تازيون خبرون

Daily Archives: December 20, 2016

2018 تائين لوڊشيڊنگ ختم ٿي ويندي: نواز شريف

اسلام آباد (اين اين آءِ) وزيراعظم محمد نواز شريف چيو آهي ته ملڪ ۾ وسيع اقتصادي موقعن ۽ صلاحيتن مان ڀرپور فائدو وٺڻ لاءِ بجلي جي کوٽ جو خاتمو ضروري آهي، هو سومر تي پي ايم هائوس ۾ توانائي بابت مختلف منصوبن تي اڳڀرائي واري جائزي اجلاس کي خطاب ڪري رهيو هو، وزيراعظم چيو ته موجوده حڪومت جي اڻٿڪ ڪوششن صرف 2018 تائين ملڪ مان بجلي جي کوٽ ختم ڪرڻ تائين محدود نه آهن پر حڪومت جي ڊگهن منصوبن ۾ 2022 تائين 30 هزار ميگاواٽ کان وڌيڪ بجلي پيدا ٿي ويندي، هن چيو ته پاڪستان جي تاريخ ۾ بجلي جي پيداوار لاءِ ايڏي وڏي سيڙپڪاري پهريان ڪڏهن به نه ٿي آهي جنهن جو مقصد پنهنجي ضرورتن کي پورو ڪرڻ ۽ مستقبل جي تقاضائن کي مد نظر رکڻ آهي، وزيراعظم ان ڳالهه تي ڏک جو اظهار ڪيو ته بدقسمتي سان گذريل 15 سالن دوران گذريل حڪومتن ان مسئلي کي نظرانداز ڪيو، هن چيو ته بجلي جي پيداوار ۾ واڌ سان اقتصادي ترقي ۾ واڌ ٿيندي ۽ صنعتي سرگرميون وڌيڪ تيز ٿينديون، هن چيو ته هو منصوبن جي وقت تي پڄاڻي کي يقيني بڻائڻ لاءِ سڄي ملڪ ۾ جاري بجلي جي منصوبن تي اڳڀرائي جي ذاتي طور تي نگراني ڪري رهيو آهي، اجلاس کي پاڪستان ۾ بجلي جي جاري منصوبن جي گنجائش ۽ وقت جي باري ۾ تفصيلي بريفنگ ڏني وئي، اجلاس کي ٻڌايو ويو ته 7 کان 8 هزار ميگاواٽ جي امڪاني شارٽ فعال جي مقابلي ۾ مارچ 2018 تائين اٽڪل 10 هزار 996 ميگاواٽ بجلي نيشنل گرڊ ۾ شامل ٿي ويندي، نيشنل گرڊ ۾ بجلي جي وڏي واڌ جي نتيجي ۾ ملڪ مان لوڊشيڊنگ ختم ٿي ويندي، اجلاس کي ٻڌايو ويو ته ملڪ جي سمورن حصن ۾ ٽرانسميشن سسٽم کي بهتر بڻائڻ لاءِ به ڪم جاري آهي جنهن جي وزارت پاڻي ۽ بجلي نگراني ڪري رهي آهي، اضافي گنجائش لاءِ نظام کي هٿي ڏيڻ جو عمل 2017 جي آخر تائين مڪمل ٿي ويندو جنهن سان ملڪ جو 90 سيڪڙو ٽرانسميشن سسٽم رڪاوٽن کان پاڪ ٿي ويندو، اجلاس ۾ ناڻي واري وزير اسحاق ڊار، وفاقي وزير احسن اقبال،خواجه آصف، طارق فاطمي، شهباز شريف ۽ سينيئر اختيارن شرڪت ڪئي.

اي ڊي خواجه عهدي تان فارغ، آءِ جي سنڌ جي اضافي چارج مشتاق مهر حوالي، نوٽيفڪيشن جاري

