تازيون خبرون

Daily Archives: October 9, 2016

اڳوڻي سونهن راڻي ايشوريا راءِ سال جي بهترين عورت شخصيت جو ايوارڊ ماڻي ورتو

ممبئي (شوبز نيوز) بالي ووڊ فنڪارا ايشوريا راءِ نه صرف اڄ ڪلهه پنهنجي نئين ايندڙ فلم ”اي دل هي مشڪل“ جي ٽريلر رليز ٿيڻ کانپوءِ خبرن جي زينت بڻيل آهي، پر هاڻ هن سال جي بهترين عورت شخصيت جو ايوارڊ به پنهنجي ڪري ورتو آهي. ڀارتي ميڊيا رپورٽن موجب بالي ووڊ فنڪارا ايشوريا راءِ بچن ڊگهي عرصي کان هڪ ڀيرو ٻيهر جڏهن سلور اسڪرين تي آئي آهي، تڏهن کان شاندار اداڪاري پيش ڪري رهي آهي ۽ پنهنجي شاندار ڪارڪردگي سبب فنڪارا هڪ ٻيو قدم وڌائيندي سال جي بهترين عورت شخصيت جو ايوارڊ  به پنهنجي نالي ڪري ورتو آهي، هڪ بزنس ميگزين پاران 19 عورتن کي سال جي بهترين سليبرٽي جو ايوارڊ سان نوازيو آهي، جنهن ۾ اڳوڻي حسن جي راڻي ايشوريا راءِ به شامل آهي.  ايوارڊ کٽڻ تي ايشوريا راءِ جو چوڻ هو ته ايوارڊ حاصل ڪري هوءَ تمام گهڻو خوش آهي، هن ٻين عورتن کي به نصيحت ڪئي ته هو به پاڻ کي پنهنجي پنهنجي شعبي ۾ بهترين بڻائين.

 

ايندڙ فلمن ۾ صرف ڀارتي فنڪارن کي اوليت ڏيندس: فرح خان

نئين دهلي (شوبز نيوز) نئين دهلي ۾ ٿيندڙ هڪ تقريب ۾ ڀارتي هدايتڪارا ۽ ڪوريوگرافر فرح خان پاڪستاني فنڪارن بابت ڳالهائيندي چيو ته اسان وٽ ملڪ ۾ ڪافي ٽيلنٽ آهي ۽ اسان کي خيالن جو اظهار پابندي جي حوالي سان پنهنجن ماڻهن سان ڪم ڪرڻ گهرجي. فرح خان وڌيڪ چيو ته منهنجي خيال ۾ هاڻ جيڪڏهن اهو چيو پيو وڃي ته اسان کي انهن سان گڏجي ڪم نه ڪرڻ گهرجي ته مان اهو چونديس ته اسان جي ملڪ ۾ تمام گهڻو ٽيلينٽ موجود آهي ۽ اسان کي پنهنجي ملڪ جي ماڻهن سان گڏ ڪم ڪرڻ گهرجي. پاڪستاني فنڪارن بابت ڳالهائيندي فرح خان جو چوڻ هو ته انهن وٽ اهڙو ڇا آهي جيڪو اسان وٽ ناهي، منهنجو خيال آهي ته اسان انهن کان بهتر آهيون، تنهن ڪري اسان کي پنهنجن ماڻهن سان گڏجي ڪم ڪنداسين. فرح خان واضح طور تي چيو ته مان پنهنجي ايندڙ فلمن ۾ ملڪ سان تعلق رکندڙ فنڪارن کي ئي ڪاسٽ ڪرڻ کي اوليت ڏيندس. بالي ووڊ ڊائريڪٽر ڪرن جوهر ۽ فنڪار شاهه رخ خان جي حمايت ڪندي فرح خان چيو ته پابندي جو عمل انهن فلمن تي لاڳو نه ٿيڻ گهرجي، جيڪي مڪمل ٿي چڪيون آهن ۽ رليز ٿيڻ واريون آهن.

 

پي ايس ايل،ڪراڙن“ايمرجنگ ڪرڪيٽرن” لاءِ در بند ڪري ڇڏيا

لاهور (اسپورٽس نيوز) پي ايس ايل جي ٻئين ايڊيشن لاءِ ڊرافٽ جو عمل 19 آڪٽوبر تي دبئي ۾ ٿيندو،پي سي بي پاران مختلف ڪيٽيگريز ۾ لاڳو ٿيندڙ قانونن جي وضاحت ڪئي وئي آهي.جنهن ۾ ٻڌايو ويو آهي ته ايمرجنگ ڪيٽيگري ۾ رڳو اهي ئي رانديگر چونڊجي سگهجندا،جن جي عمر 1 جنوري تي 23 سالن کان گهٽ هوندي،ٽيمن جي رينجرز سان تعلق رکندڙن ڪوچ 5،5 نوجوان رانديگرن جا نالا ڊرافٽ لاءِ ڏيندا.

