تازيون خبرون

Daily Archives: November 25, 2016

جنرل راحيل شريف قابليت جي بنياد تي سپهه سالار بڻيو، ضرب عضب جي تعريف پوري دنيا پئي ڪري: نواز شريف

اسلام آباد (م.ڊ) وزيراعظم هائوس ۾ آرمي چيف جنرل راحيل شريف جي مان آجياڻو ڏنو ويو ، آرمي چيف جنرل راحيل شريف وزيراعظم هائوس پهتو ته وزيراعظم نواز شريف سندس جي آجيان ڪئي، ان کان پوءِ وزيراعظم نواز شريف ۽ جنرل راحيل شريف وچ ۾ ون آن ون ملاقات ٿي، وزيراعظم نواز شريف آرمي چيف جنرل راحيل شريف سان ون آن ون ۽ الوداعي ملاقات ۾ سندس خدمتن تي کيس ڀيٽا پيش ڪئي، وزيراعظم هائوس ۾ ٿيندڙ اهم گڏجاڻي ۾ ايندڙ آرمي چيف جي چونڊ بابت به صلاح مشورا ڪيا ويا، وزيراعظم هائوس ۾ آرمي چيف جي مان ۾ ڏنل آجياڻي واري تقريب ۾ ليفٽينينٽ جنرل اشفاق نديم، ليفٽينينٽ جنرل زبير حيات، ڊي جي آءِ ايس آءِ رضوان اختر، ليفٽينينٽ جنرل جاويد اقبال رمدي، ليفٽينينٽ جنرل قمر جاويد باجوا، پاڪ فضائيه جو سربراهه ايئر چيف مارشل سهيل امان ۽ ٻيا اڳواڻ به شريڪ ٿيا، آرمي چيف جنرل راحيل شريف ۽ وزيراعظم نواز شريف ۾ ون آن ون ملاقات ختم ٿيڻ کان پوءِ سمورن مهمانن سان ملاقاتن جو سلسلو شروع ڪيو ويو. وزيراعظم نواز شريف چيو آهي ته ملڪ لاءِ قربانيون ڏيندڙ پاڪ فوج جي قربانين تي ڀيٽا پيش ڪيون ٿا، جنرل راحيل شريف جو خاندان ملڪي دفاعي خدمت جي لاءِ سڃاتو ويندو آهي، جنرل راحيل شريف پاڪ فوج ۾ خدمتن دوران پيشيوراسڻي مهارت جو مظاهرو ڪيو، وزيراعظم نواز شريف آرمي چيف جنرل راحيل شريف جي مان ۾ ڏنل الوداعي تقريب کي خطاب ڪندي چيو ته جنرل راحيل شريف آرمي چيف طور ملڪ لاءِ شاندار خدمتون انجام ڏنيون، تقريب جو مقصد جنرل راحيل شريف جي شاندار خدمتن تي کيس ڀيٽا پيش ڪرن آهي. هٿياربندن فوج جي آپريشن ضرب عضب جي سموري دنيا تعريف ڪري رهي آهي، جنرل راحيل شريف کي قابليت جي بنياد تي آرمي چيف بڻايو ويو، جنرل راحيل شريف محنت ۽ لڳاءَ سان پاڻ کي بهترين سپهه سالار ثابت ڪيو، جنرل راحيل شريف جي اڻٿڪ ڪوششن ۽ ارادي کي ڀيٽا پيش ڪريون ٿا.36

 

جيڪڏهن اسان سرجيڪل اسٽرائيڪ ڪئي ته ڀارتي پنهنجي ٻارن کي پاڪ فوج جا قصا ٻڌائيندا رهندا: آرمي چيف

