تازيون خبرون

Daily Archives: April 6, 2017

سنڌ ڪابينا اي ڊي خواجا کي هٽائڻ جي منظوري ڏئي ڇڏي، خدمتون وفاق حوالي ڪرڻ جو فيصلو

ڪراچي (ويب ڊيسڪ): سنڌ ڪابينا پاران تڪراري بڻيل صوبي جي آءِ جي اي ڊي خواجا کي هٽائڻ جي منظوري ڏني وئي ، سنڌ ڪابينا جو اجلاس وڏي وزير سيد مراد علي شاهه جي صدارت هيٺ ڪوٺايو ويو اجلاس ۾ سنڌ جي آءِ جي اي ڊي خواجا جون خدمتون وفاق جي حوالي ڪرڻ جو منظور ڏني وئي ، سنڌ ڪابينا پاران سردار عبدالمجيد دستي کي صوبي جو نئون آءِ جي مقرر ڪرڻ جي به منظوري ڏني وئي ، ٻئي پاسي آءِ جي سنڌ اي ڊي خواجا چيو آهي ته هو ڪنهن به صورت ۾ پنهنجو عهدو نه ڇڏيندو. هوڏانهن  وڏي وزير سيد مراد علي شاهه چيو آهي ته مون اڄوڪو اجلاس انڪري گهرايو آهي ته سموري صوبي ۾ تمام گهڻي لوڊشيڊنگ ٿي رهي آهي ۽ زرعي ۽ پيئڻ جي پاڻيءَ جو بحران آهي، ماڻهو انهن مسئلن سبب پريشان آهن، انڪري مون سوچيو ته ڪابينا کي اعتماد ۾ وٺان. هن اها ڳالهه وزيراعليٰ هائوس ۾ ڪابينا جي اجلاس جي صدارت ڪندي ڪئي. اجلاس ۾ سمورا صوبائي وزير، خاص معاون ۽ سمورا سيڪريٽريز سميت ٻين آفيسرن شرڪت ڪئي. اجلاس ۾ ڪابينا کي سيڪريٽري آبپاشيءَ ٻڌايو ته ارسا جي مطابق ربيع جي موسم ۾ پاڻي جي گهٽتائي 17 سيڪڙو تائين هوندي آهي پر هاڻي 50 سيڪڙو کان وڌيڪ آهي. هن وڌيڪ چيو ته مارچ جي گذريل ڏهن ڏينهن ۾ پاڻي جي صورتحال ڏٺي وڃي ته 55 سيڪڙو آهي ۽ اسڪردو ۾ گرمي پد وڌي رهيو آهي جنهن ڪري برف پگهرندي ۽ خريف جي شروع ۾ 12 سيڪڙو کوٽ هئي پر اها 50 سيڪڙو تائين وڌي ويندي. وڏي وزير سيد مراد علي شاهه پاڻي جي کوٽ تي واضح پاليسي اختيار ڪئي آهي، جنهن مطابق پاڻي جي کوٽ کي رڪارڊ مطابق شيئر ڪيو وڃي، پاڻيءَ جي کوٽ دوران ڪو به ڊيم نه ڀريو وڃي،  پاڻيءَ جي کوٽ دوران سمورا لنڪس ڪينال بند ڪيا وڃن، ڪپهه جي پوکيءَ کي بچائڻ لاءِ سنڌ جي پاڻيءَ جي گهرجون پوريون ڪيون وڃن، اسان کي منگلا ڊيم مان پاڻي ناهي ڏنو ويندو، جيڪڏهن تربيلا ۾ پاڻي نه آهي ته اسان کي پاڻي منگلا ڊيم مان ڏنو وڃي. سنڌ جي وڏي وزير سيد مراد علي شاهه اهو به مطالبو ڪيو ته ڪوٽڙي بئراج کي پاڪستان جو حصو سمجهي پاڻي ڏنو وڃي. ان موقعي تي ڪابينا محمد علي ملڪاڻيءَ ٻڌايو ته سجاول، ٺٽي ۽ بدين ضلعن ۾ زير زمين پاڻي خارو ٿي ويو آهي. صوبائي وزير ڊاڪٽر سڪندر مينڌرو چيو ته جيڪڏهن اسان کي پاڻي نه ڏنو ويو ته نه صرف فصل خراب ٿيندو پر ماڻهن ۽ چوپائي مال کي به نقصان پهچندو، ڇاڪاڻ ته شديد گرمي ٿي رهي آهي. وڏي وزير سيد مراد علي شاهه چيو ته