تازيون خبرون

Daily Archives: October 10, 2016

آرمي چيف پاران ايل او سي جي اڳين مورچن جو دورو، آپريشنل تيارين تي اطمينان جو اظهار

راولپنڊي(م.ڊ) چيف آف آرمي اسٽاف جنرل راحيل شريف لائن آف ڪنٽرول جي حاجي پير سيڪٽر تي مورچن جو دورو ڪيو. آءِ ايس پي آر طرفان جاري بيان ۾ چيو ويو آهي ته آرمي چيف جنرل راحيل شريف ايل او سي جي حاجي پير سيڪٽر تي مورچن جو دورو ڪيو جتي ڪور ڪمانڊر ليفٽيننٽ جنرل ظفر اقبال هن جو استقبال ڪيو. ان موقعي تي آرمي چيف ايل او سي جي صورتحال، آپريشنل تيارين ۽ فارميشن جي حوالي سان فارميشن ڪمانڊر بريفنگ ڏني. جنرل راحيل شريف مورچن تي مقرر فوجي اهلڪارن سان به ملاقات ڪئي جئين انهن جو حوصلا وڌائي سگهي. آرمي چيف فوجي جوانن جي حوصلي، عزم ۽ آپريشنل تيارين تي به اطمينان جو اظهار ڪيو.

 

