تازيون خبرون

Daily Archives: December 10, 2016

پامانه ليڪس ڪيس، جمع ڪرايل دستاويز فيصلي لاءِ ناڪافي قرار، ڇو نه ڪميشن جوڙي وڃي: سپريم ڪورٽ

اسلام آباد (اين اين آءِ) سپريم ڪورٽ آف پاڪستان ۾ پي ٽي آءِ پاناما ليڪس جي معاملي جي جاچ لاءِ ڪميشن جي قيام جي مخالفت ڪندي چيو آهي ته جيڪڏهن ڪميشن جوڙي وئي ته بائيڪاٽ ڪنداسين، جڏهن ته چيف جسٽس انور ظهير جمالي چيو آهي ته هو رٽائرڊ ٿي رهيو آهي، فل ڪورٽ ريفرنس کانپوءِ ڪنهن بينچ ۾ نه ويهندو، ڪيس جي نئين سر ٻڌڻي جنوري ۾ ٿيندي، جمعي تي چيف جسٽس جي اڳواڻي ۾ سپريم ڪورٽ جي 5 رڪني لارجر بينچ پاناما ليڪس جي درخواستن تي مختصر ٻڌڻي ڪئي، ان موقعي تي پي ٽي آءِ جي چيئرمين عمران خان ۽ ٻين اڳواڻن سميت مسلم ليگ ن جا وڪيل به موجود هئا، ٻڌڻي دوران بينچ ريمارڪس ڏنا ته الزام مڙهيندي پارٽي ۽ جن مٿان الزام مڙهيا ويا آهن ٻنهي جيڪي دستاويز عدالت ۾ جمع ڪرايا آهن ان جو ڪو فيصلو ڏيڻ لاءِ ناڪافي آهن انڪري ان معاملي جي جاچ لاءِ ڇو نه ڪميشن جوڙي وڃي، پي ٽي آءِ جي وڪيل نعيم بخاري چيو ته اسان ڪميشن جوڙڻ جي خلاف آهيون، جيڪڏهن ڪميشن جوڙي وئي ته بائيڪاٽ ڪنداسين، هن چيو ته اسان چاهيون ٿا ته عدالت فيصلو ڪري ۽ جيڪڏهن عدالت ان نتيجي تي پهتي آهي ته اسان پنهنجو ڪيس صحيح انداز ۾ پيش نه ڪري سگهياسين پوءِ به پيش ڪيو وڃي ۽ جيڪڏهن عدالت اهو سمجهي ٿي ته وزيراعظم جو ڪيس ڪمزور آهي ته تڏهن به فيصلو ڏنو وڃي، نواز شريف جي ٻارڙن جي وڪيل عدالت کي ٻڌايو ته حسن نواز  ۽ حسين نواز اووسيز پاڪستاني آهن، عدالت سمجهي ته اسان جاچ ۾ رڪاوٽ نه بڻجنداسين، ڪميشن جي بناوت يا خود ٻڌڻي بابت عدالت جيڪو فيصلو ڪندي اسان کي منظور هوندو، چيف جسٽس وزيراعظم جي وڪيل سلمان اسلم بٽ کان پڇيو ته توهان کي ڪميشن جوڙڻ جي سلسلي ۾ ڪهڙيون هدايتون مليون آهن، هن جواب ۾ چيو ته عدالت جيڪو چاهي فيصلو ڪري، اسان کي ڪو به اعتراض ناهي پر پي ٽي آءِ پاران ڪميشن جوڙڻ کان انڪار سامهون آيو آهي جنهن تي چيف جسٽس ريمارڪس ڏنا ته ٻي ڌر کي ڇڏي، توهان پنهنجو موقف ٻڌايو، سلمان اسلم بٽ چيو ته اڃاتائين وزيراعظم جي خلاف ڪو به ثبوت رڪارڊ تي ناهي، ڪيس جو فيصلو سپريم ڪورٽ ڪري يا ڪميشن جوڙي وڃي اسان کي فيصلو قبول آهي، شيخ رشيد چيو ته نانگ جو ڪکيل نوڙي کان ڊڄندو آهي، هن چيو ته توهان پتا نه پڙهيا آهن پر اسان هزارين صفحا پڙهيا آهن، چيف جسٽس چيو ته ڪيس ۾ عدالت تي وڏي ذميواري هوندي آهي نٿا چاهيون ٿا جنهن جي خلاف فيصلو اچي اهو چوي ته اسان کي نه ٻڌايو ويو، سپريم ڪورٽ ۾ ٻڌڻي دوران چيف جسٽس چيو ته بينچ جي بناوت کانپوءِ ڪيس جي نئين سر ٻڌڻي ٿيندي ۽ وڪيلن کي ٻيهر دليل ڏيڻا پوندا.