 

چائنا اوپن، ڪونٽااورر اڊونسڪا فائينل ۾ پهچي وئي

بيجنگ (اسپورٽس نيوز) بيجنگ ۾ هلندڙ چائنا اوپن ٽينس ۾ سنگلز جي سيمي فائينل جي مقابلن ۾ برطانيا جي جوهانا ڪونٽا آمريڪا جي ميڊيسن ڪيز کي 7-9، 6-4 ۽ 6-4 تان مات ڏئي فائينل ۾ پهچي وئي. جنهن کانپوءِ ڪونٽا پهرين برطانوي عورت آهي،جيڪا عالمي تاپ ٽين رينڪنگ ۾ 32 سالن کانپوءِ شامل ٿي.

 

رونديون ڏِٺيون مون، اِنَ دَرَ مٿي دادِليون: ڊاڪٽر پروين موسيٰ ميمڻ

چئي چنيسر ڄامَ سين، ليلان! لکاءِ مَ توُن،

ايءُ ڪانڌ ڪنهن جو نه ٿيئي، نه ڪا موُن نه توُن،

رُوُنديون ڏِٺيون مُون، اِن دَرَ مٿي دادِليون. (ليلان چنيسر، 2-18)

مٿيون بيت شاهه صاحب جي سر ليلا چنيسر جي داستان ٻئي ۾ ارڙهون نمبر بيت (رسالو شاهواڻي) آهي. سر ليلا چنيسر ۾ پڻ ڪاموڏ جيان نياز ۽ نوڙت ڌارڻ جو سبق ڏنل آهي، پر هن سُر ۾ خاص طور خطا ٿيڻ ۽ پوءِ جي شدت واري پڇتاءُ بعد مالڪ طرفان مهر جي نظر ٿيڻ جي موضوع کي بيان ڪيو ويو آهي. ليلا چنيسر جو تاريخي واقعو سنڌ جي ڪيترن سگهڙن ۽ شاعرن بيان ڪيو آهي، پر لطيفي بيان جي ڳالهه ئي نرالي آهي. شاهه صاحب جو سڄو ڪلام سڪ ۽ سوز، وندر ۽ ورونهن، سچائي ۽ سخاوت، تصوف ۽ وحدانيت، امن ۽ انسانيت جي اپٽار آهي. سندس شاعري سونهن ۽ سچ جي نشانبر آهي، سو هن واقعي کي به امر حيثيت ڏئي ڇڏي اٿس. انساني محبت ۽ نفسيات جي ڪيفيتن کي هن پنهنجي اعليٰ شاعراڻي شعور سان هڪ ماهر مصور جيان چٽيو آهي. ليلا جا ايلاز ۽ منٿون، چنيسر جو ڏيهان ڏيهه ڏهڪار، عشق ۽ محبت، درد ۽ فراق، رسڻ ۽ پرچڻ، کلڻ ۽ روئڻ جا سڀ منظر پڙهندڙن جي اکين اڳيان واضح ٿي اچي بيهن ٿا. چنيسر سومري جو ليلا سان ايڏو اٿاهه پيار ۽ ايتري چري چاهت جو کيس ڪا خبر ئي نه پئي ته ڇا پيو وهي ۽ واپري ۽ جڏهن ريساڻو راجا سجاڳ ٿو ٿئي، تڏهن ليلا کي ڏهاڳ جو ڏانءُ ڏيندي دير ئي نٿو ڪري.

