تازيون خبرون

Daily Archives: December 19, 2016

حڪومت خلاف اصل اپوزيشن هاڻي شروع ٿيندي، 4 مطالبا مڃرائينداسين: بلاول ڀٽو زرداري

ڪراچي(م.ڊ) پاڪستان پيپلزپارٽي جي شريڪ چيئرمين آصف علي زرداري کي ڊاڪٽر سفر جي اجازت ڏئي ڇڏي آهي، جڏهن ته بلاول ڀٽو زرداري چيو آهي ته آصف زرداري 23 ڊسمبر تي ڪراچي پهچندو. ڪراچي ۾ پريس ڪانفرنس ڪندي پ پ چيئرمين بلاول ڀٽو زرداري چيو ته پيپلزپارٽي ايندڙ ٽن ڏينهن ۾ آصف علي زرداري جي آجيان جون تياريون ڪندي ۽ جيڪڏهن اڳوڻو صدر اسان سان گڏ هوندو ته اسان پاناما ليڪس جي معاملي تي حڪومت کان پنهنجا مطالبا مڃرائي وٺنداسين. بلاول ڀٽو زرداري پريس ڪانفرنس ۾ پنهنجاچار مطالبا ورجائيندي چيو ته اسان ئي پاسڪتان ۾ اصل اپوزيشن آهيون ۽ ملڪ ۾ حقيقي جمهوريت چاهيون ٿا. اسان پاناما اسڪينڊل جي شفاف جاچ چاهيون ٿا، پاناما ليڪس تي اسان جي ٺهراءِ تي عملدرآمد کان بنا ملڪ ۾ جمهوريت نٿي اچي سگھي. هن چيو ته پاناما ليڪس ۾ منهنجي امڙ جو نالو ناهي جيڪڏهن ڪنهن کي شڪ آهي ته اهو آءِ سي آءِ جي جي ويب سائيٽ تي وڃي پنهنجي تسلي ڪري وٺي. هن چيو ته منهنجي خاندان جي ڪنهن به ڀاتي جو نالو پاناما ليڪس ۾ ناهي، پر ملڪ جي وزير اعظم جو نالو ان ۾ آيو آهي. جيڪڏهن منهنجو نالو به شامل هجي ته مونکان به جاچ ڪئي وڃي. 37

 

پاڪستان ۽ سعودي عرب جو دهشتگردي جي خاتمي لاءِ نئين عزم سان ڪم ڪرڻ تي اتفاق

راولپنڊي(م.ڊ) آرمي چيف جنرل قمر جاويد باجوه سعودي فرمنانروا شاههه سلمان سان ملاقات ڪئي جنهن دوران دهشتگردي ۽ انتهاپسندي جي خاتمي جي لاءِ گڏجي ڪم ڪرڻ تي اتفاق ڪيو ويو آهي. پاڪ فوج جي اداري (آءِايس پي آر) موجب آرمي چيف جنرل قمر جاويد باجوه سعودي عرب جي دوري تي آهي جتي ان جي ملاقات سعودي فرمانروا شاهه سلمان سان ٿي جنهن ۾ دهشتگردي ۽ انتهاپسندي جي خاتمي جي لاءِ گڏجي نئين عزم سان گڏ ڪم ڪرڻ تي اتفاق ڪيو ويو آهي. ملاقات ۾ ان ڳالهه تي به اتفاق ڪيو ويو ته خطي ۾ مضبوطي جي حوالي سان ٻئي ملڪ اهم اسٽيڪ هولڊر آهن ۽ ٻنهي ملڪن تي مسلم امت جي حوالي سان اهم ذميواريون آهن.

