تازيون خبرون

Daily Archives: December 5, 2016

سموري سنڌ ايڪتا جي رنگن ۾ رڱجي وئي، ماڻهن جو سمنڊ اٿلي پيو، دهلن شرنائن تي جهمريون، ريليون

حيدرآباد (اي پي پي) سنڌ جو ثقافتي ڏهاڙو نين اميدن ۽ جوش سان گڏ ڀرپور نموني ملهايو ويو. ” اي پي پي “ جي رپورٽ مطابق سنڌ واسين طرفان قديم سنڌي ثقافت جي بقا لاءِ ثقافتي ڏهاڙو ملهائڻ ڀرپور نموني سان ملهائڻ واري اعلان بعد گذريل ڏينهن سنڌ واسي هڪ هنڌ گڏجي ويا ۽ سنڌ جا واهڻ وستيون خوشي مان جهومي اٿيون، سموري سنڌ هڪ هنڌ گڏجي وئي، هر طرف رنگن جو بهارون نظر اچڻ لڳيون، معصوم ٻالڪن ۽ عورتن سميت سمورا سنڌ واسي خوشين مان جهومندي نظر اچڻ لڳا، سنڌ ڌرتي سان يڪجهتي جو اظهار ڪرڻ لاءِ سنڌ جو ثقافتي ڏهاڙو قومي عيد جيان ڀرپور طريقي سان ملهايو ويو، ڌرتي ڌڻين طرفان ثقافتي ڏهاڙي جي حوالي شاندار تقريبن ۽ جوش خروش جو مظاهرو ڪيو ويو، سنڌي ثقافت جو ڏهارو ملهائڻ واري اعلان بعد ڌرتي جا وارث ثقافتي ڏهاڙو ملهائڻ جي تيارين ۾ مصروف ٿي ويا ۽ سنڌ جا شهر توڙي جهر جهنگ ٿقافتي رنگن ۾ رنگجي ويا آهن ۽ سنڌ ۾ رهندڙ سموريون ٻوليون ڳالهائيندڙن سميت سياسي، سماجي، شاگردن، نوجوانن ۽ ساڃاهه وندن طرفان ان ڏهاڙي کي خوشين ۽ محبت جي ڏهاڙي طور ملهايو ويو ۽ سنڌ ۾ ان حوالي سان تقريبون منعقد ڪيون ويون. ان ڏهاڙي جي حوالي سان حيدرآباد پريس ڪلب آڏو مختلف سياسي، سماجي ۽ شهري تنظيمن طرفان ريليون ڪڍي سنڌ سان ڀرپور يڪجهتي جو مظاهرو ڪيو ويو. ثقافتي ڏهاڙي تي حيدرآباد شهر جي سمورن روڊن رستن تي ان ڏهاڙي جي حوالي سان بينر ۽ پينافليڪس لڳايا ويا هئا ۽ شهر جي سمورن رستن ۽ چوراهن تي سنڌ واسي جهومندي ۽ خوشين وچان نچندي نظر آيا. حيدرآباد پريس ڪلب آڏو ثقافتي ڏهاڙي جي حوالي ان لڳايل اسٽيج تي پاڪستان پپلز پارٽي حيدرآباد سميت مختلف قومپرست پارٽين ۽ شهرين وڏي انگ ۾ پهچي اهو ڏهاڙو ڀرپور انداز ۾ ملهايو جڏهن ته ان موقعي تي سنڌي جي ڀلوڙ راڳين ۽ ناليواري مزاحيه فنڪارن