راولپنڊي (اين اين آءِ) آرمي چيف جنرل راحيل شريف چيو آهي ته ڀارت  ايل او سي تي سرجيڪل اسٽرائيڪ جو ڊرامو ڪيو، جيڪڏن اسان سرجيڪ اسٽرائيڪ ڪئي ته ڀارت جو ايندڙ نسل ياد رکندو. پاڪ فوج دنيا جي عظيم فوج آهي مان وڃان پيو ۽ 29 نومبر تي پنهنجا اختيار واپس ڏئي ڇڏيندس. نوان ماڻهو ايندا ۽ اهو سلسلو ائين ئي برقرار رهندو. منهنجو جيئڻ مرڻ ملڪ لاءِ آهي. ريٽائرمينٽ کان پوءِ پنهنجي زندگي شهيدن جي وارثن لاءِ وقف ڪريان ٿو. آرمي چيف جنرل راحيل شريف چيو ته پاڪ فوج جا جوان ڀارتي فوج کي سبق سيکاري سگهن ٿا. ڀارت ايل او سي تي سرجيڪل اسٽرائيڪ جو ڪوڙو ڊرامو ڪيو. کين سرجيڪل اسٽرائيڪ جي خبر ئي ناهي. جيڪڏهن اسان سرجيڪل اسٽرائيڪ شروع ڪئي ته ڀارت جو ايندڙ نسل ياد رکندو ۽  جيڪڏهن ڀارت پاران سرجيڪل اسٽرائيڪ ڪئي وئي ته ڀارتي ڪتابن ۾ پاڪ فوج جو قصا پڙهايا ويندا. چيف آف آرمي اسٽاف جنرل راحيل شريف چيو آهي ته قوم جي حمايت سان دهشتگردي خاتمي جي آپريشن جو سلسلو مڪمل ٿي چڪو آهي اسٽيبلائيزيشن آپريشن ۽ عارضي بي گهر ماڻهن جي ٻيهر آبادي جي مرحلي سان اسان کي پنهنجي ڪاميابين کي مضبوط ڪرڻ ۾ مدد ملي رهي آهي قبائلي عوام ۽ اسان دهشتگردي جو ڪيترن ئي سالن کان گڏجي مقابلو ڪيو آءِ ايس پي آر مطابق چيف آف آرمي اسٽاف جنرل راحيل شريف خميس تي فاٽا ۽ پشاور جو دورو ڪيو جيڪو ان جي الوداعي دورن جو حصو آهي وانا ۾ آرمي چيف پاڪ فوج ۽ فرنٽيئر ڪور جي آفيسرن ۽ جوانن کي خطاب ڪيو. آرمي چيف دهشتگردن کي فاٽا جي پناهه گاهن مان ڪاميابي سان ڪڍڻ ۽ ان جو انفراسٽريڪچر ختم ڪرن تي آرمي ۽ فرنٽيئر ڪور جي تعريف ڪئي جنرل راحيل شريف چيو ته الله حمدالله قوم جي حمايت سان اسان دهشتگردي جي خاتمي جي آپريشن جو سلسلو گڏيل ۽ منفرد انداز ۾ مڪمل ڪيو آهي هن چيو ته پنهنجي علائقن کي دهشتگردن کان پاڪ ڪرڻ لاءِ آرمي جي مڪمل حمايت تي قبائلي اڳاوڻن جو ٿورائتو آهيان هن چيو ته مشهور ڪرڪيٽر شاهد آفريدي جي نالي تي باڙه ۾ ڪرڪيٽ اسٽيڊيم جو سنگ بنياد به رکيو اهو اسٽيڊيم پاڪ فوج جي انجنيئر تعمير ڪندا اسٽيڊيم جي تعمير جو مقصد شاهد آفريدي جي خدمتن جو اعتراف فاٽا ۾ اسپورٽس انفرااسٽريڪچر کي هٿي ڏيڻ ۽ نئين ٽيلنٽ کي موقعو فراهم ڪرڻ آهي.

 