 

ڳڙهي ياسين لڳ هيانءُ ڏاريندڙ روڊ حادثو، هڪ ئي خاندان جا 6 ڀاتي فوت، 4 ڄڻا زخمي

شڪارپور(ڊ.ر) شڪارپور لڳ ڳڙهي ياسين ٿاڻي جي حد سون واھ وٽ ڳڙهي ياسين کان رتوديرو ويندڙ ڪار، رتوديرو کان ايندڙ ٽرالر ۾ خوفناڪ ٽڪر ٿي پيو، جنهن جي نتيجي ۾ ڪار سوار ڊرائيور عبدالمجيد ڀٽو، ذيشان راجپوت، مسمات انا، معصوم ٻارڙيون حرا، ردا ۽ عائشا موقعي تي ئي فوت ٿي ويون. جڏهن ته ڪار ۾ سوار معصوم ٻارڙي زينب زخمي ٿي پئي. جڏهن ته خوفناڪ ٽڪر کان بعد ٽرالر هوٽل تي چڙهي وئي. جنهن جي ڪري هوٽل جي ڇت ڪرڻ سبب مظفر علي اوڍو، گل اوڍو، عبدالفتاح ڪيهر سخت زخمي ٿي پيا. زخمين کي لاڙڪانا اسپتال داخل ڪرايو ويو، جڏهن ته واقعي بعد ٽرالر ڊرائيور موقعي تان فرار ٿيڻ ۾ ڪامياب ٿي ويو، ٻي طرف فوتين ۾ هڪ ئي خاندان جا 5 فرد شامل آهن، جنهن ۾ ذيشان راجپوت، مسمات انا، معصوم ٻارڙيون حرا، ردا ۽ عائشا شامل آهن. ٻڌايو وڃي ٿو ته ذيشان راجپوت پنهنجي گهر ڳڙهي ياسين کان رتوديرو پنهنجي مائٽن ڏي ڪار ۾ سوار ٿي وڃي رهيو هو ته واقعو پيش آيو، ٻي طرف واقعي علائقي ۾ سوڳ جو ماحول ڇائنجي ويو، جڏهن ته آخري اطلاعن تائين واقعي جو ڪو به ڪيس داخل ٿي نه سگهيو.

 

بلاول ڀٽو جي غير اخلاقي بيان آڪسفورڊ جي تعليم کي شرمسار ڪري ڇڏيو: مريم اورنگزيب

اسلام آباد(م.ڊ) سڌُ سماءَ واري مملڪتي وزير  مريم اورنگزيب چيو آهي ته بلاول ڀٽو زرداري جي غير اخلاقي بيان آڪسفورڊ جي تعليم کي شرمسا ڪري ڇڏيو آهي. پنهنجي بيان ۾ مريم اورنگزيب چيو آهي ته بلاول جا سياسي استاد کيس سان چڱائي نٿا چاهن، سندس طرفان ڪيل اخلاق کان ڪريل ڳالهه کي ڪجهه ماڻهو ٻار سمجهي ئي نظرانداز ڪندا. هن چيو ته بلاول کي سندس ميڊيا سيل اهو ٻڌائي ته وزير اعظم نواز شريف جو نالو نه پر ڀٽو خاندان جو نالو پامانا ۾ آيو آهي،  پنهنجي دور ۾ جلسا نه ڪندڙ اڄ سڀني جي سامهون جلسا ڪري رهيا آهن.

 

