تازيون خبرون

Daily Archives: November 30, 2016

پاڪستاني فلمن ”دوبارا پهر سي“ ۽ ”لاهور سي آگي“ جا پريميئر شو آمريڪا ۾ ٿيندا، اداڪار پهچي ويا

ڪراچي (شوبز نيوز) پاڪستاني ٽي وي ۽ فلم جا فنڪار آمريڪا پهچي ويا آهن، انهن فنڪارن ۾ ياسر حسين، صنم سعيد، عديل حسين، طوبيٰ صديقي، حريم فاروق، هدايتڪاره مهرين جبار، صبا قمر، هدايتڪار وجاهت رئوف، شازيا وجاهت ۽ ٻيا شامل آهن، ڄاڻايل اداڪار پاڪستاني فلمن لاهور سي آگي ۽ دوبارا پهر سي جي پريميئر شو ۾ شامل ٿيندا.

 

سلمان منهنجي نئين ايندڙ فلم ”دنگل“ جي مشهوري ڪري خوشي محسوس ڪندو:عامر خان

ممبئي (شوبز نيوز) بالي  ووڊ جو مسٽر پرفيڪشنسٽ عامر خان پنهنجي فلمن جي پروموشن سوشل ميڊيا سوڌو ٻين پليٽ فارم تي ڪندي نظر ايندو آهي، جڏهن ته ٻين اداڪارن ۾ جي فلمن جي پروموشن به ڪندو آهي. پر هاڻ هن جو چوڻ آهي ته هو پنهنجي نئين ايندڙ فلم ”دنگل“ سلمان خان کي ڏيکارڻ لاءِ گهڻو بي چين آهي. ڀارتي ميڊيا رپورٽن موجب بالي ووڊ اداڪار عامر خان جو چوڻ آهي ته مون کي يقين آهي ته سلمان منهنجي نئين ايندڙ فلم ”دنگل“ جي مشهوري ڪري خوشي محسوس ڪندو، جڏهن ته مون کي به اداڪار جون فلمون پروموٽ ڪرڻ وڻندو آهي. پر مان پنهنجي فلم ”دنگل“ سلمان خان کي ڏيکارڻ لاءِ گهڻو بي چين آهيان.

 

نيوزيلينڊ پاڪستان کي ٻين ۽ آخري ڪرڪيٽ ميچ ۾ 138 رنسن تان هارائي وائيٽ واش ڪري ڇڏيو

هيملٽن(اسپورٽس نيوز) نيوزيلينڊ پاڪستان کي ٻين ۽ آخري ڪرڪيٽ ٽيسٽ ميچ ۾ 138 رنسن تان شڪست ڏئي 31 سالن کانپوءِ ٽيسٽ سيريز ۾ ڪلين سوئپ ڪري ڇڏيو. ان کان اڳ 1985ع ۾ نيوزيليند پاڪستان کي ٽيسٽ سيريز ۾ شڪست ڏني هئي. پاڪستان ٽيم 369 رنسن جي هدف ۾ 230 رنسون ٺاهي آئوٽ ٿي  وئي. ڪيويز بالرز ٻين اننگز ۾ پڻ شاندار بالنگ جو مظاهرو ڪيو جنهن سبب پاڪستان جا 58 رانديگر اڳتي نه وڌي سگهيا. پاڪستان طرفان سميع اسلم 91 ۽ ڪپتان اظهر علي 58 رنسن تان نمايان رهيا. ان کان علاوه ڪوبه رانديگر مقابلو ڪري نه سگهيو. پاڪستان طرفان سميع اسلم هڪ ڀيرو ٻيهر پنهنجي سيچري مڪمل نه ڪري سگهيو. نيوزيلينڊ طرفان نيل واگنر 3، ٽم سائوٿي ۽ مٽ سائنز 2-2 جڏهن ته هنري ۽ گرينڊ هوم هڪ هڪ وڪيٽ حاصل ڪئي. اربع ڏينهن ميچ جي آخري ڏينهن پاڪستان ٽيم پنهنجي ٻين اڌوري اننگز هڪ رن ڪنهن نقصان کان سواءِ ٻيهر شروع ڪئي ته سميع اسلم ۽ اظهر علي کيڏي رهيا هئا ۽ پاڪستان جي ٽيم کي ميچ ۾ ڪاميابيءَ لاءِ 368 رنسن جي ضرورت هئي. ٻنهي رانديگرن وچ ۾ پهرين وڪيٽ جي شراڪت ۾ قيمتي 131 رنسون ٺهيون پر ان موقعي تي ڪپتان اظهر علي پنهنجي اڌ سينچري مڪمل ڪري 58 رنسون ٺاهي مچل سانٽر جي بال تي ڪلين بولڊ ٿي ويو. بابر اعظم ٻيو آئوٽ ٿيندڙ رانديگر هو. جيڪو 16 رنسون ٺاهي مچل سانٽر جي بال تي ڪلين بولڊ ٿي ويو. ان موقعي تي سميع الله پڻ ٽيم جو ساٿ ڇڏي ويو. 91 رنسون ٺاهي ٽم سائوٿي ٻئي بال تي ڪلين بولڊ ٿي ويو. هو رڳو 9 رنسن جي فرق تي ڪيريئر جي پهرين سينچري مڪمل نه ڪري سگهيو. سرفراز 19 رنسون ٺاهيون، اسد شفيق رنس کانسواءِ آئوٽ ٿي ويو. يونس خان 11، سهيل خان 8 رنسون ٺاهيون، محمد عمر ۽ وهاب رياض، عمران خان کان پوءِ هڪ ٻئي پٺيان آئوٽ ٿي ويا. محمد رضوان 13 رنسن تان آئوٽ ٿي ويو ۽ ائين نيوزيلينڊ جي ٽيم پاڪستان کي ٻين ۽ آخري ڪرڪيٽ ٽيسٽ ميچ ۾ 138 رنسن تان هارائي ڪلين سوئپ ڪري ڇڏيو.

