تازيون خبرون

Daily Archives: November 1, 2016

ڀارتي فوج جي ايل او سي تي فائرنگ، 4 شهري شهيد، 6 زخمي

ڪوٽلي (اين اين آءِ) ڀارتي فورسز پاران هڪ ڀيرو ٻيهر نڪيال سيڪٽر تي ڇتي فائرنگ ڪئي جنهن سبب 4 شهري شهيد ۽ 6 زخمي ٿي پيا، پنجاب رينجرز ڀارتي جارحيت جو ڀرپور جواب ڏنو، آءِ ايس پي آر مطابق ڀارتي فوج نڪيال سيڪٽر ۽ ورڪنگ بائونڊري جون خلاف ورزيون مسلسل جاري آهن، فورسز هڪ ڀيرو ٻيهر جارحيت جو مظاهرو ڪندي ورڪنگ بائونڊري تي هرپال، چڪراڙ ۽ شڪر ڳڙهه سيڪٽر ۾ فائرنگ ڪئي جنهن سبب 4 شهري شهيد ٿي ويا آهن ۽ 9 زخمي ٿيا، جن کي طبي امداد لاءِ سي ايم، ايڇ سيالڪوٽ پهچايو ويو، رينجرز پاران ڀارتي فورسز جو ڀرپور جواب ڏنو ويو.

 

نواز شريف بينظير ڀٽو جي حڪومت ختم ڪرڻ لاءِ اسامه بن لادن کان پئسا ورتاۡ: بلاول ڀٽو

ڪراچي (اسٽاف رپورٽر) پيپلز پارٽيءَ جي چيئرمين بلاول ڀُٽي زرداريءَ چيو آهي ته خراب ماڻهو هر هنڌ موجود آهن، سلام شهدا ريليءَ ۾ وڏي ڏياري ملهائڻ جو اعلان ڪيو ويو هو، پر ڪوئيٽا واقعي تي اها ڏياري تقريب ملتوي ڪئي وئي، ڪراچيءَ ۾ شو مندر ۾ ڏياريءَ جي تقريب ۾ شرڪت ڪرڻ کان پوءِ ميڊيا سان ڳالهائيندي پ پ چيئرمين چيو ته ڪوئيٽا واقعي تي هندو برادريءَ ڏياريءَ جو ڏڻ سادگيءَ سان ملهائڻ جو اعلان ڪيو، اسان امن ۽ جمهوريت پسند آهيون، پاڪستان ۾ مسلمانن سان گڏ اقليتن کي به عبادت جي مڪمل آزادي آهي، اسان سڀ گڏجي دهشتگرديءَ جو مقابلو ڪري سگھون ٿا، وڏو وزير ننڍي عمر جو ۽ اعليٰ تعليم يافتا آهي، سنڌ ۾ جيئن گڏجي سڏجي ڪم ڪيو پيو وڃي، ٻيون حڪومتون ايئن ڪم نه پيون ڪن، نواز شريف ضياءُ الحق جو سياسي پٽ آهي، نواز شريف امير المومنين بڻجڻ پي چاهيو، بينظير ڀٽو جي حڪومت ختم ڪرڻ لاءِ هُن اساما بن لادن کان پئسا ورتا، آرمي پبلڪ اسڪول حملي تي عدالتي جاچ ڪميشن ٺهڻ گھرجي ها، ڪي پي سرڪار حملي جي جاچ لاءِ عدالتي جاچ ڪميٽي نه جوڙي، سڀ ڏسون پيا ته اسلام آباد ۾ ڇا ٿي رهيو آهي، ٻيهر چوان ٿو ته نواز سرڪار منهنجا چار مطالبا مڃي. پاناما بل منظور ڪيو وڃي، احتساب کان سواءِ مُلڪ نه هلي سگھندو، اسان کي عدليا ۽ جمهوريت کي مضبوط ڪرڻو آهي، روڊن تي ۽ پارليامينٽ ۾ وڙهنداسين، پر دهشتگردن کي ڪامياب ٿيڻ نه ڏينداسين، مودي اسان جي فوجين، شهرين کي ماري رهيو آهي پر ڪو به ٻڙڪ به نه ٿو ڪڍي، آمريڪا ۾ اليڪشن وڙهندڙ به موديءَ جا لفظ ڳالهائي رهيو آهي. حڪومت سٺن طالبانن کي سرگرميون ڪرڻ پئي ڏئي، پر اسان ۽ عمران خان جي سرگرمين کي روڪيو ويو آهي، توهان اسان جا يا ملڪ جا وزيراعظم ۽ گھرو وزير نه آهيو توهان سٺن طالبانن جا وزيراعظم ۽ گھرو وزير آهيو، نواز شريف اسان ۽ عمران خان جو نه پر سٺن طالبانن جو وزيراعظم آهي، ميان نواز شريف نه پر پاناما شريف آهي.