فن جو مظاهرو ڪيو. هوڏانهن سنڌ جي مختلف شهرن ۾ قومي عيد ملهائيندڙ شاگردن ۽ معقوم ٻارڙن ٻڌايو ته ثقافتي ڏهاڙي ۽ تقريب جي حوالي سان شاگردن ۾ وڏو جوش ۽ خروش آهي ۽ اهي ان تقريب کي ملهائڻ لاءِ ڪافي ڏينهن کان محنت ڪري رهيا آهن هن ٻڌايو ته اسانجي ثقافت امير ترين ثقافت آهي ۽ اسانجو فرض بڻجي ٿو ته ان جي تحفظ ۽ بقا لاءِ جيترو ٿي سگهي ڪوششون وٺون. ان حوالي سان ٽنڊو آدم جي هڪ خانگي اسڪول طرفان ملهائي ويندڙ قومي عيد جي موقعي تي ذميواريون ڏنل شاگردن طلحهٰ علي ساند ۽ حسنين علي ساند ” اي پي پي “ کي ٻڌايو ته سنڌ اسانجي ماءُ آهي جنهن جي ثقافت دنيا جي مڙني ثقافتن کان قديم آهي جنهن جي بقا لاءِ نوجوان نسل کي ئي محنت ڪرڻي آهي هنن ٻڌايو ته اڄ جي پروگرام ۾ هو ڀرپور نموني سان پنهنجي ثقافت کي اجاگر ڪندا هنن ٻڌايو ته ثقافت ڏهاڙو ملهائڻ جي حوالي سان اسڪول انتظاميه ڀرپور سهڪار ڪيو آهي. ثقافتي ڏهاڙي تي سڄي سنڌ ۾ ثقافتي ويس پائي ريليون ڪڍيون ويون، ان سان گڏوگڏ مچ ڪچهريون پڻ ڪوٺايون ويون ۽ ملهه ملاکڙو، ونجهه وٽي ۽ ڪوڏي ڪوڏي سميت سنڌ جي ثقافتي راندين جو پڻ مظاهرو ڪيو ويو. هزارين سال قديم ثقافت جو ڏهاڙو ملهائڻ لاءِ سنڌ جي ننڍن، وڏن شهرن، ڳوٺن، وستين توڙي واهڻ ۾ ثقافتي پروگرام ڪرايا ويا. هر سال جيان هن سال به هزارين سال قديم تهذيب جي ثقافت جا سمورا رنگ نروار ڪرڻ لاءِ ثقافتي سرگرميون ڀرپور انداز ۾ پيش ڪيون ويون، تعليمي ادارن ۾ پروگرام منعقد ڪيا ويا. هن ڀيري ثقافتي ڏهاڙي کي انتها پسنديءَ خلاف جاڳرتا سري هيٺ ملهائڻ جو اعلان ڪيو ويو هو ۽ ان اعلان تحت انتهاپسنديءَ خلاف سنڌي ثقافت جو ڪردار جي عنوان سان ڪانفرنسون ڪوٺايون ويون، ان ڏهاڙي تي سنڌ واسين جو آواز سڄي دنيا ۾ گونجي اٿيو ۽ عالم کي بچائڻ ۽ انتهاپسندي کي شڪست ڏيڻ لاءِ محبتن جي پرچار ڪئي وئي. ڌرتي ڌڻين جو چوڻ آهي ته سنڌي ثقافت ۾ اهڙي طاقت آهي جو اها ٻين ثقافتن سان گڏجي دنيا مان انتها پسندي جي پاڙ پٽي سگهي ٿي.