 

وڏي وزير جي ڪوششن رنگ لاڳو، وفاق ڪراچي سرڪلر ريلوي منصوبو سي پيڪ ۾ شامل ڪري ڇڏيو

ڪراچي (اسٽاف رپورٽر) سنڌ حڪومت ۽ پاڪستان ريلوي هڪ ورڪنگ گروپ جوڙيو آهي، ته جيئن ڪراچي اربن ٽرانسپورٽ ڪارپوريشن جو انتظامي ڪنٽرول ۽ ڪراچي سرڪيولر ريلوي (ڪي سي آر) جي رائٽ آف وي سنڌ حڪومت حوالي ڪرڻ جي سمورين قانوني گهرجن ۽ تقاضن کي پوري ڪري سگهجي. اهو فيصلو اڄ سيد مراد علي شاهه ۽ ريلوي واري وفاقي وزير خواجه سعد رفيق وچ ۾ ملاقات دوران وزيراعليٰ هائوس ۾ ڪيو ويو. وڏي وزير جي معاونت صوبائي ٽرانسپورٽ وارو وزير سيد ناصر حسين شاهه، ايڊيشنل چيف سيڪريٽري (ترقيات) محمد وسيم، وڏي وزير جي پرنسپل سيڪريٽري نويد ڪامران بلوچ، سيڪريٽري ٽرانسپورٽ طحهٰ فاروقي، سيڪريٽري فنانس حسن نقوي ڪئي، جڏهن ته وفاقي وزير جي معاونت سندس ٽي رڪني ٽيم ڪئي. وڏي وزير سيد مراد علي شاهه چيو ته هُو ڪراچي سرڪيولر ريلوي واري رٿا کي بحال ڪرڻ چاهي ٿو. هن چيو ته مون ڪيترائي ڀيرا ان مسئلي تي چائنيز اٿارٽيز سان ملاقاتون ڪيون آهن ته ان کي سي-پيڪ ۾ شامل ڪيو وڃي ۽ مون کي اميد آهي ته منهنجون ڪاوشون ضرور ڪاميابي ماڻينديون. هن چيو ته اصل ڪي سي آر رٿا جي ڊيگهه 43.12 ڪلوميٽر آهي، جيڪا ڊرگ روڊ کان سرڪلر ۾ الادين پارڪ تائين آهي، ان سرڪلر ۾ جنهن تي 2609 ملين ڊالر جي لڳ ڀڳ لاڳت ايندي. هن چيو ته ان رٿا جي موجوده اسڪوپ ۾ واڌ ڪندي ان کي سٽي اسٽيشن کان اسٽيل ملز شروع ڪرڻو آهي ۽ بعد ۾ ڊي ايڇ اي سٽي سپر هاءِ وي کان ٽاور ڏانهن سرڪلر جو رخ هوندو. ان سان سڄي سمورو شهر بشمول صنعتي ۽ رهائشي علائقن جو احاطو ٿي سگهندو. سنڌ جي وڏي وزير سيد مراد علي شاهه ۽ وفاقي ريلوي واري وزير خواجه سعد رفيق ان ڳالهه تي اتفاق ڪيو ته انٽرنيشنل بڊنگ ذريعي هڪ نئين فزيبلٽي تيار ڪئي وڃي ته جيئن ڪي سي آر جي مستقبل جو احاطو ڪري سگهجي، پر هن وقت ڌيان ان رٿا جي شروع ڪرڻ تي هجڻ گهرجي، جنهن لاءِ هن چيو ته هُو ذاتي طور تي چين جو دورو ڪندو ۽ جوائنٽ ڪائونسل فار ڪارپوريشن (جي سي يس) ۾ شرڪت ڪندو ته ان رٿا کي سي-پيڪ ۾ شامل ڪيو وڃي. واضح رهي ته ڪي سي آر واري رٿا 1964ع ۾ شروع ٿي هئي ۽ اهو ماس ٽرانسپوٽيشن سسٽم 1984ع تائين موثر رهيو. ان رٿا جي افاديت هلندڙ وقت ۾ واڌ ۽ سيڙپڪاريءَ ۾ گهٽتائيءَ ڪري متاثر ٿي، جنهن جي نتيجي ۾ ريل گاڏين جي تعداد ۾ ڪمي ٿي، انڪري ان جي آپريشن استدادڪار گهٽ ٿيندي وئي ۽ آخرڪار ڊسمبر 1999ع ۾ انکي بند ڪيو ويو. انهيءَ بعد وفاقي حڪومت ۽ جائيڪا 2008ع ۾ ان جي اسٽڊي ڪئي ۽ 2009ع م رپورٽ فائل ڪئي. جائيڪا آسان شرطن تي قرضو ڏيڻ جي تجويز جي آڇ ڪئي پر ڪنهن نه ڪنهن ڪارڻ ڪري ان تي عملدرآمد نه ٿي سگهيو. 