالي سان گرميءَ جو زور چوٽ چڙهيل آهي ته ٻئي پاسي سياست جي ميدان ۾ به صورتحال ڪا گهڻي مختلف ناهي اُتي به گرميءَ جو درجو جيئن پوءِ تيئن وڌي رهيو آهي ۽ پاڻ جهڙن ٻُڌ سُڌ تي هلندڙ ماڻهن کي سمجهه ۾ نه پيو اچي ته نيٺ هي ڇا ٿي رهيو آهي؟ ڇو ٿي رهيو آهي؟ ۽ ڇا ٿيڻو آهي؟ هاڻي جڏهن ميان نواز شريف جي اقتدار ۾ باقي ڪو سال ڏيڍ جو عرصو مس بچيو آهي، تڏهن هن جي سرگرمي ڏسڻ وٽان آهي. پنجاب ۾ ته هي جلسن جلوسن جي حوالي سان مسلسل سرگرمِ عمل آهي پر اڄڪلهه سندس زور سنڌ طرف پڻ مڙئي ڪجهه سوايو نظر اچي رهيو آهي. مهيني سوا جي مختصر عرصي دوران هي سنڌ جا ٽي چڪر لڳائي چڪو آهي ۽ نه رڳو جذباتي قسم جون تقريرون ڪري پنهنجي حامين کان تاڙيون وڄرائي ويو آهي پر گڏوگڏ ڪجهه پرڪشش پيڪيج پڻ اعلاني ويو آهي، جن ۾ روڊ رستا، يونيورسٽيون ۽ انٽرنيشنل هوائي اڏا ٺاهڻ وغيره شامل آهن. اُها الڳ ڳالهه آهي ته سندس اقتدار جي باقي بچيل مدي دوران اُهي پيڪيج عملي صورت اختيار ڪن ٿا يا نه ۽ جيڪڏهن انهن جي شروعات ٿئي به ٿي تڏهن به پايه تڪميل تي پهچن ٿا يا روايتي سرڪاري پيڪيجن وانگر اڌ ۾ رُلي تباهه ٿي وڃن ٿا. ميان صاحب دعويٰ ڪري ويو آهي ته ايندڙ اليڪشن ۾ هيءَ ئي ڪامياب ٿيندو ۽ سنڌ ۾ سندس پارٽي جي حڪومت ئي جڙندي. ڪيترائي سياستدان هن سان رابطي ۾ آهن ۽ سندس پارٽيءَ ۾ اچڻ جا خواهشمند آهن. هن معاملي جو دلچسپ پاسو هيءَ آهي ته هڪڙي ڏينهن ميان صاحب حيدرآباد ۾ اهڙي قسم جون دعوائون ڪري وڃي ٿو ته ٻئي ڏينهن وري سندس پارٽيءَ جو صوبائي صدر اسماعيل راهو استعيفيٰ ڏئي ڇڏي ٿو. ان سلسلي ۾ هڪڙي صحافي دوست ڏاڍو دلچسپ تبصرو ڪيو ته نوان ماڻهو اچڻ ته گهڻي پوءِ جي ڳالهه آهي پهريان ميان صاحب پنهنجا ماڻهو ته سنڀالي.

