تازيون خبرون

Daily Archives: December 22, 2016

القاعده ۽ ٽي ٽي پي جو خطرو ٽاري ڇڏيو، پاڪستان ۾ داعش جو وجود ناهي:نواز شريف

سرائيوو(م.ڊ) وزير اعظم نواز شريف بوسنيا جي وزير اعظم ڊاڪٽر  ڊينيس زوويدي جي آفيس پهچي ويو، جتي هڪ تقريب منعقد ڪئي وئي ۽ ان جو شاندار استقبال ڪيو ويو، جڏهن ته هٿياربند فوج جي چست دستي سلامي ۽ گارڊ آف آنر پيش ڪيو. تفصيل موجب وزير اعظم نواز شريف، خاتون اول ڪلثوم نواز ۽ صلاحڪار صارق فاطمي سان گڏ بوسنيا جي 3 ڏينهن جي دوري تي گذريل ڏينهن بوسنيا پهتو ته وزير ٽرانسپورٽ هن جو استقبال ڪيو، اڄ هو بوسنيا جي وزير اعظم ڊاڪٽر ڊينيس زوويدي جي آفس پهتو آهي،  جتي ان جي هم منصب استقبال ڪيو ۽ هڪ تقريب به منعقد ڪئي، تقريب ۾ پاڪستان ۽ بوسنيا جا قومي ترانا هلايا ويا ۽ هٿياربند فوج جي دستي سلامي ۽ گارڊ  آف آنر به پيش ڪيو. وزيراعظم نواز شريف چيو آهي ته پاڪستان سان لاڳاپا وڌائڻ واري بوسينيا جي ڪوششون تعريف جوڳيون آهن، بوسنيا جي وزيراعظم سان تمام فائدي واري ڳالهه ٻول ٿي آهي، بوسنيا سان واپار، بزنس، صنعت ۽ تعليم جي شعبي ۾ سهڪار وڌائڻ تي اتفاق ٿيو آهي، بوسيان جي شهر سرائيوو ۾ بوسنيائي هم منصب سان گڏيل پريس ڪانفرنس کي خطاب ڪندي نواز شريف جو چوڻ هو ته توانائيءَ جي شعبي ۽ پاڪستان ۾ توانائيءَ جي صورتحال تي به تفصيلي ڳالهه ٻول ٿي آهي، بوسنيا سان ٽيڪسٽائل ۽ زراعت جي شعبي ۾ سهڪار چاهيون ٿا، وزيراعظم نواز شريف وڌيڪ چيوته بوسنيا ۾ مختلف شعبن ۾ سهڪار جي لاءِ پاڪستان مان وفد موڪلڻ تي به ڪم ڪري رهيا آهيون، پاڪستان جي معيشيت ۾ ترقيءَ ۽ سيڙپڪاريءَ جي شرح ۾ واڌ ٿي رهي آهي، بوسنيا ۾ ڪاٺ ۽ ٽيڪسٽائيل جي شعبي ۾ واپار چاهيون ٿا، بوسنيا جي وزيراعظم سان عالمي معاملن تي ڳالهين جي ڏي وٺ ٿي آهي. وزيراعظم نواز شريف بوسنيا سان لاڳاپن تي ۽ وڌندڙ سهڪار واري عمل تي اطمينان جو اظهار ڪيو آهي. ٻي طرف وزير اعظم نواز شريف چيو آهي ته پاڪستان ۾ داعش جو ڪو به وجود ناهي، اسان القاعده ۽ ٽي ٽي پي جي خطرن کي موثر طور اڪلايو آهي. بوسنيا جي دوري تي موجود وزير اعظم نواز شريف پارلياماني گروپ سان ڳالهه ٻولهه ڪندي چيو آهي ته اسان القاعده ۽ ٽي ٽي پي جي گهرن  محفوظ ٿاڪن کي ختم ڪري ڇڏيو آهي. هن چيو ته اسان دهشتگردي خلاف جنگ ۾ ڳري قيمت ادا ڪري چڪا آهيون. وزير اعظم وڌيڪ چيو ته دهشتگردي جي گڏيل خطري کي ختم ڪرڻ  جو مڪمل عزم ڪيو آهي. ڀارت بابت ڳالهائيندي هن چيو ته پاڪستان ڀارت سان ڪشمير سميت سمورن تڪرارن جو پرامن حل چاهيون ٿا ۽ افغانستان سان لڳندڙ سرحد تي بارڊر مينيجمينٽ درست ڪري رهيا آهيون.

