تازيون خبرون

Monthly Archives: November 2016

نئين سپهه سالار ڪمان سنڀالي ورتي، لائن آف ڪنٽرول جي صورتحال جلد بهتر ٿي ويندي: جنرل باجوا

راولپنڊي(م.ڊ)  نئين چيف آف  آرمي اسٽاف جنرل قمر جاويد باجوه پاڪ فوج جي ڪمان سنڀالي ورتي. رٽائر ٿيندڙ  آرمي چيف جنرل راحيل شريف روايتي ڇڙي نئين آرمي چيف جنرل قمر جاويد باجوه جي حوالي ڪئي. پاڪ فوج جي ڪمان جي تبديلي جي اهم تقريب جي ايڇ ڪيو سان لاڳاپيل آرمي هاڪي اسٽيڊيم ۾ ٿي، ان سان گڏ ئي پاڪ فوج ۾ اعليٰ عهدن تي تبديلين جو اهم مرحلو مڪمل ٿي ويو. تقريب ۾ اسپيڪر قومي اسيمبلي اياز صادق، دفاع وارو وزير خواجا آصف، مملڪتي وزير دفاع ۽ پيداوار رانا تنوير، پرڏيهي صلاحڪار سرتاج عزيز،  وزير سيفرون عبدالقادر بلوچ، مملڪتي وزير سڌ سماءَ ۽ نشريات مريم اورنگزيب سوڌو پارليامينٽ جي ميمبرن شرڪت ڪئي. پاڪ فوج جي تبديلي ڪمان جي تقريب ۾ چيئرمين جوائنٽ چيفس آف اسٽاف ڪميٽي جنرل زبير حيات، هوائي ۽ سامونڊي فوج جا سربراهه، پرڏيهي ملڪن جا سفارتڪار ۽ اڳوڻي آرمي چيف  جنرل اشفاق پرويز  ڪياني سوڌو رٽائرڊ فوجي آفيسر ۽ انهن جا گهرڀاتي به شريڪ هئا. ان موقعي تي تقريب جي خاص مهمان جنرل راحيل شريف کي فرنٽيئر فورس رجمنٽ جي جٿي ۽ جنرل قمر جاويد باجوه کي بلوچ رجمنٽ جي جٿي سلامي ڏني، نئين فوجي سربراهه جو واسطو بلوچ رجمنٽ سان آهي. نئين مقرر ٿيل آرمي چيف جنرل قمر جاويد باجوا چيو آهي ته لائن آف ڪنٽرول جي صورتحال جلد بهتر ٿي ويندي، مون تي وڏي ذميوار اچي وئي آهي، ميڊيا پاڪ فوج جي عظمت کي بلند رکي، پاڪ فوج جي ڪمان سنڀالڻ کانپوءِ صحافين سان ڳالهائيندي جنرل قمر جاويد باجوا چيو آهي ته ميڊيا ۾ مايوسي جون ڳالهيون نه ٿيڻ گهرجن، جلد توهان سان ملندس ۽ صحافين کي گڏ کڻي هلندس. تقريب جي پڄاڻي تي آرمي چيف جنرل قمر جاويد باجوا تقريب ۾ شامل ٿيندڙن سان ملندو رهيو، هو شهيدن جي وارثن سان مليو ۽ ٻارڙن سان هٿ ملايو، تقريب ۾ شامل ٿيندڙ مهمانن آرمي چيف سان تصويرون پڻ ڪڍرايون.

 