2008ع ۾ ڪراچي اربن ٽرانسپورٽ ڪارپوريشن جوڙي وئي، جنهن ۾ 60 سيڪڙو حصو پاڪستان ريلوي جو آهي، 25 سيڪڙو حصو سنڌ حڪومت ۽ 15 سيڪڙو ڪراچي ميونسپل ڪارپوريشن جو آهي. ڪي يو ٽي سي کي ڪراچي سرڪولر ريلوي (ڪي سي آر) رٿا تي عملدرآمد ڪرڻو آهي. وڏي وزير ڪي سي آر رٿا کي شروع ڪرڻ لاءِ ڪي يو ٽي سي جو انتظامي ڪنٽرول وٺڻ لاءِ پلان تيار ڪيو آهي، ان تي غور ويچار ڪندي سيد مراد علي شاهه چيو ته هن وزيراعظم نواز شريف کي خط لکيو هو ته ڪراچي اربن ٽرانسپورٽ ڪارپوريشن جي اونرشپ سنڌ حڪومت حوالي ڪئي وڃي ۽ سنڌ حڪومت سان گڏجي ڪي سي آر رٿا کي سي-پيڪ ۾ وٺي وڃڻ لاءِ سهڪار ڪري ۽ ڪي سي آر رٿا لاءِ خودمختيار ضمانت ڏئي. هن چيو ته مان وزيراعظم جو ٿورائتو آهيان ته منهنجو جيئن ئي کيس خط مليو، هن ان جي منظوري ڏئي ڇڏي ۽ وزيراعظم سنڌ جي ماڻهن جي مفاد ۾اسان سان تعاون ڪري رهيو آهي. ريلوي واري وفاقي وزير خواجه سعد رفيق چيو ته پاڪستان جو وزيراعظم نواز شريف ڪي يو ٽي سي جو انتظامي ڪنٽرول سنڌ حڪومت کي ڏيڻ تي راضپو ظاهر ڪيو آهي ۽ هن سنڌ حڪومت کي پنهنجي مڪمل سهڪار جو يقين ڏياريو آهي. وڏي وزير ۽ وفاقي وزير ڪي يو ٽي سي جي مئنجميٽ حوالي ڪرڻ لاءِ ۽ ڪي سي آر جي رائٽ آف وي سنڌ کي حوالي ڪرڻ لاءِ حڪمت عملي واضع ڪرڻ ۽ هڪ ورڪنگ گروپ جوڙڻ لاءِ راضپو ظاهر ڪيو. ۽ هي گروپ اي سي ايس (ترقيات) محمد وسيم. سيڪريٽري ترانسپورٽ طحهٰ فاروقي ۽ ڪمشنر ڪراچي اعجاز خان ۽ وزارت ريلوي جي چيف انجنيئر بشارت، ڊي ايس ڪراچي ۽ چيف مارڪيٽنگ آفيسر تي ٻڌل هوندو ۽ اهي ايندڙ هفتي کان اجلاس شروع ڪندا. وفاقي وزير سنڌ جي وڏي وزير کي يقين ڏياريو ته هُو سنڌ حڪومت کي تمام ضروري ماهرن جي مدد به فراهم ڪندو. ملاقات ۾ ان ڳالهه تي به اتفاق ڪيو ويو ته پاڪستان ريلوي جي 260 ايڪڙ تي مشتمل زمين سنڌ حڪومت کي ڪي سي آر رٿا لاءِ ڏني ويندي. واضح رهي ته ڪي سي آر روٽ سان 3600 حدد خليون آهن، انڪري وڏي وزير پنهنجي ٽيم کي هدايت ڪئي ته انهن حددد خلين کي هٽائڻ لاءِ منصوبو جوڙيو وڃي. انهيءَ دوران ملاقات ۾ اهو به فيصلو ٿيو ته جائيڪا اسٽڊي سان گڏوگڏ سنڌ حڪومت ان رٿا جي هڪ ٻئي اسٽڊي لاءِ عالمي فرمز کي گهرائيندي ته جيئن ان جي اسڪوپ ۾ خاطر خواهه واڌ ٿي سگهي. وڏي وزير پنهنجي ٽيم کي هدايت ڪئي ته هُو حددد خلين جي خاتمي لاءِ ڪلين-پلان چاهي ٿو ۽ هو ان ڄاڻايل رٿا جي چئوطرف بائونڊري وال جي تعمير شروع ڪرائيندو. هن چيو ته پاڪستان پيپلز پارٽي جي حڪومت اهو تحفو ڪراچي جي شهرين کي ڏيڻ چاهي ٿي. خواجه سعد رفيق وڏي وزير سيد مراد علي شاهه جي ڪاوشن ۽ جذبي جي واکاڻ ڪندي چيو ته اوهان جي اڳواڻي قابل ستائش ۽ متحرڪ آهي ۽ اوهان اهو ڪم ڪري سگهو ٿا. هن چيو ته منهنجي وزارت اوهان سان هر قسم جو سهڪار ۽ تعاون ڪندي.

