تازيون خبرون

Daily Archives: November 5, 2016

مخالف ترقي جي راهه ۾ رنڊڪون پيا وجهن، اسان بيهڻ وارن مان ناهيون: نواز شريف

نڙهه (اين اين آءِ) وزيراعظم محمد نواز شريف چيو آهي ته ڪوڙ ڳالهائيندڙ ۽ پٽڪو لاهيندڙ عوام جو نمائندو نه ٿو ٿي سگهي، پاڪستان جي ترقي ڏسي مخالفن جون ننڊون حرام ٿي ويون آهن، چون ٿا ته وري ن ليگ اچي ويندي ۽ اسان ڪراڙا ٿي وينداسين ته پاڪستان جي خدمت ڪرڻ جي قابل نه رهنداسين. ڌرڻي وارو ملڪ کي 50 سال پوئتي ڌڪڻ چاهي ٿو پر هو ڪامياب نه ٿيندو، گڏيل قومن ۾ ڀرپور طريقي سان ڪشمير جو مسئلو اٿاريو آهي.، ڪنهن کان به ڊڄڻ ۽ گهٻرائڻ وارا ناهيون آئنده به ڪشمير جو معاملو اٿاريندا رهنداسين. بجلي جي کوٽ پيدا ڪندڙ ڏوهاري آهن. وقت سر قدم ڇو نه کنيا ويا، 2018 ۾ لوڊشيڊنگ ختم ٿي ويندي. ٽي سال اڳ پي آءِ اي جي ذريعي حج تي ويندڙ حاجي سڳورا رلندا هئا انهن کان ڪير پڇڻ وارو نه هو. جمعي تي نڙهه ۾ عوامي جلسي کي خطاب ڪندي وزيراعظم نواز شريف چيو ته مان دل جي گهراين سان توهان کي سلام ڪريان ٿو شاهد خاقان عباسي چيو آهي ته ايڏي وڏي انگ ۾ اسان جو ڀينرون ۽ ٻارڙيون ڪڏهن نه آيو آهن جيڪي اڄ جلسي ۾ آيون آهن. مان ايندڙ پنهنجي ٻارڙين، ڀينرن، مائرن جو ٿورائتو آهيان مون کي بزرگ ويٺي نظر اچي رهيا آهن، جڏهن ته جلسي ۾ نوجوانن جو به وڏو انگ موجود آهي. وزيراعظم جلسي کي خطاب ۾ وڌيڪ چيو ته مخالف چاهين ٿا ته خوشحالي جو رستو روڪيو وڃي ۽ بدحالي جو دور شروع ٿي وڃي. وزيراعظم چيو ته موٽروي ن ليگ جي دور ۾ ٺهيا آهن پاڪستان ۾ ترقي ٿي آهي ته مسلم ليگ (ن) جي حڪومت ۾ ٿي آهي اقتصادي ترقي به اسان جي دور ۾ ٿي آهي. دفاعي ترقي به اسان جي دور ۾ ٿي آهي ۽ ايٽمي ڌماڪا به اسان جي دور ۾ ٿيا آهن. ڪشمير جي ڳالهه مسلم ليگ نه ڪري ٿي، هن چيو