تازيون خبرون

Daily Archives: November 6, 2016

مونکي خوبصورتي سبب نه پرکيو وڃي: مومنا محسن

لنڊن (شوبز نيوز) ڪو اسٽوڊيو سيزن جي 9 جي گاني آفرين آفرين مان شهرت حاصل ڪندڙ مومنا محسن انڪشاف ڪيو آهي ته ظاهري خوبصورتي سبب ملندڙ توجهه سبب هو ڪجهه وڌيڪ سٺو محسوس نٿي ڪري، بي بي سي اردو مان فيس بڪ تي لائيو چيٽ ڪندي مومنا چيو ته سچ ٻڌايان ته مونکي ڄاڻ نه هئي ته منهنجي مسڪراهٽ ۾ ڪا خاص ڳالهه آهي، شروع ۾ اهو سٺو نه لڳندو هو ته ماڻهو مون کي ان سبب سڃاڻين، هن وڌيڪ چيو ته مان ڪا ماڊل يا اداڪار نه آهيان ۽ نه ئي مان دعويٰ ڪيان ٿي پر اهو سڀ مون کي وڌيڪ سٺو نٿو لڳي، مون کي خبر هئي ته اهو سڀ ائين ٿيندو، اهو ئي سبب هو جو مان ڪيمرا کان پري رهندي هيس، رپورٽ موجب مومنا چيو ته شهرت ان لاءِ ذهني دٻاءُ جو سبب بڻي.

 

اداڪاره شردا ڪپور فلم ۾ سڌارت ملوترا جي ڀيڻ بڻجڻ تي پريشان

ممبئي (شوبز نيوز) بالي ووڊ اداڪاره شردا ڪپور انڊر ورلڊ ڊان دائود ابراهيم جي ڀيڻ حسينا جي زندگي تي ٺهندڙ فلم سڌارت ملوترا جي ڀيڻ ٿيڻ تي پريشان آهي، سرڌا ڪپور دائود ابراهيم حسينا جي زندگي تي ٺهندڙ فلم ۾ مرڪزي ڪردار ادا ڪندي، جڏهن ته فلم ۾ نوجوان اداڪار سڌارت دائود ابراهيم جو ڪردار ادا ڪندو جنهن کانپوءِ ٻنهي اداڪارن جي گڏ ٻي فلم هوندي پر اداڪاره سڌارت تي ڀيڻ بڻجڻ تي پريشان آهي، ڀارتي ميڊيا رپورٽ موجب شردا ڪپور جو چوڻ آهي ته فلم ۾ سڌارت جي ڀيڻ بڻجڻ لاءِ بي تاب آهيان پر ٻنهي جي ڀيڻ ۽ ڀاءُ جا منظر فلمائڻ تي پريشان به آهيان، ڇو ته فلم جي ڪردارن جي مضبوطي لاءِ مون کي اهو وسارڻو پوندو ته سڌارت منهنجو ڀاءُ آهي.

 

شيفلڊ شيلڊ وڪٽوريه ۽ سائوٿ آسٽريليا جي ڪاميابي

ميلبورن (شوبز نيوز) آسٽريلوي شيفلڊ شيلڊ ۾ وڪٽوريه ڪوئنز لميٽڊ کي آسان اننگز ۽ 81 رنسن تان هارائي ڇڏيو. ڪوئنز لينڊ جي ٽيم پنهنجي ٻين اننگز ۾ پڻ ناڪام رهي ۽ يورپي ٽيم 199 رنسن تي ڍير ٿي وئي. جان هالينڊ چار وڪيٽون حاصل ڪيون واضح رهي ته وڪٽوريه ڪوئنز لينڊ جي پهرين اننگز 137 رنسن جي جواب ۾ 417 رنسون ٺاهيون. جان هالينڊ کي مرد ميدان قرار ڏنو ويو. هڪ ٻي ميچ ۾ سائوٿ آسٽريليا تسمانيه کي اننگز 94 رنسن تان هارايو.