ڪراچي (اين اين آءِ) سنڌ حڪومت آءِ جي سنڌ الهه ڏنو خواجه کان چارو واپس وٺي ان کي جبري موڪل تي موڪليو ويو آهي جڏهن ته ايڊيشنل آءِ جي ڪراچي مشتاق احمد مهر کي آءِ جي سنڌ جي عارضي چارج ڏني ويئي آهي سنڌ جي وڏي وزير پاران جبري موڪل تي موڪليل آءِ جي سنڌ اي ڊي خواجه کي 12 مارچ 2016 تي آءِ جي سنڌ مقرر ڪيو ويو هو هو 9 مهينا 7 ڏينهن ان عهدي تي ڪم ڪندو رهيو ذريعن موجب سنڌ پوليس ۾ مئرٽ تي ڀرتين تي ڪجهه سياستدان اي ڊي خواجه کان ناراض هئا ذريعن موجب گذريل ڏينهن مشهور واپاري سان ان جي سخت جملن جي ڏي وٺ به ٿي جنهن سبب بدين ۾ ڪمند جي ڪرشنگ هئي 11 مارچ2016 تي سپريم ڪورٽ پوليس جاچ فنڊن ۾ گهوٻيون ۽ غير قانوني ڀرتين جي ڪيس ۾ آءِ جي سنڌ غلام حيدر جمالي کي ان جي عهدي تان هٽائڻ جو حڪم ڏنو جنهن کان پوءِ وفاق 12 مارچ تي آءِ جي سنڌ غلام حيدر جمالي جي جاءِ تي اي ڊي خواجه کي آءِ جي سنڌ جون ذميواريون ڏنيون هيون ذريعن موجب وزيراعظم پاران آءِ جي اي ڊي خواجه جي مقرري جي منظوري سنڌ حڪومت سان مشوري کان پوءِ ڏني ويئي اي ڊي خواجه جو تعلق ٽنڊو محمد خان سان آهي سنڌ پوليس ۾ ڪيترن ئي اهم عهدن تي رهي چڪو آهي ان جي مقرري کان پوءِ سنڌ حڪومت ۽ آءِ جي سنڌ ۾ اختلافن جون خبرون آيون انهيءَ عهدي تان هٽائڻ جون ڳالهيون ٻڌڻ ۾ آيون ۽ سومر تي ان کي جبري موڪل تي موڪليو ويو. ڪجهه ڏينهن اڳ هڪ خصوصي انترويو ۾ اي ڊي خواجه چيو هو ته مان گذريل 8 مهينن کان ان عهدي تي فائز آهيان پر پوليس ۾ موجود اعليٰ عهدن تي فائز آفيسرن ۽ سنڌ جي اهم سياسي شخصيتون مون ان تان هٽائڻ جي ڪوشش ۾ آهن جيڪڏهن مون کي وفاق يا سنڌ حڪومت پاران عهدو ڇڏڻ جو حڪم ڏنو ويو ته مان فوري طور تي عهدي جي چارج ڇڏڻ لاءِ تيار آهيان آءِ جي سنڌ چيو ته ان حوالي سان مان سنڌ جي وڏي وزير سيد مرادعلي شاهه سان به ڳالهه ڪئي آهي ته مون کي گذريل ٻن مهينن کان غير قانوني ڪم ڪرڻ لاءِ مجبور ڪيو پيو وڃي ان ڪري مان ان عهدي تي وڌيڪ ڪم نٿو ڪري سگهان جڏهن ته سنڌ جي وڏي وزير پاران ان حوالي سان ڪنهن به قسم جي مدد جي خاطري نه ڪرائي ويئي.

 

وزير اعظم آئي سي آئي جي، جي رپورٽ تي ڳالهائي معاملي کي حقيقت بڻايو: خورشيد شاهه

اسلام آباد (م.ڊ) قومي اسيمبليءَ ۾ مخالف ڌر اڳواڻ سيد خورشيد شاهه چيو آهي ته آءِ سي آءِ جي، جي رپورٽ ڪوڙي آهي ته پوءِ وزيراعظم کي ان تي ڳالهائڻ جي ڪهڙي ضرورت هئي؟ ان معاملي کي پاڻ ن ليگ حقيقت بڻايو، قومي اسيمبليءَ ۾ ڳالهائيندي سيد خورشيد شاهه جو چوڻ هو ته مان به سمجھان ٿو ته آءِ سي آءِ جي، جي رپورٽ ڪوڙي آهي پر جيڪڏهن آءِ سي آءِ جي رپورٽ ڪوڙ تي ٻڌل آهي ته برطانوي وزيراعظم پارليامينٽ کي وضاحتون پيش ڇو ڪيون؟ ڇو آئس لينڊ جي وزيراعظم استعيفيٰ ڏني. جيڪڏهن اهو ڪوڙ هو ته پوءِ وزيراعظم کي ان تي ڳالهائڻ جي ڪهڙي ضرورت هئي؟ ان معاملي کيپاڻ مسلم ليگ ن حقيقت بڻايو آهي، هن چيو ته پاناما معاملي تي برطانوي وزيراعظم ڪلاڪن جا ڪلاڪ وضاحتون ڏنيون جيتوڻيڪ ان جو نالو ته ان ۾ شامل به نه هو، مان حيران آهيان ته حڪومت طرفان ڪهڙا جواب اچي رهيا آهن، اسان سدائين پارليامينٽ کي اهميت ڏني آهي ۽ ان کي عزت بخشي آهي، اسان جي وزيراعظم ڪڏهن به ان پارليامينٽ کي ناهي ڇڏيو، اسان جو وزيراعظم هر روز پنهنجي سيٽ تي اچي ويهندو هو ۽ سڀ ڪجھه ٻڌندو هو.

