تازيون خبرون

Daily Archives: October 14, 2016

کاڌ خوراڪ جي کوٽ جي حوالي سان پاڪستان لاءِ صورتحال اڃا به ڳڻتي جوڳي قرار

ڪراچي (اين اين آءِ) سڄي دنيا ۾ بک ۽ بدحالي جي شڪار ملڪن جي لسٽ ۾ پاڪستان 11 نمبر تي اچي ويو آهي انٽرنيشنل فوڊ پاليسي ريسرچ انسٽيٽيوٽ پاران بک جي شڪار ملڪن جي لسٽ جاري ڪئي ويئي آهي جنهن ۾ پاڪستان 11 نمبر تي آهي جڏهن ته اها صورتحال ماضي جي مقابلي ۾ بهتر آهي رپورٽ ۾ 118 ملڪن جي لسٽ جاري ڪئي ويئي آهي جنهن ۾ پاڪستان جو نمبر 107 ٻڌايو ويو آهي ۽ چيو ويو آهي ته کاڌ خوراڪ جي کوٽ جي حوالي سان پاڪستان جي لاءِ صورتحال اڃا به ڳڻتي جوڳي آهي اداري پاران گلوبل هنگر انڊيڪس 2016 ۾ مختلف ملڪن جي ماڻهن کي خوراڪ جي دستيابي جي صورتحال بابت انهن کي زيرو کان 100 پوائنٽس ۾ ورهايو ويو آهي پاڪستان 118 ملڪن مان 11 نمبر تي آهي ۽ انهن جون 33.4 پوائنٽون آهن پاڪستان مان صرف 11 ملڪ اهڙا آهن جتي بک ۽ بدحالي جي ماڻهن جو تناسب وڌيڪ آهي رپورٽ ۾ خوراڪ جي کوٽ جي حوالي سان پاڪستان جو اسڪور 33.4 آهي جيڪو 2008 ۾ 35.1 هو. جڏهن ته پاڪستان کي اڃا به پنهنجي پاڙيسري ملڪن جي نسبت ان صورتحال سان منهن ڏيڻ لاءِ ڪافي موثر قدمن جي ضرورت آهي ڇو ته ڀارت ۽ بنگلاديش جو اسڪور 28.5 ۽ 27.1 آهي جڏهن ته افغانستان جي صورتحال پاڪستان کان به خراب آهي ان جو اسڪور 34.8 آهي ڀارت جي صورتحال هن رپورٽ ۾ پاڪستان کان بهتر آهي جنهن جو ان لسٽ ۾ 22هون نمبر آهي رپورٽ ۾ ٻڌايو ويو آهي ته دنيا جي ڪل 70 ڪروڙ 95 لک ماڻهو بک ۽ بدحالي جو شڪار آهن 2008 ۾ پاڪستان جون پوائنٽون 35 تي هيون جنهن مان معلوم ٿئي ٿو ته هاڻي بک ۽ بدحالي ۾ ڪجهه گهٽتائي ٿي آهي. پر ان لسٽ مان خبر پوي ٿي ته اڃا به کاڌ خوراڪ جي شڪار ملڪن ۾ پاڪستان ڳڻتي واري صورتحال مان گذري رهيو آهي رپورٽ موجب پاڪستان ۾ ڪل آبادي جو 22 سيڪڙو حصو کاڌ خوراڪ جي کوٽ جو شڪار آهي ۽ 8.1 سيڪڙو ٻارڙ 5 سالن کان گهٽ عمر ۾ ئي فوت ٿي وڃن ٿا.

