تازيون خبرون

Daily Archives: December 26, 2016

انور مجيد سان لاڳاپن جو اعتراف، ڊاڪٽر عاصم جي خاندان پاڪستان ٺاهيو: آصف زرداري

ڪراچي (اين اين آءِ) اڳوڻي صدر آصف علي زرداري چيو آهي ته اسان کي ڪوتاهين تي سٺي نظر وجهڻي پوندي، ڊاڪٽر عاصم جي خاندان پاڪستان بڻايو، عدالتن تي اعتماد آهي، اميد آهي ته کيس انصاف ملندو، انور مجيد سان لاڳاپن کان انڪار نه آهي، جڏهن ته ڇاپن جي باري ۾ گهرو وزير کان پڇيو وڃي، 4 مطالبن تي پارٽي پاليسي جو اعلان 27 ڊسمبر تي ڪندس، آئين ته چونڊن جي اها ئي تاريخ ڏيندو آهي، ماڻهو اهڙيون حالتون پيدا ڪن ٿا ته چونڊون جلد ٿين، مزار قائد تي حاضري ۽ فاتح خواني کانپوءِ ميڊيا سان ڳالهائيندي هن چيو ته پاڪستان کي ترقي جي رستي هلائينداسين، قائد جي خواب موجب پاڪستان کي اڳتي وٺي وينداسين، هن چيو ته پاڪستان هميشه مضبوط کان مضبوط ٿي رهيو آهي، هن چيو ته ميڊيا کي گذارش آهي ته مثبت انداز ۾ ڪوتاهين تي نظر وجهي، خبر مان خبر نه ڪڍي، هن چيو ته انور مجيد جو معاملو عدالت ۾ آهي، هاڻ ڏسڻو آهي ته اهو ڪيستائين وڃي ٿو، مزار قائد تي حاضري جي موقعي تي ان سان گڏ سنڌ جو وڏو وزير سيد مراد علي شاهه ۽ سنڌ ڪابينا جا ميمبر به ساڻس گڏ هئا.

 

نواز شريف جا ووٽ ٽوڙڻ جي ڪوشش ۾ عمران خان پنهنجا ماڻهو وڃائي ويٺو: مريم اورنگزيب

اسلام آباد(م.ڊ) سڌُ سماءُ بابت مملڪتي وزير مريم اورنگزيب چيو آهي ته وزير اعظم نواز شريف جا ووٽ ٽوڙڻ جي ڪوشش ڪندي ڪندي عمران خان ماڻهو وڃائي ويٺو آهي. عمران خان 2018 تائين انتظار ڪري سڄو پاڪستان نواز شريف کي ووٽ ڏيندو. عمران خان جي بيان تي پنهنجو رد عمل ظاهر ڪندي مريم اورنگزيب چيو ته عمران خان پارٽي مان گهڻن ماڻهن کي ڪڍندو. اسلام آباد ۾ تقريب کي خطاب ڪندي هن چيو ته وزير اعظم جي تعليم سڌاري واري پروگرام تحت سرڪاري شعبي جي اسڪولن ۾ ٻارن جي لاءِ سهولتون ۾ اضافو ڪيو پيو وڃي. پهرين جنوري 2017ع تي ٻارن کي ٽرانسپورٽ سميت ٻيون سهولتون ڏيڻ سان گڏوگڏ استادن جي تربيت به ڪرائي ويندي.

 

باني پاڪستان جو جنم ڏينهن جوش ۽ جذبي سان ملهايو ويو، توپن جي سلامي سان ڏينهن جي شروعات