 

هدف وڏو هجڻ ۽ تيز کيڏڻ سبب ميچ هارائي وياسين:ڪپتان اظهر علي

هيملٽن (اسپورٽس نيوز) نيوزيلينڊ خلاف ٻئي ٽيسٽ ۾ شڪست اچڻ تي ڪپتان اظهر علي چيو آهي ته هدف وڏو هو، ميچ کٽڻ پي چاهيون پر تيز کيڏڻ سبب وڪيٽيون وڃايون. هملٽن ٽيسٽ ۾ 138 رنسن جي فرق سان ايندڙ شڪست تي هن چيو ته نيوزيلينڊ جي بالرن ٻي نئين بال سان سٺي بالنگ ڪئي. ڪيوي ڪپتان ڪين وليم سن چيو ته ٽيسٽ جي آخري ڏينهن پاڪستان سٺي بيٽنگ ڪئي، ميچ جو ٽاس هارجڻ کانپوءِ ٽيم بالرن لاءِ سازگار وڪيٽ تي 270 رنسون ٺاهيون، جنهن ڪاميابي ۾ اهم ڪردار ادا ڪيو.

 

فخرِ قوم۽ بهترين ڪمانڊر قرار ڏنل جنرل راحيل شريف: جاويد ابڙو

گذريل ڏهاڙي نئين چيئرمين جوائنٽ چيفس آف اسٽاف ڪميٽي کانپوءِ نئين آرمي چيف جي ڪمان جي منتقلي جي تقريب اڄ جي ايڇ ڪيو (راولپنڊي) ۾ ٿي رهي آهي، جنهن ۾ رٽائر ٿيندڙ آرمي چيف جنرل راحيل شريف باضابطا طور تي پنهنجي عهدي جي ڪمان نئين آرمي چيف جنرل قمر جاويد باجوه حوالي ڪري ڇڏيندو، ڪنهن به ملڪ جي سپهه سالاريءَ جو عهدو انتهائي اهم ۽ طاقتور هوندو آهي، اهو ئي سبب آهي جو سڄي دنيا جون نظرون به پاڪ فوج جي نئين مقرري تي مرڪوز آهن. وزيراعظم نوازشريف پنهنجي حڪومتي دورن ۾ هيل تائين پنج آرمي چيف مقرر ڪري چڪو آهي، موجوده حڪومتي دور ۾ هن ئي جنرل راحيل شريف کي پاڪ فوج جو سربراهه بڻايو هو، جنهن جي صلاحيتن، ڪاميابين کي اڄ نه رڳو ڏيهه توڙي پرڏيهه ۾ به ساراهيو پيو وڃي. هِن وقت ملڪ جي سياسي قيادت پاران به نئين آرمي چيف جي آجيان ڪئي پئي وڃي، جنرل قمر جاويد باجوه فوج ۾ سينئر ترين جنرل ته نه هو، پوءِ به کيس چئن جرنيلن تي فوقيت ڏئي آرمي چيف بڻايو ويو آهي، تنهن هوندي به هن پنهنجي شاندار ڪيريئر، اڻٿڪ ڪم ۽ محنت سان نالو ڪمايو آهي، کيس