در حقيقت دنيا جي سمورن فسادن جي جڙ لالچ آهي. اها لالچ ئي آهي جا آدم ۽ بي بي حوا کي ان وڻ جي ويجهو وٺي وئي، جنهن جو کين حڪم هو ته ”لا تقربا هذاه الشجرة“ ”هن وڻ جي ويجها نه وڃجو“ پر دائمي حياتيءَ جي خواهش کانئن اهو ڪم ڪرايو، جو کين هميشه لاءِ پنهنجي رب وٽ اهو نافرمانيءَ جو داغ کڻڻو پيو. اهڙيون خواهشون جن ۾ لالچ سمال هجي، هميشه هيٺانهين درجي تي پهچائينديون آهن، جڏهن ڪا خواهش شدت اختيار ڪري جنون جي حد تائين پهچي وڃي، تڏهن ان جو انجام هميشه ناڪاري ئي ٿيندو آهي. ليلا هارَ تي هرکجي، چنيسر جي چاهت ۾ ايترو ته چري ٿي وئي جو کيس اها خبر ئي ڪانه پيئي ته سندس اها انڌي لالچ ۽ انڌي محبت کانئس ڪانڌ قربان ڪرائيندي- ۽ هيڏي وڏي هاڃي کيس پرزا پرزا ڪري ڇڏيو، هوءَ فقط ليلائيندي رهي. ڏٺو وڃي ته لالچ هميشه خواهش مان جنم وٺندي آهي ۽ خواهش کي قابو رکڻ ۾ وڏو ڪم انسان جو نفس ئي ادا ڪري ٿو. جيڪڏهن هو نفس جي گهوڙي کي قابو رکي ۽ ضرورت ۽ خواهش ۾ فرق کي ڄاڻي ته ڪڏهن به ساڻس اهي هاڃا نه ٿين، جن کانپوءِ پڇتاءُ سندس مقدر ٿو هجي. حضرت علي ڪرم الله وجه جو قول آهي ته ”زندگيءَ کي ضرورت تائين محدود رکو ۽ ضرورت فقيرن جي به پوري ٿيندي آهي ۽ خواهشون بادشاهن جون به رهجي وينديون آهن“ ۽ اهو به فرمايو اٿن ته ”ڪوشش ڪريو ته توهان دنيا ۾ رهو ۽ دنيا توهان ۾ نه رهي، ڇو ته ٻيڙي جڏهن پاڻيءَ تي رهندي آهي ته اها ترندي رهندي آهي ۽ جڏهن پاڻي ٻيڙيءَ ۾ اچي ويندو آهي ته اها ٻڏي ويندي آهي.“

خواهشون رکڻ عيب ڪونهي پر بي جا ۽ غلط خواهشون حياتيءَ جو سڪون وڃائينديون آهن ۽ پوءِ انسان کي بري ۽ ڀلي ۾ تميز نه ٿي رهي ۽ شين جي محبت جڏهن دل ۾ وسي ويندي آهي، تڏهن انهيءَ دل جو مالڪ اتان لڏي ويندو آهي، پوءِ فقط اميدن ۽ لاحاصل خواهشن کي ممڪنات ۾ بدلائڻ جا ڀَوَ هوندا آهن. سو ليلا پڻ لالچ ۽ نفساني خواهش سبب نافرمانيءَ جي مرتڪب ٿي. سچيءَ محبت جو جذبو پاڪ ۽ شفاف آهي، جيئن ڌڻيءَ سڳوري کي پنهنجي محبت ۾ شراڪت جو جذبو پسند ڪونهي، هو سڀ ڪجهه معاف ڪري ٿو، پر شرڪ کي معاف نٿو ڪري، تيئن دنياوي طور پڻ محبت ۾ ٻيائي محبتين وٽ معافيءَ جوڳو عمل نه آهي. سو شاهه صاحب ”پاڻ مَ کڻج پاڻ سين وسيلا وسار“ شرڪ ۽ ٻيائي کان روڪي ٿو، کيس چڱيءَ پر خبر آهي ته ڪانڌ کي وڏائي ۽ ڪبريائي پسند ڪونهي فرمائي ٿو ته،

چنيسر سين چاءُ، متان ڪا مُنڌ ڪري،

ڪانڌِ ڪنهن جو نه وڻي گيرَب ۽ گاءُ،

جي ٿِڙي ٿورڙياءِ ته دوسِ داسِڙو.

سچي محبت بي عيب آهي جا ليلا کي نصيب هئي پر هُن انهيءَ ۾ ٻيائي ڪئي، سو سندس سٽاڻي سردار کي پسند نه پيئي، ڀانيائين ته حيلو ڪريان، هار پائي پاڻ کي وڌيڪ وڻائينديس، پر ان هار ئي کيس هلڪو ڪيو. شاهه لطيف ليلان جي واتان سندس اهو ڏک هن ريت بيان ڪيو آهي، فرمائي ٿو ته،

وڏيري هُياس، چنيسر جي راڄ ۾،

دُهلين دَمامِين، نقُرين ٿي پلپل پُڇياسِ،

هُيس دادِلي دوسنِ جِي، کَڻِي هارَ هَلڪِي ڪَياس،

تِهان پوءِ ٿِياسِ، ڪانِيارِي ڪانڌَ جِي. (ليلان چنيسر، 2-5)

ليلان جي واتان عيبن جا اعتراف آهن ۽ پڇتاءُ جي پيڙا آهي. ڏٺو وڃي ته آزي نيزاري ۽ التجا ٻانهي جو هٿيار هئڻ گهرجي، پاڻ پڌائڻ ۽ سينو ساهڻ شيطاني رستو آهي، جنهن سان ڪئي ڪمائي ڪُٽ ٿي وڃي. ليلا ڪيڏي نه مانائتي هئي؟ هاڻي کيس مڪمل احساس آهي ته اها وڏيرائپ نه سندس ڏات هئي ۽ نه سندس ڏانءُ هو، اها ته فقط دوس داسڙي جي مهرباني هئي، سندس واتان ڀٽ ڌڻي ماضي جا ڏک ٿو سارائي.