 

آرمي چيف 10 دهشتگردن جي موت جو پروانو جاري ڪري ڇڏيو

راولپنڊي(م.ڊ) آرمي چيف 10 دهشتگردن جي موت جي سزا جي منظوري ڏئي ڇڏي آهي. آءِ ايس پي آر موجب آرمي چيف جنرل راحيل شريف دهشتگرد شاهد، حسين، ظفر اقبال، انور زيب سميت 10 دهشتگردن جي موت جي سزا جي منظوري ڏني آهي. دهشتگرد معصوم شهرين، عورتن ۽ پوليو ورڪرن جي قتل ۾ ملوث آهن، جڏهن ته جوابدار پوليس آفيشلز، هٿياربند فوج جي اهلڪارن جي قتل ۾ به ملوث هئا. آءِ ايس پي آر موجب دهشتگردن خلاف فوجي عدالتن ۾ ڪيس هلندڙ هئا، موت جي سزا ملي دهشتگردن ۾ جوابدار شاهد، ٻن عورت ورڪرن، 11 اين جي اوز ورڪرن جي قتل ۾ ملوث هو. دهشتگرد حسين ميجر مصطفيٰ ۽ ڪيپٽن وسيم جي قتل ۾ ملوث هو. مٿس ٻين به ڪيترن ئي سيڪيورٽي اهلڪارن جي قتل جا ڪيس هئا.  دهشتگرد ظفر اقبا ايف سي اهلڪارن جي قتل ۾ ملوث آهي، جڏهن ته دهشتگرد انور زيب پوليس جي سب انسپيڪٽر عمر جو ڳلو ڪپيو هو.

 

وزير اعظم جي صدارت هيٺ سيڪيورٽي بابت اجلاس، يوم عاشور تي بهتر سيڪيورٽي تي  اطمينان جو اظهار

اسلام آباد(م.ڊ) وزير اعظم جي صدارت هيٺ سيڪيورٽي بابت اجلاس ٿيو جنهن ۾ يوم عاشور تي امن امان جي بهتر صورتحال تي اطمينان جو اظهار ڪيو ويو آهي. اسلام آباد وزير اعظم جي صدارت هيٺ اجلاس ٿيو جنهن ۾ وفاقي گهرو وزير، چيف سيڪريٽري پنجاب ۽ آءِ جي پنجاب سميت ٻين آفيسرن شرڪت ڪئي.اجلاس ۾ اندرين سيڪيورٽي ۽ نيشنل ايڪشن پلان تي عملدرآمد جو جائزو ورتو ويو. اجلاس ۾ وزير اعظم يوم عاشور جي موقعي تي سيڪيورٽي صورتحال بهتر رکڻ تي سيڪيورٽي ادارن جي تعريف به ڪئي.

 

عمران خان کان وڌيڪ وزير اعظم جو ڪير به خير خواهه ناهي، پاڻي ورڇ ۾ سمورن صوبن کي گهربل حصو ملڻ گهرجي: خورشيد شاهه