 

الزامن بدران سٺن قدمن تي ڌيان ڏيڻو پوندو، تڪرار جي پرامن حل سان تعاون کي هٿي ملندي: پاڪستان

اسلام آباد  (اين اين آءِ) وزيراعظم جي پرڏيهي معاملن واري صلاحڪار سرتاج عزيز چيو آهي ته لائين آف ڪنٽرول ۽ ورڪنگ بائونڊري تي اڳرائي باوجود هارٽ آف ايشيا ڪانفرنس ۾ پاڪستان جي شرڪت افغانستان ۾ پراڻي امن لاءِ پاڪستان جي عزم جو اطهار آهي، افغانستان جي مسئلي جو فوجي حل نه آهي، اهو مسئلو افغان عوام جي خواهشن موجب ڳالهين

ذريعي حل ڪيو وڃي، پاڪستان جي حڪومت ۽ عوام افغانستان ۾ امن لاءِ افغان عوام سان گڏ آهي، سارڪ سربراهه ڪانفرنس جو ملتوي ٿيڻ علائقائي تعاون جي ڪوششن لاءِ نقصان آهي، آچر تي افغانستان ۾ امن ۽ ترقي جي حوالي سان ڇهين هارٽ آف ايشيا ڪانفرنس کي خطاب ڪندي هن چيو ته هارٽ آف ايشيا ڪانفرنس ۾ شرڪت اسان لاءِ اعزاز آهي، ڇڪتاڻ باوجود شرڪت خطي ۽ افغانستان ۾ امن لاءِ پاڪستان جي عزم جو اظهار آهي، افغانستان کي سڌو سنئون پاڪستان واپاري سهولتون ڏيڻ لاءِ پرعزم آهي، پاڪستان گذريل 3 ڏهاڪن کان لکين مهاجرن جي مهمانواز ڪئي آهي، گڏيل قومن سان گڏجي افغان مهاجرن جي باعزت واپسي لاءِ ڪم ڪري رهيا آهيون، افغان مهاجرن جي رضاڪاراڻي وطن واپسي جي عمل کي 31 ڊسمبر 2017 تائين وڌائي سگهجي ٿو، افغانستان جي هر ممڪن مدد ڪنداسين، سرتاج عزيز چيو ته پاڪستان حڪومت ۽ عوام افغانستان ۾ امن لاءِ افغان عوام ۽ حڪومت سان گڏ آهي، هن چيو ته علاقائي رابطو معاشي ترقي ۾ واڌ وج بنياد آهي،سياسي مضبوطي ۽ معاشي ترقي علائقي جي استحڪام سان جڙيل آهي، افغانستان ۾ امن اسان جي گڏيل ضرورت آهي، هن چيو ته الزامن بدران اسان کي سٺن قدمن تي ڌيان ڏيڻو پوندو، دهشتگردي ۾ انساني جانين جي نقصان کي روڪڻ لاءِ گڏجي ڪوششون ڪرڻيون پونديون، تڪرار جي پرامن حل سان علائقي جي تعاون کي هٿي ملندي، هن چيو ته ستين هارٽ آف ايشِيا ڪانفرنس جو آئيذر بائيجان ۾ انقاد سٺي ڳالهه آهي، هارٽ آف ايشيا ڪانفرنس جو فورم افغانستان ۾ امن لاءِ اهم ڪردار ادا ڪري رهيو اهي، پاڪستان استمبول ڳالهين واري عمل کي اهمت ڏئي ٿو، هن خاطري ڪرائي ته پاڪستان هارٽ آف ايشيا جا مقصد حاصل ڪرڻ لاءِ تعاون ڪندو ۽ ان سلسلي ۾ اسٽيڪ هولڊرز طرفان هن وقت تائين ڪيل ڪوششن کي با مقصد بڻائڻ جي ضرورت تي ڀريو، هن چيو ته افعانستان ۾ سيڪيورٽي صورتحال تمام ڏکي آهي، هن چيو ته ڪنهن هڪ ملڪ کي وڌندڙ ڇڪتاڻ جو الزام مڙهڻ تمام سولو آهي، نيڪ نيتي سان مقصدن تي ڪم ڪرڻ جي ضرورت آهي، افغان حڪومت ۽ حذب اسلامي افغانستان ۾ ٿيندڙ امن معاهدو ۽ عملدرآمد وڌيڪ مزاحمت ڪندڙ گروپن سان گڏجي ڳالهين لاءِ رول ماڊل هوندو، هن چيو ته افغانستان ۾ دهشتگردي ۽ تشدد جهڙن نتيجن ۾ انساني جانيون ضايع ٿي چڪيون آهن، انهن تي ڪنٽرول ڪرڻ لاءِ موثر ۽ گڏيل ڪوششن جي ضرورت آهي، هن چيو ته افغان حڪومت  ۽ طالبان ۾ امن ڳالهين جي عمل جا سٺا نتيجا نه نڪتا آهن، هن چيو ته ڏکڻ ايشيا جي تعاون جي تنظيم سارڪ جي اسلام آباد ۾ طئه ٿيل سربراهه اجلاس جي ملتوي ٿيڻ سان تي به ڳڻتي جو اظهار ڪيو ۽ چيو ته ان سان علائقي جي تعاون کي هٿي ڏيڻ ۽ ان جي اهميت بابت ڪوششن کي نقصان ٿيو آهي، پرڏيهي صلاحڪار ٻن ڏينهن واري هارٽ آف ايشيا ڪانفرنس ۾ ڇنڇر تي ڀارت ۾ پهتل آهي، جيڪو افغانستان ۽ ان جي پاڙيسري ملڪ ۾ علائقائي تعاون ۽ خطي ۾ پائيدار امن لاءِ وڏي اهميت رکي ٿو.