الا! ڏاهي مَ ٿيان، ڏاهيُون ڏُک ڏسن،

مون سين مون پرين، ڀورائيءَ ۾ ڀال ڪيا. (ليلان چنيسر، 2-6)

هتي ليلا ڪريم جي ڪيل ڪرمن کي ياد ڪندي اهو مڃي ٿي ته مون خود کي ”عقل ڪُل“ سمجهيو. عام طور ڏاهپ مان مراد عقل ۽ سمجهه جي ورتي ويندي آهي ۽ ڀورائي اهڃاڻ آهي، بي عقليءَ جو پر هن بيت ۾ اها حيرت جهڙي ڳالهه آهي ته ”ڏاهي مَ ٿيان“ يعني ”شل مون کي عقل ئي نه هجي“ اهڙو گفتو شاهه صاحب پنهنجي هن سُورميءَ کان ڪيئن چورايو آهي؟ جڏهن ته عقل ۽ سمجهه ته خدائي نعمت ۽ هڪ وڏو عطيو آهي ۽ اهو اعليٰ عطيو ته پيغمبرن ۽ نيڪن جو ورثو آهي، پوءِ ان کي ڇو نِنديو ويو آهي؟ غور ڪرڻ سان واضح ٿئي ٿو ته هيءُ اهو عقل ۽ ڏاهپ ڪانهي جا پيغمبري سمجهه ۽ ڏاهپ آهي، بلڪه هيءَ ڏاهپ اها آهي، جنهن کانپوءِ انسان خود کي ”عقل ڪل“ ۽ خودمختيار سمجهندو آهي ۽ اتان ئي نفس جي گمراهي شروع ٿي وڃي ٿي ۽ جنهن ليلا کي به چنيسر راجا جي دل تان لاٿو. هتي ”ڀورائيءَ“ مان مراد اها سادگي ۽ نهٺائي آهي، جنهن ۾ بندي جو عاجزيءَ سان محبوب کي مانائتو ڪرڻ ۽ پنهنجي ”خودي“ ۽ ”پاڻ پڻي“ کي ختم ڪرڻ آهي. مطلب ته ڀورائي بي عقلي هوندي به عقل آهي ۽ بي سمجهائي هوندي به سمجهه ۽ ڏاهپ آهي، جنهن ۾ ڪريم جا ڪروڙين ڪرم ٿين ٿا ۽ انهيءَ جي ابتڙ ڏاهپ ئي اهو شيطاني فخر آهي، جيڪو هميشه لاءِ هيٺانهين تي لعنتي ڪرائي پهچائي ٿو ۽ انهيءَ کانپوءِ فقط ۽ فقط پڇتاءُ ۽ آزيون ۽ نيزاريون ٿيون بچن، سي به شل قبول پون. آزين ۽ نيزارين کانپوءِ ليلائڻ ۽ منٿن کانپوءِ به نڌر کي نوازڻ هُن غفار الذنوب جو ڪم آهي، جتي فقط ڪيرت ڪرڻي آهي ۽ رحمت مان مايوس به نه ٿيڻو آهي ”لا تقنطو من رحمت الله“ يعني الله تعاليٰ جي رحمت مان مايوس نه ٿيو. هُن کي، دل جي صفائي گهرجي ۽ هو داسڙو دليون ٿو پرکي ان ڪري.

جي ليلائي نَه لهِين ته پُڻ ليلائج،

آسَر مَ لاهيج، سڄڻ ٻاجهيندڙ گهڻو. (ليلا چنيسر، 2-21)

