تازيون خبرون

Daily Archives: November 24, 2016

ايل او سي تي ڀارتي درندگي جاري، 3 فوجي جوانن سميت 10 پاڪستاني شهيد، 7 ڀارتي فوجن کي ماريو ويو

اسلام آباد/راولپنڊي (اي پي پي/م.ڊ) ڀارتي فوج طرفان لائين آف ڪنٽرول تي بنا سبب فائرنگ جو سلسلو جاري آهي، جنهن جي نتيجي ۾ 3 فوجي جوان شهيد ٿي ويا. آءِ ايس پي آر موجب ڪنٽرول لائين تي ڀارتي فوج جي فائرنگ ۾ ڪيپٽن تيمور، حوالدار مشتاق ۽ لانس نائيڪ غلام حسين شهيد ٿي ويا، جڏهن ته پاڪ فوج پڻ ڀرپور جوابي ڪارروائي ڪندي 7 ڀارتي فوجين کي ماريو آهي. بيان موجب ايل او سي تي اڃا تائين فائرنگ جي ڏي وٺ جو سلسلو جاري آهي. ڀارتي فوج شهري آبادي تي حملا پئي ڪري، جڏهن ته پاڪ فوج رڳو ڀارتي پوسٽن کي نشانو بڻائي رهي آهي. واضح رهي ته اڄ صبح ڀارتي فوج وادي نيلم ۾ مسافر بس تي فائرنگ ۽ گولا باري ڪئي هئي، جنهن جي نتيجي ۾ 7 شهري شهيد ۽ ٻارن سميت ڪيترائي زخمي ٿيا هئا، جڏهن ته ايمبولينس کي پڻ نشانو بڻايو ويو هو. ٻئي طرف  ڀارتي فوج نيلم وادي ۾ لائن آف ڪنٽرول ويجهو سويلين مسافر بس ۽ ايمبولينس کي نشانو بڻايو جنهن جي نتيجي ۾ بس ۾ سوار 7 مسافر اجل جو شڪار ۽ 7 زخمي ٿي پيا. گذريل ڏينهن آءِ ايس پي آر طرفان جاري بيان موجب بس ۽ ايمبولينس کي لائن آف ڪنٽرول تي دڌنيال واري علائقي کي نشانو بڻايو ويو. اها ايمبولينس بس جي زخمي مسافرن جي طبي امداد 7 اجل جو شڪار ماڻهن جا مڙهه کڻي وڃڻ لاءِ اتي پهتي هئي. ڀارتي فوج مسلسل سيز فائر جي ڀڃڪڙي ڪري رهي آهي جڏهن ته والاريل ڪشمير جي عوام تي بدترين ظلم ڪيا پيا وڃن. ايمبولينس کي نشانو بڻائي ڀارتي فوج هڪ ڀيرو ٻيهر انساني حقن جي ڀڃڪڙي جي بدترين مثال قائم ڪئي. ٻئي پاسي ڀارتي فوج شاهه ڪورٽ، جور، بٽل، ڪريلا، باغ، باگسر، هاٽ اسپرنگز سيڪٽرن ۾ لائن آف ڪنٽرول تي بنا جواز فائرنگ ۽ گولا باري ڪئي جن ۾ شهري آبادين کي نشانو بڻايو ويو. پاڪستاني فوج ڀارتي چوڪين کي هدف بنائي رهي آهي. جن سيڪٽرن ۾ ڀارتي فوج شهري آبادي کي هدف بڻائي رهي آهي اتي فائرنگ جي شديد ڏي وٺ جاري آهي. پاڪستان ڀارتي ڊپٽي هاءِ ڪمشنر کي پرڏيهي آفيس گهرائي ڀارتي فوج جي ڪنٽرول لائين تي بنا سبب فائرنگ جي نتيجي ۾ شهرين ۽ فوجين جي شهادت تي سخت احتجاج رڪارڊ ڪرايو آهي. رپورٽن موجب ڀارتي فوج اڄ صبح وادي نيلم ۾ مسافر بس کي نشانو بڻايو، جنهن جي نتيجي ۾ 7 ڄڻا شهيد ٿي ويا، جڏهن ته ايل او سي تي فائرنگ ۾ 3 فوجي جوان پڻ شهيد ٿيا آهن. ان حوالي سان پرڏيهي وزارت ڀارتي ڊپٽي هاءِ ڪمشنر جي پي سنگهه کي گهرائي سخت احتجاج رڪارڊ ڪرائيندي چيو آهي ته ڀارتي فوج جنگبندي جي معاهدي تي عمل ڪري.27

