تازيون خبرون

Daily Archives: November 8, 2016

حسن نواز کي پيش ٿيڻ جو حڪم، عدالت کي مطمئن نه ڪرڻ تائين ڪلين چٽ نه ملندي: چيف جسٽس

اسلام آباد (بيورو) سپريم ڪورٽ پاناما ليڪس جاچ ڪميشن ڪيس ۾ ڌُرين کي الزامن جي حوالي سان دستاويز جمع ڪرائڻ لاءِ 15 نومبر تائين جي مهلت ڏيندي ٻُڌڻي ملتوي ڪري ڇڏي، سپريم ڪورٽ ۾ پاناما ليڪس ڪيس بابت چيف جسٽس انور ظهير جمالي جي سربراهي ۾ ٻڌڻي ٿي، جنهن دوران شريف فيملي جي وڪيل سلمان اسلم بٽ وزير اعظم نواز شريف جي ٻارن مريم نواز، حسن ۽ حسين نواز جا جواب داخل ڪرايا. مريم نواز پاران داخل ڪرايل جواب ۾ چيو ويو ته هو 2009ع کان پهرين پرڏيهه ۾ هئي، 2009ع کانپوءِ هو پنهنجو ٽيڪس باقاعدگي سان ادا ڪري رهي آهي. جڏهن ته حسن نواز ۽ حسين نواز پاران داخل جواب ۾ چيو ويو ته اسان ٻئي ڀائر ڪيترن ئي سالن کان پرڏيهه ۾ آهيون، ٻئي ڄڻا بالغ آهن ۽ پنهنجو ڪاروبار ڪري رهيا آهن، ٻنهي وٽ ڪو به سرڪاري عهدو نه آهي، وزير اعظم نواز شريف جو سندن ڪاروبار سان ڪو به واسطو نه آهي. ان موقعي تي عدالت ريمارڪس ڏيندي چيو ته هي تمام سادو ڪيس آهي، جيستائين عدالت کي مطمئن نه ڪيو ويندو تيستائين ڪلين چٽ نه ڏني ويندي، حسين نواز عدالت ۾ پيش ٿي مطمئن ڪري، ڪمپنين جي ملڪيت جو اعتراف ڪرڻ کانپوءِ عدالت کي مطمئن ڪرڻ مالڪن جو ڪم آهي. چيف جسٽس ريمارڪس ڏنا ته دستاويز ڪميشن آڏو پيش ڪيا وڃن اُتي ڪير به مهلت نٿو گهري سگهي، ان تي شريف خاندان جي وڪيل چيو ته اسان دستاويز جمع ڪرائي ڇڏينداسين، عدالت ڪميشن ٺاهي، چيف جسٽس ريمارڪس ڏنا ته ڪميشن جو اعلان سڀني معاملن جو جائزو وٺڻ کانپوءِ ڪيو ويندو،  جنهن کانپوءِ عدالت ڌُرين کي الزامن بابت دستاويز جمع ڪرائڻ لاءِ 15 نومبر تائين جي مهلت ڏيندي ٻڌڻي ملتوي ڪري ڇڏي. ٻئي طرف  سپريم ڪورٽ آف پاڪستان ليگي اڳواڻ حنيف عباسي جي درخواست تي تحريڪ انصاف جي سربراهه عمران خان ۽ پي ٽي آءِ رهنما جهانگرين ترين کان 15 نومبر تائين جواب طلب ڪري ورتو آهي. سومر تي سپريم ڪورٽ ۾ حنيف عباسي جي درخواست جي سماعت ٿي. ان موقعي تي ليگي اڳواڻ جو موقف اختيار ڪيو ته عمران خان ۽ جهانگير ترين جي به آف شور ڪمپنيون آهن هن چيو ته عمران خان ۽ جهانگير ترين پنهنجن گوشوارن ۾ اهي ڪمپينيون لڪايون جڏهن ته پي ٽي آءِ جي سربراهه 6 ڪروڙ رپين جي ماليت جو فليٽ جي خريداري کي ظاهر نه ڪيو نجي ٽي وي مطابق چيف جسٽس چيو ته هي فيصلو ٻي ڌر جو ٻڌي پوءِ ڪنداسين. حنيف عباسي جي وڪيل اڪرم شيخ چيو آهي ته عمران خان، جهانگير ترين تي جرح ڪرڻ چاهيان ٿو. عمران خان پنهنجي پٺي تان به ڪپڙو لاهي ڏيکاري عمران خان جي آف شور ڪمپني آهي تحريڪ انصاف فارين فنڊ واري پارٽي آهي. چيف جسٽس چيو ته اسان نوٽيس جاري ڪيا آهن وڪيل چيو ته سڀني جو برابر احتساب ٿيڻ گهرجي 15 نومبر تي منهنجي درخواست لارجر بئنچ جي اڳيان ٻڌي وڃي عدالت عمران خان ۽ جهانگير ترين کي نوٽيس ڪندي ٻڌڻي 15 نومبر تائين روڪي ڇڏي.

