تازيون خبرون

Daily Archives: November 26, 2016

پڪ اٿم پاڪستان جي سرزمين تان دهشتگردي جو صفايو ٿي ويندو: جنرل راحيل شريف

اسلام آباد(اي پي پي) هٿياربند فوج جي سربراهه جنرل راحيل شريف مادرِ وطن جي حفاظت دوران حياتين جا نذرانا پيش ڪندڙ پاڪ فوج جي شهيدن کي خراجِ عقيدت پيش ڪيو آهي.آرمي چيف جنرل راحيل شريف اوڪاڙا گيريزن جو الوداعي دورو ڪيو، جڏهن ته هن ملتان ۽ بهاولپور ۾ فوجي جوانن کي خطاب ڪيو. آءِ اي سي آر موجب فوجين کي خطاب ڪندي آرمي چيف چيو ته مون کي يقين آهي ته پاڪستان جي سرزمين تان دهشتگردي جو صفايو ٿي ويندو، رٽائرمينٽ جو فيصلو قوم ۽ ملڪ جي مفاد ۾ ڪيو، منهنجو ايمان آهي ته پاڪستاني قوم دهشتگردي جي خاتمي جو پڪو پهه ڪري ڇڏيو آهي، پاڪستان جا ايندڙ ڏينهن تمام سٺا هوندا، قوم جي خدمت جي لاءِ حاضر آهيان،، آرمي چيف چيو ته سرحدن جي حفاظت جوانن جو جذبو ساراهه جوڳو آهي، اهي اڳتي به عوامي خدمتن لاءِ پنهنجي پيشيوراڻي صلاحيتن جو مظاهرو جاري رکن، جڏهن ته جنرل راحيل شريف اوڪاڙا گيريزن ۾ اسپيشل ٻارن لاءِ اسٽيٽ آف دي آرٽ اسڪول جو افتتاح ڪيو.  هو جمعي ڏينهن الوداعي دؤرن جي سلسلي ۾ 10 ڪور راولپنڊي جي دؤري دوران آفيسرن ۽ جوانن کي خطاب ڪري رهيو هو. آءِ ايس پي آر مطابق جنرل راحيل شريف 10 ڪور جي دؤري تي چڪلالا گيريزن پهتو ته ڪور ڪمانڊر راولپنڊي ليفٽيننٽ جنرل ملڪ ظفر اقبال سندس گرمجوشيءَ سان استقبال ڪيو. فوجي آفيسرن ۽ جوانن کي پنهنجي خطاب ۾ آرمي چيف جنرل راحيل شريف مادرِ وطن جي حفاظت دوران حياتين جا نذرانا پيش ڪندڙ پاڪ فوج جي آفيسرن ۽ جوانن کي خراجِ عقيدت پيش ڪيو. ٻئي طرف هٿياربند فوج جي سربراهه جنرل راحيل شريف سان آمريڪي سفير ڊيوڊ هيل ملاقات ڪئي. آءِ ايس پي آر مطابق جمعي ڏينهن جنرل راحيل شريف سان آمريڪي سفير ڊيوڊ هيل جي ايڇ ڪيو راولپنڊيءَ ۾ ملاقات ڪئي. آمريڪي سفير ڊيوڊ هيل پاڪ فوج جي سربراهه جي قيادت ۾ پاڪ فوج جي دهشتگرديءَ خلاف جنگ ۾ ڪاميابين جي واکاڻ ڪئي

 