هن صوبي ۾ وڌندڙ لوڊشيڊنگ تي شديد اعتراض آهن، ماڻهو گرميءَ ۾ مري رهيا آهن، اسپتالن ۽ درگاهن کي به بجليءَ جي لوڊشيڊنگ کان نه ٿو بخشيو وڃي. توانائي واري سيڪريٽري آغا واصف ڪابينا کي بريفنگ ڏيندي ٻڌايو ته ضلعي هيڊڪورٽر ۾ 4 ڪلاڪ، تعلقي هيڊڪوارٽر ۾ 6 ۽ ٻهراڙي وارن علائقن 8 ڪلاڪ لوڊشيڊنگ ٿي رهي آهي. ڪي اليڪٽرڪ بابت هن ٻڌايو ته 40 سيڪڙو فيڊر لاسز جي نتيجي ۾ 5 ڪلاڪ لوڊشيڊنگ ڪئي ويندي آهي. سيڪريٽري توانائي ٻڌايو ته ايس ايس جي سي پاران ڪي اليڪٽرڪ لاءِ گيس جي دستيابي انتهائي ڳڻتي جوڳي صورتحال تي آهي جڏهن ته گذريل سال اپريل ۾ ڪي اليڪٽرڪ کي ايس ايس جي سي پاران 208 ايم ايم سي ايف ڊي گيس ملي رهي هئي، جڏهن ته هن وقت ڪي اليڪٽرڪ کي 120 ايم ايم سي ايف ڊي ملي رهي آهي، جنهن ڪري ڪي اليڪٽرڪ گيس مان بجلي پيدا ڪرڻ جي صلاحيت کي مڪمل طور تي استعمال نه ٿي ڪري سگهي، ان نتيجي ۾ شهر کي 400 ميگاواٽ بجليءَ جي کوٽ آهي ۽ انڪري شهر ۾ لوڊشيڊنگ ڇهن ڪلاڪن کان وڌيڪ ٿي وئي آهي. لوڊشيڊنگ جا ڪارڻ ٻڌائيندي سيڪريٽري توانائي ٻڌايو ته 31 مارچ 2017ع تائين پيڪ ڊيمانڊ رڪارڊ ٿي آهي ۽ ملڪ ۾ 17970 ميگاواٽ ٿي. اپريل ۾ ڊيمانڊ 15600 ميگاواٽ آهي، خانگي ڪسٽمرز کان گهٽ رڪوري، ڊيسڪوس (Discos) جي نااهلي، ڪمزور ٽرانسميشن ۽ ڊسٽريبيوشن سسٽم، سرڪولر ڊيبٽ 31 مارچ تائين 385 بلين روپيا ٿي ويو آهي. گيس ڪمپنين جا واجبات 125 بلين رپيا آهن، فوري 100 بلين رپين جي رقم آءِ آءِ پيز کي حڪومت ادا ڪرڻي آهي. سنڌ صوبو کي حيسڪو ۽ سيپڪو کي 27.398 بلين رپيا فل اينڊ فائنل پيمنٽ جولاءِ 2010 کان 2016 تائين جا پاور بلز آهن، جنهن ۾ 22.83 بلين رپيا ڏنا ويا آهن، جنهن ۾ 8.525 بلين رپيا حيسڪو ۽ 14.305 بلين رپيا سيپڪو جا آهن، جنهن تي وڏي وزير سيد مراد علي شاهه سيڪريٽري توانائي آغا واصف کي هدايت ڪئي ته مون کي سموري رقم ٻڙي ڪري ڏيو. ڪرنٽ واجبات 1.069 بلين رپيا ڊسمبر 2016ع تائين جا آهن، جن کي وڏي وزير فوري رليز ڪرڻ جو حڪم ڏنو. سيڪريٽري توانائي ٻڌايو ته سڄي سنڌ ۾ 1700 ميگاواٽ بجلي جو شارٽ فال آهي. وڏي وزير سيد مراد علي شاهه ڪابينا کي ٻڌايو ته آٽوميٽڪ ميٽر ريڊنگ (اي ايم آر) جي خريداري وارو عمل شروع ٿي ويو آهي، جنهن لاءِ سنڌ حڪومت 50 سيڪڙو رقم ادا ڪندي ۽ سنڌ صوبي ۾ ڪي اليڪٽرڪ جا 4.796 بلين رپيا جون 2016ع کان فيبروري 2017ع تائين جي رقم ادا ڪئي آهي ۽ ڪراچي ميونسپل ڪارپوريشن (ڪي ايم سي)  / ڊسٽرڪٽ ميونسپل ڪارپوريشن ڪراچي (ڊي ايم سي ڪي) ڏانهن ڪي اليڪٽرڪ جا 952 بلين رپيا