تازيون خبرون

Daily Archives: November 10, 2016

سنڌ حڪومت سان گڏجي ڪراچي ۾ امن بحال ڪرايو وڃي: آرمي چيف

ڪراچي (اين اين آءِ) آرمي چيف جنرل راحيل شريف سيڪيورٽي فورسز ۽ انٽيليجنس ايجنسين کي ڪراچي جي شهرين لاءِ امن جي بحالي سان قانون لاڳو ڪندڙ ادارن ۽ صوبائي حڪومت سان گڏجي آپريشن جاري رکڻ جي هدايت ڪئي آهي، جڏهن ته ڏکڻ ڪمانڊ جي جاري مشقن جي معائني دوران فارميشنز جون صلاحيتيون ۽ آپريشن تي اطمينان جو اظهار ڪيو آهي، آءِ ايس پي آر موجب چيف آف آرمي اسٽاف جنرل راحيل شريف اربع تي ڪو هيڊڪوارٽر ڪراچي جو دورو ڪيو ۽ ڏکڻ ڪمانڊ جي جاري مشقن رزلٽ ريسپانس ۾ شرڪت ڪئي، آرمي چيف کي تفصيلي بريفنگ ڏني وئي ۽ مشقن ۾ شامل جارحاڻا ۽ دفاعي آپريشن بابت ٻڌايو ويو، آرمي چيف شريڪ ٿيندڙن کي خطاب ڪندي فارميشن جون صلاحيتن ۽ آپريشنل تيارين تي اطمينان جو اظهار ڪيو، ان کانپوءِ آرمي چيف سيڪيورٽي ڪانفرنس جي به صدارت ڪئي جنهن ۾ ڪور ڪمانڊر، ڊي جي آءِ ايس آءِ، ڊي جي ايم آءِ، ڊي جي ايم او ۽ ڊي جي رينجرز شرڪت ڪئي، سيڪيورٽي، فورسز ۽ انٽيليجنس ايجنسين پاران ڪراچي ۾ امن امان جي صورتحال بهتر بڻائڻ جي سلسلي ۾ حاصل ڪاميابين کي ساراهيو.  آرمي چيف چيو  ته سنڌ حڪومت سان گڏجي ڪراچي ۾ امن امال بحال ڪرايو وڃي، جڏهن ته مضبوطي لاءِ پڻ حڪومت جي مدد ڪئي وڃي.

 

وفاقي حڪومت عشرت العباد کي هٽائي ڇڏيو، سعيد الزمان صديقي سنڌ جو نئو گورنر مقرر، نوٽيفڪيشن جاري