نيون عدالتون ٺهڻ سان عوام کي تڪڙو انصاف ملڻ ۾ مدد ملندي: انور ظهير جمالي

ڪراچي (اين اين آءِ) چيف جسٽس آف پاڪستان انور ظهير جمالي چيو آهي ته ڊگهي عرصي کان اهو مطالبو ڪيو ويو هو ته سنڌ جي عدالتن جو انفراسٽريڪچر بهتر ڪيو وڃي اڄ خوشي جهڙو ڏينهن آهي ته سنڌ حڪومت جي تمام پراڻي واعدي جي تڪميل ٿي رهي آهي سينٽرل جيل ۾ 20 اي ٽي سي عدالتون ٺاهيون وينديون جنهن جو اڄ پهريون فيز آهي جنهن تحت 6 عدالتن جي اڏاوت ڪئي ويئي آهي انهن عدالتن جي قيام جو مقصد ماڻهن کي جلد کان جلد انهن کي انصاف فراهم ڪرڻ آهي هو اميد ڪري ٿو ته سنڌ هاءِ ڪورٽ جو چيف جسٽس ۽ سنڌ حڪومت وڌيڪ عدالتن جي قيام جون ڪوششون ڪندا اهڙن خيالن جو اظهار هن خميس تي جيل ۾ جڊيشل ڪمپليڪس جي نئين عمارت جو افتتاح ڪندي تقريب کي خطاب ڪندي ڪيو ان موقعي تي جسٽس امير حاني مسلم چيف جسٽس سنڌ هاءِ ڪورٽ سيد سجاد علي شاهه هاءِ ڪورٽ کي ججن اي ٽي سي جي ججن چيف سيڪريٽريز پراسيڪيوٽرز سميت ٻين اعليٰ اختيارين به شرڪت ڪئي چيف جسٽس چيو ته اميد ڪيان ٿو ته اي ٽي سي جون عدالتون بهترين ڪارڪردگي جو مظاهرو ڪري ڪيسن کي جلد کان جلد اڪلائينديون عدالت آئين پاڪستان جي تحت ٽيون ٿنڀ آهي جنهن جي ذميواري لڳائي ويئي آهي پر ان ۾ انتهائي اهم اهو آهي ته بغير انفرااسٽريڪچر جي ڪوبه ادارو پنهنجي بهتر ڪارڪردگي جو مظاهرو نٿو ڪري سگهي

 

برطانيا جو ڪشميرين تي ظلم بند ڪرڻ جو مطالبو، ايل او سي جي ڇڪتاڻ تي ڳڻتي ظاهر

اسلام آباد (اين اين آءِ) برطانيا جي لائين آف ڪنٽرول جي صورتحال تي ڳڻتي جو اظهار ڪندي چيو آهي ته پاڪستان ۽ ڀارت ڳالهين جي ذريعي مسئلن کي حل ڪن پاڪستان سان تجارتي ۽ اقتصادي لاڳاپن تي هٿي چاهيون ٿا گڏيل تجارتي حجم اڍائي ارب پائونڊ کان وڌائينداسين پاڪستان سان صرف اسٽريٽجڪ ڳالهين جي بجاءِ ٻين شعبن ۾ به تعاون ڪرڻ چاهيون ٿا پاڪستان جي دوري تي آيل برطانوي پرڏيهي وزير بورس جانسن پاڪستاني پرڏيهي صلاحڪار سرتاج عزيز سان گڏ پريس ڪانفرنس کي خطاب ڪندي چيو ته پاڪستان سان لاڳاپا انتهائي اهميت وارا آهن پاڪستاني معيشت تيزي سان ترقي ڪري رهي آهي پاڪستان خطي جو اهم ملڪ آهي ۽ اسان ان سان تجارت ۽ اقتصادي لاڳاپن کي وڌائڻ چاهيون ٿا تجارتي سطح تي پاڪستان ۾ سيڙپڪاري جي حمايت ڪيون ٿا هن چيو ته پاڪستان جي آزادي جي 70هين سالگرهه تي لاڳاپا بهتر ۽ وڌيڪ مضبوط ڪنداسين هن چيو ته خطي ۾ سيڪيورٽي جو معاملو تمام اهم آهي جنهن تي پاڪستان سان گڏ آهيون دهشتگردي جي خلاف جنگ ۾ پاڪستانين جون قربانيون ساراهه جوڳيون آهن هن چيو ته سرتاج عزيز سان گڏ سيڪيورٽي تجارتي ۽ مختلف شعبن ۾ تعاون تي ڳالهه ٻولهه ٿي آهي بورس جانسن چيو آهي ته ملاقات ۾ گڏيل علائقائي صورتحال تي به ڳالهه ٻولهه ٿي آهي پاڪستان ۽ ڀارت ٻنهي کي صبر جو مظاهرو ڪرڻ گهرجي هن چيو ته اسان ٻنهي ملڪن سان سٺين ڳالهين جي توقع رکون ٿا  ان کان اڳ برطانوي پرڏيهي وزير بورس جانسن ٻن ڏينهن جي دوري تي خميس تي پاڪستان پهتو ۽ پرڏيهي صلاحڪار سرتاج عزيز سان ملاقات ڪئي ملاقات دوران پرڏيهي صلاحڪار لائين آف ڪنٽرول تي ڀارتي اڳرائي تي بريفنگ ڏني ۽ لاڳاپيل ڪشمير ۾ ڀارتي ظلم جو مسئلو اٿاريندي مطالبو ڪيو ته برطانيا ڪشمير مسئلي کي حل ڪرڻ ۾ پنهنجو ڪردار ادا ڪري.

