تازيون خبرون

Daily Archives: October 11, 2016

دهشتگردن خلاف بنا فرق جي ڪارروائي جاري رهندي: سياسي ۽ عسڪري قيادت

اسلام آباد(م.ڊ) وزير اعظم نواز شريف سان آرمي چيف جنرل راحيل شريف جي ملاقات ٿي جنهن ۾ دهشتگردن خلاف بنا فرق ڪارروائي واري عزم کي ورجايو ۽ نيشنل ڪميٽي جي اجلاس جي حوالي سان ڊان نيوز ۾ شايع ٿيل خبرن جي مذمت ڪئي وئي. وزير اعظم جي صدارت هيٺ اجلاس ٿيو جنهن ۾ آرمي چيف جنرل راحيل شريف، ڊي جي آءِ ايس آءِ رضوان اختر، پنجاب جي وڏي وزير شهباز شريف، ناڻي واري وزير اسحاق ڊار ۽ گهرو وزير چوڌري نثار شرڪت ڪئي. ان موقعي تي قومي سلامتي ۽ علائقائي صورتحال تي غور ڪيو ويو. اجلاس ۾ سول ۽ عسڪري قيادت ڊان اخبار ۾ شايع ٿيل خبر تي ڳڻتي جو اظهار ڪيو ۽ ان خبر کي گڏيل طور رد ڪيو ويو، شرڪت ڪندڙن جو چوڻ هو ته پرنٽ ۽ اليڪٽرانڪ ميڊيا کي سيڪيورٽي واري معاملي تي افواهه نه پکيڙڻ گهرجن. وزير اعظم نواز شريف  خبر جو نوٽيس وٺندي ذميوارن خلاف جاچ جو حڪم ڏئي ڇڏيو.

 

دنيا جي ڪابه طاقت پاڪستان کي ڪشميرين جي حمايت کان نٿي روڪي سگهي: وزيراعظم

اسلام آباد (اين اين آءِ) وزيراعظم نوازشريف هڪ دفعو ٻيهر چيو آهي ته اسان جو ايجنڊا ترقي ۽ خوشحالي آهي ڪجهه ماڻهو ترقي جي عمل کي پٽڙي تان لاهڻ چاهين ٿا منفي سياست ڪندڙ 2014 ۾ پنهنجي ڪوششن ۾ ناڪام ويا هن دفعي به هو بري طرح ناڪام ٿيندا دنيا جي ڪابه طاقت پاڪستان کي ڪشميرين جي حمايت کان نٿي روڪي سگهي توانائي بحران تي ڪنٽرول ڪرڻ لاءِ ٿر جي ڪوئلي جي ذريعي بجلي جي پيداوار لاءِ پاور پلانٽ لڳايا پيا وڃن 2018 تائين نيشنل گرڊ ۾ 10 هزار ميگاواٽ بجلي شامل ٿي ويندي 2018 ۾ ئي لوڊشيڊنگ مڪمل ختم ٿي ويندي سي پيڪ منصوبي تحت 46 ارب ڊالرن جي سيڙپڪاري ٿي رهي آهي منصوبي جو سڀ کان وڏو فائدو بلوچستان کي پوندو اسلام آباد ۾ وزيراعظم نوازشريف جي صدارت هيٺ مسلم ليگ (ن) جي مرڪزي مجلس عامه جو اجلاس ٿيو اجلاس ۾ وفاقي گهرو وزير چوڌري نثار وزيراعظم جو صلاحڪار سڌسماءَ وارو وفاقي وزير پرويز رشيد ناڻي وارو وفاقي وزير اسحاق ڊار پنجاب جو وڏو وزير شهبازشريف حمزه شهبازشريف راجا ظفر الحق ۽ خرم دستگير به گڏ هئا وزيراعظم چيو ته ڀارت جي هي غلط فهمي آهي ته هو رياستي دهشتگردي ذريعي ڪشميرين جي تحريڪ آزادي کي ختم ڪري ڇڏيندو ڪشميرين کي انهن جي حق خوداراديت کان ڪوبه محروم نٿو ڪري سگهي ۽ پاڪستان کي دنيا جي ڪابه طاقت ڪشميرين جي حمايت کان نٿي روڪي سگهي وزيراعظم چيو ته برهان الدين واني جنهن کي ڀارتي سيڪيورٽي فورسز شهيد ڪيو هو جيڪو حريت پسند هو ۽ ان کان اهو فخر ڪوبه نٿو ڇني سگهي. وزيراعظم چيو ته جڏهن اقتدار سنڀاليو هو ته ملڪ کي تمام گهڻا مسئلا درپيش هئا دهشتگردي عروج تي هئي توانائي بحران سبب عوام پريشاني جو شڪار ۽ مايوس ٿي چڪو هو. جڏهن ته هاڻي ملڪ جي معاشي صورتحال بهتر آهي. دهشتگردي جي خلاف آپريشن ضرب عضب شروع ڪيو ويو ان سبب دهشتگردي ۾ گهٽتائي ٿي آهي ڪراچي  ۾ سمورين سياسي پارٽين جي مشاورت ۽ رضامندي سان آپريشن شروع ڪيو ويو ۽ ڪراچي کي هڪ دفعو ٻيهر روشنين جو شهر بڻايو ويو. ڀاشا ڊيم جي اڏاوت لاءِ زمين حاصل ڪرڻ جي ڪوشش جاري آهي توانائي بحران جي ڪنٽرول لاءِ ٿر ڪوئلي ذريعي بجلي پيدا ڪرڻ لاءِ پاور پلانٽ لڳايا پيا وڃن. وزيراعظم چيو ته جمهوريت احتجاج جو حق ڏي ٿي پر انهن جون حدون هونديون آهن اهي منفي سياست ذريعي پاڪستان کي ڪمزور ڪرڻ چاهين ٿا 2014 ۾ هو پنهنجي ڪوششن ۾ ناڪام ٿيا هئا ۽ هن دفعي به ناڪامي نصيب ٿيندي.