جيڪا سرگرمي ميان صاحب سنڌ ۾ ڏيکاري رهيو آهي اُن ساڳي سرگرمي سان وري پيپلزپارٽي پنجاب ۾ لٿل آهي ۽ لڳ ڀڳ اهي ساڳيون دعوائون ئي ڪري رهي آهي پر پنجاب ۾ سندس جيڪا پوزيشن آهي اُها ڪنهن کان لڪل ڍڪيل ناهي، اتي هن کي پنهنجا پير کوڙڻ لاءِ تمام گهڻي محنت جي ضرورت آهي. عمران خان ٽائيپ ماڻهو وري هن سموري معاملي کي ”ڊيل“ جو نالو ڏئي رهيا آهن انهن جو چوڻ آهي ته اصل ۾ اندروني طور تي پ پ ۽ نواز ليگ پاڻ ۾ ٺهيون پيون آهن. هي سڀ ڪجهه ٽين طاقت جو رستو روڪڻ لاءِ (اصل ۾ خان صاحب جو اشارو پاڻ طرف آهي) ۽ عوام جي اکين ۾ ڌوڙ وجهڻ لاءِ ڪري رهيون آهن. ان لاءِ خان صاحب وٽ هڪ کان هڪ دليل آهن جن ۾ شرجيل جي وطن واپسي، ڊاڪٽر عاصم جي آزادي، ماڊل ايان علي جي خير خيريت سان ملڪ مان روانگي سميت هو ٻيا مختلف مثال پيش ڪري رهيو آهي ۽ ان کي ڊيل جو نالو ڏئي رهيو آهي. جيتوڻيڪ اهي سڀ معاملا عدالتي حڪمن تحت ٿيا آهن. شرجيل هجي يا ڊاڪٽر عاصم يا وري ايان علي هجي انهن کي عدالت طرفان ئي رليف مليو آهي پر خان صاحب جيئن ته ڳالهه مان ڳالهوڙو ٺاهڻ جو ڪمال ڪاريگر سمجهيو وڃي ٿو. ان ڪري هو ڪنهن به معاملي تي خاموش رهڻ پسند نه ٿو ڪري. هڪڙي پاسي هي ٻئي پارٽيون آهن ته ٻئي پاسي تحريڪ انصاف به ميدان تي باقاعدي سندرا ٻڌي نڪتل آهي نه رڳو عوام ۾ پنهنجي حمايت وڌائڻ لاءِ هي ڪوششون ڪري رهي آهي پر اهم اعليٰ اختيارين سان ميل ملاقاتون ڪرڻ واري پاسي به سندس خاص ڌيان آهي، جنهن جو هڪڙو مثال تازو عمران خان جي آرمي چيف سان ڪيل ملاقات به آهي، جنهن تي سياسي مبصر پنهنجي پنهنجي علم ۽ عقل مطابق تبصرا ڪري رهيا آهن. چيو پيو وڃي ته خان صاحب ايندڙ ڀيري وزيراعظم ٿيڻ جو باقاعدي ارادو ڪري ورتو آهي. سندس هي خواهش پوري ٿئي ٿي يا نه ٿي ٿئي ان بابت ڪجهه به چوڻ وقت کان اڳ آهي بهرحال هن همراهه جي جستجو جاري آهي.

سياست جي ميدان تي هي جيڪا گرما گرمي هلي رهي آهي ۽ سرگرميون چوٽ چڙهيل نظر اچي رهيون آهن اُن کي ڪجهه مبصر ايندڙ اليڪشن جي تياريءَ جو حصو چئي رهيا آهن، انهن جو چوڻ آهي ته ڀلي اليڪشن ۾ اڃان سال ڏيڍ جو عرصو بچيل هجي ته ضروري ناهي ته ان ٽائيم پيرڊ تي ئي اليڪشن ٿئي. ممڪن آهي ته اُها اڳ ۾ به ٿي وڃي. ان سلسلي ۾ هي پاناما ڪيس واري فيصلي کي وڏي اهميت وارو چئي رهيا آهن جنهن بابت اهي خبرون هلي رهيون آهن ته اُهو ڪجهه ئي ڏينهن ۾ اچي ويندو. سياسي مبصرن جو چوڻ آهي ته جيڪڏهن اهو فيصلو شريف خاندان جي خلاف اچي ٿو ته يقينن سندن اقتدار ۾ رهڻ جو جواز باقي نه بچندو. اهو به امڪان آهي ته عدالت نئون وزيراعظم چونڊڻ جو حڪم جاري ڪري جيئن يوسف رضا گيلاني واري معاملي ۾ ٿيو هو. جيڪڏهن ائين به ٿئي ٿو، تڏهن به اهو شريف خاندان هڪ وڏو امتحان وارو مرحلو هوندو. ان صورتحال ۾ شريف خاندان لاءِ پنهنجي پارٽي مان ڪو اعتبار وارو ماڻهو چونڊڻ واقعي به هڪ وڏي آزمائش وارو ڪم هوندو. ٿي سگهي ٿو ته نئين اليڪشن جو اعلان به ٿي وڃي پر اهو سڀ ڪجهه عدالتي فيصلي تي دارومدار رکي ٿو ته اهو ڪهڙي نوعيت جو هوندو. اهو به ممڪن آهي ته شريف خاندان تي اهو الزام غلط ثابت ٿئي ۽ کين باعزت نموني ان الزام کان آجو ڪيو وڃي بهرحال اهي ته امڪانن واريون ڳالهيون آهن يقين سان ڪير به ڪجهه نٿو چئي سگهي. سڀني کي عدالت جي فيصلي جو انتظار آهي.

