تازيون خبرون

Daily Archives: November 7, 2016

ڪراچي: هٿياربندن جي فائرنگ ۾ 2 ڄڻا قتل، 3 زخمي، مرزا يوسف ۽ تاج حنفي سميت 50 کان وڌيڪ گرفتار

ڪراچي (اين اين آءِ) ڪراچي ۾ دهشتگردي جي تازي لهر کانپوءِ پوليس ۽ قانون لاڳو ڪندڙ ادارن پاران سرچ آپريشن ۽ گرفتارين جو سلسلو جاري آهي، شهر جي مختلف علائقن ۾ سرچ آپريشن دوران اهل سنت والجماعت جي جنرل سيڪريٽري مرزا يوسف حسين سميت 50 کان وڌيڪ ماڻهن کي حراست ۾ ورتو ويو، سرچ آپريشن دوران هٿيار به هٿ ڪيا ويا آهن، تفصيل موجب پوليس ۽ رينجرز آچر جي صبح ناظم آباد ۾ رضويا ۽ نانگن چورنگي ويجهو مسجد صديق اڪبر هاسٽل ۾ سرچ آپريشن ڪيو، آپريشن دوران 3 کي حراست ۾ ورتو ويو جنهن کانپوءِ شهر ۾ سرچ آپريشن دوران گرفتار ٿيل ماڻهن جو انگ 50 کان وڌيڪ ٿي ويو آهي، مختلف علائقن ۾ گذريل رات فائرنگ سان 2 ڄڻا فوت ۽ 3 زخمي ٿيا هئا، پوليس موجب سچل جي علائقي ۾ اڻڄاتل جوابدارن مجلس عزا کان واپس ٿيندڙ تي فائرنگ ڪئي جنهن سان ڪامران فوت، جڏهن ته انور قاظمي سخت زخمي ٿي پيو، اورنگي ٽائون ۾ فائرنگ سان اسرار نالي شخص مارجي ويو، ايس ايس پي ويسٽ موجب فائرنگ جو واقعو ذاتي دشمني سبب ٻڌايو ويو آهي، اورنگي ۾ به فائرنگ سان 3 ڄڻا زخمي ٿيا، پوليس موجب ٽنهي جي حالت خطري کان ٻاهر آهي، نانگن چورنگي صديق اڪبر ۾ رينجرز سرچ آپريشن دوران اهل سنت والجماعت جي جنرل سيڪريٽري تاج حنفي کي گرفتار ڪري هٿيار هٿ ڪيا آهن، رينجرز موجب سرچ آپريشن دوران هٿيار ۽ نفرت وارو مواد به هٿ ڪيو ويو آهي، جڏهن ته اهل سنت والجماعت جي صدر ربنواز حنفي صديق اڪبر مولانا شعيب جي گرفتاري لاءِ ڇاپا هنيا پيا وڃن، مدينا ڪالوني ۽ نيو ڪراچي جي علائقن مان 2 جوابدارن کي گرفتار ڪري انهن وٽان هٿيار هٿ ڪيا ويا آهن، ناظم آباد ۾ قانون لاڳو ڪندڙ اداري ڪارروائي ڪري علامه يوسف حسين کي حراست ۾ وٺي جاچ لاءِ اڻڄاتل هنڌ منتقل ڪيو ويو، خيال رهي ته علامه مرزا يوسف حسين مسجد نور ايمان جو خطيب آهي.  ملڪ ۾ جاري شيعا ٽارگيٽ ڪلنگ، رياستي جبر، اڳوڻي سينيٽر فيصل رضا عابدي، شيعا ايڪشن ڪميٽي جي اڳواڻ مرزا يوسف سميت ملت شيعا جي ٻين ماڻهن جي گرفتارين خلاف مجلس وحدت المسلمين جو سڏ ڪراچي ۽ راولپنڊي سميت ملڪ جي ٻين وڏن شهرن ۾ مظاهرا ڪيا ويا، ان سلسلي ۾ خراسان کان نمائش چورنگي تائين ريلي ڪڍي وئي جنهن جي قيادت مجلس وحدت مسلمين، سني اتحاد ڪونسل، شيعا ايڪشن ڪميٽي جي اڳواڻن ڪئي، ريلي ۾ سوين ڪارڪنن، عورتن ۽ ٻارڙن شرڪت ڪئي، مقرررين خطاب ڪندي چيو ته هن ملڪ لاءِ سڀ کان وڌيڪ قربانيون ملت تشعيت ڏنيون آهن، اسان هميشه آئين ۽ قانون کي بالاتر سمجهيو پنهنجي عمل ۽ ڪردار سان اهو ثابت ڪيو ته اهل تشيع پاڪستان جي ذميوار ۽ محب وطن شهري آهن پر يهودين جي چوڻ تي شيعن کي حڪومت طرفان جنهن جارحاڻي عمل سان منهن ڏيڻو پوي ٿو ان نامناسب ۽ ملڪ کي انتشار طرف وٺي وڃڻ جي طئه ٿيل سازش آهي، اسان جي مختلف شعبن جا ماهر، وڪيل، انجنيئر، ڊآڪٽر ۽ اعليٰ تعليم يافته ماڻهو روز دهشتگردي جي ور چڙهي رهيا آهن، اسان گذريل 3 ڏهاڪن کان لاش کڻي رهيا آهيون پر قاتل اڄ ڏينهن تائين آزاد گهمي رهيا آهن، انهن تي ڪو مضبوط هٿ نٿو وڌو وڃي، ان جي برعڪس اسان جي بي گناهه ماڻهن کي قيدي بڻايو پيو وڃي جيڪو ملڪ دشمن پابندي مڙهيل پاٽين خلاف آواز بلن ڪن ٿا، قانون ۽ انصاف کي آخر ڪيستائين پرڏيهي ڊڪٽيشن جو غلام بڻايو ويندو، هنن چيو ته ڪراچي ۾ هڪ ڏينهن دوران مجلس ۾ 5 ماڻهن کي گوليون هڻي شهيد ڪيو ويو، سنڌ حڪومت کي علم آهي ته ڪهڙي پابندي مڙهيل پارٽي اهڙي طرح جي واقعن جي ذميواري آهي، جڏهن ته ڪنهن ذميوار جي خلاف ڪارروائي نه ڪئي وئي آهي. هن حڪومت پاڪستان کي پنهنجا مطالبا ورجائيندي چيو ته نيشنل ايڪشن پلان جي سمورن نقطن تي فوري طور عمل ڪرايو وڃي پابندي مڙهيل تنظيمن جي سياسي ۽ مذهبي سرگرمين تي مڪمل پابندي هڻي انهن کي گرفتار ڪيو وڃي جيڪي نالا تبديل ڪري پنهنجون سرگرميون جاري رکندا اچن پيا ۽ شيعن کي گرفتار ڪيل بي گناهه ماڻهن کي آزاد ڪيو وڃي ۽ انهن شهرين جا نالا شيڊول فور مان ڪڍيا وڃن جيڪي ڪنهن غير قانوني سرگرمين ۾ ملوث نه آهن.