ڪشمير مسئلو ايجنڊا ۾شامل نه هجڻ تائين ڀارت سان ڳالهيون نه ڪنداسين: پاڪستان

اسلام آباد (اين اين آءِ) وزيراعظم نوازشريف جي پرڏيهي معاملن واري وزير سرتاج عزيز چيو آهي ته ڪشمير مسئلي جو اصل حل ڪشميرين جي پنهنجي ئي تحريڪ مان نڪرندو ڪشمير جي حوالي سان اسان جي پاليسي بلڪل چٽي آهي اسان ڪشميرين جي سياسي سفارتي ۽ اخلاقي حمايت جاري رکنداسين. سمورن پاڙيسري ملڪن سان پرامن ۽ پاڙيسري برقرار رکڻ چاهيون ٿا ڀارت سان ڪشمير سميت سمورن مسئلن تي ڳالهه ٻولهه ڪنداسين. پنهنجي سرحدن جي حفاظت ڪرڻ ڄاڻون ٿا ۽ ڀارت جي ڪنهن به اڳرائي جو ڀرپور جواب ڏنو ويندو جمعي تي قومي اسيمبلي ۾ لائين آف ڪنٽرول جي حوالي سان پاليسي بيان ڏيندي سرتاج عزيز چيو ته ڀارت ڪشمير مسئلي تان ڌيان هٽائڻ لاءِ لائين آف ڪنٽرول تي اڳرائي ڪري رهيو آهي ۽ ڄاڻي واڻي شهري آبادي کي نشانو بڻائي رهيو آهي هن چيو ته پاڻ کي مهذب ملڪ چورائيندڙ هندستان ڪشمير ۾ ظلم ڪري رهيو آهي سرتاج عزيز چيو ته ڪشمير جي حوالي سان اسان جي پاليسي بلڪل چٽي آهي ۽ اسان انهن جي سفارتي ۽ اخلاقي حمايت جاري رکنداسين. هن چيو ته اسان پنهنجي سرحدن جي حفاظت ڪرڻ ڄاڻون ٿا اسان ڪنهن جي دٻاءُ ۾ نه اينداسين ڀارت پاران لائين آف ڪنٽرول تي اڳرائي سان پيدا ٿيندڙ صورتحال تي بحث ڪندي مسلم ليگ ضياءُ جي اڳوڻ محمد اعجازالحق چيو ته 8 جولاءِ کان پوءِ والاريل ڪشمير ۾ برهان واني جي شهادت کان پوءِ ڪرفيو لڳل آهي هن وقت تائين 150 کان وڌيڪ ڪشميري شهيد ٿي چڪا آهن اهڙي طرح سوين ماڻهو پنهنجي اکين جو نور وڃائي ويٺا آهن. اها دنيا جي سڀ کان وڏي رياستي دهشتگردي آهي هن چيو ته پهريون ڀيرو عالمي سطح تي اهو مسئلو اجاگر ٿيو آهي ان سبب دنيا جو ڌيان هٽائڻ لاءِ ايل او سي تي حملا ٿي رهيا آهن وزيراعظم پهريون ڀيرو جنرل اسيمبلي ۾ ڪشمير جي حوالي سان پنهنجو موقف پيش ڪيو. هن چيو ته اسان جي پاليسي امن جي آهي جڏهن ته لتن جا ڀوت ڳالهين سان نه مڃيندا آهن ڀارت کي سبق سيکارڻو پوندو ان مسئلي کي گڏيل قومن جي سيڪيورٽي ڪائونسل ۾ پيش ڪيو وڃي. پرڏيهي صلاحڪار کي هارٽ آف ايشيا ڪانفرنس ۾ وڃڻ گهرجي. هن چيو ته ڀارتي اڳرائي جو مقصد عالمي سطح تي ڌيان هٽائڻ آهي وزيراعظم پاران پرڏيهي ملڪن وفد موڪلڻ جو فيصلو سٺو قدم هو اهم گڏيل قومن ۾ انهن جي قراردادن جي حوالي سان به ياد ڏياريو هن چيو ته جيستائين ڪشمير جو مسئلو حل نه ٿيندو پاڪستان ۽ ڀارت ۾ امن قائم نه ٿي سگهندو. پاڪستان 70 سالن کان ڪشمير جي مسئلي لاءِ ڪوشش ڪري رهيو آهي ڀارت سان ان مسئلي تي 3 جنگون ٿيون آهن ان مسئلي کي اجاگر ڪرڻ لاءِ پهريون ڀيرو چونڊيل نمائندن کي پرڏيهي موڪليو اسان برطانيا ۾ وڃي پارليمينٽرين سان ملاقاتون ڪيوسين انهن اسان کي ڀليڪار ڪيو ۽ اسان جي ڳالهه ٻڌي ۽ اسان کي خاطري ڪرائي ته ڀارت سان ڪشمير جو مسئلو اٿاريندا هن تجويز ڏني ته اسان کي پرڏيهه ملڪ پاڪستاني سفارتخانن ۾ ڪشمير ڊيسڪ قائم ڪرڻ گهرجي پيپلزپارٽي جي شاهده رحماني چيو ته سنڌ اسيمبلي پاڪستان ۾ وڌندڙ مذهبي جنون کي مدنظر رکندي بل منظور ڪيو آهي هن چيو ته ڀارتي حملا انساني حقن جون خلاف ورزيون آهن اسان ان جي ڀرپور مذمت ڪيون ٿا. هن چيو ته قومي اسيمبلي ميمبر عازي غلاب جمال چيو ته 1940 ۾ فاٽا جي ماڻهن ڪشمير تي قبضو ڪيو هو پر انهن کي واپس گهرايو ويو هن چيو ته ڀارت پاڪستان جي اندروني دهشتگردي جي صورتحال مان فائدو وٺندي واويلا ڪئي ته ڪشمير ۾ غير رياستي ماڻهو ڪارروايون ڪري رهيا آهن برهان واني جي شهادت کان پوءِ صورتحال چٽي ٿي ويئي ته اهو ڪشميرين جي پنهنجي جدوجهد جي آزادي جي تحريڪ آهي هن چيو ته ايل او سي تي ڇڪتاڻ جي معاملي تي حڪومت موثر انداز ۾ اڳتي وڌائي رهي آهي ڪوبه قدم سوچ ويچار کان پوءِ کنيو ويندو مسرت احمد زيد چيو ته ڪشمير جي باري ۾ ڪوئي به پاڪستاني  لاتعلق نٿو رهي سگهي ڇو ته اها اسان جي شه رڳ آهي پارليامينٽ پاڪستان جو سپريم ادارو آهي اتان کان ان مسئلي جي لاءِ اٿندڙ آواز ئي اهميت رکي ٿو. مسلم ليگ (ن) جي ملڪ ابرار احمد چيو ته پاڪستان ڪشمير جي مسئلي تي جنهن انداز ۾ آواز اٿاريو پيو وڃي پوري دنيا کي اسان جو ساٿ ڏيڻ گهرجي ڪشمير جو معاملو گڏيل قومن سميت دنيا جي هر فورم تي اٿارڻ گهرجي. جي يو آءِ (ف) جي محمد جمال الدين چيو ته ڪشمير جي مسئلي تي اسان کي آمريڪا تي اعتماد نه ڪرڻ گهرجي پر اسان کي خود اڳتي وڌڻ گهرجي هن چيو ته جنگ مسئلن جو حل نه آهي ان مسئلي کي سفارتي طريقي مطابق حل ڪرڻ گهرجي. ڊاڪٽر طارق فضل چوڌري چيو ته دنيا جي ڪابه مهذب قوم جنگ جي حالت ۾ به ايمبولينسن ۽ معصوم شهرين کي نشانو نه بڻائيندي آهي ڀارتي ظلم تي دنيا جي خاموشي سمجهه کان ٻاهر آهي هن چيو ته اسان ڀارتي شهرين کي نشانو نه بڻجڻ ڏينداسين. سيد نويد قمر چيو ته اسان ڏسڻ چاهيون ٿا ته ڀارتي حملن جي پويان ڪهڙا مقصد آهن ڀارت پاڪستان کي اڪيلو ڪرڻ چاهي ٿو هن چيو ته بدقسمتي سان ڀارت جو دهشتگردي ۽ ڪشمير جي حوالي سان پروپيگنڊا جاري اهي آمريڪي معاشرو خود ورڇ جو شڪار آهي اسان کي آمريڪي سول سوسائٽي ۽ ٿنڪ ٽينڪس کي آماده ڪرڻو پوندو پاليسي سازي ۾ پارليامينٽ کي فوقيت ڏني وڃي پارليامينٽ جي قومي سلامتي ڪميٽي قائم ڪئي وڃي.