 

پاڪستان ۽ نيوزيلينڊ اي وچ ۾ ٽن ڏينهن واري وارم اپ ميچ 11 نومبر کان شروع ٿيندي

نيلسن (شوبز نيوز) پاڪستان ۽ نيوزيلينڊ اي جي وچ ۾ ٽن ڏينهن واريم وارم اپ ميچ 11 کان 13 نومبر تائين نيلسن جي سيڪنن اوول گرائونڊ ۾ کيڏي ويندي. تفصيل موجب قومي ڪرڪيٽ ٽيم مصباح الهق جي اڳواڻي ۾ نيوزيلينڊ خلاف ٻن ٽيسٽ ميچن جي سيريز کيڏڻ لاءِ نيوزيلينڊ ۾ موجود اهي. ٻنهي ٽيمن وچ ۾ پهرين ٽيسٽ 17 کان 21 نومبر تائين هيگلي اوول ڪرائسٽ چرچ جڏهن ته ٻي ۽ آخري ٽيسٽ 25 کان 29 نومبر تائين سيڊن پارڪ ۾ هيملٽن ۾ کيڏي ويندي.

 

هڪڙي رياست ۾ ٻٽا معيار!: گل مورو

جڏهن رياست جي ٻٽن معيارن متعلق ڳالهيون ٿيڻ شروع ٿينديون آهن ته پوءِ اهي ڳالهيون هميشه انارڪي واري صورتحال پيدا ڪنديون آهن.اهو ئي منظر موجوده رياستي ڍانچي مان نظر اچي پيو جو ”جيڪو ڏاڍو سو گابو“ وارو مثال موجود آهي. حالانڪه جڏهن رياستي ڍانچو 1940ع جي قرارداد تحت جوڙيو ويو هو ته انهن ڏينهن ۾ مڙني قومن سان اهو واعدو ۽ وچن ڪيو ويو هو ته سمورين فطري قومن کي برابري جي بنياد تي حق حاصل هوندا، مهڙ ۾ چيو ته اِهوئي ويو ته پاڪستان ۾ مڙني قومن ۽ ماڻهن کي برابريءَ جي بنياد تي حق حاصل آهن، انهن جي تهذيبن، ثقافتن ۽ ٻولين سان ڪا به هٿ چراند ڪا نه ڪئي پئي وڃي پر دنيا ڏٺو ته نون سالن تائين ملڪي آئين ئي نه جوڙيو ويو، نظريه ضرورت تحت مخصوص مفاد ماڻڻ لاءِ وڏي ڀاءُ ننڍن ڀائرن جي نڙيءَ تي لت ڏئي ڪري سمورا وسيلا پنهنجي قبضي هيٺ ڪرڻ شروع ڪيا، جنهن جو نتيجو اهو نڪتو جو ون يونٽ واري لڙهي مان آزاد ٿيڻ لاءِ سمورين قومن جڏهن جنگ جوٽي ته ان جي نتيجي ۾ غداري وارا ڪيس مڙهيا ويا، اهو تلا اگر ڪيس هجي يا حيدرآباد سازش وارو ڪيس هجي يا وري سنڌ ۽ بلوچستان جي ترقي پسند ۽ ملائيت کان بيزاري وارن ذهنن کي زبردستي زنجير هڻڻ وارو منظر هجي؛ اهو ڏاڍي تيزي سان سلسلو هلندو رهيو، جنهن جو نتيجو اهو نڪتو جو وقت به وقت مارشلائي قوتن کي آڻي ڪري مڙني مظلوم قومن جي وسيلن کي ڦٻائڻ لاءِ ڏاڍ جي بنياد تي هيسائي ڪري هٿ ڪرڻ وارا جتن ورجايا ويا. اهو ون يونٽ وارو قهري دور هجي يا ملڪ اندر جمهوري ۽ نيم جمهوري حڪيمن وارو نسخو هجي، انهن مڙني ئي نسخن جي ذريعي اها ئي ڪوشش ڪئي وئي ته ڪهڙي به طريقي سان صرف وڏي ڀاءُ جو ئي پيٽ ڀرڻو آهي، جڏهن ته ٻين مظلومن کي نه ٽڪو پئسو ڏيڻو آهي نه وري انهن جو ڪو رياست اندر اهڙو ڪو حق آهي، اهو ئي سبب هو جو باچا خان اهڙين نفرت ڀرين ڳالهين کي ڏسي ڪري پنهنجي اها وصيت ڪئي ته آئون هن گهٽ ٻوسٽ واري ماحول ۾ جيئڻ ته ڇا پر دفن ٿيڻ به پسند نه ڪندس. پوءِ ائين ٿيو جو اڄ جلال آباد جي شهر ۾ مدفون آهي. ائين ئي خيربخش اول کان وٺي ٻئي خيربخش تائين جيڪو به سلوڪ بلوچستان جي عوام سان ٿيندو رهيو، اهو منظر بالاچ اول کان وٺي ٻئي بالاچ مري تائين جنهن شهادت ماڻي پر خيربخش اول جي ان نظم تان هٿ نه کنيو ته؛