اسلام آباد/ڪراچي(م.ڊ) باني پاڪستان باباءِ قوم قائد  اعظم محمد علي جناح جي پيدائش جو ڏينهن اڄ عقيدت ۽ احترام سان ملهايو ويو، ڪراچي ۾ مزار قائد تي گارڊز جي تبديلي جي پروقار تقريب، پاڪستان آرمي جي ڪيڊٽس گارڊز جا فرض سنڀالي ورتا. قائد  اعظم محمد علي جناح رح جي 140 هين يوم پيدائش جي سلسلي ۾ سرڪاري ۽ غير سرڪاري تنظيمن ۽ سياسي پارٽين جي انتظام هيٺ باوقار تقريبون، سيمينار، ڪانفرنسز، مذاڪرا ۽ مباحثا منعقد ڪيا ويا، صبح سويري وفاقي ۽ صوبائي گادي واري شهرن ۾ ڏينهن جي شروعات توپن جي سلامي سان ٿي، نماز فجر کانپوءِ قوم جي درجن جي بلندي، ملڪ جي بقا ۽ سلامتي ۽ امن ۽ ترقي لاءِ خصوصي دعائون گهريون ويون. قائد جي ڏينهن جي مناسبت سان سڀني کان اهم تقريب ڪراچي ۾ مزار قائد تي ٿي، جتي مزار قائد تي گارڊز جي تبديلي جي باوقار تقريب منعقد ٿي، تقريب جو مهمان خاص ڪمانڊنٽ پي ايم اي ڪاڪول ميجر جنرل عبدالله ڊوگر هو، تقريب ۾ گارڊز جا فرض پي ايم اي ڪاڪول جي ڪيڊٽس کي ڏنا ويا.صدر ممنون حسين چيو آهي ته قائد اعظم محمد علي جناح کي ڀيٽا پيش ڪرڻ جو بهترين طريقو اهو آهي ته اسان سندس رستي تي عمل ڪيون. صدر ممنون حسين پنهنجي جاري ڪيل بيان ۾ چيو ته آئون سمجهان ٿو ته قائد اعظم کي ڀيٽا پيش ڪرڻ جو بهترين طريقو اهو آهي ته ان جي فڪر ۽ تعليم تي سچي دل سان عمل ڪري پنهنجي صلاحيتن کي پاڪستان جي تعمير ۽ ترقي جي لاءِ وقف ڪيون. عزت نفس ۽ نظرياتي اساس تي ثابت قدمي سان ڄمي رهڻ  سندس جي شخصيت جو نمايان رخ هو، امانت ۽ ديانت ان جي ذاتي ڪردار کي فخر جوڳو بڻايو. وزير اعظم نواز شريف چيو آهي ته سڄي قوم الله تعاليٰ جي ٿورائتي آهي ته ننڍي کنڊ جي مسلمانن کي هڪ عظيم قائد سان نوازيو جنهن اسان کي هڪ آزاد ملڪ ڏنو،  قائد اعظم محمد علي جناح کي ڀيٽا پيش ڪرڻ جو بهترين طريقو اهو آهي ته اسان سندس تعليم تي عمل پيرا ٿيڻ جو عزم ڪيون. قائد اعظم محمد علي جناح جي 140هين سالگرهه جي موقعي تي پنهنجي پيغام ۾  وزير اعظم نواز شريف چيو ته قائد اعظم محمد علي جناح دنيا جي نقشي تي هڪ  خودمختيار رياست کي قائم ڪرڻ جي لاءِ پنهنجي جدوجهد ۾ ڇڙوڇڙ مسلمان کي هڪ جهنڊي هيٺان جمع ڪيو، پنهنجي مثالي ڪردا ۽ قائداڻي صلاحيتن تحت قائد اعظم  اڄ به اسان جي لاءِ اڳواڻي جو ذريعو آهي.

 

ڪنهن جي وڃڻ سان معاملا بيهندا ناهن، آصف زرداري جي واپسي مخالفن جون ننڊون اڏائي ڇڏيون: وڏو وزير