 

جذبي سان هر چيلينج کي منهن ڏئي سگھون ٿا: جنرل راحيل شريف

راولپنڊي(م.ڊ) آرمي چيف جنرل راحيل شريف چيو آهي ته پيشيواراڻي جذبي سان هر چيلنج کي منهن ڏئي سگھون ٿا، مستقبل جي ليڊرشپ پروفيشنل تيارين تي ڌيان ڏي. آءِ ايس پي آر جي پڌرائي موجب آرمي چيف جنرل راحيل شريف پاڪستان ملٽري اڪيڊمي ڪاڪول جو دورو ڪيو. ان موقعي تي جنرل راحيل شريف چوٿين پاڪستان بٽالين  جو افتتاح ڪيو. افتتاح دوران پاڪ فوج جي سربراهه جنرل راحيل شريف چوٿين پاڪستان بٽالين جي جوانن سان ملاقات ڪري سندن ڪارڪردگي جي ساراهه ڪئي. ان موقعي تي جنرل راحيل شريف چيو ته پيشواراڻي جذبي تي فخر سان گڏ اسين هر چيئلنج کي منهن ڏئي سگھون ٿا دهشتگردي خلاف جنگ ۾ اسان جي قربانين تي فخر آهي جيڪو برارقرار رکبو. هن چيو ته مستقبل جي ليڊرشپ پروفيشنل تيارين تي ڌيان ڏي.

 