”اوهان جون محل ۽ ماڙيون ڀل ڪيڏيون به خوبصورت ڇو نه هجن پر منهنجي وطن جون بي ستيون سڪل ڪاٺيون هزار ڀيرا ڀليون آهن.“ (خيربخش اول)

خيربخش اول جون هي سٽون ان ڪري اڄ ياد اچن ٿيون جو گڊاڻي واري غريبن سان جيڪا قهري قيامت جهاز حادثي دوران گذري، اها ڪنهن کان به ڳجهي ناهي. ڪيڏي نه حيرت جوڳي ڳالهه آهي جو ان بحري جهاز ۾ 300 کان وڌيڪ بلوچ، سنڌي، سرائيڪي، پختون ۽ ٻيا مسڪين ماڻهو پنهنجي پيٽ گذر لاءِ انهيءَ جهاز جو لوهه ڪاٽي رهيا هئا ته اوچتو ڌماڪو ٿي ويو، جنهن جي نتيجي ۾ اکين ڏٺن شاهدن موجب جن جو ذڪر ميڊيا ۾ به اچي چڪو آهي ته 60 کان وڌيڪ لاش ائين ئي ڪلوميٽر پري وڃي ڪريا پر سندن ڪو به اوهي واهي نه بڻيو. جڏهن ته جهاز ۾ موجود اڍائي سئو کان وڌيڪ ماڻهن جو اڃا تائين ڪو به ڏس پتو ناهي پيو، جڏهن ته ٽن ڏينهن تائين اها باهه ڀڙڪندي رهي. باهه وسائڻ لاءِ نه وفاقي راڄڌاني مان نه وري صوبائي سرڪار بلوچستان جي ڪي خاطر خواهه ڪوششون ورتيون نه وري ملڪ جي ٺلهو وزير داخلا ڪو بيان ڏنو.