آهن. واٽر بورڊ جا بجلي بل سنڌ حڪومت ادا ڪندي آهي. ان موقعي تي ڄام خان شوري ٻڌايو ته واسا جي علائقن ۾ 16 ڪلاڪ لوڊشيڊنگ ٿي رهي آهي، اسان واٽر جنيٽرز تي هلائڻ جو رسڪ گهٽ کڻندا آهيون، جنهن ڪري حيدرآباد ۾ پاڻيءَ جي کوٽ ٿيندي آهي. نثار کهڙي چيو ته پهريان لاڙڪاڻي ۾ ٽرانسفارمز شديد گرميءَ ڪري سڙي ويندا هئا ۽ انهن جي مرمت لاڙڪاڻي ۾ ئي ڪئي ويندي هئي پر هاڻي انهن ٽرانسفارمز جي مرمت جو ڪم سکر رپيئر ورڪشاپ منتقل ڪيو ويو آهي، جنهن ڪري مسئلا پيدا ٿي رهيا آهن. ممتاز جکراڻيءَ چيو ته بجلي جي بلن جي رڪوري نيب کان ڪرائي پئي وڃي جيڪو غريب ماڻهن تي ظلم آهي. وڏي وزير چيو ته سموري ملڪ جي حساب سان سڄي سنڌ ۾ وڌيڪ لوڊشيڊنگ آهي جيڪڏهن لوڊشيڊنگ ۽ پاڻيءَ جي کوٽ ٿي ته اسان پنهنجي ماڻهن سان گڏ بيٺل هونداسين. سنڌ ڪابينا صوبي ۾ 12 کان 16 ڪلاڪ لوڊشيڊنگ ٿيڻ تي شديد تحفظن جو اظهار ڪيو ۽ حيسيڪو ۽ سيپڪو ۾ جيڪي چور آهن، پهرين انهن کي پڪڙيو وڃي بعد ۾ ٻئي ڪنهن خلاف ڪارروائي ڪئي وڃي. سنڌ ڪابينا وفاق کان مطالبو ڪيو ته سنڌ صوبي گيس پيدا ڪندي آهي ۽ ان تي پهريون حق سنڌ جي عوام جي آهي ۽ گيس جا ڪنيڪشن تي جيڪا پابندي مڙهي وئي آهي سا غيرقانوني آهي، انڪري سنڌ ۾ گيس ڪنيڪشن تان پابندي هٽائي وڃي ۽ اتي ڪنيڪشن لڳايا وڃن. آدمشماريءَ بابت ڪابينا کي بريفنگ ڏيندي عليم ميمڻ ٻڌايو ته 18161 بلاڪس، 2912 سرڪلز ۽ 463 چارجز تي اڌ ڪم ٿي چڪو آهي. فيز ٽو ۾ سينس جو ڪم جاري آهي، لاڙڪاڻي ڊويزن ۾ 118 چارجز، 545 سرڪلز، 5007 بلاڪس آهن، اهڙي ريت سکر ڊويزن ۾ 66 چارجز، 309 سرڪلز، 2785 بلاڪس، شهيد بينظير آباد ۾ 78 چارجز، 450 سرڪلز، 3550 بلاڪس، حيدرآباد ڊويزن ۾123 چارجز،634 سرڪلز ۽ 6633 بلاڪس، ميرپورخاص ڊويزن ۾ 85 چارجز، 206 سرڪلز ۽ 2863 بلاڪس آهن. چيف سيڪريٽري رضوان ميمڻ ان موقعي تي چيو ته منهنجي گهر کي ڳڻپ ۾ ناهي آندو ويو، نه پهرين مرحلي ۾ نه ئي ٻئي مرحلي ۾، مون کان آدم شماري وارن رڳو سوال پڇيو ته اوهان وٽ ڪيترا هٿيارن جا لائسنس آهن؟ جنهن تي مون سندن چيو ته اهو اختيار اوهان کي ڏنو آهي ته اوهان هٿيارن جي لائسنس بابت پڇيو؟. وڏي وزير سيد مراد علي شاهه چيف سيڪريٽري کان پڇيو ته اوهان کان اهو سوال ڪنهن ڪيو؟. چيف سيڪريٽريءَ وراڻيو ته نيوي جو اهلڪار هو. ڪابينا آدمشماري وارن کي هدايت ڪئي ته جيڪي سندن سوالنامو آهي ان جا پابندي رهن. ڪابينا ڪمشنر آدمشماري کي آدمشماري جي عمل تي پنهنجي ناپسندگي جو اظهار ڪندي چيو ته آدمشماري جي عمل کي شاف شفاف بڻايو وڃي.