ڪراچي جون رونقون بحال ٿينديون، پوليس کي اختيار اورانگهڻ نه ڏينداسين: وڏو وزير

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو ته هن نشتر پارڪ ۾ مجلس ٻڌي آهي ۽ سج لٿي واري نماز بنوري ٽائون مسجد ۾ ادا ڪئي ته جيئن صوبي ۽ خاص طور شهر ۾ فرقيواريت هم آهنگي ۽ ڀائيچاري  کي وڌيڪ هٿي وٺرائي سگهجي. اها ڳالهه اڄ هن گرومندر جي ويجهو ڇولن جي چاٽ کائيندي ميڊيا جي نمائندن سان ڳالهه ٻولهه ڪندي چئي. ان سان گڏوگڏ ڪابينا جا ميمبر، آئي جي پوليس سنڌ اي ڊي خواجه، ايڊيشنل آئي جي ڪراچي مشتاق مهر، ڪمشنر ڪراچي ۽ ٻيا پڻ شريڪ هئا.  وڏي وزير ڪلفٽن کان مائي ڪولاچي، کهارادر ۾ حسينيه ايرانيه امام بارگاهه جو دورو ڪيو ۽ ان کانپوءِ لياري جي گهٽين کان ٿيندي سولجر بازار ويو جتي هن دڪاندارن سان ملاقات ڪئي ۽ ماڻهن جا مسئلا ٻڌندي انهن کي يقين ڏياريو ته سندن جائز مسئلا حل ڪيا ويندا. وڏي وزير دڪاندارن کي چيو ته هو هتان جي روڊ کي 5 ڏينهن ۾ تعمير ڪرائيندو پر انهيءَ لاءِ اوهان جو تعاون گهربل هوندو ۽ روڊ جي تعمير دوران پنهنجين دڪانن کي بند ڪرڻو پوندو. جنهن تي دڪاندارن پنهنجي خوشي جو اظهار به ڪيو. ان کانپوءِ وڏي وزير جنهن جي جيپ سيد ناصر شاهه هلائي رهيو هو هن ايم اي جناح روڊ ڏانهن رخ ڪيو جتي هن مرڪزي جلوس جي لنگهه جو جائزو وٺندي آئي جي پوليس کي  ضروري هدايتون جاري ڪيون. ان موقعي تي آئي جي پوليس سنڌ اي ڊي خواجه وڏي وزير کي جلوس واري رستي بابت تفصيلي ڄاڻ پڻ ڏني. ان کانپوءِ پلازه مارڪيٽ کان ٿيندي پريڊي پوليس اسٽيشن جي اندر ويو جتي پوليس اسٽيشن جي لاڪ اپ ۾ موجود ماڻهن سان ڳالهه ٻولهه ڪئي ۽ انهن جا مسئلا دريافت ڪيا. ۽ اتي ويٺل هڪ شڪايتي سان پڻ مليو جنهن ٻڌايو ته هن جي موٽر سائيڪل ٻن مهينن کان چوري ٿي وئي آهي جنهن تي وڏي وزير ايس ايڇ او کي هدايت ڪئي ته هن جي موٽر سائيڪل جلد ڳولا ڪري مونکي رپورٽ پيش ڪري. وڏي وزير سيد مراد علي شاهه آئي جي پوليس اي ڊي خواجه کي هدايت ڪئي ته هو پوليس اسٽيشنن ۾ ايس ايڇ اوز جي موجودگي کي يقيني بڻائي. هن چيو ته مونکي شڪايتون مليون آهن ته ايس ايڇ اوز پنهنجن آفيسن ۾ نٿا ويهن. هن چيو ته جيڪڏهن اهي موجود نه هوندا ته پوءِ اهي ماڻهن جي شڪايتون ڪيئن ٻڌندا. هن چيو ته ها پيٽرولنگ به ضروري آهي پر پنهنجن آفيسن کي به وقت ڏيڻ ڏيڻ ضروري آهي. وڏي وزير پوليس اسٽيشن کان نڪرندي نمائش ويو جتي هن سبيل بابت اسٽالن جو دورو ڪيو ۽ هو اوڏانهن پنڌ ڪري نشترپارڪ پهتو. نشتر پارڪ ۾ هن پنهنجي ڪابينا جي ميمبرن سان گڏ علامه طالب جوهري جو خطاب ٻڌو. سيد مراد علي شاهه علامه طالب جوهري جي خطاب جي پڄاڻ کانپوءِ جامعيه بنوري ٽائون گرومندر ويو ۽ اتي ئي سج لٿي جي نماز ادا ڪئي. هن اتي جامعه جي ايڊمنسٽريٽر ڊاڪٽر عبدالرزاق اسڪندر ۽ ٻين سان ملاقات ڪئي. شاگردن نماز کانپوءِ وڏي وزير سان وڏي پاٻوهه سان ڀليڪار چيو. ان موقعي تي هن چيو ته پي پي جي حڪومت هميشه اسلام جي خدمت ڪئي آهي ۽ انهي ڳالهه جو ڪريڊٽ به پي پي کي وڃي ٿو ته هن بنا ڪنهن سماجي ۽ مذهبي تفريق جي ماڻهن کي ڀلي ڇٽي هيٺان گڏ ڪيو. ۽ ان کانپوءِ گرومندر فوڊ اسٽريٽ تي بيهي رهيا ۽ پنهنجي ڪابينا جي ميمبرن، آئي جي پوليس سنڌ ۽ علائقن جي نمائندن سان گڏ ڇولا چاٽ کاڌي ۽ اتي گڏ ٿيندڙ ماڻهن جا مسئلا پڻ ٻڌائون. چاٽ کائڻ کانپوءِ سيد مراد علي شاهه ڊي ايڇ اي فيز فوو ۾ يثرب امام بارگاه جو دورو ڪيو اتي هن امام بارگاه جي انتظاميه سان ملاقات ڪئي ۽ انهن سان سندن مسئلن بابت خيالن جي ڏي وٺ ڪيائون. نمائش تي ميڊيا سان ڳالهائيندي وڏي وزير چيو ته هن جي هدايتن تي پوليس نيپا چورنگي تي هڪ شاگرد جي قتل جي ايف آئي آر داخل ڪئي آهي. پوليس ٻن پوليس اهلڪارن کي گرفتار ڪري انهن سان پڇا ڳاڇا ڪئي پئي وڃي. ۽ هر صورت تي انصاف ڪيو ويندو. هن چيو ته هتي پوليس ماڻهن جي جان ۽ مال جي حفاظت لاءِ هئي، انهن کي اختيارن جي غلط استعمال جي اجازت ڪونهي. وڏي وزير چيو ته نوابشاهه ۽ عزيزآباد مان ملندڙ هٿيار ڪنهن به دهشتگرد ڪاروائي لاءِ استعمال ٿي پئي سگهيو. وڏي وزير خوشي جو اظهار ڪندي چيو ته شهر جون پراڻيون رونقون بحال ٿي رهيون آهن ۽ هتي فرقيواريت هم آهنگي کي هٿي ملي رهي آهي ۽ تفريحي جاين ۾ وڏي انگ ۾ ماڻهو گهمن ٿا. ۽ شهر ۾ پرامن فضا آهي. هن چيو ته اهڙي قسم جو ماحول ٻيهر پيدا ڪرڻ جو ڪريڊٽ ڪراچي جي رهواسين کي وڃي ٿو