صبر جي پاليسي کي ڪمزوري سمجهڻ ڀارت لاءِ خطرناڪ ثابت ٿيندو: جنرل راحيل شريف

راولپنڊي(م.ڊ)  آرمي چيف جنرل راحيل شريف چيو آهي ته خطي ۾ سيڪيورٽي جي حالت ڏکي آهي، سي پيڪ جا دشمن پنهنجي ڪوششن کي رد ڪري ان جي فائدي ۾ شامل ٿين، جي ايڇ ڪيو جي آرمي هاڪي اسٽيڊيم ۾ پاڪ فوج جي اڳواڻ جي تبديلي واري تقريب ۾ بطور آرمي چيف آخري خطاب ۾ راحيل شريف ڀارت سان مخاطب ٿيندي چيو ته اسان جي صبر جي پاليسي کي ڪمزوري سمجهڻ سندس لاءِ خطرناڪ ثابت ٿيندو، هن چيو ته دهشتگردي خلاف جنگ ۾ ڪاميابي جا نتيجا ملي رهيا آهن، فوج جي ساٿ ڏيڻ سان سياسي قيادت، انٽيليجنس ادارن، قوم ۽ ميڊيا جو ٿورائتو آهيان. هن جو وڌيڪ چوڻ هو ته دهشتگردي خلاف جنگ وڙهي اسان تاريخ کي موڙي ڇڏيو آهي، سي پيڪ، ضرب عضب ۽ ڪراچي آپريشن جهڙا فيصلا ڪندي قومي مفادن کي ترجيح ڏني، پڪو يقين اٿم ته پاڪ فوج قوم جي اعتماد تي هميشه پورو لهندي. راحيل شريف چيو ته پرڏيهي خطرن سان منهن ڏيڻ لاءِ اندروني خطرن، ڏوهاري عنصرن، ڪرپشن ۽ انتهاپسندي کان نجات حاصل ڪرڻي پوندي، نيشنل ايڪشن پلان تي ان جي روح مطابق عمل کي به لازمي بڻائڻو پوندو.

 

خيرپور ۽ جيڪب آباد ۾ ڪارنهن الزامن تحت 2 نارين سميت 4 قتل

جيڪب آباد/خيرپور(نمائندن وٽان) جيڪب آباد جي صدر ٿاڻي جي حد ڳوٺ رسول بخش ويسر ۾ جوابدار مشتاق عرف ڀٽو ويسر پنهنجي نوجوان ڪنواري ڌيءَ 17 ورهين جي گلبانو ۽ سوئٽ جي پٽ 18 ورهين جي نوجوان در محمد پٽ حاڪم علي ويسر کي ڪارنهن الزام هيٺ قتل ڪري ڇڏيو ۽ صدر ٿاڻي جي پهچي گرفتاري پيش ڪري ڏوهه جو اعتراف ڪري ورتو. جوابدارن پاران ٿاڻي جي پهچي اطلاع ڏيڻ کانپوءِ حد جي پوليس واقعي واري هنڌ پهچي ٻنهي مقتولين جا لاش پنهنجي تحويل ۾ وٺي سول اسپتال جيڪب آباد پهچايا، جتي ڊاڪٽرن پاران لاشن جو پوسٽ مارٽم ڪرڻ کانپوءِ وارثن حوالي ڪيا ويا. ان سلسلي ۾ رابطو ڪرڻ تي صدر پوليس ٻڌايو ته جوابدار مشتاق عرف ڀٽو پنهنجي نوجوان ڌيءَ 17 ورهين جي گلبانو کي ڪارنهن الزام هيٺ گهٽا ڏيئي قتل ڪري ڇڏيو جڏهن ته سوئٽ جي پٽ در محمد ويسر کي ڏنڊا هڻي قتل ڪري ڇڏيو ۽ ٿاڻي تي پهچي گرفتاري پيش ڪندي پنهنجي ڏوهه جو اعتراف ڪندي چيو ته پنهنجي نياڻي گلبانو کي پنهنجي سوئٽ جي پٽ درمحمد سان اعتراض جوڳي حالت ۾ ڏٺو ته برداشت نه ڪري سگهيس ۽ ٻنهي کي ڪارو ڪري قتل ڪري ڇڏيو آهي. صدر پوليس موجب جوابدار مشتاق ويسر خلاف گناهه نمبر 199 هيٺ سرڪار پاران ايس ايچ او اياز علي پٺاڻ جي فرياد تي ٻٽي قتل جو ڪيس داخل ڪري ورتو آهي. ٻي طرف خيرپور لڳ ڳوٺ پيروسڻ ۾ چاچي ڪارنهن جو الزام هڻي پنهنجي شادي شدا ڀائيٽي کي پنهنجي ڀائٽي سان ڪهاڙين جا وار ڪري قتل ڪري ڇڏيو. پوليس جوابدار کي گرفتار ڪري ورتو آهي. پوليس کي بيان ڏيندي جوابدار ٻڌايو ته کيس پنهنجي ڀائيٽي ۽ ڀائٽي تي شڪ هو، اڄ ٻنهي کي گڏ ويٺي ڪچهري ڪندي ڏٺم، ڪاوڙ مان ٻنهي کي ڪمري ۾ بند ڪري مون مارڪٽ شروع ڪري ڏني ته هنن مون تي حملو ڪرڻ جي ڪوشش ڪئي، جنهن تي مون ڪاوڙ ۾ اچي ٻنهي کي ڪهاڙين جا وار ڪري قتل ڪري ڇڏيو. مارجي ويل نوجوان جي سڃاڻپ جعفر نالي ٿي آهي. جنهن جي عمر 32 سال آهي. ايندڙ مهيني سندس شادي رٿيل هئي. واقعي کان پوءِ پوليس جوابدار کي ڪهاڙي سميت گرفتار ڪري لاش پوسٽ مارٽم لاءِ اسپتال موڪلي، وڌيڪ جاچ شروع ڪري ڏني آهي.