 

اسان جا مطالبا نه مڃيا ويا ته گو نواز گو جو نعرو سڄي ملڪ ۾ گوجندو: بلاول ڀٽو

لاهور (اين اين آءِ) سنڌ جو ثقافتي ڏهاڙو پنجاب ۾ به ملهايو ويو، هر طرف سنڌي ٽوپي ۽ اجرڪ جا جلوها،  بلاول ڀٽو سميت پ پ اڳواڻ توڙي ڪارڪنن هڪي ٻئي کي اجرڪ ۽ توپيون پارايون، نوجوانن جا سنڌي گيتن تي رقص، پ پ چيئرمين بلاول ڀٽو چيو آهي ته جاڳ پنجاب جاڳ پاڪستان سڙي رهيو آهي، تخت رائيونڊ وارو ٻڌو هاڻ اسان گو نواز گو جو نعرو چار ديواري ۾ هڻي رهيا آهيون، جيڪڏهن اسان جا 4 مطالبا نه مڃيا ويا ته اهو سڄي ملڪ ۾ گوجندو، اهڙن خيالن جو اظهار هن بلاول هائوس لاهور ۾ پ پ سنڌ جي ورڪرز ڪنويشن کي خطاب ڪندي ڪيو، ان موقعي تي بختاور ڀٽو، آصفا ڀٽو، سنڌ جو وڏو وزير سيد مراد علي شاهه، سيد خورشيد شاهه، نثار احمد کهڙو، شيري رحمان سميت ٻيا به گڏ هئا، ان موقعي تي سنڌ جي ثقافت جو ڏهاڙو ملهائي ڪيڪ ڪاٽيو ويو، بلاول ڀٽو خطاب ڪندي چيو ته گهرو وزير چوڌري نثار علي خان سبب نيشنل ايڪشن پلان ناڪام ايڪشن پلان بڻجي ويو آهي، گو نثار گو جو نعرو تخت لاهور مان اٿي رهيو آهي، گو نثار گو جو نعرو هڻائيندي چيو ته جاڳ پنجاب جاڳ پاڪستان سڙي رهيو آهي، هن ڪارڪنن کان پڇيو ته جڏهن کان بي بي شهيد جو پٽ آيو ڇا سنڌ ۾ تبديلي آئي آهي، پارٽي ۾ تبديلي اچي رهي آهي، جيڪڏهن توهان منهنجو ساٿ ڏيو ته انشاالله 2018 ۾ توهان جو وزيراعظم ڪير هوندو، جنهن تي ڪارڪنن بلاول ڀٽو جا نعرا هنيا، ان موقعي تي سنڌ جي وڏي وزير بلاول ڀٽو کي سنڌي اجرڪ ۽ سنڌي ٽوپي پيش ڪئي، ٻين اڳواڻن به هڪٻي کي  سنڌي اجرڪ ۽ ٽوپي جا تحفا ڏنا، ڪنويشن ۾ سنڌ جو ثقافتي شو به پيش ڪيو ويو، بلاول ڀٽو تقرير کانپوءِ ڪارڪنن سان سيلفيو ٺهرايون.

 