 

عمران عوام کي بيوقوف ٿو سمجهي، ڪميشن نه ٺهي ته لاڪ ڊائون ڪنداسين: ن ليگ

اسلام آباد (م.ڊ) مسلم ليگ ن جي اڳواڻن چيو آهي ته عمران خان هڪ ڀيرو ٻيهر يوٽرن ورتو، پهريان چيائين ته ڪميشن ٺاهيو، هاڻي ٿو چئي ته ڪميشن ٺهي ته بائيڪاٽ ڪنداسين، هو ڄاڻي ٿو ته ڪميشن ٺهي ته ان کي وٺڻ بدران ڏيڻو پوندو. ليگي اڳواڻن طلال چوڌري ۽ انوشا رحمان ميڊيا سان ڳالهه ٻول ڪئي، ان دوران طلال چوڌريءَ جو چوڻ هو ته ڪميشن نه ٺهي ته لاڪ ڊائون ڪنداسين، هاڻي ٿا چوڻ ته ڪميشن ٺهي ته بائيڪاٽ ڪنداسين، عمران خان ماڻهن کي بيوقوف ٿو سمجھي، اهڙا وزيراعظم نه بڻجڻ گھرجن، ان موقعي تي انوشا رحمان چيو ته عوام هجي يا پارليامينٽ عمران خان ڪنهن کي نه ٿو مڃي، هو شارٽ ڪٽ سبب شيرواني پائي وزيراعظم بڻجڻ چاهي ٿو، محسن نواز رانجھا جو چوڻ هو ته عمران خان وري يوٽرن ورتو، ستن مهينن تائين ڪميشن جي پُڪار ۽ هاڻي ان کان انڪار، هي ڪهڙو عمراني قانون آهي. مسلم ليگ ن جي اڳواڻن جو چوڻ هو ته هو سپريم ڪورٽ جي هر فيصلي کي مڃين ٿا، پر تحريڪ انصاف ئي ڀڄي ويندي.