 

پانامه ليڪس: وزير اعظم جي پٽن کي جواب داخل ڪرائڻ لاءِ ڏنل مهلت ختم، ٻڌڻي اڄ ٿيندي

اسلام آباد (اين اين آءِ) سپريم ڪورٽ ۾ پاناما معاملي جي ٻڌڻي اڄ سومر تي ٿيندي، وزيراعظم نواز شريف جي پٽ حسن نواز ۽ حسين نواز پنهنجا بيان جمع ڪرائيندا، عدالت هڪ رڪني جوڊيشل ڪميشن جو حتمي فيصلو ڪندي، سپريم ڪورٽ ۾ پاناما جي معاملي تي وزيراعظم جي خلاف پي ٽي آءِ، جماعت اسلامي، عوامي مسلم ليگ، جمهوري وطن پارٽي ۽ طارق ايڊووڪيٽ پاران داخل درخواستن تي چيف جسٽس انور ظهير جمالي جي اڳواڻي جسٽس آصف سعيد کوسو، امير هاني مسلم، عظمت سعيد شيخ ۽ اعجاز الحسن تي ٻڌل سپريم ڪورٽ جو 5 رڪني لارجر بينچ اڄ سومر تي ساڍي 9 وڳي ٻڌڻي ڪندو، گذريل ٻڌڻي تي سپريم ڪورٽ وزيراعظم نواز شريف جي پٽن حسن نواز ۽ حسين نواز کي پاناما معاملي تي پنهنجا جواب جمع ڪرائڻ لاءِ سومر تائين مهلت ڏني هئي ۽ واصح ڪيو هو ته قانون موجب جيڪڏهن جواب جمع نه ڪرايو ويو ته الزام تسليم ڪيا ويندا، چيف جسٽس ريمارڪس ۾ چيو هو ته جاچ لاءِ هڪ رڪني جوڊيشل ڪميٽي جوڙي ويندي جيڪا پاناما پيپرز ۾ سامهون ايندڙ انڪشافن جي جاچ ڪندي، پاناما گيٽ ڪميشن کي سپريم ڪورٽ جا اختيار حاصل هوندا.

