تازيون خبرون

Daily Archives: April 1, 2017

پارا چنار بم ڌماڪو، 22 چڻا شهيد، ڪيترائي زخمي، اسپتالن ۾ ايمرجنسي لاڳو

پاراچنار (اين اين آءِ) ڪرم ايجنسي جي علائقي پارا چنار ۾ بم ڌماڪي جي نتيجي ۾ 22 ڄڻا فوت ۽ 50 کان وڌيڪ زخمي ٿي پيا زخمين ۾ ڪيترن جي حالت نازڪ آهي جنهن سبب فوتگي ۾ واڌ جو خدشو آهي جڏهن ته صدر ممنون حسين وزيراعظم نوازشريف ڌماڪي جي مذمت ڪندي چيو ته پنهنجي ڌرتي تان دهشتگردي جي مڪمل خاتمي تائين جنگ جاري رکڻ اسان جي قومي ذميواري آهي گهرو وزير چوڌري نثارعلي بم ڌماڪي تي ڳڻتي جو اظهار ڪندي شروعاتي رپورٽ طلب ڪري ورتي اطلاع موجب جمعي تي ڌماڪو ڪرم ايجنسي جي علائقي پاراچنار جي نور بازار ۾ ٿيو جنهن جي ويجهو امام بارگاهه ۽ ڪيترائي دڪان موجود آهن نجي ٽي وي مطابق اسپتال ذريعن ڌماڪي جي نتيجي ۾ 22 ڄڻا فوت ٿيڻ جي تصديق ڪئي آهي پوليٽيڪل انتظاميه مطابق 50 کان وڌيڪ زخمي ٿيا آهن چٽن شاهدين موجب ڪجهه حملو ڪندڙن بازار کان ڪجهه مفاصلي جي وٿي تي موجود فاٽڪ تي بيٺل ليويز اهلڪارن کي فائرنگ جو نشانو بڻايو جنهن کان پوءِ بازار ۾ ڌماڪو ٿيو پوليٽيڪل انتظاميه موجب نور مارڪيٽ ۾ بم ڌماڪو ڪار سان ڪيو ويو ڌماڪي کان پوءِ گاڏي جا ٽڪرا پري پري تائين ڦهلجي ويا ڪيترائي دڪان ۽ اتي بيٺل گاڏين کي به نقصان پهتو پارا چنار سان تعلق رکندڙ قومي اسيمبلي ميمبر ساجد حسين موجب ڌماڪو آپگهاتي هو ۽ آپگهاتي حملي کان اڳ فائرنگ به ڪئي ويئي برطانوي ميڊيا سان ڳالهائيندي هن چيو ته ڌماڪو تمام مصروف علائقي ۾ ٿيو ۽ ان جو نشانو عورتن جي مسجد تي ٿي سگهي ٿو ٻئي طرف ايجنسي واري مقامي هيڊڪوارٽر اسپتال جي ڊاڪٽر ممتاز حسين موجب اسپتال ۾ آندل ميتن ۾ هڪ عورت ۽ ٻه ٻارڙا شامل آهن ڊاڪٽر ممتاز حسين زخمين جي لاءِ گهربل رت جي کوٽ کي پورو ڪرڻ لاءِ ماڻهن کان رت جو عطيو ڏيڻ جي اپيل ڪئي آهي واقعي جو اطلاع ملندي ئي سيڪيورٽي فورسز ۽ ريسڪيو اهلڪار حادثي واري جاءِ تي پهتا ۽ پاراچنار جي سمورين اسپتالن ۾ ايمرجنسي نافذ ڪئي ويئي هوڏانهن پاراچنار ڌماڪي کان پوءِ پشاور جي حيات آباد ميڊيڪل ڪامپليڪس ۽ ليڊي ريڊنگ اسپتال ۾ ايمرجنسي نافذ ڪئي ويئي پاڪ فوج پاران جاري ٿيندڙ بيان مطابق ڌماڪي واري هنڌ تان زخمين کي ڪڍڻ لاءِ پاڪ فوج جو هيليڪاپٽر موڪليو ويو صدر ممنون حسين دهشتگردي جي واقعي جي سخت مذمت ڪئي آهي ان حادثي ۾ فوت ٿيندڙ ۽ زخمي ٿيندڙ بيگناهه ماڻهن سان تعزيت جو اظهار ڪيو آهي. آزاد ڪشمير جي صدر مسعود خان وزيراعظم آزاد ڪشمير فاروق حيدر خان سينيٽ جي چيئرمين ميان رضا رباني قومي اسيمبلي اسپيڪر سردار اياز صادق ڊپٽي اسپيڪر گلگت بلتستان جو وڏو وزير ڪي پي ڪي جو وڏو وزير ۽ سنڌ جو وڏو وزير سيد مرادعلي شآهه پنجاب جو وڏو وزير ميان شهبازشريف بلوچستان جو وڏو وزير ثناءُالله زهري پنجاب جو گورنر بلوچستان جو گورنر سنڌ جو گورنر ڪي پي ڪي جي گورنر مريم اورنگزيب پ پ پ جي چيئرمين بلاول ڀٽو زرداري آصف زرداري مولانا فضل الرحمان سراج الحق تحريڪ انصاف جي چيئرمين عمران خان سميت ڪيترن ئي اڳواڻن ڌماڪي جي مذمت ڪندي واثن سان همدردي جو اظهار ڪيو.