 

انتظام ڪريون پيا، اسلام آباد لاڪ ڊائون ڪرڻ نه ڏينداسين: ن ليگ

اسلام آباد(بيورو) ن ليگ اڳواڻن چيو آهي ته اڳواٽ انتظام ڪري رهيا آهيون، اسلام آباد لاڪ ڊائون ڪرڻ نه ڏينداسين. اسلام آباد ۾ پريس ڪانفرنس ڪندي ن ليگ اڳواڻ محمد زبير چيو ته لاڪ ڊائون ملڪي تاريخ ۾ پهريون ڀيرو ٿي رهيو آهي ۽ توهان چئو ٿا ته وٺ پڪڙ نه ڪريون. هن چيو ته احتجاج ڀلي ڪن پر هُنن جيڪي ڌمڪيون ڏنيون آهن اهي سڀني جي سامهون آهن. هن چيو ته اسان کي عمران خان سان همدردي آهي، هنن 10 لک ماڻهو آڻڻ جو چيو بني گالا ۾ هن وقت 15 سئو ماڻهو مس ويٺا آهن. محمد زبير موجب عمران خان جي احتجاج جي ڪال به مايوس ڪندڙ هئي، توهان معمول جي زندگي کي معطل ڪري نٿا سگھو. شهرين کي حقن کان نٿو روڪي سگھجي. هن چيو ته عدالت به چيو آهي، تحريڪ انصاف فيصلو مڃڻ کان انڪار ڪري ڇڏيو. هنن کي خاص جڳهه ڏيون ٿا اتي جيترو وڻين احتجاج ڪن. ان موقعي تي دانيال عزيز چيو ته جنهن جو نالو ئي پاناما ليڪس ۾ ناهي ان خلاف احتجاج ڪرڻ اچي رهيا آهن. پرويز الاهي جي پٽ جو نالو به پاناما پيپرز ۾ آهي.

 

جيل وڃڻ لاءِ تيار آهيان، ڪارڪن سان گڏجي وڙهنداسين: عمران خان

اسلام آباد (اين اين آءِ) پي ٽي آءِ جي اڳواڻ عمران خان چيو آهي ته ڪارڪنن جي گرفتاري تي سپريم ڪورٽ پاڻمرادو نوٽيس وٺي گرفتاريون نه پر ڪارڪنن کي اغوا ڪيو پيو وڃي آصف علي زرداري منافق نه آهي شريف ڀائر منافق آهن 2018 تمام پري آهي ان کان اڳ گهڻو ڪجهه ٿيڻ وارو آهي. ڪارڪن تيار آهن اسان گڏجي وڙهنداسين نوازشريف جي جمهوريت کان پرويز مشرف جي آمريت بهتر هئي پهرين نمبر تي منهنجو سپريم ڪورٽ وڃڻ جو ارادو آهي سومر تي ميڊيا سان ڳالهائيندي هن چيو ته اهي گرفتاري نه پر اغوا آهي ماڻهن جي جمهوري حق تي ڌاڙو هنيو پيو وڃي ماڻهن کي گهرن مان ڪهڙي قانون تحت کنيو پيو وڃي هن چيو ته نوازشريف کي نه جمهوريت سمجهڻ اچي ٿي ۽ نه ئي هو جمهوريت چاهي ٿو هن چيو ته ان لاءِ اها جمهوريت آهي ته ڌانڌلي ڪيو اقتدار ۾ اچو ملڪ کي لٽيو پئسو ٺاهيو ۽ پئسو ٻاهر موڪليو ڇو ته ان جا ٻار ٻاهر ويٺا آهن ۽ ڪاروبار به ٻاهر آهي هن چيو ته جڏهن به ان جي ڪرپشن تي ڳالهه ڪئي وڃي ته چوي ٿو ته جمهوريت سي پيڪ ۽ ترقي کي خطرو لاحق ٿي ويو آهي عمران خان چيو ته ڪنهن آمر ايتر ظلم ڪيو جيترو هي حڪومت ڪري رهي آهي ماڻهن جي گهرن جا دروازا ٽوڙي انهن کي کنيو پيو وڃي اڳوڻي صدر آصف زرداري جي حوالي سان هن چيو ته آصف زرداري منافق نه هو هن ڪڏهن به نه چيو ته قوم جو پئسو واپس آڻينداسين پر هي ٻئي ڀائر منافق آهن هن چيو ته نيب ۽ ايف بي آر ۾ پنهنجي مرضي جا اڳواڻ مقرر ڪيا ته جيئن اها انهن کي پڪڙي نه سگهي. سپريم ڪورٽ ۾ پانامه ليڪس جي حوالي سان ڪيس جي ٻڌڻي بابت عمران خان چيو ته پهرين نومبر تي سپريم ڪورٽ وڃڻ جو ارادو آهي. هڪ سوال جي جواب ۾ هن چيو ته منهنجي ڀيڻ ۽ ان جا ٻارڙا آيل آهن جيڪي منهنجا ٻچا آهن.