 

جماعت الحرار ۽ لشڪر جهنگوي کي پابندي مڙهيل تنظيم قرار ڏيڻ جي سفارش

اسلام آباد  (اين اين آءِ) نيڪٽا گهرو وزارت کي جماعت الاحرار ۽ لشڪر جهنگوي العالمي کي پابندي مڙهيل تنطيم قرار ڏيڻ جي سفارش ڪري ڇڏي، نيڪٽا پاران گهرو وزارت کي لکيل خط موجب اٿارٽي پاران جماعت الاحرار ۽ لشڪر جهنگوي کي پابندي مڙهيل تنظيمن جي لسٽ ۾ شامل ڪرڻ جي سفارش ڪئي وڃي ٿي، واضح رهي ته ڪالعدم تحريڪ طالبان پاڪستان کان جدا ٿيڻ کانپوءِ جماعت الاحرار آگسٽ 2014 ۾ اڀري اڳيان آئي هئي، دهشتگرد تنظيم پاڪستان ۾ سسيڪيورٽِي اهلڪارن، سرڪاري تنصيبات، سياستدانن، مذهبي اقليتن ۽ وڪيلن کي ڪيترائي حملا ڪيا، جماعت الاحرار هلندڙ سال 8 آڪٽومبر تي ڪوئيٽا ۾ وڪيلن تي حملي جي ذميواري قبول ڪئي هئي جنهن ۾ 70 ڄڻا فوت ٿي ويا هئا، آگسٽ ۾ آمريڪي پرڏيهي کاتي جماعت الاحرار جو نالو دهشتگردن جي عالمي لسٽ ۾ شامل ڪيو هو.

 

لاگرز ليڊرن عوام کي مايوس ڪيو، ميان صاحب آمر سان ڊيل ڪري ملڪ ڇڏي ويو هو: پ پ

ڪراچي (اين اين آءِ) پاڪستان پيپلز پارٽي سنڌ جي صدر نثار احمد کهڙو چيو آهي ته عوام لاگرز ليڊرن جي رويي مان مايوس ٿي پ پ ۾ شامل ٿي رهيو آهي، وفاق جون پاليسيون ملڪ کي دنيا ۾ اڪيلو ڪري ڇڏيو آهي، پ پ ميڊيا سيل سنڌ ۾ هڪ وڏي ميڙ کي پريس ڪانفرنس کي خطاب ڪندي هن پي ٽي آءِ جي ڪيترن ئي ڪارڪنن جو پ پ ۾ شامل ٿيڻ تي ڀليڪار ڪيو، هن چيو ته سنڌ جي عوام گهوٽڪي جي جلسي ۾ ڀرپور شرڪت ڪري اهو ثابت ڪيو آهي ته اهو بلاول ڀٽو جي قيادت تي يقي رکي ٿو ۽ ان جي قيادت فخر آهي، هن چيو ته لاگرز ليڊرن جي رويي عوام کي مايوس ڪيو آهي، نواز شريف سزا ٻڌي هڪ آمر سان ڊيل ڪري ته مان سياست ۾ 10 سالن تائين نه ايندس ۽ ٻاهر هليو ويو، هن چيو ته اڄ جي نئين ليڊر ڪارڪنن کي پوليس هٿان مار ۽ گرفتار ٿيندي ڏسي گهر مان ٻاهر نڪرڻ بدران پريس ڪانفرنس ڪندو رهيو، هن چيو ته ليڊر اهو هوندو آهي جيڪو عوام لاءِ پنهنجي جان جي پرواهه نه ڪري،  پ پ ۽ ان جي ليڊرن قربانين جا لازوال مثال قائم ڪيا آهن، بلاول ڀٽو اڄ ادارن ۽ جمهوريت کي ڪمزور ڪندڙن کي للڪاري رهيو آهي، پ پ هميشه عوام جو ساٿ ڏنو ۽ ڪڏهن به عوام کي اڪيلو نه ڇڏيو، هن چيو ته وزيراعظم تي اٿيندڙ سوال به سڄي دنيا ۾ پاڪستان کي اڪيلو ڪيو آهي، واضح رهي ته پ پ ۾ شموليت ڪندڙ نعيم شيخ 2013 جي عام چونڊن ۾ پي ٽي آءِ جي ٽڪيٽ تي اين اي 254 مان حصو ورتو هو.