ته گوادر بندرگاهه سان پاڪستان ۾ خوشحالي جو پيغام ايندو. بجلي ۽ گيس به ان وقت آئي آهي جڏهن مسلم ليگ (ن) اقتدار ۾ آئي آهي. هن چيو ته پشاور کان اسلام آباد ۽ اسلام آباد کان لاهور موٽر وي اسان جي دور ۾ ٺهيا ۽ بعد ۾ موٽروي ڇو نه ٺهيا. هاڻي موٽروي ڪراچي وڃي رهيو آهي ان جي تعمير به شروع ٿي وئي آهي. هن چيو ته ڪير ڏوهاري آهي جنهن بجلي جي کوٽ پيدا ڪئي، گذريل وقت ۾ 16 کان 18 ڪلاڪن جي لوڊشيڊنگ ٿيندي آهي جيڪا اسان گهٽائي ڇڏي آهي. وزيراعظم چيو ته جيڪو مون سان وفا ڪري ٿو مان به ان سان وفا ڪندو آهيان ۽ ڪنهن سان بي وفائي نه ڪندو آهيان راجا ظفرالحق منهنجي پارٽي جو چيئرمين آهي ان سان مضبوط لاڳاپا آهن ۽ شاهد خاقان عباسي به منهنجو ويجهو دوست آهي هن چيو ته عوام بار بار مسلم ليگ (ن) کي موقعو ڏئي ٿو ته پاڪستان جي خدمت ڪئي وڃي انهي سبب جي ڪري مخالفن جون ننڊون حرام ٿي ويون آهن. وزيراعظم چيو ته بيروزگاري جو خاتمو اسان جي پهرين ترجيح آهي اسان دهشتگردي جي چيلهه چٻي ڪري ڇڏي آهي. هن چيو ته اسان جي نوجوانن کي ليپ ٽاپ ملن ٿا ۽ اربين رپيا وظيفن تي خرچ ڪيا وڃن ٿا. اسان غريبن لاءِ مفت علاج جو پروگرام بڻايو ۽ اهو پروگرام نڙهه ۾ به پهچندو. هن چيو ته ترقي جو سفر وڏي زور ۽ شور سان جاري آهي جيڪو انشاءَ الله جاري رهندو. هن نڙهه جي عوام کي مخاطب ٿيندي چيو ته توهان وٽ خالي هٿين نه آيو آهيان، ترقياتي پروگرام هلي رهيا آهن ۽ اهي هلندا رهندا. هن اعلان ڪيو ته راولپنڊي، ڪهوٽا، ڪلرڪا، منهند ۽ سهالا جي هنڌ تي هيڊ برج ٺهندو وزيراعظم ڪهوٽا تعلقي ڪلر سيڊان جي سمورن يونين ڪائونسلن کي بجلي ۽ گئس فراهم ڪرڻ جو اعلان ڪندي چيو ته ڪهوٽا ۾ تعلقي هيڊ ڪوارٽر اسپتال کي بهترين درجي جي اسپتال بڻايو ويندو ته جيئن ماڻهن کي راولپنڊي نه وڃڻو پوي.