 

پاڪستان جي هارٽ آف ايشيا ڪانفرنس ۾ شرڪت ڪمزوري ڏيکارڻ برابر هوندي: خورشيد شاهه

اسلام آباد (اين اين آءِ)قومي اسيمبلي ۾ مخالف ڌر جي اڳواڻ سيد خورشيد شاهه چيو ته ڀارتي فورسز جي فائرنگ سان 40 اهلڪارن سميت ڪيترائي شهري شهيد ٿي چڪا آهن. حڪومت ڀارتي اڳرائي کان سڄي دنيا کي آگاهه ڪري. پاڪستان نيو ڪليئر پاور آهي هڪ ملڪ تباهي ڏانهن وٺي وڃڻ چاهي ٿو، هارٽ ايشيا ڪانفرنس ۾ وڃڻ پاڪستان جي ڪمزوري هوندي. تحريڪ انصاف 24 هين ترميم جي مخالف ايوان ۾ اچي ڪري، خميس تي قومي اسيمبلي ۾ خورشيد شاهه چيو ته سمورن ملڪن جون نظرون حڪومت، رياست هلائيندڙ پارٽي ۽ وزيراعظم تي کتل آهن ڀارت پاران 230 دفعا ورڪنگ بائونڊري جي خلاف ورزي ڪئي وئي ۽ هن وقت تائين 40 فوجين سميت ڪيترائي شهري شهيد ۽ 150 زخمي ٿي چڪا آهن پر حڪومت پاران ڀارتي اڳرائي تي خاموشي اختيار ڪئي وئي آحي هٿيار بند فوج ڀارتي اڳرائي جو منهن ٽوڙ جواب ڏيڻ جي صلاحيت رکي ٿي. هن چيو ته والاريل ڪشمير۾ اڳرائي ان ڳالهه کي ظاهر ڪري ٿي ته ڀارت پاڪستان ۾ حالتون خراب ڪري رهيو آهي، پاڪستان نيو ڪليئر پاور آهي هن چيو ته پاڪستان جنگ نه ٿو چاهي پر ڀارتي حڪمران جنگ وڙهڻ چاهين ٿا حڪومت سڄي دنيا کي ڀارت جي اڳرائي کان آگاهه ڪري. هن چيو ته ڀارت پاڪستان جي سرحدن کي غير محفوظ ۽ اتي رهندڙ پاڪستانين کي خوفزده ڪري رهيو آهي. هن چيو ته ان ڀارتي اڳرائي جي خلاف موثر جواب ڏيڻ گهرجي. اسان جي فوج ڀارت جي مقابلي ۾ 10 دفعا وڌيڪ طاقتور آهي.

 

آرمي چيف جنرل راحيل شريف جي خدمتون سڀني کي ياد رهنديون: اعتزاز احسن

اسلام آباد(بيورو) پاڪستان پيپلز پارٽي جي اڳواڻ اعتزاز احسن چيو آهي ته آرمي چيف جنرل راحيل شريف جي خدمتون سڀني کي ياد رهنديون. اعتزاز احسن صحافين سان ڳالهائيندي چيو ته راحيل شريف بهترين آرمي چيف رهيو آهي، جنگ ۾ گهري فوج جو راحيل شريف ڪنڌ اٿاريو آهي. پيپلز پارٽي جي اڳواڻ چيو ته مدو پورو ٿيڻ تي ريٽائرمينٽ وٺڻ سڄي روايت آهي. تحريڪ انصاف طرفان وڪيل جي پيشڪشن واري سوال تي هن چيو ته پي ٽي آءِ عدالت ۾ سٺي راند کيڏي رهي آهي، حامد خان ڪيس کي صحيح انداز ۾ فارورڊ ڪيو آهي. هن وڌيڪ چيو ته ثبوت ته حڪومت کي پيش ڪرڻا آهن.