آزاد ڪشمير ۽ اترين علائقن ۾ سيڪيورٽي فورسز جا معاملا سنڀالڻ جو وسيع تجربو آهي، بهرحال، اهو ته وزيراعظم جو ئي اختيار آهي ته هُو ڪهڙي ٿري اسٽار جنرل کي فور اسٽار بڻائي آرمي چيف مقرر ڪري ٿو. جنرل راحيل شريف کي به جڏهن موجوده وزيراعظم نوازشريف آرمي چيف جي عهدي لاءِ چونڊيو هو ته هو به سينئر موسٽ جنرل نه هو، تنهن هوندي به هُن انهيءَ اهم عهدي تي پاڻ کي مڪمل طرح اهل ثابت ڪري ڏيکاريو، ملڪ خاطر هر قومي معاملي تي جمهوري حڪومت جي حدن ۽ گهرجن جو خيال رکندي فرنٽ مين طور نڀايو ۽ هن ڪڏهن به اهڙو قدم نه کنيو، جيڪو سويلين حڪومت جي ڪمن ۾ مداخلت سمجهيو وڃي. اهو ئي سبب آهي جو اڄ کيس خراج تحسين پيش ڪيو پيو وڃي، جنهن جو هُو حقدار آهي.

جڏهن جنرل راحيل شريف ٽي سال اڳ آرمي چيف جو عهدو سنڀاليو هو ته سڄي ملڪ ۾ دهشتگردي وڏي حد تائين پکڙيل هئي، ڪوبه ڏينهن خالي نه هو، جڏهن ملڪ جي ڪنهن شهر يا علائقي ۾ بم ڌماڪو، آپگهاتي حملو يا فائرنگ ۾ بيگناهه ماڻهو ماريا نه ويا هجن، ڪراچي ۾ ته نيول بيس تي بيٺل جهازن کي دهشتگردن نشانو بڻايو هو، رينجرز ۽ پوليس جي تربيتي مرڪزن تي هر ٽئين چوٿين ڏينهن حملا ٿي رهيا هئا، ايستائين جو دهشتگردن جي ايڇ ڪيو ۾ به داخل ٿيڻ جي ڪوشش ڪئي، عوام جي ذهنن تان اڄ به 12 مئي وارو سانحو ناهي وسريو، جڏهن وڪيلن کي زنده ساڙيو ويو، بلديا فيڪٽري واري واقعي ۾ به ڀتي جي خاطر پورهيتن کي زنده جلائي سندن گهرن کي اُجاڙيو ويو، مطلب ته سڄو ملڪ دهشتگردن جي نشاني تي هو، جنهن کي محفوظ بڻائڻ ۾ جنرل راحيل شريف جو نمايان ڪردار شامل آهي. دهشتگردي جي انهن ڪارروائين کي ٻُنجو ڏيڻ ۾ جنرل راحيل شريف جيڪو اسٽينڊ ورتو، تنهن کي تاريخ جي ورقن ۾ هميشه ياد رکيو ويندو ۽ سندس ڪارڪردگي جا گُڻ ڳائبا رهبا.