 

پ پ سنڌ هاءِ ڪورٽ جو فيصلو سپريم ڪورٽ ۾ چئلنج ڪندي، ڪميٽي قائم

ڪراچي (اين اين آءِ) اڳوڻي صدر آف علي زرداري ۽ سنڌ جي وڏي وزير ۾ دبئي ۾ ٿيندڙ ملاقات ۾ سنڌ هاءِ ڪورٽ جي فيصلي کي سپريم ڪورٽ ۾ چئلينج ڪرڻ جو اصولي فيصلو ڪيو ويو آهي دبئي ۾ سنڌ جي وڏي وزير سيد مرادعلي شاهه ۽ اڳوڻي صدر آصف علي زرداري ۾ ملاقات ٿي ملاقات ۾ مرتضيٰ وهاب به گڏ هو ملاقات ۾ سنڌ ۾ صلاحڪارن کي قلمدان ڏيڻ جي حوالي سان مشورو ڪيو ويو جڏهن ته سنڌ هاءِ ڪورٽ جي فيصلي کي سپريم ڪورٽ ۾ چئلينج ڪرڻ جو اصولي فيصلو به ڪيو ويو ذريعن چيو ته آصف علي زرداري فاروق ايڇ نائڪ اعتزازاحسن ۽ لطيف کوسي تي ٻڌل قانوني ڪميٽي جوڙي ويئي آهي قانوني ڪميٽي سنڌ هاءِ ڪورٽ جي فيصلي کي سپريم ڪورٽ ۾ چئلينج ڪندي.