اسلام آباد/ڪراچي(م.ڊ) جسٽس رٽائرڊ سعيد الزمان صديقي کي سنڌ جو نئون گورنر مقرر ڪيو ويو آهي، جيڪو ڊاڪٽر عشرت العباد جي جاءِ تي ذميواريون سنڀاليندو. رپورٽ موجب ايوان صدر سنڌ جي نئين گورنر جي مقرريءَ جو نوٽيفڪيشن جاري ڪري ڇڏيو آهي، جنهن تحت جسٽس رٽائرڊ سعيد الزمان صديقي سنڌ جي نئين گورنر طور ذميواريون سنڀاليندو   ان حوالي سان ايوان صدر جي ترجمان موجب صدر ممنون حسين وزيراعظم جي سفارش تي سعيد الزمان صديقي کي سنڌ جو نئون گورنر مقرر ڪري ڇڏيو آهي، جنهن جو نوٽيفڪيشن جاري ڪيو ويو آهي. وفاقي حڪومت طرفان سنڌ جي گورنر کي تبديل ڪرڻ واري فيصلي کان عشرت العباد به لاعلم نڪتو،  هن چيو ته سنڌ جي گورنر جي تبديلي جي حوالي سان اسلام آباد هن وقت تائين آگاهه ناهي ڪيو. گورنر عشرت العباد چيو ته گورنر جي تبديلي وفاقي حڪومت جو استحقاق آهي، هن جي مرضي هو جيڪو فيصلو ڪري مون کي منظور هوندو. هن چيو ته گورنر سنڌ جي عهدي تي رهندي هميشه ڪراچي جي امن ۽ سنڌ جي مفاد جي لاءِ ڪم ڪيو آهي. هن وڌيڪ چيو ته جيڪڏهن ڪراچي جو گورنر نه رهيس تڏهن به ڪراچي جي امن جي لاءِ ڪم ڪندو رهندس. وفاقي حڪومت سنڌ ۾ نئين گورنر جي مقرري جو فيصلو ڪري ڇڏيو آهي، جنهن کانپوءِ ڊاڪٽر عشرت العباد عهدو ڇڏڻ جون تياريون شروع ڪري ڇڏيون آهن. رپورٽن موجب وفاق سنڌ حڪومت کي نئين گورنر جي مقرري جي فيصلي بابت آگاهه ڪندي چيو آهي ته ايندڙ 72 ڪلاڪن ۾ نئين گورنر جي حلف برداري جو امڪان آهي، جنهن کانپوءِ عشرت العباد پنهنجا ڪم اُڪلائڻ شروع ڪري ڇڏيا آهن. وفاق طرفان نئين گورنر جي مقرري جو نوٽيفڪيشن جاري ٿيڻ کانپوءِ عشرت العباد پنهنجو عهدو ڇڏي ڏيندو. ٻئي طرف سنڌ اسيمبلي جي اسپيڪر آغا سراج دراني چيو آهي ته گورنر جي تبديلي تي سنڌ حڪومت کان صلاح مشورو ناهي ورتو ويو. پنهنجي بيان ۾ سراج دراني چيو ته نواز ليگ جو سنڌ حڪومت سان لهجو سٺو ناهي، وفاقي حڪومت سنڌ جي گورنر کي هٽائڻ تي صوبائي حڪومت کي اعتماد ۾ ناهي ورتو. هن گورنر عشرت العباد کي بهترين گورنر قرار ڏيندي چيو ته هن ڪيترن ئي حڪومت کي بحرانن مان ڪڍڻ ۾ مدد ڪئي تنهن هوندي هن جي ان ڪردار کي انتهائي قدر واري نگاهه سان ڏٺو ويندو آهي ۽ هميشه ياد رکيو ويندو.  هن وڌيڪ چيو ته عشرت العباد جو بطور گورنر  وارو ڪردار انتهائي مثبت رهيو آهي. مولابخش چانڊيو پنهنجو رد عمل ظاهر ڪندي چيو آهي وفاقي حڪومت ڊاڪٽر عشرت العباد کي هٽائڻ ۽ جسٽس (ر) سعيد الزمان صديقي جي مقرري جي حوالي سان سنڌ حڪومت کي اعتماد ۾ ناهي ورت نه ئي مشاورت ڪئي وئي آهي،  جواب ۾ وزير اعظم جي ترجمان مصديق ملڪ چيو آهي ته سعيد الزمان صديقي جي مقرري آئين ۽ قانون موجب  ڪئي وئي اهي، جن ماڻهن سان مشاورت ڪرڻ گهربي هئي انهن سان مشاورتي ڪري ڇڏي آهي، پاڪ سرزمين پارٽي جي اڳواڻ رضا هارون چيو آهي ته وزير اعظم ۽ مصدق ملڪ کي ٻڌائڻ گهرجي ته گورنر سنڌ کي هٽائڻ جو سبب ڪهڙو آهي؟.

 