 

ن ليگ راهِه فرار پئي اختيار ڪري، پانامه شريف فئملي کي نه ڇڏيندو: چانڊيو

ڪراچي (اين اين آءِ) سنڌ جي سڌسماءَ واري صلاحڪار مولابخش چانڊئي چيو آهي ته پانامه شريف فئملي کي نه ڇڏيندو ڇو ته شريف فئملي سڄو قوم سان ڪوڙ ڳالهايو آهي حڪومت هاڻي ايئن ڀڄي رهي آهي جيئن اڄ درياهه جي ڪناري ڀڄندو اها ڳالهه هن هڪ نجي ٽي وي چئنل سان ڳالهائيندي ڪئي هن چيو ته پانامه جي معاملي ۾ مسلم ليگ (ن) جا ڪجهه اڳواڻ شروع ۾ شريف فئملي جو بچاءُ ڪيو پر جيئن ئي پانامه جي حقيقت جي خبر پئي ته (ن) ليگ جي سينيئر ۽ معتبر اڳواڻن خاموشي اختيار ڪئي ۽ اهي لاپته ٿي ويا مولابخش چاندِو چيو ته حڪومت اهڙا ماڻهو ڀرتي ڪيا آهن جيڪي عدالت ٻاهران سوال پڇڻ وارن کي گاريون ڏين ٿا حڪومت کي احساس ٿي ويو آهي ته پانامه جو معاملو حقيقت آهي ان کان بچڻ مشڪل ئي نه پر ناممڪن آهي هن چيو ته پ پ پ جي خلاف (ن) ليگ جا ٻه نعرا هئا جيڪي ان جي پير ۽ مرشد ضياءُالحق جا هئا هڪ پيپلزپارٽي ڪرپٽ آهي ۽ ٻيو احتساب خدا جو شان ڏسو جو اڄ بين الاقوامي ڪرپشن اسڪينڊل ۾ شريف فئملي جو نالو آهي ۽ هاڻي احتساب کان فرار وارو رستو اختيار ڪري رهيا آهن مولابخش چانڊيو چيو ته شريف فئملي هر ڀيري قوم سان ڪوڙ ڳالهايو آهي مشرف سان معاهدو ڪري ملڪ مان ٻاهر ويو ۽ ان ڳالهه جو انڪار ڪندو رهيو آخرڪار ان جو قوم سان ڳالهايل ڪوڙ پڪڙجي ويو ۽ آخر ثابت ٿي ويو ته هو مشرف سان معاهدو ڪري ويو هو. هن چيو ته سپريم ڪورٽ ذوالفقارعلي ڀٽو کي ڦاسي ڏني بينظير ڀٽو شهيد کي ڪٽهڙي ۾ بيهاريو ۽ ٻن چونڊيل وزيراعظم کي گهر موڪليو ان جاءِ تي سپريم ڪورٽ هاڻي به هڪ مشڪل فيصلو ڪندي.

 

موجوده حڪومت انساني حقن جي تحفظ کي يقيني بنائڻ لاءِ تمام گهڻا قدم کڻي رهي آهي: وزيراعظم