وزيراعظم ڪنهن جي دٻاءَ تي ايوان ۾ نه ايندو: ن ليگ

لاهور (اين اين آءِ) پاڪستان مسلم ليگ (ن) جي مرڪزي اطلاعات جي سيڪريٽري سينيٽر مشاهدالله چيو آهي ته گهرو وزير چوڌري نثار کان استعيفيٰ وٺڻ جي بجاءِ سندس اڳواڻي ۾ دهشتگردي خلاف جاري جنگ ۾ ڪاميابين تي ساراهڻ گهرجي. اڄ تائين ڪيترا به ڪميشن ٺهيا ان جون رپورٽون آيون ڇا ڪنهن وزير ان تي استعيفي ڏني پاناما ليڪس ۾ وزيراعظمنواز شريف جو نه پر بلاول جي والده بينظير ڀٽو جو نالو آهي. خورشيد شاهه انتهائي گهٽيا ڳالهه ڪئي آهي ته هاڻي ته چيف جسٽس به پنهنجو اچي رهيو آهي هن جو اهو بيان پنهنجن ادارن جي توهين ۽ ان کي ڪمزور ڪرڻ جي برابر آهي. عمران خان ته پاڻ چونڊ ڌانڌلي جي جاچ لاءِ جوڙيل عدالتي ڪميشن کي نه مڃيو. هاڻي هو ڇو رڙيون ڪري رهيو آهي. پيپلز پارٽي ۽ تحريڪ انصاف جي بيانن تي رد عمل ڏيندي مشاهدالله خان چيو ته عمران خان چوي ٿو ته ڪوئيٽا واقعي جي ذميوار ن ليگ جي وفاقي ۽ صوبائي حڪومت آهي ته پوءِ پشاور ۾ آرمي پبلڪ اسڪول سميت جيترا به دهشتگردي جا واقعا ٿيا آهن ان جو ذميوار عمران خان ۽ اتان جي صوبائي حڪومت آهي. حقيقت ۾ عمران خان ڪي پي ڪي ۾ مڪمل طور تي ناڪام ٿي چڪو آهي ۽ کيس 2018 ۾ اتي شڪست واضح نظر اچي رهي آهي ۽ ان ناڪامي کان بچڻ لاءِ هو روزانو ن ليگ جي حڪومت تي طرح طرح جا الزام لڳائيندو رهيو آهي. مون کي افسوس آهي ته خورشيد شاهه اپوزيشن ليڊر هجڻ باوجود ايتري ڳالهه کان به واقف ناهي. سندس اهو بيان پنهنجن ادارن جي توهين ۽ انهن کي ڪمزور ڪرڻ جي برابر آهي. ٻئي طرف طلال چوڌري چيو آهي ته شاهه محمود قريشي جون ڳالهيون اجايون آهن وزيراعظم پهريان به پارليامينٽ ۾ بيان ڏيندو رهيو آهي پر ڪنهن جي به دٻاءَ ۾ ايوان ۾ نه ايندو شاهه محمود قريشي جي پريس ڪانفرنس تي طلال چوڌري چيو ته اها سٺي ڳالهه آهي ته هاڻي پي ٽي آءِ کي هر ڳالهه ۾ پارليامينٽ ياد اچي رهي آهي جيڪڏهن پارليامينٽ ايتري سٺي آهي ته عمران خان کي ايوان ۾ وٺي اچي. هن چيو ته ڊگهي عرصي کانپوءِ پارليامينٽ اچڻ تي شاهه محمود قريشي کي شرمسار ٿيڻو پيو جنهن سبب هو روز نوان مطالبا ڪندو رهي ٿو.

 

بلاول جو چوڌري نثار جي برطرفي جو مطالبو درس هو، کيس برطرف ڪيو وڃي: چانڊيو

ڀٽ شاهه(م.ڊ) وڏي وزير جي سڌُ سماءَ بابت صلاحڪار مولا بخش چانڊئي چيو آهي ته اهڙن گهرو وزيرن کي برطرف ڪرڻ گهرجي، جنهن کي اها خبر  به نه هجي ته ساڻس ملڻ لاءِ ڪير اچي رهيو آهي، اهڙو گهرو وزير قومي سلامتي جا معاملا ڪيئن ٿو سنڀالي سگهي. ڀٽ شاهه ۾ ميڊياسان ڳالهه ٻولهه ڪندي مولا بخش چانڊئي چيو آهي ته گهرو وزير کي پريس ڪانفرنس کان پوءِ پنهنجي قائد جي مطالبي تي وڌيڪ يقين ٿي ويو آهي، ڀٽو جو وارث ۽ بيبي جو پٽ بلاول آهي. هن چيو ته چوڌري نثار جي برطرفي وارو مطالبو درست هو، ڪوڙ کي پير ناهن هوندا، جماعت اسلامي سميت ڪيترين ئي پارٽين چيو ته مولانا لڌيانوي جي ملاقات پاڻ گهرو وزير جي خواهش تي ٿي جنهن کان پوءِ گهرو وزير جي ڪوڙ جو ڀانڊو ڦاٽي پيو.