عمران خان جيتوڻيڪ هن سموري معاملي کي ”ڊيل“ جو نالو ڏئي رهيو آهي پر جيڪڏهن معاملي کي گهرائيءَ سان ڏسجي ته هي ڊيل نه ٿي لڳي ها باقي ان کي اليڪشن جي تياري جو نالو ڏئي سگهجي ٿو. ٻنهي پارٽين جي ليڊرشپ طرفان جيڪي هڪ ٻئي خلاف سخت بيان اچي رهيا آهن، انهن کي ڏسي ”ڊيل“ وارا آثار بلڪل به نظر نه پيا اچن. باقي سياست ۾ ته ڪجهه به ناممڪن ناهي. بظاهر ٻئي پارٽيون پوري ڪوشش ۾ آهن ته ايندڙ اليڪشن ۾ هيءَ ئي ڪامياب ٿين. سنڌ ۾ ته پيپلزپارٽي تقريبن سڀني مخالفن کي پنهنجي ڪئمپ ۾ آڻي ميدان صاف ڪري ورتو آهي. هاڻي سندس سڄو زور پنجاب ۽ ٻين صوبن واري پاسي آهي. ساڳيو معاملو نواز ليگ جو آهي، جيڪا پنجاب ۾ جيتوڻيڪ ايتري مضبوط نظر نه پئي اچي جيتري سنڌ ۾ پيپلز پارٽي آهي، پر پوءِ به انهيءَ کي اتي اڪثريتي سيٽون ملڻ جو آسرو ضرور آهي ۽ هي اتي گهڻي محنت ڪرڻ بدران باقي صوبن جن ۾ سنڌ ۽ خيبر پختونخواه اهم آهن اتي محنت ڪرڻ چاهي ٿي ۽ اتي گهٽ ۾ گهٽ ايتريون سيٽون ضرور کڻڻ چاهي ٿي جيڪي سندس صوبائي اسيمبلين ۾ نمائندگي جو ڀرم برقرار رکن. سنڌ ۾ ته ان حوالي سان سندس خواب جي ساڀيان ڪجهه مشڪل نظر اچي رهي آهي، ڇو ته هاڻي هن سان ٿر جي ارباب رحيم ۽ ٺٽي جي شيرازين کان سواءِ ڪير به گڏ نه رهيو آهي. انهن ماڻهن سان به پ پ جون ڳالهيون هلندڙ ٻڌايون پيون وڃن. ان ڪري اليڪشن تائين انهن جي شموليت جي امڪان کي مڪمل طور تي رد نٿو ڪري سگهجي. باقي رهيا راحيلا گل مگسي، سيد شاهه محمد شاهه، سليم ضياء ۽ کيئل داس ڪوهستاني جهڙا اڳواڻ ته انهن جي جيڪا سياسي پوزيشن آهي اها اسان سڀني جي سامهون آهي. بهرحال معاملا ڏاڍا دلچسپ آهن، پل پل ۾ صورتحال تبديل ٿي رهي آهي. هي صورتحال اليڪشن تائين ڪهڙي حد تي پهچندي، ان بابت يقين سان ڪير به ڪجهه نٿو چئي سگهي، سو ان لاءِ بهتر ائين ئي ٿيندو  ته ايندڙ وقت جو انتظار ڪجي.

wahidparas@yahoo.com

 