جنرل راحيل شريف جي مقبوليت جو اعتراف عالمي ميڊيا به ڪيو آهي، جنرل راحيل شريف پنهنجي ٽن سالن جي دور ۾ مثالي ڪاميابين سان نه رڳو هتي جي عوام پر سڄي دنيا ۾ مقبوليت ماڻي آهي. جنگ جو ميدان هجي يا سي پيڪ منصوبو، بين الاقوامي اُفق جنرل راحيل شريف جهڙي شهرت ۽ عوامي مقبوليت شايد ئي ڪنهن ٻئي آرمي چيف کي ملي هجي. دهشتگردي جي باهه ۾ سڙندڙ ملڪ کي امن ڏيڻ تي رڳو اسان ئي نه پر ملڪي تاريخ به جنرل راحيل شريف جو ٿورو مڃيندي رهندي ۽ مٿس فخر ڪندي. انٽرنيشنل ميڊيا ۾ جنرل راحيل کي بهترين ڪمانڊر قرار ڏنو ويو آهي. جنرل راحيل جو شمار بهتري فيصلو ڪندڙن، بهترين ڪمانڊر، دشمنن جو بدترين دشمن، دوستن جو بهترين دوست ۽ حالتن تي گهري نظر رکندڙن ۾ سندس شمار ٿئي ٿو. رڳو پاڪستان ئي نه پر سڄي دنيا جنرل راحيل شريف کي مقبول ترين آرمي چيف سمجهي ٿي، آمريڪي ميڊيا به جنرل راحيل کي بهترين ڪمانڊر قرار ڏنو آهي، برطانوي آرمي چيف جنرل نڪولس سميت دنيا جا ڪيترائي اڳواڻ جنرل راحيل جي بهترين ڪارڪردگي جو اعتراف ڪن ٿا.

جنرل راحيل شريف جي قيادت ۾ پاڪ فوج نه رڳو ٻاهرين خطرن پر دهشتگردي جو به ڄمي مقابلو ڪيو، ملڪ جي اترين علائقن ۾ آپريشن ضرب عضب وسيلي دهشتگردن جا ٺڪاڻا تباهه ڪرڻ ۽ انهن جو نيٽ ورڪ نيست و نابود ڪرڻ ۾جنرل راحيل شريف کي بهترين انداز ۾ ڪاميابي ملي، جنهن جو اعتراف آمريڪا، برطانيا ۽ جرمني سميت ٻيون عالمي قوتون به ڪري رهيون آهن، ان کانسواءِ سندس ڪمان ۾ پاڪ فوج اهي ڪاميابيون حاصل ڪيون آهن، جيڪي سمورا وسيلا رکڻ جي باوجود به آمريڪا جهڙو سپر پاور ملڪ به ماڻي نه سگهيو.

هن وقت ملڪ ۾ دهشتگردي ڪنٽرول ۾ نظر اچي رهي آهي ۽ دهشتگردن جي ڪارروائين ۾ به نمايان ڪمي آئي آهي، اهو صرف ۽ صرف جنرل راحيل شريف جي قيادت ۾ شروع ٿيل آپريشن ضرب عضب ۽ ڪراچي آپريشن جو نتيجو آهي، رينجرز ته اڳ به ڪراچي ۾گذريل ڪيترن ئي سالن کان موجود هئي، پر دهشتگردن خلاف اُتي ٿيندڙ ڪارروائين جو ايترو لاڀ نه پئي مليو، جيڪو جنرل راحيل شريف جي اچڻ بعد عوام سڪون جو ساهه کڻڻ، روشنين جي شهر ۽ ڪاروبار جي بحالي جي صورت ۾ حاصل ڪيو آهي. ان کان اڳ ڪراچي ۾ ٽارگيٽ ڪلنگ، ڀتاخوري ۽ قبضاگيري سميت ڏوهاري عنصرن جون ڪارروايون بنا ڪنهن خوف جي جاري هيون، جن کي به روڪڻ ۾ جنرل راحيل شريف جو ڪردار اهم آهي. جيڪڏهن جنرل راحيل شريف جي صلاحيتن کي ملڪ جي ٻئي ڪنهن شعبي ۾ آزمايو وڃي ته هو پنهنجي تجربي جي بنياد تي ملڪ ۽ قوم لاءِ وڌيڪ خدمتون پيش ڪري سگهي ٿو، بهرحال، اهو ته جنرل راحيل شريف کي ئي فيصلو ڪرڻو آهي ته هو رٽائرمينٽ کانپوءِ پنهنجي باقي زندگي ڪيئن ٿو گهاري.