 

هر ڇوڪري ملڪ جو اثاثو آهي، انصاف جو بهترين نظام چاهيون ٿا: بلاول ڀٽو زرداري

ڪراچي (م.ڊ) پيپلز پارٽي جي چيئرمين بلاول ڀُٽي زرداريءَ چيو آهي ته نئين نسل کي ملڪي مسئلن جو حل ڪڍڻو پوندو. انصاف جو بهترين نظام قائم ڪرڻ چاهيون ٿا، اهو اسان لاءِ چيلنج آهي. هن سال ڪيتريون ئي عورتون غيرت جي نالي تي قتل ڪيون ويون. ڪراچيءَ جي آرٽس ڪائونسل ۾ نفيسه شاهه جي ڪتاب جي مهورتي تقريب کي خطاب ڪندي بلاول ڀُٽي جو چوڻ هو ته پاڪستان انساني حقن بابت مسئلن کي منهن ڏئي رهيو آهي، هر ڇوڪري ملڪ جو اثاثو آهي، مختلف علائقن ۾ عورتن کي قتل ڪيو پيو وڃي، عورتن تي سماجي ۽ اخلاقي طور تشدد ڪيو پيو وڃي، لاهور ۾ ڇوڪريءَ کي جيئرو ساڙي ماريو ويو، اسان قانون ته بدلائيندا رهندا آهيون پر ان تي عمل ٿيندي نظر نه پيو اچي، عورتن جي قتل ۽ انهن تي تشدد جو ڪو جواز پيش نه ٿو ڪري سگھجي، غيرت جي نالي تي قتل جو جواز پيش ڪرڻ افسوسناڪ عمل آهي، پ پ چيئرمين وڌيڪ چيو ته اسان محترمه بينظير ڀٽو سان انصاف نه ڪري سگھياسين، عورتن تي تشدد خلاف قانون سخت هجڻ گھرجي، سزا کي يقيني بڻايو ويندو، قانونن تي وڌيڪ اثرائتي انداز ۾ عمل جي ضرورت آهي.36

 