 

حڪمران پنهنجي نڪ کان اڳتي نٿا نهارين، هاڻي نواز شريف نه جمهوريت بچندي: بلاول

رهڙڪي(رپورٽر/م.ڊ) پ پ چيئرمين بلاول ڀٽو زرداري چيو آهي ته دهشتگرد اسان جا ٻچا ڪُهي رهيا آهن ۽ حڪمران فوٽو سيشن تائين محدود آهن. پاناما پيپرز تي احتساب ضرور ٿيندو. رهڙڪي ۾ جلسي کي خطاب ڪندي پ پ چيئرمين بلاول ڀٽو زرداري چيو ته ڪوئيٽا سڀ کان وڌيڪ دهشتگردي جو شڪار آهي، دهشتگرد اسان جي ٻچن کي ماري رهيا آهن ۽ حڪمران رڳو فوٽو سيشن تائين محدود آهن. هن چيو ته حڪومت دهشتگردن ۽ انهن جي پٺڀرائي ڪندڙن خلاف ڪارروائي نٿي ڪري. حڪمران پنهنجي نڪ کان اڳتي نٿا نهارين. هنن حڪمرانن ۾ دهشتگردي خلاف ڪم ڪرڻ جي نه ته اهليت آهي نه ئي انهن جي نيت آهي. بلاول ڀٽو زرداري وڌيڪ چيو ته  ميان صاحب هي ڪاروبار نه پر عوام آهي، توهان وزيراعظم آهيو، بادشاهه نه، هي جمهوريت آهي تخت رائيونڊ جي بادشاهت نه. ماڻهو غريب ٿيندا وڃن ۽ توهان دولت جا ڍڳ ٺاهيندا پيا وڃو. منهنجو چاچو  عمران خان پاناما پيپرز جي ڳالهه ڪري رهيو آهي، توهان تي ڪرپشن جو الزام آهي، ان ڪري توهان کي جواب ڏيڻو پوندو. هن چيو ته سستي ماني اسڪيم، ييلو ڪيب، دانش اسڪول اسڪينڊل، نندي پور اسڪينڊل، ماڊل ٽائون واقعو هجي يا اصغر خان ڪيس هجي يا پاناما پيپرز جو اسڪينڊل، توهان ڪنهن تي به جواب نه ٿا ڏيو. پر هاڻي احتساب ٿيندو، اعتزاز احسن جي  پاناما پيپرز بل کي پاس ڪرڻو پوندو. بلاول ڀٽو زرداري وڌيڪ چيو ته آئون توهان کي خبردار ڪريان ٿو ته توهان جي حڪومت ڪرپشن بچائي نه ٿي هلي سگھي. هن چيو ته حڪمران راجن پور سميت ڏکڻ پنجاب کي نظر انداز ڪري رهيا آهن، هي حڪمران رڳو هڪ علائقي کي ترقي ڏيندا ته وفاق ڪمزور ٿيندو. حڪمرانن جي پاليسين قوم کي ورهائي ڇڏيو آهي. هن چيو ته وفاقي حڪومت مون سان واعدو ڪيو هو ته ٿر تي ترقياتي بجيٽ خرچ ڪنداسين پر هڪ ٽڪو به خرچ نه ٿيو. لاهور لاءِ 2 سئو ارب ۽ ڪراچي لاءِ رڳو ٻارهن ارب رپيا رکيا ويا آهن. مودي سازش ڪري رهيو آهي ۽ وزيراعظم نواز شريف چُپ آهي. توهان جي پاليسين جي ڪري پاڪستان دنيا ۾ اڪيلو ٿي رهيو آهي. ڪشمير مسئلي تي پاڪستان عالمي حمايت حاصل ڪرڻ ۾ ناڪام ٿي ويو آهي. هن چيو ته گذريل ٽن سالن کان ملڪ بنا پرڏيهي وزير جي هلي رهيو آهي، حڪمرانن جي پرڏيهي پاليسي ناڪام آهي. 3 ڀيرا وزيراعظم ٿيڻ باوجود هنن کي پرڏيهي وزير نه پيو ملي، هن