 

پوري ملڪ ۾ فوجي عدالتون 2 سالن لاءِ بحال، صدر بل تي صحيح ڪري ڇڏي

اسلام آباد (اين اين آءِ) صدر ممنون حسين 23هين آئيني ترميم سميت آرمي ايڪٽ 2017 تي صحيح ڪري ڇڏي جنهن کان پوءِ فوجي عدالتن جي مدي ۾ وڌيڪ ٻن سالن جي واڌ ٿي ويئي قومي اسيمبلي ۽ سينيٽ مان منظور کان پوءِ صدر کي آئيني ترميم ۽ آرمي ايڪٽ جو بل صحيح لاءِ موڪليو ويو هو جيڪو صدر جي صحيح کان پوءِ هاڻي 23هين آئيني ترميم چورائيندي ياد رهي ته قومي اسيمبلي مان منظوري دوران ان کي 28هين آئيني ترميم چيو ويندو هو ڇو ته اسيمبلي اجلاس ۾ آئين ۾ ڪيترائي ترميم جا بل پيش ٿيا هئا. جڏهن ته پاڪستان جي آئين ۾ هن وقت تائين 22 آئيني ترميمو ٿي چڪيون آهن ان لاءِ تازي ترميم کي 23هين آئيني ترميم چيو ويو آهي نجي ٽي وي موجب قومي اسيمبلي کان اڪثريت سان منظوري کان پوءِ 3 ڏينهن سينيٽ ان ترميم کي منظور ڪيو هو ان کان پوءِ پارلياماني معاملن واري وزارت صحيح جي لاءِ آئيني ترميم کي صدر ڏانهن موڪليو ويو. فوجي عدالتن جو قيام 16 ڊسمبر 2014 تي پشاور جي آرمي پبلڪ اسڪول تي حملي کان پوءِ آئين ۾ 21هين ترميم ڪري عمل ۾ آندو ويو هو.

 

ايف آءِ کي جاچ جاري رکڻ جي هدايت، مواد ختم ڪرڻ لاءِ پينل بڻائڻ جو حڪم

اسلام آباد(ويب ڊيسڪ) سوشل ميڊيا تي گستاخ مواد ڪيس جو اسلام آباد هاءِ ڪورٽ مختصر فيصلو جاري ڪري ڇڏيو آهي، جسٽس شوڪت عزيز صديقي 3 صفحن تي ٻڌل لکت ۾ حڪمنامو جاري ڪيو. عدالت فيصلي ۾ هدايت ڪئي ته ايف آءِ قانون موجب جاچ جاري رکي، 5 بلاگرن کي خاص شاهدين جي موجودگي ۾ ملڪ واپس آندو وڃي. ايف آءِ اي گستاخ مواد جي نئين درخواست تي ڪارروائي ڪري. عدالت هدايت جاري ڪئي ته گستاخ مواد تي ٻڌل پيجن خلاف ميڪنزم بڻايو وڃي، پي ٽي اي سوشل ميڊيا تي گستاخ مواد روڪڻ جو طريقي ڪار طئي ڪري، اليڪٽرانڪ ڪرائيم ٽوڙ ايڪٽ 2016ع ۾ هڪ مهيني جي ترميم ڪئي وڃي جڏهن ته گستاخ مواد ختم ڪرڻ جي لاءِ پينل يا ڪميٽي بڻائي وڃي.