سکر (اين اين آءِ) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته وزيراعظم نوازشريف جو عمران خان کان خيرخواهه ڪوبه نه آهي هو پنهنجي غلط پاليسين سان حڪومت جي مضبوطي جو سبب بڻجي رهيو آهي اپوزيشن حڪومت کي پرڏيهي وزير نه هئڻ جي حوالي سان ايترو دٻاءُ وڌو آهي ته هاڻي اميد آهي ته ايندڙ مهيني پرڏيهي وزير مقرر ٿي ويندو خميس تي سکر ۾پنهنجي رهائشگاهه تي ميڊيا سان ڳالهائيندي خورشيد شاهه چيو ته عمران خان هر مهيني ڪوئي نه ڪوئي جلسو يا ڌرڻو ڪندو آهي ۽ هو فيل ٿي ويندو آهي نتيجو اهو نڪرندو آهي ته نوازشريف پهريان کان وڌيڪ مضبوط ٿي ويندو آهي ان لاءِ اسان سمجهڻ تي مجبور آهيون ته نوازشريف جو سڀ کان وڏو همدردر ۽ خيرخواهه عمران خان آهي. هو پنهنجي غلط پاليسين سان حڪومت جي مضبوطي جو سبب بڻجي رهيوآهي هن چيو ته ڪنهن شهر کي بند ڪرڻ مسئلو نه آهي ڇو ته 500 ماڻهو رستي تي اچي ٽائرن کي باهيون ڏين ته روڊ بند ٿي ويندو آهي احتجاج ڪرڻ سڀني جو حق آهي پر اسان ان غير جمهوري قدمن جي حمايت نه ڪنداسين جڏهن اليڪشن ايندو آهي ته ان کان پوءِ سيپٽمبر، آڪٽوبر يا ڊسمبر سميت هر مهيني حڪومت وڃڻ جا چوٻول ٿيندا آهن پر هاڻي پاڪستان ۾ سياستدان سمجهه وارا ٿيندا وڃن پيا هن چيو ته پاڪستان ۾ پرڏيهي وزير نه آهي پر ان جي لاءِ اسيمبلي ۾ قرارداد آڻي سگهجي ٿي ڇو ته اهڙي قرارداد مذاق بڻجي ويندي خورشيد شاهه چيو ته انگريزي اخبار جي خبر تي ڪنهن به اجلاس اندر جون ڳالهيون ٻاهر ڪڍڻ افسوسناڪ آهي ڪجهه حڪومتي معاملا ڪيترن ئي سالن تائين ٻاهر نه ايندا آهن جيئن حمود الرحمان ڪميسن جي رپورٽ هئي ان معاملي کي ڏسڻو پوندو ته هي ڳالهه خبر جي ته ان معاملي تي تبصرو ڪري سگهجي ٿو هن چيو ته اليڪشن ڪميشن کي خط لکيو آهي ته هو ووٽن جي لسٽ جي تاريخ ۾ واڌ ڪري. ٻئي طرف  مخالف ڌر جي اڳواڻ خورشيد شاهه چيو آهي ته پاڻي ورڇ ۾ سمورن صوبن کي گهربل حصو ملڻ گهرجي. خورشيد شاهه سکر بئراج جي دوري دوران ميڊيا سان ڳالهه ٻولهه ڪندي چيو ته سکر بئراج جو معاملو اٿارڻ تي ميڊيا جو ٿورائتو آهيان، سنڌ کي پنهنجي حصي جو پاڻي نه پيو ملي، پاڻي ورڇ منصفاڻي ڪئي وڃي. هن وڌيڪ چيو ته سکر بئراج جي گيٽ نمبر 3 وٽ پاڻي جو دٻاءُ آهي.

 

16 آڪٽوبر تي سلام شهداءِ ريلي ڪڍڻ جو اعلان، ڪنهن جمهوري ملڪ ۾ اي سي ايل به هوندي آهي؟: بلاول ڀٽو زرداري

ڪراچي (اين اين آءِ) پاڪستان پيپلزپارٽي جي چيئرمين بلاول ڀٽو زرداري چيو آهي ته ڪارساز واقعي جي شهيدن کي خراج عقيدت پيش ڪرڻ لاءِ هو پنهنجي ساٿين سان گڏ 16 آڪٽوبر جي صبح جو بلاول هائوس مان سلام شهداء ريلي ڪڍي ڪارساز ويندو پيپلزپارٽي ميڊيا سيل مان جاري هڪ وڊيو پيغام ۾ بلاول ڀٽو زرداري چيو ته محرم اسان کي امام حسين ۽ ان جي ساٿين جي عظيم قربانين جي ياد ڏياري ٿو شهداء ڪربلا جا حوصلا ۽ جدوجهد ڏيڻ جي تاريخ جو بيمثال باب آهي هن چيو ته جتي جتي ظلم ٿيندو اتي اتي ڪربلا هوندي. هن چيو ته پيپلزپارٽي جي سياسي جدوجهد ظلم خلاف ۽ جمهوريت جي حق ۾ آهي هن چيو ته 18 آڪٽوبر 2007 دنيا جي تاريخ جو بدترين واقعو آهي ڪارساز سانحي جي شهيدن کي خراج عقيدت پيش ڪرڻ لاءِ پنهنجي ساٿين سان گڏ هو 16 آڪٽوبر جي صبح بلاول هائوس مان سلام شهداء ريلي ڪڍي ڪارساز ويندو هن کي اميد آهي ته عوام ان کي ان ۾ ان جو ڀرپور ساٿ ڏيندو. ٻئي طرف  پيپلزپارٽي جي چيئرمين بلاول ڀٽو زرداري ڊان ٽي وي جي صحافي جو نالو اي سي ايل ۾ شامل ڪرڻ تي مذمت ڪندي چيو آهي ته ڇا ڪنهن جمهوري ملڪ ۾ اي سي ايل به هوندي آهي؟. پنهنجي ٽوئيٽر اڪائونٽ تي ڇڏيل پيغام ۾ پ پ چيئرمين بلاول ڀٽو زرداري چيو ته اسان جي ملڪ ۾ اي سي ايل ڇو آهي؟ هن چيو ته ڇا مان هڪ فضول سوال ڪري ساگھان ٿو ته اي سي ايل ڇو آهي؟.