 

ڪراچي ۾ ڊينگي کان پوءِ” چڪن گونيا“ ظاهر، ملير ۾ 1500 کان وڌيڪ متاثر

ملير(ڊ.ر) ڪراچي ۾ مليريا، ڊينگي ۽ نگليريا کان پوءِ هاڻ ”چڪن گونيا“ پکڙجي ويو آهي جنهن سبب هن وقت تائين 1500 کان وڌيڪ ماڻهو متاثر ٿي چڪا آهن. ڪراچي ۾ مليريا، ڊينگي ۽ نگليريا کان پوءِ هاڻ ” چڪن گونيا“وائرس شهر ۾ تيزي سان ڦهلجي رهيو آهي جنهن سبب رڳو ڪراچي جي ضلعي ملير جي علائقي کوکراپار مان هن وقت تائين  1500 کان وڌيڪ ماڻهو متاثر ٿي چڪا آهن. ڊاڪٽرن موجب چڪن گونيا جي مريض کي تيز بخار، سنڌن ۾ سور ۽ شديد مٿي ۾ سور شروع ٿي ويندو آهي اهڙين علامتن جي صورت ۾ فوري طور ڊاڪٽرن سان رابطو ڪيو وڃي.

 

ن ليگ جي هڪ ڌڙي جسٽس قاضي فائز عيسيٰ جي رپورٽ جي حمايت ڪري ڇڏي، رپورٽ اسان لاءِ رهنمائي آهي: خرم دستگير

لاهور(م.ڊ) حڪمران جماعت مسلم ليگ نواز جي هڪ ڌڙي گھرو وزير چوڌري نثار علي بابت سپريم ڪورٽ جي جسٽس قاضي فائز عيسيٰ جي سربراهي ۾ ڪميشن جي جاري ڪيل رپورٽ جي حمايت ڪري ڇڏي آهي. واپار ۽ صنعتن واري وزير خرم دستگير چيو آهي ته جسٽس قاضي فائز عيسيٰ ڪميشن جي رپورٽ اسان لاءِ هڪ رهنمائي آهي، ادارن جي کوٽ ايندڙ سالن ۾ پوري ڪري وٺنداسين. لاهور جي پولوڪلب ۾ ميڊيا سان ڳالهائيندي وفاقي وزير خرم دستگير چيو ته 2012ع جي مقابلي ۾ اڄ دهشتگردي 80 سيڪڙو گھٽجي وئي آهي. دهشتگردي جي خاتمي ۽ توانائي بحران کي منهن ڏيڻ بابت هي سال سٺو رهيو آهي. هن وڌيڪ چيو ته هلندڙ سال پاڪستان لاءِ سٺو رهيو آهي ۽ اها خوشي جي ڳالهه آهي ته پاڪستان جون روشنيون بحال ٿي رهيون آهن. قوم دعا ڪري ته ايندڙ سال به هن سال کان بهتر هجي. 37

 

ڏوهارين جو ساٿ ڏيڻ جي الزام هيٺ ڪراچي پوليس جي ٻن ايس آءِ، 5 اي ايس آءِ سميت 11 آفيسر ۽ اهلڪار معطل