اهي زخم جن تي مرهم رکڻ جو وقت هيو پر مرهم رکڻ بجاءِ انهن کي ائين بي سهارو ڇڏي ڪري اهو باور ڪرايو ويو ته ڄڻ ته اهي هن ملڪ جا نه رهواسي هيا نه وري حڪمرانن تي سندن حفاظت جو ڪو فرض آهي. هن وقت تائين انهن فوت ٿي ويلن توڙي زخمين جي علاج لاءِ نه وفاقي راڄڌاني نه وري بلوچستان سرڪار ڪنهن معاوضي جو اعلان ڪيو. ايتري قدر جو ٻه اڍائي ايمبولنسون لاش ڍوئڻ لاءِ ڪراچي کان موڪليون ويون هيون، اهي به اڌ ۾ ڪم ڇڏي روانيون ٿي ويون. بلوچستان جو وزيراعليٰ ثناءُالله زهري جيڪو ميڊيا اڳيان روز روز اهي بيان ڏيڻ ۾ مصروف هوندو آهي ته بلوچستان جي عوام جي احساس محرومين کي ختم ڪرڻ ۾ هن ۽ سندس ٽيم ڏينهن رات هڪ ڪري ڇڏيا آهن پر نه رڳو هن واقعي پر ڪوئٽا ڀرسان پوليس هيڊڪوارٽر ۾ ڌماڪي دوران جيڪي گهڻي ڀاڱي بلوچستان جا ماڻهو هئا، جن ۾ ڪيچ، مڪران، سبي، خضدار، لسٻيلو جي علائقن جا نوجوان شامل هيا؛ ميڊيائي رپورٽ مطابق انهن جا لاش مسڪين ماڻهو اٺ گاڏن تي کڻي وڃي مٽي ماءُ حوالي ڪيا پر نه ايمبولينسون کين مهيا ڪيون ويون نه وري ڪو هوائي جهاز ذريعي سندن لاش پهچايا ويا. اهو منظر ڪيڏو نه ڏکائيندڙ هوندو، جنهن وقت اهي جگر گوشا پنهنجي ممتائن آڏو چچريل چهرن جي صورت ۾ پهتا هوندا، تڏهن ته بلاول زرداري به ڳوڙها ڳاڙي ويٺو هو. صرف ڳوڙها ڳاڙڻ ڪافي ناهي، پر سچ چوڻ به ضروري هوندو آهي. ان ٻٽي معيار جو عملي ثبوت اهو ئي آهي جو جڏهن پنجاب کان فريد ايڪسپريس ۽ ذڪريا ايڪسپريس ٽرينن وچ ۾ ڪراچي اندر ٽڪر ٿئي ٿو ته ان جي نتيجي ۾ جيڪي 20 کان وڌيڪ ماڻهو فوت ٿين ٿا، جن جو تعلق وڏي ڀاءُ يعني پنجاب سان هجي ٿو، انهن جي لاءِ فوري طور تي سڄي ميڊيا وفاقي سرڪار، سنڌ سرڪار ۽ ملڪ جون سموريون وفاقي پارٽيون جاڳي پون ٿيون ۽ انهن جي لاشن کي خصوصي هيليڪاپٽر ذريعي پنجاب پهچايو وڃي ٿو ۽ انهن فوت ٿي ويلن لاءِ في ماڻهو 15 لک رپيا ۽ زخمي کي 3 لک رپيا ۽ ان سان گڏ سنڌ اندر کين پلاٽ به ڏيڻ جو اعلان ڪيو وڃي ٿو. اصل ۾ اهو ئي رياستي ٻٽو معيار آهي، جنهن جي ڪري هن وقت ماڻهو اهو ئي سوچي پيو ته