 

دهشتگردي کي پاڙان پٽيو ويندو،گرفتار جوابدار هاءِ پروفائل ڪاررواين ۾ ملوث آهن: وڏو وزير

ڪراچي (م.ڊ/اين اين آءِ)قانون لاڳو ڪندڙ ادارن ڪراچي ۾ امجد صابري قتل ڪيس، ناظم آباد مجلس حملي، ملٽري پوليس اهلڪارن جي قتل ڪيس سميت چئن هاءِ پروفائل ڪيس حل ڪرڻ جي دعويٰ ڪئي آهي. سي ٽي ڊي پوليس موجب ڪراچي جي علائقي ناظم آباد ۾ هفتو کن اڳ مجلس تي ٿيل حملي ۾ ملوث جوابدار گرفتار ڪيا آهن. گرفتار جوابدارن وٽان وڏي انگ ۾ هٿيار ۽ بارود هٿ آيو آهي. جڏهن ته ناليواري قوال امجد فريد صابري جي قتل ڪيس ۾ گهربل جوابدار به گرفتار ڪيا ويا آهن.  هوڏانهن پوليس اهلڪارن ۽ ملٽري پوليس جي اهلڪارن جي قتل ڪيس ۾ ملوث جوابدار پڻ گرفتار ڪيا ويا آهن. ٻئي طرف سنڌ جي وڏي وزير سيد مراد علي شاهه چيو آهي ته شهر جون حالتون خراب ٿيڻ تي ڪجهه گرفتاريون ڪيون آهن، جوابدار هاءِ پروفائل ڪيسن ۾ ملوث آهن. سي پي او آفيس ۾ پريس ڪانفرنس ڪندي سيد مراد علي شاهه چيو ته لياقت آباد مان ٻن ڏوهارين اسحاق عرف بوبي ۽ عاصم عرف ڪيپري کي گرفتار ڪيو ويو، جن جي قبضي مان وڏي مقدار ۾ هٿيار هٿ آيا آهن. جوابدارن ناظم آباد ۾ مجلس عزا تي به حملو ڪيو، ملٽري پوليس جي ٻن اهلڪارن، اورنگي ۾ 7 پوليس اهلڪارن، اتحاد ٽائون ۾ چئن رينجرز اهلڪارن جي قتل ۾ به ساڳيا جوابدار ملوث آهي، جڏهن ته امجد صابري کي به ساڳي ئي گينگ قتل ڪيو ۽ عبدالوحيد ايڊووڪيٽ جي قتل ۾ ساڳيا جوابدار ملوث آهن. هن چيو ته گرفتار گينگ 9 هاءِ پروفائل ڪيسن سميت 28 وارداتن ۾ ملوث هئي، جن ۾ استعمال ٿيل هٿيار سمورين ڪاررواين ۾ استعمال ڪيل هٿيارن سان ميچ ٿيا آهن. سيد مراد علي شاهه چيو ته دهشتگردن جو واسطو لشڪر جهنگوي نعيم بخاري گروپ سان آهي. اسان کي جتي شڪ آهي، اتي گرفتاريون ڪري رهيا آهيون، بي گناهه ماڻهن کي ڇڏي ڏيندا آهيون. هن چيو ته اسان پنهنجي اڳواڻ بينظير ڀٽو کي دهشتگردي جي ڪري وڃايو، رڳو ڪنهن خاص طبقي جي خلاف ڪارروايون نه پيا ڪيون. هن چيو ته فيصل رضا عابدي وٽان بنا لائسنس وارا هٿيار هٿ آيا.