عوام ۽ جمهوريت لاءِ جانيون قربان ڪندڙن کي پ پ فراموش نه ڪندي: بلاول ڀٽو

ڪراچي (اين اين آءِ) پاڪستان پيپلزپارٽي ڪراچي جي اڳوال بلاول هائوس ۾ پاڪستان پيپلزپارٽي جي چيئرمين بلاول ڀٽو زرداري سان ملاقات ڪئي ۽ ان کي ڪارساز شهيدن کي خراج عقيدت پيش ڪرڻ لاءِ 16 آڪتوبر تي بلاول هائوس مان ڪارساز تائين اعلان ڪيل ريلي جي تيارين کان آگاهه ڪيو. ملاقات ڪندڙ اڳواڻن ۾ سينيٽر سعيد غني، شهلا رضا، راشد رباني، وقار مهدي ۽ نجمي عالم شامل هئا ان موقعي تي پيپلزپارٽي جي ليڊيز ونگ جي صدر ايم اين اي فريال ٽالپر، سنڌ جو وڏو وزير سيد مرادعلي شاهه، نثار کهڙو، مولابخش چانڊيو ۽ جميل سومرو به موجود هئا پيپلزپارٽي ڪراچي جي اڳواڻن ٻڌايو ته ڪارساز واقعي جي شهيدن ۽ شهيد محترمه بينظير ڀٽو جيڪا راولپنڊي ۾ هڪ دهشتگردي جي حملي ۾ شهيد ٿيڻ کان ٺيڪ 8 هفتا اڳ ان واقعي ۾ معجزاڻي طور تي محفوظ رهي کي زبردست خراج عقيدت پيش ڪرڻ ۽ ڪراچي جي عوام کي وڏي پئماني تي ريلي ۾ آڻڻ لاءِ انهن ڪارڪنن سان ميٽنگ پمفليٽ بينر ۽ هينڊ بلز جي ذريعي متحرڪ ڪيو پيو وڃي بلاول ڀٽو چيو آهي ته ملڪ جي عوام ۽ جمهوريت لاءِ پنهنجون جانيون قربان ڪندڙ اڳواڻن ۽ ڪارڪنن کي پاڪستان پيپلزپارٽي ڪڏهن به فراموش نه ڪندي.

 

ملڪ جي غريب ماڻهن کان جيئڻ جو حق ۽ 2 وقتن جي ماني به کسي پئي وڃي: خورشيد شاهه

لاڙڪاڻو(بيورو) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته ملڪ جي غريب ماڻهن کان جيئڻ جو حق ۽ انهن کان 2 وقتن جي ماني به کسي پئي وڃي. لاڙڪاڻي ۾ ميڊيا سان ڳالهه ٻولهه ڪندي خورشيد شاهه چيو ته هڪ پاسي حڪوتم طرفان دعويٰ ڪئي وئي آهي ته ذخيرا ملڪي تاريخ جي بلند ترين سطح تي پهچي رهيا آهن جڏهن ته ٻئي پاسي ملڪ جي غريبن کان جيئڻ جو حق به کسيو پيو وڇي. خورشيد شاهه چيو ته گيس اگهن ۾ 36 سيڪڙو واڌ ڪرڻ غريب عوام تي ظلم آهي، پيپلز پارٽي گيس جي اگهن ۾ ظالماڻي واڌ کي ڪنهن به صورت ۾ قبول نه ڪندي ۽ عوام تي اهو ظلم نه ٿيڻ ڏبو. مخالف ڌر اڳواڻ خورشيد شاهه چيو ته اسان ايم ڪيو ايم باني سميت ڪنهن به شخصيت کي محبت وطن يا غدار هئڻ جو سرٽيفڪيٽ نٿا ڏئي سگهون جڏهن ته 30 آڪٽوبر تي پي ٽي آءِ جو ڌرڻ ان جو پنهنجو رد عمل آهي ان ۾ پ پ جو ڪو به ڪردار ناهي.

 

9 ۽ 10 محرم الحرام دوران فول پروف سيڪيورٽيءَ کي هر قيمت تي يقيني بڻايو وڃي: مراد علي شاهه