 

ڪراچي ۾ امن بگاڙڻ واريون ڪوششون ناڪام بڻايون ويون: آرمي چيف

راولپنڊي (اين اين آءِ) چيف آف آرمي اسٽاف جنرل راحيل شريف چيو آهي ته پاڪستان جي دشمنن طرفان ڪراچي ۾ امن امان جي صورتحال خراب ڪرڻ جا سمورا ناپاڪ ارادا ناڪام بڻائي ڇڏيا آهن، ڪراچي ۾ زندگي معمول موجب بحال ٿي چڪي آهي ۽ ڪاروباري سرگرميون عروج تي آهن، انهن حاصل ٿيندڙ ڪاميابين کي ضايع ٿيڻ نه ڏينداسين، آفيسر ۽ جوان پيشور سرگرمين تي توجهه ڏين، سپاهگير جي بهترين روايت قائم رکي وڃي، آءِ ايس پي آر موجب چيف آف آرمي اسٽاف پنهنجي الوداعي دورن جي سلسلي ۾ اربع تي ڪراچي جو دورو ڪيو، جتي هن ڪراچي ڪو ۽ سنڌ رينجرز جي آفيسرن ۽ جوانن کي خطاب ڪيو، آرمي چيف ڪراچي ۽ سنڌ جي ٻين شهرن ۾ سيڪيورٽي صورتحال بهتر بڻائڻ جي سلسلي ۾ انهن جي غير معمولي ڪاميابين تي خراج تحسين پيش ڪيو، هن چيو ته ڪراچي ۾ زندگي معمول موجب بحال ٿي چڪي آهي، جنرل راحيل شريف چيو ته ڪراچي ۾ امن امان جي صورتحال خراب ڪرڻ جي دشمن جا سمورا ارادا ناڪام بڻايا آهن، هن چيو ته بين الاقوامي سرحد جي نگراني تي سيڪيورٽي فورسز ساراهه جوڳي آهي، هن چيو ته آرمي ۽ رينجرز پاران خاص طور تي ڏورانهن علائقن ۽ سنڌ جي ٿر وارن علائقن ۾ آفتون ۽ بهتران صورتحال ۾ سماجي خدمتن تي خاص طور تي ساراهيو، ان کان اڳ آرمي چيف جي آمد تي ڪور ڪمانڊر ليفٽيننٽ جنرل نويد مختار ان جي آجيان ڪئي.

 

