تازيون خبرون

Daily Archives: January 31, 2017

عمران خان سياست ۽ ترقي ۾ نواز شريف جو مقابلو ڪندو: مريم اورنگزيب

اسلام آباد (م.ڊ) سڌُ سماءَ واري مملڪتي وزير مريم اورنگزيب چيو آهي ته عمران خان سياست ۾ نواز شريف جو مقابلو ڪندو. ترقي ۾ وزير اعظم جو مقابل ڪندو رڳو ڳالهيون سان ڪجهه ناهي ٿيندو. توهان ڪي پي ڪي سان جيڪي واعدا ڪيا اهي پورا ڪيو. پاناما ڪيس جي ٻڌڻي کان پوءِ ميڊيا سان ڳالهائيندي هن چيو ته عمران خان کي پنهنجي شڪست نظر اچي رهي آهي ۽ هو پاڪستانين جا ويزا بند ڪرائڻ چاهي ٿو. سمورا ثبوت عدالت ۾ جمع ڪرائي ڇڏيا آهن. مني لانڊرنگ ٿي نه پاڪستان جو ڪو پيسو چوري ٿو. عمران خان جي الزامن تي حيرانگي آهي هو خوابن ۽ خيالن جي دنيا ۾ رهندو آهي ۽ روزاني ڪوڙ ڳالهائيندو آهي.

 

اسيمبلي جو ماحول بهتر بڻائڻ سڀني پارٽين جي ذميواري آهي: خواجا آصف

اسلام آباد (اين اين آءِ) پاڻي ۽ بجلي جي وفاقي وزير خواجه محمد آصف چيو آهي ته عمران خان کي پاناما ڪيس ۾ شڪست نظر اچي رهي آهي، ان لاءِ قومي اسيمبلي جو ماحول خراب ڪرڻ چاهي ٿو، سومر تي ميڊيا سان ڳالهائيندي هن چيو ته هو پاناما ڪيس جي ڪارروائي تي نه ڳالهائيندي پر ايترو ضرور چوندو ته خان صاحب کي ان ڪيس ۾ شڪست نظر اچي رهي آهي ان لاءِ هو قومي اسيمبلي جي ماحول کي خراب ڪري رهيو آهي، ماحول کي خراب ڪرڻ جي شروعات پي ٽي آءِ نعرن سان ڪئي، پي ٽي آءِ جا ميمبر اسيمبلي جي ڊيسڪن تي چڙهي قومي اسيمبلي جي توهين ڪئي آهي، هن چيو ته اها ذميواري قومي اسيمبلي ۾ موجود سياسي پارٽين تي لاڳو ٿئي ٿي ته اهي اسيمبلي جي ماحول کي خوشگوار رکن، پارليامينٽ ۾ موجود سمورين سياسي پارٽين سان اهو معاهدو ٿيو هو ته جيڪڏهن قومي اسيمبلي ۾ 2 اپوزيشن جا ميمبر ڳالهائيندا ته اسان پاران ن ليگ جو هڪ ميمبر ان جي جواب ۾ پنهنجي ڳالهه ڪندو پر پي ٽي آءِ معاهدي جي خلاف ورزي ڪندي نعريبازي ڪئي جيڪو انهن کي زيب نٿو ڏئي، جيڪڏهن قومي اسيمبلي جو ماحول بهتر ٿيندو ته ڪارروائي سٺي نموني اڳتي وڌي سگهندي، جنهن سان پارليامان جو ادارو بهتري ڏانهن گامزن ٿيندو.

 

محمد زبير کي سنڌ جو 32 هون گورنر مقرر ڪرڻ جو آخري فيصلو، جلد قسم کڻندو

اسلام آباد (م.ڊ) وفاقي حڪومت پاران محمد زبير کي سنڌ جو نئون گورنر بڻائڻ جو فيصلو ڪيو ويو آهي، ذريعن جو چوڻ آهي ته وفاقي حڪومت سرڪار پاران ن ليگ اڳواڻ محمد زبير کي سنڌ جو نئون گورنر مقرر ڪرڻ جو فيصلو ڪيو ويو آهي، محمد زبير هِن وقت خانگائڻ واري ڪميشن جو چيئرمين آهي، محمد زبيرن جو چوڻ هو ته سنڌ سڀ کان وڌيڪ حساس صوبو آهي، ن ليگ اڳواڻ سينيٽر نهال هاشمي جو چوڻ آهي ته محمد زبير کي سنڌ جو نئون گورنر مقرر ڪرڻ بابت آخري فيصلو ڪيو ويو آهي، اهڙو فيصو وزيراعظم نواز شريف ۽ صدر ممنون حسين جي ملاقات دوران ڪيو ويو، خميس جي ڏينهن امڪان آهي ته محمد زبير پنهنجي عهدي جو حلف پڻ کڻي وٺي.36