 

سنڌ اسيمبلي عورتن تي تشدد خلاف ٺهراءُ منظور ڪري ورتو

ڪراچي(اسٽاف رپورٽر) سنڌ اسيمبلي عورتن تي تشدد خلاف ٺهراءُ اتفاق راءِ سان منظور ڪري ورتو، عورتن تي تشدد خلاف عالمي ڏينهن تي عورت ميمبرز ٺهراءُ منظور ٿيڻ تي سنڌ سرڪار جي واکاڻ ڪندي چيو آهي ته ٺهراءُ  جي منظوري سان عورتن کي تحفظ جو هٿيار فراهم ڪيو ويو آهي، هاڻي قانون تي عمل به ٿيڻ گهرجي. سنڌ اسيمبلي جو اجلاس اسپيڪر آعا سراج دراني جي صدارت هيٺ ٿيو، اجلاس ۾ شروعات ۾ پ پ اڳواڻ ڊاڪٽر عاصم حسين، گورنر سنڌ سعيد الزمان صديقي جي صحتيابي ۽ ناليواري اديب جميل الدين عالي جي پهرين ورسي جي حوالي سان سندس مغفرت لاءِ دعا گهري وئي. اجلاس دوران پ پ ميمبر غزاله سيال ۽ ايم ڪيو ايم ميمبر ناهيد بيگم  عورتن تي تشدد خلاف گڏيل ٺهراءُ پيش ڪيو، جنهن جي اتفاق راءِ سان منظوري ڏني وئي. پ پ جي غزاله سيال چيو ته عورتن کي هڪ جهڙا حق حاصل آهن  ۽ ايم ڪيو ايم ميمبر ناهيد بيگم چيو ته  عورت تي گهريلو تشدد  کي ڪنهن به صورت ۾ تسليم نه ويندو، ٺهراءُ منظور ٿيڻ سان عورتن کي تحفظ ملندو.  فنڪشنل ليگ جي مهتاب اڪبر راشدي چيو ته سنڌ اسيمبلي عورتن جي حقن بابت قانونسازي ڪري هڪ بهتر روايت قائم ڪئي آهي،عورتن جي حقن  جي حوالي سان ٻين صوبن ۾ قانون سازي ناهي ٿيل، هاڻي ان قانون تي عمل به ٿيڻ گهرجي. صوبائي وزير نثار کهڙي چيو ته  سنڌ اسيمبلي عورتن ۽ اقليتن جي حقن بابت قانونسازي ڪئي آهي. اجلاس دوران صوبائي وزير نثار کهڙي خوراڪ کاتي بابت ميمبرز جي سوالن جا جواب پڻ ڏنا. اجلاس ۾ دوران ايم ڪيو ايم ميمبر ظفر ڪمالي پنهنجي سيٽ تي اٿي بيهي چيو ته  اسيمبلي ۾مڇر اچي ويا آهن، جنهن تي اسپيڪر چيو ته مڇر توهان سان گڏ ايوان ۾ آيا هوندا. اسپيڪر چيو ته ڪجهه مڇر ته ايوان ۾ اچي ويهي رهن ٿا، اسپري ان لاءِ نه ٿا ڪرايون جو سڀئي بيهوش ٿي ويندا. اجلاس ۾ ڳالهائڻ جي اجازت نه ملڻ تي اپوزيشن ليڊر خواجه اظهار ۽ نثار کهڙي وچ ۾ سخت لفظن جي ڏي وٺ به ٿي. خواجه اظهار چيو ته کيس اعتراض واري نقطي تي ڳالهائڻ جي اجازت هجڻ گهرجي.