ڪراچي (اسٽآف رپورٽر) سنڌ جي وڏي وزير سيد مراد علي شاهه چيو آهي ته 9 ۽ 10 محرم الحرام دوران فول پروف سيڪيورٽيءَ کي هر قيمت تي يقيني بڻايو وڃي. هن چيو ته اسان محرم جي سڪيورٽيءَ جي حوالي سان باقاعدگيءَ اجلاس گهرايا ۽ ذاتي طور تي مرڪزي جلوس جي رستن جو دورو پڻ ڪيو انڪري جيتري قدر سڪيورٽي جو تعلق آهي ان حوالي سان ڪوبه معاملو نه هئڻ گهرجي. هن اها ڳالهه اڄ 9 ۽ 10 محرم الحرام جي مجلسن ۽ جُلوسن جي سڪيورٽي بابت وزيراعليٰ هائوس ۾ رٿيل اجلاس جي صدارت ڪندي ڪئي. اجلاس ۾ وڏي وزير جي قانون واري  صلاحڪار مرتضيٰ وهاب، چيف سيڪريٽري سنڌ محمد صديق ميمڻ، آءِ جي سنڌ اي ڊي خواجه، ايڊيشنل آءِ جي ڪراچي مشتاق مهر، گهرو سيڪريٽري رياض سومرو سميت ٻين لاڳاپيل آفيسرن شرڪت ڪئي. آءِ جي سنڌ اي ڊي خواجه چيو ته 9 محرم تي 528 مجلسون ٿينديون جنهن ۾ سنين جون 39 به شامل آهن. اهڙي ريت 10 محرم تي 403 مجلسون بشمول 23 سنين جون ٿينديون. اهڙي طرح شهر ۾ 9 محرم واري ڏينهن 279 جلوس ۽ 10 محرم الحرام تي 289 جلوس نڪرندا. آءِ جي سنڌ چيو ته 10 محرم الحرام تي گڏيل طور تي 25674 تي ٻڌل فورس بشمول 22381 پوليس اهلڪار، 389 ليڊي پوليس، 2778 رضاڪار مقرر ڪيا ويندا. محرم الحرام تي نڪرندڙ جلوسن جا تفصيل ٻڌائيندي آءِ جي پوليس ٻڌايو ته 9 محرم الحرام تي صبح 10 وڳي هڪ جُلوس بي بي فاطمه امام بارگاهه کا نڪرندو ۽ اوڀر ضلعي کان ٽي تلوار واري علائقي ۾ داخل ٿيندو. جُلوس جو رستو بي بي فاطمه امام بارگاهه لياقت آباد نمبر 10 کان تين هٽي ڏانهن ويندي لياقت آباد پوسٽ آفيس، تين هٽي، جهانگير روڊ، شاهه نجف امام بارگاهه، مارٽن ڪوارٽر، جامعه بنوري، گرو مندر، بهادر يار جنگ روڊ، سولجر بازار ۽ نشتر پارڪ جتي اهو مرڪزي جُلوس ۾ شامل ٿيندو. مرڪزي جُلوس منجهند 12 وڳي نشتر پارڪ کان شروع ٿيندو ان جو رستو نشتر پارڪ کان پراڻي نمائش، صدر ايمپريس مارڪيٽ، ريگل چوڪ، ايم اي جناح روڊ، ڊينسو هال، بولٽن مارڪيٽ، پلاسٽڪ مارڪيٽ کان ٿيندو حسينيه ايرانيان امام بارگاهه پهچندو. عزادار ظهرين واري نماز علي رضا امام بارگاهه ايم اي جناح روڊ تي ادا ڪندا ۽ حسينه ايرانيان امام بارگاهه کارادر ۾ اختتام ٿيندو. هن چيو ته 10 محرم الحرام تي جُلوس صبح 10 وڳي نشتر پارڪ کان شروع ٿيندو جنهن جو روٽ نشتر پارڪ کان پراڻي نمائش، صدر ايمپريس مارڪيٽ، ريگل چوڪ، ايم اي جناح روڊ، ڊينسو هال، بولٽن مارڪيٽ، پلاسٽڪ مارڪيٽ، حسينيه ايرانيان امام بارگاهه تي پهچندو. جُلوس ۾ شريڪ ٿيندڙ منجهند 1:30 وڳي تبت سينٽر ويجهو نماز ظهرين ادا ڪندا. جُلوس شام ڇهه وڳي ختم ٿيندو. اي ڊي خواجه وڏي وزير کي مرڪزي جُلوس جي فليش پوائنٽ بابت بريفنگ ڏيندي ٻڌايو ته اتي سڪيورٽي جا وڌ کان وڌ انتظام ڪيا ويا آهن. هن چيو ته نشتر پارڪ، نمائش، امام بارگاهه علي رضا، ڪيپري سينيما، صدر دوا خانو، ايمپريس مارڪيٽ، ريگل چوڪ، تبت سينٽر، سعيد منزل، عيدگاهه مارڪيٽ، لائيٽ هائوس، بولٽن مارڪيٽ، وڏو امام بارگاهه، بغدادي، کارادر ۽ حسينه ايرانيان امام بارگاهه وٽ رزرو فورس جون چار پلاٽون مقرر ڪيون وينديون. ايڊيشنل آءِ جي مشتاق مهر چيو ته 10 محرم الحرام تي تعزئي جي مرڪزي جُلوس ۾ ايم اي جناح روڊ تي شهر جي مختلف حصن مان پهچندڙ ننڍا تعزيا شامل ٿي ويندا ۽ ايم اي جناح روڊ جي رستي نيٽي جيٽي ڏانهن ويندا. وڏي وزير سيد مراد علي شاهه چيو ته ڪيترائي ماڻهو روايتي رستي جي پيروي ناهن ڪندا جنهن ڪري جُلوس جي شروع ۽ آخر ۾ هڪ وڏو خال پيدا ٿيندو آهي، ان کي ڏسندي تحفظ فراهم ڪيو وڃي. هن وڌيڪ چيو ته مان صلاح ڏيندس ته خال ٿيڻ نه ڏنو وڃي. اجلاس ۾ ڪنهن به اڻوڻندڙ واقعي جي صورت ۾ انخلاءِ واري پلان تي به غور ويچار ڪيو ويو.