 

صوبن ۾ ويڇن جو ذميوار نواز شريف قرار، پ پ وزير اعظم جي استعيفيٰ جو مطالبو ڪري ڇڏيو

ڪراچي (اين اين آءِ) سنڌ جي سڌ سماءَ بابت صلاحڪار مولابخش چانڊيو چيو آهي ته مسلم ليگ (ن) جڏهن به حڪومت ۾ آئي آهي ته صوبن ۾ نفرتون وڌي وينديون آهن صوبن کي وفاق سان ويڙهائڻ نواز شريف سيکاريو آهي وفاقي حڪومت سي پيڪ منصوبي کي هڪ صوبي تائين محدود نه ڪري. ان جا منفي اثر پوندا. ڪراچي ۾ بدامني جي صورتحال برداشت نه ڪئي ويندي محرم پرامن طور تي گذرڻ کانپوءِ شهر جون حالتون خراب ڪرڻ جي سازش ڪئي پئي وڃي ضياءُ الحق جيڪو ٻج پوکيو هيو ان جا وڻ وڏا ٿي چڪا آهن. اهو تاثر نه ڏنو وڃي ڪنهن جي خلاف هڪ طرفي ڪارروائي ٿي رهي آهي سنڌ جو وڏو وزير سمورن کاتن جي ڊپارٽمينٽ ڪميٽين کي فوري طورملازمن کي گريڊ ڏيڻ جي هدايت ڪئي آهي. هن سومر تي سنڌ ڪابينا جي اجلاس کانپوءِ نيو سنڌ سيڪريٽريٽ ۾ پريس ڪانفرنس کي خطاب ڪري رهيو هو. مولا بخش چانڊيو چيو ته وڏو وزير سيد مراد علي شاهه ڪراچي ۾ امن جي صورتحال جو نوٽيس ورتو آهي وڏي وزير واضح ڪيو آهي ته بدامني جي صورتحال برداشت نه ڪئي ويندي. گڏيل طور تي ڪراچي امن امان جي صورتحال بهتر آهي. فرقيواراڻن جهيڙن کي ختم ڪيو ويندو. سنڌ جي وڏي وزير آفيسرن کي 10 ڏينهن جي مهلت ڏني آهي ته جيئن خالي جاين تي ڀرتيون ڪيون وڃن. هن چيو ته سي پيڪ منصوبي کي تڪراري نه بڻايو وڃي وفاقي حڪومت منصوبي کي هڪ صوبي تائين محدود نه ڪري جنهن جا خراب اثر پوندا.  ٻئي طرف پيپلز پارٽيءَ جي اڳواڻ تاج حيدر پريس ڪانفرنس ڪندي چيو آهي ته يوسف رضا گيلانيءَ به استعيفيٰ ڏني هئي، نواز شريف به استعيفيٰ ڏئي، وزيراعظم عوام کي چوي ٿو ته ٽيڪس ڏيو پر پاڻ نه ٿو ڏئي، گڏيل مخالف ڌر جيڪو بل پيش ڪيو آهي ان کي منظور ڪيو وڃي، پاناما ليڪس هڪ سنجيده معاملو آهي ۽ هڪ وڏي رقم ملڪ کان ٻاهر وئي آهي، تاج حيدر جو چوڻ هو ته يوسف رضا گيلانيءَ عدلاتي فيصلي کي مڃيو ۽ اقتدار ٻئي وزيراعظم کي منتقل ڪيو، ملڪ هين وقت انارڪيءَ طرف وڌي رهيو آهي، عدالت جي فيصلي باوجود نواز ليگ جي حڪومت شهرن کي بند ڪيو، اسان بند ڪمري تائين ڳالهه نه ڪنداسين اسان احتجاج ڪنداسين، پاڪستان جي ٻنهي ايوانن ۾ پاناما بل تي احتجاج ڪنداسين.