آءِ جي پنهنجي مرضي جو رکنداسين، چوڌري نثار هدايتون نه ڏي: وڏو وزير

ڪراچي (اين اين آءِ) سنڌ جي وڏي وزير سيد مراد علي شاهه چيو آهي ته چوڌري نثار آءِ جي سنڌ جي مقرري جي معاملي تي هدايتون نه ڏي،  آءِ جي جي مقرري پنهنجي مرضي سان ڪنداسين. ريگيوليٽري اٿارٽيز جي لاڳاپيل وفاقي وزارتن ڏانهن منتقلي مفادن ۾ ٽڪراءُ آهي ۽ اهڙي فيصلي سان سندن آزادي متاثر ٿيندي. پاڪستان جي وزيراعظم نواز شريف کي لکيل خط ۾ هن ان سلسلي ۾ 20 ڊسمبر تي اليڪٽرونڪ ۽ پرنٽ ميڊيا ۾ وسيع نموني رپورٽ ٿيندڙ خبر تي ڌيان ڇڪرايو، جنهن ۾ وفاقي حڪومت ريگيوليٽري اٿارٽيز جو انتظامي ڪنٽرول ڪيبنٽ ڊويزن کان لائين وزارتن ڏانهن منتقل ڪري ڇڏيو آهي. پنهنجي خط ۾ هن لکيو آهي ته ريگيوليٽري اٿارٽيز جهڙوڪ نيپرا، اوگرا، پي ٽي اي، پي پي آر اي، ايف اي بي کي لائين وزارتن جهڙوڪ پاڻي ۽ بجلي، پيٽروليم ۽ قدرتي وسيلن، ناڻي ۽ انفارميشن اينڊ ٽيڪنالاجي ۽ ٽيليڪام کي منتقل ڪرڻ مفادن جو ٽڪراءُ آهي، جنهن سان ريگيوليٽري اٿارٽيز جي آزادي کي سنگين خطرو ٿيندو ۽ سندن ڪم پڻ متاثر ٿيندو. سيد مراد علي شاهه چيو ته حقيقت ۾ ريگيوليٽري اٿارٽيز لائين وزارتن تحت ڪم ڪندڙ تجارتي آپريشن کي آزاداڻي طريقي سان ريگيوليٽ ڪندي آهي. گڏيل مفادن واري ڪائونسل (سي سي آءِ) جي مستقل سيڪريٽريٽ جي شق 154 (1) ۽ (3) تحت ريگيوليٽري اٿارٽيز کي ڪنٽرول ڪرڻ گهرجي. هن چيو ته ڪيبنٽ ڊويزن انهن ادارن کي ڪنٽرول ڪري رهي آهي، سمورين ريگيوليٽري اٿارٽيز وفاقي قانونسازيءَ جي فهرست جي انٽري نمبر ڇهه جي ڀاڱي ٻه جي وفاقي قانون تحت قائم ڪيون ويون آهن ۽ سي سي آءِ ان جي سپروائيز، ڪنٽرول ۽ پاليسي جوڙڻ جي حوالي سان مجاز فورم آهي. وڏي وزير سيد مراد علي شاهه پنهنجي خط ۾ چيو آهي ته وفاقي حڪومت ريگيوليٽري اٿارٽيز جو ڪنٽرول ڪيبنٽ ڊويزن کان لائين وزارتن ڏانهن منتقل ڪرڻ يڪطرفو فيصلو ڪيو آهن ۽ اهو سي سي آءِ جي منظوريءَ بنا ٿيو آهي، جيڪو سي سي آءِ جي ڊومين کان تجاوز ۽ غيرآئيني آهي. سنڌ جي وڏي وزير پنهنجي خط ۾ پاڪستان جي وزيراعظم کي درخواست ڪئي ته ان نوٽيفڪيشن کي فوري طور تي رد ڪيو وڃي ۽ عوام جي مفاد ۾ ريگيوليٽري اٿارٽيز کي آزاداڻي ريت ڪم ڪرڻ کي يقيني بڻايو وڃي ۽ سي سي آءِ جو اجلاس گهرايو وڃي جنهن ۾ ان مامري تي غور ويچار ڪيو وڃي. سيد مراد علي شاهه پنهنجي خط جي آخر ۾ ان ڳالهه تي زور ڀريو ته مون کي اميد آهي ته ان حوالي سان مثبت جواب حاصل ٿيندو

 

پاڪستان ۾ دهشتگردن جو ڪوبه نيٽ ورڪ ناهي، افغانستان ڪنهن جي چوڻ تي ملڪ سان لاڳاپا خراب نه ڪري: چوڌري نثار