 

وزيراعظم جي ترڪمانستان جي صدر سان ملاقات، مختلف معاملن تي ڳالهيون

اشڪ آباد (م.ڊ) وزيراعظم نواز شريف ٻن ڏينهن جي دوري تي وفد ساڻ ڪري ترڪمانستان پهچي ويو آهي، جتي وزيراعظم نواز شريف ترڪمانستان جي صدر سان ملاقات ڪئي، ان موقعي تي وزيراعظم جو چوڻ هو ته ترڪمانستان ۽ پاڪستان جا لاڳاپا مضبوط ۽ وڌيڪ بهتر ٿي رهيا آهن، روس کي سي پيڪ ۾ شامل ٿيڻ واري خواهش تي ڀليڪار ڪيون ٿا، تاپي منصوبو پاڪستان ۾ گيس جي ضرورت پوري ڪندو، ٻنهي ملڪن وچ ۾ هر سال اعليٰ سطح تي رابطو ٿيڻ گھرجي، چئني ملڪڻ ٽرانسپورٽيشن، رابطن سان ساڍا 3 ارب آباديءَ کي فائدو ٿيندو، ڪافي ملڪ سي پيڪ منصوبي ۾ شرڪت جا خواهشمند آهن، وزيراعظم جو چوڻ هو ته پاڪستان ۽ ترڪمانستان جي دوستي وقت سان گڏ مضبوط ٿي رهي آهي، تاپي پيس منصوبي تي اڳڀرائي ٿي رهي اهي، تاپي منصوبو خطي ۾ بهتريءَ جو منصوبو آهي، پاڪستان ۽ ترڪمانستان وچ ۾ ايئر روٽن ۾ واڌ ڪئي ويندي، سي پيڪ وچ ايشيائي ملڪن سان سلهاڙڻ لاءِ ترڪمانستان راضپو ڏيکاريو، اقتصادي راهداري منصوبي سان سڄي ملڪ ۾ ترقي ٿيندي.36

 

سنڌ حڪومت پوليو جي خاتمي لاءِ هنگامي قدم کڻي رهي آهي: مراد علي شاهه

ڪراچي(اسٽاف رپورٽر) سنڌ جي وڏي وزير سيد مراد علي شاهه سان گلگت بُلتستان جي وڏي وزير حافظ حفيظ الرحمان وزيراعليٰ هائوس ۾ ملاقات ڪئي. ملاقات ۾ گلگت بُلتستان جي وڏي وزير ڪراچي ۾ امن امان جي بهتر صورتحال تي سنڌ جي وڏي وزير کي واڌايون ڏنيون. گلگت بُلتستان جي وڏي وزير سنڌ جي وڏي وزير ۽ سندس ڪابينا کي گلگت بُلتستان جي دوري جي دعوت ڏيندي چيو ته اوهان اتي ڪابينا جو اجلاس به ڪوٺايو، هن چيو ته اوهان جي ۽ سنڌ ڪابينا جي دوري سان گلگت بُلتستان جي سياحت جي شعبي ۾ واڌ ٿيندي ۽ گلگت بُلتستان جي خوبصورت تفريحي هنڌن ڏانهن سياح به راغب ٿيندا ۽ سياحت کي هٿي ملندي. سنڌ جي وڏي وزير سيد مراد علي شاهه سندس دوري جي دعوت قبول ڪندي چيو ته هُو جلد ڪابينا جي ميمبرن سان گلگت بُلتستان جو دورو ڪندو. گلگت بُلتستان جي وڏي وزير سنڌ جي وڏي وزير کي اها آڇ به ڪئي ته هُو گلگت بُلتستان ۾ سنڌ هائوس لاءِ زمين فراهم ڪرڻ لاءِ به تيار آهي ۽ اوهان به ٻين صوبن جيان اتي سنڌ هائوس تعمير ڪرايو. سنڌ جي وڏي وزير سندس ان آڇ کي به قبول ڪندي چيو ته جلد ان حوالي سان لاڳاپيل مامرن جو جائزو وٺي ان رٿا کي به حتمي شڪل ڏني ويندي. گلگت بُلتستان جي وڏي وزير سنڌ جي وڏي وزير کي ميڊيڪل ڪاليج ۾ گلگت بُلتستان جون سيٽون وڌائڻ جي گذارش به ڪئي هن وقت سي ايم سي ۾ گلگت بُلتستان جون ٻه سيٽون آهن. سنڌ جي وڏي وزير چيو ته ان حوالي سان هُو صورتحال جو جائزو وٺندو. ٻئي پاسي سنڌ جي وڏي وزير سيد مراد علي شاهه هوائي فوج جي شهيد آفيسر مريم مختيار کي خراج عقيدت پيش ڪندي ڪراچيءَ ۾ ڪاليج جو نالو سندس ناليءَ تي رکي ڇڏيو. هن گورنمينٽ ڊگري لياقت آباد جو نالو تبديل ڪري شهيد فلائنگ آفيسر مريم مختيار گورنمينٽ گرلز ڊگري ڪاليج لياقت آباد رکڻ واري سمريءَ جي منظوري ڏئي ڇڏي آهي. سنڌ جي وڏي وزير سيد مراد علي شاهه اخبار ۾ شايع ٿيل ان خبر تي جنهن ۾ سنڌ جي ٻن ضلعن دادو جي پيارو اسٽيشن ۽ بدين جي گولاڙچي مان هڪ ڏينهن ۾ پوليو جا 8 ڪيس سامهون اچڻ جو سختيءَ سان نوٽيس وٺندي صوبائي صحت واري سيڪريٽري کان ان حوالي سان فوري رپورٽ گهري ورتي آهي. وڏي وزير چيو آهي ته سنڌ حڪومت صوبي مان پوليو جي خاتمي لاءِ سختيءَ سان ڪوششون وٺي رهي آهي ۽ پوليو جي خاتمي لاءِ ٻارن کي پوليو جا ڦُرا باقاعدگيءَ سان پياريا پيا وڃن، پر انهن سمورين احتياطي قدمن باوجود پوليو ڪيسن جو سامهون اچڻ ڳڻتيءَ جوڳو آهي. هن سمورن لاڳاپيل ادارن کي سختيءَ سان هدايت ڪئي ته پوليو جي خاتمي لاءِ جنگي بنيادن تي قدم کنيا وڃن ۽ سنڌ کي پوليو کان پاڪ ڪرڻ لاءِ دستياب وسيلن سان ڀرپور ريت فائدو حاصل ڪيو وڃي.