 

آرمي چيف کاريان پهچي ويو، سينٽرل ڪمانڊ جي هلندڙ مشقن جو جائزو وٺندو

کاريان(م.ڊ)  آرمي چيف جنرل راحيل شريف کاريان پهچي ويو آهي، آءِ ايس پي آر جو چوڻ آهي ته آرمي چيف سينٽرل ڪمانڊ جي مشقن جو جائزو پڻ وٺندو، خابرو اداري مطابق مشقن ۾ دشمن جي سازشن ۽ جنگ کي ناڪام بڻائڻ لاءِ تربيتڪئي پئي وڃي، پاڪ فوج جون هي مشقون گوجرنوالا ۽ کاريان ويجهو ٿي رهيون آهن.

 

لائن آف ڪنٽرول تي ڀارتي فوج جي بنا جواز فائرنگ ۽ بمباري، 2 عورتن سميت 4 ڄڻا زخمي

راولپنڊي/ مظفر آباد(اي پي پي)  آزاد ڄمون ۽ ڪشمير ۾ لائن آف ڪنٽرول تي ڀارتي فوج جي بنا جواز فائرنگ ۽ بمباري سبب 2 عورتن سميت 4 ڄڻا زخمي ٿي پيا. اسسٽنٽ ڪمشنر  هجيره محمد شهباز ٻڌايو ته آچر تي صبح جو 7 وڳي ايل او سي تي ڀارتي فوج طرفان بنا جواز فائرنگ ۽ بمباري ڪئي وئي جيڪا ٻنپهرن تائين جاري رهي جنهن جي نتيجي ۾ 4 ڄڻا عبدالمجيد، قادر، ساجده پروين ۽ شميم اختر زخمي ٿي پيا جن کي ڪوٽلي اسپتال منتقل ڪيو ويو. ڀارت پاران لائين آف ڪنٽرول ۽ ورڪنگ بائونڊري تي فائرنگ جو سلسلو آچر تي به جاري رهيو، ڀارتي فورسز لائين آف ڪنٽرول تي ڇتي فائرنگ ڪئي، پاڪ فوج جي جوابي ڪارروائي ۾ ڀارتي هٿيار خاموش ٿي ويا، آءِ ايس پي آر موجب ڀارتي فورسز هڪ ڀيرو ٻيهر ضد جو مظاهرو ڪندي ڪونڇ بٽل سيڪٽر تي ڇتي فائرنگ ڪئي، مدارپور، سحر، گهر مثال ۽ ناتر جي علائقن ۾ فائرنگ ڪئي، ميڊيا رپورٽ موجب ڀارتي فورسز پاران سول آبادي کي نشانو بڻايو ويو جنهن سبب شهري گهرن ۾ بند رهيا، پاڪ فوج پاران جارحيت جو منهن ٽوڙ جواب ڏنو ويو جنهن سبب دشمن جا هٿيار خاموش ٿي ويا، ڀارتي اڳرائي جي نتيجي ۾ هن وقت تائين 10 کان وڌيڪ شهيد ۽ ڪيترائي زخمي ٿي چڪا آهن.

 

پاناماليڪس معاملي تي سپريم ڪورٽ ڪارروائي شروع ڪري ڇڏي آهي، کيس پنهنجو ڪم ڪرڻ ڏنو وڃي: اياز صادق