چيو ته سياسي پارٽين کي جلسا ڪرڻ جي اجازت ناهي پر گڊ يا بيڊ طالبان کي گھرو وزير جي آفيس ۾ اچي چانهه پي وڃن ٿا. ملڪ ۾ نيشنل ايڪشن پلان جا بکيا اڊيڙيا پيا وڃن. ڪافر ڪافر جا نعرا هنيا پيا وڃن. حڪمرانن کي ملڪ ۽ عوام جو ڪو فڪر ناهي. هنن کي غريبن جو ڪو احساس ناهي، ملڪ قرض جي بار ۾ ڦاسندو پيو وڃي، مهانگائي آسمان سان ڳالهائي رهي آهي، هنن کي مسئلن جي حل ۾ ڪا دلچسپي ناهي، ذاتي اقتدار کان سواءِ انهن کي ڪنهن مسئلي ۾ دلچسپي ناهي. غريب کي ته هي ويجھو ئي اچڻ نٿا ڏين. اوڪاڙا کان لاهور تائين هارين کي دهشتگردي جي نالي تي گرفتار ڪيو پيو وڃي. چاچا عمران هاڻي گھڻو ٿي ويو، مون گھڻو برداشت ڪيو، عوام گھڻو ڀوڳيو آهي، توهان روز اسٽيج تي بيهي ڪوڙا الزام هڻو ٿا، توهان منهنجي شهيد ماءُ تي به الزام هنيا هئا، ايتري تائين جو چاچي عمران 18 آڪٽوبر 2007ع ۾ ٿيل ڌماڪي جو الزام به منهنجي ماءُ تي هڻڻ جي ڪوشش ڪئي. توهان منهنجي پيءُ تي نواز شريف تي لڳل الزام ورجايو ٿا. هن چيو ته ڪوئٽا سانحي جي ڪري رهڙڪي ۾ ڏياري نه ملهائي سگهيس. بلاول ڀٽو زرداري وڌيڪ چيو ته اسين موهن جي دڙي، سنڌو تهذيب جا وارث آهيون. اڄ سنڌ_پنجاب جي سرحد تي عوام کي مخاطب آهيان ۽ مودي کي ٻڌائڻ چاهيان ٿو ته جناح ۽ بينظير جي پاڪستان ۾ هندو ۽ مسلمانن ۾ ڪو فرق ناهي، هتي سڀ هڪ آهن. اسين نسل، ٻولي ۽ جنس جي بنياد تي فرق ناهيون ڪندا. هن چيو ته اڄ هتان ڪنور ڀڳت سنگھ کي سلام پيش ڪريان ٿو. اسان جي جدوجهد غريبن، بيروزگارن، عورتن ۽ اقليتن لاءِ آهي. اسان جي جدوجهد دهشتگردي کي پاڙان ختم ڪرڻ لاءِ آهي. هن چيو ته جمهوريت کي بچائڻو آهي ته شينهن جي قرباني ضروري آهي. نواز شريف کي پاناما ليڪس جي سمورن الزامن جو جواب ڏيڻو پوندو. هاڻي جمهوريت بچندي پر نواز شريف نه بچندو. پاناما بل منظور نه ٿيو ته عدالتي ڪميشن نه هلي سگھندو، جيڪڏهن ڪميشن نه هليو ته حڪومت نه هلي سگھندي. ٻئي طرف اوٻاوڙو ۾ پاڪستان پيپلز پارٽي جي سربراهه بلاول ڀٽو زرداري چيو آهي ته سنڌ ۾وڌيڪ يونيورسٽيون ۽ ڪاليج قائم ڪيا ويندا. پيپلز پارٽي جي سربراهه بلاول ڀٽو زرداري آءِ بي ڪميونٽي ڪاليج جو اففتاح ڪيو. ان موقعي تي هن ميڊيا سان ڳالهائيندي چيو ته سنڌ سرڪار تعليم جي بهتري جي لاءِ بهتر قدم کنيا آهن جڏهن ته بلاول اوٻاوڙي ۾ ميڊيڪل ڪاليج قائم ڪرڻ جو پڻ اعلان ڪيو آهي.