 

جنرل زبير محمود حيات جي وزيراعظم ۽ صدر سان ملاقات، مختلف معاملن تي ڳالهيون

اسلام آباد(بيورو)  وزيراعظم نواز شريف جي صدارت هيٺ وفاقي ڪابينا جي توانائي ڪميٽي جي اجلاس ۾ بجلي منصوبن جو جائزو ورتو ويو، وزيراعظم چيو آهي ته حڪومت سنڀالڻ وقت بجلي جو بحران هو، هاڻي صنعتن لاءِ لوڊشيڊنگ زيرو آهي، بجلي ورڇ واري سسٽم ۾ پيدا ٿيل خرابيون ختم ڪرڻيون پونديون. اجلاس دوران وزيراعظم کي بريفنگ ڏني وئي ته سال 2017 ۽ 2018ع دوران اڪثر توانائي منصوبا مڪمل ٿي ويندا، جنهن ڪري بجلي لوڊشيڊنگ ۾ گهڻي حد تائين گهٽتائي اچي ويندي. بريفنگ ۾ چيو ويو ته شهري ۽ ٻهراڙي وارن علائقن ۾ لوڊشيڊنگ گهڻِي حد تائين گهٽجي وئي آهي، حڪومت ختم ٿيڻ تائين مهانگي بجلي خريد ڪرڻ تي نه ڀاڙڻو پوندو.

 

حڪومت سنڀالڻ وقت بجلي جو بحران هو، هاڻي صنعتن لاءِ لوڊشيڊنگ زيرو آهي: نواز شريف

اسلام آباد(بيورو)  وزيراعظم نواز شريف جي صدارت هيٺ وفاقي ڪابينا جي توانائي ڪميٽي جي اجلاس ۾ بجلي منصوبن جو جائزو ورتو ويو، وزيراعظم چيو آهي ته حڪومت سنڀالڻ وقت بجلي جو بحران هو، هاڻي صنعتن لاءِ لوڊشيڊنگ زيرو آهي، بجلي ورڇ واري سسٽم ۾ پيدا ٿيل خرابيون ختم ڪرڻيون پونديون. اجلاس دوران وزيراعظم کي بريفنگ ڏني وئي ته سال 2017 ۽ 2018ع دوران اڪثر توانائي منصوبا مڪمل ٿي ويندا، جنهن ڪري بجلي لوڊشيڊنگ ۾ گهڻي حد تائين گهٽتائي اچي ويندي. بريفنگ ۾ چيو ويو ته شهري ۽ ٻهراڙي وارن علائقن ۾ لوڊشيڊنگ گهڻِي حد تائين گهٽجي وئي آهي، حڪومت ختم ٿيڻ تائين مهانگي بجلي خريد ڪرڻ تي نه ڀاڙڻو پوندو.

 

بلاول هاڻي پارليامينٽ جي پليٽ فارم تان جمهوري جدوجهد جي قيادت ڪندو: آصف علي زرداري