ڪراچي(اسٽاف رپورٽر) سنڌ جي وڏي وزير سيد مراد علي شاھ چيو آهي ته قائداعظم جي قول موجب ملڪ جي ترقي کي هٿي ڏيڻي پوندي. اها ڳالهه هن اڄ پنهنجي ڪابينا سان گڏ پاڪستان اڏيندڙ قائداعظم محمد علي جناح جي 141هين جنم ڏينهن جي موقعي تي مزار قائد تي گل چڙهائي ۽ فاتحه خواني کانپوءِ ميڊيا جي نمائندن سان ڳالهه ٻولهه ڪندي چئي. هن چيو ته پاڪستان اڏيندڙ قائداعظم محمد علي جناح پنهنجي جدوجهد سان پاڪستان جي آزادي جي موومينٽ کي شروع ڪيو ۽ هن اسان کي پاڪستان ٺاهي ڏنو. اسان سڀني جو فرض آهي ته قائداعظم جي سنهري اصولن تي عمل ڪندي پاڪستان کي وڌيڪ مضبوط ۽ عوام جي خدمت ڪيون. اسان پاڪستان پيپلز پارٽي جي چيئرمين بلاول ڀٽو زرداري ۽ شريڪ چيئرمين آصف علي زرداري جي اڳواڻي ۾ قائدعوام جي سنهري اصولن تي هلندي ملڪ ۽ قوم جي خدمت ڪيون پيا. هن چيو ته بلاول ڀٽو زرداري چئن مطالبن کي آڏو رکيو آهي جيڪي جائز آهن. هڪ سوال جي جواب ۾ هن چيو ته جنوري جي پهرين هفتي ۾ ايپڪس ڪميٽي جو اجلاس گهرائينداسين. وڌيڪ چيو ته 2018 جي چونڊن ۾ پيپلز پارٽي ضرور ڪامياب ٿيندي. هڪ سوال جي جواب ۾ وڏي وزير چيو ته فقط هڪ آئي جي سنڌ جو مسئلو ڪونهي ٻيا به معاملا آهن. ڪنهن جي به موڪل تي وڃڻ سان ڪم ۾ خلل ناهي پوندو. هن چيو ته ڊاڪٽر عاصم جي دهشتگردي جي ڪيس ۾ ضمانت ٿي چڪي آهي. هن وڌيڪ چيو ته قانوني طور تي مڪاني ادارن کي اختيارات ڏنا ويا آهن. ڪراچي واسين جي بهتري لاءِ گڏجي ڪم ڪنداسين. ڪوشش آهي ته ڪراچي ۾ امن برقرار هجي. هن وڌيڪ چيو ته ميئر کي اختيار ڏيڻ منهنجي وس ۾ ڪونهي. ڪوبه سياسي ڳالهه ڪرڻ گهري ٿو ته هن جو حق آهي. وڏي وزير چيو ته اختيارن جي روئڻ بجائي ڪم ڪري ڏيکارين، اسان گڏ آهيون. وڏي وزير چيو ته چيئرمين آصف علي زرداري ڏيڍ سال کانپوءِ ملڪ واپس آيو آهي ۽ مخالف ڌر سندن اچڻ تي پريشان آهي. هن چيو ته 18هين ترميم اسان جي پارٽي جي شريڪ چيئرمين جي وڏي ڪاميابي آهي. هڪ ۽ ٻئي سوال جي جواب ۾ هن چيو ته انور مجيد جي معاملي کي قانون موجب ڏسي رهيا آهيون. هن چيو ته ملڪ بغير وزير خارجه جي هلڻ ڪنهن کي نظر نٿو اچي پر آئي جي سنڌ جو موڪل تي وڃڻ سڀني کي نظر ايندو آهي. وڏي وزير چيو ته آصف علي زرداري مشڪل حالتن ۾ ملڪ جو صدر رهيو آهي. پارليامينٽ سڀني کان وڏو ادارو آهي. پاناماليڪس جي معاملي کي اهو ئي ڏسي. هن وڌيڪ چيو ته آصف علي زرداري گذريل سال ئي واپس اچي وڃي ها پر صحت ٺيڪ نه هجڻ سبب نه اچي سگهيو. هن چيو ته اڳوڻو صدر آصف علي زرداري 27 ڊسمبر جو شهيد محترمه بينظير ڀٽو جي ورسي تي خطاب ڪندو.