وليج گئسيفڪيشن لاءِ 1.2 ارب رپيا، وليج ايليڪٽريفڪيشن لاءِ 1300 ملين رپيا مختص

ڪراچي(اي پي پي)سنڌ جي وڏي وزير سيد مراد علي شاهه چيو آهي ته وليج ايليڪٽريفڪيشن ۽گئسيفڪيشن سندس اوليت ۾ شامل آهي. هن چيو ته مان قابل تجديد ۽ ڪوئلي مان هلندڙ رٿائن ذريعي بجلي پيدا ڪرڻ لاءِ ڪوشش ڪري رهيو آهيان، اهڙي ريت ڳوٺن کي بجلي ۽ گئس فراهم ڪرڻ لاءِ پڻ ڪم ڪري رهيو آهيان. هن اها ڳالهه اربع تي وليج ايليڪٽري/فڪيشن ۽گئسيفڪيشن جي حوالي سان اجلاس جي صدارت ڪندي ڪئي. اجلاس ۾ ايڊيشنل چيف سيڪريٽري (ترقيات) محمد وسيم، وڏي وزير جو پرنسپل سيڪريٽري نويد ڪامران بلوچ، اسپيشل سيڪريٽري رحيم شيخ، ناڻي وارو سيڪريٽري حسن نقوي ۽ ٻيا شريڪ هئا. ايڊيشنل چيف سيڪريٽري (ترقيات) محمد وسيم اجلاس کي بريفنگ ڏيندي چيو ته هلندڙ مالي سال دوران وليج ايليڪٽريفڪيشن لاءِ 1300 ملين رپيا مختص ڪيا ويا آهن. سنڌ حڪومت توانائي کاتي کي هڪ ملين رپيا جاري ڪري ڇڏيا آهن، جنهن مان هن 272.94 ملين رپيا سيپڪو کي 247 ننڍن ڳوٺن کي بجليءَ جي فراهميءَ لاءِ جاري ڪيا آهن. اهڙي ريت حيسڪو کي بجليءَ جي فراهميءَ جي 175 رٿائن لاءِ 252.33 ملين رپيا ڏنا آهن. وڏي وزير سيد مراد علي شاهه ايڊيشنل چيف سيڪريٽري (ترقيات) کي هدايت ڪئي ته هُو وليج ايليڪٽريفڪيشن جي مسئلي جي حوالي سان لاڳاپيل اٿارٽيءَ سان ڳالهائي ته جيئن ڳوٺن کي بجليءَ جي سهولت جلد ڏئي سگهجي. وڏي وزير سيد مراد علي شاهه کي اهو به ٻڌايو ويو ته وليج گئسيفڪيشن لاءِ 1.2 ارب رپيا مختص ڪيا ويا آهن، جڏهن ته وليج گئسيفڪيشن جون 88 رٿائون آهن. وڏي وزير سئي سدرن گئس ڪمپني کي گئس جي فراهميءَ لاءِ هدايتن کي فالو ڪرڻ جي به هدايت ڪئي. هن چيو ته اسان جي ڳوٺن جون عورتون اڃا تائين روائيتي طريقي سان چلهه ٻاري کاڌو پچائينديون آهن .هن چيو ته اهو اسان جو فرض آهي ته پراڻي نظام کي بدلائيندي گئس فراهم ڪريون ته جيئن اهي گئس ذريعي چلهه ٻاري آساني سان رڌ پچاءُ ڪري سگهن.

 

ڊيره اسماعيل خان ويجهو مسافر وين کاهي ۾ ڪري پئي، ٻارڙن ۽ عورتن سميت 10 ماڻهو فوت ، 15 زخمي

ڊيرا اسماعيل  (اين اين آءِ) تيزنا جي ڳوٺ ۾ مسافر گاڏي وڏي کڏ ۾ ڪرڻ جي نتيجي ۾ 2 ٻارڙن ۽ 3 عورتن سميت 10 ڄڻا فوت، جڏهن ته 13 زخمي ، اها مسافر گاڏي لاهور ۾ رائيونڊ ۾ ميڙ لاءِ وڃي رهي هئي ته تيز گانا ڳوٺ ويجهو تيز رفتاري سبب گاڏي وڏي کڏ ۾ ڪري جنهن سبب گاڏي ۾ سوار 2 ٻارڙن ۽ 3 عورتن سميت 10 ڄڻا فوت ٿي ويا، جڏهن ته 12 زخمي ٿي پيا، زخمين کي درازندا اسپتال، مفتي محمود ڊيرا، ڊسٽرڪٽ هيڊڪوارٽر پهچايو ويو، جڏهن ته سخت زخمين کي پشاور ۽ ملتان روانو ڪيو ويو.

 

وزير اعظم جي صدر سان ملاقات، پاڪ-چين راهداري منصوبي سميت ٻين معاملن تي ڳالهيون

اسلام آباد (اين اين آءِ) وزيراعظم نواز شريف صدر ممنون حسين سان ايوان صدر اسلام آباد ۾ ملاقات ڪئي، ملاقات ۾ ٻنهي اڳواڻن قومي اهم معاملن تي ڳالهه ٻولهه ڪئي، ملاقا ۾ پاڪ چين اقتصادي راهداري، توانائي جا منصوبا، امن امان لائين آف ڪنٽرول ۽ والاريل ڪشمير جي ورڪنگ بائونڊري تي پيدا ٿيندڙ صورتحال سميت سمورن معاملن تي ڳالهه ٻولهه ڪئي وئي، وزير اعظم صدر کي حڪومت پاران اقتصادي ۽ عوامي ڀلائي جي ڏس ۾ ڪيل قدمن کان آگاهه ڪيو، صدر حڪومت جي معاشي پاليسين کي ساراهيندي چيو ته ان پاليسين سبب قومي معيشت مضبوط ٿي آهي ۽ ان جا اثر عام ماڻهو تائين پهچي رهيا آهن، صدر ۽ وزير اعظم پاڪ چين اقتصادي راهداري جي تعمير جي رفتار تي اطمينان جو اظهار ڪندي چيو ته اهو منصوبو نه صرف پاڪستان پر سڄي خطي لاءِ فائديمند ثابت ٿيندو، ٻنهي اڳواڻن اهو عزم به ڪيو ته پاڪ چين اقتصادي راهداري جي عظيم منصوبي سان سمورا صوبن ۽ خطي کي هڪجهڙا فائدا حاصل ٿيندا.