 

پي ٽي آءِ وٽ ڪي ثبوت نه آهن، حقيقتون ٽوڙي مروڙِي پيش ڪيون ويون: ن ليگ

اسلام آباد (م.ڊ) ن ليگ اڳواڻ دانيال عزيز ۽ محمد زبير اسلام آباد ۾ پريس ڪانفرنس ڪندي چيو آهي ته ڪنٽينر تي ويهي طوطن جيان ڪهاڻيون ٻڌائيندڙن جا اڄ شرم کان ڪنڌ جھڪيل آهن، ٽاڪ شوز ۾ ڪاغذ گھمائي ڦيرائي 24 ملڪيتون ڏيکاريون ويون، پي ٽي آءِ وارا ٻڌائين ته  اڄ اهي ثبوت ڪيڏانهن ويا، عمران خان، شيخ رشيد ۽ اعتزاز احسن سان گڏ ويهي ڪاغذ لهرائيندو هو ايندڙ اڱاري تائين سڀ شاهديون پيش ڪري ڇڏينداسين، ڪجھه پروگرامن جا ڪجھه حصا ڀڃي پيش ڪيا ويا، ايئن ان ڪري ڪيو ويو جيئن هٿ ٺوڪي ڪهاڻي ٺاهي سگھجي، چيو ويندو آهي ته وزيراعظم جي اولاد جي بيانن ۾ تضاد آهي، عمران خان ڪنٽينر تي ويهي چوندو هو ته کيس ملندڙ ٽرافي هن وزيراعظم کي ڏئي ڇڏي آهي، پي ٽي آءِ جا وڪيل چئي رهيا آهن ته وٽن ڪو ثبوت نه آهي، اڄ به پي ٽي آءِ جي وڪيل ثبوت نه ڏنا، وزيراعظم جي ٻارن بابت عدالت ۾ ڪاغذ جمع ڪرائي ڇڏيا آهن، اسان چاهيون ٿا ته شاهديون ڏيڻ جو موقعو ملي جيئن کير جو کير ۽ پاڻيءَ جو پاڻي ئي. دانيال عزيز چيو ته استعيفائن کان خبر ناهي انهن کي ڪهڙو لڳاءُ آهي، ان کان اڳ به اسان 35 پنچرن واري ڳالهه ٻڌي آهي. عمران خان، جهانگير ترين ۽ ٻين وٽ به آف شور ڪمپنيون آهن.

 

مريم نواز ٽيڪس ڏيندي آهي، وزير اعظم پاناما ڪيس مان ڪلين چٽ کڻي نڪرندو: مريم اورنگزيب

اسلام آباد (اين اين آءِ) مملڪتي سڌسماءَ واري وزير چيو آهي ته هاڻي الزامن جو وقت ختم ۽ ثبوت ڏيڻ جو وقت شروع ٿي ويو آهي ڪوڙ جي سياست ڪندڙ پهريان ثبوت نه فراهم ڪري سگهيا آهن ۽ نه ئي ڪري سگهندا ڪوڙن الزام هڻندڙن کي عدالت ۾ شرمسار ٿيڻو پوندو سپريم ڪورٽ جي ٻاهران ميڊيا سان ڳالهائيندي سڌسماءُ واري وزير مريم اورنگزيب چيو ته عمران خان جي وڪيل عدالت کي ٻڌايو ته هو هن وقت واسطيدار ثبوت نه آهي دستاويز آهن جيڪي 15 نومبر کان اڳ جمع ڪرايا ويندا هن چيو ته هاڻي الزامن جو دور ختم ٿي ويو. هن چيو ته وزيراعظم پاڻ کي احتساب لاءِ پيش ڪري چڪو آهي. ۽ چئي چڪو آهي ته معاملي جي شفاف جاچ ٿئي مريم نواز باقاعدگي سان ٽيڪس ڏيندي آهي اهي ماڻهو جنهن جي سياست ڪوڙ تي ٻڌل آهي ۽ اهي عدالت ۽ جاچ ڪميشن کان ڀڄي رهيا هئا انهن کي خبر هئڻ گهرجي ته ڪنٽينر ۽ عدالتن ۾ وڏو فرق هوندو آهي هي ڪنٽينر نه آهي جڏهن چاهي چڙهي ڪوڙ ڳالهائڻ شروع ڪيو وڃي. عدالتن ڌمڪين تي نه پر ثبوتن جي بنيادن تي فيصلو ڏيندي آهي ۽ پي ٽي آءِ هميشه ثبوت آڻڻ ۾ ناڪام رهي آهي.