لاهور (اين اين آءِ) قومي اسيمبلي جي اسپيڪر اياز صادق چيو آهي ته حڪومت ڪوئلي مان بجلي پيدا ڪرڻ جي تعمير هيٺ منصوبن سان ماحولياتي آلودگي کي روڪڻ لاٰءِ قدم کنيا آهن جڏهن ته وڌيڪ پلانٽس نه لڳائڻ جو فيصلو ڪيو ويو آهي، عوام عمران خان جا ارادا ڄاڻي چڪو آهي، پي ٽي آءِ وارا ٻڌائين ته ڪنهن جو اينجنڊا کڻي هلي رهيا آهن، بلاول ، عمر خان کان عمر ۾ ننڍو آهي هو ان کي چاچو نه چوي پيو ڇا چوي، هڪ طرف پاڪستان ۾ دهشتگردي ٿي رهي آهي ٻئي طرف جيڪو ڀارت ڪري رهيو آهي اها به دهشتگردي آهي، پاڪستان لاءِ دهشتگردي اهم مسئلو آهي، پنهنجي چونڊ تڪ جي دوري دوران ميڊيا سان ڳالهائيندي هن چيو ته امن امان حڪومت جي ذميواري هوندي آهي، قلم 144 جي خلاف ورزي تي گرفتاريون ٿيون آهن، پي ٽي آءِ جا سمورا حراست هيٺ ڪارڪنن کي آزاد ڪيو ويو آهي، هن چيو ته اسان اپوزيشن ۾ رهندي اپوزيشن کي ٽارگيٽ ڪندا هئاسين پر اهو سافٽ ٽارگيٽ هوندو هو ۽ اڄ تحريڪ انصاف جو رويو سڀني جي سامهون آهي، هن چيو ته هاڻ اسان جو عمر چاچي ۽ مامي واريون آهن، تهذيب جي دائري ۾ جيڪي ڳالهه ٿئي اها خوبصورت هوندي آهي، اقتصادي راهداري کي ناڪام بڻائڻ جون سازشون ٿي رهيون آهن، پي ٽي آءِ هاڻ اقتصادي راهداري خلاف عدالت ۾ وڃي رهي آهي، اهو حڪومت جو نه پر ملڪ جو منصوبو آهي ان کي سياست جي ور نه چاڙهيو وڃي، اقتصادي راهداري کي ناڪام بڻائڻ جون ڪوششون ڪندڙن کي قوم معاف نه ڪندي، ڀارت لائين آف ڪنٽرول تي جارحيت ڪرڻ سان گڏ والاريل ڪشمير ۾ به دهشتگردي ڪري رهيو آهي، پاڪستان مسئلي کي سڄي دنيا ۾ ڀرپور نموني اجاگر ڪيو آهي، هن ماحولياتي آلودگي ۽ دونهي جي حوالي سان ڳالهائيندي چيو ته پارليامينٽ ان معاملي ۾ پنهنجو ڪردار ادا ڪيو آهي، پاڪستان جي پارليامينٽ دنيا جي واحد پارليامينٽ آهي جيڪا ماحول دوست آهي ۽ ان کي سولر پينل تي منتقل ڪيو ويو آهي جنهن سان ماحولياتي آلودگي ۾ گهٽتائي ٿي آهي.

 

ڪرپشن ڪنهن به سوسائٽي لاءِ وڏو ناسور آهي: احسن اقبال

اسلام آباد (اين اين آءِ) وفاقي وزير احسن اقبال چيو آهي ته پاڪستاني عوام ذهني طور تي ميچيوئر ٿي چڪو آهي، پاڪستان ۾ تبديلي جو فيصلو بيلٽ باڪس ذريعي ٿيڻ گهرجي، سي پيڪ منصوبي سان سمورو خطو فائدو حاصل ڪندو، پاناما پيپر تي سپريم ڪورٽ جيڪو فيصلو ڪندي قبول ڪنداسين، آئينده ڪڏهن به ڪنهن شهر کي لاڪ ڊآئون جي اجازت نه ڏني ويندي، انٽرويو ۾ وفاقي وزير چيو ته پاڪستاني عوام ذهني طور ميچيوئر ٿي چڪو آهي، ۽ اهو چاهي ٿو ته چونڊيل حڪومت پنهنجو مدو پورو ڪري ته جيئن ملڪ اڳتي وڌي سگهي ۽ ان کانپوءِ ٻيهر عوام اهو فيصلو ڪندي ته ڪهڙي حڪومت ڪامياب آهي ۽ ڪهڙي ناڪام آهي، ان ڪري پاڪستان ۾ تبديلي جو فيصلو بيلٽ باڪس ذريعي ٿيڻ گهرجي، هن چيو ته عوام جي سنجيندگي ۽ ذهني ميچيوئرٽي جو اهو نتيجو آهي ته عمران خان 2 ڏينهن تائين رستن تي نڪرڻ جو سڏ ڏيندو رهيو ته هو ملڪ ۾ باهيون ڏئي احتجاج ڪري پر ملڪ ۾ ڪٿي به وڏي پيماني تي ڪو احتجاج سامهون نه آيو جيڪو پاڪستان تحريڪ انصاف جي مقبوليت ۾ گهٽتائي جو چٽو ثبوت آهي، هن چيو ته ملڪ ترقي جي دڳ تي هلي رهيو آهي، ادارا پنهنجي آئيني حدن ۾ رهندي پنهنجو ڪم ڪري رهيا آهن، وزيراعظم نواز شريف 22 اپريل تي پاناما پيپرز جي جاچ لاءِ ڪميشن جوڙڻ لاءِ سپريم ڪورٽ کي خط لکيو هو پر پي ٽي آءِ بنا سبب احتجاج ڪري قوم جا 6 مهينا ضايع ڪيا ۽ هاڻ ٻيهر ان ڪورٽ ۾ ڪيس هلي رهيو آهي جنهن کي حڪومت ڀليڪار ڪيو آهي، عدالت جيڪو فيصلو ڪندي اهو سان کي قبول هوندو.