آخر ننڍن قومن جا ماڻهو جن پاڪستان ٺهرائڻ ۾ مک ڪردار ادا ڪيو هو، ڇا انهن کي انهيءَ جي سزا ڏني پئي وڃي يا کين اهو باور ڪرايو پيو وڃي ته سواءِ وڏي ڀاءُ جي ملڪ جي هر اداري ۽ هر وسيلي تي سندن حق ئي نه آهي، پر جڏهن سنڌ مان تيل ۽ گئس جا ذخيرا نڪرن ٿا ته ان لاءِ فوري طور تي وفاقي راڄڌاني ۾ پريس ڪانفرنس ذريعي اهو ٻڌايو ٿو وڃي ته گئس ۽ تيل جا ذخيرا سنڌ جي علائقن مان ٻيا به نڪتا آهن، انهن کي ڪڍڻ لاءِ فوري طور ڪم ڪيو ويندو، جنهن جو ذڪر ميڊيا ۾ به اچي چڪو آهي جو وفاقي حڪومت اوگرا جي علم مطابق ڄاڻائي چڪي آهي ته سنڌ مان گئس جا ٻه وڏا ذخيرا خيرپور ۽ گهوٽڪي مان ملي چڪا آهن، جيڪي گهريلو صارفين جون ضرورتون پوريون ڪري وٺندا. يقينن اهي گهريلو صارفين به ماضيءَ جي تاريخ جيان وڏي ڀاءُ جا ئي گهر گهاٽ هوندا، جن کي سنڌ جي تيل ۽ گئس مان روشن ڪيو ويندو. سندن ئي چلهيون ٻرنديون ڇو ته ماضي بعيد کان وٺي تاريخ شاهد آهي ته سنڌ ۽ بلوچستان مان 72 سيڪڙو تيل ۽ گئس جيڪو مهيا ٿئي ٿو، ان جو گهڻو فائدو وڏي ڀاءُ ئي ورتو آهي. جو اڄ به هنن جون صنعتون ۽ گهرن جا چلها ته ٻري رهيا آهن پر سنڌ جون مسڪين عورتون ۽ بلوچن جون گج پاتل مڙهيون (پوڙهيون) اڄ به ڇيڻن کي ڦوڪون ڏئي ڏئي دم ۽ ٻين مرضن ۾ متبلا ٿي وڃن ٿيون. اهو اونداهي وارو دور الائي ڪڏهن ختم ٿيندو؟ اهو رياست جو ٻٽو معيار الائي ڪڏهن ختم ٿيندو؟ جو اڃا تائين ناانصافيءَ واري جيڪا حد آهي شايد اها وڌيڪ تيزيءَ سان اڀرندي رهي ڇو ته جڏهن رياستون پنهنجا من پسند فيصلا ڪري ماڻهن کي ڏنڊي جي زور تي هلائڻ واري روش اختيار ڪنديون آهن ۽ اهو تسلسل وقت به وقت جڏهن تيزيءَ سان جاري رهندو آهي ته پوءِ اتي ئي انارڪي واري صورتحال پيدا ٿيندي آهي ۽ ڪو به ماڻهو رياستي اهڃاڻن تي ڀروسو ناهي ڪندو. پوءِ ڀل اهو اپيڪس ڪاميٽي وارو فارمولو ڇو نه هجي، جنهن ۾ سنڌ اپيڪس ڪميٽي به ڄاڻايو آهي ته فورٿ شيڊول ۾ قومپرست گروپن خلاف به آپريشن ڪيو ويندو. وري به سوال اهو ئي اڀري ٿو ته ڇا گڊاڻي جي غريبن جو رت ۽ لاهورين جو رت الڳ الڳ آهي؟