 

پي ٽي آءِ اڳواڻن وٽان هٿيار هٿ اچڻ بدامني ڦهلائڻ کي ظاهر ڪيو، حڪومت رٽ تي ٺاهه نه ڪندي: خواجا آصف

اسلام آباد (بيورو) بچاءَ واري وفاقي وزير خواجا آصف چيو آهي ته هاءِ ڪورٽ جي سڏائڻ باوجود عمران خان عدالت نه ويو، پي ٽي آءِ جي قيادت ۾ سوچڻ ۽ سمجھڻ جي اڻاٺ آهي، اسان عدالتن جي فيصلن جو احترام ڪندا آهيون، اسلام آباد ۾ ميڊيا سان ڳالهائيندي بچاءَ واري وزير خواجا آصف جو چوڻ هو ته حڪومت پنهنجي رِٽ تي ڪو ٺاهه نه ڪندي، عوام ڌرڻن ۽ احتجاج جي سياست کي رد ڪري ڇڏيو آهي، پي ٽي آءِ اڳواڻن وٽان هٿيار هٿ اچڻ بد امني ڦهلائڻ کي ظاهر ڪري رهيو آهي، خواجا آصف چيو ته ڌرڻي کي احتجاج تائين محدود رکڻو پوندو، ڏُڦيڙ ڦهلائڻ نه ڏينداسين، احتجاج جي آڙ ۾ شهرين جي زندگي مفلوج ڪرڻ نه ڏينداسين، پورو يقين آهي ته حڪومت پنهنجو آئيني مُدو پورو ڪندي.

 

عمران خان اسلام آباد کي لاڪ ڊائون ڪرڻ جو چيو، اتان جي شهرين جا حق به آهن: اسحاق ڊار

اسلام آباد (بيورو) خزاني واري وفاقي وزير اسحاق ڊار چيو آهي ته اوگرا پيٽروليم شين جي قيمتن ۾ واڌ جي سمري موڪلي آهي، وزيراعظم نومبر ۾ پيٽروليم شين جون قيمتون برقرار رکڻ جي هدايت ڪئي آهي، اسلام آباد ۾ ميڊيا سان ڳالهائيندي اسحاق ڊار چيو ته عمران خان اسلام آباد کي لاڪ ڊائون ڪرڻ جو چيو هو، اسلام آباد جي شهرين جا حق به آهن، عدالتاحتجاج جي لاءِ هڪ خاص هنڌ مقرر ڪيو آهي، سڀاڻي ڪابينا ۾ بل پيش ڪيو ويندو، جنهن ۾ پاناما تي قانون سازي به شامل هوندي، بل ۾ پاناما ۽ بهاماس سميت 9 معاملا شامل هوندا، بل تحت ايف بي آر پرڏيهي وزارت کان پرڏيهي ڪمپنين جي ڄاڻ وٺي سگھندي، بل تحت پرڏيهي ڪمپنيءَ جا عملدار ايس اي سي پي کي جواب ڏيندي، بل ڪمپنيءَ جي مالڪن ۽ شيئر هولڊرن کي به گھيري ۾ آڻيندي، اسحاق ڊار چيو ته پاڪستان ۾ رهندڙ پرڏيهي ڪمپنين جا مالڪ ايس اي سي پي ۾ رجسٽرڊ ٿيندا، ايس اي سي پي پرڏيهي ڪمپنين جي مالڪن، شيئر هولڊرن کان جواب طلب ڪري سگھي ٿي. پرڏيهي ڪمپنين کي قانون جي دائري ۾ آڻينداسين، بل سان ايس اي سي پي جي قانون جي ڪم واري دائري ۾ واڌ ٿيندي.ڪمپنين جي 100 سيڪڙو ضم ڪرڻ جي لاءِ ڪنهن اجازت جي ضرورت نه پوندي، بل ۾ فيبروري زون ڪمپنينن بابت شق به شامل ڪيا ويا آهن، بل ۾ زراعت بابت قانون سازي به شامل آهي.