شاهه صاحب جي هن سڄي سُر ۾ اها تلقين آهي ته لالچ کان بچو، هٺ، فخر ۽ غرور کان پاسو ڪيو. پنهنجي پاڻ کان ٿيل غلطين کي دل سان مڃي پانڌ غريبيءَ گڏائي، معافيءَ جا طالبو ٿيو ۽ سچيءَ دل جي اها معافي جنهن ۾ خوديءَ جو ڪوڙو ڀرم نه هجي، ضرور قبول ٿيندي. سچيءَ محبت جو قدر ڪيو، محبتن جا قدردان ڪڏهن به ڏکيا ڪونه ٿيندا آهن. ليلا تي چنيسر جا وڏا وڙ، وڏا قرب ۽ وڏيون عنايتون ۽ عطائون هيون، پر هڪ معمولي هيري تي هرکجي هيڏي بي بها دل واري ناياب هيري کي هٿان وڃايائين. سو پيار ئي دنيا جي اصل حقيقت آهي، سچي پيار جو قدر ڪرڻ ۽ ان جي پرک ڪرڻ لاءِ صاف ضمير ۽ خالص دل ئي ڪسوٽي آهي. اخلاص، نياز ۽ ٻانهپ جي ٻولي هر هڪ ماڻهوءَ جي دل جيتڻ جو هٿيار آهي ۽ ان سان ئي هن زمين تي محبتون ۽ دلين ۾ وسعتون پيدا ٿينديون رهنديون.

parweenmoosa2018@gmail.com

 

 

دشمن جي ٻارن کي پڙهائڻ وارو عزم ۽ سنڌ حڪومت…: ڊاڪٽر پيار

پٿر جي دور ۾ جڏهن طاقت جو سرچشمو جسماني مضبوط جوڙجڪ ۽ ڏاڍ ڏهڪاءُ توڙي لشڪري افرادي قوت هوندي هئي، تنهن دور ۾ به جيڪو سڀني کان سياڻو، حرفتي ۽ اٽڪلي مڪار هوندو هيو، جيڪو شڪار کي آساني سان ڦاسائي سگهي يا دشمن کي ڀاڙيو ڪري ڀڄائي سگهي، تنهن جي سندس قبيلي ۽ راڄ ڀاڳ ۾ عزت هوندي هئي. وقت گذرندو رهيو، ماڻهن جون گهرجون بدلجنديون رهيون، شين کي ماپڻ جا پيمانا مٽجندا رهيا، علم ۽ ڄاڻ وڌندي رهي، جنهن جي حاصلات سان ماڻهو ترقيءَ جون راهون طئي ڪندو رهيو، وهمن، وسوسن ۽ ٺلهن هٿ ٺوڪين عقيدن جي بدران ماڻهو تجرباتي ۽ سوچيل سمجهيل حقيقت جي ڪافي ويجهو رازن ۽ رمزن کي سمجهڻ لڳو، ماڻهو تقدير تي انڌو اعتبار ڪرڻ بدران پنهنجي مسئلن کي حل ڪرڻ لاءِ تدبيرون ڪرڻ لڳا. پنهنجي قسمت هٿن جي لڪيرن ۾ ڳولهڻ بدران پنهنجي ٻانهن جي ٻل تي پنهنجي قسمت جو پاڻ فيصلو ڪرڻ لڳا. بيمارين ۽ وبائن سان منهن ڏيڻ لاءِ پيرن فقيرن کان دعائن ۽ ٽوڻا ڦيڻا وٺڻ بجاءِ حڪيمن ۽ طبيبن جون ڏسيل، جڙي ٻوٽين مان ٺهيل يوناني دوائون ۽ ليبارٽين مان تصديق ٿيل گورين کي کائڻ لڳا. ماڻهو قدرتي آفتن کان بچڻ لاءِ ڪنهن ازغيبي ڪرشمن ۽ معجزن جو انتظار ڪرڻ بدران پنهنجي مدد پاڻ تحت  علم و هنر جي مدد سان ڪيترين ئي آفتن ۽ بيمارين تي ضابطو آڻي ويا.

علم و هنر جي مدد سان دنيا ۾ وڏا وڏا معاشي اقتصادي ثقافتي ۽ مذهبي انقلاب آندا ويا، جن عالم انسانيت جي زندگي جهنم مان جنت بڻائي ڇڏي. علم و هنر جي اهڙي اهميت ڏسي دنيا جون قومون پنهنجي اندر علمي ماحول پيدا ڪري علم و هنر کي رائج ڪري پنهنجي اندر ڪيترائي وڏا دانا، مفڪر ۽ ڏاها سائنسدان پيدا ڪيا، جيڪي نه صرف پنهنجي پنهنجي ملڪ ۽ قوم لاءِ ڪارائتيون ايجادون ڏئي ويا، پر پوري انسانيت سندن ايجادن مان لاڀ پرائي رهي آهي. دنيا ۾ ترقيءَ جو معيار به ان ڳالهه تي ٻڌل آهي ته ڪهڙي قوم ۽ ڪهڙي ملڪ جا وڌ ۾ وڌ سائنسدان پيدا ٿيا آهن. تنهنڪري هر ملڪ پنهنجي اندر وڌ ۾ وڌ پيسو خرچ ڪري اعليٰ قسم جا تعليمي ادارا ۽ تحقيقي مرڪز قائم ڪري رهيا آهن، شهر شهر توڙي وستي واهڻ، ڳوٺ ڳوٺ ۾ اسڪول، ڪاليجون ۽ يونيورسٽيون کولي جديد تعليم پڙهائي وڃي ٿي. ترقي يافته ملڪن جي ڪاميابيءَ جو واحد سبب سندن معاشري ۾ علم کي عام ڪيو ويو آهي ۽ استاد واري شعبي کي ٻين مڙني شعبن کان مٿي ڀانيو ويو آهي.