 

آئين ۾ وزيراعظم جي سولو فلائيٽ جي گنجائش ناهي: سپريم ڪورٽ

اسلام آباد (اين اين آءِ) سپريم ڪورٽ وفاقي ڪابينه کي باءِ پاس ڪرڻ جي وزيراعظم جي اختيار کي ڪالعدم ڪرڻ جي خلاف حڪومت جي نظرثاني ۽ درخواست رد ڪري ڇڏي آهي جمعي تي جسٽس ثاقب نثار جي اڳواڻي ۾ ٽه رڪني بئنچ حڪومت جي نظرثاني ۽ درخواست تي ٻڌڻي ڪئي ااٽآرجي جنرل پاڪستان حڪومتي اپيل تي دليل ڏيندي چيو ته حڪومتي معاملن جي لاءِ مضبوط وزيراعظم جي ضرورت آهي جسٽس ريمارڪس ڏنا ته آئين ۾ وزيراعظم جي سولو فلائيٽ جي ڪابه گنجائش نه آهي ٽيڪس رعايت ۽ ليوي ٽيڪس جو نفاذ وفاقي حڪومت جو اختيار آهي آئين ۾ ڪٿي به ناهي لکيل ته وزيراعظم يا ڪو وزير يا صلاحڪار اڪيلو وفاقي حڪومت آهي. رولز ڪڏهن به آئين کان مٿانهون نٿو ٿي سگهي جج سوال ڪيو ته ڇا وزيراعظم جي ڪابينه جي منظوري جي بغير جو چاهي ڪري سگهي ٿو اٽارني جنرل چيو ته هر وفاقي وزير  وفاقي حڪومت چورائيندو ان تي جج چيو ته آئين ۾ وفاقي حڪومت جي تعريف بيان نه ڪئي ويئي وفاقي حڪومت ڪابينه جي ميڙ کي چيو وڃي ٿو ٻڌڻي کان پوءِ سپريم ڪورٽ وزيراعظم نوازشريف پاران ڪابينه کي باءِ پاس ڪرڻ جي معاملي تي وفاق جي نظرثاني اپيل رد ڪري ڇڏي.

 

وفاق سنڌ سان زيادتيون پيو ڪري، هاڻي بيٽ گرائونڊ ۾ ۽ شينهن جهنگ ۾ هوندو: وڏو وزير

ڏهرڪي (اين اين آءِ) سنڌ جي وڏي وزير سيد مراد علي شاهه چيو آهي ته وفاق سنڌ سان زيادتيون ڪري رهيو آهي هاڻي بيٽ گرائونڊِ ۾ ۽ شينهن جهنگ ۾ هليو ويندو ۽ سڄي ملڪ ۾ تير ئي تير هوندو. پيپلز پارٽي 2018 جي چونڊن ۾ چئني صوبن تي حڪمراني ڪندي پارٽي فيصلو ڪيو ته پرويز خٽڪ وانگر سڀ کان اڳيان هوندس. هن جمعي تي درٻار گرائونڊ جي دوري جي موقعي تي ميڊيا سان ڳالهائي رهيو هو. وڏي وزير چيو ته بلاول ڀٽو زرداري 30 آڪٽومبر تي هندو برادري سان گڏجي ديوالي ملهائڻي هئي پر ڪوئيٽا واقعي سبب 30 آڪٽومبر تي تقريب ملتوي ڪئي وئي. هن چيو ته بلاول ڀٽو زرداري موجوده صورتحال ۾ عوام کي متحرڪ ڪندو. هاڻي تير سموري ملڪ ۾ پنهنجو ڪمال ڏيکاريندو ۽ عوام جي مدد سان تير کان شير ۽ بيٽ جو شڪار ڪنداسين. شينهن جنگ ۾ هليو ويندو ۽ بيٽ گرائونڊ ۾ هوندي هاڻي هن ملڪ ۾ تير هوندو. هن چيو ته وفاق جي زيادتين سبب 16 آڪٽومبر تي نعرو هنيو هو ۽ هو سڀاڻي سي سي آءِ جي ميٽنگ ۾ ان جي خلاف ڀرپور آواز اٿاريندو. هن چيو ته بلاول ڀٽو مڊ ٽرم چونڊن جو مطالبو ناهي ڪيو. مراد علي شاهه چيو ته وفاقي حڪومت کي پ پ جي چيئرمين بلاول ڀٽو زرداري چار مطالبا پيش ڪيا آهن جيڪڏهن حڪومت مطالبن کي نظرانداز ڪيو ته پنهنجن مطالبن جي لاءِ جمهوري طريقيڪار موجب احتجاج ڪنداسين. جمهوري طريقي سان ئي حڪومت تي دٻاءُ وجهي سسگهجي ٿو هن چيو ته مون کي اميد آهي ته احتجاج جي نوبت نه ايندي. پرويز مشرف جي حوالي سان هن چيو ته اڳوڻي صدر کي اها سزا نه ملي جيڪا کيس ملڻ گهرجي ها.