 

لاهور: آدم شماري ٽيم تي آپگهاتي حملو، 5 فوجين سميت 6 ڄڻا شهيد، 10 زخمي

لاهور(ويب ڊيسڪ) بيديان روڊ تي وين تي آپگهاتي ڌماجي نتيجي ۾ 4 فوجين سميت 6 ڄڻا شهيد جڏهن ته 10 ڄڻا زخمي ٿي پيا آهن. بيديان روڊ تي مانانوالا چوڪ تي بيٺل وين ۾ آپگهاتي ڌماڪي جي نتيجي ۾ مردم شماري ٽم ۾ شامل 4 فوجين جي شهيد ٿيڻ جي تصديق ٿي وئي آهي جن ۾ سپاهي رياض، ساجد ۽ عبدالله جي سڃاڻپ ٿي وئي آهي جڏهن ته هڪ شهيد ٿيل جوان جو تعلق پاڪستان ايئر فورس سان آهي ۽ ڌماڪي ۾ هڪ وقت تائين 6 ڄڻا شهيد ۽ 10 زخمي ٿي چڪا آهن. زخمين کي سي ايم ايڇ ۽ جنرل اسپتال منتقل ڪيو ويو آهي. آپگهاتي ڌماڪي ۾ مردم شماري ٽيم کي نشانو بڻايو ويو جڏهن ته زخمين کي اسپتال منتقل ڪيو ويو آهي جن ۾ سخت زخمين جا آپريشن جاري آهن.يديان روڊ ڌماڪي جي ذميواري پابندي مڙهيل تنظيم تحريڪ طالبان پاڪستان قبولي ورتي آهي. پرڏيهي خابرو اداري موجب بيديان روڊ تي آدم شماري ٽيم تي آپگهاتي ڌماڪي جي ذميواري پابندي مڙهيل تنظيم تحريڪ طالبان قبولي ورتي آهي ۽ تنظيم جي ترجمان محمد خراساني پنهنجي بيان ۾ آدم شماري ٽيم کي نشانو بڻائڻ جي ذميواري قبولي ورتي آهي.لاهور جي علائقي بيديان روڊ تي آدم شماري ٽيم تي آپگهاتي ڌماڪي ۾ شهيد ٿيلن فوجي جوانن جي جنازي نماز لاهور جي ايوب اسٽيڊيم  ۾ ادا ڪئي وئي . لاهور جي علائقي بيديان روڊ تي آدم شماري جي ٽيم مٿان ٿيل حملي ۾ 6 ڄڻا شهيد ٿي ويا هئا. شهيد فوجين جو تعلق سنڌ رجمنٽ سان هو. جڏهن ته شهيدن ۾ رياض، ساجد ۽ ٻيا سپاهي شامل آهن. سندن جنازي نماز ۾ فوجي قيادت، پنجاب ڪابينا ۽ ٻيون اختياريون شريڪ ٿيون.