اسلام آباد (اين اين آءِ) وزيراعظم نوازشريف چيو آهي ته موجوده حڪومت انساني حقن جي تحفظ کي يقيني بنائڻ لاءِ ڪيترائي قدم کڻي رهي آهي انساني حقن جي عالمي ڏينهن جي مناسبت سان جاري پيغام ۾ وزيراعظم چيو ته انساني حقن جو عالمي ڏينهن بين الاقوامي انساني حقن جي عينڪ کي اجاگر ڪرڻ لاءِ ملهايو ويندو آهي گڏيل قومن پاران 1948 کان انساني حقن جو عالمي ڏينهن ملهائڻ جو مقصد دنيا جي قومن جو ڌيان انساني حقن ۽ انساني قدرن جي تحفظ ڏانهن ڏيارڻ آهي وزيراعظم چيو ته گڏيل قومن پاران انساني حقن جو عالمي ڏينهن ملهائڻ جي شروعات کان پهريان اسان جي مذهب اسلام انساني حقن جي پاسداري جي تعليم ڏني آهي هن چيو ته مان هميشه انساني آزادي ۽ اظهار راءِ جي آزادي ۽ سڀني جي لاءِ انصاف جي لاءِ آواز بلند ڪيو آهي هن چيو ته مان هميشه فرق ۽ شدت پسندي جي خلاف جدوجده ڪرڻ جي ضرورت تي زور ڀريو آهي. اسان جي حڪومت قائداعظم جي ويزن موجب پاڪستان کي هڪ عظيم ملڪ بنائڻ لاءِ قومي اتحاد ۽ يڪجهتي کي هٿي ڏيڻ لاءِ ڪوشش ڪري رهيو آهي. اسان پرامن جو هڪ اهڙو ماحول پيدا ڪرڻ لاءِ ڪوشش ۾ آهيون جتي سمورن انسانن کي برابر جو درجو حاصل هجي ۽ ذات نسل رنگ مذهب جي نالي تي ان سان فرق نه ڪيو وڃي. وزيراعظم چيو ته پاڪستان کي دهشتگردي سميت تمام گهڻا للڪار درپيش آهن ته ذميوار ملڪ جي حيثيت سان پاڪستان پنهنجي علائقائي ۽ بين الاقوامي ذميوارين کان پوري طرح باخبر آهي ۽ اسان انساني حقن جي حوالي سان ڪنوينشن تي مناسب طور تي عمل ڪري رهيا آهيون هن چيو ته حڪومت ملڪ مان غربت جي خاتمي ۽ هر شعبي سان تعلق رکندڙ نوجوانن لاءِ روزگار جا موقعا پيدا ڪرڻ جو عزم ڪيو آهي. وزيراعظم جي يوٿ پروگرام جي منصوبي تحت نوجوانن جي لاءِ موقعا پيدا ڪيا پيا وڃن ته جيئن انهن کي بااختيار ۽ ڪابل بڻائي سگهجي ته هو قومي تعمير ۽ ترقي ۾ پنهنجو ڪردار ادا ڪري.

 

ملڪي دفاع ۾ آئي ايس آئي جو ڪردار فخر جوڳو آهي: جنرل قمر جاويد باجوه

اسلام آباد (اين اين آءِ) چيف آف آرمي اسٽاف جنرل قمر جاويد باجوا سيڪيورٽي ۽ ملڪ جي بچاءُ جي استحڪام لاءِ آءِ ايس آءِ جي ڪردار ۽ ان جي آفيسرن ۽ جوانن جي قربانين کي ساراهيو آءِ ايس پي آر مطابق چيف آف آرمي اسٽاف جنرل قمر جاويد باجوا جمعي تي آءِ ايس آءِ هيڊڪوارٽر جو دورو ڪيو آرمي چيف کي ملڪ جي اندروني ۽ ٻاهرين سيڪيورٽي صورتحال ۽ آءِ ايس آءِ جي قومي سلامتي ۽ دهشتگردي جي خاتمي جي حوالي سان ڪردار بابت تفصيلي بريفنگ ڏني ويئي. آرمي چيف انٽر سروسز انٽيليجنس جي ڪارڪردگي تي پنهنجي مڪمل اعتماد جو اظهار ڪندي سيڪيورٽي ۽ ملڪي بچاءُ جي استحڪام لاءِ آءِ ايس آءِ جي ڪردار ۽ ان جي آفيسرن ۽ جوانن جي قربانين کي ساراهيو.

 