 

موجوده جمهوري حڪومت آزادي اظهار راءِ تي يقين رکي ٿي: مريم اورنگزيب

اسلام آباد (اين اين آءِ) سنڌ سماءُ واري مملڪتي وزير مريم اورنگزيب پريس انفارميشن ڊپارٽمينٽ جو دورو ڪيو ان موقعي تي مملڪتي وزير پي آءِ ڊي ۾ اطلاع واري وزارت جي اختيارين سان ملاقات ڪئي جن ۾ پريس انفارميشن آفيسر ۽ ٻين اعليٰ اختيارين به شرڪت ڪئي. پريس انفارميشن آفيسر مملڪتي وزير کي کاتي جي ڪم ۽ طريقيڪار بابت بريفنگ ڏني مملڪتي وزير چيو ته موجوده جمهوري حڪومت آزادي اظهار راءِ تي يقين رکي ٿي مريم اورنگزيب چيو ته حڪومت ملڪ ۾ آزاد ميڊيا جي ترقي لاءِ سهولتن جي فراهمي جاري رکندي هن چيو ته پي آءِ ڊي ڪارڪردگي جي پلان موجب شفافيت کي يقيني بڻائي هن چيو ته پاڪستان جي مثبت حيحيت کي اجاگر ڪرڻ لاءِ جديد ٽيڪنڪ اپنائي وڃي مريم اورنگزيب چيو ته اشتهار جي لاءِ سوشل ميڊيا ۽ ڊجيٽل ميڊيا کي به استعمال ڪيو وڃي. آفيسرن پيشيورانه معاملن جي ادائيگي ۾ درپيش للڪار سان مملڪتي وزير کي آگاهه ڪن جنهن تي ان پي آءِ ڊي آفيسرن کي مسئلا حل ڪرڻ جي خاطري ڪرائي.

 

احتساب وقت جي اهم ضرورت آهي، حڪومت بلاول جا چار مطالبا مڃي: مولابخش چانڊيو

ڪراچي (اين اين آءِ) سڌ سماء واري صلاحڪار مولابخش چانڊيو گهوٽڪي جي علائقي ڏهرڪي ۾ ڪامياب جلسي ڪرڻ تي چيئرمين بلاول ڀٽو زرداري ۽ پارٽي قيادت کي مبارڪباد ڏيندي چيو آهي ته حڪومت کي بلاول ڀٽو زرداري جا چار مطالبا مڃي ضد ختم ڪرڻ گهرجي هڪ بيان ۾ مولابخش چانڊيو گهوٽڪي سميت سنڌ ۽ ٻين صوبن مان ايندڙ پيپلز پارٽي جي ڪارڪنن کي زبردست ڀيٽا پيش ڪندي چيو ته هن وقت ملڪ ۾ جمهوري احتساب جي سخت ضرورت آهي. هن چيو ته عمران خان جي مسلسل ناڪامي نواز شريف کي مضبوط ڪيو آهي. مولابخش چانڊيو چيو ته پ پ چيئرمين بلاول ڀٽو زرداري ئي ملڪ ۾ حقيقي نوجوان قيادت ۽ اپوزيشن ليڊر آهي. هن چيو ته سنڌ ۾ بهتري ۽ تبديلي جو دارومدار بلاول ڀٽو تي آهي ۽ هاڻي ملڪ ۾ حقيقي تبديلي به بلاول ئي آڻيندو هن وڌيڪ چيو ته هن وقت ملڪ جو سياسي حالتون آصف زرداري جي سياسي ڏاهپ کي ياد ڪري رهيون آهن .