 

پ پ چيئرمين جو قومي اسيمبليءَ جي چونڊ وڙهڻ جو فيصلو، وفاقي حڪومت پاناما ڪيس ۾ مڪمل طور ڦاسي چُڪي آهي: بلاول ڀٽو زرداري

ڪراچي (م.ڊ) پاڪستان پيپلز پارٽي جي سربراهه بلاول ڀٽو زرداري چيو آهي ته وفاقي حڪومت پاناما ڪيس ۾ مڪمل طور ڦاسي چُڪي آهي، پاناما ڪيس معاملي تي ڪنهن به صورت ۾ پوئتي نه هٽنداسين، پارٽي ڪارڪنن کي خطاب ڪندي پ پ سربراهه بلاول ڀٽو زرداري چيو ته پارٽي جي نئين چونڊيل عهديدارن کي مبارڪ ڏيان ٿو، عهديدارن کي گهرجي ته هو رابطا مهم تي نڪرن، هن وڌيڪ چيو ته حڪومت پاناما بل جي منظوري ۾ رنڊڪ نه بڻجي، 27 ڊسمبر تائين پ پ جا مطالبا نه مڃيا ويا ته تحريڪ هلائي ويندي، ان احتجاجي تحريڪ جي اڳواڻي آءُ پاڻ ڪندس. ٻئي طرف پاڪستان پيپلز پارٽيءَ جي چيئرمين بلاول ڀُٽو زرداري قومي اسيمبلي جي چونڊ وڙهڻ جو فيصلو ڪري ورتو آهي، هو لاڙڪاڻي مان ننڍي چونڊ وڙهندو. بلاول ڀُٽي کي پارلياماني سياست ۾ حصو وٺڻ جي لاءِ پيپلز پارٽيءَ جي اڳواڻن صلاح ڏني آهي، ڀُٽو لاڙڪاڻي مان ننڍي چونڊ وڙهي قومي اسيمبليءَ ۾ وڃي سگھندو، اڳوڻي صدر آصف علي زرداريءَ جي ڏيهه ورڻ وارو فيصلو به 30 نومبر تي پيپلز پارٽيءَ جي يوم تاسيس تي ڪيو ويندو.36

 

آئيڊياز 2016ع سان ملڪ دشمنن کي واضح نياپو پهتو آهي ته پاڪستان هڪ مضبوط ۽ مستحڪم ملڪ آهي: سيد مراد علي شاهه

ڪراچي (اين اين آءِ) سنڌ جي وڏي وزير سيد مراد علي شاهه چيو آهي ته آئيڊياز 2016ع ۾ پاڪستان جي دفاعي شين جي نماءَ سان پاڪستان جي دشمنن کي هڪ واضح نياپو پهتو آهي ته پاڪستان هڪ مضبوط ۽ مستحڪم ملڪ آهي ۽ جديد هٿيارن سان ليس آهي ۽ ڪنهن به قسم جي جارحيت جو بخوبي مقابلو ڪري سگهي ٿو. هن اها ڳالهه اڄ ايڪسپو سينٽر ۾ آئيڊياز 2016ع تحت رٿيل دفاعي نمائش جي دوري جي دوران ميڊيا سان ڳالهائيندي ڪئي. هن چيو ته پاڪستان جي فوج تربيت، آلات ۽ جنگي صلاحيت جي لحاظ سان تمام مضبوط ۽ مستحڪم آهي ۽ اسان جي فوج وٽ هڪ جذبو آهي، ڇاڪاڻ ته انهن کي ملڪ جي سرحدن جي تحفظ جي حوالي سان عوام جو ڀرپور سهڪار حاصل آهي. هن چيو ته اها ڳالهه اسان لاءِ فخر جي قابل آهي ته اسان جي قومي دفاعي پيداوار ۾ دفاعي شعبي ۾ بلندي واري منزل تي پهتل آهيون. هن چيو ته اهي هٿيار اسان جي دفاع لاءِ آهن يعني امن لاءِ آهن، ڇاڪاڻ ته اسان جارحيت ۾ يقين ناهيون رکندا پر اسان پيار، محبت ۽ انساني ترقي ۾ يقين رکندا آهيون. هن قوم کي واڌيون ڏيندي چيو ته اسان جي دفاعي صنعت ترقي ڪري ٻين ترقياتي ملڪن جيان هڪ متوازع صنعت بڻجي چڪي آهي. سنڌ جي وڏي وزير سيد مراد علي شاهه اڄ صبح اسيمبلي سيشن ۾ شرڪت ڪئي ۽ ان کانپوءِ آئيڊياز 2016ع جو دورو ڪيو ۽ دفاعي نمائش ڏٺي. هن مختلف ملڪن بشمول پاڪستان جي لڳايل مختلف اسٽالن جو دورو ڪيو، کين اسٽالز جي آرگنائيزن پنهنجي پيداوار بابت بريفنگ ڏني ۽ ان موقعي تي ٽينڪ، هيليڪاپٽر جا ماڊل ۽ ڪتابون پيش ڪيا. نمائش ۾ موجود ماڻهن وڏي وزير سان سيلفيون پڻ بڻايون.