 

اسيمبلي ميمبرن جي گرفتاري غير قانوني آهي، حڪومت ڌمڪين کان ڪم نه وٺي: خورشيد شاهه

اسلام آباد(بيورو) مخالف ڌر اڳواڻ سيد خورشيد شاهه پي ٽي آءِ جي احتجاج دوران اسيمبلي ميمبرن جي گرفتارين کي غير قانوني قرار ڏيندي چيو آهي ته حڪومت ڌمڪين کان ڪم وٺي رهي آهي. پنهنجي هڪ بيان ۾ قومي اسيمبلي ۾ اپوزيشن ليڊر سيد خورشيد احمد شاهه چيو ته هي ملڪ چئن برادرين تي ٻڌل آهي، هر برادريءَ کي برابري جا حق حال آهن. هن چيو ته اسيمبلي ميمبرن جي گرفتاري غير قانوني آهي، انهن کي فوري طور آزاد ڪيو وڃي. خورشيد شاهه وڌيڪ چيو ته پارليامينٽ ميمبرن جي گرفتاري کان اڳ اسپيڪر يا سينيٽ چيئرمين کان اجازت وٺڻي هوندي آهي. حڪومت سمورا ضباطا پوئتي رکندي ڌمڪين کان ڪم وٺي رهي آهي. هن چيو ته ڪي پي ڪي جو رستو روڪڻ خطرناڪ راند آهي. حڪومت جي هن قدم سان وفاق کي وڏو نقصان پهچندو.

 