 

2018ع چونڊن جي تياري ۾ آهيون، پ پ ريڊ لائيٽ ڪراس ڪئي ته اسان به ڪنداسين، بلاول عمران نه بڻجي: خواجا سعد رفيق

ڪراچي (اسٽاف رپورٽر) ريلوي واري وفاقي وزير خواجا سعد رفيق چيو آهي ته ڌرڻي واري دوست کي چوندس ته ان جو ڪراچيءَ ۾ ڪو به مستقبل نه آهي، بلاول صاحب ڪراچيءَ سميت سڄي سنڌ تي ڌيان ڏئي، ڪراچيءَ ۾ ميڊيا سان ڳالهائيندي خواجا سعد رفيق جو چوڻ هو ته عمران خان خيبرپختون خواهه تي ڌيان ڏئي، جيڪو شهر لاڪ ڊائون ڪندو ان جي سياست لاڪ ڊائون ٿي ويندي، ڌرڻا ٽو به جمهوريت خلاف سازش هئي، بدلاءُ سدائين ووٽ وسيلي ئي ايندو آهي، ڪنهن جي پيءُ جو نالو نه وٺو، اوهان ڪراچيءَ کي کنڊر بڻائي ڇڏيو آهي، سي پيڪ ۾ ريلوي جو حصو تمام سٺو آهي، ڪراچيءَ کي پشاور سان ڳنڍي رهيا آهيون، 55 لوڪو موٽو آمريڪا مان اچي رهيون آهن، اوهان وڏي وزير مراد علي شاهه کي ڪم ڪرڻ ڏيو، اسان کي سٺو ٿو لڳي جڏهن مراد علي شاهه ڪم ڪندو آهي، اوهان نه هوڏانهن جا نه ئي هيڏانهن جا رهندؤ، خواجا سعد رفيق پ پ چيئرمين کي مخاطب ڪندي چيو ته بلاول اوهان عمران خان بڻجڻ جي ڪوشش نه ڪريون، ايم ڪيو ايم کي ڪو ٻيو نقصان نه ٿو پهچائي سگھي، ان جي ليڊرن اُن خلاف محاذ بڻائي ڇڏيا آهن، ايم ڪيو ايم جا گھڻا ماڻهو اسان جا دوست آهن، جن ماڻهن الڳ ٿيڻ جو اظهار ڪيو اهي تعريف جوڳا آهن، 2018ع جي چونڊن جي تياري ڪري رهيا آهيون، پيپلز پارٽيءَ ريڊ لائيٽ ڪراس ڪئي ته اسان به ڪنداسين، پيپلز پارتيءَ سان اختلافن باوجود اها جمهوريت جي لاءِ خطرو نه آهي.

 

اسٽيل مل جي اڳوڻي چيئرمين جو قتل: نثار مورائي تي فرد جرم لاڳو، جوابدار جو انڪار

ڪراچي( اي پي پي) پاڪستان اسٽيل مل جي اڳوڻي چيئرمين سجاد حسين جي قتل ڪيس ۾ نامزد فش هاربر جي اڳوڻي چيئرمين نثار مورائي تي عدالت فرد جرم لاڳو ڪري ڇڏيو جڏهن ته ملزم ڏوهه کان انڪار ڪري ڇڏيو. ڪيس جي ٻڌڻي جمعي تي ايڊيشنل ڊسٽرڪٽ ۽ سيشن جج ڏکڻ جي عدالت ۾ ٿي عدالت ايندڙ ٻڌڻي تي ڪيس جي شاهدن کي طلب ڪري ورتو آهي.بعد ۾  ٻڌڻي 12 نومبر تائين ملتوي ڪئي وئي .