وفاقي وزيرن ۽ اسيمبلي ميمبرن جي پگهارن ۾ 150 سيڪڙو واڌ جي منظوري

اسلام آباد  (اين اين آءِ) وفاقي ڪابينه اسپيڪر چيئرمين سينيٽ وفاقي وزيرن ۽ پارليامينٽ جي ميمبرن جي پگهارن ۾ 150 سيڪڙو تائين واڌ جي منظوري ڏني آهي اربع تي وفاقي گاڌي واري هنڌ ۾ وزيراعظم نوازشريف جي قيادت ۾ ڪابينه جو اجلاس ٿيو جنهن ۾ 16 نقاطي ايجنٽي تي غور ڪيو ويو فنانس سيڪريٽري وقار مسعود خان پاران پيش ڪيل سفارشن ۾ ٻڌايو ويو ته سينيٽ جي چيئرمين ۽ قومي اسيمبلي جي اسپيڪر هن وقت هڪ لک 19 هزار 8 رپيا بنيادي پگهار ٻن الائونسن سان 31 هزار 750 رپيا ۽ 11 هزار 901 رپيا وصول ڪري رهيا آهن اها سفارش ڪئي ويئي هئي ته سينيٽ جي چيئرمين ۽ قومي اسيمبلي جي اسپيڪر جي پگهار 2 لک 5 هزار رپيا جنهن ۾ الائونس به شامل ڪيا وڃن تائين وڌائي وڃي اها به سفارش ڪئي ويئي ته ڊپٽي چيئرمين سينيٽ ۽ ڊپٽي اسپيڪر قومي اسيمبلي جون پگهارون هڪ 10 هزار 85 رپين مان وڌائي هڪ لک 85 هزار رپيا ڪئي وڃي پارليامينٽ جي ميمبرن جي ماهوار بنيادي پگهارون 44 هزار 630 مان وڌائي هڪ لک 50 هزار رپيا ڪرڻ جي به سفارش ڪئي ويئي هئي وفاقي وزيرن جون پگهارون هڪ لک 14 هزار 897 رپيا ماهوار مان وڌائي 2 لک رپين جي تجويز پيش ڪئي ويئي هئي ۽ اها به سفارش ڪئي ويئي هئي ته انهن کان علاوه مملڪتي وزيرن جون پگهارون هڪ لک 6 هزار 281 رپين کان علاوه الائونسز وڌائي هڪ لک 80 هزار رپيا ڪئي وڃي. ان کان پوءِ ميڊيا سان ڳالهائيندي مملڪتي سڌسماءُ واري وزير مريم اورنگزيب چيو ته نين پگهارن جو اطلاق پهرين آڪٽوبر کان هوندو واڌ سان قومي ناڻي تي ساليانو 40 ڪروڙ رپيا واڌ جو ٻوجهه پوندو. هن چيو ته 14 سالن کان پوءِ پارليامينٽ جي ميمبرن جي پگهارن ۾ واڌ ڪئي ويئي آهي.  مريم اورنگزيب ٻڌايو ته ڪابينه افغان مهاجرن کي ڊسمبر 2017 تي پاڪستان ۾ رهڻ جي اجازت ڏني آهي جڏهن ته ان عرصي کان پوءِ افغان مهاجرين کي وطن واپس وڃڻو پوندو.

 