 

اقليتي برادري ملڪ جي ترقي ۽ خوشحالي ۾ فعال ڪردار ادا ڪندي رهي آهي: ممنون حسين/نواز شريف

اسلام آباد(م.د) وزير اعظم نواز شريف چيو آهي ته اقليتي برادري ملڪ جي ترقي ۽ خوشحالي ۾ فعال ڪردار ادا ڪندي رهي آهي. مسيحي برادري پاڪستان جي ترقي، خوشحالي ۽ ۽ امن جي لاءِ ڀرپور ڪردار ادا ڪندي رهي. ڪرسمس جي موقعي تي جاري بيان ۾ وزير اعظم چيو ته اقليتي برادري ڪيترن ئي شعبن ۾ خدمتون سر انجام ڏئي رهي آهي ۽ ملڪ جي ترقي ۽ خوشحالي ۾ فعال ڪردار ادا ڪري رهي آهي. سماجي ۽ اقتصادي ترقي، صحت ۽ تعليم جي شعبن ۾ مسيحي برادري کي ساراهيان ٿو. هن وڌيڪ چيو ته مسيحي برادري جي حب الوطني، خدمت ۽ ملڪ سان وابستگي کي قدر جي نگاهه سان ڏسان ٿو ۽ اميد آهي ته اقليتي برادري ملڪ جي ترقي ۽ خوشحالي جي لاءِ خدمتون جاري رکندي.

 

فاطمه ڀٽو ۽ ذوالفقار جونيئر منهنجي خاندان جو حصو آهن: بلاول ڀٽو زرداري

ڪراچي (اين اين آءِ) پ پ چيئرمين بلاول ڀٽو زرداري چيو آهي ته آصف زرداري ڪهڙي سرپرائيز ڏيندو ان لاءِ 27 ڊسمبر جو انتظار ڪرڻو پوندو، فاطمه ڀٽو ۽ ذوالفقار جونيئر منهنجي خاندان جو حصو آهي، فاطمه ۽ ذوالفقار جونيئر سان ڪافي عرصي کان ڪو به رابطو نه ٿيو آهي پر دل جا دروازا هميشه انهن لاءِ کليل آهن، اهڙن خيالن جو اظهار هن قائد اعظم محمد علي جناح جي مزار تي حاضري کانپوءِ ميڊيا سان ڳالهائيندي ڪيو، بلاول ڀٽو زرداري سان گڏ سنڌ جو وڏو وزير مراد علي شاهه، شهلا رضا، منظور وساڻ، مولا بخش چانڊيو ۽ ٻيا سنڌ اسيمبلي جا ميمبر به گڏ هئا، انهن گلن جي چادر چاڙهي ۽ فاتح خواني ڪئي، بلاول ڀٽو چيو ته قائد اعظم سياسي جدوجهد ذريعي اسان کي آزادي ڏياري، قائد اعظم جو خواب روشن خيال هو، اسان پاڪستان کي قائد اعظم جي ويزن موجب ٺاهينداسين، هن چيو ته آصف زرداري ڪهڙي سرپرائيز ڏيندو ان لاءِ 27 ڊسمبر جو انتظار ڪرڻو پوندو، پنهنجي مامي مرتضيٰ ڀٽو جي ٻارڙن جي حوالي سان هن چيو ته فاطمه ۽ ذولفقار جونيئر منهنجي خاندان جو حصو آهن.

 

پ پ ن ليگ سان عدليه جو هميشه کان جدا جدا ورتا رهيو آهي: خورشيد شاهه

لاهور (اين اين آءِ) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته پاڪستان پيپلز پارٽي ۽ ن ليگ سان عدليه جو هميشه الڳ الڳ ورتا رهيو آهي اهو ئي سبب آهي ته ڪوئيٽا ڪميشن جي رپورٽ اچڻ تي چوڌري نثار استعيفيٰ ڏيڻ بدران عدليه جي توهين ڪري رهيو آهي، ن ليگ عدليه تي هميشه حملا ڪندي آئي آهي، چوڌري نثار به ساڳي تاريخ ورجائي رهيو آهي، نجي ٽي وي کي انٽروويو ۾ هن چيو ته هن ملڪ ۾ سمورا قانون ۽ احتساب جا ادارا صرف پ پ لاءِ آهن، هڪ ئي معاملي ۾ عدليه جو پ پ لاءِ ٻيو قانون هوندو آهي ته ن ليگ لاءِ هڪ ٻيو قانون هوندو آهي، اڳوڻي چيف جسٽس افتخار چوڌري اسان جي حڪومت کي هلڻ ئي نه ڏنو، اسان جي چونڊيل وزيراعظم کي گهر ڀيڙو ڪيو، مان اڄ به اعلان ڪريان ٿو ته افتخار چوڌري جو رويو پ پ سان سٺو نه هو، اسان سان جيڪو ڪجهه ڪيو ويو اهو پوري عدليا جي تاريخ ۾ ياد ڪيو ويندو. هن چيو ته ڪوئيٽا ڪميشن جي رپورٽ ۾ چوڌري نثار کي ذميواري قرار ڏنو ويو آهي، ان کي پنهنجي ناڪامي مڃڻي پوندي، پر هو سرعام ڪميشن جي رپورٽ جي توهين ڪري رهيو آهي، 27 ڊسمبر تي اهم اعلان ٿيندا.