بلاول ڀٽو سياست ۾ نئون آهي اڳواڻي لاءِ وزيراعظم کان رهنمائي وٺي: مريم اورنگزيب

ڪراچي (اين اين آءِ) سڌ سماءَ جي مملڪتي وزير مريم اورنگزيب چيو آهي ته ميڊيا کي گهرجي ته هو اختلاف راءِ جي ڳالهه ضرور ڪري پر ڪنهنجي عزت جو خيال ڪري، بلاول ڀٽو سياست ۾ نئون آهي، هو اڳواڻي لاءِ وزيراعظم سان ڳالهه ڪري، 4 مطالبن تي جيڪڏهن هو سنڌ ۾ عمل ڪري اڄ ته سنڌ جون حالتون بهتر هجن ها، عمران خان خود اقتدار جو حصو آهي، هو ڪيئين اها ڳالهه ڪري ٿو ته اقتدار ۾ اچي سڀ ڪجهه تبديل ڪري ڇڏيندس، اهڙن خيالن جو اظهار هن ڪراچي پريس ڪلب جي پروگرام ميٽ تي پريس کي خطاب ڪندي ڪيو، ان موقعي تي ان سان گڏ پريس ڪلب جي سيڪريٽري ايڇ خانزاده ۽ ٻيا عهديدار به گڏ هئا، اي ايڇ خانزادي ڪراچي پريس ڪلب پاران مملڪتي وزير کي اجرڪ جو تحفو پيش ڪيو، مريم اورنگزيب چيو ته اڄ مان ڪراچي پريس ڪلب کي ثقافت وارو ڏهاڙو ملهائڻ تي مبارڪ ڏيان ٿي، هن چيو ته صحافين پاران سيڪيورٽي ۽ تحفظ جي حوالي سان قانون جي کوٽ آهي، ان حوالي سان هڪ باقائده قانون هجڻ گهرجي، اسان جي حڪومت ان سلسلي ۾ ڊرافٽ مڪمل ڪيو آهي، هو جلد پريس ڪلب ڏانهن موڪليو ويندو، صحافين جي سيڪيورٽي سيفٽي بل پهريون ڀيرو حڪومت پاران جلد پارليامينٽ ۾ پيش ڪيو ويندو، هن چيو ته ميڊيا جي حوالي سان وزيراعظم جو چٽو موقف آهي، ان کانسواءِ وزيراعظم بجلي جي لوڊشيڊنگ، ٽرانسپورٽ، دهشتگردي جي خاتمي جي حوالي سان جيڪي ڪاميابيون حاصل ڪيون آهن اهي سڀني جي سامهون آهن ۽ ڪراچي جهڙي شهر ۾ امن قائم ڪيو آهي، جيڪي ڪثر رهجي وئي آهي اها به جلد ختم ڪئي ويندي، مريم اورنگزيب چيو ته اختلاف راءِ ضرور ڪيو وڃي پر ڪنهن جي عزت جو به خيال ڪيو وڃي، ميڊيا وارن کي آزادي جي راءِ جو  حق آهي، پر توهان ماڻهن کي پنهنجي ذميواري جو احساس هجڻ گهرجي ۽ اهڙو ڪم ڪرڻ گهرجي جنهن سان پاڪستان جو اميج سٺو ٿئي، هن چيو ته پريس ڪلب کي ان پاور هجڻ گهرجي، انهن وٽ فنڊن جا مسئلا آهن جنهن جو حڪومت کي احساس آهي.

 

طالبان ليڊر پاڪستان طرفان مدد ملڻ جو اعتراف ڪيو آهي: (افغان صدر)، دهشتگردي ۾ سهڪار ڪندڙ خلاف ڪارروائي لازمي آهي: مودي

امر تسر (اين اين آءِ) ڀارتي وزيراعظم نريدر مودي ۽ افغانستان جي صدر اشرف غني هارٽ آف ايشيا ڪانفرنس دوران پاڪستان خلاف بيانبازي ڪندي دهشتگردن جي معاونت جو الزام مڙهيو ڇڏيو آهي ۽ چيو آهي ته دهشتگردن جي اڳواڻي ڪندڙ خلاف ڪارروائي جي ضرورت آهي، آچر تي هارٽ آف ايشيا ڪانفرنس جي ٻئي ڏينهن وزارتي سطح ڪانفرنس جي باقائده شروعات ڀارتي وزيراعظم ۽ افغان صدر ڪيو، ان موقعي تي ڀارتي وزيراعظم نريندر مودي شرڪت تي سمورن ملڪن جا ٿورا مڃيا، جڏهن ته پاڪستان جو نالو کڻڻ کانسواءِ دهشتگردن جي معاونت جو الزام لاڳو ڪندو رهيو، ڀارتي وزيراعظ چيو ته اسان جو گڏ ٿيڻ افغانستان ۾ پراڻي امن ۽ سياسي استحڪام جو عزم ڪرڻ آهي، هن چيو ته ان ۾ ڪو به شڪ ناهي ته للڪار تمام گهڻيون آهن پر اسان انهن سان منهن ڏيڻ جي صلاحيت رکون ٿا، هن چيو ته دهشتگردي افغانستان جي امن لاءِ خطرو آهي، خطي ۾ امن لاءِ افغانستان ۾ امن جو قيام ضروري آهي،ا سان جو ڌيان افغانستان ۽ ان جي شهرين کي محفوظ ڪرڻ تي آهي، اسان گڏجي دهشتگردي جي نيٽ ورڪ کي ٽوڙڻ ۽ اڳواڻي ڪندڙن کي روڪڻو پوندو، هن چيو ته دهشتگردي جي نيٽ ورڪ کي ختم ڪرڻ لاءِ ڀرپور عزم جي ضرورت آهي، نريندر مودي ۽ افغان صدر اشرف غني ۾ ٿيندڙ ڌار ڌار ملاقاتون هڪ ڪلاڪ تائين جاري رهيون، ان کان اڳ نريندر مودي ۽ اشرف غني گڏيل طور تي گولڊن ٽيمپل جو دورو ڪيو هو.