 

هٿيارن جي لائسنس تان پابندي هٽائڻ تي غور، نوان لائسنس ڊسمبر يا جنوري ۾ شروع ڪيا ويندا: چوڌري نثار

اسلام آباد (اين اين آءِ) گهرو وزارت هٿيارن جي لائسنس جاري ٿيڻ تي لڳل پابندي ختم ڪرڻ تي غور شروع ڪري ڇڏيو آهي جنهن تحت هٿيارن جا لائسنس جو جاري ٿيڻ مربوط سسٽم تحت هوندو، نجي ٽي وي موجب گهرو وزير چوڌري نثار علي خان هٿيارن جي لائسنس جاري ٿيڻ تي لڳل پابندي ختم ڪرڻ تي غور شروع ڪيو آهي، نون لائسنس کي جاري ڊسمبر 2016 يا جنوري 2017 ۾ شروع ڪيو ويندو، جاري ٿيڻ کانپوءِ پهريان پارليامينٽ جا ميمبر هٿياربند فوج جا آفيسر، جج ۽ صحافين کي لائسنس ملندا، ڊاڪٽرن ۽ واپارين کي به هٿيارن جا لائسنس جاري ڪيا ويندا، جڏهن ته تعليمي ادارن سميت مختلف انسٽيٽيوٽ کي به هٿيارن جا لائسنس جاري ڪيا ويندا.

 

فيصل رضا عابدي 19 نومبر تائين جوڊيشل ريمانڊ تي جيل حوالي

ڪراچي (اين اين آءِ) جوڊيشل مئجسٽريٽ ملير اڳوڻي سينيٽر فيصل رضا عابدي کي غير قانوني هٿيار رکڻ جي ڏوهه ۾ 19 نومبر تائين جيل موڪلي ڇڏيو، تفصيل موجب نيو رضيا سوسائٽي ۾ ڇاپي دوران گرفتار فيصل رضا عابدي کي غير قانوني هٿيار رکڻ جي ڏوهه ۾ جوڊيشل مئجسٽريٽ ملير نمبر 6 جي عدالت ۾ پيش ڪيو، جاچ آفيسر عدالت کي ٻڌايو ته فيصل رضا عابدي جي گهر مان سرچ آپريشن دوران 5 قسمن جا هٿيار مليا آهن، انهن جي لائنسنس جي تصديق نه ٿي سگهي آهي، فيصل رضا عابدي جي گهر مان هٿ ٿيل هٿيارن ۾ هڪ ايس ايم جي به شامل آهي جنهن جو لائسنس پيش نه ڪيو ويو، فيصل رضا عابدي جي هٿيارن جا لائسنس وفاقي ۽ صوبائي گهرو وزارت کي تصديق لاءِ موڪليا ويا آهن، جڏهن ته مختلف معاملن ۾ جاچ به جاري آهي، ان ڪري جوابدار جو جسماني ريمانڊ ڏنو وڃي، عدالت فيصل رضا عابدي کي 19 نومبر تائين جوڊيشل ريمانڊ تي جيل موڪلڻ جو حڪم ڏيندي هٿيارن جي لائسنس جي تصديق ۽ غير قانوني هٿيارن بابت رپورٽ طلب ڪئي آهي، فيصل رضا عابدي خلاف هڪ وڌيڪ ڪيس داخل ڪيو ويو آهي.