 

سنڌ اسيمبليءَ زوري مذهب بدلائڻ خلاف تاريخي بل پاس ڪيو، ٻيون اسيمبليون به ان جي پوئواري ڪن: بلاول ڀٽو زرداري

ڪراچي (اين اين آءِ) پ پ پ جي چيئرمين بلاول ڀٽو زرداري زور ڀريندي چيو اهي ته سنڌ صوبو پاڪستانين جي بانين جي مشن جي تڪميل لاءِ هڪ رستو ڏنو آهي جنهن ملڪ جي غير مسلم شهرين جي جبري مذهب جي تبديلي جي خلاف هڪ تاريخ ساز قانون پاس ڪيو آهي وڌيڪ ٻين صوبن کي به سنڌ اسيمبلي جي پيروي ڪرڻ گهرجي ياد رهي ته خميس جي ڏينهن سنڌ اسيمبلي جبري مذهب جي تبديلي ۽ پوءِ زبردستي شادي کي روڪڻ لاءِ سنڌ ڪرمنل لا پروٽيڪشن آف مينارٽيز بل 2015 کي اتفاق راءِ سان منظور ڪيو آهي ان قانون تحت جبري مذهب تبديل ڪرڻ واري عمل کي گهٽ ۾ گهٽ 5 سال ۽ وڌ کان وڌ عمرقيد جي سزا ملندي ۽ جرمانو به ادا ڪرڻو پوندو بلاول ڀٽو زرداري چيو ته اسلام دنيا جي تياريخ ۾ تيزي سان ڦهلجڻ وارو مذهب آهي جبري مذهب جي تبديلي جهڙا واقعا ۽ رپورٽون اسلام جي پرامن ۽ قائناتي درس کي ضرب پهچائڻ جو بهانو فراهم ڪري ٿي هن وڌيڪ چيو ته هڪ مضبوط ۽ جمهوري پاڪستان ۾ معاشري جي ڪنهن به  طبقي لاءِ مستقل خوف ۾ گذارڻ جي ڪابه گنجائش نه آهي پاڪستان پيپلزپارٽي جي اڪثريت واري سنڌ اسيمبلي پاران منظور ڪيل قانون پاڪستان جي غير مسلم شهرين جي مسئلن ۾ ڪجهه کي حل ڪندو جيڪي اسان وٽ ميڊيا ۽ عوام جي مدد سان پهچي رهيا آهن. هن سنڌ حڪومت اسيمبلي جي ميمبرن ۽ سمورن طبقن کي ساراهيو آهي جيڪي ان قانونسازي جي عمل ۾ بل تيار ڪري ان کي ايوان ۾ آڻڻ جي سڄي عوام ۾ شامل ڪيو آهي.