 

16 آڪٽوبر تي شهداءِ ڪارساز جي ياد ۾ نڪرندڙ ريلي تاريخي هوندي: مولابخش چانديو

ڪراچي (اين اين آءِ) سنڌ جي سڌسماءُ واري صلاحڪار مولابخش چانڊيو چيو آهي ته ڪجهه پارٽيون دهشتگردن جي ڇانو ۾ ريليون ڪڍنديون آهن ۽ اسان کي ريلي ڪڍڻ ۾ ڌمڪيون ملنديون آهن پيپلزپارٽِ پاران 16 آڪٽوبر تي شهداء ڪارساز جي ياد ۾ نڪرندڙ ريلي تاريخي هوندي پاڪستان جو ڪوبه اهڙو علائقو نه آهي جتي پيپلزپارٽي موجود نه هجي ميان صاحب کي ملڪ جو مخصوص حصو پاڪستان نظر اچي ٿو ان جو وس هلي ته سڀڪجهه لاهور کڻي وڃي. هن خميس تي ڪراچي ۾ ميڊيا سان ڳالهائيندي چيو ته 16 آڪٽوبر تي بلاول ڀٽو زرداري جي قيادت ۾ شهداء ڪارساز کي خراج عقيدت پيش ڪرڻ لاءِ بلاول چورنگي کان ڪارساز تائين تاريخ ساز ريلي ڪڍي ويندي. بلاول ڀٽو زرداري هدايت ڪئي ته ريلي جا اهڙا انتظام ڪيا وڃن جنهن سان عوام کي ڏکيائيون پيش نه اچن ان حوالي سان ماڻهن کي متبادل رستن کان به آگاهه ڪيو ويندو هن چيو ته سيڪيورٽي خدشا موجود آهن بلاول ڀٽو شهيد محترمه بينظير ڀٽو جو فرزند آهي جڏهن وڏا وڏا ويندڙ لڪي ويا هئا ان وقت بينظير ڀٽو روڊن ۽ رستن تي هئي هن چيو ته بلاول ڀٽو زرداري ماڻهن ۾ رهڻ ۽ انهن سان گڏ هلڻ چاهي ٿو. هن چيو ته عمران خان جو 30 آڪٽوبر جو احتجاج هوندو عمران خان جي احتجاج ۾ پڙهيل لکيل ماڻهو ايندا ان جي احتجاج ۾ ماڻهو ڏينهن ۾ پارڪن ۽ رات جو گهرن ۾ آرام ڪندا. هن چيو ته نوازشريف جو جانشين اهو هوندو جيڪو نوازشريف جي ڳالهه ڪري ٿو هن چيو ته طاهرالقادري به عمران خان جو ساٿ ڏيڻ کان انڪار ڪري ڇڏيو آهي.

 

وزيرا عظم کي احتساب لاءِ مجبور ڪنداسين: عمران خان

اسلام آباد(بيورو) پاڪستان تحريڪ انصاف جي سربراهه عمران خان چيو آهي ته حڪمران چاهين ٿا ته پاناما ليڪس معاملو دفن ٿي وڃي. پر وزير اعظم کي احتساب لاءِ مجبور ڪنداسين. پريس ڪانفرنس ڪندي پي ٽي آءِ سربراهه عمران خان چيو ته عوام حڪمرانن جي احتساب لاءِ روڊن تي نڪرندو ۽ وزير اعظم کي احتساب لاءِ مجبور ٿيڻو ئي پوندو. هن چيو ته اسلام آباد وارو ڌرڻو تاريخي هوندو، ان دوران ملڪي مسئلا حل ڪرڻ لاءِ آواز اٿارينداسين.