 

حافظ سعيد ۽ سندس 5 ساٿين کي حفاظتي تحويل ۾ ورتو آهي: پنجاب جي گھرو وزارت جي تصديق نوٽيفڪيشن جاري

لاهور (م.ڊ) پنجاب جي گھرو وزارت پاران جماعت الدعوة جي امير حافظ سميت سندس پنجن ساٿين کي نظر بند ڪرڻ جي تصديق ڪري ڇڏي آهي، گھرو وزارت جي ذريعن جو چوڻ آهي ته حافظ سعيد سميت پنجن ڄڻن کي حفاظتي تحويل ۾ ورتو ويو آهي، پنجاب جي گھرو وزارت پاران عبدالله، عبيد، ظفر اقبال، عبدالرحمان، عابد ۽ قاضي ڪاشف نياز کي حفاظتي تحويل ۾ ورتو ويو آهي، گھرو وزارت جو چوڻ آهي ته پنجاب جي گھرو وزارت 4 ڏينهن اڳ پنجن ڄڻن جا نالا واچ لسٽ ۾ شامل ڪيا هئا، حافظ سعيد ۽ سندس ساٿين کي شيڊول 2 تحت حفاظتي تحويل ۾ ورتو ويو آهي، حفاظتي تحويل جو نوٽيفڪيشن پڻ جاري ڪيو ويو آهي.36

 

مني ٽريل قطر جي خطن سان نه پر بينڪن جي کاتن مان ٺهندي، خط مني لانڊرنگ جو اعتراف آهي: اعتزاز احسن

لاهور (اين اين آءِ) پ پ جي سينيئر اڳواڻ اعتزاز احسن چيو آهي ته مني ٽريل قطري خطن سان نه پر بينڪن جي کاتن سان ٺهندي، قطري شهزادي جا خط مني لانڊرنگ جو اعتراف آهن، اميد آهي ته عدالت اهڙو فيصلو نه ڏيندي جنهن سان انارڪي ڦهلجي، ڇا اها عجيب ڳالهه نه آهي ته سڄو خاندان هڪٻئي تي اربين رپين جا تحفا ڏئي رهيو آهي، شريف خاندان جو اهڙو شخص آهي جيڪو ڪاروبار جي نگراني ڪري ٿو، شريف فيملي جي سمورن ماڻهن جي بينڪ اڪائونٽن جي جاچ ڪرڻ تائين مني ٽريل ڄاڻڻ ممڪن نه آهي، لاهور هاءِ ڪورٽ ۾ ميڊيا سان ڳالهائيندي هن چيو ته شريف خاندان پنهنجي ملڪيت تسليم ڪري چڪو آهي، ملڪيت مڃڻ کانپوءِ سمورو وزن ثبوتن جو شريف خاندان تي آهي، عرب ملڪ ڪيش ٽرانزيڪشن قبول ڪن ٿا، مني ٽرائيل کانسواءِ شريف خاندان بچي نٿو سگهي، شريف خاندان لاءِ ڪيس مان ڪڍڻ انتهائي مشڪل ٿي ويو آهي، هن چيو ته ماضي ۾ سپريم ڪورٽ ڪرپشن جي بنياد تي برطرف ٿيل بينظير جي حڪومت کي بحال ڪرڻ کان انڪار ڪيو ۽ ان الزام تي نواز شريف جي حڪومت جلد بحال ڪئي وئي.