سنڌ حڪومت آتشگير مادي واري ليب قائم ڪرڻ لاءِ 8 ملين رپين جي منظوري ڏئي ڇڏي

ڪراچي (اسٽاف رپورٽر) سنڌ جو وڏو وزير سيد مراد علي شاهه آتشگير مادي واري ليب (Explosive Lab) کي قائم ڪرڻ لاءِ 8 ملين رپين جي منظوري ڏني ۽ شهر ۾ فرانزڪ ليب لاءِ مناسب زمين جي انتظام ڪرڻ جي به اجازت ڏني. هن اهو فيصلو اڄ وزيراعليٰ هائوس ۾ ايندڙ اپيڪس ڪميٽي جي تياريءَ لاءِ رٿيل اجلاس جي صدرات ڪندي ڪيو. اجلاس ۾ صوبائي قانون وارو صلاحڪار مرتضيٰ وهاب، چيف سيڪريٽري سنڌ محمد صديق ميمڻ، آءِ جي پوليس اي ڊي خواجا، گهرو سيڪريٽري شڪيل مڱڻيجو، ايڊيشنل آءِ جي (سي ٽي ڊي) ثناءُ الله عباسي، ايڊيشنل آءِ جي ڪراچي مشتاق مهر، ڪمشنر ڪراچي اعجاز خان، ايڊووڪيٽ جنرل سنڌ ضمير گهمرو، پراسيڪيوٽر جنرل شهادت اعواڻ ۽ ٻين شرڪت ڪئي. وڏي وزير سيد مراد علي شاهه چيو ته اپيڪس ڪميٽيءَ ۾ عيدالاضحيٰ جي موقعي تي کلون گڏ ڪرڻ لاءِ ڀلائي وارين تنظيمن کي ان شرط تي اين او سي جاري ڪيون هيون ته اهي پنهنجا اڪائونٽس آڊٽ ڪرائيندا، هن چيو ته ان حوالي سان ڪهڙي اڳڀرائي ٿي آهي؟ ان تي چيف سيڪريٽري صديق ميمڻ چيو ته هن ڪمشنرن کي هدايتون جاري ڪيون هيون. ان موقعي ڪمشنر ڪراچي اعجاز خان چيو ته هن کلون گڏ ڪرڻ لاءِ ڀلائي وارين تنظيمن کا 687 اين او سي جاري ڪيون هيون. وڏي وزير چيو ته هُو تنظيمن کي هدايت ڪري ته اهي ان مان حاصل ٿيندڙ رقم جو آڊٽ ڪرائن ۽ سندس رپورٽ پيش ڪئي وڃي. تعمير هيٺ دهشتگردي ٽوڙ عدالتن بابت ڳالهائيندي چيف سيڪريٽريءَ چيو ته سينٽرل جيل ۾ ڇهه عمارتون تيار آهن جتي عدالتون لڳائي سگهجن ٿيون. آءِ جي پوليس اي ڊي خواجا چيو ته هن ڇهه سئو پوليس اهلڪارن کي مقرر ڪيو آهي، جن کي جيل پوليس ڪوٺيو ويندو آهي جيڪي پڇا ڳاڇا ٿيندڙ قيدن / انڊر ٽرائل قيدي (يو ٽي پيز) کي سينٽرل جيل مان ڪلفٽن ۾ واقع اي ٽي سي ڪورٽس ۾ ٻڌڻيءَ لاءِ آڻيدا آهن. ان تي وڏي وزير چيو ته اهو تمام گهڻو خطرناڪ ۽ حساس معاملو آهي ته يو ٽي پيز جي اي ٽي سي ڪورٽ ڪلفٽن ٻڌڻيءَ لاءِ روزاني موڪليو وڃي، جڏهن اهي دهشتگرديءَ وارا ڪيسز انڊر ٽرائل قيدي (يو ٽي پي) اتي (اي ٽي سي ڪورٽس) پهچندا آهن ته ڪجهه ڪلاڪن لاءِ قيام ڪندا آهن جيڪو اڃا وڌيڪ خطرناڪ هوندو آهي، انڪري مان اوهان کي اها صلاح ڏيندس ته ڇهه دهشتگردي ٽوڙ عدالتون سينٽرل جيل ۾ قائم ڪري نئين عمارتن ۾ منتقل ڪيون وڃن. هن چيو ته ان مرحلي تي جڏهن اسان دهشتگردن ۽ ملڪ دشمنن سان وڙهي رهيا آهيون ته اسان اهڙو خطرو ڪيئن وٺي سگهون ٿا. هن چيف سيڪريٽريءَ تي زور ڀريو ته ايندڙ ٽن مهيننن اندر ٻيون 14 عدالتي عمارتون تيار ٿي وينديون جتي نيون اي ٽي سي ڪورٽس قائم ڪري سگهجن ٿيون. هن پنهنجي پرنسپل سيڪريٽري نويد ڪامران بلوچ کي هدايت ڪئي ته هُو ڪانٽريڪٽنگ فرم سان گڏجي رابطو ڪري ايندڙ ٽن مهينن اندر 14 اي ٽي سي جون تيار ٿيندڙ عمارتون حاصل ڪري. وڏي وزير سيد مراد علي شاهه گذريل اپيڪس ڪميٽي جيڪا 31 آگسٽ تي منعقد ٿي هئي ان جو جائزو وٺندي چيو ته فرانزڪ ليب قائم ٿيڻي هئي؟ ان تي آءِ جي پوليس اي ڊي خواجا ٻڌايو ته هن فرانزڪ ليب لاءِ محفوظ علائقي ۾ هڪ مناسب زمين جي ڳولها ڪري رهيو آهي ۽ هن چيو ته جيڪڏهن حڪومت 8 ملين رپين جي منظوري ڏئي ته هُو هڪ ايڪسپلوسو ليب قائم ڪري سگهي ٿو. وڏي وزير سيد مراد علي شاهه رقم جي منظوري ڏيندي آءِ جي سنڌ کي ان مامري تي عمل ڪرائڻ هدايت ڪئي. سنڌ جي وڏي وزير کي اپيڪس ڪميٽيءَ جي ٻين فيصلن انسداد فساد (Anti-Riot Unit) جي قيام بابت ٿيل اڳڀرائي بابت ٻڌاائيندي آءِ جي پوليس چيو ته هُو ابتدائي طور تي 2 اينٽي رائٽ يونٽ هڪ سائوٿ ۽ ٻيو حيدرآباد ۾ قائم ڪري هيو آهي جنهن جي افرادي قوت 300 نڪوس تي ٻڌل هوندي. گهرو سيڪريٽري شڪيل منڱڻيجي ٻڌايو ته هُو ڊويزنل هيڊ ڪوارٽرز ۾ اينٽي رائٽ يونٽ جي قيام لاءِ ڪم ڪري رهيو آهي. ان تي وڏي وزير آءِ جي پوليس ۽ گهرو سيڪريٽريءَ کي هدايت ڪئي ته اهي هڪ ٻيو اينٽي رائٽ يونٽ ڪراچيءَ ۾ قائم  ڪن. گذريل اپيڪس ڪميٽيءَ ۾ فيصلو ڪيو ويو هو ته رجسٽرڊ ڪمپنين پاران جيڪو آتشگير مادو وڪرو ڪيو پيو وڃي ان جي چڪاس ڪئي ويندي. ان تي چيف سيڪريٽريءَ چيو ته مون سمورن ڪمشنرز کي هدايتون جاري ڪيون آهن ته اهي مارڪيٽ ۾ آتشگير مادي جي خريد ۽ فروخت جي مانيٽرنگ ڪري ۽ ان جي وقت بوقت رپورٽ پيش ڪئي وڃي. سمورن قسمن جي گاڏين، موٽرسائيڪلن ۾ سڪيورٽي فيچر بشمول ٽريڪنگ سسٽم جي حامل نيون نمبر پليٽس کي متعارف ڪرائڻ بابت چيف سيڪريٽريءَ چيو ته ايڪسائيز اينڊ ٽيڪسيشن کاتي سان مشاورتي عمل شروع ڪيو آهي. وڏي وزير چيف سيڪريٽريءَ کي هدايت ڪئي ته ان بابت ٿيل پيش رفت کي تيز ڪري ۽ ان تي عملدرآمد کي يقيني بڻائي. آءِ جي سنڌ وڏي وزير کي ٻڌايو ته سي پي ايس سي رٿائن لاءِ 1100 اهلڪارن تي ٻڌل فورس جوڙي وئي آهي جڏهن ته باقي 900 اهلڪارن جي ڀرتيءَ وارو ڪم جاري آهي. انهيءَ کان اڳ آءِ جي پوليس ۽ ايڊيشنل آءِ جي (سي ٽي ڊي) پوليس ثناءُ الله عباسيءَ ناظم آباد واقعي بابت بريفنگ ڏني ۽ هن ٻڌيو ته ڪجهه شڪي ماڻهن کي گرفتار ڪيو ويو آهي ۽ ان مامري جي مختلف پاسن کان جاچ جاري آهي، ان تي وڏي وزير سيد مراد علي شاهه آءِ جي پوليس کي هدايت ڪئي ته هُو ٻين ايجنسين سان به رابطو ڪري ۽ ڪيس کي فوري حل ڪيو وڃي ۽ هن چيو ته اهو هڪ ٻئي پٺيان چوٿون واقعو آهي ۽ ان کي نظر انداز نه ٿو ڪري سگهجي. هن چيو ته ان حوالي سان پنهنجي ڪارڪردگي ڏيکاريو.