پ پ جو سنڌ ڊي 4 ڊسمبر تي لاهور ۾ ملهائڻ جو اعلان

ڪراچي (اسٽاف رپورٽر) پاڪستان پيپلز پارٽي سنڌ جو اجلاس پيپلز پارٽي سنڌ جي صدر نثار احمد کهڙو جي صدرات هيٺ اڄ وزيراعليٰ هائوس ۾ منعقد ٿيو. اجلاس ۾ سنڌ جو وڏو وزير سيد مراد علي شاهه. اڳوڻو وڏو وزير سيد قائم علي شاهه، اسپيڪر سنڌ اسيمبلي آغا سراج دراني، پيپلز پارٽي سنڌ جو جنرل سيڪريٽري وقار مهدي، سڌ سماءَ وارو سيڪريٽري عاجز ڌامراهه، ايم اين ايز، ايم پي ايز ۽ ٻين عهديدارن شرڪت ڪئي. اجلاس جي ابتدا ڪلام پاڪ سان ٿي ۽ شهيد محترمه بينظير ڀٽو جي ايثال ثواب لاءِ دعا پڻ ڪئي وئي. ان موقعي تي اسٽيج سيڪريٽري جا فرض وقار مهديءَ نڀايا. پيپلز پارٽي سنڌ جي صدر نثار احمد کهڙي پارٽي آرگنائيزيشن پروسيس جي تفصيلن بابت اجلاس کي آگاهه ڪيو ۽ هن نون چونڊيل عهديدارن کي واڌايون ڏنيون. هن چيو ته پيپلز پارٽي جو 49هين يوم تاسيس لاهور ۾ ملهايو ويندو ۽ ان حوالي سان 30 نومبر تي لاهور ۾ تقريب معنقد ڪئي ويندي. هن چيو ته پهرين ڊسمبر تي پيپلز پارٽي سنڌ جو ڏينهن هوندو جنهن ۾ چيئرمين بلاول ڀٽو زرداري سمورن شارٽ لسٽڊ اميدوارن سان ملاقات ڪندو ۽ اهڙي ريت نوان عهديدار چونڊجي ويندا. نثار احمد کهڙي وڌيڪ چيو ته اسان سنڌي ٽوپيءَ وارو ڏينهن لاهور ۾ ملهائينداسين ۽ چيئرمين پيپلز پارٽيءَ جي خواهش آهي ته اوهان سڀ چونڊيل نمائندا، ٽڪٽ هولڊرز، ذيلي تنظيمن جا عهديدار ۽ پارٽيءَ جا ماڻهو ان ۾ ڀرپور ريت شرڪت ڪن. هن چيو ته سنڌ ڊي 4 ڊسمبر تي لاهور ۾ ملهايو ويندو ۽ اوهان سمورا 30 نومبر تي لاهور پهچڻ جي تياري ڪريو. نثار احمد کهڙي چيو ته 27 ڊسمبر تي شهيد محترمه بينظير ڀٽو جي ورسيءَ جي تياري به اوهان ڀرپور انداز ۾ ڪريو. هن چيو ته چيئرمين پاڪستان پيپلز پارٽي بلاول ڀٽو زرداري پارٽيءَ کي ڀرپور انداز ۾ فعال ڪري رهيو آهي. ان موقعي تي اڳوڻي سنڌ جي وڏي وزير سيد قائم علي شاهه به اجلاس کي خطاب ڪيو. هن پنهنجي خطاب جي شروعات جيئي ڀٽو جي نعري سان ڪيو. هن چيو ته يوم تاسيس پارٽيءَ جي ڄم جو ڏينهن آهي ۽ پارٽي چيئرمين جو حڪم آهي ته يوم تاسيس ۾ ڀرپور ريت شرڪت ڪئي وڃي. ٻئي طرف سنڌ جي سينيئر وزير ۽ پاڪستان پيپلزپارٽي سنڌ جي صدر نثار احمد کهڙو چيو آهي ته سنڌ حڪومت وڏي وزير جي قانون بابت صلاحڪار ۽ صوبائي صلاحڪارن بابت سنڌ هاءِ ڪورٽ جي فيصلي جي خلاف سپريم ڪورٽ ۾ اپيل داخل ڪندي. اهڙن خيالن جوا ظهار هن اربع ڏينهن سنڌ اسيمبليءَ ۾ ڳالهائيندي ڪيو. هن چيو ته آئين ۾ اهڙي ڪا به پابندي ناهي ته اڻ چونڊيل شخص صلاحڪار نه ٿو ٿي سگهي. هن چيو ته اهڙي پريڪٽس نه صرف سنڌ پر مرڪز ۾ به آهي ۽ مرڪز ۾ به اڻ چونڊيل حڪومت جو حصو آهن. هن چيو ته سنڌ حڪومت سنڌ هاءِ ڪورٽ جي اهڙي فيصلي جي خلاف سپريم ڪورٽ ۾ اپيل داخل ڪندي ڇاڪاڻ ته سنڌ حڪومت وٽ اپيل داخل ڪرڻ جو حق حاصل آهي.