 

بندوق جي زور تي ڪنهن کان ڪوبه بيان وٺي سگهجي ٿو، اسحاق ڊار کان اٽڪ جيل ۾ ورتل بيان جي ڪابه اهميت نه آهي: انوشا رحمان

اسلام آباد (اين اين آءِ) انفارميشن ٽيڪنالوجي جي مملڪتي وزير انوشا رحمان چيو آهي ته بندوق جي زور تي ڪوئي به بيان وٺي سگهجي ٿو اسحاق ڊار کان اٽڪ جيل ۾ ورتل بيان جي ڪابه اهميت نه آهي اسٽيج تي جمريون هڻڻ سياست نه آهي عمران خان کي پنهنجي ڪاري ناڻي جو پئسو اڇو ڪرڻ تي به شرم نٿو اچي پانامه ڪيس جي ٻڌني دوران ميڊيا سان ڳالهائيندي انوشا رحمان چيو ته اسٽيج تي جمريون هڻڻ ڪا سياست نه آهي تحريڪ انصاف جي سياست پاڪستان جي بنيادي مسئلن جي لاءِ نه پر وزيراعظم جي خاندان جي ڪردارڪشي آهي انهن جي بندوقن جو رخ پهريان نوازشريف، پوءِ مريم نواز ۽ هاڻي اسحاق ڊار ڏانهن آهي حديبيه پيپر ملز جو معاملو گذريل 25 سالن کان بحث هيٺ اچي رهيو آهي حديبيه پيپر ملز مرده گهوڙو آهي انوشا رحمان چيو ته آمريت جي دور ۾ اهڙا بيان سنجيده نه هوندا آهن هن چيو ته اسان انصاف جي اميد رکون ٿا حديبيه پيپر مل ڪيس کي 13 ججن ٻڌو ۽ ختم ڪيو ان لاءِ هاڻي ان کي دفن ڪرڻ جي اجازت ملڻ گهرجي. ان موقعي تي دانيال عزيز چيو ته پانامه ڪيس ۾ پي ٽي آءِ کي شڪست ٿي چڪي آهي هو ماڻهن جي ذهنن سان کيڏي رهيا آهن ۽ ڪوڙا الزام هڻي ڪيس کي سهارو ڏيئي رهيا آهن جهانگير ترين ۽ عمران خان خود اعترافي بان ڏيئي چڪا آهن مائره حميد چيو ته عمران خان ڪل 5000 ماڻهن جي جلسي ۾ پانامه پيپر وڪرو ڪرڻ جي ڪوشش ڪئي آهي ان جي جلسن مان ثابت ٿي چڪو آهي ته ان جا پيپر رد ٿي چڪا آهن هن چيو ته آمريڪا ويزا بند ڪرڻ جي حوالي سان عمران خان جو بيان غيرذميوارانه هو.

 

نواز شريف اسيمبلي ۾ لکيل تقرير پڙهي، نواز شريف وٽ ثبوت آهن ته پيش ڪري: عمران خان

اسلام آباد (اين اين آءِ) پي ٽي آءِ جي چيئرمين عمران خان چيو آهي ته پاناما ڪيس جو جيڪو فيصلو ٿيندو اسان کي قبول هوندو، اسحاق ڊار جي اعترافي بيان کي پڙهيو وڃي ته سڄي مني ٽريل موجود آهي، سومر تي سپريم ڪورٽ ٻاهران ميڊيا سان ڳالهائيندي عمران خان چيو ته اسميبلي ۾ تقرير ۾ نواز شريف واضح چيو آهي ته اسان وٽ سڀ دستاويز آهن، جڏهن چاهيندو پيش ڪنداسين، جڏهن ته هاڻ انهن جا بيان تبديل ٿيندا پيا وڃن، اڄ ان جو وڪيل چئي رهيو آهي ته دستاويز نه آهن، هن وقت ڪيش ۾ ڪاروبار ٿيندو هو ان کي خبر نه هئي ته سپريم ڪورٽ ۾ تلاشي ٿيندي، ان لاءِ بيان تبديل ٿيندا پيا وڃن، هن چيو ته اسان شروع کان چئي رهيا آهيون ته گلف اسٽيل نقصان ۾ هئي ته انهن وٽ پيسو ڪٿان آيو، اسحاق ڊار جو اعترافي بيان آهي اهو مني ٽرائيل آهي، ان کي پڙهيو وڃي ته ان جي بيان ۾ سڄي مني ٽريل موجود آهي. هن چيو ته بي بي سي جرمن اخبار آءِ سي آءِ جي چئي رهيا آهن ته مني لانڊرنگ ٿي آهي، جڏهن ته هتي سڀ ادارا آمريت وانگر ڪنٽرول ۾ آهن ته توهان ڪنهن جي طاقت ۽ ڏوهه کي پڪڙي نٿا سگهو، جڏهن وزيراعظم پنهنجي ڪرپشن بچائي ٿو ته پاڻ سان طاقت جي به ڪرپشن بچائي ٿو، هن ملڪ جو ڇا مستقبل آهي جتي ايف بي آر ڪاغذ ٺاهي رهي آهي، نيب ان جي ماتحت ڪم ڪري رهي آهي.