 

ڪور ڪمانڊر ڪراچي جي گورنر سنڌ سان ملاقات، امن امان جي صورتحال تي ڳالهيون

ڪراچي(اي پي پي) سنڌ جي گورنر ڊاڪٽر عشرت العباد خان سان ڪور ڪمانڊر ڪراچي فائيو ڪور ليفٽيننٽ جنرل نويد مختار جمعي ڏينهن گورنر هائوس ۾ ملاقات ڪئي. ملاقات ۾ صوبي ۾ امن امان جي مجموعي صورتحال ، شهر ۾ جاري آپريشن ۽ ٻين معاملن تي خيالن جي ڏي وٺ ڪئي. ملاقات ۾ ان عزم جو اظهار ڪيو ويو ته ڪراچي آپريشن آخري دهشت گرد جي خاتمي تائين جاري رکيو ويندو. ان موقعي تي سنڌ جي گورنر چيو ته صوبي ۾ امن قائم ڪرڻ لاءِ رينجرز ۽ قانون لاڳو ڪندڙ ٻين ادارن بيشمار قربانيون ڏنيون آهن جن کي رائيگان ٿيڻ نه ڏنو ويندو.ا

 

پانامه ليڪس معاملي تي سپريم ڪورٽ جو فيصلو قبول ڪنداسين: عمران خان

اسلام آباد (اين اين آءِ) پاڪستان تحريڪ انصاف جي چيئرمين عمران خان چيو آهي ته پانامه ليڪس جي معاملي تي سپريم ڪورٽ جو فيصلو قبول ڪنداسين منهنجا سمورا اثاثا ڊڪليئر ۽ منهنجو نالو آهي عدالت مون کي نااهل قرار ڏنو ته به فيصلو تسليم ڪندس سپريم ڪورٽ جي ريمارڪس کان مطمئن آهيان نوازشريف جا ڪاغذ ادارن تبديل ڪيا آهن ڪارروائي ٿيڻ گهرجي هڪ انٽرويو ۾ هن چيو ته منهنجا سمورا اثاثا ڊڪليئر آهن ۽ منهنجي نالي تي آهن لنڊن ۾ فليٽ منهنجي ليگل ملڪيت آهي مان پنهنجي سمورن اثاثن جي هڪ هڪ پئسي جو حساب ڏيئي سگهان ٿو نوازشريف جو جنهن ٽي او آرز تي احتساب ٿيو ان تي منهنجو به احتساب ڪيو وڃي پانامه ڪيس ۾ نوازشريف جي خاندان جي ڪمپنين جا انڪشاف ٿيا آهن 2006 ۾ مريم نواز ڪمپني جي مالڪ آهي مريم نواز جي پانامه ڪيس ۾ اربين رپين جي ملڪيت نڪتي حسين نواز تصديق ڪئي آهي آءِ سي آءِ ۾ جن ماڻهن جا نالا آيا آهن انهن سڀني تسليم ڪيو آهي ته آفشور ڪمپنين بابت سڄي دنيا جي ماڻهن جا نالا آيا آهن پانامه ليڪس جو معاملو صرف پاڪستان جو نه پر پوري دنيا جو آهي پانامه ڪيس ۾ شريف خاندان جي اثاثن جو ذڪر آيو آهي ان تي منهنجو اعتراض اهو آهي ته هو پئسو غلط طريقي سان ٻاهر موڪليو آهي سپريم ڪورٽ ۾ صرف ٻه ڳالهيون ثابت ڪرڻيون آهن ته مريم نواز کي نوازشريف جي ڪفالت هيٺ ثابت ڪرڻو آهي هن چيو ته ان ڪيس ۾ ادارن جو به ٽرائيل ٿيندو نيب ايف بي آر ايف آءِ اي ماڻهن جا ڪاغذ تبديل ڪيا آهن. ٻئي طرف نوازشريف جي خاندان جي بيانن ۾ تذات آهي اڃا تائين نوازشريف جي نينگرن جا بيان جمع نه ڪرايا آهن ان جو مطلب ڇا آهي ته معاملي کي ٽارڻ چاهين ٿا هن چيو ته پاڪستان جي تاريخ ۾ ڪنهن طاقور کي اڄ ڏينهن تائين سزا نه ملي آهي اسان جو ڪلچر آهي ته ڪمزور ۽ طاقتور لاءِ جدا جدا قانون هوندا آهن.