 

جنوري 2018 تائين لوڊشيڊنگ جو خاتمو ڪيو ويندو: پاڻي بجلي وزارت

اسلام آباد (اين اين آءِ) پاڻي ۽ بجلي واري وزارت چيو آهي ته ملڪ مان جنوري 2018 تائين بجلي جي لوڊشيڊنگ ختم ٿي ويندي. 2018 جي آخر تائين 4 هزار ميگاواٽ تائين وڌيڪ بجلي ميسر ٿيندي هلندڙ مهيني جي آخر تائين سرپلس ڊيٽ 310 ارب هوندو. 2015 ۾ سٺين پاليسين سبب 93.4 سيڪڙو وصولي ڪئي وئي جنهن سان 51 ارب رپين جو فائدو ٿيو هلندڙ سال جي آخر تائين داسو پراجيڪٽ جو بنياد رکيو ويندو. پاڻي ۽ بجلي واري وزارت جي ذريعن ٻڌايو ته 2013 ۾ ملڪ اندر بجلي جي کوٽ 5500 ميگاواٽ هئي صنعتن ۾ بجلي جي لوڊشيڊنگ جو وقت شهري علائقن ۾ 12 ڪلاڪ ۽ ٻهراڙي ۾ 14 ڪلاڪ هيو سرپلس ڊيٽ ۾ ماهوار 14 کان 15 ارب رپين جي حساب سان واڌ ٿي رهي هئي 2014 ۾ صنعتن کي زيرو لوڊشيڊنگ سميت سخت مانيٽرنگ سان وصولين کي بهتر بنائڻ جا قدم کنيا ويا. بهتر ڪسٽمر سروس فراهم ڪئي وئي. 2015 ۾ بهتر پاليسين سبب 93.4سيڪڙو رڪوري ڪئي وئي جنهن سان 51 ارب رپين جو فائدو ٿيو اهڙي طرح لائين لاسز جيڪو هميشه 19 سيڪڙو کان وڌيڪ رهيو 2015 ۾ 18 سيڪڙو تائين اچي ويو. ذريعن ٻڌايو ته ماضي ۾ اهو تصور هو ته 15 هزار ميگاواٽ کان وڌيڪ ملڪ ۾ بجلي پيدا نه ٿي ڪري سگهجي ان جي برعڪس 2015 ۾ بجلي جي پيداوار 16 هزار 866 ميگاواٽ جڏهن ته 2016 ۾ 17 هزار 340 ميگاواٽ تائين پهچي وئي.