اسلام آباد(بيورو)  اڳوڻي صدر آصف علي زرداريءَ پيپلز پارٽيءَ جي يوم تاسيس جي موقعي تي پنهنجي پيغام ۾ چيو آهي ته اهو خوشيءَ جو ڏينهن هجڻ سان گڏ تقاضا ڪري ٿو ته اسان پاڻ کي مضبوط ڪيون، ان موقعي تي آصف زرداريءَ پيپلز پارٽيءَ جي 49 هين يوم تاسيس تي ڪارڪنن کي واڌايون به ڏنيون. هن وڌيڪ چيو ته اهو ڪارڪنن جو مطالبو آهي جنهن جي حمايت ٿو ڪريان، بلاول هاڻي پارليامينٽ جي پليٽ فارم تان جمهوري جدوجهد جي قيادت ڪندو، اسان جي پارٽي جا 2 اصول جمهوريت اسان جي سياست، طاقت جو سرچشمو عوام آهي انهن اصولن ۽ مشن جي لاءِ پارٽي جي ٻن سربراهن جانين جو نذرانو پيش ڪيو، اسان جا اصول ماڻهن جي شعور ۾ ڊوڙي رهيا آهن، هر صورت ۾ سٺي ڪارڪردگي، عوام جا مسئلا حل ڪرڻ جي ضرورت آهي، جدوجهد ۾ قربانيون پيش ڪندڙ ليڊر، ڪارڪنن کي ڀيٽا پيش ڪن ٿا، سياسي ڪارڪن جمهوري اصولن جي لاءِ مصيبتون برداشت ڪندا رهندا آهن، پارٽي انهن سڀني پرخلوص، پرعزم ۽ بهادر ورڪرن کي سلام پيش ڪري ٿي.

 

فوجي قيادت بابت افواهه بي بنياد ۽ افسوس جوڳا آهن: ڊي جي آءِ ايس پي آر

راولپنڊي(م.ڊ) ڊي جي آءِ ايس پي آر ليفٽيننٽ جنرل عاصم سليم باجوه واضع ڪيو آهي ته فوجي قيادت بابت افواهه ۽ پروپيگنڊه بي بنياد ۽ افسوس جوڳا آهن، فوج ڪنهن به تبديلي بابت آءِ ايس پي آر پاڻ آگاهه ڪندي. جي ايڇ ڪيو ۾ ميڊيا سان غير رسمي ڳالهه ٻولهه ڪندي هن چيو ته فوج ۽ فوجي قيادت بابت ناڪاري پروپيگنڊه کان پاسو ڪيو وڃي، فوج ۾ ڪنهن به قسم جي تبديلي بابت آءِ ايس پي آر پاڻ آگاهه ڪندي. هن چيو ته فوج ۾ معمول جو ترقيون، مقرريون ۽ بديلون تي افواهه درست ناهن.

 

اين ايف سي ايوارڊ جو آدمشماري سان ڪو به تعلق ناهي: وڏو وزير

ميرپورخاص (مختيار ڪيريو) سنڌ جي وڏي وزير سيد مراد علي شاھه چيو آهي ته اين ايف سي ايوارڊ ماضي ۾ به پيپلزپارٽي جي دور ۾ منظور ڪرايو ويو هو ۽ هاڻي به بهتر کان بهتر طريقي سان منظور ڪرايو ويندو . اهڙو اظهار هن نئون ڪوٽ ۾ ايم اين اي فقير شير محمد ٻلالاڻي جي رهائشگاهه تي سندس والده جي وفات تي تعزيت بعد ميڊيا سان ڳالهائيندي ڪيو . وڏي وزير چيو ته بلدياتي نمائندن جي اختيارن جو فيصلو سنڌ اسيمبلي ڪري چڪي آهي انهن کي قانون مطابق اختيار ڏنا ويندا . وزير اعليٰ  سنڌ سيد مراد علي شاھه  هڪ سوال جي جواب ۾ چيو ته ٿر ۾ ڊيم فزيبلٽي مطابق ٺهي رهيو آهي اتان جي مقامي ماڻهن کي سهولتون فراهم ڪيون وينديون ڇاڪاڻ ته اسان ٿر جي ماڻهن کي هر قسم جون سهولتون ڏيڻ جا پابند آهيون . هن وڌيڪ چيو ته ٿر ڪول هڪ قومي منصوبو آهي ان ڪري ماڻهن کي پنهنجا ذاتي مفاد ڇڏڻا پوندا ملڪ جي ترقي لاءِ ڪجھه تڪليفون ته کڻڻيون پونديون آهن. وڏي وزير چيو ته ٽيل تائين جي واهن ۽ ڪئنالن لاءِ وڌيڪ بجيٽ رکي آهي جنهن سان هتان جي ماڻهن جي پاڻي جو مسئلو جلد حل ٿي ويندو . هڪ ٻئي سوال جي جواب ۾ وزير اعليٰ سنڌ چيو ته مان جلد ٿر جو دورو ڪري ٿر جي مسئلن کي حل ڪرڻ سان گڏو گڏ پيڪيج جو اعلان ڪندس . ان اڳ سنڌ جي وڏي وزير سيد مراد علي شاهھ  ڊگھڙي ۾ ايم پي اي مير حيات ٽالپر جي رهائشگاهھ تي سندس ننڍي ڀاءُ چيئرمين ٽائون ڪاميٽي ڊگھڙي مير علي محمد خان ٽالپر جي وفات تي تعزيت ڪئي . ان موقعي تي صوبائي وزير منظور وساڻ، امداد پتافي ، تيمور ٽالپر، ايم پي اي نور احمد ڀرڳڙي، ڪمشنر ميرپورخاص ڊويزن شفيق احمد مهيسر، ڊپٽي ڪمشنر سيد مهدي علي شاهھ، ڊي آءِ جي پوليس ميرپورخاص جاويد عالم اوڍو ، ايس ايس پي خالد مصطفيٰ ڪورائي، ڊاڪٽر عبدالله ٽالپر ۽ ٻيا ساڻس گڏ هئا .