پيپلز پارٽي پاناماليڪس معاملي کي ملڪ لاءِ ٽيسٽ ڪيس قرار ڏئي ڇڏيو

ڪراچي (اين اين آءِ) پاڪستان پيپلزپارٽي جي چيئرمين بلاول ڀٽو زرداري پانامه ليڪس کي ملڪ جي لاءِ هڪ ٽيسٽ ڪيس قرار ڏيندي زور ڀريو ته اڄ رشوت جي خاتمي جي عالمي ڏينهن جي موقعي تي پوري قوم کي جمهوري احتساب جي ذريعي ڪرپشن جي خاتمي جو پڪو ارادو ڪرڻ گهرجي. بلاول ڀٽو زرداري چيو ته معاشري کي درپيش ٻين خرابين سان گڏوگڏ ڪرپشن تي به آمريتي دور ۾ هٿي ڏيئي ان جي سرپرستي ڪئي ويئي. ،قدس ڳئون وارو سنڊرون ۽ احتسابي ڊانچي کي صرف سياسي انتقام لاءِ استعمال ڪندي ڪرپشن جي خلاف اٿندڙ سمورن قدمن ۾ رڪاوٽون آهن بلاول ڀٽو زرداري چيو ته اسان جي وزيراعظم جي دنيا جي وڏي ڪرپشن اسڪينڊل پانامه ليڪس ۾ ملوث هجڻ ۽ نواز ليگ پاران پانامه ڪيس جي انڪوائري بابت پاڪستان پيپلزپارٽي جي بل کي منظور ڪرائڻ ۾ نٽائڻ تي سڄي قوم کي جاڳڻو پوندو. پ پ پ جي چيئرمين ڪرپشن جي خاتمي لاءِ سنڌ حڪومت پاران پنهنجي رشوت جي خاتمي واري کاتي کي سختي سان سرگرم ڪرڻ کي ساراهيو آهي جڏهن ته ٻين صوبن ۾ اهي ئي کاتا غير سرگرم ۽ خاموش آهن هن چيو ته مقدس ڳئون کي ڀڄڻ جو ڪوبه رستو ڏيڻ کان سواءِ سمورن ادارن مان هر قسم جي ڪرپشن جي خاتمي لاءِ جمهوري احتساب متعارف ڪرائڻ لاءِ منهنجا 4 مطالبا به وڏي حد تائين ويندا.

 

سموريون سياسي پارِٽيون هڪ خاص وقت ۾ انساني حقن جو چارٽر بڻائين: آصف علي زرداري

اسلام آباد (اين اين آءِ) اڳوڻي صدر آصف علي زرداري انساني حقن جي عالمي ڏينهن جي موقعي تي پنهنجي پيغام ۾ چيو آهي ته ملڪ جي ابتر انساني حقن جي صورتحال اها گهرج ڪري ٿي ته ميثاق جمهوريت تي انساني حقن جو هڪ قومي چارٽر جوڙيو وڃي، هن پنهنجي پيغام ۾ چيو ته انساني حق عالمي حق هوندا آهن ۽ انهن حقن جي ڪا به سرحد نه هوندي آهي ۽ ان جي تقاضا آهي ته سموريون سياسي پارٽيون هڪ خاص وقت ۾ انساني حقن جو اهو چارٽر جوڙين، هن چيو ته امن ۽ جمهوريت انساني حقن سان جڙيل آهن ۽ جيستائين انساني حق نه ڏنا ويندا تيستائين امن ۽ جمهوريت اسان کان پري رهندا، هن چيو ته ضرورت ان ڳالهه جي آهي ته آزادي لبرلزم کي هٿي ڏيڻ لاءِ هڪ سازگار ماحول پيدا ڪريون، هن چيو ته سڀ کان بنيادي انساني حقن ۾ زندگي جو حق آهي، آزادي جو حق ۽ تحفظ جو حق آهي جنهن سان آزادي اظهار، اطلاع ڏيڻ جو حق ڪنهن هنڌ تي گڏ ٿيڻ جو حق ڪنهن تنظيم سان جڙڻ جو حق ان چارٽر ۾ شامل ٿيڻ گهرجي، هن چيو ته افسوس جي ڳالهه  آهي ته اڄ ان انساني حقن جي ڏينهن جي موقعي تي اطلاع پهچائڻ کان انڪار ڪيو پيو وڃي، وفاقي سطح تي ان لاءِ ڪا به قانونسازي نه ڪئي وئي آهي، هن انساني حقن جي ڪارڪنن کي سلام پيش ڪندي ان جي تحفظ لاءِ خاص قدمن جو مطالبو ڪيو.  ٻئي طرف پ پ جي شريڪ چيئرمين آصف علي زرداري سان دبئي ۾ سانگهڙ سان تعلق رکندڙ سينيئر سياستدان ڄام قائم علي ملاقات ڪئي، ملاقات ۾ سياسي صورتحال ۽ ٻين معاملن تي ڳالهه ٻولهه ڪئي وئي، ان موقعي تي آصف زرداري چيو ته پ پ وفاق جي پارٽي آهي، ماضي ۾ پارٽي منشور موجب عوام جي خدمت ڪئي ۽ ڪندا رهنداسين، هن چيو ته ايندڙ چونڊن ۾ پ پ وڏي ڪاميابي حاصل ڪندي، ان موقعي تي ڄام قائم علي چيو ته پ پ  جي سنڌ حڪومت سانگهڙ سميت صوبي جي سمورن ضلعن ۾ عوام جا مسئلا حل ڪرڻ لاءِ قدم کڻي رهي آهي، اسان سنڌ حڪومت جي عوام جي خدمت جي ساراهه ڪريون ٿا.