 

ڀارت بي ڏوهي شهرين کي نشانو پيو بڻائي: نواز شريف

اسلام آباد (م.ڊ) وزيراعظم نواز شريف ڀارتي فوج جي فائرنگ ۾ شهيد ٿي ويلن جي وارثن سان ڏک جو اظهار ڪندي چيو آهي ته اسان جي صبر باوجود ڀارت بي ڏوهين کي نشانو پيو بڻائي. پنهنجي بيان ۾ وزيراعظم نواز شريف جو چوڻ هو ته وطن جي بچاءَ لاءِ پنهنجون حياتيون ڏيندڙن کي قوم سدائين ياد رکندي. اسان جي صبر باجود ڀارت بي ڏوهي شهرين کي نشانو رهيو آهي. ڪا به ذميوار رياست بي ڏوهين، خاص طور تي ايمبولينس تي حملي جي اجازت نٿي ڏئي سگهي. هن چيو ته ڀارت والاريل ڪشمير ۾ ظلم کي لڪائڻ جي ناڪام ڪوشش ڪري رهيو آهي. ڪشميرين جي اخلاقي ۽ سفارتي حمايت جاري رکنداسين.27

 

ڀارتي اڳراين جو سبب پاڪستان جي ڪمزور پرڏيهي پاليسي آهي: خورشيد شاهه

پشاور (اين اين آءِ) پ پ پ جي اڳواڻ اپوزيشن ليڊر سيد خورشيد شاهه چيو آهي ته مستقل پرڏيهي وزير جو نه هجڻ پرڏيهي پاليسي جي ناڪامي جو سبب آهي ڀارت سان لاڳاپا هميشه تڪرار جو شڪار رهيا آهن ملڪ جي ناڪام پرڏيهي  پاليسين سبب پاڙيسري ملڪن سان لاڳاپا بهتر نه آهن اپوزيشن ليڊر خورشيد شاهه پشاور ۾ حاجي عديل جي لاڏاڻي تي ان جي گهر وڃي وارثن سان تعزيت ڪئي ان موقعي تي ميڊيا سان ڳالهائيندي خورشيدشاهه چيو ته حڪومت جي خلاف جڏهن به نڪرنداسين ته هر پارٽي کي گڏ کڻي هلنداسين هن چيو ته حڪومت جو پرڏيهي پاليسي تي ڌيان نه آهي صرف قرض وٺڻ جي باري ۾ سوچي رهي آهي هن چيو ته پاڙيسري ملڪن سان لاڳاپا بهتر نه آهن ڀارت سان لاڳاپا هميشه تڪرار جو شڪار رهيا آهن هن چيو ته پرڏيهي پاليسي جي ناڪامي مستقل پرڏيهي وزير جو نه هجڻ آهي. هن چيو ته وزيراعظم جو وڌيڪ وقت ٻاهرين دورن ۾ گذري رهيو آهي هن چيو ته وزيراعظم وٽ پارليامينٽ اچڻ لاءِ وقت نه آهي يو اي اِي ۽ سعودي عرب ۾ ڀارت جو اثر رسوخ وڌيڪ ٿي رهيو آهي ايران افغانستان ۽ ڀارت سان لاڳاپا سٺا نه رهيا آهن هن چيو ته پ پ پ واحد پارٽي آهي جنهن ڊڪٽيٽرن جو کلي مقابلو ڪيو.

 

هر معاملي تي قانون صرف سنڌ لاءِ آهي، باقي صوبن لاءِ فيصلا الڳ ڪيا وڃن ٿا: مولا بخش چانڊيو