 

ميان صاحب پنهنجو اقتدار بچائڻ لاءِ وفاق کي داءَ تي لڳائي رهيو آهي: مولا بخش چانڊيو

ڪراچي (م.ڊ) وڏي وزير جي سڌ سماءَ بابت صلاحڪار مولا بخش چانڊئي چيو آهي ته هڪ صوبي جي وڏي وزير کي تشدد وسيلي روڪي ڪهڙو پيغام ڏنو پيو وڃي، ضياءَ جي باقيات هڪ ڀيرو ٻيهر وفاق کي نقصان پهچائي رهي آهي، ڪراچيءَ ۾ صحافين سان ڳالهائيندي مولا بخش چانڊئي جو چوڻ هو ته ملڪ کي رڳو هڪ وڏي صوبي جي مخصوص ٽولي جي ملڪيت بڻايو پيو وڃي، ڪي پي ڪي جي وڏي وزير تي تشدد وفاق کي ڪمزور ڪري ڇڏيندو، ميان صاحب جا نوَ رتن کيس انڌي کاهيءَ ۾ ڌڪي چڪا آهن، چئني صوبن جي ڪڙين کي ٽوڙيو پيو وڃي، ميان صاحب پنهنجو اقتدار بچائڻ جي لاءِ وفاق کي داءَ تي لڳائي رهيو آهي، حڪومت طاقت جي نشي ۾ مست هاٿي بڻجي وئي آهي.