 

سڄي دنيا امن لاءِ ڪيل اسان جي ڪوششن کي مڃي ٿي: آرمي چيف

راولپنڊي (ويب ڊيسڪ) پاڪ فوج جي سربراهه جنرل قمر جاويد باجوا منگلا ڀرسان قومي دهشتگردي ٽوڙ مرڪز پبي جو دورو ڪري پرڏيهي ٽيمن سان ملاقات ڪئي. آءِ ايس پي آر موجب آرمي چيف نيشنل ڪائونٽر ٽيرر ازم سينٽر جو دورو ڪيو، جتي هن پاڪ فوج جي مقابلن ۾ شريڪ پرڏيهي عسڪري ٽيمن سان ملاقات ڪئي. ان موقعي تي جنرل قمر جاويد باجوا جو چوڻ هو ته دهشتگردي سڄي دنيا کي متاثر ڪري رهي آهي، جنهن خلاف اجتماعي رد عمل واري حڪمت عملي جي ضرورت آهي. هن چيو ته امن ۽ استحڪام لاءِ اهم ڪردار ادا ڪري رهيا آهيون، ڇو ته پاڪستان امن پسند ملڪ آهي. سڄي دنيا امن ۽ استحڪام لاءِ ڪيل اسان جي ڪوشش کي تسليم ڪري ٿي. آرمي چيف چيو ته پرڏيهي ٽيمن جي موجودگي اسان جي ڪوششن کي مڃڻ جو ثبوت آهي. پاڪستان خلاف عالمي اڪيلائيءَ جي پروپئگنڊا ڪندڙ ڏسي ڇڏين، اسان اڪيلا ناهيون.27

 

سکر ڊرينيج جي پاڻيءَ کي ٽريٽيمينٽ بعد واهن ۽ درياهه ۾ ڇوڙ ڪيو وڃي: خورشيد شاه

سکر(ويب ڊيسڪ) قومي اسيمبليءَ ۾ مخالف ڌر جي اڳواڻ سيپڪو چيف کي شهري سهولتن جي ادارن جي بجليءَ نه ڪاٽڻ ۽ ڏينهن جي وقت لوڊ شيدنگ نه ڪرڻ جي هدايت ڪري ڇڏي. قومي اسيمبليءَ ۾ مخالف ڌر جي اڳواڻ ۽ پ پ ايم اين اي سيد خورشيد احمد شاهه سکر ضلعي جي مختلف ترقياتي اسڪيمن جي رفتار ۽ ڪارڪردگي جي حوالي سان ڪمشنر هائوس ۾ هڪ اعليٰ سطحي اجلاس جي صدارت ڪئي، جنهن ۾ ڪمشنر سکر ڊويزن محمد عباس بلوچ، ڊپٽي ڪمشنر سکر رحيم بخش ميتلو ۽ سيپڪو چيف ايگزيڪيوٽو بلال حسنين ڀٽي سميت مختلف لاڳاپيل کاتن ۽ ادارن جي آفيسرن شرڪت ڪئي. اجلاس ۾ ڳالهائيندي سيد خورشيد احمد شاهه انتظاميه کي هدايت ڪئي ته پراڻي سکر جي سمورن چوڪن تان حددخليون ختم ڪيون وڃن ته جيئن شهرين کي ڪنهن به تڪليف جو منهن ڏسڻو نه پوي. هن چيو ته ميونسپل قانون تي عمل ڪندي سکر شهر مان ٦۲ واڙن کي منتقل ڪيو وڃي، ته جيئن شهر مان بيماريون ختم ٿين ۽ ڊرينيج جو نظام بهتر ٿي سگهي. هن هدايت ڪئي ته سکر جي ڊرينيج جي پاڻيءَ کي ٽريٽيمينٽ بعد واهن ۽ درياهه ۾ ڇوڙ ڪرايو وڃي، جڏهن ته گندگي جي ڍيرن کي شهر کان ٻاهر لينڊ فلس سائيڊ ٺاهڻ ۽ اسپتالن جي گند ڪچري کي ختم ڪرڻ جي اسڪيمن لاءِ پي سي ون ٺاهي وڃي. هن چيو ته پبلڪ هيلٿ آفيسرن کي ٽيڪنيڪل ڄاڻ نه آهي، ان لاءِ وڏن پراجيڪٽس تي ڪنسلٽنٽس مقرر ڪيا وڃن ۽ وڌندڙ آباديءَ کي ڏسندي مستقبل جي پلاننگ ڪئي وڃي ۽ پي سي ون ٺاهڻ وقت ٻهراڙين جي آبادي شهرن ڏانهن منتقل ٿيڻ کي به نظر ۾ رکيو وڃي. هن لاڳاپيل انجنيئر کي هدايت ڪئي ته ۲۰ ڪروڙن جي لاڳت سان هلندڙ پنوعاقل جي ڊرينيج اسڪيم تي ڊرينيج جي ليول کي برقرار رکيو وڃي ۽ پروجيڪٽ شروع ڪرڻ کان اڳ سوائل ٽيسٽ کي يقيني بڻايو وڃي، جڏهن ته ڊرينيج لائين جي هر اٺين مين هول تي ڪيچ مينٽ ايريا ٺاهي وڃي ۽ اتي زهريلي گئس ٻاهر ڪڍڻ جو پائيپ پڻ لڳايو وڃي ته جيئن صفائي ڪندڙ عملي جي جان جو تحفظ ڪري سگهجي. هن لاڳاپيل عملدارن کي اها به هدايت ڪئي ته پيور جو ريٽ ۱٦۰ رپين کان وڌيڪ ڪنهن کي به نه ڏنو وڃي. اپوزيشن ليڊر خورشيد احمد شاهه سيپڪو چيف کي هدايت ڪئي ته شهري سهولتن وارن ادارن جي بجلي ڪاٽڻ کان پاسو ڪيو وڃي ۽ ڏينهن جي وقت بجلي جي لوڊشيڊنگ نه ڪئي وڃي ڇاڪاڻ ته گرميءَ جي شدت وڌيڪ آهي.