 

ڇڪتاڻ نٿا چاهيون، پاڪستان جو غدار پاڪستان ۾ نٿو رهي سگهي: آءِ ايس پي آر

راولپنڊي(ويب ڊيسڪ) آءِ ايس پي آر پنهنجي پڌرائي ۾ ڄاڻايو آهي ته پاڪستان سعودي عرب ۽ ايران سان سٺا لاڳاپا چاهي ٿو، ڊي جي آءِ ايس پي آر جنرل آصف غفور باجوا موجب سعودي اتحاد ۾ راحيل شريف جي مقرري پاڪستاني رياست جو فيصلو آهي، آءِ ايس پي آر موجب آپريشن رد الفساد تحت مدرسن جي سڌارن تي ڪم ٿي رهيو آهي، ڊي جي آءِ ايس پي آر ميڊيا کي بريفنگ ڏيندي چيو ته پاڪستان سعودي عرب ۽ ايران سان سٺا لاڳاپا چاهي ٿو. هن چيو ته هاڻي اسان کي پنهنجي منزل نظر اچي رهي آهي، پاڪستان جو غدار پاڪستان ۾ نٿو رهي سگهي، خطي ۾ ڇڪتاڻ نٿا چاهيون، جنرل آصف غفور باجوا چيو ته بي شڪ اسان ڏکئي وقت مان گذري رهيا آهيون، دنيا ۾ هاڻي ڪوبه اسان کي باءِ پاس نٿو ڪري سگهي.

 

عمران پوري ملڪ جو ٺيڪو ڇڏي خيبرپختون خواهه جي ڳڻتي ڪري: مريم اورنگزيب

اسلام آباد (ويب ڊيسڪ) سُڌ سماءَ بابت مملڪتي وزير مريم اورنگزيب چيو آهي ته خيبر پختون خواهه ۾ 3 هزار کان وڌيڪ اسڪولن ۾ واش روم نه آهن، عمران خان خيبرپختون خواهه جي احتساب ڪميشن جا تالا کولرائي، اسلام آباد ۾ ميڊيا سان ڳالهائيندي مريم اورنگزيب جو چوڻ هو ته خيبر پختون خواهه جي عوام جو لٽيل پئسو صوبي تي خرچ ڪري، خيبر پختون خواهه ۾ اسڪولن جي بهتريءَ جي لاءِ ڇا ڪيو ويو آهي؟ توهان خيبر پختون خواهه جي اسڪولن ۾ هڪبه نئون ڪلاس روم ڏيکاريو، خيبر پختون خواهه ۾ 25 لک بار اسڪولن کان ٻاهر آهن، 10 هزار اسڪولن ۾ بجلي ئي ڪانهي، 7 هزار اسڪولن ۾ پيئڻ جو پاڻي نه آهي، تعليمي اصلاحن ۾ مدد گھرجي ته مريم نواز ۽ شهباز شريف سان رابطو ڪيو، وزارت عظميٰ جي ڪرسيءَ عمران خان کي ذهني مريض بڻائي ڇڏيو آهي، انتشاري سياست جي ڪري عوام چونڊن ۾ عمران خان کي رد ڪري ڇڏيو.36

 