 

27 ڊسمبر کانپوءِ سياسي ماحول گرمائي ڇڏبو، نواز شريف وڃڻ جي تياري ڪري: پيپلزپارٽي

ڪراچي(م.ڊ) صوبائي وزير نثار احمد کهڙي چيو آهي پيپلزپارٽي اصلي شينهن جو مقابلو ڪرڻ ڄاڻي ٿي، هي ته نقلي شينهن آهن. نواز شريف ملڪ ۾ واپس پيپلزپارٽي جي ڪري آيو. ميڊيا سان ڳالهائيندي پ پ سنڌ جي صدر نثار احمد کهڙي چيو ته اڳوڻو صدر آصف علي زرداري 23 ڊسمبر جي منجھند تي ڪراچي ايئرپورٽ پهچندو، جتي پارٽي پاران سندس شاندار آجيان ڪئي ويندي. اسين 27 ڊسمبر کانپوءِ قيادت جي اڳواڻي ۾ تحريڪ هلائي سياسي ماحول گرمائي ڇڏينداسين. هن چيو تهجيڪي ماڻهو چون ٿا ته پ پ ختم ٿيڻ جي ويجھي آهي تحريڪ دوران پ پ جي جيالن جو ميڙ گڏ ڪري انهن ڳالهين کي رد ڪري ڇڏينداسين. نثار کهڙي وزير اعظم تي تنقيد ڪندي چيو ته هاڻي نواز شريف وڃڻ جي تياري ڪري وٺي، سندس حڪومت جا ڏينهن ڳڻجي چڪا آهن، نواز شريف کي اها ڳالهه ذهن ۾ رکڻ گھرجي ته پ پ جي ڪري ئي هو ڏيهه واپس آيو، سندس ڏيهه واپسي اسان جي پارٽي جي ڪري ممڪن ٿي. هن چيو ته آصف زرداري نواز شريف جيان آمر سان معاهدو ڪري ملڪ مان ٻاهر ناهي ويو. هو 23 ڊسمبر تي عزت واري طريقي سان واپس اچي ويندو. 37

 

بجيٽ هاڻي سينيٽ ۾ به منظور ٿيندي، پنج هزار جو نوٽ پڻ ختم، حڪومتي اعتراض باوجود سينيٽ ۾ ٺهراءُ پاس

اسلام آباد (م.ڊ) سينيٽ ۾ هڪ ڀيرو ٻيهر حڪومت تي سخت تنقيد سميت ان جي فيصلن جي نندا ڪئي وئي آهي، مٿئين ايوان کي بجيٽ پاس ڪرڻ جو اختيار ڏيڻ واري ٺهراءَ جي حڪومتي مخالفت باوجود منظوري ڏني وئي، قانون واري وزير زاهد حامد سينيٽ جي مالي اختيارن جي مخالفت ڪندي چيو ته قومي اسيمبليءَ مان پاس بجيٽ سينيٽ منظور نه ڪئي حڪومت جي حيثيت ختم ٿي ويندي، سينيٽ کي مالي اختيار گھرجن ته ميمبرن جي سڌي سنئين چونڊ ڪئي وڃي. جنهن تي سينيٽ چيئرمين سوال اٿاريو ته قومي اسيمبليءَ جي خاص سيٽن تي چونڊيل 70 ميمبرن جو بجيٽ تي ووٽ وٺي سگھجي ٿو ته سينيٽر ڇو نه ٿا ڪري سگھن؟ قرارداد اڪثريت راءِ سان منظور ڪئي وئي، پنج هزار جو نوٽ ختم ڪرڻ جو ٺهراءُ پيپلز پارٽيءَ جي عثمان سيف الله پيش ڪئي، ان تي به قانون واري وزير جي مخالفت بيڪار وئي، قرار داد ۾ چيو ويو ته پنج هزار جو نوٽ ختم ڪرڻ سان ڪرپشن گھٽ ٿيندي.