ڪراچي (اين اين آءِ) پ پ اڳواڻ ۽ صلاحڪار مولا بخش چانڊيو ڪورٽ جي فيصلي تي سخت خدشن جو اظهار ڪندي چيو آهي ته هر معاملي تي قانون صرف سنڌ لاءِ آهي باقي صوبن لاءِ فيصلا جدا ڪيا وڃن ٿا، جڏهن وفاق ٽنهي صوبن ۾ صلاحڪار رکي سگهي ٿو ته سنڌ ۾ پابندي ڇو مڙهي وئي آهي، اسان عدالت جو احترام ڪريون ٿا ۽ ان جي هر فيصلي تي دل سان عمل ڪنداسين پر صلاحڪارن جي مقرري غير آئيني ڪيئن آهي اسان کي سمجهايو وڃي، مان اڄ تائين پ پ لاءِ عدالت وٽان خوش خبري نه ٻڌي، پهريان عدالت وقت تي انصاف ڪري، ڏاڏو ڪيس ڪري ٿو ۽ پوٽو وڙهي ٿو، اپيڪس ڪميٽي ۾ مرتضي2 وهاب عدالت ۾ ڪيسن جي موڪل جي حوالي سان ڳالهه ڪئي هئي جنهن جي ان کي سزا ڏني وئي آهي، اهڙن خيالن جو اظهار هن اربع تي سنڌ سيڪريٽريٽ ۾ پريس ڪانفرنس ڪندي ڪيو، ان موقعي تي سينيٽر سعيد غني به ساڻس گڏ هو، هن چيو ته سنڌ هاءِ ڪورٽ جي فيصلي موجب معاون خاص ۽ صلاحڪار ڪابينا اجلاس ۾ نٿا ويهي سگهن، مقرري مرتضيٰ وهاب جي چئلينج ڪئي وئي هئي پر فيصلو سڄي حڪومت خلاف ڏنو ويو آهي، فيصلي کي پسند يا نه پسند ڪرڻ جو اختيار ماڻهن وٽ آهي، ان لاءِ اپيل جو حق به آهي، هن چيو ته آئين ڪنهن شخص کي صوابديدي اختيار ڏنا آهن ته ڪو ٻيو ڪيئن اختيار ڪري سگهي ٿو، آئين جو مخصوص علائقن ۾ مخصوص چهرو نظر اچي ته اها سٺي ڳالهه نه آهي، ٻين صوبن لاءِ فيصلا ڪجهه ٻيا ۽ سنڌ ۾ ڪجهه ٻيا ٿين ٿا، ڇا آئين جو اهڙي طرح سان اطلاق صرف سنڌ لاءِ آهي، هن چيو ته صلاحڪارن جي مقرري غير آئين ڪيئن آهي، اسان کي ٻڌايو وڃي، اسان سنڌ هاءِ ڪورٽ جي فيصلي خلاف نه آهيون پر جيڪو معاملو عدالت ۾ آندو ئي نه ويو ان تي فيصلو اچڻ حيرت جي ڳالهه آهي.

 

سپريم ڪورٽ سنڌ ۾ شراب جي وڪري تي پابنديءَ وارو هاءِ ڪورٽ جو فيصلو رد ڪري ڇڏيو

اسلام آباد (اين اين آءِ) سپريم ڪورٽ آف پاڪستان سنڌ ۾ شراب جي وڪرو تي پابندي جو سنڌ هاءِ ڪورٽ جو فيصلو ڪالعدم قرار ڏيئي ڇڏيو شراب وڪرو ڪندڙن سپريم ڪورٽ ۾ سنڌ ۾ شراب جي وڪرو تي پابندي بابت اپيل داخل ڪئي هئي جنهن کي عدالت منظور ڪندي ان کي واپس سنڌ هاءِ ڪورٽ ۾ موڪلي ڇڏيو جسٽس ثاقب نثار جي اڳواڻي ۾ سپريم ڪورٽ جي ٽه رڪني بئنچ درخواست تي ٻڌڻي ڪئي سپريم ڪورٽ ۾ شاهد حامد ۽ عاصمه جهانگير پيش ٿيا دليل ٻڌڻ کان پوءِ عدالت حڪم ڏنو ته سنڌ هاءِ ڪورٽ روزانو جي بنياد تي ٻڌڻي ڪري ڪيس کي جلد کان جلد اڪلائي ٻڌڻي دوران قومي اسيمبلي جي ميمبر ڊاڪٽر رميش ڪمار موقف اختيار ڪيو ته هندو مذهبي ڪتابن ۾ شراب جو وڪرو ۽ شراب نوشي منعي آهي مذهب جي نالي تي شراب جو ڪاروبار ڪرڻ صحيح نه آهي ان تي جسٽس ثاقب نثار ان کي تنبيهه ڪئي ته رميش صاحب توهان کي بطور در تسليم نه ڪيو آهي توهان ويهي رهو جسٽس ثاقب نثار چيو ته اسان جي اڳيان قانوني معاملا آيا آهن شراب جو وڪرو جائز آهي يا ناجائز آهي اسان ان معاملي ۾ نٿا پوڻ چاهيون اسان اهو ڏسڻ چاهيون ٿا ته معاملو ڪيترو قانوني آهي ڊاڪٽر رميش پابندي برقرار رکڻ جي حق ۾ سپريم ڪورٽ ۾ درخواست داخل ڪئي هئي سپريم ڪورٽ اهو به چٽو چيو ته ان حڪم سان اهو تاثر نه ورتو وڃي ته عدالت شراب جي وڪري جي اجازت ڏيئي رهي آهي.