 

27 ڊسمبر خير سان گذري ويندو، اسان کي زرداري صاحب جا فرمان ٻڌڻ ڏنا وڃن، بعد ۾ پنهنجون گذارشون پيش ڪنداسين: خواجه سعد رفيق

لاهور (اين اين آءِ) 27 ڊسمبر خير سان گذري ويندو، اسان کي زرداري صاحب جا فرمان ٻڌڻ ڏنا وڃن، ان کانپوءِ اسان پ پ کي پنهنجون گذارشون پيش ڪنداسين، هو پنهنجي نئين پٽ جي سياست کي تربيت ڏئي، پاڪستان ريلوي ڪرسمس پيس ٽرين هلائي هڪ تاريخ ڪم ڪيو آهي، دهشتگردي پاڪستان جو اصل چهرو نه آهي پر مذهبي هم آهنگي ۽ امن کي هٿي ڏيڻ لاءِ جيڪو ڪرسمس پيس ٽرين هلائي وئي آهي اهو اصل چهرو آهي، اهڙن خيالن جو اظهار وفاقي وزير خواجه سعد رفيق ۽ قومي اسيمبلي جي اسپيڪر سردار اياز صادق ريلوي اسٽيشن تي ڪرسمس پيس ٽرين جي دوري جي موقعي تي ميڊيا سان ڳالهائيندي ڪيو، ان موقعي تي بادشاهي مسجد جي خطيب عبدالخبير آزاد ۽ فادر جيمز سميت ساڻس ٻيا به گڏ هئا، قومي اسيمبلي جي اسپيڪر چيو ته پاڪستان ريلوي ڪرسمس پيس ٽرين هلائي هڪ تاريخي ڪم ڪيو آهي، خواجه سعد رفيق چيو ته 27 ڊسمبر ايندو ۽ خير سان گذري ويندو، آصف علي زرداري 18 مهينن کانپوءِ وطن واپس آيو آهي، اسان ڪا سخت ڳالهه ڪري ان جي خوشي کي خراب ڪرڻ نٿا چاهيون اسان چاهيون ٿا ته هو هتي رهي ۽ پنهنجي پارٽي جي قيادت ڪري ان سان گڏ پنهنجي پٽ جي سياسي تربيت به ڪري، چانڊيو صاحب اسان جو دوست آهي، اسان کي ان جون ڳالهيون خراب نه لڳنديون آهن، هن چيو ته اسان اڄ جي ڏينهن مسيحي برادري جي خوشين ۾ برابر جا شريڪ آهيون.

 

بينظير ڀٽو جي شهادت جو ڏينهن پاڪستان جو ڪارو ڏينهن هو: رضا رباني

لاڙڪاڻو(بيورو) سينيٽ جي چيئرمين رضا رباني چيو آهي ته بينظير ڀٽو جي شهادت جو ڏينهن پاڪستان جي تاريخ جو ڪارو ترين ڏينهن هو. پرويز مشرف جي بيان عداليه کي تڪراري بڻائڻ جي ڪوشش ڪئي ته پنهنجو ڪم احسن طريقي سان سر انجام ڏئي رهي آهي. سينيٽ چيئرمين ڳڙهي خدا بخش پهچڻ تي ميڊيا سان ڳالهائيندي چيو ته بينظير ڀٽو کي جنهن ڏينهن شهيد ڪيو ويو اهو پاڪستان جو ڪارو ترين ڏينهن هو ۽ جيڪڏهن اڄ هوءَ زنده هجي ها ته اڄ ملڪ سياسي طور تي مضبوط هجي ها. شهيد بينظير کي شهيد ڪرڻ جو مقصد ئي ملڪ ۾ عدم استحڪام پيدا ڪرڻ هو. هن وڌيڪ چيو ته پاڪستان جون عدالتون احسن طريقي سان پنهنجو ڪم سر انجام ڏئي رهيون آهن.