 

سنڌ ۾ رهندڙن کي سنڌي ثقافت ڏهاڙي تي مبارڪ، فاٽا ۾ مڪاني چونڊون ٿيڻ گهرجن، سمورن ليڪس جو احتساب ڪيو وڃي: سراج الحق

لاهور (اين اين آءِ) جماعت اسلامي جي امير سراج الحق ايف سي آر جي خاتمي لاءِ 60 ڏينهن جي ڊيڊ لائين ڏيندي اسلام آباد ڏانهن مارچ جو اعلان ڪري ڇڏيو، آچر تي المرڪز اسلامي پشاور ۾ ايف سي آر نامنظور گرينڊ قبائلي جرڳو ٿيو جنهن جو خاص مهمان سراج الحق هو، سراج الحق جرڳي کي خطاب ڪندي چيو ته 14 سئو ڪلوميٽر سرحد جي حفاظت ڪندڙ هڪ ڪروڙ قبائلي، 40 ايف سي آرز جي جيل ۾ قيد جي زندگي گذاري رهيا آهن انهن کي بنيادي انساني ۽ آئيني حقن کان محروم رکيو ويو آهي ته ٻئي طرف سڄي دنيا جي ميڊيا انهن کي دهشتگرد، منشيات فروش جا الزام مڙهي رهي آهي، هن چيو ته ان جو بنيادي سبب 40 ايف سي آرز آهن، قبائلي محب وطن ۽ امن پسند ماڻهو آهن، هن قائد اعظم کان پگهار کانسواءِ مغربي سرحد جي حفاظت جو واعدو ڪيو هو ۽ 70 سالن کان اهو واعدو نڀائي رهيا آهن، هن چيو ته قبائلي عوام لاءِ ڪا به يونيورسٽي نه آهي، مريض کي سوين ڪلوميٽر پري پشاور جي اسپتال وڃڻو پوي ٿو، انهن لاءِ ڪا عدالت نه آهي، انهن جو آواز ٻڌڻ ۽ قانونسازي لاءِ ڪو ادارو نه آهي، انهن جي صوبائي اسيمبلي ۾ ڪا به نمائندگي نه آهي، قومي اسيمبلي ۾ انهن جي نمائندن کي قانونسازي جو حق نه آهي، بجلي لوڊشيڊنگ ته ڇا بجلي آهي ئي نه، هن چيو ته قبائلي عوام پنهنجي ۽ نئين نسل لاءِ آزادي چاهي ٿو، صحت جي سهولت چاهي ٿو، ايف سي آر ۾ انهن جو ڪو به حق نه ملي رهيو آهي، سمورا قبائلي ان ڳالهه تي متفق آهن، هن چيو ته هنگامي حالتن ۽ هر مشڪل ۾ جماعتي اسلامي قبائلي ڀائرن سان گڏ آهي، قبائلي پاڪستانين وانگر هن ملڪ جا شهري آهن ۽ قومي وسيلن ۽ ناڻي تي انهن جو ايترو ئي حق آهي جيترو ڪراچي، اسلام ۽ لاهور جي ماڻهن جو آهي، انهن جو حقن لاءِ اسلام جو مارچ ڪرڻو پوندو.   جماعت اسلامي جي امير سينيٽر سراج الحق سنڌ ۾ رهندڙن کي ثقافت ڏهاڙي تي مبارڪ ڏيندي چيو آهي ته شاهه عبدالطيف ڀٽائي جي سنڌ امن، محبت ۽ ڀائيچاري جي درتي آهي جنهن هميشه وحدانيت، رنگ نسل ۽ مذهب کان مٿانهون ٿي انسانيت جي خدمت جو سبق ڏنو آهي، هن سنڌ جي ثقافتي ڏهاڙي تي جاري ڪيل پيغام ۾ چيو ته سنڌ جا ماڻهو ان ڏينهن تي نفرتن ۽ جاهلاڻي رسمن جي خاتمي ۽ محبت کي هٿي ڏيڻ ۽ اسلام دوستي، مهمانوازي ۽ هڪٻئي جي خير خواهي سميت سٺين روايتن کي اجاگر ڪن، هن چيو ته هر شخص کي پنهنجي ٻولي ۽ ثقافت سان پيار هوندو آهي جيڪا ان جي سڃاڻپ هوندي آهي، سنڌي ٻولي سميت پاڪستان جون سموريون علائقائي ٻوليون هڪ گلدستي وانگر آهن، سنڌ ۾ رهندڙ سمورن ماڻهن کي يوم يڪجهتي سنڌ ثقافت ڏهاڙي ۾ شامل ڪري اتحاد ۽ نفرت جو خاتمو ڪيو وڃي.