جنرل باجوه اهڙي وقت ۾ پاڪستان جي بري فوج جي ڪمان سنڀالي رهيو آهي، جڏهن ڀارت پاران ڪنٽرول لائين تي اڳرايون ۽ سرحدي خلاف ورزيون جاري آهن ۽ جيڪڏهن اهو سلسلو ائين ئي جاري رهيو ته اڳتي هلي پاڪ ڀارت ڇڪتاڻ اڃا وڌي سگهي ٿي، جنهن کي منهن ڏيڻ به جنرل باجوه لاءِ وڏو چئلينج هوندو. ان کان علاوه ملڪ جي نئين آرمي چيف کي مختلف چئلينجز کي منهن ڏيڻو آهي، پهرين ته اهو ڏسڻو پوندو ته هُو جنرل راحيل شريف جي ڇڏيل مشن کي ڪهڙي ريت انجام تائين پهچائيندو ۽ جنرل راحيل پنهنجي ڪارنامن ذريعي جيڪو مقام بڻايو، ان سطح تي پهچڻ به جنرل قمر جاويد باجوه لاءِ هڪ چئلينج هوندو. جنرل راحيل شريف گذريل ٽن سالن تائين جيڪي خدمتون انجام ڏنيون، ان سلسلي کي اڳتي وڌائڻ جي اها ذميواري اڄ جنرل قمر جاويد باجوه جي ڪُلهن تي پئي آهي، ملڪ جا سياسي حلقا توڙي دنيا جون امن پسند ڌريون به اها ئي توقع ڪري رهيون آهن ته هو به جنرل راحيل شريف جو تسلسل ثابت ٿيندو ۽ سندس انهن ڪمن کي انجام تائين پهچائڻ ۾ ڀرپور ڪردار ادا ڪندو، جيڪي رٽائرمينٽ سبب سندس قيادت ۾ پورا نه ٿي سگهيا.

 

 

يمن جنگ سعودي دهليز پار ڪري ورتي…..!!!!: غلام مصطفيٰ جمالي

يمن جنگ حوثين باغين جي بغاوت سعودي جي لاءِ خطرناڪ صورت اختيار ڪري ورتي آهي.جڏهن ته ايران سڀ ڪجهه اکين سان ڏسندي خاموش ۽ ماٺ وارو ماحول پيدا ڪري ڇڏيو آهي،جڏهن ته حوثين پاران سعودي عرب جي علائقي نجران تي ميزائن سان حملو ڪيو جنهن سان ڪيتريون بي گناهه زندگيون موت جو کاج بڻجي ويون،جڏهن ته پاڪستان جي پارليمنٽ جي منظور شده قرارداد جو هڪ جائزو وٺنداسين جنهن ۾ چيو ويو آهي جيڪڏهن سعودي تي ڪنهن ملڪ کان  جنگي خطرو آهي ته انهي ڏس ۾ پاڪستان سعودي عرب جي ڀرپور مالي توڙي عڪسري مدد ڪندو انهي ڪري هن وقت حوثين باغين پاران سعودي عرب جي علائقي نجران تي جيڪو ميزائن سان حملو ڪيو آهي انهي حملي ڪري پاڪستان کي سعودي عرب جي مدد ڪرڻ گهرجي پر افسوس آهي ته پاڪستان اندر اهڙي ڪا چرپر ڏسڻ ۾ نه پئي اچي هن وقت پوري دنيا جي مسلمان ملڪن جي مالي بحران جو جائزو وٺنداسين ته گهڻي ڀاڱي انهي مالي بحران جي ڊوڙ ۾ انهي مالي بحران جي رستن تي پيرن جا نشان ايران جا ئي نظر اچي رهيا آهن ايران هڪ طرف مغرب ملڪن سان تعلق بهتر ڪرڻ جي چڪر ۾ آهي ٻئي طرف سندس عرب ملڪن سان تفادن تمام گهڻي حد تائين خراب ٿي رهيا آهن اهڙا اثرات عرب ملڪن ۾سعودي عرب،عراق،يمن خليج بحرين،۽ لبنان ۾ واضع ڏسڻ ۾ اچي رهيا آهن انهن ملڪن سان ايران جو سياستي سرگرميون تيل ۽ هٿيارن ۽ مذهبي رويو بهتر نه هجڻ ڪري پوري خطي ۾ خطري جون گهنٽيون وڄي رهيون آهن.