 

ميجر جنرل محمد سعيد ڊي جي رينجرز سنڌ جو عهدو سنڀالي ورتو، بلال اڪبر ۽ وڏي وزير سان ملاقاتون، امن امان جي صورتحال تي ڳالهيون

ڪراچي (اسٽاف رپورٽر) ميجر جنرل محمد سعيد ڊي جي رينجرز سنڌ جو عهدو سنڀالي ورتو آهي. ميجر جنرل محمد سعيد سنڌ رينجرز جو 13 هون ڊي جي آهي. رينجرز ترجمان جو چوڻ آهي ته ليفٽيننٽ جنرل بلال اڪبر چارج ميجر جنرل محمد سعيد جي حوالي ڪيو. چارج ڏيڻ واري تقريب رينجرز هيڊ ڪوارٽر سنڌ ۾ رٿي وئي هئي، ٻئي سنڌ جي وڏي وزير سيد مراد علي شاهه سان سبڪدوش ٿيندڙ ڊي جي رينجرز ميجر جنرل بلال اڪبر نئين ڊي جي رينجرز سنڌ ميجر جنرل محمد سعيد سان گڏجي وزيراعليٰ هائوس ۾ ملاقات ڪئي. ان موقعي تي سنڌ جي وڏي وزير سيد مراد علي شاهه ميجر جنرل بلال اڪبر جون بحيثيت ڊي جي رينجرز سنڌ جي خدمتن جي واکاڻ ڪئي ۽ سندس بطور ليفٽننٽ جنرل جي نيون ذميواريون سنڀالڻ تي کين نيڪ خواهشن جو اظهار ڪيو. سنڌ جي وڏي وزير نئين ڊي جي رينجرز سنڌ ميجر جنرل محمد سعيد کي ڀليڪار ڪندي سندس نئين ذميوارين جي حوالي سان پنهنجي ڀرپور سهڪار جو يقين ڏياريو.

 

غداري ڪيس ۾ راحيل شريف حڪومت سان ڊيل ڪرائي مدد ڪئي: پرويز مشرف

اسلام آباد(م.ڊ) وزير اعظم نواز شريف جي اڳوڻي حڪومت جو تختو اونڌو ڪندڙ اڳوڻي آرمي چيف جنرل پرويز مشرف چيو آهي ته غداري ڪيس ۾ تازو رٽائر ٿيندڙ آرمي چيف جنرل (ر) راحيل شريف مدد ڪئي. نجي ٽي وي چينل جي پروگرام ۾ انٽرويو ڏيندي اڳوڻي آرمي چيف جنرل پرويز مشرف چيو ته مون تي ڪيل سمورا ڪيس سياسي هئا ۽ سياسي طور تي منهنجو نالو به اي سي ايل ۾ شامل ڪيو ويو. عدالت پردي پويان دٻاءُ ۾ ڪم ڪري رهي هئي. حڪومت سان ڊيل ڪرڻ ۾ اڳوڻي آرمي چيف جو رول هو ۽ ان ڪري ڪورٽ آزاداڻو فيصلو ٻڌايو. هن چيو ته جنرل راحيل شريف حڪومت کي چيو ته توهان ججن تي دٻاءُ نه وجھو، جنهن کانپوءِ حڪومت دٻاءُ وجھڻ ڇڏي ڏنو ۽ عدالت فيصلو ٻڌايو. هن چيو ته آئون راحيل شريف جو باس رهيو آهيان ۽ آرمي چيف به رهيو آهيان، راحيل شريف غداري ڪيس ۾ مدد ڪئي.