 

ڊاڪٽر عاصم جي آزادي سان انتقامي سياست کي شڪست ملي: آصف علي زرداري

ڪراچي(ويب ڊيسڪ) اڳوڻي صدر ۽ پاڪستان پيپلز پارٽي جي شريڪ چيئرمين آصف زرداري پيٽروليم بابت اڳوڻي صلاحڪار ڊاڪٽر عاصم حسين کي سندس آزادي تي واڌايون ڏنيون آهن. آصف علي زرداري ڊاڪٽر عاصم کي واڌايون ڏيندي چيو ته ڊاڪٽر عاصم بي بنياد ڪيس جو وڏي جرئت ۽ بهادري سان مقابلو ڪيو. سندس آزادي تي واڌايون پيش ڪيان ٿون. هن وڌيڪ چيو ته ڊاڪٽر عاصم حسين جي آزادي سان انتقامي سياست کي شڪست ملي آهي. ٻئي طرف اڳوڻي صدر ۽ پاڪستان پيپلز پارٽي جي شريڪ چيئرمين آصف علي زرداري پارا چنار ۾ دهشتگرداڻي ڪارروائي جي سخت لفظن ۾ مذمت ڪئي آهي. آصف زرداري ڌماڪي جي سخت مذمت ڪندي زخمين ۽ مارجي ويلن جي وارثن سان ڏک، افسوس ۽ همدردي جو اظهار ڪيو. هن چيو ته معصوم انسانن کي نشانو بڻائيندڙ معافي جي لائق ناهن. پارٽي جا سمورا ڪارڪن ڌماڪي ۾ زخمي
ٿيلن جي زندگي بچائڻ جي لاءِ رت جو عطيو ڏيڻ جي پڻ هدايت ڪئي آهي

 

ڊاڪٽر عاصم 17 مهينن تائين بهادري سان ذهني اذيتون برداشت ڪيون: بلاول ڀٽو زرداري

لاهور(ويب ڊيسڪ) پاڪستان پيپلز پارٽي جي سربراهه بلاول ڀٽو زرداري پيٽروليم بابت اڳوڻي صلاحڪار ڊاڪٽر عاصم حسين کي ڪرپشن ۽ ٻين ڪيسن مان آزادي ملڻ تي مبارڪ واڌايون پيش ڪندي چيو آهي ته ڊاڪٽر عاصم حسين 17 مهينن تائين بهادري سان ذهني ۽ جسماني اذيتون برداشت ڪيون. ميڊيا سان ڳالهائيندي بلاول ڀٽو زرداري چيو ته ڪوڙا ۽ پاڻ مرادا ڪيس ڊاڪٽر عاصم کي ٽوڙي نه سگهيا، ڊاڪٽر عاصم ڪمزور صحت جي باوجود ڏکين حالتن کي بهادري سان منهن ڏنو، وفاقي حڪومت انتقامي ڪارروائين سان اسان کي ڊيڄاري نٿي سگهي. هن وڌيڪ چيو ته پ پ قيادت ۽ ڪارڪنن ماضي ۾ خوفناڪ آمريتن جو مقابلو ڪيو، اسان جي قيادت ۽ ڪارڪن قرباني ڏئي تاريخ ۾ هيرو بڻجي ويا آهن.