بدقسمتي سان اسان جي ملڪ ۾ تعليم واري شعبي سان بي حسي ۽ محرومين وارو سلوڪ ڪيو وڃي ٿو، پنهنجي ملڪ ۾ تعليم کي يتيم ٻار جيان ليکيو وڃي ٿو، جنهن جي ڪنهن کي ڪا پرواهه ناهي هوندي. پنهنجي ملڪ ۾ خيرن سان هر شعبي ۾ ڀينگ لڳي پئي آهي، پر تعليم وارو شعبو ته پنهنجا آخري پساهه پورا ڪري رهيو آهي. جتي ملڪ جي سالياني بجيٽ جو اڌ کان وڌ حصو هٿيار وٺڻ تي خرچ ڪيو وڃي ۽ باقي بچيل پئسو به حڪمرامن جي عياشين تي لڳايو وڃي ته پوءِ اندازو لڳايو ته اهڙي ملڪ جي ترقي جي ڪيتري اميد ڪري سگهجي ٿي. حڪمران ته ڄاڻي واڻي عوام کي ڄٽ ۽ جاهل رکي رهيا آهن ته جيئن ماڻهو جيترا جاهل هوندا، اوتري سندن وڏيرائپ ۽ حاڪميت هلندي رهندي، ڇو ته جاهل تي لٺ ۽ موچڙي سان آسانيءَ سان حڪمراني ڪري سگهجي ٿي، جنهن کي پنهنجو ڪو آئيندو نظر ناهي ايندو، جنهن کي پنهنجي حقن جو پتو ناهي پوندو، تنهن کي خالي خوابن سان خوش ڪري سندن حق غصب ڪري سگهجن ٿا. تنهنڪري هڪ سوچيل سمجهيل سازش تحت ملڪ جو حڪمران طبقو ملڪ جا تعليمي ادارا تباهه ڪري رهيو آهي ته جيئن پيٽ بکيو عوام تعليم حاصل ڪري پنهنجي حقن جي گهرج نه ڪري سگهي.

ملڪ جي ٻين صوبن ۾ ڪنهن نه ڪنهن حد تائين سٺي حڪمراني ذريعي تعليم جو معيار بهتر بڻايو ويو آهي. معياري تعليمي ادارا کولي بهتر تعليمي ماحول ميسر ڪيو ويو آهي. پنجاب ته سنڌ کان ڪافي اڳتي نظر اچي ٿو، جيئن ئي سنڌ جون سرحدون پار ڪري پنجاب ۾ داخل ٿجي ٿو ته پنجاب جي روڊ رستن جو وڇايل ڄار، صفائي سٿرائي توڙي امن و امان ڏسي اچرج ۾ پئجي وڃجي ٿو ته هڪ ئي ملڪ ۾ هوندي هڪڙو صوبو ايترو اڳتي اچي چڪو آهي. پنجاب ته ٺهيو پر خيبرپختونخوا ۾ تحريڪ انصاف جي هڪڙي حڪومت ايندي ڪيڏا نه زبردست پروجيڪٽ شروع ڪري ڇڏيا آهن. اتان جي پوليس کي غير سياسي بڻائي اهل ماڻهن کي ڀرتي ڪيو ويو، راشي پوليس آفيسرن کي صوبي مان نيڪالي ڏئي يا سختي ڪري قانون تي عمل ڪرڻ لاءِ پابند بڻايو ويو آهي، آن لائن ايف آءِ آر جو نظام ڏئي ڄڻ ته غريب عوام لاءِ ناقابل يقين آساني پيدا ڪري ڇڏي آهي. صوبي ۾ ڪمپيوٽرائزڊ نقشا ۽ ڍل وارو نظام بڻائي، تپيدارن جون من مستيون ختم ڪري اٻوجهه عوام کي ساهه کڻڻ جهڙو بڻائي ڇڏيو اٿن. جڏهن ته پاڻ اڃا تائين غار جي دور ۾ رهي رهيا آهيون. سونهاري سنڌ نااهل حڪمرانن، ظالم منصفن، راشي پوليس، گوسڙو ماسترن حوالي ڪئي وئي آهي. سنڌ جي حالت ڏسي انڌير نگري چرٻٽ راجا، ٽڪي سير بصر ٽڪي سير کاڄا واري ڪار لڳي لڳي پئي آهي، جتي نه ڪو قانون نه ڪو آئين رهيو آهي، ظلم ستم جي بازار گرم لڳي پئي آهي، رشوت پنهنجي عروج تي پهتي آهي. چوري چڪاري، اغوا ڦرون ايتريون ته وڌي چڪيون آهن جو ڪو شريف ماڻهو شام جو سج لهڻ کان پوءِ ٻاهر نڪرڻ جي جرئت نه ٿو ڪري سگهي. سڄي ملڪ ۾ جتي دشمن جي ٻارن کي پڙهائڻ لاءِ وچن ڪيا پيا وڃن، اتي سنڌ جي حڪومت پنهنجي عوام جي ٻارن کي ڪيتري تعليم مهيا ڪري رهي آهي. سنڌ جي حالت تي ماتم ڪرڻ لاءِ دل چوي ٿي. اهي حڪمران جن کي عوام ان مقام تي آندو، سي پنهنجي عوام جي ٻارن لاءِ ڪهڙيون سهولتون مهيا ڪيون آهن. جتي ٿر ۾ ان غريب عوام جا ٻار کاڌ خوراڪ نه ملڻ جي ڪري بک ۾ پاهه ٿي بي يارو مددگار مري رهيا آهن، اتي پاڻ وارا حڪمران کل جوڳا بيان ڏئي سچ ته پنهنجي جهالت کي نروار ڪن ٿا، اهي پاڻ عيش  عشرت واري زندگي گهاريندي لينڊ ڪروز ۽ بلٽ پروف گاڏين ۾ ويهي اسيمبلين تائين پهچڻ وارا لنگهڻ ڪاٽي رهيا آهن،