 

دهشتگردي سان منهن ڏيڻ لاءِ تڪرار سياسي معاشي ۽ سماجي ڪمزوري جو خاتمو به ضروري آهي: مليحه لوڌي

نيويارڪ (اين اين آءِ) گڏيل قومن ۾ پاڪستان جي مستقل نمائنده مليحه لوڌي چيو آهي ته دهشتگردي سان منهن ڏيڻ لاءِ تڪرار سياسي معاشي ۽ سماجي ڪمزوري جو خاتمو به ضروري آهي ملڪ ۾ دهشتگردن جي ختم ٿيڻ تائين جنگ جاري رهندي. ڪشمير جي عوام تي ڀارتي ظلم رياستي دهشتگردي آهي مسئلي تي گڏيل قومن جي چارٽر جي خلاف ورزين کي نظرانداز نه ڪرڻ گهرجي بين الاقوامي دهشتگردي جي خاتمي لاءِ گڏيل کي گڏيل قومن ۾ بحث دوران گڏيل قومن ۾ پاڪستان جي مستقل نمائنده مليحه لوڌي چيو آهي ته پاڪستان دهشتگردن جي خلاف فوجي ڪارروائي ۽ گڏيل نيشنل ايڪشن پلان تي عمل پيرا آهي پاڪستان دهشتگردي جي خلاف يڪجهتي حڪمت عملي جوڙي آهي جڏهن ته دهشتگردي سان منهن ڏيڻ لاءِ انهن ڪمزورين کي ختم ڪرڻ ضروري آهي هن چيو ته نقصانن کان دهشتگردي خلاف ويڙهه جو اسان جو عزم پختو آهي. ان ڪري ملڪ مان دهشتگردن جي ختم ٿيڻ تائين جنگ جاري رهندي. مليحه لوڌي مغرب ۾ اسلام فوبيا کي هوا ڏيندڙن تي ڇتي تنقيد ڪندي چيو ته ڄاڻي واڻي نفرت ڦهلائيندڙن جي خلاف ڪارروايون ڇو نٿيون ڪيون وڃن دنيا متفق آهي ته دهشتگردي کي ڪنهن مذهب سان جوڙي نٿو سگهجي.