 

پاڪستان جي پرڏيهي پاليسي وزير نه هئڻ سبب مونجهارن جو شڪار آهي: خورشيد شاهه

اسلام آباد (اين اين آءِ) مخالف ڌر جي اڳواڻ سيد خورشيد شاهه چيو آهي ته ڊونلڊ ٽرمپ جي ڪاميابي سان دنيا ۾ وڏي تبديلي ايندي، راءِ ايجنڊ طور تي پڪڙيل تل ڀوشن حاضر سروس ڀارتي فوجي آفيسر هو، مستقل پرڏيهي وزير نه هجڻ سبب اسان ڀارت جو ڀيانڪ چهرو دنيا کي نه ڏيکاري سگهياسين جيڪا پرڏيهي پاليسي جي وڏي ناڪامي آهي، تحريڪ انصاف جو قانون انصاف ڪميٽي ۾ نه اچڻ، حيرت جي ڳالهه آهي، خبر ناهي ته ڪهڙي راند کيڏي رهي آهي، عمران خان جو پارلياماني تجربو ناهي ۽ نه ئي سياست جو ان لاءِ هو هن وقت تائين پارليامان جي اهميت کي نه سمجهي سگهيو آهي، سيد خورشيد شاهه پارليامينٽ هائوس ۾ صحافين سان ڳالهائيندي چيو ته آمريڪي صدارتي چونڊن ۾ ڊونلڊ ٽرمپ جي ڪاميابي سان سڄي دنيا ۾ وڏي تبديلي ايندي، پاڪستان سميت سڄي دنيا کي پنهنجي پرڏيهي پاليسين تي نظرثاني ڪرڻي پوندي، هن چيو ته صدارتي چونڊن جي ان تبديلي جو اثر اندروني طور تي آمريڪا ۾ به ٿيندو ۽ سڄي دنيا متاثر ٿيندي.

 

بلاول جون ڊونلڊ ٽرمپ کي مبارڪون، هيلري ڪلنٽن ڏاڍي بهادري سان مقابلو ڪيو: پ پ چيئرمين

ڪراچي(م.ڊ) پاڪستان پيپلز پارٽي جي سربراهه بلاول ڀٽو زرداري آمريڪا جي نئين چونڊيل صدر ڊونلڊ ٽرمپ کي مبارڪ ڏئي ڇڏي آهي. سماجي رابطن واري ويب سائيٽ ٽوئيٽر تي پنهنجي پيغام ۾ بلاول ڀٽو زرداري چيو ته منهنجو نالو بلاول آهي، آئون مسلمان ۽ پاڪستاني شهري آهيان.  هن وڌيڪ چيو ته هيلري ڪلنٽن ڏاڍي بهادري سان مقابلو ڪيو ۽ آئون اميد ڪريان ٿو ته هي شڪست اوهان کي وڌيڪ مضبوط ڪندي.

 