 

شاهه رخ ۽ انوشڪا جي نئين فلم جو پهريون ڏيک ڏسي چاهيندڙ ڇرڪجي ويا

ممبئي (شوبز نيوز) ڀارتي ميڊيا رپورٽن مطابق شاهه رخ خان ۽ اداڪارا انوشڪا شرما امتياز علي جي فلم“دي رنگ” ۾ گڏ ٻيهر چاهيندڙن جون دليون کٽيندا،پر هنن ٻنهي جي هن نئين فلم جي پهرين ڏيک ماڻهن کي ڇرڪائي ڇڏيو. اداڪار سماجي رابطن واري ويب سائيٽ تي ايندڙ فلم“دي رنگ” جي شوٽنگ  وقت پنهنجي ۽ انوشڪا جي هڪ اهڙي تصوير ونڊ ڪئي،جنهن ۾ ٻئي اداڪار اسڪار فس،ڪيپ ۽ پنهنجي پاڻ کي پورو ڍڪي بلڪل ننجا جيان نظر ٿي آيا.شاهه رخ ٽوئٽر نياپي ۾ چيو آهي ته اهو امتياز علي جي فلم دي رنگ جو پهريون نظارو آهي،جيڪا نه ئي ڀوائتي فلم آهي نه وري پيار محبت پر هن ۾ رڳو ڏسندڙن جا ڇرڪ نڪرندا اها اسان جي دعويٰ آهي.

 

قوال جي بي تاج بادشاهه نصرت فتح علي خان جو 68هون جنم ڏهاڙو ملهايو ويو

لاهور (شوبز نيوز) قوالي ۾  مهارت رکندڙ ۽ قوالي جي ذريعي پوري دنيا ۾ پنهنجو ڪم مڃرائيندڙ استاد نصرت فتح علي خان،جنهن جو اڄ68 هون جنم ڏهاڙو ملهايو پيو وڃي،نصرت فتح علي خان 13 آڪٽوبر 1948ع ۾ فيصل آباد ۾ اک کولي.هن پنهنجي پهرين پرفارمنس 1971ع ۾ پنهنجي پيءُ جي چاليهي جي موقعي تي ڏني،جڏهن سندس عمر 16 سال هئي.هن پوري دنيا ۾ پنهنجي فن کي مڃرايو ۽ پاڪستان جو نالو آسمان جي ستارن ۾ لکرايو.کيس تمغائي برائي حسن ڪارڪردگي پڻ مليو،استاد نصرت فتح علي خان 16 آگسٽ 1997ع ۾ لنڊن ۾ لاڏاڻو ڪري ويو پر سندس قواليون، اڄ به ان ئي چاهه سان ٻڌيون وڃن ٿيون،نصرت فتح علي خان قوالي کي هڪ نئون رنگ ۽ انداز پڻ ڏنو،سندس ڪيتريون ئي قواليون،غزل،مشهور ٿيا،جيڪي اڄ به کيس چاهيندرن جي دلين ۾ ڌڙڪن ٿا.

 

قومي وومين فٽبال ٽيم جي رانديگرياڻي شاهه لائلا بلوچ حادثي ۾ فوت

ڪراچي (اسپورٽس نيوز) قومي وومين فٽبال ٽيم جي رانديگرياڻي شاهه لائلا احمد زئي بلوچ دو دريا جي ويجهو ڪار حادثي ۾ فوت ٿي وئي. ميڊيا رپورٽن موجب پاڪستان وومين فٽبال ٽيم جي اسٽرائيڪر شاهه لائلا احمد زئي بلوچ گذريل رات پنهنجن دوستن سان گڏ وڃي رهي هئي ته دو دريا ويجهو ان جي ڪار سان حادثو ٿي پيو، حادثي ۾ شاهه لائلا کي سخت ڌڪ رسيا، هن کي خانگي اسپتال پهچايو ويو، پر  هو زخمن جا سور نه سهندي فوت ٿي وئي. اسٽار فٽبالر جي لاش قلات پهچائي ويندي، جتي ان کي اباڻي علائقي ۾ مٽي ماءُ حوالي ڪيو ويندو.