 

سنڌ حڪومت جا عوام دوست ڪم ڪيترن ئي ماڻهن کان هضم نٿا ٿين: مولا بخش چانڊيو

ڪراچي( اي پي پي) وڏي وزير جي اطلاعات بابت صلاحڪار مولا بخش چانڊيو چيو آهي ته سنڌ حڪومت جا عوام دوست ڪم ڪيترن ئي ماڻهن کان هضم نٿا ٿين. تعصب جي عينڪ لاهي ڏٺو وڃي ته کين سنڌ ۾ ترقي نظر ايندي. اها ڳالھه هن ڪالهه پنهنجي جاري ڪيل هڪ بيان ۾ ڪئي. مولا بخش چانڊيو چيو ته سنڌ ۾ روڊن جو ڄار ۽ وڏيون وڏيون پلون پيپلز پارٽي جي عوام دوست پاليسي جون آئينو آهن. ٿر جي ڪيترن ئي ڳوٺاڻن ڪڏهن مٺي شهر ڪونه ڏٺو هو اڄ ٿرپارڪر ۽ مٺي شهر جو سفر ڪجهه ڪلاڪن ۾ پورو ٿي ويندو آهي. هن چيو ته پيپلز پارٽي جي حڪومت ٿر ۾ روڊن جو ڄار وڇايو آهي اهي تعيمر ڪيل روڊ پيپلز پارٽي سنڌ جي ترقياتي ڪمن جا شاهد آهن. اطلاعات بابت صلاحڪار چيو ته ٿر جي هر ضلعي ۾ وڏيون اسپتالون بڻايون ويون آهن سنڌ جي ترقي چيئرمين بلاول ڀٽو زرداري جي وسيع سوچ جو نتيجو آهي. بلاول ڀٽو زرداري هاڻي پاڪستان جي اميد بڻجي بڻجي چڪو آهي. عوام هر ڀيري ثابت ڪيو آهي ته سندن دلين ۾ پي پي پي مخالفن لاءِ ڪا به جاءِ ناهي. پيپلز پارٽي جي مخالفن لاءِ سياسي خوف جو نئون نالو بلاول ڀٽو زرداري آهي ۽ هو سڄي ملڪ جي نمائندگي ڪري رهيو آهي. بلاول ڀٽو زرداري صرف پاڪستان پيپلز پارٽي جو چيئرمين ئي نه پر پاڪستاني قوم جي اميد آهي.

 

ڄامشورو: زميني تڪرار تان کوسا برادري جي ٻن ڌرين ۾ جهيڙو، فائرنگ، 3 ڄڻا قتل

ڄامشورو(ڊ.ر)  زميني تڪرار تان کوسا برادري جي ٻن ڌرين ۾ جهيڙو فائرنگ سبب 3 ڄڻا قتل. خبر موجب ڄامشورو لڳ راڄڙي ٻيلي جي ڪچي واري علائقي ۾ زمين جي تڪرار تان کوسا برادري جي ٻن ڌرين ۾ جهيڙو ٿي پيو، فائرنگ جي ڏي وٺ سبب 3 ڄڻا قتل ٿي پيا. مارجي ويلن ۾ پيارو کوسو ولد سائين بخش، عرس ولد ڏهول کوسو ۽ جمال شامل آهن. آخري اطلاعن تائين ڪو به ڪيس داخل ٿي نه سگهيو هو. واقعي کان پوءِ پوري علائقي ۾ خوف و حراس ڇانيل رهيو.