اسلامي فوجي اتحاد ۽ ايران جو ردعمل: صاحب خان ڀٽي

سعودي عرب جي قيادت ۾ جڙندڙ اسلامي فوجي اتحاد جي ايران پاران حمايت نه ڪرڻ جو فيصلو ڪيو ويو آهي، ايران طرفان به ان جا ڪيترائي ڪارڻ ٻڌايا ويا آهن، ايتري قدر جو ايران پاڪستان جي رٽائرڊ جنرل راحيل شريف طرفان اسلامي فوجي اتحاد سربراهه طور ذميواريون سنڀالڻ تي به ڳڻتي جو اظهار ڪيو ويو آهي. سعودي عرب جي قيادت ۾ جڙندڙ اسلامي فوجي اتحاد ۾ شروعاتي طور 34 ملڪ شامل ٿيا هئا جن جو هاڻ انگ وڌي 39 ٿي ويو آهي. سعودي عرب طرفان ٻڌايو ويو آهي ته ان اتحاد سان خطي ۾ دهشتگردي ۽ انتهاپسندي خلاف ڪم ڪيو ويندو ۽ ان اتحاد سان امن قائم ٿيندو پر سعودي عرب طرفان اتحاد جي قيام جو واضع طور سبب ۽ ڪم جي طريقيڪارن بابت گهڻو ڪجهه ناهي ٻڌايو ويو جنهن سبب ايران کي تمام گهڻا خدشا آهن، جيڪڏهن ڏٺو وڃي ته صرف ايران کي اسلامي فوجي اتحاد تي ڳڻتي نه آهي پر سڀ کان وڏي ڳڻتي رٽائرڊ جنرل راحيل شريف جي سربراهه ٿيڻ جي آهي، هونءَ ته سڀني کي خبر آهي ته گذريل ڪيتري ئي عرصي کان سعودي عرب ۽ ايران ۾ ڇڪتاڻ هلندي رهي آهي، ڪجهه عرصو اڳ به شيعا اڳواڻن کي ڦاهي ڏيڻ واري معاملي تي به ايران ۽ سعودي عرب ۾ ڇڪتاڻ پيدا ٿي وئي هئي، جنهن بعد سعودي اختيارين پاڪستان جا دورا شروع ڪيا هئا جنهن تي پاڪستان جي سياسي اڳواڻن چيو هو ته وزيراعظم کي معاملو حل ڪرڻ لاءِ ٽياڪڙي وارو ڪردار ادا ڪرڻو پوندو  ڇاڪاڻ ته ٻئي ملڪ اسلامي آهن.

جيڪڏهن ٻنهي ملڪن ۾ ڇڪتاڻ ٿيندي ته ان جو اثر سمورن اسلامي ملڪن تي ٿيندو، بهرحال اهو معاملو ڪجهه حد تائين ختم ٿي ويو هو پر هاڻ وري هڪ ڀيرو الزامن وارو سلسلو شروع ٿي ويو آهي جئين ماضي ۾ ٿيندو رهيو آهي، هونءَ ته سعودي عرب سميت نار جا اڪثر ملڪ خطي ۾ پکڙيل انتهاپسندي ۽ دهشتگردي جو ذميوار ايران کي قرار ڏيندا آهن پر هن وقت تائين ايران طرفان لڳايل سمورن الزامن جو ڀرپور مقابلو ڪيو ويو آهي، هڪ طرف سعودي عرب ايران تي الزام لڳائي رهيو آهي ته ٻي طرف وري آمريڪا به سعودي عرب تي نائن اليون ۾ ملوث هجڻ جون رڙيون ڪندو رهيو آهي، عالمي برادري به يمن ۾ سعودي فوج جي ڪاررواين تي ڳڻتي جو اظهار ڪري چڪي آهي پر ان باوجود سعودي عرب عالمي برادري جي هڪ به نه ٻڌي آهي، جڏهن ملڪ اندر رٽائرڊ جنرل راحيل شريف جي اسلامي فوجي اتحاد جو سربراهه ٿيڻ واريون خبرون پکڙجڻ لڳيون هيون ته ان وقت به ملڪ اندر وڏو بحث ڇڙي ويو هو، ڪجهه ماڻهو ان تي اعتراض ڪري رهيا هئا ته ڪجهه وري ان جي حمايت به ڪري رهيا پر هن وقت تائين حڪومت اهو واضع طور سمورو معاملو عوام آڏو ناهي آڻي سگهي ته آخر رٽائرڊ جنرل راحيل شريف کي اسلامي فوجي اتحاد جي سربراهه ٿيڻ جي اين او سي ڪنهن جاري ڪئي؟