لنڊي ڪوتل/طورخم(م.ڊ) وفاقي گهرو وزير چوڌري نثار جو چوڻ آهي ته مان پوري ذميواري سان چوان ٿو ته پاڪستان ۾ دهشتگردن جو ڪوبه نيٽ ورڪ موجود ناهي، پاڪ فوج، ايف سي ۽ سيڪيورٽي ادارن جي قربانين سان امن قائم ٿيو آهي، جنهن ۾ قبائلي عوام سڀ کان وڏو ڪردار ادا ڪيو آهي، هن چيو ته جنرل راحيل شريف دهشتگردي خلاف هميشه پهرين صف ۾ بيٺو، سندس سٺن ڪمن کي هميشه ياد رکيو ويندو، بارڊر مئنيجمينٽ کي بهتر ڪنداسين ۽ 2020ع تائين رڳو 6 ڪنٽرولڊ روٽس هوندا. طورخم بارڊر جي دوري تي هن ميڊيا سان ڳالهائيندي چيو ته افغانستان دوست ۽ پاڙيسري ملڪ آهي، ان جو احترام ڪريون ٿا، هو ڪنهن جي چوڻ تي پاڪستان سان لاڳاپا خراب نه ڪري، افغانستان جو دشمن اسان جو دشمن آهي.

 

حڪومت پاران چونڊ سڌارن بابت قانون جو مسودو اڄ سينيٽ ۾ پيش ڪرڻ جو اعلان

اسلام آباد(م.ڊ) وفاقي حڪومت چونڊ سڌارن بابت بل سڀاڻي سينيٽ ۾ پيش ڪرڻ جو اعلان ڪري ڇڏيو آهي،  ناڻي واري وفاقي وزير اسحاق ڊار چيو آهي ته چونڊ سڌارن جي ڪميٽي نئون قانون آڻڻ لاءِ جوڙي آهي، ججن کي بحال نه ڪرڻ تي اڳوڻي حڪومت کان ڌار ٿياسين. اسلام آباد ۾ چونڊ سڌارن بابت ميڊيا کي بريفنگ ڏيندي وفاقي وزير اسحاق ڊار چيو ته چونڊ سڌارن واري ڪميٽي جو مقصد نئون قانون جوڙڻ آهي. نئين قانون وارو بل اتفاق راءِ سان منظور ڪرائڻ چاهيون ٿا. هن چيو ته چونڊ سڌارن جي ڪميٽي ۾ سمورين پارٽين جي نمائندگي موجود آهي. چونڊ سڌارن لاءِ ڪميٽي جا 70 اجلاس ٿيا. هن چيو ته قومي اسيمبلي ۽ سينيٽ جا ميمبر  چونڊ سڌارن بابت پنهنجون تجويزون 30 ڏينهن ۾ پيش ڪن. ڪميٽي جي رپورٽ قومي اسيمبلي ۾ پيش ڪئي.  چونڊ قاعدن جو مسودو اليڪشن ڪميشن ۾ پيش ڪيو آهي. بل 2017ع جو مسودو سڀاڻي سينيٽ جي اجلاس ۾ پيش ڪيو ويندو.

 

ايندڙ ڏينهن ۾ ن ليگ وارن کي پاناما جي نالي سان چڙايو ويندو: مولابخش چانڊيو

حيدرآباد (بيورو) پاڪستان پيپلز پارٽي جي اڳواڻ ۽ سُڌ سماءَ واري صوبائي صلاحڪار مولابخش چانڊئي چيو آهي ته ايندڙ ڏينهن ۾ ن ليگ وارن کي پاناما جي نالي سان چڙايو ويندو، حڪمرانن وٽ ننڍن صوبن لاءِ ڪابه گنجائش ناهي، حيدرآباد ۾ صحافين سان ڳالهائيندي صوبائي صلاحڪار مولابخش چانڊئي جو چوڻ هو ته حڪمرانن جي ترقياتي منصوبن ۾ ننڍا صوبا شامل ناهن، بلاول ڀٽو زرداري اڃا هاڻ شروعات ڪئي آهي، پاناما ڪيس نه ڇڏينداسين، جمهوريت پسند ماڻهو اسان سان گڏ هلندا، چوڌري نثار منهنجو دوست ناهي، هو اسان لاءِ صرف گهرو وزير آهي، هن وڌيڪ چيو ته هڪ به مسلم ليگ جو معتبر ناهي جيڪو نواز شريف جي حق ۾ ڳالهائي، 27 ڊسمبر تي شروع ٿيندڙ تحريڪ پنهنجي منزل تائين پهچندي.