 

بلال اڪبر سميت 7 ميجر جنرلن جي ليفٽينينٽ جنرل جي عهدي تي ترقي: آءِ ايس پي آر

راولپنڊي (اين اين آءِ) پاڪ فوج جي ستن ميجر جنرلز کي ليفٽيننٽ جنرل جي عهدي تي ترقي ڏني ويئي آهي جمعي تي آءِ ايس پي آر مطابق پاڪ آرمي جي ستن ميجر جرنلز کي ليفٽيننٽ جنرل جي عهدي تي ترقي ڏني ويئي جن ميجر جنرلز کي عهدي جي ترقي ڏني ويئي آهي انهن ۾ ميجر جنرل نديم رضا ميجر جنرل همايون عزيز، ميجر جنرل نعيم اشرف ميجر جنرل محمد افضل ميجر جنرل شير افگن ميجر جنرل قاضي اڪرام ۽ ميجر جرنل بلال اڪبر ڊي جي ريجرز سنڌ شامل آهن.

 

نواز شريف ٻڌي ڇڏي اسان پاناما کي وسارڻ نه ڏينداسين، ڪرپشن بابت صدر جو بيان نواز شريف ڏانهن اشارو آهي: عمران خان

اسلام آباد  (اين اين آءِ) پاڪستان تحريڪ انصاف جي چيئرمين عمران خان چيو آهي ته پانامه ڪيس جي ٻڌڻي نه ٿيڻ تي مايوسي ٿي پر وزيراعظم نوازشريف ۽ بچاءُ وارو وزير خواجه آصف ٻڌي ڇڏي ته اسان قوم کي پانامه ڪيس وسارڻ نه ڏينداسين ڪيس جي لاءِ ڪميشن جي ضرورت ئي نه آهي ڪجهه به ٿي وڃي پانامه ليڪس ڪيس کي انجام تائين پهچائينداسين جمعي تي ميڊيا سان ڳالهائيندي تحريڪ انصاف جي چيئرمين عمران خان چيو ته اسان جي ڪوشش هئي ته پانامه ڪيس جي ٻڌڻي روزانو جي بنياد تي ٿئي پر اڄ ڪيس جي ٻڌڻي نه ٿيڻ تي مايوسي ٿي آهي. پر اسان عدالتي فيصلن جو احترام ڪيون ٿا عمران خان چيو ته ڪيس ۾ ڪميشن بنائڻ جي ضرورت نه آهي هاڻي وقت گذري ويو ۽ اهو ڪيس سپريم ڪورٽ ۾ آهي. اميد آهي ته جنوري جي پهرين هفتي ساڳي بئنچ ان ڪيس کي ٻڌندي ايندڙ ڪيس جي ٻڌڻي نئين چيف جسٽس ثاقب نثار جي اڳواڻي ۾ ٿيندي. هاڻي ان تي وڏي ذميواري لاڳو ٿيندي قوم ڪنهن به ڪيس ۾ ايتري دلچسپي نه ورتي جيتري پانامه ڪيس ۾ وٺي رهي آهي اسان جي ڪوشش آهي ته پانامه ڪيس جو جيترو جلد ٿي سگهي فيصلو ٿي وڃي ڇو ته ان ڪيس جي فيصلي سان خبر پئجي ويندي ته ملڪ ۾ طاقت جي لاءِ به قانون موجود آهي. چيئرمين پي ٽي آءِ چيو ته خواجه آصف پارليامينٽ چيو هو ته ڳڻتي نه ڪيو قوم جلد ئي وساري ڇڏيندي پر مان وزيراعظم نوازشريف ۽ خواجه آصف کي ٻڌائڻ چاهيان ٿو ته قوم کي ڪنهن به صورت ۾ ڪيس جي حوالي سان وسارڻ نه ڏينداسين ۽ نوازشريف کان جواب طلب ڪنداسين.