 

پاڪستان ڀارت سان ڪشمير سميت سمورن حل طلب مسئلن کي حل ڪرڻ تي ڳالهيون ڪرڻ لاءِ تيار آهي: طارق فاطمي

اسلام آباد (اين اين آءِ) وزيراعظم جي پرڏيهي معاملن واري معاون خاص سيد طارق فاطمي چيو آهي ته پاڪستان ڀارت سان ڪشمير سميت سمورن حل طلب مسئلن تي ڳالهيون ڪرڻ لاءِ تيار آهي، خطي ۾ ڇڪتان نٿا چاهيون، ڀارت سميت سمورن پاڙيسرين سان بهتر لاڳاپن جا خواهشمند آهيون، ڪشميري بنيادي حق جو مضبوط عزم ڪري پنهنجي پرامن تحريڪ کي جاري رکيل آهي، هڪ انٽرويو ۾ هن چيو ته ڳالهين جي عمل جي بحالي کانپوءِ پاڪستان ڀارت سان ڪشمير سميت سمورن حل طلب مسئلن تي ڳالهه ٻولهه ڪرڻ لاءِ تيار آهي، هارٽ آف ايشيا ڪانفرنس ۾ پاڪ ڀارت ٻطرفي ڳالهين جي امڪان کي رد ڪندي چيو ته اهڙي ڪا به اميد نه آهي، هن چيو ته اسان خطي ۾ ڇڪتاڻ نٿا چاهيون، ڀارت سميت سمورن پاڙيسرين سان بهتر لاڳاپا رکڻ چاهيون ٿا ته جيئن خطي ۾ ترقي ٿئي ۽ عوام خوشحال ٿئي اهو ئي سبب آهي جو اسان جي ان پاليسي کي سڄي دنيا ۾ ساراهيو وڃي ٿو.

 

پاڪستان جي افغانستان جي مسئلن جو سبب هجن جو تاثر کي ظاهر ٿيڻ گهرجي: شاهه محمود قريشي

لاهور (اين اين آءِ) پي ٽي آءِ جي وائيس چيئرمين شاهه محمود قريشي چيو آهي ته پاڪستان جي افغانستان واري مسئلن جي سبب واري تاثر کي ظاهر ٿيڻ گهرجي، سرتاج عزيز کي هارٽ آف ايشيا ڪانفرنس جي شرڪاءُ کي پاڪستان جي قدمن، پاليسين ۽ سوچ سان موثر طريقي سان آگاهه ڪرڻ جي ڪوشش ڪرڻي هئي، افغانستان جي صدر اشرف غني جي پاڪستان جي الزامن تي رد عمل ڏيندي شاهه محمود قريشي چيو ته اهو تمام ضروري آهي ته اسان افغانستان جي مسئلن سبب پاڪستان کي قرار ڏنل تاثر کي ظاهر ڪرڻ لاءِ ڀرپور طريقي سان ڳالهيون ڪنداسين، هن چيو ته اسان کي ٻڌائڻ گهرجي ته پاڪستان، افغانستان جي مسئلن جي حل لاءِ ڪهڙيون پاليسيون ۽ قدم کنيا آهن، هن چيو ته پرڏيهي صلاحڪار سرتاج عزيز کي هارٽ آف ڪانفرنس ۾ شرڪت ڪندڙن کي موثر طريقي سان ڳالهيون ڪرڻ ڪائل ڪرڻ گهرجي ها.