 

اڳوڻي ايس ايس پي رائو انوار خلاف جاچ مڪمل، الزامن کان آجو قرار

ڪراچي (اين اين آءِ)اڳوڻي ملير جي ايس ايس پي رائو انوار کي اپوزيشن ليڊر خواجا اظهار کي غيرقانوني گرفتار ڪرڻ واري معاملي تي جاچ ڪميٽي آجو قرار ڏئي ڇڏيو آهي، سنڌ جي وڏي وزير ايم ڪيو ايم جي سنڌ اسيمبلي ۾ پارلياماني اڳواڻ خواجا اظهارالحسن جي گرفتاري کانپوءِ رائو انوار جي خلاف اختيارن جو ناجائز استعمال جي الزام جي جاچ لاءِ هڪ ڪميٽي جوڙي هئي جنهن جي اڳواڻي ڊي آءِ جي سائوٿ ڊاڪٽر جميل ڪئي جنهن ۾ هن رائو انوار کي سمورن الزامن کان آجو قيرار ڏئي ڇڏيو آهي ذريعن موجب ڪجه عرصو اڳ ايس ايس پي رائو انوار ۽ سنڌ جي وڏي وزير وچ ۾ ملاقات ٿي هئي جنهن ۾ رائو انوار سنڌ جي وڏي وزير کي خواجا اظهار جي گرفتاري بابت قانوني گهرجن کان آگاهه ڪيو هو.

 

گذريل ٻن چئن سالن دوران عدالتي نظام جي بهتريءَ تي تمام گهڻو ڌيان ڏنو: چيف جسٽس سجاد علي شاهه