 

پرڏيهي وزير نه هجڻ پاڪستان جي ڪمزوري ۽ مائنس ون جو فارمول پراڻو آهي: خورشيد شاهه

سکر(بيورو) قومي اسيمبلي ۾ مخالف ڌر اڳواڻ سيد خورشيد شاهه جهان خان_باگڙجي روڊ جي تعمير ۾ ناقص مٽيريل استعمال ٿيڻ تي چيف انجنيئر پريم چند کي ٻانهن مان جھلي سخت ڪاوڙ جو اظهار ڪيو. هن چيف انجنيئر جي آڏو وڏا وڏا پٿر کڻي اڇلايا. ان موقعي تي سيد خورشيد شاهه جو چوڻ هو ته روڊ جي تعمير ۾ ايترا وڏا وڏا پٿر؟ ايتري وڏي سائز جا پٿر روڊن کي تباهه ڪري ڇڏيندا آهن. هن چيو ته روڊ جي تعمير ۾ 2 انچ واري پٿر بدران 5 انچ وارو پٿر ڇو پيو استعمال ڪيو وڃي. هن چيو ته آفيسرن جي ڪرپشن جي ڪري سنڌ حڪومت بدنام ٿي رهي آهي. 35 ڪروڙ رپين جو پراجيڪٽ آهي ان کي ائين ته نه ڇڏينداسين. ان موقعي تي چيف انجنيئر هاءِ ويز پريم چند مخالف ڌر اڳواڻ کي ٻانهون ٻڌندو ۽ وضاحتون ڏيندو رهيو. واضح رهي ته چيف انجنيئر پريم چند پاڻ سيد خورشيد شاهه کي روڊ جو معائنو ڪرائڻ لاءِ وٺي آيو هو.  ٻئي طرف قومي اسيمبلي ۾ مخالف ڌر اڳواڻ سيد خورشيد شاهه چيو آهي ته پرڏيهي وزير نه هجڻ پاڪستان جي ڪمزوري آهي، ڀارت پاڪستان ۾ به مداخلت ڪري رهيو آهي، هندستان جي ڪوشش آهي ته پاڪستان کي اڪيلو ڪيو وڃي. سکر ۾ ميڊيا سان ڳالهائيندي سيد خورشيد شاهه چيو ته سارڪ ڪانفرنس ملتوي ٿيڻ وڏي ناڪامي آهي، بلوچستان ۾ جيڪا راند ڪئي پئي وڃي، حڪومت ۽ ادارن کي سوچي سمجھي قدم کڻڻو پوندو. هن چيو ته مائنس ون جو فارمول اڄ جو نه 70 واري ڏهاڪي کان هلندو پيو اچي، عوام فيصلو ڪري ته ڪير مائنس ون آهي؟ خورشيد شاهه وڌيڪ چيو ته سياستدانن جون ملاقاتون ٿينديون رهنديون آهن، اها ڪا نئين ڳالهه ناهي، اسين پارليامينٽ کي بچائڻ گھرون ٿا.

 

اسحاق ڊار کي ڏکڻ ايشيا جي بهترين ناڻي واري وزير جي ايوارڊ سان نوازي ويو، ايوارڊ پاڪستان ۽ قوم جي لاءِ اعزاز آهي: اسحاق ڊار