 

سپريم ڪورٽ ۾ پاناما ليڪس جا ثبوت به ايندا ۽ نواز شريف سياسي طور تي دفن ٿي ويندو: شيخ رشيد

لاهور (اين اين آءِ) پاڪستان عوامي مسلم ليگ جي اڳواڻ شيخ رشيد چيو آهي ته نوازشريف عوامي عدالت ۾ پانامه ڪيس هارائي چڪو آهي قطر جي شهزادي جا پئسا ئي مڃڻا آهن ته پوءِ ڪرپشن کي کليل ڇوٽ ڏيڻ گهرجي سپريم ڪورٽ ۾ پانامه ليڪس جا ثبوت به ايندا ۽ نوازشريف سياسي طور تي دفن به ٿي ويندو حڪومت نه هلي رهي آهي نوازشريف ضد ڪيو ويٺو آهي پر ضد جو انجام وڏو خوفناڪ حادثو به ٿي سگهي ٿو موجوده حڪومت نيوز ليڪس کان نٿي بچي سگهي ڊسمبر تمام اهم آهي عمران خان اپوزيشن نه ڪندو ته ڇا مولانا فضل الرحمان ڪندو سردار اياز صادق ٻئي نمبر مان پهرين نمبر تي پهچي ويو آهي جمهوريت کي جيترو نقصان ان پهچايو شايد ڪنهن پهچايو هجي اهڙن خيالن جو اظهار هن گذريل ڏينهن پ پ پ جي سينيئر اڳواڻ جهانگير بدر جي لاڏاڻي تي ان جي رهائشگاهه وڃي ان جي وارثن سان تعزيت جي اظهار کان پوءِ ميڊيا سان ڳالهائيندي ڪيو شيخ رشيد چيو ته قطري ڪاغذن سان صرف نوازشريف جي ئي عزت ختم ٿي پر سڄي پاڪستان جي به جنهن کي به سي ڊي آر وارا نوٽيس ڏين اهو ڪوئي کڻي اچي ڪاغذ ۽ چئي ته هي مون وٽ انويسٽر آهي جيڪڏهن ڪو ماڻهو اهو سمجهي رهيو آهي ته نوازشريف نيوز ليڪس کان بچي ويندو ته ايئن هرگز نه ٿيندو. دنيا هيڏانهن جو هوڏانهن ٿي وڃي پر موجوده حڪومت نيوز ليڪس جي ڪيس مان نٿي بچي سگهي اهو ادارن جو فيصلو آهي ڪنهن جي اچڻ يا وڃڻ سان ادارن جي فيصلن تي ڪوبه فرق نٿو پئي جيڪڏهن سمنڊمان موجون 28 تاريخ تي ختم ٿيڻ واريون آهن ته ان جو مطلب هي نه آهي ته سمنڊ جي تهه ۾ واڳو نه ويٺا آهن سمنڊ جي تري ۾ واڳون آهن ۽ اهي ماڻهو جيڪي سمجهي رهيا آهن ته سڄي قوم کي بيوقوف بڻائي رهيا آهيون منهنجي خيال ۾ هو پنهنجو پاڻ کي بيوقوف بڻائي رهيا آهن هن چيو ته مون کي افسوس ٿي رهيو آهي ته مان لنڊن ۾ هيس ته اسپيڪر سردار اياز صادق چيو ته منهنجو ٻٽو معيار آهي اياز صادق نوازشريف کان پڇي ته منهنجو ڪهڙو اسٽينڊر آهي هو ٻه نمبر اسپيڪر اهي نوازشريف منهنجا نخرا برداشت ڪندو هو مان ڪڏهن مالڪ جو ڪردار ادا نه ڪيو هو