 

سنڌ جي ثقافتي ڏهاڙي تي سنڌ ۾ رهندڙن کي مبارڪ ڏيان ٿو، ملڪ ۾ بادشاهت جي قيام جا رستا هموار ڪيا پيا وڃن: طاهر قادري

ڪراچي (اين اين آءِ) پاڪستان عوامي تحريڪ جي اڳواڻ طاهر القادري چيو آهي ته ملڪ ۾ بادشاهت قائم ڪرڻ جا رستا هموار ڪيا پيا وڃن، دهشتگردي جو ڪلچر پنجاب کان ٿيندو ملڪ جي ٻين حصن ۾ پهتو آهي، ڦڙي ڦڙي سان ملي سمنڊ ٺهيو، عربن جي سمنڊ کي بچائڻ عرب شهزادو ايندو، سنڌ جي ثقافتي ڏهاڙي تي سنڌ ۾ رهندڙن کي مبارڪ ڏيان ٿو، اهڙن خيالن جو اظهار هن خواجه هائوس ۾ پريس ڪانفرنس ڪندي، طاهر قادري آچر جي صبح جو ڪينيڊا مان ڪراچي پهتو ته عوامي تحريڪ جي ڪارڪنن جي وڏي انگ ان جي شاندار آجيان ڪئي، طاهر قادري چيو ته ملڪ ۾ قائم ٿيندڙ آمريت جي صورت ۾ بدترين بادشاهت کي روڪڻو پوندو، ملڪ ۾ ٿيندڙ دهشتگردي ۾ پنجاب ملوث آهي، جيستائين پنجاب ۾ آپريشن نه ٿيندو ملڪ ۾ امن نه ٿيندو، ملڪ جون حالتون نازڪ آهن سمورن سياسي پارٽين کي بادشاهت جو رستو روڪڻو پوندو، هن چيو ته ڪراچي، وزيرستان، ڪوئيٽا ۾ به آپريشن ٿيا، پنجاب ۾ آپريشن نه ٿي رهيو آهي، پاڪستان ۾ امن نٿو ٿي سگهي.

 

بلديا واقعي کانپوءِ ڀولا نائين زيرو ۾ روپوش رهيو: ڀولا جي زال

ڪراچي (اين اين آءِ) بينڪاڪ مان گرفتار بلديا واقعي جي جوابدار رحمان ڀولا جي زال خاموشي ٽوڙي ڇڏي، ثمينا ٻڌايو ته بلديا واقعي کانپوءِ ڀولا ڪافي ڏينهن نائين زيرو ۾ روپوش رهيو، تفصيل موجب عبدالرحمان عرف ڀولا جي بينڪاڪ مان گرفتاري جي خبر عام ٿيندي ئي جوابدار جي زال ثمينا به خاموشي ٽوڙي ڇڏي، هن چيو ته واقعي کانپوءِ رحمان ڀولا عزيز آباد جي مشهور هنڌ نائين زيرو ۾ روپوش رهيو، هن ٻڌايو ته عبدالرحمان ڪي ايم سي جي هيلٿ ڊپارٽمينٽ ۾ ملوث هو جنهن کي بلديا ڪيس واقعي ۾ نالو اچڻ کانپوءِ پارٽي خاموشي سان هيڏانهن هوڏانهن وڃڻ جو حڪم ڏنو جنهن کانپوءِ هو ڪجهه عرصو نائين زيرو ۾ روپوش رهيو، هن ٻڌايو ته ڀولا پنهنجي خرچ تي ملائيشيا فرار ٿي ويو هو ۽ خرچ لاءِ 30 کان 35 هزار رقم موڪلي ويندي هئي.