ايران جو عرب دنيا سان ڪشيدگيون پراڻيون آهن جنهن جي اڪثريت وجهه ايران جي حڪمراني پاليسن جي آهي ايران پنهنجي پاليسن سان جيڪو انقلاب آڻڻ ٿو چاهي اهڙي ڪوشش ايران پاڪستان سان به ڪئي هئي جنهن تحت پاڪستان اندر هڪ جنوني فريقه واريت جنگ شروع ٿي هئي ۽ ڪيترا سال پاڪستان انهي فرفيه واريت جنگ جي دندل ۾ ڦاسي پيو  هو ۽ جنهن ڪري پاڪستان ڪيترن ئي مسلئن کي منهن ڏنو ايران پاڪستان اندر هڪ گروپن جي مدد وٺي ڪري فرقيه واريت جنگ ڪرائي پر انهي پروگينڊا مان ايران کي ڪجهه نه حاصل ٿيو.هن وقت وري سعودي ۽ ايران جي وچ ۾ اختلاف تيز ٿي ويا آهن پر اها ڳالهه به پنهنجي جڳهه ته ڪنهن وقت جڏهن  رياض ۽ تحران جي وچ ۾ صدر صدام حسين جي ڪويت تي چڙهائي سان انهن مسئلن جو عمل سامهون آيو ان موقعي تي ايراني صدر فسنجاني سان هڪ معاهدو طعي ٿيو جنهن سان ٻه طرفيون ڪشيدگيون ختم ٿيون پر اهو معاهدو صرف پنج سال هلي سگهيو عرب ملڪن جو اهو موقف آهي ته ته ايران جو جارح ايجنڊا انهن لاءِ خطرناڪ آهي ۽ اهو به چيو پيو وڃي ته ايران براه راست شام جي لڙائي ۾ اندورني طرف سان انهي لڙائي جو حصو آهي جڏهن ته عراق اندر جنگ ۾ سندس حمايت واضع ڏسڻ ۾ اچي رهي آهي  جهڙي لبنان ۾  جنگ جاري  آهي،

يمن غزه،بحرين، ۾ جارحيت جاري آهي جڏهن ته سوڊان اندر به سندس موجودگي آهي جڏهن ته  صدر عمرالبشير جو چوڻ آهي ته ايران سان لاڳيل جيڪي معاملا پڻ  بند ڪري ڇڏيا آهن اهوسڀ ڪجهه انهي ڪري ٿيو ته ايران پنهنجي ارادن کي درست ناهي ڪيو جڏهن ته ايران عرب ملڪن اندر پنهنجي اتحادن جي مسلسل مدد ڪري رهيو جنهن تي عرب ملڪن کي سخت اختلاف آهن انهي ڪري ايران جيڪوپنهنجي اتحادين جي مدد ڪرڻ کي پاڻ لاءِ خطرو سمجهي رهيا آهن يمن سياسي ۽  سماجي لحاظ کان سعودي عرب جي تمام ويجهو آهي انهي ڪري حوثين جي باغين جو سعودي عرب عرب مٿان حملو نه صرف سعودي لاءِ خطرناڪ آهي پر اتي پوري خطي لاءِ تمام گهڻا اخطرناڪ اثرات ڇڏيا آهن ايران جيڪو هن وقت پوري معاملي کان لاتعلقي جو اظهار ڪري رهيو آهي پر ايران هميشه هڪڙي اهڙي سوچ تحت پنهنجي اتحادين سان گڏجي اسلامي ملڪن کي ڪمزرو ڪرڻ جون ڪوششون ڪيترن ئي سالن کان وٺي ڪندو ٿو اچي ايران اسلامي ملڪن جي انهن اتحادين جي مدد ڪندو آهي جيڪي اسلامي ملڪن جي اندر حڪومتن کان بغاوت ڪري وٺندا آهن.