 

قائد اعظم جي دشمنن مڃيو ته هو ايماندار هو، اقليتن جي حقن کي تحفظ ڏيڻ اسان جي ذميواري آهي: عمران خان

اسلام آباد(م.د) پاڪستان تحريڪ انصاف جي سربراهه عمران خان چيو ته قائد اعظم جي دشمنن به مڃيو ته هو ايماندار هو، 31 آڪٽوبر تي صوابي ۾ ڪارڪنن ڳوڙها آڻيندڙ گيس جو مقابلو ڪيو، اقليتن جي حقن کي تحفظ ڏيڻ اسان جي ذميواري آهي. صوابي ۾ جلسي کي خطاب ڪندي عمران خان چيو ته قائد اعظم دلير انسان هو ۽ هن هار نه مڃي، سي پيڪ سان ملڪ جي ٻارن جو مستقبل سنورجي ويندو، اسان جي ذميواري آهي ته اسان اقليتن جي حقن کي تحفظ ڏيون. هن چيو ته سي پيڪ تي سڄي پاڪستان کي مبارڪ ڏيان ٿو، سي پيڪ منصوبو ملڪ جي قسمت بدليندو.  چين هميشه پاڪستان جو دوست رهيو آهي جڏهن ته سچو دوست اهو ئي هوندو آهي جيڪو ڏکئي وقت ۾ توهان سان گڏ هلي. نواز شريف پنهنجي زبان تي قائم ناهي رهندو، اسان جو چين سان ڪو به مسئلو ناهي، چين ڏکئي وقت ۾ پاڪستان جو ساٿ ڏنو. هن چيو ته سمورن صوبن کي پنهنجا حق ملڻ گهرجن، 2016ع تائين سي پيڪ تي معاهدن بابت ڪنهن کي به ڄاڻ ناهي، ناانصاف ٿيندي آهي ملڪ ۾ ڏڦيڙ وڌندو آهي، ٽنهي صوبن کي سي پيڪ مان حصو ڏنو وڃي، ڪي پي ڪي کي سي پيڪ مان حصو نه پيو ڏنو وڃي، ڀارت جڏهن ته پاڪستان کي دهشتگرد ملڪ چوڻ جي ڪوشش ڪئي ته چين اسان جو ساٿ ڏنو. هن وڌيڪ چيو ته ننڍا صوبا گڏجي وفاق کان سي پيڪ بابت پڇا ڪن، بلوچسان، خبيرپختونخواهه ۽ سنڌ کي انهن جو حق ملڻ گهرجي، جڏهن حق نه ملندا ته ڏڦيڙ وڌندو، پنهنجي مسيحي ڀائرن کي ڪرسمس جون واڌايون پيش ڪيان ٿو. جيڪڏهن آئون نواز شريف جي جاءِ تي هجان ها ته پهرين ننڍن علائقن جي باري ۾ سوچيان ها.  سي پيڪ منصوبن ۾ ڪي پي ڪي سان ڪيل واعدا پورا نه پيا ڪيا وڃن، اسفنديار ولي چئي ٿو ته عمران خان سي پيڪ جي حمايت ڪڏهن به نه ڪندو، سي پيڪ سان انڊسٽريون بڻجنديون ۽ روزگار ملندو، اڄ بلوچ عوام پنهنجو حق گهري رهيو آهي. هن وڌيڪ چيو ته بلوچستان جي عوام سان انصاف ناهي ٿي رهيو، مسلمان پنهنجن حقن جي بيهندو آهي، جانورن جا ڪي به حق ناهن هوندا، بلوچستان ۾ اربين رپيا سيڪيورٽي تي خرچ ڪيا پيا ويا وڃن پر انصاف نٿو ملي.