 

 

سعودي عرب کان آيل ايئر فورس وفد ۽ ايشائي حالتون…!!: غلام مصطفي جماليٰ

پاڪستان ۽ سعودي عرب جا تعلقات تمام گهڻا ويجها ۽ دوستاڻا رهيا آهن، سعودي عرب جي سربراهن ۽  ذميدار اهم شخصيتن پاڪستان سان تمام سٺو ۽ هميشه بهتر رويو رکيو آهي، ۽ پاڪستان کي پنهنجو ٻيو گهر  ۽  وطن پڻ قرار ڏنو آهي، جنهن کي صرف ڳاليهن تائين محدود ناهي رکيو ويو پر انهي ڳالهه کي سعودي عرب عملي جامو به پارايو آهي، ۽ سعودي عرب  هر مشڪل گهڙي اندر پاڪستان جو ساٿ ڏنو آهي، پاڪستان مٿان آيل آفتون هجن يا معاشي حالت جو ڪمزور ٿيڻ  پر هر حال اندر پاڪستان ۽ سعودي جا تعلقات بهتر ۽ مظبوط رهيا آهن،جڏهن ته پاڪستاني عوام پاران به هميشه سعودي عرب کي هڪ عزت ۽ احترام جي نظر سان ڏٺو ويو آهي. ڇو ته سعودي اهو مقصد ملڪ آهي جتي مسلمانن جو عقيدت ۽ ايمان ۽ حرمين شريف آهي،سعودي عرب اسانجو هڪ محسن به رهيو آهي،پر اهو سمورو سلسلو اها سموري محبت ۽ وچ ۾ ويجهڙائپ وارا  تعلقات ڪجهه خاص بهتر رهي نه سگهيا آهن، جڏهن کان يمن اندر هڪ جنگ شروع ٿي آهي انهي ڏينهن کان وٺي ٻنهي ملڪن جي وچ ۾ هڪ بحث ۽ نفرت جي ديوار بنجي وئي آهي،سعودي عرب پاڪستان جي اها آڇ ڪئي هئي ته پاڪستان پنهنجو فوجون يمن ۾ هلندڙ جنگ لاءِ موڪلي پر پاڪستان اهو ملڪ آهي جتي اهڙي ماحول اندر جيڪڏهن فوجون موڪيلو وڃن ها ته پاڪستان اندر پڻ هڪ گهرو ويڙهه ٿيڻ جا وڏا امڪان هئا ڇو ته پاڪستان  ۾ پڻ هر طبقي جا ماڻهو رهن ٿا جيڪي اهو نه پيا چاهين ته پاڪستان پنهنجون فوجون يمن موڪلي ٻئي طرف پاڪستان جيڪڏهن يمن اندر پنهنجو فوجون موڪلي هان ته نه رڳو هڪ پاسي پاڪستان جي عوام ناراض ٿي ها پر ٻئي پاسي پاڪستان جو هڪ پاڙيسري ملڪ ايران جنهن سان به پڻ پاڪستان جا تعلقات تمام گهڻا بهتر رهندا پيا اچن  اهو ملڪ پڻ  ناراض ٿي هان. ان ڪري پاڪستان ٻنهي دوست ملڪن ۽ پاڪستاني عوام کي ناراض ڪرڻ بجاءِ ٽياڪڙي جو ڪرادر ادا ڪيو،اُن وقت به ڪيترائي سوال اٿي رهيا هئا ته ڇا پاڪستان ٽياڪڙي جي آڇ تي پورو هلندو،جڏهن ته ٻئي طرف هڪ نطر.. عرب ملڪن جي تاريخ جي وجهون  ته عربن جي  تاريخ تمام گهڻي شاندار آهي.جڏهن ته دنيا ۾ واحد اهي عرب ملڪ آهن.جن اسلام اچڻ کانپوءِ تمام گهڻي ترقي ڪئي .اوهان جڏهن  بنوعباس جي تاريخ تي نظر وجهندا  ته اوهانکي معلوم ٿيندو ته عرب جتي به ويا اتي پنهنجي زبان تهذيب،۽ تمدن به پاڻ سان گڏ کڻي ۽ انهي سان گڏ فتح به .عراق،شام،لبنان،فلسطين،مصر، ۽ پوءِ اڳيان مشرق کان مغرب تائين جيڪي به ملڪ آهن اهي عربن فتح ڪيا.جن اندر اڄ به عربي ٻولي اها ڳالهائي وڃي ٿي.جيڪا انءُ وقت جي عرب قبلين جي هئي.جڏهن ته انهي جي ڀيٽ اندر ايراني تمام گهڻا مختلف آهن.انهن اسلام ته قبول ڪيو ۽  باهه پرستي کي ترڪ ڪري ڇڏيو.پر سندس ٻولي اها ئي رهي.جڏهن ته ايران اندر اسلامي دور اندر به فارسي ڳالهائي ويندي هئي ۽ هن وقت به فارسي ڳالهائي ويندي آهي.13صدي اندر جڏهن هلاڪو خان بغداد تي حملو ڪيو هيو. ان کان پهرين هن ايران کي شڪت ڏني هئي.جنهن حملي اندر ايران جو تمام گهڻو جاني توڙِي مالي نقصان ٿيو هو.جنهن جو اثر اڄ به موجود آهي.جنهن جو ننڍڙو مثال اهو به آهي ته عرب سمورا ملڪ گڏجي ڪري غيرمسلم ملڪن جو مقابلو ڪن.پوءِ به هو انهن جو مقابلو نه ڪري سگهندا.جڏهن ته ترڪي،انڊونيشا،پاڪستان،۽ ايران غيرعرب مسلمان ملڪ آهن.