پاڪستان جي مستقبل کي بهتر بڻائڻ لاءِ مضبوط ڪوششن جي ضرورت آهي: مريم اورنگزيب

اسلام آباد  (اين اين آءِ) سڌ سماءَ جي مملڪتي وزير مريم اورنگزيب چيو آهي ته پاڪستان جي مستقبل کي بهتر بڻائڻ لاءِ وڌيڪ ڪوششن جي ضرورت آهي، هوءَ اربع تي سڌ سماءَ جي وزارت جي ايڪسٽرنل پبلسٽي ونگ جي اعليٰ سطحي اجلاس جي صدارت ڪري رهي هئي، هن چيو ته پاڪستان واپار جي شعبي ۾ دنيا جي 10 بهترين ملڪن ۾ شامل آهي ۽ اقتصادي بهتري کي ڪم آڻيندي دنيا ۾ ان پيغام کي اجاگر ڪرڻ گهرجي ته پاڪستان سيڙپڪاري لاءِ هڪ بهترين ملڪ آهي، مملڪتي وزير ايڪسٽرنل پبلسٽي ونگ جي آفيسرن کي چيو ته اهي پاڪستان ۽ ان جي عوام بابت غلط فهميون ختم ڪرڻ لاءِ پرڏيهي ميڊيا سان ويجها رابطا رکن، حڪومت عام راءِ جي ڊوڙ ۾ ميڊيا جي اهميت کان آگاهه آهي ۽ ان لاءِ پرڏيهي ملڪ پريس آفيسرن مان اميد آهي ته هو ملڪ جي مفاد کي نظر ۾ رکندي عالمي اهميت جي مختلف اشوز تي پاڪستان جي موقف کي واضح طور اجاگر ڪندا، هن چيو ته حڪومت تمام سٺا ڪم ڪيا آهن ۽ حڪومت جي انهن ڪاميابين کي واضح ڪرڻ گهرجي، هن چيو ته جڏهن ن ليگ 2013 ۾ اقتدار ۾ آئي ته پاڪستان کي بحران گهڻا هئا، جڏهن ته 3 سالن کانپوءِ پاڪستان جي حالت اڳ کان بهتر آهي، دهشتگردي جي واقعن ۾ 85 سيڪڙو گهٽتائي ٿي آهي جيڪا هڪ وڏي ڪاميابي آهي، معيشت بحال ٿي آهي، غير ملڪي ناڻي جا ذخيرا پهريون ڀيرو تاريخ جي بلندين تي پهتا آهن. هن چيو ته پاڪستان دهشتگردي خلاف جنگ ۾ عظيم قربانيون ڏنيون آهن جنهن کي بين الاقوامي برادري کي تسليم ڪرڻو پوندو، پاڪ چائنا اقتصادي راهداري موجوده حڪومت جو اهم سنگ ميل آهي جنهن سان نه صرف پاڪستان پر سڄي خطي کي فائدو ٿيندو.

 

وفاقي حڪومت جو اسٽيل ملز کي ليز تي ڏيڻ جو فيصلو

ڪراچي/اسلام آباد(م.ڊ) وفاقي حڪومت اسٽيل ملز کي ليز تي ڏيڻ جو فيصلو ڪري ورتو آهي. ان سلسلي ۾ نجڪاري ڪميشن جي چيئرمين ۽ مملڪتي وزير محمد زبير چيو آهي ته اسٽيل ملز بند پيل آهي، سنڌ سرڪار به دلچسپي ناهي ڏيکاري. هن چيو ته اسٽيل ملز جي خريداري ۾ ڪير به دلچسپي نه پيو ڏيکاري. ان ڪري حڪومت ملز کي ليز تي ڏيڻ جو فيصلو ڪيو آهي. محمد زبير وڌيڪ ٻڌايو ته اسٽيل ملز کي ٻن ٽن هفتن اندر ليز تي ڏنو ويندو.

 

قرض وٺندڙن ۽ سمورن چورن جو احتساب ٿيڻ گهرجي، ڪرپٽ ماڻهو جا هٿ ٻڌل ڏسڻ چاهيون ٿا: سراج الحق

لاهور (اين اين آءِ) جماعت اسلامي جي امير سراج الحق ڊونلڊ ٽرمپ جي ڪاميابي تي تبصرو ڪندي چيو آهي ته آمريڪا ۽ ان جي عوام کي نئون 45 هون صدر مبارڪ هجي، اسان اميد رکون ٿا ڊونلڊ ٽرمپ اليڪشن کٽڻ کانپوءِ پنهنجي قومي ۽ بين الاقوامي ذميوارين سبب سوچ ۾ تبديلي آڻيندو ۽ هڪ ذميوار آمريڪي صدر هجڻ جو ثبوت ڏيندو، هن چونڊ مهم ٽين دنيا خاص طور تي مسلمانن جي باري ۾ جن خيالن جو اظهار ڪيو ۽ صدر بڻجڻ کانپوءِ جيڪو ارادو ڪيو ان جي پيش نظر اسلامي ملڪن ۾ اتحاد يڪجهتي ذريعي اسلام ۽ مسلمانن جو تحفظ ڪري سگهجي ٿو، جيڪڏهن مسلم حڪومتون ۽ عوام پنهنجي دارومدار تي ۽ گڏيل اتحاد جي حڪمت عملي نه اختيار ڪئي ته اسان جون آزمائشون پهريان کان وڌي وينديون.