ٿر جا ٻار مرڻ جهڙن واقعن تي رت جا ڳوڙها روئڻ بدران، انهن جي صدمي ۾ پنهنجي نا اهلي تسليم ڪرڻ بجاءِ حڪمران وڏي فخر واري انداز ۾ بيان ڏيڻ لڳا ته هو عوام سان مخلص ۽ غريب ماڻهن جا هڏڏوکي آهن، پر اهي سڀ بيان دوکي ۽ دولاب کانسواءِ ڪجهه به ناهن. جڏهن دنيا پنهنجي عوام جي فلاح و بهبود لاءِ پنهنجي ايندڙ نسل کي تعليم ۾ ماهر ۽ قابل ڪري رهي آهي، اتي اسان جا حڪمران اسان جا اسڪول مينهن جا واڙا ۽ وڏيرن جون اوطاقون ڪري هلائي رهيا آهن، تن مان سندن نيتون ظاهر ٿين ٿيون ته اهي ماروئڙن جا ڪيتري قدر هڏڏوکي ۽ مددگار آهن. ياد رکو ته وقت ساڳيو ناهي رهندو، ڊڄو ان ڏينهن کان، جڏهن توهان جا ڀاري برج لڏن ۽ اهي ڪوٽ ڪفر جون ديوارون ڊهي پٽ پون. هن سنڌي قوم جيڪي لقب توهان کي ڏنا آهن، اهي کسي به سگهي ٿي ۽ توهان تاريخ جي ڪٽهڙي ۾ مجرم بڻجي سگهو ٿا.

 

 