بهرحال هن وقت ملڪ اندر رٽائرڊ جنرل راحيل شريف جو بحث پنهنجي هنڌ آهي پر ايران به ان معاملي تي تمام گهڻي ڳڻتي جو اظهار ڪيو  آهي، ايران طرفان چيو ويو آهي ته کين اسلامي فوجي اتحاد ۾ باضابطه طور شامل ٿيڻ جي دعوت نه ڏني وئي هئي ۽ نه ئي هو اهڙي اتحاد جي حمايت ڪندا، اسلام آباد ۾ مقرر ايراني سفير هنر دوست پاڪ فوج جي رٽائرڊ جنرل راحيل شريف پاران اسلامي اتحاد جي قيادت ڪرڻ تي ڳڻتي جو اظهار ڪيو آهي، ايراني سفير هنر دوست چيو آهي ته پاڪستان جي حڪومت رٽائرڊ جنرل راحيل شريف کي اسلامي فوجي اتحاد جي سربراهه ٿيڻ جي اين او سي جاري ڪئي وئي جنهن تي کين تمام گهڻا خدشا آهن، جڏهن رٽائرڊ جنرل راحيل شريف جي اسلامي فوجي اتحاد جي سربراهه ٿيڻ جون خبرون هليون هيون ۽ ملڪ اندر وڏو بحث ڇڙي هو ان وقت به ڪنهن به ملڪ طرفان ان جي مخالفت نه ڪئي وئي هئي پر هاڻ ايران ان تي خدشا ظاهر ڪري رهيو آهي، ايراني سفير مهدي هنر طرفان جاري ڪيل بيان ۾ چيو ويو آهي ته پاڪستاني حڪومت اين او سي جاري ڪرڻ کان اڳ ايراني اختيارين سان رابطو ڪيو هو  پر ان وقت نه ايران ان جي حمايت ڪئي هئي ۽ نه ئي وري ان جي مخالفت ڪئي هئي.

جيتوڻيڪ هن وقت تائين پاڪستاني حڪومت طرفان ڪو به تڪڙو رد عمل ظاهر ناهي ڪيو ويو پر ان باوجود ايران پنهنجي فيصلي تي اٽل بيٺل نظر اچي رهيو آهي ۽ سعودي عرب جي جڙندڙ اسلامي فوجي اتحاد جي مخالفت ڪري رهيو  آهي، جيڪڏهن ڏٺو وڃي ته آمريڪا طرفان ان اسلامي فوجي اتحاد جي هن وقت تائين مخالفت نه ڪئي وئي آهي ۽ نه ئي وري ان تي ڪو رد عمل ظاهر ڪيو ويو آهي، هونءَ ته اسلامي فوجي اتحاد بابت ڪيترن ئي ڏينهن کان بحث ٿي رهيو آهي پر ان باوجود آمريڪا توڙي برطانيا طرفان ان تي ڳالهائڻ کان پاسو ڪيو پيو وڃي، ايران به صرف ان ڪري ئي مخالفت ڪري رهيو  اهي جو ايران هن وقت ان فوجي اتحاد جي مخالفت ۾ بيٺل آهي ۽ سمورا ملڪ به ايران کان ٿورو لنوائيندا رهيا آهن، ڇاڪاڻ ته اهو واحد ملڪ آهي جيڪو آمريڪا کي ڀرپور نموني سان جواب ڏيندو آهي، ڪجهه عرصو اڳ به آمريڪا ۽ ايران ۾ ڇڪتاڻ پيدا ٿي هئي ۽ آمريڪا طرفان مٿس وڌيڪ سخت پابنديون لڳايون ويون هيون، ان باوجود ايران پنهنجي مقصد تان نه هٽيو هو، هونءَ ته اڳوڻو آمريڪي صدر بارڪ اوباما پنهنجي بيان چيو هو ته سندس دور ۾ ايران جو ايٽمي پروگرام بند ٿي ويو هو ۽ ايران جو مسئلو هن ڳالهين ذريعي حل ڪيو هو پر ان باوجود ايران ۽  آمريڪا ۾ ويڇا هن وقت تائين گهٽجي نه سگهيا آهن،