 

سنڌ اسيمبلي جي اجلاس ۾ پ پ ۽ متحده ۾ پارڪ معاملي تي گوڙ، شيم شيم جا نعرا

ڪراچي(ويب ڊيسڪ) سنڌ اسيمبلي جي اجلاس دوران شور سبب ايوان هڪ ڀيرو ٻيهر مڇي جي بازار  بڻجي ويو. سنڌ جي اسيمبلي جي اسپيڪر آغا سراج دراني جي صدارت هيٺ ٿيندڙ اسيمبلي اجلاس دوران مڪاني کاتن واري وزير ڄام خان شوري پنهنجن خيالن جو اظهار ڪندي چيو ته ڪراچي ۾ چائنا ڪٽنگ ۽ لنڊن ڪٽنگ ڪنهن ڪئي، اها سڀني کي خبر آهي، چائنا ڪٽنگ جو خاتمو ۽ غير قانوني شادي هال ڪيرايا ٿا وڃن ته ماڻهن کي تڪليف ٿي ٿئي. هن چيو ته حيدرآباد جي لاءِ 80 ڪروڙ رپيا جاري ڪيا پيا وڃن، حيدرآباد پيپلز پارٽي جو شهر آهي ۽ هتي ڪنهن جي به داداگيري نه هلندي. هن چيو ته ڪراچي جي علائقي ڪلفٽن ۾ موجود بن قاسم پارڪ 10 سالن جي لاءِ بحريا ٽائون کي ليز تي ڏنو پيو وڃي.  اهو پارڪ فلاحي مقصدن جي لاءِ بحريا ٽائون جي حوالي ڪيو پيو وڃي ۽ عوام کان ڪو به پيسو وصول نه پيو ڪيو وڃي.

 

سنڌ ۽ بلوچستان ۾ پاڻي ورڇ جو تڪرار حل ٿي ويو، گھرج موجب پاڻي جي فراهمي شروع

اسلام آباد (ويب ڊيسڪ) ارسا ترجمان جو چوڻ آهي ته بلوچستان کي 20 لک ۽ خيبرپختون خواهه کي 8 لک ايڪڙ فٽ پاڻي ملندو، پنجاب ۾ خريف جي سيزن ۾ پاڻيءَ جي کوٽ 18 سيڪڙو رهڻ جو امڪان آهي، سنڌ بلوچستان کي 5 اپريل تائين پاڻيءَ جي فراهميءَ جو يقين ڏياريو آهي، ارسا جي ترجمان پاران جاري بيان ۾ وڌيڪ چيو ويو آهي ته سنڌ ۽ بلوچستان ۾ هلندڙ پاڻي تڪرار حل ٿي ويو آهي، خريف سيزن ۾ درياهن ۾ 11 ڪروڙ ايڪڙ فٽ پاڻي اچڻ جو امڪان آهي، ڊيمن ۾ 6 ڪروڙ 70 لک ايڪڙ فٽ پاڻي ذخيرو ٿيڻ جو اندازو لڳايو ويو آهي، پنجاب کي پهرين اپريل کان سيپٽمبر تائين 3 ڪروڙ 30 لک ايڪڙ فٽ پاڻي ڏنو ويندو، ترجمان موجب سنڌ کي 3 ڪروڙ ايڪڙ فٽ پاڻي ڏنو ويندو، اڄ کان صوبن کي گھرج موجب پاڻي ڏيڻ شروع ڪيو پيو وڃي، موسميات کاتي اپريل، مئي ۾ گرمي پڌ وڌڻ جي اڳڪٿي ڪئي آهي، ارسا ترجمان موجب برف ڳرڻ سان درياهن جي وهڪرن ۾ تيزي ايندي.

 

آپريشن رد الفساد سان گڏ ڪرپشن خلاف به آپريشن ٿيڻ گهرجي : سراج الحق

رحيم يار خان(ويب ڊيسڪ) جماعت اسلامي جي امير سراج الحق چيو آهي ته آپريشن رد الفساد سان گڏ ڪرپشن خلاف به آپريشن ٿيڻ گهرجي. رحيم يار خان ۾ جلسي کي خطاب ڪندي جماعت اسلامي جي امير چيو ته هو ڏکڻ پنجاب ايندو آهي، غربت ۾ واڌ ئي ڏسندو آهي. اڄ نوجوانن وٽ ڊگريون آهن پر هو بيروزگار آهن. سراج الحق چيو ته حڪمران پاناما ڪيس ۾ ملوث هئڻ جي باوجود پاڻ کي پاڪستان جو باني ۽ وارث چئي رهيا آهن. هن وڌيڪ چيو ته ڀارت ڪلڀوشن جهڙن ماڻهن کي پاڪستان موڪلي ۽ ٻئي پاسي پنجاب جو وڏو وزير واڌو بجلي ڀارت کي ڏيڻ جي ڳالهه ڪندو آهي.