 

پاناما پيپرز انڪوائري بل ۾ دير جي سموري ذميواري حڪومت تي آهي: اعتزاز احسن

اسلام آباد (بيورو) پ پ اڳواڻ  بيريسٽر اعتزاز احسن چيو آهي ته انڪوائري بل تي حڪومت جي ڪري دير ٿي، ڪميٽيءَ جو نوٽيس ڪيترن ئي ميمبرن کي ناهي موڪليو ويو، بل موو ڪندڙ 22 ميمبر اجلاس ۾ نه پهچي سگھيا، ڪميٽي اجلاس کان پوءِ پاناما پيپرز انڪوائري بل 2016 بابت اعتزاز احسن جي ميڊيا سان ڳالهائيندي سينٽر اعتزاز احسن جو چوڻ هو ته بابر اعواڻ مخالف ڌر سان گڏ آهي، پاناما پيپرز انڪوائري بل مستقل تڏهن ئي ٺهي سگھي ٿو جڏهن حڪومت ان کي پنهنجو ڪري، پاناما پيپرز انڪوائري بل ۾ دير جي سموري ذميواري حڪومت تي آهي.36

 

ڀارت ٻڌي وٺي، اسان ستل ناهيون، اڳرائي جو منهن ٽوڙ جواب ڏينداسين:سراج الحق

لاهور: امير جماعت اسلامي سينيٽر سراج الحق جو چوڻ آهي ته ڀارت  ٻڌي وٺي، اسان ستل ناهيون، ڪنهن به اڳرائي جو منهن ٽوڙ جواب ڏينداسين، پاڪستان جو هر ٻار شينهن ۽ نوجوان باز آهن. ايڪسپو سينٽر لاهور ۾ هڪ تقريب کي خطاب ڪندي سراج الحق جو چوڻ هو ته پاڪ فوج کي پيغام ڏيڻ چاهيون ٿا ته 20 ڪروڙ عوام جو اوهان سان ڪلهو ڪلهي ۾ ملايل آهي. هن جو چوڻ هو ته ملڪ جي ترقي ۽ سياست ۾ اسلامي جمعيت طلبه هميشه اهم ڪردار ادا ڪيو، ملڪ مان ڪرپشن ختم ڪري ساهه پٽينداسين، حڪمران ٻڌائين ته ملڪ سنواريو قرض لاهيو جي رقم ڪيڏانهن وئي.

 

ميڊيڪل بورڊ جو اجلاس: تشدد سبب مفلوج بڻيل نينگر جو علاج پرڏيهه مان ڪرائڻ جي تجويز

ڪراچي (اين اين آءِ) ميڊيڪل بورڊ لاڙڪاڻو ڪيڊٽ ڪاليج ۾ تشدد جو شڪار ٿيندڙ شاگرد احمد کي علاج لاءِ پرڏيهي ملڪ موڪلڻ جي سفارش ڪئي آهي تفصيل موجب ڪيڊٽ ڪاليج لاڙڪاڻي ۾ تشدد جو شڪار ٿيندڙ شاگرد جو ميڊيڪل بورڊ طبي معائنو ڪيو جنهن کان پوءِ بورڊ شاگرد کي علاج لاءِ پرڏيهي موڪلڻ جي سفارش ڪئي جڏهن ته رپورٽ سنڌ جي وڏي وزير ڏانهن موڪلي ويندي ذريعن موجب ميڊيڪل بورڊ چيو آهي ته محمد احمد جي ڳچي تي ڌڪ لڳل آهن جڏهن ته ان جي دماغ کي آڪسيجن نه ملي رهي آهي ان فيزيوٿراپي نجي اسپتال ۾ جاري آهي ۽ ان کي جاري رکيو وڃي ٻئي طرف احمد جي والد جو چوڻ هو ته هو پٽ جي علاج مان مطئن آهي جڏهن ته احمد سان بورڊ پاڻ ڄاڻ حاصل ڪئي.