اسلام آباد/واشنگٽن (اين اين آءِ) آمريڪا ۾ پاڪستان جي سفير جليل عباس جيلاني ناڻي واري وزير اسحاق ڊار لاءِ ڏکڻ ايشيا جي بهترين ناڻي واري وزير جو ايوارڊ وصول ڪيو آهي. . ان موقعي تي ڳالهائيندي پاڪستاني سفير اڀرندڙ معيشتن جي مئناڻي وارو وزير محمد اسحاق ڊار پاڪستان ۾ مصروفيتن سبب آءِ ايم ايف ۽ عالمي بئنڪ جي سالياني اجلاس ۾ شريڪ نه ٿي سگهيو جنهن سبب پاڪستان جي سفير جليل عباس جيلاني ان پاران اهو فخرجوڳو ايوارڊ وصول ڪيوگزين جو شڪريو ادا ڪندي چيو ته مئگزين پاڪستان جي ڪامياب اقتصادي ۽ معاشي پاليسن جو اعتراف ڪيو آهي. هن چيو ته وزيراعظم محمد نواز شريف ي هدايت تي سندس قيادت ۾ پاڪستان جي اقتصادي ٽيم پاڪستان کي خطي جو اهم معاشي طاقتور ملڪ بنائڻ ۾ بهترين ڪردار ادا ڪيو آهي.  ناڻي واري وفاقي وزير اسحاق ڊار چيو آهي ته  بهترين ناڻي واري وزير جو ايوارڊ پاڪستان ۽ قوم جي لاءِ اعزاز آهي، اقتصادي شعبي جي ترقيءَ لاءِ وڌيڪ محنت ڪنداسين. ورلڊ بينڪ ۽ آءِ ايم ايف طرفان بهترين ناڻي واري وزير جو ايوارڊ حاصل ڪرڻ کان پوءِ اسحاق ڊار چيو آهي ته گذريل ٽن سالن جي ڪارڪردگي سان اقتصادي ڏهائين ۾ بهتري آئي آهي. اقتصادي لحاظ سان بهتري ڏانهن روان دوان آهيون ۽ وڌيڪ محنت ڪنداسين. هن وڌيڪ چيو ته ايل او سي تي ڇڪتاڻ تي اي پي سي ۽ گڏيل اجلاس سبب آمريڪا جو دورو رد ڪيو هو.

 

عمران خان تڪڙ بدران 2018ع تائين انتظار ڪري: مولا بخش چانڊيو

حيدرآباد(م.ڊ) سُڌ سماءُ بابت وڏي وزير سيد مراد علي شاهه جي صلاحڪار مولا بخش چانڊيي چيو آهي ته  محرم الحرام دوران دهشتگردي جو خطرو موجود آهي، ان ڪري سيڪيورٽي جا غير معمولي انتظام ڪري ڇڏيا آهن. حيدرآباد ۾ ميڊيا سان ڳالهائيندي مولابخش چانڊيي چيو ته ڪراچي جي علائقي عزيز آباد مان هٿيار هٿ اچڻ کانپوءِ لڳو ته ڪراچي جي حالت بيروت جهڙي آهي. هٿيارن جي وڏي کيپ هٿ اچڻ معمولي ڳالهه ناهي. مولابخش چانڊيي وڌيڪ چيو ته پي ٽي آءِ سربراهه عمران خان کي گھڻي تڪڙ آهي، کيس ائين ن ڪرڻ گھرجي. هن چيو ته عمران خان کي 2018ع تائين انتظار ڪرڻو پوندو.

 

عمران خان رستن تي مٽي اڏائي وزيراعظم جي عهدي تي نه ٿو پهچي سگهي: احسن اقبال

لاهور (اين اين آءِ) وفاقي ترقي منصوبابندي ۽ سڌارن واري وزير احسن اقبال چيو آهي ته عمران خان رستن تي مٽي اڏائي ڪڏهن به وزيراعظم جي عهدي تي نه ٿو پهچي سگهي. اهڙين حالتن ۾ جڏهن ملڪ کي اتحاد جي ضرورت آهي عمران خان ملڪ ۾ انتشار ۽ انارڪي ڏانهن وٺي وڃڻ چاهي ٿو. پاڪ چين اقتصادي راهداري منصوبو ڪاميابي سان جاري آهي ۽ ان جي مڪمل ٿيڻ سان پاڪستان ترقي وارن ملڪن جي صف ۾ شامل ٿي ويندو. هن چيو ته رڪاوٽن باوجود پاڪستان وزيراعظم نواز شريف جي قيادت ۾ ترقي جي راهه تي هلي رهيو آهي ۽ انشاءَ الله اهو ڏينهن پري ناهي جڏهن پاڪستان کي ايشين ٽائيگر ٺاهڻ وارو خواب مڪمل ٿي ويندو. هن چيو ته معيشت جي ترقي لاءِ سمورين پارٽين کي قومي پاليسي بڻائي ان تي عمل پيرا هجڻ جي ضرورت آهي. احسن اقبال چيو ته وزيراعظم بڻجڻ لاءِ عوام جي دلين ۾ جڳهه ٺاهڻي پوندي آهي عمران خان رستن تي مٽي اڏائي حقيقي وزيراعظم نه ٿو بڻجي سگهي.