بهرحال ايران ۽ آمريڪا جا مسئلا پنهنجي جڳهه تي، هن وقت سڄو معاملو جنرل (ر) راحيل شريف جي اسلامي فوجي اتحاد جي سربراهه ٿيڻ جو آهي جنهن تي ايران طرفان به ڳڻتي جو اظهار ڪيوويو آهي. هڪ پرڏيهي خا برو اداري ۾ به خبر هلائي هئي ته ته قومي سلامتي بابت وزيراعظم جي صلاحڪار ناصر جنجوعه چيو هو ته جنرل رٽائرڊ راحيل شريف اسلامي اتحاد جي قيادت سنڀالڻ بعد ايران کي به ان ۾ شموليت جي دعوت ڏيندو، جيڪڏهن ڏٺو ته ايراني سفير به ان ڳالهه کي قبول ڪري رهيو آهي ته پاڪستان طرفان کين اسلامي فوجي اتحاد ۾ شامل ٿيڻ بابت ٻڌايو ويو هو. ايراني سفير طرفان اهو به واضع ڪيو ويو هو ته  تهران اهڙي اتحاد جو ڪڏهن به حصو نه بڻجندو ۽ نه ئي اهڙي ڪا کين دعوت ملي آهي.ايراني سفير مهدي هنر دوست طرفان چيو ويو آهي ته فوجي اتحاد قائم ڪرڻ بدران خطي ۾ امن لاءِ هڪ اهڙو اتحاد جوڙيو وڃي جنهن سان مسئلا حل ٿي سگهن. جيڪڏهن ڏٺو وڃي ته هن وقت ايران صرف ان ڪري ئي اسلامي فوجي اتحاد جي مخالفت ڪري رهيو آهي جو ان جو سربراهه سعودي عرب آهي ۽ ٻنهي ملڪن ۾ گذريل ڪيتري ئي عرصي بهتر لاڳاپا نه رهيا آهن، بهرحال هن وقت رٽائرڊ جنرل راحيل شريف جي اسلامي فوجي اتحاد جي سربراهه ٿيڻ واريون خبرون بحث جو مرڪز بڻيل آهن، ملڪ ۾ به ان معاملي تي وڏو بحث ڇڙي ويو آهي. هاڻ ڏسڻو اهو آهي ته آخري ڪهڙي ريت سعودي  جا اڳواڻ ان معاملي کي حل ڪرڻ لاءِ ايران کي مطئمن ڪن.

sahibalisindhi@gmail.com

 

 