جڏهن ته ايران ،پاڪستان،ترڪي انڊونيشا جي فوجي ۽ عڪسري ونگ کي هڪڙي پاسي رکي ڪري باقي53عرب ملڪن تي نظر وجهجي ته خبر پئجي ويندي ته عرب ملڪ غيرمسلم ملڪن جي ٽيڪ جي سهاري تي هلي رهيا آهن. جڏهن ته ايران تي هڪ نظر وجهي ته ايران جي فوجي قيادت ۽ عسڪري طاقت سموري عرب ملڪن کان هر معيار کان بهتر آهي. 1979ع ۾ جڏهن ايران اندر رضا شاهه پهلوي جو دور ختم ٿيو ته آيت الله خميني کي اقتدار مليو.جنهن جي ٿورڙي وقت کانپوءِ  عراق(صدرصدام) جي صدارت ۾ ايران تي حملو ڪري ڏنو.ان وقت عراق وٺ عڪسري ونگ موجود هئي.تنهن هوندي به عراق وهاڙڪن ايران جو ڪجهه به بگاڙي نه سگهيا. پورا ڏهه سال صرد صدام حسين ايران سان وڙهندو رهيو.پر ايران کي شڪت نه ڏئي سگهيو.جڏهن ته ان وقت عراقي حملي اندر ايران تي ان وقت به تمام گهڻيون مصيبتون آيون هنيون.ايران تي ڪيتريون بينل اقوامي پابنديون لڳايون ويون هنيون.ان ڪري ايران معاشيي اعتبار سان پڻ تمام گهڻو پوئتي پوندو ويو.تنهن هوندي اڄ به ايران پنهنجي.ايئرفورس،نيوي،۽ آرمي جي عسڪري سامان کي پنهنجي.ايڪي پينٽ جو حصو بڻايو اچي.جڏهن ته انهي حوالي سان ٻين عرب ملڪن تي نظر وجهبي ته اهي پئسي جي اعتبار سان ايران کان تمام گهڻا مالدار آهن.۽ وٺن تيل جا تمام گهڻا اڻکٽ ذخيرا آهن.پر دفاعي اعتبار سان صرف سندس نالو آهي ۽ عسڪري طاقت وٺن موجود ناهي.انهي ڀيٽ اندر ايران ۽ سعودي ڇڪتاڻ جي حوالي سان ڏسجي ها ته سعودي وٺ اسلامي ملڪن جو اتحاد آهي .جڏهن ته ايران وٽ عسڪري طاقت آهي . جڏهن ته سعودي عرب ۽ ايران ڇڪتان ۾ پورا اسلامي ملڪ اهو ئي چاهين ٿا ته . ايران ۽ سعودي عرب ۾ وڌندڙ ڇڪتاڻ ۾ ماٺار اچي ۽ ٻئي ملڪ ڪنهن وڏي جنگ جي طرف نه وڌن.هن وقت به سعودي عرب ۽ يمن جي حوثين باغين جي وچ ۾ ڇڪتاڻ جاري آهي.جنهن جي ڪري شايد هن وقت سعودي عرب جي ايئربيس جا سربراه جنرل محمد بن صالح القتيبي چار ڏينهن جي دوري تي پاڪستان اچي رهيو آهي،جڏهن ته پاڪستان جي دوري جي دعوت کيس پاڪستان ايئرچيف سهيل امان ڏني هئي ۽ سعودي ايئربيس وفد نورخان ائيربيس ته لهڻو هو جتي سندس پاڪ فضايه جي سرابراهه استعقبال ڪندا،جڏهن ته سعودي عرب جي وفد بابت اهو به چيو پئي ويو ته اهي پاڪ فضايه کان دفاعي مشقون ۽ دفاع جي لاءِ دفاعي آلات جي خريداري تي پڻ ڳالهيون ڪندا،هڪ پاسي سعودي عرب ۽ چين پاڪستان سان همدري ڪرڻ ٿو چاهي ته ٻئي پاسي جارحيت پکڙيندڙ ڀارت جيڪو پنهنجو نيٽ ورڪ افغانستان اندر جوڙڻ چاهي ٿو،جڏهن ته ڀارت اهو واحد ملڪ آهي جيڪو هميشه پاڪستاني جي سلامتي لاءِ خطرو رهيو آهي جڏهن ڪري ڀارتي ايجنسي را وڏي مقدار اندر پنهنجي مطبوط ٽيم افغانستان اندر موجود ڪيو ويٺو آهي،۽ انهي صورتحال حال اندر هو وڌيڪ چاهي ٿو ته پاڪستان ڪمزو ٿي انهي ڪري هو چار بهار منصوبي کي افغانستان تائين پهچائڻ ٿو چاهي،جڏهن ته  ڏٺو وڃي ته انهي ماحول اندر آمريڪا ڀلي پاڪستان سان همدري رکي پر اندورني طرف سان هو به پاڪستان جو خيرخواه ناهي ان ڪري پاڪستان جا ايران ۽ سعودي عرب جي وچ اندر جيڪي تعلقات بهتر نه هيا اهي ڀارت جي آڙ  وٺِي ڪري پنهجو مفاد ڳولي فائدو وٺڻ ٿو چاهي ،ان ڪري ايران ۽ سعودي عرب کي سوچڻ گهرجي ته پاڪستان هيمشه ٻنهي ملڪن جي خيرسلامي چاهي ٿو ۽ ٻنهي ملڪن جي سلامتي لاءَ پنهنجو ڀرپور ڪرادر ادا ڪري سگهي ٿو،ان ڪري ٻنهي ملڪن جي حڪمرانن کي گهرجي ته اهي به پاڪستان سان سهڪار ۾ رهن، ان ڪري هن وقت جيڪو سعودي عرب کان وفد آيل آهي انهي سان پاڪستان جي امن سلامتي جون پڻ ڳاليهون ڪيون وڃن،ته جئين پاڪستان به پنهنجي پاڙيسري ۽ سعودي عرب سان پنهنجا تعلقات بهتر رکي سگهي،