 

عمران خان جي اسلام آباد بند ڪرڻ واري ايجنڊا ڪامياب نه ٿيندي: راڻا ثناءُ الله

فيصل آباد (اين اين آءِ)پنجاب جي قانون واري وزير راڻا ثناءُ الله چيو آهي ته عمران خان جو اسلام آباد کي بند ڪرڻ واري ايجنڊا ڪنهن به صورت ۾ ڪامياب ٿيڻ نه ڏينداسين، سموري پنجاب ۾ سيڪيورٽي جا هرممڪن قدم کنيا ويا آهن. ميڊيا سان ڳالهائيندي هن چيو ته پاڪستان جي گادي واري شهر اسلام آباد کي بند ڪرڻ پاڪستان کي بند ڪرڻ جي برابر آهي. اهو ڪم ڪنهن به صورت ۾ نه ڪرڻ ڏينداسين. اسلام آباد ۾ ڌرڻي واري ڏينهن لکين ماڻهو ان سان نه پر ان کي روڪڻ لاءِ نڪرندا. سيڪيورٽي کي بهتر بنائڻ لاءِ سموري پنجاب ۾ انتظام ڪيا ويا آهن.

 

ملڪ بند ٿيڻ لاءِ ناهن، ڪنهن کي شهر بند ڪرڻ نه ڏبا: عابد شير علي

فيصل آباد(م.ڊ) پاڻي ۽ بجليءَ واري مُملڪتي وزير عابد شير علي چيو آهي ته ملڪ هَلڻ لاءِ هوندا آهن، بند ٿيڻ لاءِ نه، ڪنهن کي به ڏڦيڙ پکيڙڻ جي اجازت نه ڏينداسين. فيصل آباد ۾ ميڊيا سان ڳالهائيندي مملڪتي وزير عابد شير علي چيو ته محرم الحرام جي حوالي سان سيڪيورٽي انتظام تَسَلي جوڳا آهن، 9 ۽ 10 محرم تي فول پروف سيڪيورٽي هوندي، هن چيو ته فيصل آباد شهر ۾ هاءِ الرٽ آهي، 8 هزار اهلڪار ڊيوٽي ڏئي رهيا آهن.

 

مودي سرڪار جي سرجيڪل اسٽرائيڪ واري دعويٰ ڪوڙي آهي: مايا وتي

دهلي(م.ڊ) ڀارت جي بهوجن سماج پارٽي جي اڳواڻ مايا وتي به مودي سرڪار جي پاڪستان ۾ سرجيڪل اسٽرائيڪ کي ڊرامو قرار ڏئي ڇڏيو آهي، سندس چوڻ آهي ته نريندر مودي سياسي مفادن لاءِ اهو ڊرامو ڪيو. لکنئو ۾ تقريب کي خطاب ڪندي بهوجن سماج پارٽي جي اڳوا۾ مايا وتي چيو ته مودي حڪومت پنهنجون ناڪاميون لڪائڻ لاءِ سرجيڪل اسٽرائيڪس جو ڊرامو پئي ڪري، ان قسم جون ڪارروائيون اڳ به ٿينديون رهيون آهن. مايا وتي وڌيڪ چيوته بي جي پي حڪومت اقليتن سان تعصباڻو سلوڪ ڪري رهي آهي، حيدرآباد ۾ روهت ويمولا جو موت، گجرات ۾ دَلَتن تي تشدد جا واقعا ان جو مثال آهن.