هن وقت حوثي باغي يمن جي حڪومت کان مڪمل بغاوت ڪري يمن ۾ خاناجنگي ڪري يمن ۾ ڪيترا بي گناهه انسان انهي جنگ ۾ موت جو کاڄ بنجي ويا آهن جڏهن ته سعودي عرب يمن جي صدر کي پناهه ڏني ته يمن ۾ موجود حوثين باغين مٿان حملا ڪرڻ شوع ڪيا حوثين باغين به جواب جو سعودي عرب مٿان حملا ڪرڻ شروع ڪيا انهي ڏي وٺ  ۾ ايران ٻنهي ملڪن جي وچ ۾ ڪو ٺاه ڪرائن بجاءِ يمن ۾ موجود حوثين باغين جي مدد  ڪرڻ لڳو جنهن ڪري حوثين باغين کي هڪ ملڪي حمايت ۽ عسڪري طاقت ملي جنهن عسڪري طاقت ملڻ جو نتيجو اهو نڪتو ته اڄ انهي حوثين باغين جي ميزائن جي حملي ڪري  سعودي جي عوام  کي بيگناه ماري ڇڏيو آهي جنهن ڪري پاڪستان به انهي ٻه واٽي تي اچي ٻيٺو آهي ته هو ڇا ڪري ڪنهن جي مدد ڪري ۽ ڪنهن کي ناراض ڪري جڏهن ته پاڪستان هڪ اسلامي ملڪ هجڻ سان هڪ فريقه واريت جي دندل ۾ پڻ ڦاٿل آهي ۽ پاڪستان اندر ايران جي حمايتي عوام ۽ سعودي عرب جي حمايتي عوام جي تمام گهڻي اڪثريت آهي جنهن ڪري پاڪستان ڪو قدم کڻڻ کان پهرين اهو ضرور سوچي رهيو ته اگر پاڪستان سعودي جي عسڪري مدد ڪري ٿو ته ڇا پاڪستان اندر فرقيه واريت جنگ ته نه ٿيندي ۽ جيڪڏهن پاڪستان مدد نه ٿو ڪري سعودي اتحادي به پاڪستان اندر انهي ڳالهه کي سامهون رکي ڪري مطالبا ڪري سگهن ٿا جڏهن ته پاڪستان هن وقت مختلف مسئلن جي گهري هيٺ آيل آهي جنهن ۾ صرب غضب مِشين حڪومت خلاف جوڊيشل ڪمِشن  جو قيام پارٽي جي  ليڊرن جو نااهل ٿيڻ مٿن ڌاڌلين جا ثبوت ثابت ٿيڻ سان گڏ پاڙيسسيري  ملڪ سان به تلعق بهتر  نه هجڻ سميت ڪيترائي مسئلا آهن جن کي  پاڪستان منهن ڏئي رهيو آهي انهي وچ ۾ پاڪستان کي ڪو فيصلو ڪرڻ مشڪل ضرور لڳي رهيو آهي پر پا ڪستان کي ڪو هڪ طرفعو فيصلو ضرور ڪرڻو پوندو ته پاڪستان حوثين باغين واري جنگ ۾ سعودي جو ساٿ ڏي يا نه ڏي.جڏهن ته انهي ڊوڙ ۾ ايران هميشه انهن گروپن جي مدد ڪندو آهي جيڪي گروپ حڪومت کان باغي هوندا آهن انهي ڪري حزب الله جي مدد ڪري لبنان جي حڪومت کي ڪمزور ڪيو پيو وڃي جڏهن ته لبنان حڪومت ايران جي ڪا به مخالف نه ڪري رهي آهي فلسطي ۾ حماس جي مدد ڪري رهيو آهي جڏهن انهن به ايران جي ڪا مخالف ناهي ڪئي ايران يمن اندر حوثين باغين جي مدد ڪري يمن کي ڪمزور ڪري رهيو آهي جڏهن ته يمن جا ايران سان تعلق ايترا خراب نه هئا بطور صدر علي عبدالله صالح جي ايران سان تعلق بهتر  هئا .

انهي ڪري سوچڻ جهڙي ڳالهه آهي جتي پاڻ ايران کي چئي رهيا آهيون ته هو يمن ۾ حوثين ٻاغين جي سعودي تي حملا ڪرڻ کان روڪي اتي سعودي ڇو نه پيو ايران کي چوي.؟هن وقت ڀارت ايران سان چار بهار بندر گاهه جي تعمير جو مهاهدو ڪري رهيو آهي ٻئي طرف ايران خليجي عرب رياستن سان جنگ واري ڪيفت ۾ آهي ۽ ڀارت ايران سان تجارت ڪرڻ جي بحالي جو سوچي ورتو آهي جهن ڪري هو ايران اندر بندرگاهه تعمير ڪرائڻ جو معاهدو ڪري رهيو آهي انهي ڪري سوچڻ جي ڳالهه آهي ته پاڪستان انهي ڏس ۾ ڪهڙو ڪردار ادا ٿو ڪري انهي ڪري پاڪستان عوام پڻ اسلامي ملڪن تي باغين جي حملي ڪرڻ جي ڪري سخت پريشان آهي

 

 

 

 

پاڪ فوج جي نئين سپهه سالار ڪمان سنڀالي ورتي…..!