سنڌ ۾ اينٽي ڪرپشن قانون مٽائڻ جو اعلان

ميڊيا سان ڳالهائيندي وڏي وزير سيد مراد علي شاهه چيو ته عزيز آباد مان سياسي پارٽي جي هيڊ ڪوارٽر ڀرسان هٿيار هٿ آيا آهن. عزيز آباد مان هٿيار هٿ اچڻ جي جاچ جاري آهي، پر هٿيار ملڻ جو شڪ هڪ سياسي پاٽي ڏانهن آهي. اسين ڪرپشن جي خلاف آهيون، نيب پنهنجو ڪم جاري رکي. اينٽي ڪرپشن کاتي کي به سڌاري رهيا آهيون ۽ اينٽي ڪرپشن تي نئون قانون به لاڳو ڪندا سين .عزيز آباد مان هٿيار هٿ ٿيڻ واري معامعلي جي جاچ لاءِ سنڌ ۾ اينٽي ڪرپشن قانون مٽائڻ جو اعلان ڪندي سندس چوڻ هو ته نيب جو ڪنهن به هڪ پارٽي جي پويان پوڻ ۽ ٻين سڀني سالن پراڻن وڏن ڪيسن کي ڇڏي ڏيڻ ٺيڪ ناهي. سرڪاري پڌرائي موجب سنڌ جي وڏي وزير سيد مراد علي شاهه چيو آهي ته جنهن گهر مان وڏي انگ ۾ هٿيار مليا آهن اهو هڪ سياسي جماعت جي هيڊڪوارٽر جي ويجهو آهي جنهن سبب ڪيترائي سوال اٿيا. عزيزآباد ۾ هڪ گهر مان وڏي انگ ۾ اسلحي جي حاصلات بابت تفصيلي جانچ پڙتال ڪرڻ جو حڪم ڏنو آهي. هي گهر هڪ جماعت جي هيڊڪوارٽر جي ويجهو آهي تنهنڪري ماڻهو انهن هٿيارن بابت سوال ڪري رهيا آهن ته ايڏي وڏي انگ ۾ اتي هٿيار ڪيئن پهتا. جانچ مڪمل ٿيڻ کانپوءِ سڀئي ڳالهيون واضح ٿي وينديون. نيب بابت هڪ سوال جي جواب ۾ هن چيو ته هن کي وڏي حيرانگي ٿي ته نيب ميگا اسڪينڊل جي جانچ ڇڏي ڪري سنڌ ۾ وچ هنٽ شروع ڪري ڇڏيو آهي ۽ مون کي ڪابه ان ڳالهه تي ڪابه ڳڻتي ڪانهي ته نيب ڇا پيو ڪري. آئون پنهنجي ڪم ۽ سنڌ جي عوام جي خدمت ڪرڻ ۾ ئي گهڻو رڌل آهيان. سنڌ حڪومت اينٽي ڪرپشن اسٽيبلشمينٽ بابت قانون ۾ ترميم ڪري وڌيڪ مؤثر بڻائي پئي ته جيئن هي ادارو وڏي وڏي جانچ پڙتال به ڪري سگهي. سنڌ صوبي ۾ ڪرپشن جي حوالي سان پيدا ٿيندڙ تاثر بابت وڏي وزير چيو ته اهو گهڻو پراڻو مسئلو آهي. آئون صوبي ۾ گڊ گورننس جي قيام لاءِ ڏينهن رات جاکوڙي رهيو آهيان. هڪ ڀيرو جڏهن گڊ گورننس بهتر ٿي وئي ته بدعنواني ۽ ڪرپشن پاڻمرادو ختم ٿي ويندي. مون اڄ تعليم کاتي بابت به هڪ اجلاس ڪوٺايو هيو. ڪن ماڻهن جو چوڻ هيو ته 6 ملين ٻار اسڪولن کان ٻاهر آهن ۽ ڪن جو وري خيال هيو ته اسڪولن مان ٻاهر ٻارن جو تعداد 3 ملين آهي. جيڪڏهن فقط 3 ٻار به اسڪول کان ٻاهر آهن ته اها ڳالهه منهنجي لاءِ ڳڻتي جو سبب آهي ۽ منهنجي ذميواري آهي ته آئون انهن کي اسڪول اماڻيان. تعليمي ماهرن جي مشورن سان صوبي ۾ ايجوڪيشن پاليسي آڻڻ گهران ٿو جنهن تحت سموري صوبي ۾ مفت معياري تعليم حاصل ٿي سگهي پر انهي هدف کي حاصل ڪرڻ لاءِ سڀني کي منهنجو هٿ ونڊرائڻو پوندو. ساڳئي ريت صحت لاءِ پاليسي به جوڙي پئي وڃي جنهن جو مقصد سڀني لاءِ مفت طبي خدمتون فراهم ڪرڻ آهي. منهنجي حڪومت جو ڪوبه منجهيل ايجنڊا ڪونهي پر منهنجون ترجيحات گهڻو ساديون آهن ته تعليم جي معيار ۽ صحت جي خدمتن کي به بهتر بڻايو وڃي ۽ هڪ سٺي حڪومت قائم ڪئي وڃي. هر ڪوئي ان سان تعاون ڪري رهيو آهي انهيءَ ڪري هو پنهنجي ڄاڻايل هدف کي حاصل ڪري وٺندو. هڪ سوال جي جواب ۾ چيو ته هن کي رپورٽ ملي آهي ته سول اسپتال لاڙڪاڻي ۾ ڊائليسز کانپوءِ ڪجهه مريضن ۾ ايڊز انفڪيشن ٿيو آهي. مريضن جو چوڻ آهي ته ڊائلاسيز مشينن ۾ ايڊز  وائرس هو. آئون پهريان ئي سيڪريٽري صحت کي انهي بابت تحقيقات ڪري رپورٽ پيش ڪرڻ جي هدايت ڪئي آهي.