 

فرانسيسي سندري مس ڪائنات جو تاج ماڻي ورتو

منيلا (شوبز نيوز) هلندڙ سال مس ڪائنات جو تاج فرانسيسي سندري آئرس متنائري پنهنجي مٿي تي سجائي ورتو آهي. فلپائن جيشهر منيلا ۾ مس يونيورس جو مقابلو ٿيو، جنهن ۾ 13 سندرين فائنل ۾ جڳهه ٺاهي. فائنل ۾ فرانسيسي سندري آئرس متنائري پنهنجي ادائن سان ججن جون کٽيندي مس ڪائنات جو تاج پنهنجي مٿي تي سجائي ورتو. ان موقعي تي آئرس متنائري جو چوڻ هو ته منهنجو اهو اعزاز ماڻهن جي مدد ڪرڻ لاءِ آهي.

شاهه رخ خان جو پٽ ابرام ايندڙ نسل جو سپراسٽار ٿيندو

ممبئي(شوبز نيوز) بالي ووڊ جي ڪنگ شاهه رخ خان چيو آهي ته نئين نسل جو سپر اسٽار منهنجو پٽ ابرام خان هوندو. شاهه رخ خان نئين رليز ٿيل فلم رئيس جي ڪاميابي بابت ڳالهائيندي چيو ته بالي ووڊ ۾ خانن جو جادو ختم ٿيڻ جو جواب ڏيندي هن چيو ته منهنجو ننڍو پٽ ايندڙ سپر اسٽار آهي، ان کي منهنجي نئين فلم رئيس پسند آئي آهي، هو به عام ماڻهن وانگر ليلا او ليلا جي گيت تي ڊانس ڪندو رهيو ۽ جڏهن آئون غنڊن کي ماري رهيو هئس ته هو چئي رهيو هو “گو پاپا گو”. هن وڌيڪ چيو ته مون کي ايڪشن فلمون ڪرڻ جو موقعو ئي نه مليو آهي، ننڍو هئس ته منهنجو ايڪشن به ٺيڪ هو، ڇو ته آئون جمناسٽر به هئس ۽ ڊوڙ به سٺي لڳائي ڇڏيندو هئس پر بدقسمتي آهي جو مون کي ايڪشن ڪردار نه مليا آهن، هاڻي وقت گذري ويو آهي ۽ مون کي ايڪشن سين پسند ناهن.

 

ٽي ٽوئنٽي بلائينڊ ورلڊ ڪپ، پاڪستان جي فتح سان شاندار شروعات

نئين دهلي (اسپورٽس نيوز) ٽي ٽوئنٽي بلائينڊ ورلڊ ڪپ ۾ پاڪستان جي ٽيم انگلينڊ جي ٽيم کي شڪست ڏئي فاتحاڻي شروعات ڪئي آهي. نئين دهلي جي سري فورٽ ڪرڪيٽ گرائونڊ ۾ پاڪستان ٽاس کٽي نيوزي لينڊ کي بيٽنگ جي دعوت ڏني. ڪيويز بيٽسمين پاڪستاني بالرن سامهون ٽڪي نه سگهيا ۽ مقرر اوورن ۾ 7 وڪيٽن تي رڳو 112 رنس اسڪور ڪيو. ميڪ ڪاسڪل 27 رنسن سان ڪامياب بيٽسمين رهيو. پاڪستان طرفان محمد جميل 2 وڪيٽون حاصل ڪيون. 113 رنسن جي ٽارگيٽ ۾ پاڪستان بدر منير جي جارحاڻي اننگز سان 7.1 اوورن ۾ هدف حاصل ڪري ورتو. اوپننگ بيٽسمين هڪ ڇڪي ۽ 17 چوڪن جي مدد سان 35 بالن تي 92 رنسن جي انگز کيڏي ٽيم کي فتح ڏياري. محسن خان15 رنس تي ناٽ آئوٽ رهيو، بهترين بيٽنگ تي بدر منير کي مين آف دي ميچ قرار ڏنو ويو. پاڪستاني ٽيم جو پهرين فيبري تي روايتي حريف ڀارت سان مقابلو ٿيندو.