ڪراچي ( م.ڊُ) ڪراچي پوليس ۾ ڏوهارين جي ساٿاري، زمينن تي قبضن، ڀتي خوري ۽ شهرين کان زبردستي ڦرلٽ ڪندڙ 2 سب انسپيڪٽر ۽ 5 اي ايس آءِ ايسٽ پوليس جي 11 پوليس آفيسرن ۽ اهلڪارن کي معطل ڪيو ويو آهي، پوليس ترجمان مطابق جن پوليس اهلڪارن کي معطل ڪيو ويو آهي انهن ۾ نيو ٽائون جي ايس آءِ راجا امتياز، برگيڊ پوليس ٿاڻي جي اي ايس آءِ بشير،پي ءِ بي ڪالوني ٿاڻي جي اي ايس آءِ ارض محمد، ايس آءِ اقبال منگي، محمود آباد ٿاڻي جي هيڊ ڪانسٽيبل رئيس احمد، گلستان جوهر ٿاڻي جي هيڊ ڪانسٽيبل فخرالدين، ڪورنگي ٿاڻي جي اي ايس آءِ مجيد ڪورائي، سچل ٿاڻي جي اي ايس آءِ محمد رمضان، ٻئي طرف سائوٿ پوليس جي 3 اهلڪارن کي پڻ شهرين کان رشوت وٺندر 3 اهلڪارن کي معطل ڪري گرفتار ڪيو ويو آهي، پوليس ترجمان مطابق ڪلفٽن جي علائقي ۾ چيڪنگ دوران ٻن پوليس اهلڪارن جن ۾ قربان، غلام مصفطيٰ ۽ عابد شامل آهن انهن موٽرسائيڪل سوار شهرين کان رشوت جن جا شهرين موبائل فون تي فوٽيج ورتا، ايس ايس پي سائوٿ ثاقب اسماعيل ميمڻ نوٽيس اهلڪارن کي فوري طور تي معطل ڪري ڪواٽرگارڊ ڪري ڪري ڇڏيو جن خلاف جاچ ڪئي پئي وڃي.

 

شريف ڀائرن ملڪ جو ڏيوالو ڪڍي ڇڏيو، 2017 چونڊن جو سال آهي: منظور وساڻ

ڪنب(رپوٽر)صوبائي وزير منظور حسين وساڻ چيو آهي ته 2017عام چونڊن جو سال آهي شريف ڀائر ملڪ جو ڏيوالو ڪڍي ڇڏيو آهي فنڪشنل ليگ جا اڳواڻ جلد پ پ پ ۾ شامل ٿيندا اهڙن خيالن جو اظهار صوبائي وزير منظور حسين وساڻ ڪوٽڏيجي علائقي ۾ مختلف جاين تي تعزيتون ڪرڻ ۽ وساڻ هائوس تي صحافين سان ڳالهائندي ڪيو هن چيو ته پ پ پ هر دور اقتدار ۾ عوام جي خدمت ڪئي آهي شهرن ۽ ڳوٽن ۾ ترقياتي ڪم ڪرايا ۽ بيروزگارن کي نوڪريون ڏنيون هن چيو ته 2017۾ اليڪشن ٿيندي اليڪشن ۾ پ پ پ چئني صوبن ۾ اڪثريت سان ڪاميابي ماڻيندي ۽ حڪومتون به پ پ پ جون ٽهنديون هڪ سوال جي جواب ۾ منظور حسين وساڻ چيو ته هن وقت مسلم ليگ فنڪشنل جا اڳواڻ پ پ پ ۾ شامل ٿيا آهن ۽ ٻيا اڳواڻ به پ پ پ ۾ شامل ٿيڻ وارا آهن هن چيو ته وفاقي حڪومت پ پ پ چيئر مين بلاول ڀٽو جا 4 مطالبا منظور نه ڪيا ته 27ڊسمبر کان پوء دمادم مست قلندر ٿيندي ۽ عوام ۽ جيالن جو وڏو سمنڊ رائيونڊ جي ديوار کي ڊاهي ڇڏيندا هن چيو ته شريف ڀائرن ملڪ جو ڏيوالوڪڍي ڇڏيو آهي وفاقي سرڪار جي وزيرن توڙي شريف ڀائرن ڪرپشن جي انتها ڪري ڇڎي آهي هنن پنهنجا گهر ڀري ڇڏيا آهن هن چيو ته پ پ پ هاڻي پنجاپ ۾ مضبوط پارٽي ٿي اڀرندي ۽ بلاول ڀٽو مستقبل جو وزيراعظم هوندو