 

اڳ مشاهد الله ۽ هاڻي پرويز رشيد کي قرباني جو ٻڪرو بڻايو ويو آهي: اعتزاز احسن

لاهور (اين اين آءِ) پاڪستان پيپلزپارٽي جي مرڪزي اڳواڻ اعتزازاحسن چيو آهي ته مسلم ليگ (ن) پاران پنهنجو اقتدار بچائڻ لاءِ ظلم ڪيو پيو وڃي پرويز رشيد کي قرباني جو ٻڪرو بڻايو ويو اصل ۾ خبر ليڪ ڪندڙ ڪو ٻيو آهي پي ٽي آءِ جي احتجاج جو ايترو اڀري اڳيان اچڻ حڪومت جي نااهلي آهي پانامه ليڪس ۾ ايندڙ نالن جو احتساب هر صورت ۾ ٿيڻ گهرجي جاچ مڪمل ٿيڻ تائين اخلاقي طور تي حڪمران خاندان جي ڪنهن به ماڻهو کي وزيراعظم جي عهدي تي نه ويهڻ گهرجي اهڙن خيالن جو اظهار هن سپريم ڪورٽ بار جي چونڊن ۾ ووٽ وجهڻ جي موقعي تي ميڊيا سان ڳالهائيندي ڪيو هن چيو ته (ن) ليگ جي لاءِ اقتدار پاڪستان ۽ وفاق کان به وڌيڪ قيمتي آهي ان جي لاءِ ملڪي سالميت کان وڌيڪ اقتدار اهم آهي ۽ اهو ملڪ جي بجاءِ پنهنجي اقتدار کي بچائڻ چاهين ٿا هن چيو ته (ن) ليگ وارا هميشه ڪمزورن کي قرباني جو ٻڪرو بڻائيندا آهن. گذريل دفعي مشاهدالله کي قرباني جو ٻڪرو بڻايو ويو ۽ هاڻي پرويز رشيد کي به انهيءَ سلسلي ۾ ماريو ويو خبر پرويز رشيد ليڪ ناهي ڪئي پر اصل ۾ خبر ليڪ ڪندڙ ڪو ٻيو آهي ان کي هر صورت ۾ بي نقاب ٿيڻ گهرجي. خبر ڏيڻ وارو پرويز رشيد کان وڌيڪ طاقتور آهي. هن چيو ته قومي سلامتي جون ڳالهيون (ن) ليگ جي دور ۾ سڀ کان وڌيڪ ٿينديون آهن پاڪستان پيپلزپارٽي پنج سال گذاريا پر قومي سلامتي جي نالي تي ڪنهن به قسم جو انتشار نه ڦهليو اسان جي خلاف ميموگيٽ اسڪينڊل بڻايو ويو پر ان مان ڪجهه به حاصل نه ٿيو هن چيونڊيل وزيراعظم کي خط نه لکڻ تي ڊي سيٽ ڪيو ويو حالانڪه قانوني موقف اپنايو ته هو پنهنجي ملڪ جي وزيراعظم کي ڪنهن پرڏيهي مئجسٽريٽ جي سامهون  پيش ڪرڻ جو نٿو چئي سگهي هن چيو ته پي ٽي آءِ جو احتجاج ايترو اڀري اڳيان آيو جو حڪومت جي نااهلي آهي حڪومت لاڪ ڊائون کان پهريان اسلام آباد ويندڙ سمورا رستا بند ڪري ڇڏيا ۽ وفاق کي صوبن کان ڪٽي ڇڏيو هن چيو ته وزيراعظم جي تبديلي جي صورت ۾ (ن) ليگ جنهن کي به وزيراعظم بنائڻ چاهي ٿي اهو ان جو اندروني معاملو آهي پاڪستان پيپلزپارٽي پنهنجي موقف تي قائم آهي ته پانامه ليڪس ۾ ايندڙ نالن جو احتساب هر صورت ۾ ٿيڻ گهرجي.