چوي ٿو ته مان سائوٿ آفريڪا جي ويزا لاءِ توهان کي چيو مان اسيمبلي جو اهو ميمبر آهيان جن کي آمريڪا جهاز مان به ڀيرا لاهي ڇڏيو مان آمريڪا نه وڃي رهيو هيس جيڪڏهن اهو ڪنهن ٻئي ملڪ جي ميمبر پارليامينٽ سان ٿئي ها ته جهاز روڪي ان کي آف لوڊ ڪيو وڃي ها ته اهو قيادت آڻي ڇڏي ها امريڪن معافي وٺڻ لاءِ تيار آهن پر مان چيو ته نه توهان آفيشل اسٽيٽمينٽ ڏيو آمريڪي پرڏيهي آفيس مون کان معافي وٺي ته ان مون سان زيادتي ڪئي آهي پر ان سان اياز صادق تي ڪوبه فرق نٿو پوي هر قائمه ڪميٽي جون ڪميٽيون هونديون آهن ڪوبه آفريڪا ۾ هوندو آهي ته ڪوئي لنڊن ۾ هوندو آهي مان قائمه ڪميٽي آفريڪا ۾ هيس ۽ اياز صادق جي لاءِ عرض آهي ته هن منهنجو ٽوئر ۾ نالو وڌو هو ۽ ٽڪيٽ موڪلي هئي خدا جو شڪر آهي مان نه ويس شايد وڃان ها پر مان مصروف هيس جنهن ملڪ جو اسپيڪر ايترو ننڍو هجي ۽ جيڪو ٻئي نمبر مان پهرين نمبر تي اچي ويو هجي اهو سمجهي ٿو ته جمهوريت ان سان زنده رهندي. مان سمجهان ٿو ته ان جمهويت کي جيترو نقصان اياز صادق جهڙِ نااهلي اسپيڪر پهچايو آهي شايد ئي ڪنهن پهچايو هجي.هڪ سوال جي جواب ۾ هن چيو ته آصف علي زرداري راحيل شريف جي دوران نه آيو اهو ان کي خبر پوندي هن ڊاڪٽر عاصم ۽ ٻين ماڻهن جي معاملي تي نوازشريف سان بهتر ڊيل ڪئي هن چيو ته عمران خان سان گڏ مان آهيان ۽ سڀ ڪجهه ٺيڪ هلي رهيو آهي.

 

فواد چوڌري تحريڪ انصاف جو ترجمان مقرر، نعيم الحق پارٽي ترجمان ئي رهندو: عمران خان

اسلام آباد (بيورو/م.ڊ) پاڪستان تحريڪ انصاف جي چيئرمين عمران خان، فواد چوڌري کي پارٽي جو ترجمان مقرر ڪري ڇڏيو آهي. رپورٽن موجب عمران خان پارٽي ترجمان لاءِ فواد چوڌري جي چونڊ ڪئي آهي، جڏهن ته نعيم الحق اطلاعات واري مرڪزي سيڪريٽري طور خدمتون انجام ڏيندو رهندو.  تحريڪ انصاف جي چيئرمين عمران خان چيو آهي ته نعيم الحق پارٽي جو اطلاعات وارو سيڪريٽري ۽ ترجمان ئي رهندو. سماجي رابطن واري ويب سائيٽ ٽوئيٽر تي پنهنجي بيان ۾ عمران خان جو چوڻ هو ته نعيم الحق سان گڏ ڪجهه ترجمانن جي ٽيم جوڙي وئي آهي، هو پنهنجي عهدي تي قائم رهندو ۽ تحريڪ انصاف جي ترجمان طور موقف پيش ڪندو.27