 

حڪمرانن قومي ايئرلائين کي تباهه ڪري ڇڏيو آهي: عمران خان

اسلام آباد(م.ڊ) تحريڪ انصاف جي سربراهه عمران خان چيو آهي ته حڪمرانن قومي ايئرلائين کي تباهه ڪري ڇڏيو آهي، هاڻي پي آءِ اي جو اهو حال آهي جو اڏام کان اڳ ٻڪري جو صدقو ڪرڻو پئجي رهيو آهي. سماجي رابطن واري ويب سائيٽ ٽوئيٽر تي جاري ڪيل پيغام ۾ عمران خان چيو ته حڪمرانن جي غلط پاليسين سبب پي آءِ اي ادارو تباهه ٿي رهيو آهي. هن چيو ته قومي ايئر لائين جو اهو حال آهي جو اڄ اڏام کان اڳ ٻڪري جو صدقو ڪرڻو پئجي رهيو آهي، جيڪا افسوسناڪ صورتحال آهي. عمران خان وڌيڪ چيو ته حڪمرانن هٿ وٺي قومي ايئر لائين کي تباهه ڪيوآهي، ايئرلائين جي بهتري لاءِ ڪي به اُپاءَ نه پيا ورتا وڃن.

 

عوام ڪرپشن جو خاتمو ۽ چورن جو احتساب چاهي ٿو: سراج الحق

لاهور(م.ڊ) جماعت اسلامي جي امير سراج الحق چيو آهي ته حڪمرانن وٽ حڪومت جو ڪو به اخلاقي جواز ناهي رهيو. عوام ڪرپشن جو خاتمو ۽ چورن جو احتساب چاهي ٿو. منصوره ۾ مرڪزي مشاورتي ڪائونسل جي اجلاس کي خطاب ڪندي سراج الحق چيو ته سياسي پارٽين جي اندر جمهوريت آهي نه ئي وري امانت ديانت جو ڪو تصور. اسان چاهيون ٿا ته هر لٽيري کي ڪٺهڙي ۾ بيهاريو وڃي. حڪمران قومي ناڻي مان پنهنجي چونڊ مهم هلائي رهي آهي. هن وڌيڪ چيو ته اسان جي تحريڪ جي ڪري اڄ هر مجلس جو موضوع ڪرپشن بڻجي چڪو آهي.

 

گهوٽڪي ۾ ديوار ڪرڻ ۽ ڄامشورو ۾ روڊ حادثي سبب 3 پورهيتن سميت 5 ڄڻا فوت، 6 ڄڻا زخمي

ڄامشورو/گهوٽڪي(م.ڊ) گهوٽڪي باءِ پاس لڳ هڪ رائيس مل ۾ ڪم ڪندڙ پورهيتن مٿان اوچتو ديوار ڪري ڊهي پئي جنهن جي نتيجي ۾ ڪنڌڪوٽ واسي 30 ورهين جو مينگل پٽ عبدالجبار کوسو ۽ شڪيل احمد پٽ فقير محمد چاچڙ ڳوٺ صيفل چاچڙ ٿڏي تي فوت ٿي ويا، جڏهن ته وقار پٽ خان محمد چاچڙ،صدورو عرف محمد سليمان پٽ پهلوان چاچڙ ۽ گوهر پٽ بهادر پهوڙ ڪارو گهٽ واسي سخت زخمي ٿي پيا آهن، اطلاع تي گهوٽڪي جي اي سيڪشن پوليس واقعي واري هنڌ پهچي فوتين جا لاش ۽ زخمين کي سرڪاري اسپتال پهچايو. ٻي طرف ڄامشورو: مانجهند ويجهو انڊس هاءِ وي تي تيز رفتار مسافر ڪوچ جو چنگچي کي ٽڪر، 2 ڄڻا فوت، 3 زخمي، تفصيل مطابق مانجهند ويجهو انڊس هاءِ وي تي تيز رفتار ڪوچ سامهون ايندڙ چنگچي مٿان چڙهي وئي، جنهن جي نتيجي ۾ چنگچي ۾ سوار نوجوان غلام نبي کوسو ۽ مسمات گڏي موقعي تي ئي فوت ٿي ويا، جڏهن ته 3 ڄڻا زخمي ٿي پيا، فوتين جا لاش ۽ زخمين کي لمس اسپتال نيو ويو. جتي ضروري ڪارروائي کانپوءِ لاش وارثن حوالي ڪيا ويا.