سکر (اي پي پي) سنڌ هاءِ ڪورٽ جي چيف جسٽس جسٽس سجاد علي شاهه چيو آهي ته گذريل ٻن چئن سالن دوران عدالتي نظام جي بهتريءَ تي تمام گهڻو ڌيان ڏنو ۽ شفافيت قائم ڪرڻ جي ڪوشش ڪئي، اِهو ئي سبب آهي جو 30 ججن کي ڪرپشن الزامن هيٺ نوڪرين مان فارغ ڪيو ويو ۽ هاڻي 22 ايڊيشنل ڊسٽرڪٽ اينڊ سيشن ججن جي خالي پوسٽن لاءِ ٿيل انٽرويوز ۾ وڪيلن مان رُڳو 10 جج چونڊجي سگهيا آهن، گنجائش وڌيڪ هوندي به اسان ميرٽ تي ڪابه سوديبازي نه ڪئي ۽ اهو طئي ڪيو ته جايون ڀلي خالي رهن پر نااهل ماڻهو ناهن وٺڻا. خيرپور ضلعي جي تعلقي ٺري ميرواهه ۾ 32.361 ملين رپين جي لاڳت سان مڪمل ٿيل جڊيشل ڪامپليڪس ۽ تعلقه بار لائبريريءَ جي افتتاح کانپوءِ بار کي خطاب ڪندي چيف جسٽس سنڌ هاءِ ڪورٽ جسٽس سجاد علي شاهه چيو ته جج بار مان ئي ايندا آهن، بار مضبوط ۽ ان جا نمائندا لائق هوندا ته ججن جو معيار پاڻ ئي بهتر ٿي ويندو. هن چيو ته وڪالت جو پيشو انتهائي معزز تسليم ڪيو ويندو آهي ۽ اهي قانون جا رکوالا آهن، قانون جي رکوالن کي سڀ کان وڌيڪ قانون جي پاسداري ڪرڻ گهرجي. هن چيو ته نوجوان وڪيلن کي وڌيڪ محنت ڪرڻ سان گڏوگڏ شروعاتي پنجن سالن ۾ بار کان وڌيڪ لائبررين کي آباد رکڻو آهي، جنهن سان نوجوان پنهنجي ۽ ملڪ جي بهتريءَ جي ڪوشش ڪري سگهن ٿا. چيف جسٽس سنڌ هاءِ ڪورٽ وڌيڪ چيو ته گذريل ڀيري ٿيل جڊيشل مئجسٽريٽس جي مقرريءَ ۾ خيرپور ضلعو سرفهرست رهيو، پر محنت ۽ تعليم جي ڪا حد ناهي جيتري تعليم ۽ محنت هجي اها هميشه گهٽ ئي محسوس ٿيندي آهي اسان ٻيهر جڊيشل مئجسٽريٽس جي مقرريءَ جو عمل شروع ڪري ڏنو آهي ۽ اميد آهي ته هن ڀيري به خيرپور ضلعو نمايان رهندو. هن چيو ته ڪرپشن اها نه آهي ته جج پئسا نه وٺي ۽ وڪيل پنهنجي اسيل کي وڪڻي نه ڇڏي، اصل ايمانداري ۽ محنت اها آهي ته جج الله تعاليٰ کي حاضر ناظر ڄاڻي پوري محنت ۽ ايمانداري سان وڌ کان وڌ ڪيسن جا فيصلا ڪري ۽ وڪيل پوري محنت ۽ ايمانداري سان پنهنجي اصيل جو ڪيس عدالت ۾ پيش ڪري. هن چيو ته گذريل ڪجهه سالن کان عدالتي نظام کي شفاف بڻائڻ لاءِ سنجيده ڪوششون ورتيون ۽ 30 ججن کي ڪرپشن الزامن هيٺ نوڪرين مان فارغ ڪيو، جڏهن ته بنيادي ڍانچي جي مضبوطي ۽ عدالتن جي عمارتن تي خاص ڌيان ڏنو ۽ اسان بيشمار ججن جي مقرري ڪئي، پر ايترين مقررين باوجود ميڊيا ۾ تاثر اچي رهيو آهي ته موجوده جڊيشل سسٽم عوام جي اميدن تي پورو نه ٿو لهي، اهو لمحه فڪريه نه رُڳو ججن پر وڪيلن لاءِ پڻ آهي، منهنجي نظر ۾ ان جو هڪ حل اهو آهي ته بار وڌيڪ محنت ڪري، ڇاڪاڻ ته جج ان ئي بار مان ايندا آهن. ٻيو حل اهو آهي ته جج وڌيڪ محنت ڪن ۽ اهو نه سمجهن ته اسين بس جج جي ڪرسيءَ تي اچي ويا آهيون ۽ ترقي ٿيندي رهندي ۽ اسانکي وڌيڪ ڪتاب پڙهڻ ۽ محنت جو ڪو فائدو ناهي. آئون ٻڌائڻ ٿو گهران ته اسان قانون ۾ تبديلي آڻيندي ترقيءَ کي لازم قرار ڏنو آهي ته هڪ ڪيڊر مان ٻئي ڪيڊر ۾ ترقيءَ لاءِ ڪنهن به جج کي ڊپارٽمينٽل پروموشن ڪميٽي غور ئي نه ڪندي جيسيتائين اُهي ڇهن مهينن جي ٽريننگ ۽ مخصوص امتحان پاس نه ڪن. جسٽس سجاد علي شاهه تعلقه بار ٺري ميرواهه لاءِ ضروري فرنيچر ۽ هڪ لک رپين جا ڪتاب فراهم ڪرڻ جو اعلان ڪندي چيو ته هڪ مهيني اندر ٺري ميرواهه ۾ آئڊنٽيفڪيشن برانچ قائم ڪئي ويندي. چيف جسٽس سنڌ هاءِ ڪورٽ فيض گنج ڪورٽ جي عمارت ٺهرائڻ جو اعلان ڪندي چيو ته جتي به هڪ عدالت هوندي اتي پنهنجي عمارت هوندي. هن چيو ته هن وقت تائين ميرپور ماٿيلو ۽ ڪنڌڪوٽ تعلقن ۾ ڊائريڪٽ جيورسڊڪشن پاور ڏنا ويا آهن، ٺري ميرواهه ۾ به اهڙا پاور ڏيڻ لاءِ درخواست ملڻ تي سفارش ڪئي ويندي. اِن کان اڳ ٺري ميرواه تعلقه بار جي صدر آفتاب شر آجياڻي خطاب ۾ بار بلڊنگ جي تعمير ۽ ٻين سهولتن جو مطالبو ڪيو ۽ مهمانن جا ٿورا مڃيا. تقريب ۾ سنڌ هاءِ ڪورٽ جا جج سيد حسن اظهر رضوي، جسٽس عبدالرسول ميمڻ، جسٽس صادق حسين ڀٽي، جسٽس آفتاب احمد ڳورڙ، جسٽس فهيم احمد صديقي، جسٽس عقيل احمد عباسي، جسٽس احمد علي شيخ، ڊسٽرڪٽ اينڊ سيشن جج خيرپور سيد غلام شاهه، رجسٽرار سنڌ هاءِ ڪورٽ غلام مصطفيٰ ميمڻ، ڊپٽي ڪمشنر خيرپور محمد سليم راجپوت، ايس ايس پي اظفر مهيسر، ايڊيشنل ايڊووڪيٽ جنرل لياقت شر، سپريم ڪورٽ بار جو نائب صدر شبير شر، شفقت مهيسر، قربان ملاڻو، نثار ڀنڀرو ۽ ٻيا پڻ موجود هئا. وڪيل برادريءَ پاران چيف جسٽس سنڌ هاءِ ڪورٽ ۽ ٻين معزز ججن کي سوکڙيون پڻ ڏنيون ويون.