 

 

 

 

قومي سلامتي واري خبر جو معاملو: پرويز رشيد خلاف جاچ نه ڪرڻ جو فيصلو

صحافين سان ڳالهائيندي چوڌري نثار چيو  آهي ته قومي سلامتي جي خلاف تڪراري خبر جي انڪوائري حڪومت جي اعلان ڪيل پاليسي تحت هڪ ڪميٽي ڪندي، پارليامينٽ جو ان سان واسطو نه آهي، جاچ پرويز رشيد خلاف نه پر ڪوڙي خبر ڏيندڙ جي باري ۾ ڪئي پئي وڃي، ڪميٽي هڪ ٻن ڏينهن ۾ ٺهي ويندي جنهن جي سربراهي هاءِ ڪورٽ جو رٽائرڊ جج ڪندو، ڪميٽي جي ميمبرن ۾ سينيئر آفيسر هوندا جن تي ڪو به آڱر کڻي نه سگهندو، ڪميٽي جا نالا وزيراعظم کي موڪليا ويا آهن. سينيٽ چيئرمين جو وڏو احترام ڪريان ٿو، هو پيپلزپارٽي جي انهن اڳواڻن مان آهي جيڪي جمهوريت، آئين ۽ قانون جي بالادستي جي باري ۾ واضح موقف رکن ٿا پر اها ڳالهه واضح ڪرڻ چاهيان ٿو ته ڊان جي قومي سلامتي جي خلاف تڪراري خبر جي انڪوائري حڪومت جي اعلان ڪيل پاليسي تحت هڪ ڪميٽي ڪندي پارليامينٽ نه ڪندي. انڪوائري پرويز رشيد جي خلاف نه آهي پر اها انڪوائري ڪوڙي خبر ڏيندڙ جي باري ۾ آهي. ڪميٽي ايندڙ هڪ ٻن ڏينهن ۾ ٺهي ويندي جنهن جو سربراهه هاءِ ڪورٽ جو اڳوڻو جج هوندو ۽ ميمبرن ۾ اهڙا سينيئر آفيسر هوندا جن تي ڪو به آڱر کڻي نه سگهندو. ڪميٽي جي ميمبرن جي نالن تي مشاورت مڪمل ٿي وئي آهي ۽ اهي وزيراعظم کي موڪليا ويا آهن ۽ اميد آهي ته سومر تي ڪميٽي قائم ڪئي ويندي. اسان به چاهيون ٿا جيڪو به غلط خبر جو محرڪ آهي ان جي نشاندهي ٿئي ۽ انهن الزامن جو منهن بند ٿئي جيڪي لڳي رهيا آهن ۽ قوم جي جان ڇٽي. هي نيشنل سيڪيورٽي جو معاملو آهي ڪا ٻارن جي راند نه آهي هر ڪنهن کي ذميواري جو ثبوت ڏيڻ گهرجي. ڪميٽي کي آزاد ۽ شفاف ماحول ۾ ڪم ڪرڻ ڏنو وڃي. ڪميٽي جي نالن مان واضح ٿي ويندو ته حڪومت شفاف انڪوائري چاهي ٿي ته جيئن قوم آڏو حقيقتون اچي سگهن ۽ انتهائي اهم ۽ حساس معاملن تي سياست ڪندڙن جي حوصلا شڪني ٿي سگهي.

 

وزير اعظم جي ٻارن جو ڊوئچي بئنڪ مان قرض وٺڻ جو انڪشاف

برطانوي اخبار انڪشاف ڪيو آهي ته وزيراعظم جي ٻارن ڊوئچي بئنڪ مان 70 لک پائونڊ جو قرض ورتو، اهو قرض مريم نواز ۽ حسين نواز طرفان 2008ع ۾ ورتو ويو هو. اهو قرض لنڊن جي علائقي پارڪ لين ۾ موجود فليٽن کي گروي رکي ورتو ويو. ڊوئچي بنڪ جو چوڻ آهي ته اسان ان معاملي جي اهميت کان واقف آهيون. بئنڪ 2013ع کان شروع ڪيل آڊٽ ۾ نواز خاندان کي به شامل ڪري ورتو آهي. بئنڪ موجب ته پنهنجي کاتيدار جي معلومات جي ڇنڊ ڇاڻ ڪري رهيا آهيون. اسان اهو به ڏسي رهيا آهيون ته اسان جا کاتيدار ڪنهن قسم جي چوري ۾ ملوث ته ناهن.

برطانوي اخبار موجب پارڪ لين جا فليٽ 1993ع ۽ 1996ع جي وچ ۾ خريد ڪيا ويا. آف شور ڪمپنيون 2006ع تائين موزيڪ فونسيڪا ۾ منتقل نه ڪيو ويون هيون، پاناما پيپرز ظاهر ڪن ٿا ته موزيڪ فونسيڪا کي 2012ع ۾ اندازو ٿيو ته هو ڪمپنين لاءِ ايجنٽ طور ڪم ڪري رهيو هو. 2013ع ۾ نواز شريف هڪ ڀيرو ٻيهر وزيراعظم بڻجي ويو. اداري جي ايتري جاچ ٿي ته ان ڪمپنين کي فوري طور تي نظر ۾ رکڻ شروع ڪري ڇڏيو ۽ هر چئن مهينن ۾ انهن کي چيڪ ڪرڻ جا حڪم جاري ڪيا.  موزيڪ فونسيڪا جو چوڻ آهي ته سياسي شخصيتن ۽ ان متعلق ماڻهن جي آفشورس ڪمپني جي واڌو جاچ ڪرڻ گهرجي. ڇو ته اهي پئسا سياسي اثر رسوخ استعمال ڪندي ڪمايا ويا.