منافعا ڏيندڙ ادارا ۽ ڪارخانا بند ڇو ؟؟؟

گذريل 4 اپريل تي ڳڙهي خدابخش ڀٽو ۾ شهيد ذوالفقار علي ڀٽو جي 38هين ورسي جي موقعي تي جلسي عام کي خطاب ڪندي پ پ چيئرمين بلاول ڀٽو زرداري جو چوڻ هو ته جيڪڏهن ملڪ ۾ ترقي ٿي رهي آهي ته آِ ايم ايف کان نجات ڇو نه ٿي ملي بجلي بعد گئس جي لوڊشيڊنگ ڇو وڌي آهي، منافعا ڏيندڙ ادارا ۽ ڪارخانا ڇو بند ٿي رهيا آهن، غربت ۾ ڇو اضافو ٿي رهيو آهي، مزدور ڇو بک تي سمهي رهيو آهي، ميان صاحب عوام اوهان ۽ اوهان جي ننڍي ڀاءُ کان نجات گهري ٿو.ترقي جو ڍنڍورو وڄائيندڙ نواز ليگ حڪومت جي ترقي صرف اشتهارن ۾ نظر اچي ٿي ۽ اربين روپيا اشتهارن ۾ خرچ ڪري ڪرپشن ڪري پاڻ کي ايماندار سڏايو وڃي ٿو ۽ اسان اليڪشن جي تياري مڪمل ڪري ڇڏي آهي، ميان صاحب توهان کي هاڻ سنڌ ڇو ياد اچي وئي آهي، سنڌ جو عوام اوهان کي خوب ڄاڻي ۽ سڃاڻي ٿو ۽ حيدرآباد جو عوام کي اوهان جي ڪوڙن واعدن تي اعتبار نه آهي، اوهان 20 سال اڳ اوهان ٿر لاءِ 20 ارب روپين جو اعلان ڪيو هو ۽ چيو هو ته اوهان جي دل ٿري ماڻهن لاءِ روئي ٿي، پر جڏهن ڏيڻ جو وقت اچي ٿو ته اوهان صرف ڪوڙا واعدا ڪري هليا وڃو ٿا. ٻڌي ڇڏيو اوهان پاڻ کي دوکو ڏئي سگهو ٿا پر 20 ڪروڙ عوام کي دوکو نه ٿا ڏئي سگهو، حڪمران عوام جي طاقت سان نه پر ڌانڌلي سان آيا آهن، جن وٽ نه ئي خارجه پاليسيون آهن ۽ نه ئي وري دهشتگردي کي منهن ڏيڻ لاءِ وقت سر فيصلو ڪرڻ جي صلاحيت اٿن. دهشتگردي جي خاتمي لاءِ اڄ ملٽري ڪورٽن جي ضرورت ڇو پئي آهي، جيڪڏهن اوهان نيشنل ايڪشن پلان تي عمل ڪيو ها، پنجاب ۾ دهشتگردن خلاف ايڪشن کڻو ها، پارلياماني نيشنل سيڪيوريٽي بڻايو ها ته انهن جي ضرورت نه پوي ها، هنن حڪمرانن ۾ اها صلاحيت نه آهي ته اهي وقت تي فيصلو ڪري سگهن، انهن کي ملڪ هلائڻ جي ڪا به صلاحيت نه آهي. قومي سلامتي جي نه پر پاناما جي پريشاني آهي، پنجاب اندر اسان جي ٻن اڳواڻن مٿان حملو ڪيو ويو، گهر ۾ گهري قتل ڪيو ويو، گڊ گورننس جو دهل وڄائيندڙ شهباز شريف کان پڇون ٿا ته اسان کي ڪڏهن انصاف ملندو، پاڪستان جو عوام اوهان کي اقتدار مان ڪڍي پوءِ دم کڻندو. مان پنجاب ۾ ويس ته شينهن ۽ بيٽ وارن جي حالت خراب هئي. چند سيٽون کٽڻ لاءِ ننڍن صوبن ۾ محروميون پيدا ڪري رهيا آهيو، هڪ طرف نئين گئس ڪنيڪشن تي پابندي آهي ته ٻئي طرف پنجاب جي هڪ مخصوص علائقي ۾ 37 ارب روپين جا نوان گئس منصوبا شروع ڪري اوهان ڇا ٿا ثابت ڪرڻ چاهيو، عمر ڪورٽ جهڙي تاريخي شهر کي گئس نه پئي ڏني وئي، حوارين ۾ نوان گئس ڪنيڪشن ورهايا پيا وڃن، مظلوم قومن جي ليڊر، هارين، مزدورن، طالب علم، عورتن جي حقن جي علمبردار، ملڪ کي ائٽمي طاقت بڻائيندڙ، نوجوانن جي روشن مستقبل جي اڳواڻ، خواتين جي حقن جي علمبدار، محب وطن، قومپرست پاڪستاني شهيد ذوالفقار علي ڀٽو کي ڦاهي ڏني وئي، اڄ پوري قوم روئي رهي آهي، اڄ 38 سال گذرڻ باوجود به ماڻهو جون دليون روئي رهيون آهن، اڄ به هر زبان تي هڪ ئي سوال آهي ته شهيد ڀٽو کي ڇو ڦاهي ڏني وئي، ڀٽو جو عدالتي قتل ڇو ڪيو ويو، ڀٽو جو آخر ڏوهه ڪهڙو هو؟ اڄ جي ٻار کي به خبر آهي ته ان عوام سان سچو عشق ڪيو ۽ عوام کي طاقتور بڻائڻ چاهيو ۽ آزاد خارخه پاليسي ڏني ۽ سامراج کان عوام کي آزادي ڏياري ۽ پاڪستان کي ائٽمي طاقت بڻايو پر افسوس ته اڄ تائين نه ڀٽو کي ۽ نه ڀٽو جي وارثن کي انصاف مليو آهي.مذهبي انتهاپسندي جو ٻج ڇٽيو ويو، جنهن خلاف اڄ ڏينهن تائين وڙهي رهيا آهيون، ۽ ان خلاف اسان جنگ وڙهي رهيا آهيون.