آدم شماري قومي فرض آهي، هر صورت ۾ مڪمل ڪيو ويندو: آرمي چيف

راولپنڊي (اين اين آءِ) پاڪ فوج جي سربراهه جنرل قمر جاويد باجوه لاهور آپگهاتي ڌماڪي ۾ فرض جي ادائگي دوران شهيد ٿيل فوجين ۽ سولين کي خراج عقيدت پيش ڪندي واضح ڪيو آهي ته آدمشماري جو عمل هر قيمت تي مڪمل ڪيو ويندو، انهن قربانين سان اسان جو قومي عزم وڌيڪ مضبوط ٿيندو، سڄي قوم جي حمايت سان پنهنجي ڌرتي کي دهشتگردي جي لعنت کان پاڪ ڪري سک جو ساهه کڻنداسين، اربع تي آءِ ايس پي آر موجب چيف آف آرمي اسٽاف جنرل قمر جاويد باجوه چيو ته لاهور آپگهاتي حملي ۾ شهيد ٿيندڙ فوجي ۽ سولين آدمشماري جي ڊيوٽي تي هئا، آدمشماري جو انقاد هڪ قومي ذميواري آهي، هن چيو ته آدمشماري جو عمل هر قيمت تي مڪمل ڪيو ويندو، هن چيو ته منهنجون سموريون همدرديون ڏکايل خاندانن سان گڏ آهن، مان شهيدن کي ڀرپور خراج عقيدت پيش ڪريان ٿو.

 

ملڪ ۾ مسلسل دهشتگردي جي واقعن تي ڳڻتي آهي: خورشيد شاهه

سکر(ويب ڊيسڪ) مخالف ڌر جي اڳواڻ سيد خورشيد احمد شاهه لاهور جي علائقي بيديان روڊ تي آدم شماري ٽيم تي آپگهاتي حملي جي سخت لفظن ۾ مذمت ڪندي چيو آهي ته دهشتگردي جون پاڙون پٽڻ جي لاءِ وڏي پيماني تي قدم کنيا وڃن. ميڊيا سان ڳالهائيندي خورشيد شاهه چيو ته لاهور ڌماڪي جي مذمت ڪيون ٿا. هن ڌماڪي ۾ شهيدن ٿيلن ۽ زخمين سان تعزيت ۽ همدردي جو اظهار ڪيو. هن چيو ته دهشتگردي جي مسلسل واقعن تي ڳڻتي آهي.

 

پاڪ فوج جي جوانن تي حملو ڪندڙن کي سخت کان سخت سزا ڏني وڃي: آصف زرداري

ڪراچي(ويب ڊيسڪ) پاڪستان پيپلز پارٽي جي شريڪ چيئرمين ۽ اڳوڻي صدر آصف علي زرداري لاهور ۾ آدم شماري جي ٽيم تي حملي جي سخت مذمت ڪئي آهي. ميڊيا سان ڳالهه ٻولهه ڪندي آصف زرداري چيو ته پاڪستان آرمي جي جوانن تي حملو ڪندڙن کي سخت کان سخت سزا ڏني وڃي. هن چيو ته هاڻ دهشتگردن جون سموريون نرسريون تباهه ڪرڻيون پونديون. آصف زرداري ڌماڪي ۾ شهيدن ٿيلن جي وارثن سان همدردي ۽ افسوس جو اظهار پڻ ڪيو.

 

نيشنل ايڪشن پلان تي عمل ٿئي ها ته لاهور جهڙا واقعا پيش نه اچن ها: بلاول ڀٽو زرداري