نئين چيف آف  آرمي اسٽاف جنرل قمر جاويد باجوه پاڪ فوج جي ڪمان سنڀالي ورتي. رٽائر ٿيندڙ  آرمي چيف جنرل راحيل شريف روايتي ڇڙي نئين آرمي چيف جنرل قمر جاويد باجوه جي حوالي ڪئي. پاڪ فوج جي ڪمان جي تبديلي جي اهم تقريب جي ايڇ ڪيو سان لاڳاپيل آرمي هاڪي اسٽيڊيم ۾ ٿي، ان سان گڏ ئي پاڪ فوج ۾ اعليٰ عهدن تي تبديلين جو اهم مرحلو مڪمل ٿي ويو. تقريب ۾ اسپيڪر قومي اسيمبلي اياز صادق، دفاع وارو وزير خواجا آصف، مملڪتي وزير دفاع ۽ پيداوار رانا تنوير، پرڏيهي صلاحڪار سرتاج عزيز،  وزير سيفرون عبدالقادر بلوچ، مملڪتي وزير سڌ سماءَ ۽ نشريات مريم اورنگزيب سوڌو پارليامينٽ جي ميمبرن شرڪت ڪئي. پاڪ فوج جي تبديلي ڪمان جي تقريب ۾ چيئرمين جوائنٽ چيفس آف اسٽاف ڪميٽي جنرل زبير حيات، هوائي ۽ سامونڊي فوج جا سربراهه، پرڏيهي ملڪن جا سفارتڪار ۽ اڳوڻي آرمي چيف  جنرل اشفاق پرويز  ڪياني سوڌو رٽائرڊ فوجي آفيسر ۽ انهن جا گهرڀاتي به شريڪ هئا.تقريب جي خاص مهمان جنرل راحيل شريف کي فرنٽيئر فورس رجمنٽ جي جٿي ۽ جنرل قمر جاويد باجوه کي بلوچ رجمنٽ جي جٿي سلامي ڏني، نئين فوجي سربراهه جو واسطو بلوچ رجمنٽ سان آهي. نئين مقرر ٿيل آرمي چيف جنرل قمر جاويد باجوا چيو آهي ته لائن آف ڪنٽرول جي صورتحال جلد بهتر ٿي ويندي، مون تي وڏي ذميوار اچي وئي آهي، ميڊيا پاڪ فوج جي عظمت کي بلند رکي، پاڪ فوج جي ڪمان سنڀالڻ ميڊيا ۾ مايوسي جون ڳالهيون نه ٿيڻ گهرجن، جلد توهان سان ملندس ۽ صحافين کي گڏ کڻي هلندس. تقريب جي پڄاڻي تي آرمي چيف جنرل قمر جاويد باجوا تقريب ۾ شامل ٿيندڙن سان ملندو رهيو، هو شهيدن جي وارثن سان مليو ۽ ٻارڙن سان هٿ ملايو، تقريب ۾ شامل ٿيندڙ مهمانن آرمي چيف سان تصويرون پڻ ڪڍرايون.

پاڪ فوج جي اڳواڻ جي تبديلي واري تقريب ۾ بطور آرمي چيف آخري خطاب ۾ راحيل شريف ڀارت سان مخاطب ٿيندي چيو ته اسان جي صبر جي پاليسي کي ڪمزوري سمجهڻ سندس لاءِ خطرناڪ ثابت ٿيندو،  خطي ۾ سيڪيورٽي جي حالت ڏکي آهي، سي پيڪ جا دشمن پنهنجي ڪوششن کي رد ڪري ان جي فائدي ۾ شامل ٿين، دهشتگردي خلاف جنگ ۾ ڪاميابي جا نتيجا ملي رهيا آهن، فوج جي ساٿ ڏيڻ سان سياسي قيادت، انٽيليجنس ادارن، قوم ۽ ميڊيا جو ٿورائتو آهيان. دهشتگردي خلاف جنگ وڙهي اسان تاريخ کي موڙي ڇڏيو آهي، سي پيڪ، ضرب عضب ۽ ڪراچي آپريشن جهڙا فيصلا ڪندي قومي مفادن کي ترجيح ڏني، پڪو يقين اٿم ته پاڪ فوج قوم جي اعتماد تي هميشه پورو لهندي. پرڏيهي خطرن سان منهن ڏيڻ لاءِ اندروني خطرن، ڏوهاري عنصرن، ڪرپشن ۽ انتهاپسندي کان نجات حاصل ڪرڻي پوندي، نيشنل ايڪشن پلان تي ان جي روح مطابق عمل کي به لازمي بڻائڻو پوندو.