 

سپريم ڪورٽ بنا فرق احتساب جي لاءِ ڪميشن جوڙي ۽ نواز شريف سميت سڀني جو احتساب ڪري: سراج الحق

ملتان(م.ڊ) جماعت اسلامي جي امير سراج الحق چيو آهي ته سپريم ڪورٽ بنا فرق احتساب جي لاءِ ڪميشن بڻائي ميان نواز شريف سميت سڀني جو احتساب ڪري. سراج الحق جنرل راحيل شريف جي خاص تعريف ڪئي ۽ چيو ته هو پنهنجي ملازمت واري مدي ۾ واڌ وٺي ها ته اها قدر ۽ قيمت نه رهي ها جيڪا اڄ سڄي قوم وٽ  آهي. ڊسٽرڪٽ بار ملتان ۾ وڪيلن جي اجتماع کي خطاب ڪندي سراج الحق چيو ته ڦرلٽ ڪندڙ حڪمران عوام جي نظرن ۾ ڪري چڪا آهن ان ڪري هاڻ قطري ۽ سعودي شهزادن جي اچڻ جي باوجود به عوام ۾ انهن جي عزت بحال نٿي ٿي سگهي. ڏکڻ پنجاب جي وڪيلن کي نظر انداز ڪري هن خطي سان ناانصافي ۽ زيادتي ڪئي وئي ۽ اهو ئي سبب آهي ته اڄ وڪيلن جهڙو باشعور طبقو پنهنجي ۽ عوام جي حقن جي لاءِ الڳ صوبي جي تحريڪ جو آغاز ڪري چڪو آهي ۽ هن خطي جي عوام سان گڏ آهن، پاڪستان به هڪ وڪيل بڻايو هو، ڪنهن سياستدان، جاڳيردار ۽ جرنل نه، پاڪستان کي بچائڻ لاءِ وڪيلن جي جدوجهد ڪامياب ٿيندي.

 

وفاقي حڪومت پيپلز پارٽيءَ کي قيادت کان محروم رکڻ ٿي چاهي: مولا بخش چانڊيو

ڪراچي (م.ڊ) وڏي وزير جي سڌ سماءَ بابت صلاحڪار مولا بخش چانڊيو چيو آهي ته وفاقي حڪومت پيپلز پارٽيءَ کي قيادت کان محروم رکڻ ٿي چاهي، مناسب سڪيورٽي نه ملڻ تي بينظير ڀٽو جي شهادت ٿي، بلاول ڀٽو کي مناسب سڪيورٽي ملڻ گھرجي، پريس ڪلب ۾ صحافين سان ڳالهائيندي مولا بخش چانڊيو چيو ته اسان جي قيادت کي خطرا آهن، ڌمڪيون ملي رهيون آهن، ٻيهر وزيراعظم بڻجندڙ شخصيتن کي به شهيد ڪيو ويو، عدليا کي ڪجھه نه ٿو چئي سگھان، عدليا جو وڏو احترام ڪندو آهيان، هن چيو ته عدليا جو اسان جي معاشري ۾ وڏو اهم ڪردار آهي، عدليا اپيل جو حق ڏئي اختلاف ڪرڻ جو حق ڏنو، صلاحڪارن بابت عدالتي فيصلي کي چئلينج ڪنداسين.36