 

آرمي چيف جو خاريان ۾ جاري فوجي مشڪن جو جائزو، جوانن جي بلند حوصلن جي ساراهه

راولپنڊي (اين اين آءِ) پاڪ فوج جي اڳواڻ جنرل راحيل شريف خاريان ۽ گجراوالا ويجهو جاري فوجي مشقن جو جائزو ورتو ان موقعي تي آرمي چيف مشقن ۾ حصو وٺندڙ جوانن جي تربيت پيشيورانه صلاحيت ۽ بلند حوصلي کي به ساراهيو مشقن ۾ سينٽرل ۽ سدرن ڪمان جي فوجي دستن حصو ورتو سومر تي پاڪ فوج جي آءِ ايس پي آر جي جاري بيان مطابق راحيل شريف خاريان ۽ گجرانوالا ويجهو جاري مشن جو جائزو ورتو انهن مشقن ۾ سينٽرل ۽ سدرن ڪمان جي فوجي دستن حصو ورتو. آرمي چيف کي ان موقعي تي هاءِ ٽيڪنالوجي سان مرچوئل وار روم جي باري ۾ به آگاهه ڪيو ويو جنهن کي هن جنگي مشقن دوران استعمال ڪيو پيو وڃي جنگي مشن ۾ انفينتري ۽ ميڪنائيزڊ ڪالمز ۽ پنجاب رينجرز جي دستن گڏجي مختلف حربي آپريشنز ڪيا آرمي چيف مشقن ۾ حصو وٺندڙن جوانن جي تربيت ۽ پيشاوراڻي صلاحيت ۽ بلند حوصلي کي به ساراهيو.

 

ڀارتي فورسز جي ايل او سي تي بنا سبب فائرنگ، پوليس اهلڪار سوڌو 2 ڄڻا شهيد، 9 زخمي

مظفرآباد (اين اين آءِ) لائين آف ڪنٽرول تي ڀارتي فوج جي اڳرائي ۽ فائرنگ جي نتيجي ۾ 2 پاڪستاني شهري شهيد ۽ 9 زخمي ٿي پيا پاڪ فوج منهن ٽوڙ جواب ڏنو نڪيال جي اسسٽنٽ ڪمشنر سردار ذيشان نثار ٻڌايو ته ڀارتي  فورسز پاران فائر ڪيل مارٽر شيل جي نتيجي ۾ هڪ 30 ورهين جو پوليس ڪانسٽيبل امتياز موقعي تي ئي  شهيد ٿي ويو علائقي واسين موجب تازي فائرنگ جي نتيجي ۾ ٻه شهري فوت ٿيا شهرين موجب ڀارتي فورسز مسلسل شهري آبادي کي نشانو بڻائي رهي آهي ڀارتي فورسز پاران پونڇ بٽل مدارپور ۽ دراشيرخان ۾ وڏن هٿيارن جو آزادانو استعمال ڪيو ويو جنهن۾ 6 ڄڻا زخمي 25 گهر ۽ 3 گاڏيون تباهه ٿي ويون.