 

پانامه پيپرز صرف ڪاغذ جو ٽڪرو آهي، عمران خان ڪوڙ جي بنياد تي سموري ڪهاڻي تيار ڪئي آهي: دانيال عزيز

اسلام آباد (اين اين آءِ) مسلم ليگ (ن) جي اڳواڻ دنيال عزيز چيو آهي ته پانامه پيپرز صرف ڪاغذ جو ٽڪرو آهي ۽ عمران خان ڪوڙ جي بنياد تي سموري ڪهاڻي تيار ڪئي آهي اليڪشن ڪميشن کان ٻاهر ميڊيا سان ڳالهائيندي دانيال عزيز چيو ته عمران خان ڪلابازي خان ۽ يوٽرن ڪنگ آهي. ان کي صرف وزيراعظم ٿيڻو آهي پر هو پويان واري دروازي يا آڱرين جو سهارو وٺي وزيراعظم نٿو بڻجي سگهي عمران خان ماڻهن کي نئين پاڪستان جو ڪوڙ هنيو آهي هن چيو ته 35 پنچر جون ڳالهيون ڪوڙيون نڪتيون ڪي پي ڪي ۾ احتساب جو قانون تبديل ڪري ڇڏيو احتساب جي قانون سبب ماڻهو استعيفا ڏني عمران خان ٻڌائي ته ڪي پي ڪي ۾ نيب آزاد ڇو نه آهي مسلم ليگ (ن) جي اڳواڻ چيو ته پانامه پيپرز صرف ڪاغذ جو ٽڪرو آهي آءِ سي آءِ جي پنهنجي ويب سائيٽ تان وزيراعظم جو نالو هٽايو ۽ ان حوالي سان وضاحت به پيش ڪئي عمران خان ڪوڙ جي بنياد تي سڄي ڪهاڻي تيار ڪئي آهي.

 

وزير اعظم وري اليڪشن ڪميشن ۾ ڪوڙ ڳالهايو آهي: عمران خان

اسلام آباد(م ڊ) پي ٽي آءِ سربراهه عمران خان چيو آهي ته وزير اعظم وري اليڪشن ڪميشن ۾ ڪوڙ ڳالهايو آهي. هن ميڊيا سان ڳالهائيندي چيو ته نواز شريف مريم نواز جي مالڪي تائين ئي هٿ کڻي ويو آهي.وزير اعظم نواز شريف 2011ع  تائين ٻڌائيندو آيو ته مريم سندس مالڪي ۾ آهي.  نواز شريف جو ڪوڙ ثابت ڪري ٿو ته کيس گرفتاري جو خوف آهي، خبر هئي ته احتساب کان بچڻ لاءِ غلط حرٻو استعمال ڪيو ويندو. هن وڌيڪ چيو ته خدشو آهي ته نواز شريف سرڪاري رڪارڊ به تبديل ڪرائيندو.

 

عمران جو وزيراعظم ٿيڻ جو طريقو غلط آهي، نواز شريف اسان کي غلام نه سمجھي: اسفند يار

سوات(م ڊ) عوامي نيشنل پارٽي جي سربراهه اسفند يار ولي چيو آهي ته عمران خان وزيراعظم ٿيڻ چاهي ٿو پر سندس طريقو غلط آهي، نواز شريف اسان کي ڀاءُ تسليم ڪري، غلام نه سمجھي. سوات ۾ اي اين پي جي جلسي کي خطاب ڪندي اسفند يار ولي چيو ته عمران خان جو وزير اعظم ٿيڻ جو طريقو غلط آهي. شهر بند ڪرڻ سٺي سياست ناهي، نه ته پشاور کي ٻن ڪلاڪن اندر بند ڪري سگھون ٿا. هن چيو ته پاڙيسري ملڪ هڪٻئي لاءِ اهم هوندا آهن، پاڪستان ۽ افغانستان هڪٻئي لاءِ لازم ۽ ملزوم آهن.  هن چيو ته مردان ۾ لاش کڄي رهيا هئا ته عمران خان ناچ گانن ۾ لڳو پيو هو.