لاڙڪاڻو (اين اين آءِ) پاڪستان پيپلز پارٽي جي چيئرمين بلاول ڀٽو زرداري لاهور ۾ ٿيل بم ڌماڪي جي نتيجي ۾ چئن فوجي جوانن سميت 6 ڄڻن جي شهيد ٿيڻ واري واقعي تي انتهائي گهري ڏک ۽ افسوس جو اظهار ڪيو آهي. پنهنجي جاري ڪيل بيان ۾ هن چيو ته دهشتگردن عوام کي ذهني سڪون کان محروم ڪري ڇڏيو آهي ۽ هو سندن فوجي جوانن، شهرين، اسڪولن، اسپتالن، عبادتگاهن وغيره کي نشانو بڻائي رهيا آهن. هن وڌيڪ چيو ته دهشتگردي کي فقط ان صورت ۾ ئي ختم ڪري سگهجي ٿو، جڏهن قومي ايڪشن پلان کي ڪنهن به استثنيٰ کانسواءِ چئني صوبن ۾ لاڳو ڪيو وڃي. پي پي پي چيئرمين چيو ته هو هر قسم جي دهشتگردي جي خلاف آهن ۽ پي پي پي ملڪ اندر دهشتگردي سبب متاثر ٿيندڙ سڀني ماڻهن جي وارث آهي ۽ متاثر ڪٽنبن جي ڏک ۾ شريڪ آهي. بلاول ڀٽو زرداري زور ڀريندي چيو ته لاهور بم ڌماڪي جي زخمين کي علاج جون بهتر سهولتون فراهم ڪيون وڃن.

 

اسلامي نظرياتي ڪائونسل جي چيئرمين جو عهدو 4 مهينن کان خالي آهي: سراج الحق

لاهور (ويب ڊيسڪ): جماعت اسلامي امير سينيٽر سراج الحق چيو آهي ته اسلامي نظرياتي ڪائونسل جي چيئرمين جو عهدو 4 مهينن کان خالي آهي، چيئرمين جو عهدو هڪ آئيني ضرورت آهي، اسلامي نظرياتي ڪائونسل جي چيئرمين جي فوري طور مقرري ڪئي وڃي، هن چيو ته حڪومت چيئرمين جي مقرري نه ڪري آئين جي ڀڃڪڙي ڪري رهي اهي، سراج اللحق چيو ته ملڪ ڪنهن آئيني بحران کي برداشت نٿو ڪري سگهي.

 

ڪرپشن جو جيترو پئسو پڪڙينداسين تعليم تي خرچ ڪيو ويندو : عمران خان

اسلام آباد (ويب ڊيسڪ) تحريڪ انصاف جي سربراهه عمران خان چيو آهي ته پاڪستان جي ترقيءَ جي لاءِ تعليم تمام ضروري آهي، تعليم تي خيبر پختون خواهه حڪومت جي جيتري تعريف ڪجي اها گھٽ آهي، ڪي پيءَ ۾ استادن کي ميرٽ تي ڀرتي ڪيو ويو آهي، اسلام آباد ۾ تقريب کي خطاب ڪندي عمران خان جو چوڻ هو ته 40 هزار استاد ميرٽ تي ڀرتي ڪيا ويا آهن، ان کان وڏو ظلم ڇا ٿيندو ته استاد سفارش تي ڀرتي ٿين، خيبر پختون خواهه ۾ 40 هزار استاد اين ٽي ايس تحت چونڊيا ويا آهن، اعليٰ تعليم جو مقصد اهو نه هجڻ گھرجي ته ٻارن کي پنهنجي معاشري کان الڳ ڪيو وڃي، سياسي بنيادن تي ڀرتي ڪجھه استاد پرڏيهه ۾ ڪم ڪري رهيا آهن، انگريزي سيکارڻ جو مقصد ٻارن کي پنهنجي ڪلچر کان پري ڪرڻ نه هجڻ گھرجي، تعليمي نصاب معاشري ۽ حالتن موجب هجڻ گھرجي، مدرسن جي استادن کي تربيت ڏني وڃي جئين شاگرد قومي ڌاري ۾ اچي سگھن، عمران خان جو چوڻ هو ته ڪرپشن جو جيترو پئسو پڪڙينداسين تعليم تي خرچ ڪيو ويندو، خيبر پختون خواهه ۾ 70 سيڪڙو نوان اسڪول ٻارڙين جي لاءِ ٺهي رهيا آهن، خيبر پختون خواهه ۾ ٺهندڙ هر ٽن مان 2 ڪاليج شاگردياڻين جي لاءِ آهن، ڪوشش هجڻ گھرجي ته جتان به پئسو بچي اهو تعليم تي خرچ ڪيو وڃي.36