 

سپريم ڪورٽ پاناما ڪيس کي جلد حل ڪرڻ چاهي ٿي، جنهن تي خوشي آهي: عمران خان

اسلام آباد (بيورو) پاڪستان تحريڪ انصاف جي سربراهه عمران خان چيو آهي ته سپريم ڪورٽ پاناما ليڪس ڪيس کي جلد پُڄاڻي تي پهچائڻ چاهي ٿي، جنهن تي خوشي آهي، سپريم ڪورٽ ايندڙ ٻُڌڻي تي تفصيلي جواب ۽ دستاويز طلب ڪري ورتا آهن. پاناما ليڪس ڪيس جي ٻُڌڻي کانپوءِ ميڊيا سان ڳالهائيندي عمران خان جو چوڻ هو ته عدالت چيو آهي ته پاناما ڪيس جو فيصلو ڪميشن ٺاهي بغير عدالت به ڏئي سگهي ٿي، ڪيس جو فيصلو ڏيڻ ۾ وڌيڪ دير نه ٿيندي، عمران خان چيو ته عدالت جو ڪيس جلد حل ڪرڻ وارو عمل خوشي جوڳو آهي. نئب هٿ مٿي ڪري ويٺي آهي جڏهن ته اداري وٽ اختيار به آهن، هن وڌيڪ چيو ته مغل اعظم جي ٻارن جي وڪيل چيو آهي ته لنڊن ۾ 2006ع ۾ فليٽ خريد ڪيا ويا، جڏهن ته چوڌري نثار، صديق الفاروق، خواجا آصف ۽ ڪلثوم نواز مختلف موقعن تي چيو آهي ته فليٽ 90 جي دور ۾ ورتا ويا.

 

سپريم ڪورٽ کي ڪميشن نه ٺاهڻ گهرجي: اعتزاز احسن

اسلام آباد (بيورو) پاڪستان پيپلز پارٽي جي اڳواڻ سينيٽر اعتزاز احسن چيو آهي ته سپريم ڪورٽ مخالف ڌُر جي پارٽين جي بل جي روشني ۾ فيصلو ڪري، پنهنجي هڪ بيان ۾ سينيٽر اعتزاز احسن جو چوڻ هو ته پاناما ليڪس معاملي تي سپريم ڪورٽ کي ڪميشن نه ٺاهڻ گهرجي، مخالف ڌُر جي پارٽين جي بل جي روشني ۾ فيصلو ڪيو وڃي، مخالف ڌُر جون پارٽيون پاناما بل تي راضي ۽ گڏ آهن.

 

حڪمرانن جون چوريون پڪڙيون ويون، هاڻي لفظ به انهن جو ساٿ نه پيا ڏين: سراج الحق

لاهور (اين اين آءِ) جماعت اسلامي جي امير سينيٽر سراج الحق چيو آهي ته حڪمرانن جي چوري پڪڙي وئي آهي هاڻي ته انهن کي لفظ به ساٿ نه ڏئي رهيا آهن حڪومت سپريم ڪورٽ ۾ حسب معمول مڪمل ڪاغذ پيش نه ڪري ڪيس کي ٽاري ڇڏيو، حڪومت کي عدالتي حڪمن موجب سمورا ڪاغذ عدالت ۾ پيش ڪرڻ گهرجن جماعت اسلامي جو موقف چٽو آهي ته حساب سڀني جو ٿئي اهو ئي عوام جو نعرو آهي. هڪ طبقو ان آواز کي دٻائڻ جي ڪوشش ڪري رهيو آهي 8 مهينا گذرڻ باوجود ڪنهن به اداري پاناما پيپرز تي ڪو به ايڪشن نه ورتو. سينيٽر سراج الحق ميڊيا سان ڳالهائيندي چيو ته حڪومت سپريم ڪورٽ ۾ حسب معمول مڪمل ڪاغذ پيش نه ڪري ڪيس کي ٽاري ڇڏيو آهي.  هن چيو ته عوام ڪرپشن جي حوالي سان قانون جي جنگ جي ڪاميابي چاهي ٿو ۽ ڪرپشن ۽ ڪرپٽ ماڻهن کي ڪيفر ڪردار تائين پهچائڻ چاهي ٿو. ڪرپشن سبب پاڪستان سڄي دنيا ۾ بدنام ٿي رهيو آهي هن چي وته حڪومت قوم جا 8 مهينا ضايع ڪيا آهن هن چيو ته نيب جو ڪم صرف ڪرپشن جي حوالي سان ڄاڻ ڏيڻ نه پر ايڪشن وٺڻ آهي.