 

جاگيردارن جمهوريت ۽ ملڪي نظام کي يرغمال بڻايو آهي: سراج الحق

اسلام آباد(م.ڊ) جماعت اسلاميءَ جي امير ۽ سينيٽر سراج الحق چيو آهي ته جاگيردارن جمهوريت ۽ ملڪي نظام کي يرغمال بڻايو آهي، اسان کي حڪمرانن غربت ۽ بدحاليءَ جو تحفو ڏنو، هڪ تقريب کي خطاب ڪندي سراج الهق جو چوڻ هو ته اڄ پي آءِ اي ۽ ريلوي مالي کوٽ جو شڪار آهن. ادارا ڏينهون ڏينهن تباهه ٿي رهيا آهن جن جي تباهيءَ جو وڏو ڪارڻ ڪرپشن آهي.  انگري هليا ويا پر اڄ به ايوانن ۾ سندن پونئر ويٺل آهي.36

 

اسٽيل ملز جي پيداوار ڏيڍ سال کان بند، مختلف ادارن جو 178 ارب رپيا قرض چڙهي ويو

ڪراچي/اسلام آباد(م.ڊ) پاڪستان اسٽيل ملز مڪمل طور تباهه ٿي وئي آهي، ڏيڍ سال کان پيداوار بند هجڻ سبب اسٽيل ملز حڪومت ۽ مختلف ادارن جي 178 ارب رپين جي قرضي  ٿي وئي آهي. وفاقي سرڪار جي دستاويزن موجب اسٽيل ملز تي وفاقي حڪومت جو 40 ارب رپيا قرض آهي جڏهن ته ملازمن جي ادائگين جا 50 ارب رپيا چڙهي ويا آهن. سرڪاري دستاويزن موجب اسٽيل ملز ڏانهن گيس بلن جي مد ۾  19 ارب رپيا رهيل آهن. جڏهن ته ڪي اليڪٽرڪ جي 42 ڪروڙ رپين جي قرضي ٿي وئي آهي. دستاويزن ۾ ڄاڻايو ويو آهي ته پاڪستان اسٽيل ملز ڪا به پيداوار نه ڏئي ڏئي، ڏيڍ سال کان اسٽيل ملز جي پيداوار مڪمل طور بند آهي.